It-​Tislim lill-​Bandiera, il-​Votazzjoni, u s-​Servizz Ċivili

lt-tislim lill-​bandiera. Ix-​Xhieda taʼ Ġeħova jemmnu illi li tmil quddiem bandiera jew li ssellmilha, spiss flimkien maʼ xi innu, huwa att taʼ qima li jattribwixxi salvazzjoni lill-​Istat jew lill-​mexxejja tiegħu u mhux lil Alla. (Isaija 43:11; 1 Korintin 10:14; 1 Ġwanni 5:21) Wieħed minn dawn il-​mexxejja kien is-​Sultan Nebukadnessar taʼ Babilonja tal-​qedem. Sabiex jimpressjona lin-​nies bil-​maestà u ż-​żelu reliġjuż tiegħu, dan il-​monarka setgħan bena xbieha immensa u ġiegħel lis-​sudditi tiegħu jmilu quddiemha waqt li kienet qed tindaqq il-​mużika, bħal xi innu. Madankollu, tliet Ebrej—Sidrak, Mesak, u Għabednego—irrifjutaw li jmilu quddiem ix-​xbieha, saħansitra b’kastig tal-​mewt.—Danjel, kapitlu 3.

Fi żmienna, “il-​bandiera hija s-​simbolu ewlieni tal-​fidi u l-​oġġett fundamentali għall-​qima tan-​nazzjonaliżmu,” qal Carlton Hayes, kittieb taʼ l-​istorja. “L-​irġiel ineħħu l-​kpiepel tagħhom hi u għaddejja l-​bandiera; u b’tifħir lill-​bandiera l-​poeti jiktbu l-​poeżiji u t-​tfal ikantaw l-​innijiet.” Hu kompla jgħid li hemm ukoll il-​“ġranet imqaddsin” bħall-​Erbgħa taʼ Lulju fl-​Istati Uniti, kif ukoll “il-​qaddisin u l-​eroj” fin-​nazzjonaliżmu, flimkien mat-​“tempji,” jew in-​niċeċ tiegħu. F’ċerimonja pubblika fil-​Brażil, is-​superjur taʼ l-​armata stqarr: “Il-​bandiera tingħata rispett kbir u tiġi meqjuma . . . l-​istess bħalma tiġi meqjuma l-​Patrija.” Iva, “il-​bandiera, bħas-​salib, hija sagra,” qalet darba The Encyclopedia Americana.

Din l-​enċiklopedija li għadna kif semmejna stqarret dan l-​aħħar li l-​innijiet nazzjonali “huma espressjonijiet t’emozzjoni patrijottika u spiss jinkludu xi invokazzjoni għal gwida u protezzjoni divina għall-​poplu jew il-​mexxejja tiegħu.” Għalhekk, il-​qaddejja taʼ Ġeħova huma raġunevoli meta jqisu ċerimonji patrijottiċi li jinvolvu t-​tislim lill-​bandiera u innijiet nazzjonali bħala li huma reliġjużi. Fil-​fatt, il-​ktieb The American Character fil-​kummenti tiegħu dwar it-​tfal tax-​Xhieda taʼ Ġeħova li fl-​iskejjel taʼ l-​Istati Uniti jirrifjutaw li jagħtu qima lill-​bandiera jew li jaħilfu l-​lealtà tagħhom qal: “Li dawn ir-​ritwali taʼ kuljum huma reliġjużi sa fl-​aħħar ġie rikonoxxut mill-​Qorti Suprema f’serje taʼ każi.”

Filwaqt li ma jiħdux sehem f’ċerimonji li huma jqisuhom li m’humiex Skritturali, in-​nies taʼ Ġeħova żgur li jirrispettaw id-​dritt t’oħrajn li jagħmlu dan. Huma wkoll jirrispettaw il-​bnadar nazzjonali bħala simboli u jirrikonoxxu l-​gvernijiet bi drittijiet leġittimi bħala l-​“awtoritajiet superjuri” li jaqdu bħala ‘l-​ministri t’Alla.’ (Rumani 13:1-4) Għalhekk, ix-​Xhieda taʼ Ġeħova jagħtu kas it-​twissija biex jitolbu “għas-​slaten u għal kulmin għandu pożizzjoni għolja.” Madankollu, il-​motiv tagħna hu “sabiex inkomplu ngħaddu ħajja kalma u kwieta bid-​devozzjoni sħiħa lejn Alla u bis-​serjetà kollha.”—1 Timotju 2:2.

