Noviembre

Xa̱a̱ kíʼún kuenta ndáa ki̱ʼva chíndeétáʼan Jehová xíʼún. Tá kúú, xa̱a̱ chíndeétáʼanra xíʼún ña̱ va̱ása sa̱a̱ kamaún tá íxandi̱va̱ʼana xíʼún ti̱xin predicación. Ta saátu xa̱a̱ chíndeétáʼanra xíʼún ña̱ ndakaʼún xa̱ʼa̱ iin texto ña̱ va̱ʼa kaʼviúnña nu̱ú na̱ yiví. Ta ni tá va̱ása xíín na̱ yiví kuniso̱ʼona ña̱ nátúʼún, táxira ndee̱ ndaʼún ña̱ va̱ʼa ndakundeún natúʼún xíʼinna (Jer. 20:7-9). Ta xa̱ʼa̱ ña̱ sánáʼa̱ Jehová miíyó ndáa ki̱ʼva natúʼunyó xíʼin na̱ yiví, náʼa̱ra ña̱ va̱ʼa-inira xíʼinyó. Ti̱xin reunión ña̱ xíyo ma̱ʼñú semana, sánáʼa̱na miíyó ndáa ki̱ʼva natúʼunyó xíʼin na̱ yiví, ta káʼa̱nna xíʼinyó ná kuniñúʼuyó ña̱yóʼo tá xa̱a̱ nátúʼunyó xa̱ʼa̱ Ndióxi̱. Sana yíʼvivayó kixáʼayó keʼéyó iin ña̱ʼa ña̱ ta̱ʼán keʼéyó. Soo, tá xa̱a̱ kéʼéyóña saá kíʼinyó kuenta ña̱ va̱ʼaníva chíndeétáʼanña xíʼinyó ti̱xin territorio ña̱ kúúmiíyó. Ta saátu ti̱xin reunión á ti̱xin asamblea káʼa̱nna xíʼinyó ña̱ ndukúyó inka ki̱ʼva ña̱ natúʼunyó xíʼin na̱ yiví. w21.08 27 párr. 5, 6

Tá ka̱ʼyí ta̱ apóstol Pablo carta ku̱a̱ʼa̱n ndaʼa̱ na̱ ñuu Corinto káxiní ni̱ka̱ʼa̱nra xíʼinna xa̱ʼa̱ iin ña̱ va̱ása va̱ʼa kéʼéna. Soo tándi̱ʼi chi̱ndaʼára ta̱ Tito nu̱úna chi xi̱kuni̱ra kunda̱a̱-inira á ke̱ʼéna ña̱ ka̱ʼyíra nu̱ú cartara. Ta ni̱kusi̱íkaví-inira tá na̱kunda̱a̱-inira ña̱ ke̱ʼévana ña̱yóʼo (2 Cor. 7:6, 7). Na̱ anciano kivi kundiku̱nna yichi̱ ta̱ apóstol Pablo tá ná tavána tiempo ña̱ natúʼunna xíʼin na̱ hermano. Kivi keʼéna ña̱yóʼo tá ya̱chi̱ ná xa̱a̱na reunión ta natúʼunna xíʼin na̱ hermano. Va̱ása ku̱a̱ʼáví tiempo xíniñúʼuna ña̱ va̱ʼa chika̱a̱na ndee̱ xíʼin iin na̱ hermano ta na̱ʼa̱na ña̱ kúni̱na xíninana (Rom. 1:12). Na̱ anciano na̱ ndíku̱n yichi̱ ña̱ sa̱ndákoo ta̱ Pablo xíniñúʼuna Biblia ña̱ va̱ʼa chika̱a̱na ndee̱ xíʼin na̱ hermano ta saátu ña̱ chindeétáʼanna xíʼinna ña̱ kunda̱a̱-inina ña̱ kúʼvi̱-ini Jehová xínirana. Náʼa̱tuna ña̱ kúʼvi̱-inina xíninana tá nátúʼun ni̱ʼina xíʼinna ta ndúkúna ki̱ʼva ña̱ ka̱ʼa̱nna xíʼinna xa̱ʼa̱ ña̱ va̱ʼaní chiñu kéʼéna. Tá xíniñúʼu taxina consejo ndaʼa̱ iinna, xíniñúʼuna ña̱ va̱xi nu̱ú tu̱ʼun Ndióxi̱. Ta ni káxiní káʼa̱nna xíʼinna xa̱ʼa̱ ña̱ kéʼéna, viíní káʼa̱nna xíʼinna chi ndixa ndíʼi̱-inina xa̱ʼa̱na (Gál. 6:1). w22.03 28, 29 párr. 11, 12

