Octubre

Ña̱ kándíxayó xíʼin ña̱ sánáʼa̱yó nu̱ú tu̱ʼun Ndióxi̱ va̱xiña. Soo ni saá ku̱a̱ʼání na̱ yiví va̱ása xíínna kuniso̱ʼona ña̱ sánáʼa̱yó, saáchi túvina ña̱ kǒo mií ña̱ ndeéví kéʼéyó ña̱ va̱ʼa ndasakáʼnuyó Ndióxi̱, ta ña̱ sánáʼa̱yó va̱ása kítáʼanña xíʼin ña̱ kútóo miína keʼéna. ¿Ndáaña chindeétáʼan xíʼún ña̱ va̱ása kaka-iniún? Ta̱ apóstol Pablo ni̱ka̱ʼa̱nra ña̱yóʼo xíʼin na̱ hermano na̱ xi̱ndoo ñuu Roma: “Na̱ yiví xáa̱na kándíxana tá xa̱a̱ xíniso̱ʼona tu̱ʼun Ndióxi̱. Ta xíniso̱ʼona tu̱ʼun yóʼo tá nátúʼun iinna xa̱ʼa̱ ta̱ Cristo” (Rom. 10:17). Sava na̱ yiví túvina ña̱ liviní vikó ña̱ kéʼé na̱ veʼe-ñu̱ʼu vatá, soo va̱ása chindeétáʼanví ña̱yóʼo xíʼinna ña̱ kandíxakana Ndióxi̱, saáchi ña̱ chindeétáʼan xíʼinna kúú ña̱ kaʼvina Biblia. Ña̱kán, ña̱ va̱ʼa ndakú koo ña̱ kándíxaún Ndióxi̱ xíniñúʼu kundiku̱n ndiʼi ña̱ káʼa̱n Biblia. Saáchi tá va̱ása kándíxaún Jehová, va̱ása kindo̱o-inira xíʼin ña̱ kéʼún (Heb. 11:1, 6). Ña̱kán, ña̱ va̱ʼa kandíxa iin na̱ yiví ña̱ nda̱ni̱ʼína ña̱ nda̱a̱, va̱ása xíniñúʼu kuninu̱úvína iin milagro. Saáchi ña̱ va̱ʼa kandíxakana Ndióxi̱ xíniñúʼu viíní kaʼvina Biblia, tasaá va̱ása kaka-inina. w21.05 4, 5 párr. 11, 12

Ta̱ apóstol Pablo ni̱ya̱ʼara nu̱ú ku̱a̱ʼání tu̱ndóʼo. Ña̱kán xi̱niñúʼu taxiní Jehová ndee̱ ndaʼa̱ra tá ka̱ninara xíʼin yu̱u̱ ta chi̱ka̱a̱nara veʼeka̱a (2 Cor. 11:23-25). Ña̱kán ni̱ka̱ʼa̱nra ña̱ sava yichi̱ xi̱ndakava-inira (Rom. 7:18, 19, 24). Ta saátu ni̱ka̱ʼa̱nra xíʼin Ndióxi̱ ña̱ ná tavára “iin iñú” ña̱ xi̱ndika̱a̱ ku̱ñura, ña̱ xi̱saxóʼvi̱ní-ñaʼá (2 Cor. 12:7, 8). Jehová ta̱xi ndee̱ ndaʼa̱ ta̱ Pablo ña̱ va̱ʼa na̱túʼunra xíʼin na̱ yiví ni ni̱ya̱ʼara nu̱ú tu̱ndóʼo. Ná ndakanixi̱níyó xa̱ʼa̱ ndiʼi ña̱ ku̱chiñu ta̱ apóstol yóʼo ke̱ʼéra. Tá kúú, tá nda̱sinara ti̱xin veʼera chí ñuu Roma na̱túʼunra xa̱ʼa̱ tu̱ʼun Ndióxi̱ xíʼin na̱ xi̱niʼi yichi̱ nu̱ú na̱ judío, ta sana nda̱a̱ na̱ chíñu na̱túʼunra xíʼin (Hech. 28:17; Filip. 4:21, 22). Ta na̱túʼunra xíʼin na̱ soldado ña̱ ñuu Roma na̱ xi̱ndaa miíra, saátu xíʼin ndiʼi na̱ xi̱xa̱ʼa̱n xi̱xitoñaʼá (Hech. 28:30, 31; Filip. 1:13). Ta saá kúú ña̱ xi̱niñúʼu Ndióxi̱ ta̱ Pablo ña̱ va̱ʼa ka̱ʼyíra sava carta ña̱ chi̱ndeétáʼan xíʼin na̱ hermano tiempo saá, ta nda̱a̱ vitin chíndeétáʼanña xíʼinyó. w21.05 21 párr. 4, 5

Ta̱ Uzías, ta̱ xi̱kuu rey nu̱ú na̱ ñuu Judá, ni̱nuní xi̱kunira ta xa̱ʼa̱ ña̱yóʼo va̱ása níxiinra kuniso̱ʼora consejo ña̱ ta̱xina ndaʼa̱ra, ta nda̱a̱ ni̱xa̱a̱ra ke̱ʼéra iin ña̱ʼa ña̱ va̱ása níxiniñúʼu keʼéra. Va̱ʼaní xi̱kana ña̱ xi̱keʼéra ta ku̱chiñura ka̱nitáʼanra xíʼin ku̱a̱ʼání ñuu, i̱xava̱ʼara ku̱a̱ʼání veʼe ta saátu ni̱xi̱yoní kití sa̱na̱ra ta va̱ʼaní xi̱kana ña̱ xi̱chiʼira. Saáchi “Ndióxi̱ kúú ta̱ chi̱ndeétáʼan xíʼinra ña̱ va̱ʼaní xi̱kana ndiʼi ña̱ xi̱keʼéra” (2 Crón. 26:3-7, 10). Soo tu̱ʼun Ndióxi̱ káchiña: “Tá ni̱xa̱a̱ra nda̱kiʼinra ku̱a̱ʼáka chiñu ki̱xáʼara ni̱nu kúnira, ta ndu̱kú miíra tu̱ndóʼo ña̱ ki̱xi nu̱úra”. Jehová ni̱ka̱ʼa̱nra ña̱ na̱ su̱tu̱ kuití kúú na̱ kivi taxi incienso ti̱xin templo. Soo xa̱ʼa̱ ña̱ ni̱nuní xi̱kuni ta̱ rey Uzías ke̱ʼéra ña̱yóʼo. Ña̱kán Jehová ta̱xira kue̱ʼe̱ lepra ndaʼa̱ra (2 Crón. 26:16-21). ¿Á kivi xa̱a̱yó ni̱nuní kuniyó ta keʼéyó ña̱ va̱ása va̱ʼa nda̱a̱ táki̱ʼva ke̱ʼé ta̱ Uzías? Kiviva xa̱a̱yó ni̱nu kuniyó tá iinlá xa̱ʼa̱ miíyó ndíʼi̱-iniyó. Ña̱kán ná ndakaʼányó, ndiʼi ña̱ xíniyó keʼéyó ta saátu chiñu ña̱ kúúmiíyó ti̱xin congregación, Jehová kúú ta̱ táxiña ndaʼa̱yó (1 Cor. 4:6, 7). Tá ni̱nu kúniyó Jehová va̱ása kuniñúʼura miíyó ña̱ kachíñuyó nu̱úra. w21.06 16 párr. 7, 8

Ta̱ Jesús xi̱kunda̱a̱-inira ña̱ su̱ví ndiʼiví na̱ yiví kuniso̱ʼo ña̱ natúʼunna. Ta saátu va̱ása kúnda̱a̱-iniyó nda̱saa na̱ yiví na̱ na̱túʼunna xíʼin ni̱xa̱a̱ ndu̱u discípulo ta̱ Jesús. Ña̱kán va̱ása níxiniñúʼu kusi̱í kuití inina xa̱ʼa̱ ña̱ va̱ʼaní xi̱xiniso̱ʼo na̱ yiví, chi saátu xi̱niñúʼu kusi̱í-inina xa̱ʼa̱ ña̱ xi̱kusi̱í-ini Jehová xíʼin chiñu ña̱ xi̱keʼéna. Tá ná ndakundeéyó natúʼunyó xa̱ʼa̱ Ndióxi̱ saá kúú ña̱ ni̱ʼíyó ña̱ kutakuyó ndiʼi tiempo. Tá chíka̱a̱yó ndee̱ ña̱ chiʼiyó ña̱ nda̱a̱ níma̱ na̱ yiví ta kóso̱yóña, saá kúú ña̱ kéʼéyó ña̱ kúni̱ espíritu santo, saáchi táxiyó ña̱ chindeétáʼanña xíʼinyó. Tá ná “va̱ása kunaáyó”, Jehová káʼa̱nra taxira ña̱ kutakuyó ndiʼi tiempo, ni tá va̱ása níchindeétáʼanyó xíʼin iin na̱ yiví ña̱ xa̱a̱na ndakuchina (Gál. 6:7-9). w21.10 26 párr. 8, 9

