Kapitlu 47
Id-Dmugħ Jinbidel f’Ferħ Kbir
META Ġajru jara l-mara bin-nixxiegħa tad-demm imfejqa, il-fiduċja tiegħu fil-qawwiet mirakolużi taʼ Ġesù żgur li tiżdied. Iktar kmieni dak in-nhar, Ġesù kien ġie mitlub minn Ġajru biex jiġi u jgħin lill-maħbuba bintu taʼ 12-il sena, li waslet biex tmut. Issa, madankollu, dak li Ġajru qed jibżaʼ li jiġri jseħħ. Waqt li Ġesù għadu jitkellem mal-mara, jiġu xi rġiel u bil-kwiet igħidu lil Ġajru: “Bintek mietet! Għala tibqaʼ ddejjaq lill-għalliem?”
Kif teqirdu din l-aħbar! Aħseb ftit: Dan ir-raġel, li hu rrispettat ferm fil-komunità, ma jafx issa fejn se jagħti rasu malli jismaʼ li bintu mietet. Ġesù, madankollu, jismaʼ l-konversazzjoni. Mela, waqt li jdur fuq Ġajru hu jgħidlu b’inkuraġġiment: “Tibżaʼ xejn, biss eżerċita fidi.”
Ġesù jakkumpanja lir-raġel imnikket ferm lejn daru. Malli jaslu, isibu għagħa kbir taʼ biki u lfieq. Inġabret folla taʼ nies, u lkoll qed isawtu lilhom infushom bin-niket. Meta Ġesù jidħol ġewwa, jistaqsi: “Għala qegħdin tagħmlu dan l-istorbju u tibku? It-tifla ċkejkna ma mitetx, imma hija rieqda.”
Malli jisimgħu dan, in-nies jibdew jiddieħqu b’Ġesù u jżebilħuh għaliex jafu li t-tifla tassew mietet. Ġesù, madankollu, jgħid li hi biss rieqda. Billi juża l-qawwiet tiegħu mogħtijin minn Alla, hu se juri li n-nies jistgħu jinġiebu lura mill-mewt daqskemm hu faċli li tqajjem lil xi ħadd minn raqda fonda.
Issa Ġesù jara li kulħadd jintbagħat ’il barra ħlief Pietru, Ġakbu, Ġwanni, u omm u missier it-tifla mejta. Imbagħad jieħu lil dawn il-ħamsa miegħu fejn hi mimduda t-tifla. Waqt li jaqbadha minn idha, Ġesù igħid: “Talʹi·tha cuʹmi,” li, meta tiġi tradotta, tfisser: “Tfajla, jien ingħidlek, Qum!” U immedjatament it-tifla tqum u tibda timxi! Id-dehra kważi ġġenninhom bil-ferħ lill-ġenituri tagħha.
Wara li jgħidilhom biex jagħtuha xi ħaġa x’tiekol lit-tifla, Ġesù jordna lil Ġajru u lil martu biex ma jgħidu lil ħadd x’ġara. Imma minkejja dak li jgħid Ġesù, id-diskors dwar dan jinxtered mar-reġjun kollu. Dan hu t-tieni rxoxt li jwettaq Ġesù. Mattew 9:18-26; Mark 5:35-43; Luqa 8:41-56.
▪ Liema aħbar jirċievi Ġajru, u Ġesù kif jinkuraġġih?
▪ X’inhi s-sitwazzjoni meta jaslu fid-dar taʼ Ġajru?
▪ Ġesù għala jgħid li t-tifla mejta hi biss rieqda?
▪ Min huma l-ħamsa maʼ Ġesù li jixhdu l-irxoxt?