Kif Għandna Nittrattaw lil Xi Ħadd Maqtugħ mis-​Sħubija

Ftit hemm affarijiet li jistgħu jweġġgħuna iktar mill-​uġigħ li nħossu meta xi qarib jew xi ħabib tal-​qalb jitkeċċa mill-​kongregazzjoni minħabba li ma nidimx minn dnubu. Il-​mod kif inwieġbu għad-​direzzjoni Biblika fuq din il-​kwistjoni jistaʼ juri l-​profondità taʼ mħabbitna għal Alla kif ukoll il-​lealtà tagħna għall-​arranġament tiegħu.a Ikkunsidra ftit mistoqsijiet li jitqajmu fuq dan is-​suġġett.

Kif għandna nittrattaw lil xi ħadd maqtugħ mis-​sħubija? Il-​Bibbja tgħid: “Tibqgħux tagħmluha maʼ min jissejjaħ ħu iżda jkun żieni jew rgħib jew idolatra jew żeblieħi jew sakranazz jew imbroljun; lanqas biss għandkom tieklu maʼ bniedem bħal dan.” (1 Korintin 5:11) Inkwantu għal kulmin “ma jibqax fit-​tagħlim tal-​Kristu,” naqraw: “Tilqgħuh qatt fi djarkom u ssellmulux. Għax min isellimlu jieħu sehem fl-​għemejjel mill-​agħar tiegħu.” (2 Ġwanni 9-11) Aħna ma nitkellmux dwar affarijiet reliġjużi jew nissieħbu b’mod soċjali maʼ dawk maqtugħin mis-​sħubija. It-​Torri taʼ l-​Għassa tal-​15 taʼ Novembru, 1981, paġna 10, qal: “Sempliċi ‘X’għandna’ lil xi ħadd jistaʼ jkun l-​ewwel pass li jiżviluppa f’konversazzjoni u forsi anki fi ħbiberija. Irridu aħna li nieħdu dak l-​ewwel pass maʼ persuna mkeċċija mis-​sħubija?”

Tassew hemm bżonn li b’mod strett nevitaw kull kuntatt maʼ dawn l-​uħud? Iva, għal ħafna raġunijiet. L-​ewwel, hija kwistjoni taʼ lealtà lejn Alla u l-​Kelma tiegħu. Aħna nobdu lil Ġeħova mhux biss meta jkun faċli li nagħmlu dan, imma wkoll meta niffaċċjaw l-​isfidi għall-​ubbidjenza tagħna. L-​imħabba għal Alla tqanqalna nobdu l-​kmandamenti kollha tiegħu, filwaqt li nirrikonoxxu li hu ġust u kollu mħabba u li l-​liġijiet tiegħu huma taʼ l-​akbar ġid għalina. (Isaija 48:17; 1 Ġwanni 5:3) It-​tieni, li nitbiegħdu minn wieħed li pprattika l-​ħażen bla ma nidem jipproteġi lilna u lill-​bqija tal-​kongregazzjoni minn tinġis spiritwali u morali u jsalva r-​reputazzjoni tajba tal-​kongregazzjoni. (1 Korintin 5:6, 7) It-​tielet, il-​waqfa soda tagħna għal prinċipji Bibliċi tistaʼ tkun saħansitra taʼ benefiċċju għall-​wieħed maqtugħ mis-​sħubija. Billi nappoġġaw id-​deċiżjoni tal-​kumitat ġudizzjarju, aħna nistgħu mmissu qalb il-​midneb li sa dakinhar ikun għadu ma wiġibx għall-​isforzi taʼ l-​anzjani biex jgħinuh. It-​telfa tas-​sħubija prezzjuża maʼ dawk li jħobb tistaʼ tgħinu jiġi “f’sensih,” jara s-​serjetà tal-​ħażen tiegħu, u jieħu passi biex jerġaʼ lura lejn Ġeħova.—Luqa 15:17.

Xi ngħidu jekk xi qarib jiġi maqtugħ mis-​sħubija? F’każ bħal dan, ir-​rabta mill-​qrib bejn il-​membri tal-​familja tistaʼ toħloq prova kbira taʼ lealtà. Kif għandna nittrattaw lil xi qarib li ġie maqtugħ mis-​sħubija? Hawn ma nistgħux insemmu kull sitwazzjoni li tistaʼ tinqalaʼ, iżda ejja nikkonċentraw fuq tnejn li huma bażiċi.

Xi drabi jistaʼ jagħti l-​każ li l-​membru tal-​familja li ġie maqtugħ mis-​sħubija jkun għadu joqgħod fl-​istess dar bħala parti mill-​familja immedjata. Ladarba l-​qtugħ tiegħu mis-​sħubija ma jtemmx ir-​rabtiet tal-​familja, attivitajiet u kuntatti normali tal-​familja li jsiru minn jum għal jum jistgħu jitkomplew. Iżda, bl-​imġiba tiegħu, l-​individwu għażel li jwaqqaf ir-​relazzjoni spiritwali bejnu u l-​familja tiegħu li temmen. B’hekk, membri leali tal-​familja ma jistgħux jibqgħu jkollhom sħubija spiritwali miegħu. Per eżempju, jekk il-​wieħed maqtugħ mis-​sħubija jkun preżenti, hu ma jipparteċipax mal-​familja meta din tinġabar għall-​istudju tal-​Bibbja. Madankollu, jekk dak li ġie maqtugħ mis-​sħubija huwa minorenni, il-​ġenituri xorta għadhom responsabbli li jistruwixxuh u jiddixxiplinawh. Għalhekk, il-​ġenituri bl-​imħabba jistgħu jirranġaw biex jikkonduċu studju tal-​Bibbja mat-​tifel jew it-​tifla.b—Proverbji 6:20-22; 29:17.

Xi drabi oħrajn, il-​qarib maqtugħ mis-​sħubija jistaʼ jkun li ma joqgħodx mal-​familja immedjata u jkun jgħix f’dar differenti. Għalkemm f’xi okkażjoni rari kuntatt limitat jistaʼ jkun meħtieġ biex tiġi rranġata xi kwistjoni tal-​familja, kull kuntatt bħal dan għandu jkun minn taʼ l-​inqas. Membri leali taʼ familja Kristjana ma jfittxux skużi biex jikkuntattjaw xi qarib maqtugħ mis-​sħubija li ma jgħixx id-​dar. Anzi, lealtà lejn Ġeħova u l-​organizzazzjoni tiegħu tgħinhom jonoraw l-​arranġament Skritturali tal-​qtugħ mis-​sħubija. Il-​lealtà tagħhom hija għall-​aħjar interessi taʼ min għamel il-​ħażen u tistaʼ tgħinu jibbenefika mid-​dixxiplina li rċieva.c—Ebrej 12:11.

[Noti taʼ taħt]