Iin yichi̱, ta̱ Jesús xíʼin na̱ discípulora ku̱naánína saáchi ni̱xi̱kana iníísaá ki̱vi̱ na̱túʼunna xíʼin na̱ yiví xa̱ʼa̱ Ndióxi̱, ña̱kán ndu̱kúna iin lugar nu̱ú kivi ndakindee̱na. Soo tá ni̱xa̱a̱na kán, xa̱a̱ ndátu ku̱a̱ʼání na̱ yiví na̱yóʼo. Ta̱ Jesús ku̱ndáʼviní-inira xi̱nirana, “ta ki̱xáʼara sánáʼa̱rana ku̱a̱ʼá ña̱ʼa”. Ta̱ Jesús xi̱kunda̱a̱-inira xíʼin ña̱ ndóʼo na̱ yiví kán ta xi̱kuni̱ra chindeétáʼanra xíʼinna. Xi̱kunda̱a̱-inira ña̱ xóʼvi̱nína ta xi̱niñúʼu natúʼunra xíʼinna xa̱ʼa̱ ña̱ ndátuna ndakiʼinna chí nu̱únínu. Tiempo vitin ni si̱íva náʼa̱ na̱ yiví soo íyova tu̱ndóʼo nu̱úna, ña̱kán xíniñúʼu natúʼunyó xíʼinna xa̱ʼa̱ ña̱ ndátuna ndakiʼinna chí nu̱únínu. Na̱yóʼo íyona nda̱a̱ táki̱ʼva íyo ndikachi tí nda̱ñúʼu tí kǒo xi̱toʼo. Ta̱ apóstol Pablo ni̱ka̱ʼa̱nra ña̱ kǒo Ndióxi̱na ta kǒo ña̱ ndátuna ndakiʼinna chí nu̱únínu (Efes. 2:12). Tá ná ndakanixi̱níyó xa̱ʼa̱ ña̱ ndóʼo na̱ yiví na̱ íyo nu̱ú territorio ña̱ kúúmiíyó, saá kuni̱yó chindeétáʼanyó xíʼinna xa̱ʼa̱ ña̱ kúʼvi̱-iniyó xíniyóna ta kúndáʼvi-iniyó xíniyóna. Ta iin ki̱ʼva ña̱ chindeétáʼanyó xíʼinna kúú ña̱ ka̱ʼa̱nyó xíʼinna á kúni̱na kaʼviyó xíʼinna. w21.07 5 párr. 8

Na̱ yiví na̱ kúta̱a-ini ni̱nuní kúnina ta iinlá xa̱ʼa̱ miína ndíʼi̱-inina. Na̱ kúini̱-ini kúni̱na kuumiína ña̱ kúúmií inka na̱ yiví, soo saátu kúni̱na ña̱ ná va̱ása kuumií na̱ yiví kán ña̱ʼa ña̱ xa̱a̱ kúúmiína. Ña̱kán na̱ sáa̱-iniyó xíniyó kúúna tá saá kéʼéyó xíʼinna. Ña̱ kuta̱a-iniyó á ña̱ kukúini̱yó xíʼin inkana, íyoña nda̱a̱ táki̱ʼva íyo tí kití válí tí xáxi yitu̱n, ni va̱ʼaníva náʼa̱ túyóʼo chí sa̱tánú soo xa̱a̱ ndi̱ʼi-xa̱ʼa̱va ininú i̱xaa tí kití válí yóʼo, ña̱kán iin kama nduvavanú. Ki̱ʼva saá kivi kundoʼo iin na̱ ndásakáʼnu Jehová ni xa̱a̱ ku̱a̱ʼá tiempo káchíñuna nu̱úra, soo tá kúta̱a-inina ta kúkúini̱na xíʼin inkana, kǒo ña̱ va̱ʼa kundoʼona (Prov. 16:18). Saáchi va̱ása ndasakáʼnukana Jehová ta saxóʼvi̱na miína ta saátu saxóʼvi̱na inkana. Va̱ása xa̱a̱yó ni̱nu kuniyó tá ná kundiku̱nyó consejo ña̱ ta̱xi ta̱ apóstol Pablo tá kaachira: “Kǒo keʼéndó nda̱a̱ ni iin ña̱ʼa xa̱ʼa̱ ña̱ kúni̱ndó keetáʼanndó xíʼin inkana á xa̱ʼa̱ ña̱ ni̱nu kúnindó, va̱ʼaka vitá koo inindó, ta ndakanixi̱níndó ña̱ ndáyáʼvika inkana nu̱úndó”. w21.07 15, párr. 6-8

Savana káʼa̱nna ña̱ na̱ religión ña̱ nda̱a̱ xíniñúʼu kuchiñuna ndakuiinna ndiʼi ña̱ ndáka̱tu̱ʼun na̱ yiví, nda̱a̱ ña̱ kǒo va̱xi nu̱ú Biblia. Soo, ¿á kivi keʼéna ña̱yóʼo? Ná ka̱ʼa̱nyó xa̱ʼa̱ ña̱ ke̱ʼé ta̱ Pablo. Ni ni̱ka̱ʼa̱nra xíʼin na̱ hermano ña̱ viíní ná nandukúna xa̱ʼa̱ ndiʼi ña̱ʼa, soo xi̱kunda̱a̱-inira ña̱ ni̱xi̱yo ku̱a̱ʼání ña̱ʼa ña̱ va̱ása níxi̱kunda̱a̱-inira xa̱ʼa̱ (1 Tes. 5:21). Ta̱yóʼo ni̱ka̱ʼa̱nra ña̱ va̱ása xíni̱yó xa̱ʼa̱ ndiʼi ña̱ʼa, ta nda̱a̱ táki̱ʼva íyo na̱ xíto “nu̱ú iin espejo ña̱ va̱ása káxi va̱ʼa náʼa̱ nu̱ú” saá íyoyó (1 Cor. 13:9, 12). Ta̱ Pablo va̱ása níxi̱xini̱ra xa̱ʼa̱ ndiʼi ña̱ʼa, ta saátu miíyó va̱ása kúnda̱a̱-iniyó xa̱ʼa̱ ndiʼi ña̱ʼa. Soo xi̱kunda̱a̱va-inira xa̱ʼa̱ ña̱ ndáyáʼvi va̱ʼa xa̱ʼa̱ Jehová, ta ña̱yóʼo chi̱ndeétáʼanña xíʼinra ña̱ kandíxara ña̱ nda̱ni̱ʼíra ña̱ nda̱a̱. ¿Ndáaña kivi keʼéyó ña̱ va̱ása kaka-iniyó ña̱ nda̱ni̱ʼíyó ña̱ nda̱a̱? Iin ña̱ chindeétáʼan xíʼinyó kúú ña̱ chitáʼanyó ki̱ʼva ña̱ nda̱sakáʼnu ta̱ Jesús Ndióxi̱ xíʼin ki̱ʼva ña̱ ndásakáʼnu miíyóra tiempo vitin. w21.10 18, 19 párr. 2-4

Ndóʼó na̱ xa̱a̱ ku̱chée, ni ku̱a̱ʼá tiempo káchíñundó nu̱ú Jehová á va̱ása, kiviva chindeétáʼanndó xíʼin na̱ hermano na̱ válíka nu̱úndó. ¿Ndáa ki̱ʼva keʼéndóña? Kusi̱í-inindó xíʼin chiñu ña̱ kívi keʼéndó vitin á kivitu chika̱a̱-inindó keʼéndó inkakaña. Tá kúú ta̱ rey David, xi̱kuni̱ra ixava̱ʼara veʼe Jehová. Soo Jehová ni̱ka̱ʼa̱nra xíʼinra ña̱ se̱ʼera ta̱ Salomón kúú ta̱ ixava̱ʼa veʼe yóʼo. Ta̱ David ka̱ndíxara ña̱ ni̱ka̱ʼa̱n Jehová ta chi̱ndeétáʼanra xíʼin ta̱ Salomón (1 Crón. 17:4; 22:5). Ta̱yóʼo va̱ása níndakanixi̱níra ña̱ miíra kúú ta̱ kivi ixava̱ʼa veʼe yóʼo, saáchi loʼoní ta̱ Salomón ta va̱ása xíni̱ra (1 Crón. 29:1). Ta̱ David xi̱kunda̱a̱-inira ña̱ viíva kana chiñu ña̱ keʼé ta̱ Salomón chi Jehová chindeétáʼan xíʼinra, ta su̱ví ña̱ ndáyáʼvika kúú ku̱i̱ya̱ ta̱ Salomón á ña̱ xíni̱ra keʼéra. Ta nda̱a̱ táki̱ʼva ke̱ʼé ta̱ David, na̱ hermano na̱ xa̱a̱ ku̱chée ndákundeéna káchíñuna nu̱ú Jehová ni nása̱ma chiñuna, ta kúnda̱a̱-inina ña̱ mií Jehová chindeétáʼan xíʼin na̱ hermano na̱ kéʼé chiñu ña̱ xi̱keʼéna tá ya̱chi̱. w21.09 9 párr. 4; 10 párr. 5, 8

