Mistoqsijiet mill-​Qarrejja

Ladarba l-​Leviti ma kellhomx wirt f’Iżrael tal-​qedem, kif setaʼ Ħanamel il-​Levita jbigħ għalqa lil Ġeremija, kuġinuh il-​Levita, kif inhu dokumentat f’Ġeremija 32:7?

Rigward il-​Leviti, Jehovah qal lil Aron: “Int ma jkollok ebda wirt f’arthom u ma jkollok ebda sehem minnha f’[nofs Iżrael].” (Numri 18:20) Minkejja dan, il-​Leviti ngħataw 48 belt flimkien maʼ mergħat għall-​imrieħel tagħhom, imxerrdin maʼ l-​Art Imwiegħda. Ġeremija twieled fil-​belt t’Għanatot, waħda mill-​bliet assenjati lill-​qassisin, “ulied Aron.”—Ġożwè 21:13-19; Numri 35:1-8; 1 Kronaki 6:39, 45 (6:54, 60, NW).

F’Levitiku 25:32-34, naraw li Jehovah ta istruzzjonijiet speċifiċi rigward “id-​dritt tal-​fidwa” tal-​proprjetà tal-​Leviti. Mid-​dehra, familji Leviti individwali kien ikollhom drittijiet tal-​wirt rigward il-​pussess, l-​użu, u l-​bejgħ taʼ xi sehem speċifiku. Dawn naturalment kienu jinkludu l-​bejgħ u x-​xiri lura taʼ proprjetà.a F’ħafna aspetti, il-​Leviti kellhom proprjetà u użawha bħalma kienu jużawha tribujiet oħra Iżraelin.

X’aktarx li l-​proprjetà tal-​Leviti kienet tgħaddi għand xi ħaddieħor permezz taʼ wirt fil-​familja. Madankollu, rigward “id-​dritt tal-​fidwa” l-​Leviti setgħu biss jinnegozjaw bejniethom. Mid-​dehra, il-​bejgħ u x-​xiri lura taʼ l-​art kienu japplikaw biss għall-​proprjetà fil-​bliet, ladarba “r-​rabaʼ taʼ madwar il-​bliet tagħhom” ma kellux jinbiegħ għax kien “propjetà tagħhom għal dejjem.”—Levitiku 25:32, 34.

Għalhekk, l-​għalqa li xtara Ġeremija mingħand Ħanamel mid-​dehra kienet minn dan it-​tip li setaʼ jgħaddi għand ħaddieħor billi jiġi mifdi. Forsi kien jinsab ’il ġewwa mis-​sisien tal-​belt. Jehovah innifsu kkonferma li “l-​għalqa” li qed nitkellmu dwarha kienet taʼ Ħanamel u li Ġeremija kellu ‘d-​dritt li jifdiha.’ (Ġeremija 32:6, 7) Jehovah uża din il-​biċċa negozju simbolikament sabiex isaħħaħ il-​wegħda tiegħu li l-​Iżraelin kienu se jirritornaw u jerġgħu jieħdu l-​wirt tagħhom taʼ l-​art wara perijodu t’eżilju f’Babilonja.—Ġeremija 32:13-15.

M’hemmx indikazzjoni li Ħanamel ġie f’pussess tal-​proprjetà f’Għanatot b’metodi mhux xierqa. M’hemm xejn li jissuġġerixxi li hu kiser il-​liġi taʼ Jehovah meta stieden lil Ġeremija biex jixtri din l-​għalqa f’Għanatot jew li Ġeremija uża ħażin id-​dritt tal-​fidwa meta xtara l-​għalqa.—Ġeremija 32:8-15.

[Nota taʼ taħt]