Tiempo vitin Jehová táxira ndee̱ ndaʼa̱yó ña̱ va̱ʼa ndakundeéyó nda̱kú koo iniyó kachíñuyó nu̱úra. Inka ña̱ va̱ʼaní chindeé miíyó kúú ña̱ oración. Nu̱ú Efesios 6:18 ta̱ Pablo ka̱chira: “Ndiʼi tiempo ka̱ʼa̱nndó xíʼin Ndióxi̱”. Tá ná keʼéyó ña̱yóʼo ndasandakú Ndióxi̱ iniyó. Sana sava yichi̱ túviyó ña̱ va̱ása kúndeéyó xíʼin tu̱ndóʼo ña̱ yáʼayó nu̱ú, ta va̱ása kúnda̱a̱-iniyó ndáaña ka̱ʼa̱nyó xíʼin Jehová, soo kúnira ña̱ ná ka̱ʼa̱nyó xíʼinra ní íxayo̱ʼvi̱ña xíʼinyó (Rom. 8:26, 27). Ta saátu nda̱a̱ táki̱ʼva ke̱ʼé ta̱ Pablo saátu miíyó kivi kaʼviyó tu̱ʼun Ndióxi̱ ña̱ va̱ʼa sandíkoña-iniyó ta ndasandakúña-iniyó (Rom. 15:4). Tá káʼviyó iin texto ta ndákanixi̱níyó xa̱ʼa̱ña, Jehová kivi kuniñúʼura espíritu santora ña̱ va̱ʼa chindeétáʼanra xíʼinyó kunda̱a̱-iniyó ndáa ki̱ʼva chíndeétáʼan Biblia xíʼinyó (Heb 4: 12). w21.05 22 párr. 8-10

¿Á íxayo̱ʼvi̱ña xíʼinyó taváyó ku̱a̱ʼáka tiempo ña̱ va̱ʼa sanáʼa̱yó na̱ yiví xa̱ʼa̱ Ndióxi̱? Sava na̱ publicador íxayo̱ʼvi̱ña xíʼinna saáchi xa̱a̱ ku̱chéena á ndeé ndóʼona. Tá saá íyo ña̱ ndóʼoyó, kiviva kuniñúʼuyó teléfono á Internet ña̱ va̱ʼa kaʼviyó xíʼin na̱ yiví. Ña̱kán ni ndóoyó veʼeyó kiviva kaʼviyó xíʼinna. Sava na̱ yiví kúni̱vana sákuaʼana xa̱ʼa̱ Ndióxi̱, soo va̱ása kúnaʼa̱na hora ña̱ kéeyó nátúʼunyó xa̱ʼa̱ Ndióxi̱. Ña̱kán kiviva ka̱ʼa̱nyó xíʼinna ña̱ sanáʼa̱yóna tá íyo tiempo nu̱úna, tá kúú tá xi̱ta̱a̱n á tá xi̱ku̱aá. Saá íyo ña̱ ke̱ʼé ta̱ Jesús, chi sa̱náʼa̱ra ta̱ Nicodemo tá xi̱ku̱aá, chi saá xi̱kuni̱ mií ta̱ Nicodemo (Juan 3:1, 2). w21.07 5 párr. 10, 11