Tá ná chika̱a̱-iniyó keʼéyó ku̱a̱ʼáka chiñu nu̱ú Jehová saá kúú ña̱ kusi̱íka-iniyó. Soo ná kotoyó ndáaña kuchiñuyó keʼéyó, ta va̱ása chitáʼanyó ña̱ kéʼéyó xíʼin ña̱ kéʼé inkana. Chi tá ná keʼéyó ña̱yóʼo, kixáʼayó ndakava-iniyó ta ndi̱ʼi̱ní-iniyó (Luc. 14:28). Ni xa̱a̱ síín síín chiñu kéʼéyó nu̱ú Jehová, soo ndáyáʼvinívayó nu̱úra. Jehová ka̱nara miíyó ña̱ kooyó táʼan na̱ ñuura, soo su̱ví xa̱ʼa̱ ña̱ va̱ʼaníka miíyó nu̱ú inkana kúúña, saáchi ka̱nara miíyó xa̱ʼa̱ ña̱ xi̱nira ndáaña ndíka̱a̱ níma̱yó. Ta xi̱nira ña̱ vitá íyo iniyó ta saátu táxiyó ña̱ sánáʼa̱ra miíyó. Ña̱kán kivi kandíxayó ña̱ kúsi̱íníva-inira tá xítora ña̱ chíka̱a̱níyó ndee̱ kachíñuyó nu̱úra. Xa̱ʼa̱ ña̱ kúndeé-iniyó nu̱ú ña̱ va̱ása va̱ʼa, ta nda̱kú íyo iniyó xíʼinra náʼa̱yó ña̱ ndinuʼu-iniyó kándíxayóra (Luc. 8:15). Ña̱kán ná chika̱a̱yó ndee̱ ña̱ taxiyó mií ña̱ va̱ʼaníka ndaʼa̱ Jehová. Tá ná keʼéyó ña̱yóʼo saá kúú ña̱ kusi̱íníka-iniyó xíʼin ña̱ kéʼé miíyó (Gál. 6:4). w21.07 24 párr. 15; 25 párr. 20

Tá kúnda̱a̱-ini na̱ anciano xa̱ʼa̱ iin na̱ hermano na̱ ni̱ki̱ʼvi iin ku̱a̱chi ndeé, káʼa̱nna xíʼin Jehová ña̱ ná taxira ña̱ ndíchi ndaʼa̱na ña̱ vií ndatiinna ku̱a̱chi yóʼo nda̱a̱ táki̱ʼva kúni̱ miíra (Sant. 3:17). Chi ña̱ kúni̱na kúú ña̱ chindeétáʼanna xíʼin na̱ hermano na̱ ni̱ki̱ʼvi ku̱a̱chi yóʼo ña̱ sandákoona ña̱ va̱ása va̱ʼa kéʼéna (Sant. 5:19, 20). Ta saátu kúni̱na kundaana na̱ congregación, ta sándi̱kona-ini na̱ xóʼvi̱ (2 Cor. 1:3, 4). Tá ndátiin na̱ anciano iin ku̱a̱chi ndeé, ña̱ síʼina kéʼéna kúú ña̱ nándukúna xa̱ʼa̱ ndiʼi ña̱ ku̱u, ta ku̱a̱ʼáva tiempo xíniñúʼu keʼéna ña̱yóʼo. Tándi̱ʼi, xíniñúʼu ka̱ʼa̱nna xíʼin Jehová, ta saátu kuniñúʼuna tu̱ʼun Ndióxi̱ ña̱ va̱ʼa taxina consejo ndaʼa̱ na̱ hermano yóʼo ta viíní ndatiinna ku̱a̱chi xíʼinna (Jer. 30:11). Va̱ása kúáchi̱nína tá ndátiinna ku̱a̱chi yóʼo, soo saátu va̱ása kamaní ndátiinnaña. Tá ndíku̱nna ña̱ káʼa̱n Jehová, saá kúú ña̱ va̱ʼaní chíndeétáʼanna xíʼin na̱ congregación. w21.08 10, 11 párr. 12, 13

Xa̱ʼa̱ ña̱ ndeéní xi̱ndika̱a̱ so̱ko chí ñuu Israel, ñá Noemí xíʼin yiíñá ta saátu xíʼin u̱vi̱ se̱ʼeñá nda̱kiʼinna ku̱a̱ʼa̱nna koona chí Moab. Kán ni̱xi̱ʼi̱ yiíñá, ta saátu ti̱ndaʼa̱ u̱vi̱ saá se̱ʼeñá, soo ni̱xi̱ʼi̱tu na̱yóʼova (Rut 1:3-5). Xa̱ʼa̱ ña̱ ndo̱ʼo ñá Noemí ndiʼi ña̱yóʼo, nda̱kavaní-iniñá. Ta xa̱ʼa̱ ña̱ ndeéní ni̱xo̱ʼvi̱ñá, ni̱xa̱a̱ñá nda̱kanixi̱níñá ña̱ íyo Jehová contra xíʼinñá. Ná kotoyó ndáaña ni̱ka̱ʼa̱nñá xa̱ʼa̱ Ndióxi̱, ka̱chiñá: “Jehová kúú ta̱ íyo contra xíʼi̱n, [...] saáchi Ndióxi̱ ta̱ kúúmií ndiʼi ndee̱ ta̱xi ña̱ sákusuchíní-inii̱”. Ta saátu ni̱ka̱ʼa̱nñá ña̱yóʼo: “Jehová íyo contra xíʼi̱n. Ndióxi̱ ta̱ kúúmií ndiʼi ndee̱ sáxo̱ʼvi̱ní yi̱ʼi̱” (Rut 1:13, 20, 21). Jehová kúnda̱a̱-inira ña̱ “nda̱a̱ na̱ ndíchiní kivi xa̱a̱na keʼéna iin ña̱ʼa ña̱ kíʼviní, tá ná ixandi̱va̱ʼana xíʼinna” (Ecl. 7:7). Chi̱ka̱a̱ra-ini ñá Rut ña̱ va̱ʼa na̱ʼa̱ñá ña̱ ndixaní kúʼvi̱-iniñá xíniñá ñáyóʼo. Ñá Rut chi̱ndeétáʼanñá xíʼin si̱soñá ña̱ va̱ása ndakavaníka-iniñá, ta kunda̱a̱-iniñá ña̱ kúʼvi̱va-ini Jehová xínirañá. w21.11 9 párr. 9, 10; 10 párr. 13

Tá xa̱a̱ chíka̱a̱níyó ndee̱ ña̱ kachíñuyó nu̱ú Jehová, ¿á kúni̱ kachiña ña̱ va̱ása xíniñúʼu chika̱a̱yó ndee̱ ña̱ keʼéyó ku̱a̱ʼáka chiñu nu̱úra? Va̱ása, chi kiviva chika̱a̱yó ndee̱ ña̱ viíka natúʼunyó xíʼin na̱ yiví xa̱ʼa̱ Ndióxi̱, ta viíka sanáʼa̱yóna. Ta kivitu chika̱a̱-iniyó chindeétáʼanyó xíʼin na̱ hermanoyó. Kivi xa̱a̱yó keʼéyó ña̱yóʼo tá ndíchi íyoyó, tá vitá íyo iniyó ta ndíʼi̱-iniyó xa̱ʼa̱ inkana nu̱úka ña̱ kundi̱ʼi̱-iniyó xa̱ʼa̱ miíyó (Prov. 11:2; Hech. 20:35). ¿Ndáa chiñu kúú ña̱ kivi keʼékayó nu̱ú Jehová? Ná ka̱ʼa̱nyó xíʼinra chindeétáʼanra xíʼinyó ña̱ keʼéyó chiñu ña̱ kuchiñu kuitíyó keʼéyó (Prov. 16:3). ¿Á kivi chika̱a̱-iniyó ña̱ kooyó precursor auxiliar á regular, ña̱ ku̱ʼu̱nyó Betel á kachíñuyó nu̱ú íxava̱ʼana veʼe nu̱ú ndásakáʼnuyó Ndióxi̱? ¿Á kivitu sakúaʼayó inka tu̱ʼun ña̱ va̱ʼa natúʼunyó xíʼin ku̱a̱ʼáka na̱ yiví, á ku̱ʼu̱nyó inka ñuu nu̱ú xíniñúʼukana na̱ publicador? w21.08 23 párr. 14, 15

