X’Inhi l-​Prijorità Tiegħek?

¹ Ħafna organizzazzjonijiet reliġjużi jagħtu ħafna importanza lix-​xogħol karitattiv, bħal per eżempju li jipprovdu faċilitajiet għall-​edukazzjoni sekulari jew bżonnijiet medikali. Madankollu, filwaqt li ma jinsewx ‘jagħmlu l-​ġid lill-​oħrajn u jaqsmu dak li għandhom’ maʼ ħaddieħor, ix-​Xhieda taʼ Jehovah jagħtu prijorità lill-​għajnuna spiritwali li jagħtu lin-​nies.—Lhud 13:16.

² L-​Eżempju taʼ l-​Ewwel Seklu: Matul il-​ministeru tiegħu fuq l-​art, Ġesù għamel ħafna xogħlijiet tajbin, iżda x-​xogħol primarju tiegħu kien li jixhed għall-​verità. (Lq. 4:43; Ġw. 18:37; Atti 10:38) Hu kkmanda lid-​dixxipli tiegħu biex ‘imorru, mela, u jagħmlu dixxipli mill-​ġnus kollha, u jgħallmuhom.’ (Mt. 28:​19, 20) Hu indika wkoll li dawk li kienu se jeżerċitaw fidi fih kellhom jagħmlu dan ix-​xogħol li beda hu fuq skala akbar. (Ġw. 14:12) Ġesù ta prijorità lix-​xogħol tax-​xandir minħabba li dan jgħin lin-​nies jitgħallmu l-​mod kif jaslu għas-​salvazzjoni.—Ġw. 17:3.

³ L-​appostlu Pawlu qies l-​attività tiegħu taʼ l-​ippridkar bħala ‘obbligu,’ ħtieġa li ma setax jinjoraha. (1 Kor. 9:​16, 17) Kien dispost li jagħmel kwalunkwe tip taʼ sagrifiċċju, jissaporti provi, jew isofri kull tip taʼ tbatija li kien hemm bżonn sabiex iwettaq il-​ministeru tiegħu. (Atti 20:​22-24) L-​appostlu Pietru u sħabu wrew l-​istess tip taʼ spirtu. Anki meta ġew arrestati u msawtin, “kienu jgħallmu u jxandru bla waqfien li Ġesù hu l-​Messija.”—Atti 5:​40-42.

⁴ Xi ngħidu għalina? Nagħtu prijorità lix-​xogħol taʼ l-​ipproklamar taʼ l-​aħbar tajba tas-​Saltna u taʼ li nagħmlu dixxipli? Aħna, bħal Ġesù, nuru tħassib veru lejn dawk li huma “mdejjqa u mitluqa bħal nagħaġ bla ragħaj”? (Mt. 9:36) Il-​ġrajjiet kurrenti fid-​dinja u l-​profeziji tal-​Bibbja juru b’mod ċar li din is-​sistema ħażina dalwaqt se tintemm! Jekk inżommu ċar f’moħħna l-​importanza tax-​xogħol taʼ l-​ippridkar, se niġu motivati biex inkomplu nxandru b’mod żeluż.

⁵ Qis iċ-​Ċirkustanzi Tiegħek: Ladarba taʼ spiss iċ-​ċirkustanzi persunali jinbidlu, tkun ħaġa tajba li minn żmien għal ieħor naraw jekk nistgħux nagħmlu xi aġġustamenti sabiex nieħdu sehem iktar bis-​sħiħ fix-​xogħol tax-​xandir. Waħda oħt kienet taqdi bħala pijuniera regulari fis-​snin 50, 60, u 70, iżda mbagħad, minħabba li saħħitha ma kinitx tajba, rat li kien hemm bżonn li tieqaf. Madankollu, maż-​żmien, saħħitha marret għall-​aħjar. Reċentement, qieset iċ-​ċirkustanzi tagħha mill-​ġdid u waslet għall-​konklużjoni li setgħet terġaʼ taqdi bħala pijuniera. Kemm kienet ferħana li setgħet tattendi l-​Iskola tas-​Servizz taʼ Pijunier fl-​età taʼ 90 sena! Xi ngħidu dwarek? Wasalt biex tirtira jew tispiċċa mill-​iskola? Meta ċ-​ċirkustanzi tiegħek jinbidlu, taħseb li tkun tistaʼ tagħmel ix-​xogħol taʼ pijunier?

⁶ Meta Ġesù osserva li Marta “kienet moħħha fuq il-​ħafna xogħol tad-​dar,” hu bil-​ħlewwa ssuġġerielha li jekk iżżomm l-​affarijiet sempliċi tkun tistaʼ taħsad barkiet akbar. (Lq. 10:​40-42) Tistaʼ tissimplifika ħajtek? Hemm tassew bżonn li kemm ir-​raġel kif ukoll il-​mara jkollhom xogħol sekulari? Jekk isiru xi aġġustamenti, tistaʼ l-​familja tgħix b’paga waħda? Ħafna nies ibbenefikaw spiritwalment billi għamlu aġġustamenti sabiex ikunu jistgħu joħorġu iktar fil-​ministeru.

⁷ Jalla lkoll kemm aħna nsegwu l-​eżempju li taw Ġesù u l-​appostli! Nistgħu nkunu ċerti mill-​barka taʼ Jehovah fuq l-​isforzi ġenwini tagħna sabiex ikollna sehem sħiħ fix-​xogħol vitali taʼ li nippridkaw l-​aħbar tajba tas-​Saltna.—Lq. 9:​57-62.