Na̱ xi̱ndiku̱n ta̱ Juan ta̱ xi̱sandákuchi na̱ yiví nda̱kanda̱-inina, saáchi na̱ discípulo ta̱ Jesús va̱ása níxi̱kuumiína costumbre ña̱ koo ndutana á ña̱ va̱ása kuxuna. Ta̱ Jesús ni̱ka̱ʼa̱nra ña̱ va̱ása xíniñúʼu keʼéví na̱ discípulora ña̱yóʼo, saáchi ta̱ʼán kuvivíra (Mat. 9:14-17). Soo ni saá na̱ fariseo xíʼin inkaka na̱ yiví ni̱sa̱a̱na xíʼinra saáchi va̱ása níxi̱ndiku̱nra costumbre ña̱ xi̱kuumiína. Ni̱sa̱a̱nína xíʼinra tá xi̱nina sa̱ndáʼara na̱ yiví ki̱vi̱ sábado (Mar. 3:1-6; Juan 9:16). Na̱yóʼo ni̱nuní xi̱kunina saáchi xi̱ndakanixi̱nína ña̱ va̱ʼaní xi̱ndiku̱nna ley ña̱ xi̱ka̱ʼa̱n xa̱ʼa̱ ki̱vi̱ sábado, ta xi̱ndakanixi̱nína ña̱ va̱ʼava keʼéna negocio ti̱xin templo. Ni̱sa̱a̱nína tá ni̱ka̱ʼa̱n ta̱ Jesús xíʼinna ña̱ va̱ása va̱ʼa íyo ña̱ kéʼéna (Mat. 21:12, 13, 15). Ta tá na̱túʼun ta̱ Jesús ti̱xin sinagoga ña̱ ni̱xi̱yo chí ñuu Nazaret, ni̱sa̱a̱nína saáchi xi̱niñúʼura historia na̱ ñuu Israel ña̱ va̱ʼa ka̱ʼa̱nra xíʼinna ña̱ xi̱ndi̱ʼi̱-inina xa̱ʼa̱ miína ta va̱ása níxi̱kandíxana Ndióxi̱ (Luc. 4:16, 25-30). Ku̱a̱ʼánína va̱ása níkandíxana ta̱ Jesús saáchi va̱ása níkeʼéra ña̱ xi̱kuni̱na (Mat. 11:16-19). w21.05 5, 6 párr. 13, 14

Jehová káʼa̱nra xíʼinyó ña̱ ná kiʼinyó kuenta ña̱ va̱ása ni̱nu koo iniyó ta saátu ña̱ va̱ása kuni̱yó kuumiíyó ku̱a̱ʼání ña̱ʼa, chi ndiʼi na̱ kéʼé ña̱yóʼo xóʼvi̱nína. Ña̱kán tá káʼa̱nyó xa̱ʼa̱ na̱ kúni̱ kuumií ku̱a̱ʼáka ña̱ʼa, sana ndákanixi̱níyó xa̱ʼa̱ ta̱ Ndi̱va̱ʼa. Chi tá xi̱kuukara iin ángel va̱ʼa, ku̱a̱ʼání ña̱ʼa va̱ʼa xi̱kuumiíra, soo xi̱kuni̱ra kuumiíra ku̱a̱ʼákaña. Xi̱kuni̱ra ña̱ ná ndasakáʼnunara nda̱a̱ táki̱ʼva ndásakáʼnuna Jehová. Ta̱ Ndi̱va̱ʼa kúni̱ra ña̱ ná kooyó nda̱a̱ táki̱ʼva íyo miíra, xa̱ʼa̱ ña̱yóʼo kúni̱ra ña̱ ná va̱ása kusi̱í-iniyó xíʼin ña̱ʼa ña̱ xa̱a̱ kúúmiíyó. Ta ñá Eva kúú ña̱ nu̱ú ku̱chiñura sa̱ndáʼvira. Jehová ni̱ka̱ʼa̱nra xíʼin ñá Eva ta saátu xíʼin ta̱ Adán ña̱ kiviva kaxína ndiʼi ku̱i̱ʼi ña̱ ni̱xi̱yo nu̱ú jardín ña̱ Edén nda̱a̱ ná kutú ti̱xinna, soo iinlá kuití kúú tí va̱ása níkivi kaxína (Gén. 2:16). Ta̱ Ndi̱va̱ʼa sa̱ndáʼvira ñá Eva ta ni̱xa̱a̱ñá nda̱kanixi̱níñá ña̱ xíniñúʼu kaxíñá tíyóʼo. Ñáyóʼo va̱ása nítaxiñá tíxa̱ʼvi ndaʼa̱ Jehová xa̱ʼa̱ ña̱ xa̱a̱ xi̱kuumiíñá, saáchi xi̱kuni̱ñá kuumiíñá ku̱a̱ʼákaña. Ta kúnda̱a̱va-iniyó ndáaña ku̱u: ñá Eva ni̱ki̱ʼviñá ku̱a̱chi ta ni̱xi̱ʼi̱vañá tá ni̱ya̱ʼa tiempo (Gén. 3:6, 19). w21.06 14 párr. 2, 3; 17 párr. 9

