Familji b’Saħħithom Spiritwalment—Kif?
1 Il-familji Kristjani huma mfaħħrin għax “jipprattikaw id-devozzjoni lejn Alla f’darhom stess.” (1 Tim. 5:4, NW) Madankollu, peress li madwarna hawn ħafna influwenzi ħżiena li jistgħu jdgħajfulna l-fidi, huwa vitali li l-familji jaħdmu iebes biex jibqgħu b’saħħithom spiritwalment. Kif jistaʼ jitwettaq dan?
2 Uri l-Istat taʼ Kap bħal Kristu: Il-kapijiet tal-familja għandhom bżonn jimitaw lil Ġesù Kristu fil-mod kif jerfgħu r-responsabbiltà biex isaħħu lil dawk taʼ darhom. Ġesù mhux biss wera l-imħabba tiegħu darba permezz tas-sagrifiċċju tal-mewt tiegħu, iżda hu ‘jmantni u jieħu ħsieb’ lill-kongregazzjoni kontinwament. (Efes. 5:25-29) Ġenituri kollhom imħabba jsegwu dan l-eżempju t’affezzjoni tenera billi jum wara l-ieħor jieħdu ħsieb il-bżonnijiet spiritwali tal-familji tagħhom. Dan jinkludi li jagħmlu studju tal-Bibbja bħala familja kull ġimgħa, li jkollhom diskussjonijiet spiritwali sinifikanti kulmeta jkun possibbli, u li jieħdu ħsieb il-problemi meta dawn jinqalgħu.—Dt. 6:6, 7.
3 Fil-Ministeru taʼ l-Għalqa: Il-membri kollha tal-familja għandhom jifhmu li l-għoti taʼ xiehda lil oħrajn dwar Jehovah u l-iskopijiet tiegħu huwa parti importanti mill-qima tagħhom. (Is. 43:10-12) Jekk intom bħala ġenituri tridu li wliedkom ikunu Xhieda leali taʼ Jehovah, għandkom tibdew tħejjulhom qalbhom għall-ministeru minn meta jkunu għadhom żgħar ħafna. Iddiskutu magħhom ir-raġunijiet għala hemm bżonn li juru spirtu taʼ sagrifiċċju fis-servizz u għala għandhom jieħdu sehem fih kull ġimgħa. (Mt. 22:37-39) Imbagħad agħmlu arranġamenti magħhom biex jieħdu sehem regulari magħkom fil-ministeru taʼ l-għalqa.
4 Żviluppaw l-apprezzament għax-xogħol taʼ l-ippridkar billi twarrbu l-ħin matul l-istudju tal-familja kull ġimgħa biex tippreparaw u tipprattikaw preżentazzjoni effettiva minn qabel. Lil uliedkom agħtuhom taħriġ individwali fil-ministeru, filwaqt li tgħinuhom jagħmlu progress skond l-età u l-kapaċità tagħhom. Wara li tkunu qattajtu l-ħin flimkien fil-ministeru, iddiskutu kif huma raw it-tjubija taʼ Jehovah b’għajnejhom stess. Irrakkontawlhom esperjenzi li jsaħħu l-fidi. Iktar ma l-familji ‘jduqu kemm hu tajjeb il-Mulej,’ iktar se jsiru qrib taʼ Jehovah, li se jsaħħaħhom biex jirreżistu “kull ħażen.”—1 Pt. 2:1-3.
5 Fil-Laqgħat: Kemm hi xi ħaġa sabiħa meta l-membri tal-familja jgħinu lil xulxin biex jattendu l-laqgħat kollha tal-kongregazzjoni, speċjalment jekk xi ħadd minnhom iħossu mtaqqal, skuraġġit, jew għajjien! “Missieri jkun għajjien meta jiġi d-dar mix-xogħol,” osservat oħt żagħżugħa. “Iżda jien naqsam miegħu punt tajjeb li se jiġi diskuss fil-laqgħa dak in-nhar, u dan jinkuraġġih biex jiġi. Imbagħad meta nħossni għajjiena jien, jinkuraġġini hu biex niġi.”—Lhud 10:24, 25.
6 Jagħmlu l-Affarijiet Flimkien: Il-familji għandhom jagħmlu l-affarijiet flimkien, bħal per eżempju li jgħinu fix-xogħol tad-dar. Ukoll għandu jitwarrab il-ħin għal rikreazzjoni magħżula bil-għaqal. Il-fatt li tmorru xi piknik, mixja fil-kampanja, tilagħbu xi logħba, u tivvjaġġaw biex iżżuru lil xi qraba jew ħbieb jistaʼ jipprovdilkom mumenti taʼ ferħ u memorji għeżież lejn xiex tħarsu lura.—Koħ. 3:4.
7 Familji Kristjani sodi jegħlbu l-isfidi taʼ kuljum li jheddu l-ispiritwalità tagħhom. Billi jersqu dejjem eqreb lejn Jehovah, huma jesperjenzaw il-qawwa li hu jagħti.—Efes. 6:10.