Ippersisti fl-Ippridkar
1 Aħna ninsabu fi żminijiet kritiċi. Taqbid ċivili, gwerer etniċi, diżastri naturali, u ġrajjiet oħra tal-biżaʼ saru xi ħaġa komuni. Issa iktar minn qatt qabel, il-familja umana għandha bżonn aħbar tajba. Madankollu, l-apatija lejn l-affarijiet spiritwali hija mifruxa. F’xi postijiet, jistaʼ jkun diffiċli li nsibu nies id-dar u iktar diffiċli biex insibu nies li se jisimgħuna jew li jkunu jridu studju tal-Bibbja. Minkejja dan, huwa vitali li nippersistu fl-ippridkar taʼ l-aħbar tajba tas-Saltna stabbilita minn Alla.—Mt. 24:14.
2 L-Imħabba għan-Nies: Lippridkar tagħna jiġbed l-attenzjoni lejn l-imħabba li Ġeħova għandu għan-nies. “Ma jixtieqx li xi ħadd jinqered imma jixtieq li kulħadd jasal għall-indiema.” (2 Pt. 3:9; Eżek. 33:11) Għalhekk, hu ħareġ digriet li, bħalma qal Ġesù, “l-ewwel trid tiġi pridkata l-aħbar tajba fil-ġnus kollha.” (Mk. 13:10) Alla jsejjaħ lin-nies biex iduru lejh u jaħarbu mill-ġudizzju li ġej fuq id-dinja taʼ Satana. (Ġoel 2:28, 29, 32; Sof. 2:2, 3) M’aħniex grati li Ġeħova estenda din l-opportunità għalina?—1 Tim. 1:12, 13.
3 Ir-rapport taʼ madwar id-dinja juri li matul is-sena taʼ servizz 2004, medja taʼ 6,085,387 studju tal-Bibbja kienu kondotti kull xahar, u medja taʼ madwar 5,000 dixxiplu ġdid ġew mgħammdin kull ġimgħa! Xi wħud minn dawn li għadhom kif tgħammdu nstabu permezz tal-barka li Ġeħova tefaʼ fuq l-isforzi persistenti tal-pubblikaturi li għamlu ħilithom biex jitkellmu maʼ kulħadd fit-territorji assenjati tagħhom. Kemm ipproduċa ferħ dan fil-kongregazzjonijiet, u xi privileġġ huwa li tkun ħaddiem sħab m’Alla f’dan ix-xogħol li jsalva l-ħajjiet!—1 Kor. 3:5, 6, 9.
4 Infaħħru l-Isem t’Alla: Aħna nippersistu fl-ippridkar biex b’hekk inkunu nistgħu nfaħħru lil Ġeħova pubblikament u biex inqaddsu ismu quddiem il-bnedmin kollha. (Ebr. 13:15) Satana qarraq “bl-art abitata kollha” billi ġagħalhom jemmnu li Alla m’għandux il-qawwa biex isolvi l-problemi taʼ l-umanità, li ma jimpurtahx mis-sofferenzi tal-bniedem, jew li sempliċement ma jeżistix. (Riv. 12:9) Bl-ippridkar tagħna, aħna niddefendu l-verità dwar Missierna tas-sema li hu tant meraviljuż. Jalla nibqgħu nfaħħru lil ismu—issa u għal dejjem.—Salm 145:1, 2.