Ña̱ xi̱kuni̱ Jehová kúú ña̱ ná koo se̱ʼe ta̱ Adán xíʼin ñá Eva ta kundaana ñuʼú yóʼo. Tá níkandíxana ña̱ ni̱ka̱ʼa̱nra xíʼinna, ta saátu tá nísaxínuna ña̱ xi̱kuni̱ra keʼéna, saá kúú ña̱ miína xíʼin se̱ʼena koona se̱ʼe Jehová ndiʼi tiempo. Va̱ʼaní ña̱ ta̱xi Jehová ndaʼa̱ ta̱ Adán xíʼin ñá Eva chi xi̱kuuna se̱ʼera. Ta̱ David ni̱ka̱ʼa̱nra ña̱yóʼo xíʼin Jehová xa̱ʼa̱ ki̱ʼva ña̱ i̱xava̱ʼara miíyó na̱ yiví, ka̱chira: “Síín i̱xava̱ʼún na̱ yiví nu̱ú na̱ ángel, soo loʼova kánuu ña̱ ndáyáʼví na̱ ángel nu̱ú na̱yóʼo, ndu̱káʼnu na̱ yiví i̱xaún ta ku̱a̱ʼání ña̱ va̱ʼa ta̱xiún ndaʼa̱na” (Sal. 8:5). Ña̱ nda̱a̱ kúúvaña, síínva i̱xava̱ʼa Jehová na̱ ángel nu̱ú miíyó, saáchi na̱yóʼo ku̱a̱ʼání ndee̱ kúúmiína, ndíchiníkana nu̱ú miíyó ta saátu kéʼéna ña̱ʼa ña̱ va̱ása kúchiñuyó keʼéyó (Sal. 103:20). Soo loʼova “kánuu ña̱ ndáyáʼvi” na̱ ángel nu̱ú miíyó na̱ yiví. Ta̱ Adán xíʼin ñá Eva va̱ása níkivika koona se̱ʼe Jehová. Ta xa̱ʼa̱ ña̱yóʼo ku̱a̱ʼání tu̱ndóʼo ki̱xi nu̱ú na̱ se̱ʼena. Soo ta̱ʼán nasamaví Jehová ña̱ kúni̱ra keʼéra: saáchi kúni̱ra ña̱ ndiʼi na̱ yiví na̱ kándíxa ña̱ káʼa̱nra, ná xa̱a̱na koona se̱ʼera ndiʼi tiempo. w21.08 2, 3 párr. 2-4

Ku̱a̱ʼání na̱ ndásakáʼnu Jehová tiempo vitin sásina nu̱úna ña̱ ndasakáʼnunara. Savana ndóona ñuu nu̱ú va̱ása táxina natúʼunna xa̱ʼa̱ Ndióxi̱, ta nda̱a̱ tíinna sava na̱yóʼo ña̱ ku̱ʼu̱nna xíʼinna nu̱ú na̱ chíñu, ta tá kúu ña̱yóʼo ku̱a̱ʼá na̱ yiví xáa̱na sákuaʼana xa̱ʼa̱ Ndióxi̱ (Mat. 10:17, 18). Inka na̱ testigo síín íyo ki̱ʼva ña̱ sásina nu̱úna. Íyo país nu̱ú táxina ña̱ ndasakáʼnuna Jehová, soo na̱ veʼena ku̱a̱ʼání ña̱ kéʼéna ña̱ sásina nu̱úna (Mat. 10:32-36). Ta ku̱a̱ʼání yichi̱, tá kíʼin na̱ veʼena kuenta ña̱ va̱ása kívi kasina nu̱úna ña̱ ndasakáʼnuna Jehová, va̱ása sásikana nu̱úna. Ta sava na̱ xi̱sasi nu̱úna ta kininí xi̱keʼéna xíʼinna, tá ni̱ya̱ʼa tiempo ndu̱una testigo Jehová ta vitin kúsi̱íní-inina káchíñuna nu̱úra. Xa̱ʼa̱ ña̱kán, va̱ása ndakava-iniún tá sásina nu̱ún. Ndakú koo iniún, chi íyova Jehová xíʼún ta saátu espíritu santora. Xa̱ʼa̱ ña̱kán, kǒo nda̱a̱ ni iin ña̱ʼa xíniñúʼu yi̱ʼvíún nu̱ú. w22.03 15 párr. 8