Nu̱ú Jehová ndáyáʼviní ña̱ ndixaní kuʼvi̱-inira kunira miíyó (Os. 6:6). Ta xi̱niñúʼura ta̱ profeta Miqueas, ña̱ va̱ʼa ka̱ʼa̱nra xíʼinyó ña̱ ná chindayáʼviníyó ña̱yóʼo (Miq. 6:8, nota). Soo ña̱ va̱ʼa keʼéyó ña̱yóʼo, ná kotoyó ndáaña kúni̱ kachi ña̱ ndixaní kuʼvi̱-iniyó kuniyó inkana. Ña̱ tu̱ʼun “ndixaní kuʼvi̱-iniyó kuniyó inkana”, ki̱ʼva 230 yichi̱ va̱xiña nu̱ú La Biblia. Traducción del Nuevo Mundo. Ta, ¿ndáaña kúni̱ kachi tu̱ʼun ña̱ ndixaní kuʼvi̱-iniyó kuniyó inkana? Glosario ña̱ va̱xi nu̱ú Biblia yóʼo káchiña: “Na̱ ndixaní kúʼvi̱-ini xíni inkana va̱ása sándakoona kuʼvi̱-inina kuninana, nda̱kú íyo inina xíʼinna ta va̱ása kúxíkána nu̱úna. Ta xíniñúʼuníkana tu̱ʼun yóʼo ña̱ va̱ʼa ka̱ʼa̱nna xa̱ʼa̱ ña̱ kúʼvi̱-ini Ndióxi̱ xínira na̱ yiví, soo saátu xíniñúʼunaña ña̱ va̱ʼa ka̱ʼa̱nna xa̱ʼa̱ ña̱ kúʼvi̱-ini iin na̱ yiví xínina inkana”. Jehová kúú ta̱ va̱ʼaníka náʼa̱ ña̱yóʼo. Xa̱ʼa̱ ña̱kán ta̱ rey David ni̱ka̱ʼa̱nra ña̱yóʼo: “Ña̱ ndixaní kúʼvi̱-iniún xíniún ndi̱ʼi̱ Jehová, nda̱a̱ chí ndiví xáa̱ña [...]. Ndáyáʼviní ña̱ ndixaní kúʼvi̱-iniún xíniún ndi̱ʼi̱. Ta na̱ yiví ndáa-inina yóʼó ña̱ chindeétáʼún xíʼinna” (Sal. 36:5, 7). ¿Á chíndayáʼviyó ña̱ ndixaní kúʼvi̱-ini Ndióxi̱ xínira miíyó nda̱a̱ táki̱ʼva ke̱ʼé ta̱ rey David? w21.11 2 párr. 1, 2; 3 párr. 4

Ku̱a̱ʼání kúú na̱ ndásakáʼnu Jehová ta na̱ veʼera kúú na̱yóʼo. Iin na̱yóʼo kúú ta̱ Jesús, ta̱ kúú se̱ʼe nu̱ú Jehová, ta saátu íyo ku̱a̱ʼáníka na̱ ángel se̱ʼera (Col. 1:15; Sal. 103:20). Tá ni̱xi̱yo ta̱ Jesús nu̱ú ñuʼú yóʼo ni̱ka̱ʼa̱nra ña̱ kiviva xa̱a̱ Jehová koora yivá na̱ yiví na̱ nda̱kú íyo ini. Iin yichi̱ tá káʼa̱n ta̱ Jesús xíʼin na̱ discípulora xa̱ʼa̱ Jehová, ka̱chira: “Yivái̱ ta̱ kúú yivá ndóʼó” (Juan 20:17). Ta saátu tá ndátaxiyó miíyó ndaʼa̱ Jehová ta ndákuchiyó, xáa̱yó ndúuyó táʼan na̱ ñuura ta na̱yóʼo xáa̱na ndúuna na̱ veʼeyó (Mar. 10:29, 30). Jehová kúʼvi̱ní-inira xínira miíyó. Ta ta̱ Jesús kúni̱ra ña̱ ná kotoyó Jehová nda̱a̱ táki̱ʼva íyo yiváyó ta̱ kúʼvi̱-ini xíni miíyó, ta kivi ka̱ʼa̱nyó xíʼinra ama kúni̱ miíyó; ta va̱ása kotoyóra nda̱a̱ táki̱ʼva íyo iin na̱ yiví na̱ ndi̱va̱ʼa-ini, na̱ xáʼnda kuití chiñu nu̱úyó. Saáchi siaʼa ki̱xáʼara ni̱ka̱ʼa̱nra: “Yivándi̱”. Ta̱ Jesús kiviva sanáʼa̱ra miíyó ña̱ kixáʼayó ka̱ʼa̱nyó xíʼin Jehová ña̱ kúúra “ta̱ íyoní ndee̱”, “ta̱ i̱xava̱ʼa ndiʼi ña̱ʼa” á “Rey ta̱ íyo ndiʼi tiempo”, ta kiviva kuniñúʼuyó ña̱yóʼo chi nu̱ú Biblia va̱xiña (Gén. 49:25; Is. 40:28; 1 Tim. 1:17). Soo va̱ása níxiniñúʼu ta̱ Jesús tu̱ʼun yóʼo, saáchi tu̱ʼun ña̱ xi̱niñúʼura kúú “Yivá”. w21.09 20 párr. 1, 3

Ta̱ rey Manasés, va̱ása níxiinra kuniso̱ʼora ña̱ ni̱ka̱ʼa̱n Jehová xíʼinra tá chi̱ndaʼára na̱ profeta ni̱xa̱ʼa̱n nu̱úra. Xa̱ʼa̱ ña̱yóʼo “mií Jehová chi̱ka̱a̱-ini na̱ soldado ta̱ rey ñuu Asiria, ña̱ ni̱xa̱a̱na ka̱nitáʼanna” xíʼin na̱ ñuu Judá. “Ta ti̱inna ta̱ Manasés ta chi̱ka̱a̱na ka̱a ndaʼa̱ra xíʼin xa̱ʼa̱ra, ta nda̱kiʼinnara ku̱a̱ʼa̱n xíʼinna chí Babilonia”. Tá ndíka̱a̱ra chí Babilonia nda̱kaniníxi̱níra xa̱ʼa̱ ña̱ ke̱ʼéra. Ta “nda̱ndikóní-inira nu̱ú Ndióxi̱”. Soo íyo inkaka ña̱ ke̱ʼéra, chi “ki̱xáʼara xa̱kundáʼvira nu̱ú Ndióxi̱”, ta nda̱kundeéra ni̱ka̱ʼa̱nra xíʼinra (2 Crón. 33:10-12). Tá ni̱ya̱ʼa tiempo, nda̱kuiinva Jehová oración ña̱ ke̱ʼé ta̱ Manasés nu̱úra. Saáchi ki̱ʼinra kuenta ña̱ na̱sama ña̱ ndíka̱a̱ níma̱ ta̱yóʼo. Ku̱ndáʼviní-ini Jehová xi̱nirara, ta ta̱xira ña̱ ná kaʼndachíñu tukura. Ta̱ Manasés chi̱ka̱a̱níra ndee̱ ña̱ ni̱na̱ʼa̱ra ña̱ ndixa nda̱ndikó-inira. w21.10 4 párr. 10, 11

Ta̱ Áquila xíʼin ñá Priscila xi̱niñúʼu sandákoona ñuuna, ta tá ni̱xa̱a̱na inka ñuu xi̱niñúʼu ndukúna iin veʼe nu̱ú koona. Ta saátu xi̱niñúʼu ndukúna nu̱ú kivi koo negocio ña̱ xi̱kuumiína, saáchi veʼe válí ña̱ manta xi̱ ixava̱ʼana. Tá ni̱xa̱a̱na ñuu Corinto ki̱xáʼana chíndeétáʼanna xíʼin na̱ congregación, ta saátu chi̱ndeétáʼanna xíʼin ta̱ apóstol Pablo ña̱ va̱ʼa ndasandakúna-ini na̱ hermano. Tá ni̱ya̱ʼa tiempo, nda̱kiʼinna ku̱a̱ʼa̱nna koona inka ñuu nu̱ú kúma̱ní na̱ natúʼun xíʼin na̱ yiví xa̱ʼa̱ Ndióxi̱ (Hech. 18:18-21; Rom. 16:3-5). Ku̱a̱ʼání chiñu ni̱xi̱yo nu̱úna, soo saátu xi̱kusi̱íní-inina. Na̱ xa̱a̱ ti̱ndaʼa̱, kivi kundiku̱nna yichi̱ ñá Priscila xíʼin ta̱ Áquila tá siʼna chiñu Ndióxi̱ ná kundi̱ʼi̱-inina xa̱ʼa̱. Tá sa̱kán ki̱xáʼana xíkana xíʼin táʼanna, saá kúú ña̱ ndáyáʼviní natúʼunna xa̱ʼa̱ chiñu ña̱ kúni̱na keʼéna nu̱ú Ndióxi̱. Tá xa̱a̱ ya̱chi̱ka chíka̱a̱-inina keʼéna ku̱a̱ʼáka chiñu nu̱ú Jehová, ta chíka̱a̱na ndee̱ ña̱ xa̱a̱na keʼéna ña̱yóʼo, saá kúú ña̱ kiʼinníkana kuenta ndáa ki̱ʼva chíndeétáʼan ña̱ espíritu santo xíʼinna (Ecl. 4:12). w21.11 16, 17 párr. 11, 12

