Mingħand il-​Qarrejja

Nuqqas taʼ Sigurtà? Qrajt artiklu tassew sabiħ intitolat “In-​Nisa Kellhom Sehem Kbir.” (8 taʼ Lulju, 1999) Bqajt daqsxejn skantat meta rajt li l-​ħaddiema nisa involuti fil-​bini ma kienu lebsin l-​ebda għamla taʼ protezzjoni għall-​għajnejn.

R. L., Stati Uniti

Il-​qarrejja tagħna jistgħu jserrħu moħħhom li dawn il-​ħaddiema volontieri kienu lebsin apparat protettiv għall-​għajnejn fil-​ħin li kienu attwalment qed jagħmlu xogħolhom. Huma ġew mitluba biex jippożaw għal dawn ir-​ritratti​—mingħajr l-​apparat għall-​għajnejn​—sabiex l-​uċuħ ferrieħa tagħhom ikunu jistgħu jidhru aħjar.—ED.

Iċ-​Ċelibat Ma naqbilx mal-​parti fil-​“Ħarsa lejn id-​Dinja” li kellha t-​titlu “Iċ-​Ċelibat—Għala?” (8 t’Ottubru, 1999) Intom qed tgħidu li l-​argument tal-​Knisja “m’huwiex ibbażat fuq l-​Iskrittura.” Meta naqra Mattew 19:10-12 u l-​1 Korintin 7:8, 26, 27, ikolli nikkonkludi li hemm bażi għaċ-​ċelibat.

M. T., Stati Uniti

Huwa veru li l-​Bibbja tirrikkmanda li tkun xi ħaġa tajba għal xi wħud li jibqgħu waħedhom. Madankollu, il-​Bibbja ma titlobx li l-​ministri Kristjani ma jiżżewġux. L-​appostlu Pietru u rġiel responsabbli oħra fil-​kongregazzjoni Kristjana bikrija kienu rġiel miżżewġa. (1 Korintin 9:5; 1 Timotju 3:2) Għaldaqstant, iċ-​ċelibat taʼ bilfors m’għandux bażi fl-​Iskrittura.—ED.

Id-​Drogi Grazzi talli ppubblikajtu s-​serje “Qegħdin id-​Drogi Jieħdu d-​Dinja taħt Idejhom?” (8 taʼ Novembru, 1999) Jien kont nieħu d-​drogi—kokaina, marijuana, u ħaxixa. Kont nabbuża wkoll mix-​xorb u npejjep iktar minn 40 sigarett kuljum. Kien iebes ħafna għalija li naqtaʼ dawn il-​vizzji, imma Alla tani s-​saħħa. Ili disaʼ snin li waqaft, u kemm jien grat li rnexxieli noħroġ mill-​ħama taʼ din id-​dinja mingħajr ma laqqatt xi marda serja jew spiċċajt il-​ħabs. Peress li naf liema tbatijiet fiżiċi, emozzjonali, u ekonomiċi jġib miegħu l-​abbuż tad-​drogi, nispera li artikli bħal dawn imissu l-​qlub taż-​żgħażagħ.

G. M., Italja

Jien użajt din is-​serje f’komponiment taʼ l-​iskola, u ngħatajt l-​ogħla marka possibbli u l-​prosit mingħand l-​għalliem tiegħi. Jien dejjem nieħu pjaċir naqrah Stenbaħ!, speċjalment meta jkun fih artikli rigward affarijiet kurrenti. Dan jgħinni biex inkun realistika dwar il-​ħajja.

I. M., Italja

Soċjevoli Grazzi ħafna għall-​artiklu “Iż-​Żgħażagħ Jistaqsu . . . Għala Ma Nistax Inkun Iktar Soċjevoli?” (8 taʼ Novembru, 1999) Jien għandi 17-il sena, u l-​artiklu kważi ġagħalni naħseb li kien miktub proprju għalija. Il-​kliem li kien fih esprima eżattament il-​mod kif inħossni jien minn ġewwa. Kemm-il darba smajthom jgħidu li jien persuna mkabbra. Imma l-​fatt li xi ħadd ikun iktar kwiet mill-​oħrajn m’hijiex raġuni biex tiġġudikah ħażin.

R. R., Ġermanja

Marda serja li kelli meta kont żgħir ġagħlitni nħossni waħdi. Dan l-​artiklu għenni biex nifhem u nkampa mas-​sentimenti tiegħi u biex insib mod kif negħleb is-​sitwazzjoni. Jien se nistinka biex nagħmel ħbieb maʼ oħrajn fil-​kongregazzjoni tiegħi.

J. F. F., Brażil

Inġustizzja Nixtieq nirringrazzjakom taʼ l-​artiklu “Iż-​Żgħażagħ Jistaqsu . . . Kif Nistaʼ Nkampa maʼ l-​Inġustizzja?” (8 t’Ottubru, 1999) Għalkemm għadni żgħira, ġarrabt ħafna inġustizzja u vjolenza f’ħajti, tant li għandi ġrieħi emozzjonali profondi. Dan għamilhieli diffiċli biex inwettaq l-​attività tiegħi bħala pijuniera, attività li ili nieħu sehem fiha għal dawn l-​aħħar tmien snin. Sentenza li tant qawwietli qalbi kienet tgħid: “Agħmel li tistaʼ biex tkampa.” Dawn il-​kelmiet juru mħabba, u nirringrazzjakom minn qiegħ qalbi.

A. G., Italja

L-​Għasafar taʼ l-​Għana Grazzi taʼ l-​artiklu “Dwettisti li Jgħaxxquk.” (8 taʼ Diċembru, 1999) Stħajjiltni nismaʼ lil dawn l-​għasafar jgħannu għana mill-​isbaħ fuq fergħa taʼ siġra! Kuljum nirringrazzja lil Jehovah talli ħalaq annimali li jagħtuna pjaċir.

Y. S., Ġappun