Biblia káʼa̱nña ña̱ kúndasí Jehová xínira “na̱ kúta̱a-ini nu̱ú inkana, na̱ káʼa̱n tu̱ʼun vatá, na̱ xáʼní na̱ yiví na̱ kǒo ku̱a̱chi” (Prov. 6:16, 17). Ta saátu kúndasíra xínira “na̱ kútóoní kanitáʼan ta saátu na̱ sándaʼvi” (Sal. 5:6). Jehová kúndasíníra xínira na̱ kéʼé ña̱yóʼo, ña̱kán sa̱ndíʼi-xa̱ʼa̱ra na̱ yiví na̱ ndi̱va̱ʼa-ini na̱ xi̱ndoo tá ni̱xi̱yo ta̱ Noé saáchi nina ña̱ va̱ása va̱ʼa xi̱keʼéna (Gén. 6:13). Inka ña̱ kúndasí Jehová xínira kúú ña̱ ni̱ka̱ʼa̱n ta̱ profeta Malaquías xa̱ʼa̱: ña̱ sándaʼvina ñá síʼina á yiína xa̱ʼa̱ ña̱ kúni̱na sandákoonana. Na̱ kéʼé ña̱yóʼo, va̱ása taxika Ndióxi̱ ndasakáʼnunara ta ndatiinra ku̱a̱chi xíʼinna xa̱ʼa̱ ña̱ kéʼéna (Mal. 2:13-16; Heb. 13:4). Jehová káʼa̱nra ña̱yóʼo xíʼinyó: “Kundasíndó kunindó ña̱ va̱ása va̱ʼa” (Rom. 12:9). Ña̱ kundasíyó iin ña̱ʼa kúni̱ kachiña ña̱ nda̱a̱ ni loʼo va̱ása kúni̱yó kuniyóña, á nda̱a̱ kukini-iniyó kuniyóña. Ta ki̱ʼva saá xíniñúʼu keʼéyó tá kíxáʼayó kúni̱yó keʼéyó iin ña̱ va̱ása kútóo Jehová. w22.03 4, 5 párr. 11, 12

Si̱lóʼo kúma̱ní ta ku̱a̱ʼání ña̱ va̱ʼa taxi Jehová ndaʼa̱yó ti̱xin Reinora. Na̱ kúsi̱í-ini ndátu Jehová ku̱a̱ʼání ña̱ va̱ʼa ndakiʼinna vitin, ta saátu nu̱ú ñuyǐví xa̱á. Nu̱ú ñuyǐví xa̱á miíyó na̱ ndásakáʼnu Ndióxi̱ va̱ása kuumiíkayó táʼan tu̱ndóʼo ña̱ kúúmiíyó tiempo vitin, ta ni va̱ása ndi̱ʼi̱ka-iniyó. Kǒoka na̱ keʼé ña̱ va̱ása va̱ʼa xíʼinyó ta ni va̱ása xo̱ʼvi̱yó (Apoc. 21:4). Ta va̱ása kundi̱ʼi̱ka-iniyó ña̱ ndukúyó ña̱ʼa ña̱ xíniñúʼuyó, saáchi koo ku̱a̱ʼáníña nu̱ú ñuyǐví xa̱á (Sal. 72:16; Is. 54:13). Va̱ʼaní koo ña̱ kutakuyó. Tiempo vitin xa̱a̱ íxatu̱ʼva Jehová miíyó ña̱ va̱ʼa kooyó nu̱ú ñuʼú yóʼo tá ná kaʼndachíñu Reinora, saáchi chíndeétáʼanra xíʼinyó ña̱ sandákooyó keʼéyó ña̱ va̱ása va̱ʼa ta saátu ña̱ kuumiíyó táʼan ña̱ va̱ʼa ña̱ kúúmiíra. Ná va̱ása ndakava-iniyó ta ná ndakundeéyó kachíñuyó nu̱úra, saáchi si̱lóʼo kúma̱ní ta ndakiʼinyó ku̱a̱ʼání ña̱ va̱ʼa. Liviní koo ña̱ kutakuyó chí nu̱únínu, xa̱ʼa̱ ña̱kán ná chika̱a̱-iniyó ña̱ ndakundeéyó kúee koo iniyó ta kundatuyó ná saxínu Jehová ña̱ ni̱ka̱ʼa̱nra keʼéra. w21.08 13 párr. 17-19