Ndiʼivayó xíniñúʼu kuniso̱ʼo ña̱ ni̱ka̱ʼa̱n Jehová ña̱ ixato̱ʼóyó na̱ yiváyó. Ta ná ndakaʼányó chi tá kúma̱níka ka̱ʼa̱n Jehová ña̱ ixato̱ʼóna na̱ yivána, siʼna ni̱ka̱ʼa̱nra ña̱yóʼo xíʼinna: “Xíniñúʼu yi̱i̱ koondó, saáchi yi̱ʼi̱ Jehová Ndióxi̱ndó, ta̱ yi̱i̱ kúi̱” (Lev. 19:2). Iin tá iinyó ná ndakanixi̱níyó xa̱ʼa̱ ña̱yóʼo: “¿Á íxato̱ʼíi̱ na̱ yivái̱ nda̱a̱ táki̱ʼva kúni̱ Ndióxi̱?”. Tá xítoyó ña̱ va̱ása níxi̱keʼéyóña tá ya̱chi̱, kivi chika̱a̱yó ndee̱ ña̱ viíka keʼéyó xíʼinna vitin. Ni va̱ása kívi nasamayó ña̱ xa̱a̱ ke̱ʼéyó, soo kiviva chika̱a̱yó ndee̱ keʼéyó ku̱a̱ʼáka ña̱ʼa ña̱ va̱ʼa chindeétáʼanyó xíʼin na̱ yiváyó. Kivi taváyó tiempo ña̱ kutáʼankayó xíʼinna, ña̱ taxiyó ña̱ xíniñúʼuna, ña̱ chindeétáʼanyó xíʼinna ña̱ kachíñukana nu̱ú Jehová ta saátu kivi ka̱ʼa̱nyó tu̱ʼun va̱ʼa xíʼinna. Tá saá ná keʼéyó, na̱ʼa̱yó ña̱ ndíku̱nyó ña̱ káʼa̱n Levítico 19:3. w21.12 4, 5 párr. 10-12

Ta̱ rey David ni̱ki̱si̱ra xíʼin ñá Bat-Seba ta ndu̱kúra ki̱ʼva ña̱ kaʼnína yiíñá (2 Sam. 11:2-4, 14, 15, 24). Xa̱ʼa̱ ña̱yóʼo, su̱ví iinlá miíra níxo̱ʼvi̱ xa̱ʼa̱ ña̱ ke̱ʼéra, chi nda̱a̱ na̱ veʼera sa̱xóʼvi̱ra ta saátu inkaka ná síʼira (2 Sam. 12:10, 11). Ta inka yichi̱ ni̱na̱ʼa̱ra ña̱ va̱ása ndáa-inira Jehová, saáchi nda̱kaʼvira ndiʼi na̱ ta̱a na̱ xáʼa̱n nu̱ú ku̱a̱chi ti̱xin ñuu Israel. Ta va̱ása níka̱ʼa̱n Jehová xíʼinra keʼéra ña̱yóʼo, sana ke̱ʼéraña saáchi ni̱nuní xi̱kunira xa̱ʼa̱ ña̱ ku̱a̱ʼání xi̱kuu na̱ xi̱xa̱ʼa̱n nu̱ú ku̱a̱chi. Ta nda̱kanixi̱níra ña̱ kǒo na̱ kuchiñu kanitáʼan xíʼinna. ¿Ndáaña ku̱u xa̱ʼa̱ ña̱yóʼo? 70,000 na̱ ñuu Israel ni̱xi̱ʼi̱ xa̱ʼa̱ ña̱ ta̱xi Jehová kue̱ʼe̱ ki̱xi sa̱tána (2 Sam. 24:1-4, 10-15). ¿Á ka̱ʼa̱nyó ña̱ va̱ása va̱ʼa xa̱ʼa̱ ta̱ rey David, ta ndakanixi̱níyó ña̱ va̱ása xíniñúʼu kundáʼvi-ini Ndióxi̱ kunirara? Su̱ví saá níndakanixi̱ní Jehová xa̱ʼa̱ra. Chi nda̱kaʼánra ña̱ nda̱kúní ni̱xi̱yo ini ta̱ David xíʼinra tá xa̱ʼa̱, ta saátu ki̱ʼinra kuenta ña̱ xíʼin ndiʼi níma̱ra nda̱ndikó-inira. Ña̱kán, i̱xakáʼnu-ini Jehová xa̱ʼa̱ ku̱a̱chi ña̱ ni̱ki̱ʼvira. Xi̱kunda̱a̱-ini Jehová ña̱ xi̱kuʼvi̱ní-ini ta̱ David xi̱xinirara, ta xi̱kuni̱ra keʼéra ña̱ va̱ʼa. ¿Á va̱ása kúsi̱í-iniyó xa̱ʼa̱ ña̱ xíto Ndióxi̱ ña̱ va̱ʼa ña̱ kéʼéyó? (1 Rey. 9:4; 1 Crón. 29:10, 17). w21.12 19 párr. 11-13

Ta̱ Jesús ku̱ndáʼvi-inira xi̱nira na̱ yiví na̱ kúáa, na̱ sóʼó á na̱ va̱ása níxi̱kuchiñu kaka. Ná ndakaʼányó xa̱ʼa̱ ña̱ ni̱ka̱ʼa̱nra xíʼin ta̱ Juan ta̱ xi̱sandákuchi na̱ yiví: “Vitin na̱ kúáa xa̱a̱ xítona, na̱ kǒo kívi kaka xa̱a̱ xíkana, na̱ kúúmií lepra xa̱a̱ ndúva̱ʼana, na̱ sóʼó xa̱a̱ xíniso̱ʼona, na̱ ni̱xi̱ʼi̱ ndátakuna”. Ta tá xi̱ni na̱ yiví milagro ña̱ xi̱keʼé ta̱ Jesús “ki̱xáʼana ndásakáʼnuna Ndióxi̱” (Luc. 7:20-22). Miíyó na̱ ndásakáʼnu Ndióxi̱ ndíku̱nyó yichi̱ ta̱ Jesús saáchi va̱ʼa íyo iniyó xíʼin na̱ kúáa, na̱ sóʼó á na̱ va̱ása kívi kaka, kúndáʼvi-iniyó xíniyóna ta kúee íyo iniyó xíʼinna. Ni va̱ása nítaxi Jehová ndee̱ ndaʼa̱yó ña̱ keʼéyó milagro. Soo ta̱xivara iin chiñu ña̱ ndáyáʼviní ndaʼa̱yó: ña̱ natúʼunyó xíʼin na̱ kúáa ña̱ si̱lóʼo kúma̱ní ta ndakotona. Ta saátu ña̱ natúʼunyó xíʼin na̱ va̱ása kúnda̱a̱-ini xa̱ʼa̱ra, ña̱ si̱lóʼo kúma̱ní ndulivi nu̱ú ñuʼú yóʼo tasaá xa̱a̱na ndakutáʼan viína xíʼinra (Luc. 4:18). Ña̱ nátúʼunyó xíʼin na̱ yiví xa̱a̱ chíndeétáʼanña xíʼin ku̱a̱ʼánína ña̱ kixáʼana ndasakáʼnuna Jehová. w21.12 9 párr. 5

