“Liema Hu l-​Ewwel Kmandament Fosthom Kollha?”

Alla x’jeħtieġ minna? Hemm viżibilju taʼ regoli li rridu nsegwu? Fortunatament, ir-​risposta hi le. Skont l-​Iben t’Alla stess, Ġesù Kristu, dak li Alla jeħtieġ minna jistaʼ jinġabar f’kelma waħda.—Aqra Marku 12:28-​31.

L-​ewwel ikkunsidra l-​kuntest tal-​kliem taʼ Ġesù. Hu kien qed jgħallem fit-​tempju fil-​11 taʼ Nisan, ftit jiem qabel mewtu. L-​għedewwa tiegħu pprovaw idaħħluh f’nassa billi staqsewh mistoqsijiet kontroversjali. Kull darba, hu ħalliehom bla kliem bit-​tweġibiet tiegħu. Imbagħad lil Ġesù staqsewh din il-​mistoqsija: “Liema hu l-​ewwel kmandament fosthom kollha?”—Vers 28.

Din kienet mistoqsija diffiċli għal-​Lhud. Kien hemm 600 liġi fil-​Liġi Mosajka, u xi Lhud kienu jikkustinjaw dwar liema minnhom kienet l-​ewwel, jew l-​iktar importanti. Milli jidher, oħrajn kienu jisħqu li l-​liġijiet kollha kellhom l-​istess importanza u li kien ħażin li tqis xi liġijiet iktar importanti minn oħrajn. Ġesù kif kien se jwieġeb din il-​mistoqsija?

Bi tweġiba, Ġesù ma semmiex kmandament wieħed imma tnejn. L-​ewwel, hu qal: “Ħobb lil Ġeħova Alla tiegħek b’qalbek kollha u b’ruħek kollha u b’moħħok kollu u b’saħħtek kollha.” (Vers 30; Dewteronomju 6:5) Għalkemm Ġesù semma l-​qalb, il-​moħħ, ir-​ruħ, u s-​saħħa separatament, kull waħda minn dawn ma tfissirx li hi kompletament differenti mill-​oħra, imma kull waħda tirreferi għall-​persuna ġewwinija.a B’hekk, l-​imħabba għal Ġeħova għandha tinvolvi l-​persuna kollha kemm hi, il-​fakultajiet u r-​riżorsi kollha tagħha. Xogħol taʼ referenza Biblika jispjega li dan ifisser li għandna nħobbu lil Alla kompletament u totalment. Għalhekk, jekk tħobb lil Alla b’dan il-​mod se tagħmel l-​aħjar li tistaʼ biex tgħix kull ġurnata b’tali mod li tikseb l-​approvazzjoni tiegħu.—1 Ġwanni 5:3.

It-​tieni, Ġesù qal: “Ħobb lill-​proxxmu tiegħek bħalek innifsek.” (Vers 31; Levitiku 19:18) L-​imħabba għal Alla u l-​imħabba għall-​proxxmu jmorru id f’id. L-​imħabba għall-​proxxmu tiġi mill-​imħabba tagħna għal Alla. (1 Ġwanni 4:20, 21) Jekk inħobbu l-​proxxmu tagħna bħalna nfusna, se nittrattaw lil oħrajn kif irridu li huma jittrattaw lilna. (Mattew 7:12) Billi nagħmlu hekk, nuru li nħobbu lill-​Alla li ħalaq lilna—u lilhom—fix-​xbieha tiegħu.—Ġenesi 1:26.

Kemm huma importanti l-​kmandamenti biex inħobbu lil Alla u lill-​proxxmu? Ġesù qal: “M’hemm ebda kmandament ieħor akbar minn dawn.” (Vers 31) Fl-​istess rakkont f’​Mattew, Ġesù qal li l-​kmandamenti l-​oħra kollha jżommu fuq dawn it-​tnejn.—Mattew 22:40.

Mhuwiex diffiċli li togħġob lil Alla. Dak kollu li hu jeħtieġ minna jistaʼ jinġabar f’kelma waħda: l-​imħabba. Din dejjem kienet—u dejjem se tibqaʼ—il-​qofol tal-​qima vera. Imma l-​imħabba mhijiex sempliċement sentiment jew xi ħaġa li tintwera bil-​kliem biss, imma tintwera bl-​azzjoni. (1 Ġwanni 3:18) Għala ma ssirx taf kif tistaʼ tikkultiva u turi l-​imħabba tiegħek lejn Ġeħova, l-​Alla li “hu mħabba”?—1 Ġwanni 4:8.