Il-votazzjoni f’elezzjonijiet politiċi. Il-​Kristjani veri jirrispettaw id-​dritt t’oħrajn biex jivvotaw. Huma ma jipprotestawx kontra l-​elezzjonijiet u jikkooperaw m’awtoritajiet eletti. Madankollu, b’mod sod jibqgħu newtrali f’affarijiet politiċi tal-​pajjiżi. (Mattew 22:21; 1 Pietru 3:16) X’għandu jagħmel Kristjan f’pajjiż fejn il-​votazzjoni hija obbligatorja jew f’sitwazzjoni li fiha l-​emozzjonijiet isiru intensi kontra dawk li ma jmorrux fil-​post tal-​votazzjoni? Meta niftakru li Sidrak, Mesak, u Għabednego marru sal-​pjanura taʼ Dura, Kristjan f’ċirkustanzi simili għandu mnejn jiddeċiedi li jmur sal-​post tal-​votazzjoni jekk tippermettilu l-​kuxjenza tiegħu. Madankollu, se jieħu ħsieb li ma jiksirx in-​newtralità tiegħu. Hu għandu jqis dawn is-​sitt prinċipji li ġejjin:

1. Is-​segwaċi taʼ Ġesù ‘m’humiex parti mid-​dinja.’—Ġwanni 15:19.

2. Il-​Kristjani jirrappreżentaw lil Kristu u lil Saltnatu.—Ġwanni 18:36; 2 Korintin 5:20.

3. Il-​kongregazzjoni Kristjana hija magħquda fit-​twemmin u l-​membri tagħha huma marbutin flimkien bi mħabba bħal taʼ Kristu.—1 Korintin 1:10; Kolossin 3:14.

4. Dawk li permezz tal-​vot tagħhom itellgħu lil xi uffiċjal iġorru r-​responsabbiltà għal dak li jagħmel.—Innota l-​prinċipji li hemm fil-​kliem taʼ l-​1 Samwel 8:5, 10-18 u l-​1 Timotju 5:22.

5. Ġeħova qies ix-​xewqa taʼ Israel għal ħakkiem uman bħala sinjal li kienu warrbu Lilu.—1 Samwel 8:7.

6. Il-​Kristjani għandhom ikollhom il-​libertà tal-​kelma meta jitkellmu dwar il-​gvern tas-​Saltna t’Alla maʼ nies taʼ kull konvinzjoni politika.—Mattew 24:14; 28:19, 20; Ebrej 10:35.

Servizz ċivili. F’xi pajjiżi, l-​Istat jirrikjedi li dawk li ma jaċċettawx is-​servizz militari jagħmlu xi forma taʼ servizz ċivili għal xi żmien. Meta niġu ffaċċjati b’deċiżjoni taʼ din il-​kwalità għandna nitolbu dwarha, forsi niddiskutuha maʼ xi sieħeb Kristjan matur, u mbagħad nużaw il-​kuxjenza tagħna biex nieħdu deċiżjoni bbażata fuq dak li tgħallimna dwar is-​suġġett.—Proverbji 2:1-5; Filippin 4:5.

Il-Kelma t’Alla tgħidilna biex inkunu “ubbidjenti lejn il-​gvernijiet u l-​awtoritajiet bħala ħakkiema, lesti għal kull għemil tajjeb, . . . raġunevoli.” (Titu 3:1, 2) B’dan f’moħħna, forsi nistaqsu lilna nfusna l-​mistoqsijiet li ġejjin: ‘Jekk naċċetta x-​xogħol ċivili li pproponewli se nkun jien qed nikkomprometti n-​newtralità Kristjana tiegħi jew se nkun qed niġi mġiegħel ninvolvi ruħi fir-​reliġjon falza?’ (Mikea 4:3, 5; 2 Korintin 6:16, 17) ‘Se jkun diffiċli għalija li nwettaq id-​dmirijiet Kristjani tiegħi jekk nagħmel dan ix-​xogħol jew jistaʼ jżommni wkoll milli nwettaqhom?’ (Mattew 28:19, 20; Efesin 6:4; Ebrej 10:24, 25) ‘Min-​naħa l-​oħra, l-​involviment tiegħi f’dan ix-​xogħol se jippermettili nżid maʼ l-​attivitajiet spiritwali tiegħi, forsi li naħdem full-time fil-​ministeru?’—Ebrej 6:11, 12.

Jekk Kristjan, b’mod kuxjenzjuż, jikkonkludi li jistaʼ jagħti servizz ċivili minflok ma jmur il-​ħabs, sħabu l-​Kristjani għandhom jirrispettaw id-​deċiżjoni tiegħu. (Rumani 14:10) Madankollu, jekk iħoss li ma jistax jagħti dan is-​servizz, oħrajn għandhom jirrispettaw din il-​pożizzjoni wkoll.—1 Korintin 10:29; 2 Korintin 1:24.