Tá ni̱ya̱ʼa loʼo tiempo ña̱ nda̱kiʼinna carta yóʼo, na̱ hermano yóʼo xi̱niñúʼu sandákoona veʼena, chiñuna ta saátu na̱ veʼena na̱ va̱ása níxi̱kuu cristiano ña̱ va̱ʼa kununa ku̱ʼu̱nna chí yuku̱ (Mat. 24:16). Tá ku̱u ña̱yóʼo, xi̱niñúʼu chindeétáʼannína xíʼin na̱ hermanona. Ña̱kán, tá xa̱a̱ ya̱chi̱ka nísakúaʼana taxina ña̱ kúúmiína ndaʼa̱ inkana nda̱a̱ táki̱ʼva ka̱chi ta̱ Pablo xíʼinna, va̱ása ixayo̱ʼvi̱ña xíʼinna kuumiína loʼo ña̱ʼa ñuu nu̱ú xa̱a̱na. Sana va̱ása ka̱ʼa̱nví na̱ hermano xíʼinyó ndáa ña̱ʼa kúú ña̱ kúma̱ní nu̱úna. Taxi ná ka̱ʼa̱nna xíʼún ndáaña xíniñúʼuna. Sana ti̱xin congregaciónyó íyo na̱ hermano xíʼin ná hermana na̱ va̱ʼaní chíndeétáʼan xíʼin inkana. Ta nda̱a̱ ni iin yichi̱ va̱ása ka̱ʼa̱nvína xíʼinyó ña̱ sándi̱ʼi̱níyó-inina, saáchi kúnda̱a̱va-iniyó ña̱ chindeétáʼanna xíʼinyó tá íyo iin ña̱ xíniñúʼuyó. Ña̱kán kúni̱yó kundiku̱nyó yichi̱ na̱ hermano yóʼo. w22.02 23, 24 párr. 13-15

Tiempo vitin na̱ anciano ndáchitáʼanna ku̱a̱ʼání na̱ congregación, ta xa̱ʼa̱ ña̱yóʼo ku̱a̱ʼání na̱ hermano ndáya̱ʼana ti̱xin inka circuito. Tá ná ka̱ʼa̱nna xíʼinyó keʼéyó ña̱yóʼo, sana ixayo̱ʼvi̱ña xíʼinyó sandákooyó na̱ veʼeyó xíʼin na̱ migoyó. ¿Á káʼa̱n Jehová xíʼin na̱ anciano ndáa congregación ku̱ʼu̱n iin tá iin na̱ publicador? Va̱ása, ta sana xa̱ʼa̱ ña̱yóʼo kúú ña̱ kivi ixayo̱ʼvi̱ña xíʼinyó kundiku̱nyó ña̱ káʼa̱nna xíʼinyó. Soo kúnda̱a̱va-ini Jehová ña̱ viíní íyo ña̱ ndáka̱xin na̱ anciano keʼéna, ta saátu miíyó xíniñúʼu kandíxayó ña̱ viíní íyo ña̱ ndáka̱xinna keʼéna. ¿Nda̱chun xíniñúʼu kundiku̱nyó ña̱ ndáka̱xin na̱ anciano keʼéna ni tá va̱ása kútóoyóña? Saáchi tá kéʼéyó ña̱yóʼo saá kúú ña̱ chíndeétáʼanyó xíʼin na̱ ñuu Ndióxi̱ ña̱ vií kutáʼanna. Ta saátu ku̱a̱ʼání ña̱ va̱ʼa ndákiʼin na̱ congregación tá vitá íyo iniyó ta ndíku̱nyó ndiʼi ña̱ ndáka̱xin na̱ anciano keʼéna (Heb. 13:17). Ta saátu tá kándíxayó na̱ anciano saá náʼa̱yó ña̱ kándíxayó Jehová chi ta̱yóʼo kúú ta̱ nda̱kaxinna ña̱ kundaana miíyó (Hech. 20:28). w22.02 4, 5 párr. 9, 10

