Għala Hu Diffiċli li Tagħmel it-​Tajjeb

META Sawlu kien jagħmel affarijiet ħżiena, min kien jieħu pjaċir?— Satana x-​Xitan. Imma anki l-​mexxejja reliġjużi tal-​Lhud ħadu pjaċir. Imbagħad meta Sawlu sar dixxiplu taʼ l-​Għalliem il-​Kbir u sar jismu Pawlu, dawk il-​mexxejja reliġjużi bdew jobogħduh. Mela, qed tifhem għala huwa diffiċli għal dixxiplu taʼ Ġesù biex jagħmel it-​tajjeb?—

Darba waħda, il-​qassis il-​kbir li kien jismu Ananija ordna lin-​nies biex lil Pawlu jagħtuh daqqa ġo wiċċu. Ananija saħansitra pprova jitfaʼ lil Pawlu fil-​ħabs. Pawlu bata ħafna meta sar dixxiplu taʼ Ġesù. Per eżempju, xi nies ħżiena sawtu lil Pawlu u pprovaw joqtluh b’ġebel kbir.—Atti 23:​1, 2; 2 Korintin 11:​24, 25.

Ħafna nies se jipprovaw iġagħluna nagħmlu affarijiet li ma jogħġbux lil Alla. Mela rridu nistaqsu, Int kemm tħobb it-​tajjeb? Tħobbu biżżejjed li se tagħmel it-​tajjeb anki meta oħrajn jobogħduk talli tagħmel hekk? Irid ikollok il-​kuraġġ biex tagħmel dan, hux veru?—

Forsi taħseb, ‘In-​nies għala jobogħduna għax nagħmlu t-​tajjeb? Mhux suppost jifirħu?’ Forsi hekk taħseb. Ħafna drabi n-​nies kienu jħobbuh lil Ġesù talli kien jagħmel affarijiet tajbin. Darba minnhom, in-​nies kollha tal-​belt inġabru quddiem il-​bieb tad-​dar fejn kien qiegħed joqgħod. Dawn ġew għax Ġesù kien qiegħed ifejjaq lin-​nies morda.—Marku 1:​33.

Imma xi kultant in-​nies ma kinux jieħdu pjaċir b’dak li kien jgħallem Ġesù. Għalkemm dejjem kien jgħallem it-​tajjeb, xi wħud saru jobogħduh ħafna għax kien jgħid il-​verità. Dan ġara darba waħda f’Nazaret, il-​belt fejn kien trabba Ġesù. Hu daħal fis-​sinagoga, post fejn il-​Lhud kienu jiltaqgħu biex iqimu lil Alla.

Hemmhekk Ġesù għamel taħdita sabiħa ħafna minn fuq l-​Iskrittura. Għall-​ewwel in-​nies ħadu pjaċir biha. Baqgħu skantati bil-​kliem ħelu li ħareġ minn fommu. Bilkemm setgħu jemmnu li dan kien ir-​raġel żagħżugħ li trabba fil-​belt tagħhom stess.

Imma mbagħad Ġesù qal xi ħaġa oħra. Hu qalilhom dwar meta Alla kien wera attenzjoni speċjali lejn nies li ma kinux Lhud. Malli Ġesù qal dan, in-​nies fis-​sinagoga bdew jirrabjaw. Taf għala?— Ħasbu li Alla kien juri attenzjoni speċjali lejhom biss. Ħasbu li huma kienu aħjar minn nies oħra. Allura bdew jobogħdu lil Ġesù talli qal hekk. U taf xi pprovaw jagħmlulu?—

Il-Bibbja tgħid: ‘Huma qabdu lil Ġesù u kaxkruh barra l-​belt. Ħaduh f’xifer muntanja u kienu se jitfgħuh għal isfel u joqtluh! Imma Ġesù ħarbilhom.’—Luqa 4:​16-30.

Li kieku ġara hekk lilek, kont terġaʼ tmur lura tkellem lil dawk in-​nies dwar Alla?— Trid il-​kuraġġ, hux tassew?— Però, madwar sena wara, Ġesù reġaʼ mar f’Nazaret. Il-​Bibbja tgħid: “Beda jgħallimhom fis-​sinagoga tagħhom.” Ġesù ma waqafx jgħid il-​verità għax beżaʼ min-​nies li ma kinux iħobbu lil Alla.—Mattew 13:54.