Kúnda̱a̱-iniyó ña̱ viíní xi̱niñúʼu ta̱ Santiago tu̱ʼun Ndióxi̱ tá xi̱sanáʼa̱ra. Ta xi̱niñúʼura ña̱yóʼo ña̱ va̱ʼa chindeétáʼanra xíʼin na̱ yiví kunda̱a̱-inina ña̱ ku̱a̱ʼání ña̱ va̱ʼa táxi Jehová ndaʼa̱ na̱ nda̱kú-ini xíʼinra nda̱a̱ táki̱ʼva ke̱ʼé ta̱ Job. Tá sa̱náʼa̱ ta̱ Santiago ña̱yóʼo va̱ása níxiniñúʼura tu̱ʼun ndíchi, ta va̱ása yo̱ʼvi̱ níndakanira xa̱ʼa̱ña. Xíʼin ña̱yóʼo ni̱na̱ʼa̱ra ña̱ va̱ása níxi̱kuni̱ra ka̱ʼa̱n va̱ʼana xa̱ʼa̱ra chi ña̱ xi̱kuni̱ra kúú ña̱ ka̱ʼa̱n va̱ʼana xa̱ʼa̱ Jehová. Ña̱ sákuaʼayó: ná va̱ása kuniñúʼuyó tu̱ʼun yo̱ʼvi̱ tá sánáʼa̱yó ta ná kuniñúʼuyó tu̱ʼun Ndióxi̱. Tá sánáʼa̱yó na̱ yiví su̱ví ña̱ kúni̱yó kúú ña̱ ná kunina ña̱ xíni̱níyó, chi ña̱ kúni̱yó kúú ña̱ ná kunda̱a̱-inina ña̱ ndíchiní Jehová ta ndíʼi̱-inira xa̱ʼa̱na (Rom. 11:33). Ta kivi keʼéyó ña̱yóʼo tá chíka̱a̱yó ndee̱ ña̱ kuniñúʼuyó tu̱ʼun Ndióxi̱ tá sánáʼa̱yó na̱ yiví. Tá kúú, ná va̱ása ka̱ʼa̱nyó xíʼin na̱ káʼviyó xíʼin ndáaña keʼéyó tá ná ndoʼoyó táʼan ña̱ ndóʼona, va̱ʼaka ná chindeétáʼanyó xíʼinna ndakanixi̱nína xa̱ʼa̱ na̱ ni̱xi̱yo tá ya̱chi̱, ta saátu ná chindeétáʼanyó xíʼinna kunda̱a̱-inina ndáaña ndákanixi̱ní Jehová xíʼin ña̱ ndáka̱xinna keʼéna. Tasaá kixáʼana keʼéna ña̱ sákuaʼana xa̱ʼa̱ ña̱ kúni̱na sakúsi̱ína-ini Jehová, ta su̱ví xa̱ʼa̱ ña̱ kúni̱na sakúsi̱ína-iniyó. w22.01 10, 11 párr. 9, 10

Jehová va̱ása káʼa̱n kuitíra xíʼinyó ña̱ va̱ása xíniñúʼu ixandi̱va̱ʼayó xíʼin inkana. Chi ña̱yóʼo káʼa̱nra xíʼinyó: “Kuʼvi̱-iniún kuniún inkana nda̱a̱ táki̱ʼva kúʼvi̱-iniún xíniún miíún”. Ña̱kán, na̱ kúni̱ sakúsi̱í-ini Ndióxi̱ ndáyáʼviní keʼéna ña̱yóʼo. Ná kotoyó ndáa ki̱ʼva ni̱ka̱ʼa̱n ta̱ Jesús xa̱ʼa̱ ley ña̱ va̱xi nu̱ú Levítico 19:18. Iin yichi̱ iin ta̱ fariseo ni̱nda̱ka̱tu̱ʼunra ta̱ Jesús: “¿Ndáa chiñu ña̱ xáʼnda Ndióxi̱ kúú ña̱ káʼnuka nu̱ú ndiʼi Ley?”. Ta̱ Jesús ni̱ka̱ʼa̱nra xíʼinra ña̱ ndáyáʼvika kúú ña̱ kuʼvi̱-inira kunira Jehová xíʼin ndiʼi níma̱ra, xíʼin ndiʼi ña̱ tákura, ta saátu xíʼin ndiʼi ña̱ ndákanixi̱níra. Tasaá ni̱ka̱ʼa̱nra xa̱ʼa̱ ña̱ va̱xi nu̱ú Levítico 19:18, ta ka̱chira: “Ña̱yóʼo kúú ña̱ u̱vi̱: ‘Kuʼvi̱-iniún kuniún inka na̱ yiví nda̱a̱ táki̱ʼva kúʼvi̱-iniún xíniún miíún’” (Mat. 22:35-40). Íyo ku̱a̱ʼání ki̱ʼva ña̱ na̱ʼa̱yó ña̱ kúʼvi̱-iniyó xíniyó inkana. Iin ki̱ʼva ña̱ na̱ʼa̱yó ña̱ kúʼvi̱-iniyó xíniyó inkana kúú ña̱ keʼéyó ña̱ káʼa̱n Levítico 19:18, ña̱ káchi: “Kǒo keʼún ña̱ va̱ása va̱ʼa xíʼin inkana xa̱ʼa̱ ña̱ ke̱ʼéna ña̱ va̱ása va̱ʼa xíʼún, ta ni va̱ása sa̱a̱-iniún kuniún na̱ ñuu miíún”. w21.12 10, 11 párr. 11-13

Ndi̱ku̱n ti̱in ta̱ Jesús ndaʼa̱ Pedro ta sa̱kǎkurara. Ta̱ Pedro ku̱chiñura ni̱xi̱kara nu̱ú ti̱kui̱í ni ndeéní kánda̱rá, saáchi xi̱to káxira nu̱ú ta̱ Jesús, soo tá xi̱tora ña̱ ndeéní kúun sa̱vi̱, ni̱yi̱ʼvíra ta ki̱xáʼara ni̱xi̱ka-inira tasaá ki̱xáʼara sáʼvira ti̱xin ti̱kui̱í (Mat. 14:24-31). Íyo iin ña̱ ndáyáʼviní sákuaʼayó xíʼin ña̱ ndo̱ʼo ta̱ apóstol Pedro. Tá nu̱ura ini barco kán ta ki̱xáʼara xíkara nu̱ú ti̱kui̱í, va̱ása níndakanixi̱níra ña̱ yi̱ʼvíra ixaa sa̱vi̱ kán ta kixáʼara sa̱ʼvira ti̱xin ti̱kui̱í. Saáchi ña̱ xi̱kuni̱ra kúú ña̱ xa̱a̱ra nda̱a̱ nu̱ú níndichi ta̱ Jesús, soo va̱ása níkuchiñura chi ki̱xáʼara xítora ña̱ ndeéní kúun sa̱vi̱. Miíyó va̱ása xíkayó nu̱ú ti̱kui̱í, soo yáʼavayó nu̱ú tu̱ndóʼo ña̱ ndeéní nu̱ú xíniñúʼu na̱ʼa̱yó á kándíxayó Ndióxi̱. Tá ná sandákooyó kandíxayó Jehová ta saátu tá ná va̱ása kandíxakayó ña̱ káʼa̱nra keʼéra chí nu̱únínu, kivi xa̱a̱yó kuxíkáyó nu̱úra, ta nda̱a̱ táki̱ʼva koo na̱ sa̱ʼvi ti̱xin ti̱kui̱í saá kooyó. Ña̱kán, ni nda̱a̱ ndáaka tu̱ndóʼo ná kixi nu̱úyó, ná kandíxayó ña̱ chindeétáʼan Jehová xíʼinyó. w21.12 17, 18 párr. 6, 7

Tá káʼa̱nyó xíʼin Jehová, tá káʼviyó tu̱ʼunra ta ndákanixi̱níyó xa̱ʼa̱ña, iin ki̱ʼva ña̱ ndásakáʼnuyóra kúú ña̱yóʼo. Tá kéʼéyó oración: saá kúú ña̱ nátúʼunyó xíʼin yiváyó Jehová ta̱ kúʼvi̱ní-ini xíni miíyó. Tá káʼviyó Biblia: saá kúú ña̱ sákuaʼakayó xa̱ʼa̱ Jehová, ta̱ ndíchiníka nu̱ú ndiʼina (Prov. 2:1-5). Ta tá ndákanixi̱níyó xa̱ʼa̱ ña̱ káʼviyó: saá kúnda̱a̱ka-iniyó xa̱ʼa̱ ña̱ va̱ʼa ña̱ kúúmií Jehová, xíʼin ña̱ káʼa̱nra keʼéra chí nu̱únínu. Ña̱yóʼo kúú iin ki̱ʼva ña̱ viíníka kuniñúʼuyó tiempoyó, soo loʼova tiempo kúúmiíyó. Ña̱kán, ¿ndáaña chindeétáʼan xíʼinyó ña̱ vií kuniñúʼuyóña? Ná ndukúyó iin lugar ña̱ táxi̱n. Ná kotoyó ndáa ki̱ʼva ke̱ʼé ta̱ Jesús ña̱yóʼo. Tá ki̱xáʼara nátúʼunra xíʼin na̱ yiví xa̱ʼa̱ Ndióxi̱, siʼna ni̱xa̱ʼa̱nra 40 ki̱vi̱ chí nu̱ú ñuʼú yi̱chí (Luc. 4:1, 2). Ta kán ni̱xi̱yo tiempo nu̱úra ña̱ ni̱ka̱ʼa̱nra xíʼin yivára, ta saátu nda̱kanixi̱níra xa̱ʼa̱ ña̱ kúni̱ yivára ná keʼéra. Ña̱yóʼo chi̱ndeétáʼan xíʼinra ni̱ya̱ʼara nu̱ú tu̱ndóʼo ña̱ ki̱xi nu̱úra. w22.01 27, 28 párr 7, 8

