L-​astrologi jżuru lil Ġesù

Xi rġiel jiġu mil-​Lvant. Dawn huma astrologi—irġiel li jistudjaw il-​pożizzjoni tal-​kwiekeb, u jgħidu li billi jagħmlu dan jistgħu jispjegaw ċerti ġrajjiet fil-​ħajja tan-​nies. (Isaija 47:13) Waqt li kienu d-​dar fil-​Lvant, huma raw “kewkba” u segwewha mijiet taʼ kilometri, imma din ħadithom Ġerusalemm u mhux Betlem.

Meta jaslu Ġerusalemm, huma jistaqsu: “Fejn hu s-​sultan tal-​Lhud li twieled? Għax rajna l-​kewkba tiegħu meta konna fil-​lvant, u ġejna nuruh rispett.”—Mattew 2:1, 2.

Is-​Sultan Erodi taʼ Ġerusalemm jismaʼ dwar dan u tgħidx kemm jibda jinkwieta. Allura jsejjaħ għandu l-​qassisin ewlenin u mexxejja reliġjużi Lhud oħrajn u jistaqsihom fejn kellu jitwieled il-​Kristu. Huma jwieġbu mill-​Iskrittura u jgħidu: “F’Betlehem.” (Mattew 2:5; Mikea 5:2) Xħin jismaʼ dan, Erodi bil-​moħbi jsejjaħ għandu l-​astrologi u jgħidilhom: “Morru fittxu bir-​reqqa lit-​tifel, u meta ssibuh ejjew għiduli, ħalli jien ukoll inkun nistaʼ mmur nurih rispett.” (Mattew 2:8) Però, Erodi fir-​realtà jrid isib lit-​tifel ċkejken biex joqtlu!

Wara li l-​astrologi jitilqu, isseħħ xi ħaġa tal-​għaġeb. Il-​“kewkba” li kienu raw meta kienu fil-​Lvant timxi quddiemhom. Jidher ċar li din mhijiex xi kewkba komuni, imma qiegħda hemm apposta biex tidderiġihom. Huma jsegwuha sakemm tieqaf eżatt fuq id-​dar fejn issa qed joqogħdu Ġużeppi u Marija maċ-​ċkejken binhom.

Meta l-​astrologi jidħlu fid-​dar, huma jaraw lil Marija b’tifel żgħir—Ġesù. Imbagħad, dawn l-​irġiel imilu quddiemu u jagħtuh deheb, inċens, u mirra bħala rigali. Wara, meta jkunu sejrin lura għand Erodi, f’ħolma huma jiġu mwissijin minn Alla biex ma jmorrux lura għandu. Allura jirritornaw lejn pajjiżhom minn triq oħra.

Min taħseb li pprovda l-​“kewkba” li ggwidat lill-​astrologi? Ftakar li ma ħadithomx direttament Betlem, fejn kien Ġesù. Minflok, ħadithom Ġerusalemm, fejn iltaqgħu mas-​Sultan Erodi, li ried joqtol lil Ġesù. U kien jirnexxilu li kieku Alla ma ħax azzjoni u wissa lill-​astrologi biex ma jgħidux lil Erodi fejn kien Ġesù. Jidher ċar li kien l-​għadu t’Alla, Satana, li ried joqtol lil Ġesù, u uża dan il-​mezz biex jipprova jilħaq l-​għan tiegħu.