F’ġurnata oħra, jum is-​Sabat, Ġesù kien f’post fejn kien hemm raġel li kellu idu niexfa, jew immankata. Ġesù kellu l-​qawwa mingħand Alla biex ifejjaq lil dak ir-​raġel. Imma kien hemm xi rġiel hemmhekk li pprovaw jaqilgħu l-​inkwiet lil Ġesù. X’kien se jagħmel l-​Għalliem il-​Kbir?— L-​ewwel staqsiehom: ‘Jekk ikollkom nagħġa li taqaʼ f’ħofra kbira f’jum is-​Sabat, toħorġuha minn hemm?’

Iva, kienu jagħmlu hekk għal nagħġa, anki f’jum is-​Sabat, meta suppost kellhom jistrieħu. Għalhekk Ġesù qal: ‘Hu ħafna aħjar li tgħin raġel f’jum is-​Sabat, peress li bniedem jiswa iktar minn nagħġa!’ Kemm deher ċar li Ġesù għandu jgħin lil dan ir-​raġel billi jfejqu!

Ġesù qal lir-​raġel biex joħroġ idu, u f’daqqa waħda din fieqet. Kemm feraħ dak ir-​raġel! Imma xi ngħidu għall-​irġiel l-​oħra? Ferħu?— Le. Lil Ġesù bdew jobogħduh iktar minn qabel. Huma ħarġu ’l barra u ftiehmu bejniethom biex joqtluh!—Mattew 12:​9-14.

Aħna hekk qegħdin illum. Nagħmlu x’nagħmlu, qatt ma nistgħu nikkuntentaw lil kulħadd. Allura rridu niddeċiedu lil min verament nixtiequ nikkuntentaw. Jekk nagħżlu lil Alla Ġeħova u lil Ibnu, Ġesù Kristu, allura rridu dejjem nagħmlu dak li jgħallmu huma. Imma jekk nagħmlu hekk, min se jobgħodna? Min se jfixkilna biex ma nagħmlux it-​tajjeb?—

Satana x-​Xitan. Imma min iktar?— Dawk li x-​Xitan daħaq bihom u jġagħalhom jemmnu affarijiet ħżiena. Ġesù qal lill-​mexxejja reliġjużi taʼ żmienu: “Intom minn missierkom ix-​Xitan, u tixtiequ tagħmlu x-​xewqat taʼ missierkom.”—Ġwanni 8:​44.

Hemm ħafna nies li x-​Xitan jieħu pjaċir bihom. Ġesù jsejħilhom “id-​dinja.” X’taħseb li hi “d-​dinja” li jitkellem dwarha Ġesù?— Tajjeb, ejja niftħu Ġwanni kapitlu 15, vers 19, u naraw. Hemmhekk naqraw dan il-​kliem taʼ Ġesù: “Kieku kontu parti mid-​dinja, id-​dinja kienet tkun ferħana b’dak li hu tagħha. Issa għax m’intomx parti mid-​dinja, imma għażiltkom mid-​dinja, minħabba f’hekk tobgħodkom id-​dinja.”

Mela d-​dinja li tobgħod lid-​dixxipli taʼ Ġesù hija magħmula min-​nies kollha li m’humiex dixxipli tiegħu. Id-​dinja għala tobgħod lid-​dixxipli taʼ Ġesù?— Aħseb ftit. Min hu l-​ħakkiem taʼ din id-​dinja?— Il-​Bibbja tgħid: “Id-​dinja kollha qiegħda taħt il-​qawwa tal-​Ħażin.” Dan il-​Ħażin hu Satana x-​Xitan.—1 Ġwanni 5:​19.

Tistaʼ tara issa għala hu daqshekk diffiċli li tagħmel it-​tajjeb?— Satana u d-​dinja tiegħu jfixkluna. Imma hemm raġuni oħra. Tiftakar x’inhi?— F’Kapitlu 23 taʼ dan il-​ktieb tgħallimna li lkoll kemm aħna nitwieldu bid-​dnub. Ma jkunx sabiħ meta d-​dnub, ix-​Xitan, u d-​dinja tiegħu jkunu spiċċaw?—

Il-Bibbja twiegħed: “Id-​dinja tgħaddi.” Dan ifisser li dawk kollha li m’humiex dixxipli taʼ l-​Għalliem il-​Kbir mhux se jeżistu iktar. Mhux se jitħallew jgħixu għal dejjem. Taf min se jgħix għal dejjem?— Il-​Bibbja tkompli tgħid: “Min jagħmel ir-​rieda t’Alla jibqaʼ għal dejjem.” (1 Ġwanni 2:​17) Iva, dawk biss li jagħmlu t-​tajjeb, li jagħmlu “r-​rieda t’Alla,” se jgħixu għal dejjem fid-​dinja l-​ġdida t’Alla. Mela anki jekk ikun diffiċli, aħna rridu nagħmlu t-​tajjeb, hux tassew?—