Tá káʼa̱n iin na̱ anciano á iin na̱ hermano na̱ xa̱a̱ xu̱xa-ini xíʼinyó ndáaña xíniñúʼu viíka keʼéyó, saá náʼa̱na ña̱ kúʼvi̱ní-inina xínina miíyó. Va̱ása íxayo̱ʼvi̱ña xíʼinyó ndakuniyó ña̱ kúúyó na̱ yiví ku̱a̱chi. Soo tá káʼa̱n inkana xíʼinyó xa̱ʼa̱ iin ña̱ va̱ása va̱ʼa kéʼéyó, sana íxayo̱ʼvi̱ña xíʼinyó ndakuniyó ña̱yóʼo. Ña̱kán íxayo̱ʼvi̱níña xíʼinyó kundiku̱nyó consejo ña̱ táxi inkana ndaʼa̱yó, ta sana nda̱a̱ sáa̱yó (Ecl. 7:9). Ta sana nda̱a̱ kixáʼayó ka̱ʼa̱nyó ña̱ íyova iin xa̱ʼa̱ kúú ña̱ kéʼéyó saá, á kixáʼayó va̱ása va̱ʼa ndakanixi̱níyó xa̱ʼa̱ na̱ ta̱xi consejo ndaʼa̱yó á nda̱a̱ kivi sa̱a̱yó xíʼinna xa̱ʼa̱ ki̱ʼva ña̱ ni̱ka̱ʼa̱nna xíʼinyó. Ta nda̱a̱ kivi ndakanixi̱níyó ña̱yóʼo: “¿Nda̱chun táxina consejo ndaʼíi̱ tá saátu kéʼé miívana?”. Ta tá va̱ása níkutóoyó consejo yóʼo sana va̱ása kundiku̱nvíyóña, á sana ndukúyó consejo nu̱ú inkana saáchi kúni̱yó ña̱ ná ka̱ʼa̱nna xíʼinyó ña̱ kútóo miíyó. w22.02 8, 9 párr. 2-4

¿Á koo ña̱ kasi nu̱úyó ña̱ kandíxayó Jehová nu̱ú ñuyǐví xa̱á? Ná ndakanixi̱níyó ndáaña ku̱u tá ta̱vá Jehová na̱ ñuu Israel ti̱xin ñuu Egipto. Savana ki̱xáʼana káʼa̱n kúáchina saáchi xi̱ndakaʼánna xa̱ʼa̱ ña̱ʼa ña̱ xi̱xixina ñuu Egipto, ta va̱ása níchindayáʼvina maná ña̱ xi̱taxi Jehová xi̱xixina (Núm. 11:4-6; 21:5). ¿Á kivi kundoʼoyó táʼan ña̱yóʼo tá ná ndiʼi ña̱ gran tribulación? Sana ku̱a̱ʼání chiñu keʼéyó ña̱ va̱ʼa ndaya̱kúnyó ñuʼú yóʼo tasaá xa̱a̱ña nduliviña. Sana ixayo̱ʼvi̱vaña xíʼinyó chi koo ku̱a̱ʼání chiñu. ¿Á ka̱ʼa̱n kúáchiyó xíʼin Jehová xa̱ʼa̱ ña̱yóʼo? Tá nda̱a̱ tiempo vitin chíndayáʼviyó ndiʼi ña̱ táxi Jehová ndaʼa̱yó, saátu chindayáʼviyó ndiʼi ña̱ taxira ndaʼa̱yó chí nu̱únínu. w22.02 7 párr. 18, 19

Profecía ña̱ va̱xi nu̱ú Zacarías 8:23, tá káʼa̱nña xa̱ʼa̱ “iin ta̱ judío” ta saátu tá káʼa̱nña “kúni̱ndi̱ ku̱ʼu̱nndi̱ xíʼinndó”, xa̱ʼa̱ na̱ ku̱ʼu̱n chí ndiví na̱ kíndo̱oka nu̱ú ñuʼú yóʼo káʼa̱nña (Rom. 2:28, 29). Tá káʼa̱nña xa̱ʼa̱ “u̱xu̱ na̱ ta̱a na̱ káʼa̱n xa̱a̱ síín síín tu̱ʼun”, xa̱ʼa̱ na̱ ndátu koo nu̱ú ñuʼú yóʼo káʼa̱nña. Ta na̱yóʼo kútu̱ní tíinna ti̱ko̱to̱ na̱ ku̱ʼu̱n chí ndiví, ña̱yóʼo kúni̱ kachiña ña̱ nda̱kúní-inina xíʼinna, ta inkáchi ndásakáʼnuna Jehová xíʼinna. Profecía ña̱ Ezequiel 37:15-19, 24, 25, xa̱a̱ sáxi̱nu Jehová profecía yóʼo, saáchi chíndeétáʼanra xíʼin na̱ ku̱ʼu̱n chí ndiví ña̱ inkáchi kachíñuna xíʼin na̱ ndátu koo nu̱ú ñuʼú yóʼo. Profecía yóʼo káʼa̱nña xa̱ʼa̱ u̱vi̱ yitu̱n. Na̱ ku̱ʼu̱n chí ndiví íyona nda̱a̱ táki̱ʼva íyo yitu̱n tú “kuenta ta̱ Judá”, (ti̱xin tribu yóʼo xi̱ndaka̱xinna na̱ xi̱kuu rey ti̱xin ñuu Israel). Ta na̱ ndátu koo nu̱ú ñuʼú yóʼo, íyona nda̱a̱ táki̱ʼva íyo yitu̱n tú “kuenta ta̱ Efraín”. Mií Jehová ndachitáʼan u̱vi̱ saá na̱yóʼo ña̱ va̱ʼa xa̱a̱na nduuna “iinlá yitu̱n”. Ña̱yóʼo kúni̱ kachiña, ña̱ inkáchi kachíñuna nu̱ú ta̱ Cristo Jesús ta kúú rey nu̱úna (Juan 10:16). w22.01 22 párr. 9, 10

Ta̱ Jesús ni̱ka̱ʼa̱nra xa̱ʼa̱ na̱ xi̱taxi xu̱ʼún ndaʼa̱ na̱ nda̱ʼví ta xi̱kuni̱na ná kunda̱a̱-ini inkana xa̱ʼa̱ ña̱yóʼo. Soo va̱ása níxikusi̱í-ini Jehová xíʼin ña̱ xi̱keʼéna (Mat. 6:1-4). Tá kúni̱yó va̱ʼa koo iniyó xíʼin inkana xíniñúʼu chindeétáʼanyó xíʼinna xa̱ʼa̱ ña̱ ndixa ndíʼi̱-iniyó xa̱ʼa̱na ta su̱ví xa̱ʼa̱ ña̱ kúni̱yó ná ka̱ʼa̱n va̱ʼana xa̱ʼa̱yó. Ná ndakanixi̱níyó xa̱ʼa̱ ña̱yóʼo: “Tá ndixa va̱ʼa-inii̱, ¿á chíndeétáʼi̱n xíʼin inkana? ¿Nda̱chun kéʼíi̱ ña̱ va̱ʼa xa̱ʼa̱na?”. Jehová íyo tu̱ʼvara ña̱ chindeétáʼanra xíʼinyó saátu kéʼé espíritu santora (Gén. 1:2). Ña̱yóʼo kúni̱ kachiña ña̱ iin tá iin ña̱ va̱ʼa ña̱ táxi espíritu santo Ndióxi̱ ndaʼa̱yó kivi chindaʼáña miíyó ña̱ ndasaxa̱áyó ki̱ʼva ña̱ kéʼéyó. Tá kúú ta̱ discípulo Santiago ka̱ʼyíra ña̱yóʼo: “Saátu íyo ña̱ kándíxayó Ndióxi̱, tá kǒo ni iin ña̱ʼa ña̱ va̱ʼa kéʼéyó ni loʼoví va̱ása ndáyáʼvi ña̱ kándíxayóra” (Sant. 2:26). Ta ki̱ʼva saátu kúu xíʼin inkaka ña̱ va̱ʼa ña̱ táxi espíritu santo Ndióxi̱ ndaʼa̱yó. Ña̱kán, tá ndiʼi ki̱vi̱ náʼa̱yó ña̱yóʼo saá kúú ña̱ náʼa̱yó ña̱ táxiyó ná chindeétáʼan espíritu santo Ndióxi̱ xíʼinyó. w22.03 11 párr. 14-16

Miíyó na̱ ndásakáʼnu Ndióxi̱ xa̱a̱ síín síín chiñu kéʼéyó nu̱úra, ta ku̱a̱ʼání ña̱ kéʼéyó ña̱ va̱ʼa chindeétáʼanyó xíʼin inkana. Soo ta̱ apóstol Pedro ni̱ka̱ʼa̱nra xa̱ʼa̱ iin ña̱ ndáyáʼviní xíniñúʼu keʼéyó. Tá kúma̱níka ka̱ʼa̱nra xíʼinyó ña̱ xíniñúʼu yi̱i̱ kooyó, ña̱yóʼo ni̱ka̱ʼa̱nra: “Koo tu̱ʼvandó ña̱ ndeéní kachíñundó” (1 Ped. 1:13). ¿Ndáa chiñu kúú ña̱yóʼo? Ta̱yóʼo ni̱ka̱ʼa̱nra ña̱ na̱ ku̱ʼu̱n chí ndiví, natúʼunna iníísaá nu̱ú ñuʼú xa̱ʼa̱ ña̱ va̱ʼaní-ini Ndióxi̱ (1 Ped. 2:9). Ta tiempo vitin ndiʼi miíyó na̱ ndásakáʼnu Ndióxi̱ kéʼéyó chiñu ña̱ ndáyáʼviní yóʼo, ta va̱ʼaní chíndeétáʼanña xíʼin na̱ yiví. Ña̱kán iin chiñu ña̱ ndáyáʼviní kúú ña̱ kúúmiíyó, saáchi xíʼin ña̱ si̱í-ini nátúʼunyó xíʼin na̱ yiví xa̱ʼa̱ Ndióxi̱ ta sánáʼa̱yóna (Mar. 13:10). Ná chika̱a̱yó ndee̱ ña̱ kundiku̱nyó consejo ña̱ va̱xi nu̱ú Levítico 19. Tasaá na̱ʼa̱yó ña̱ kúʼvi̱-iniyó xíniyó Ndióxi̱, ta saátu ña̱ kúʼvi̱-iniyó xínitáʼanyó, ta kúni̱yó yi̱i̱ koo ndiʼi ña̱ kéʼéyó. w21.12 13 párr. 18

Ta̱ Pablo nina ña̱ va̱ʼa ña̱ xi̱keʼé na̱ hermano kúú ña̱ xi̱kiʼinra kuenta xíʼin. Xi̱kunda̱a̱-inira ña̱ tá iinna kéʼéna ña̱ va̱ása va̱ʼa su̱ví ña̱yóʼo kúni̱ kachina ña̱ kúúna iin na̱ yiví na̱ va̱ása va̱ʼa. Xi̱kuʼvi̱ní-inira xi̱xinira na̱ hermano ta xi̱kiʼinra kuenta xíʼin ña̱ va̱ʼa ña̱ kéʼéna. Tá xi̱kiʼinra kuenta ña̱ íyo iin ña̱ va̱ása va̱ʼa kéʼé iin na̱ hermano xi̱ndakanixi̱níra ña̱ kúni̱vana keʼéna ña̱ va̱ʼa soo xíniñúʼuna iin na̱ chindeétáʼan xíʼinna. Ná ka̱ʼa̱nyó xa̱ʼa̱ ndáa ki̱ʼva chi̱ndeétáʼan ta̱ apóstol Pablo xíʼin u̱vi̱ ná hermana ná xi̱ñuʼu congregación ña̱ Filipos (Filip. 4:1-3). Sana ñá Evodia xíʼin ñá Síntique va̱ása níxikitáʼankana xa̱ʼa̱ ña̱ ka̱ku iin ku̱a̱chi xíʼin táʼanná. Ta̱ Pablo va̱ása níndaʼyi̱ra nu̱úná ta ni kǒo níka̱ʼa̱nndaara xa̱ʼa̱ná. Nu̱úka ña̱yóʼo ki̱ʼinra kuenta xíʼin ña̱ va̱ʼa ña̱ xi̱keʼéná chi xi̱kunda̱a̱-inira ña̱ xa̱a̱ ku̱a̱ʼání ku̱i̱ya̱ nda̱kú íyo ininá xíʼin Jehová. Ta saátu xi̱kunda̱a̱-inira ña̱ kúʼvi̱ní-ini Jehová xíniraná. Xa̱ʼa̱ ña̱ viíní xi̱ndakanixi̱níra xa̱ʼa̱ná ni̱ka̱ʼa̱nra xíʼinná ña̱ ná ndasaviíná ku̱a̱chi ña̱ xi̱kuumiíná. Saátu xi̱ndakanixi̱níra xa̱ʼa̱ ndiʼi na̱ hermano, ta ña̱yóʼo chi̱ndeétáʼanña xíʼinra ña̱ kusi̱í-inira ta vií kutáʼanra xíʼin ndiʼi na̱ xi̱ñuʼu ti̱xin congregación kán. w22.03 30 párr. 16-18

Tá sándi̱ko Jehová iniyó, va̱ʼaní kúniyó ta chíndeétáʼanra xíʼinyó ña̱ vií ndakanixi̱níyó. Saá ndo̱ʼo iin ñá hermana ñá naní Luz. Ñáyóʼo káchiñá: “Sava yichi̱ túvii̱ ña̱ íyo mitúʼi̱n, ta xa̱ʼa̱ ña̱yóʼo kíxáʼíi̱ ndákanixi̱níi̱ ña̱ va̱ása kúʼvi̱-ini Jehová xínira yi̱ʼi̱. Soo kama kíxáʼíi̱ nátúʼi̱n xíʼin Jehová xa̱ʼa̱ ña̱ ndóʼi̱. Ta va̱ʼaní chíndeétáʼan ña̱yóʼo xíʼi̱n ña̱ vií ndakanixi̱níi̱”. Ña̱ ndóʼo ñá hermana yóʼo náʼa̱ña nu̱úyó ña̱ va̱ʼaní kúniyó tá káʼa̱nyó xíʼin Jehová (Filip. 4:6, 7). Kandíxayó ña̱ chindeétáʼan Jehová xíʼin ta̱ Jesús xíʼinyó tá ná kuvi iin na̱ veʼeyó. Ta saátu sa̱kúaʼayó ña̱ xíniñúʼu natúʼunyó xíʼin na̱ yiví xa̱ʼa̱ ña̱ kúndáʼvi-iniyó xíniyóna chi saá kéʼé mií Jehová xíʼin ta̱ Jesús. Ta va̱ʼaní kúniyó tá kúnda̱a̱-iniyó ña̱ mií Jehová xíʼin ta̱ Jesús, va̱ʼaní kúnda̱a̱-inina xíʼin ña̱ ndóʼoyó, ta chindeétáʼanna xíʼinyó ña̱ kundeé-iniyó. Ndátuyó kixaa̱ ki̱vi̱ ña̱ saxínu Jehová tu̱ʼun yóʼo: “Ndaya̱kúnra ti̱kui̱í nu̱úna” (Apoc. 21:4). w22.01 15 párr 7; 18, 19 párr. 19, 20

Ta̱ Jesús ni̱ka̱ʼa̱nra xa̱ʼa̱ u̱vi̱ yéʼé ña̱ kúúmií xa̱a̱ síín síín yichi̱, iinña “ndíka̱” ta iinña “táñu” (Mat. 7:14). Kǒo inkaka yichi̱ íyo. Ña̱kán, iin tá iinyó xíniñúʼu ndaka̱xinyó ndáa yichi̱ ku̱ʼu̱nyó ta xíniñúʼu viíní ndaka̱xinyó ña̱yóʼo, saáchi ña̱yóʼo kúú ña̱ chindeétáʼan xíʼinyó kutakuyó ndiʼi tiempo. Ku̱a̱ʼánína ndáka̱xinna ku̱ʼu̱nna yichi̱ ña̱ “ndíka̱”, saáchi va̱ása yo̱ʼvi̱ví ku̱ʼu̱nna nu̱úña. Ta va̱ása xíínna sandákoona yichi̱ yóʼo chi ndíku̱nna ña̱ kéʼé inkaka na̱ ku̱a̱ʼa̱n yichi̱ yóʼo. Va̱ása kíʼinna kuenta ña̱ ta̱ Ndi̱va̱ʼa kúú ta̱ kúni̱ ná ku̱ʼu̱nna yichi̱ yóʼo ña̱ va̱ʼa ndiʼi-xa̱ʼa̱na (1 Cor. 6:9, 10; 1 Juan 5:19). Ta̱ Jesús ni̱ka̱ʼa̱nra xa̱ʼa̱ inka yichi̱ ña̱ “táñu”, ta ni̱ka̱ʼa̱nra ña̱ loʼova kúú na̱ ndáni̱ʼí ña̱yóʼo. ¿Nda̱chun? Saáchi nu̱ú inka versículo ni̱ka̱ʼa̱nra ña̱ xíniñúʼu kuenta kooyó xíʼin na̱ profeta vatá (Mat. 7:15). w21.12 22, 23 párr. 3-5