Tá iin ta̱ hermano ta̱ xa̱a̱ nda̱kuchi kúún, kivi chika̱ún ndee̱ ña̱ viíka koo discurso taxiún á viíka sanáʼún. ¿Nda̱chun? Saáchi tá chíka̱ún ndee̱ ña̱ viíka kaʼviún, ña̱ viíka taxiún discurso ta viíka sanáʼún, va̱ʼaní chindeétáʼún xíʼin na̱ hermano na̱ xíniso̱ʼo yóʼó (1 Tim. 4:15). Chika̱a̱ ndee̱ kaʼviún folleto ña̱ nani Sákuaʼaka ña̱ vií kaʼviún ta sanáʼún, ta keʼé ndiʼi ña̱ va̱xi nu̱ú ña̱yóʼo. Kaʼvi iin tá iin lección ña̱ va̱xi nu̱úña, ta ku̱a̱ʼá yichi̱ ndanuúnña ti̱xin veʼún, ta tá taxiún discurso, saá keʼún ña̱ sa̱kuaʼún. Nda̱ka̱tu̱ʼun ta̱ anciano ta̱ táxi consejo ndáaña xíniñúʼu viíka keʼún. Á kivitu nda̱ka̱tu̱ʼún inka na̱ “anciano na̱ chíka̱a̱ ndee̱ ña̱ viíní sanáʼa̱na” (1 Tim. 5:17). Su̱ví nda̱saa ña̱ va̱xi nu̱ú folleto yóʼo kivi keʼún, chi saátu xíniñúʼu chindeétáʼún xíʼin na̱ xíniso̱ʼo yóʼó ña̱ kandíxakana Ndióxi̱, ta keʼéna ña̱ sákuaʼana. Ta xa̱ʼa̱ ña̱yóʼo kusi̱íníka-iniún, ta saátu na̱ xíniso̱ʼo yóʼó. w21.08 24 párr. 17

Tá ná ndakanixi̱níyó ña̱ ndáyáʼviníka inkana, va̱ása kuni̱yó keetáʼanyó xíʼin na̱ va̱ʼaní kéʼé iin ña̱ʼa á na̱ xíni̱níka nu̱ú miíyó, chi nu̱úka ña̱ keʼéyó ña̱yóʼo, na̱ kusi̱í-iniva kúúyó xíʼinna. Ta tá xítoyó ña̱ xíniñúʼuna ña̱ xíni̱na keʼéna ña̱ va̱ʼa ndasakáʼnuna Jehová, saá kúú ña̱ kúsi̱íníka-iniyó xíʼinna. Tasaá viíníka kutáʼan ndiʼiyó ti̱xin congregación ta va̱ása kanitáʼanyó. ¿Ndáaña chindeétáʼan xíʼinyó ña̱ va̱ása kukúini̱yó xíʼin inkana? Ña̱ vitá koo-iniyó ta ndakuniyó ña̱ íyo sava ña̱ʼa ña̱ va̱ása kívi keʼéyó. Tá vitá íyo iniyó, va̱ása kuni̱yó keetáʼanyó xíʼin inkana ña̱ va̱ʼa na̱ʼa̱yó ña̱ xíni̱níkayó nu̱ú inkana. Nu̱úka ña̱ keʼéyó ña̱yóʼo, ná ndukúyó ndáa ki̱ʼva sákuaʼayó xíʼin ña̱ xíni̱na keʼéna. Tá kúú, tá iin ta̱ hermano va̱ʼaní táxira discurso ti̱xin congregación, kivi nda̱ka̱tu̱ʼunyóra ndáaña kéʼéra ña̱ va̱ʼaní kána discursora. Ta saátu tá iin ñá hermana ya̱sinní kéʼéñá comida, kivi ka̱ʼa̱nyó xíʼinñá ná sanáʼa̱ñá miíyó. w21.07 15, 16 párr. 8, 9

Nu̱ú libro ña̱ Números, Jehová ni̱ka̱ʼa̱nra ña̱ ná kaʼnína iin ta̱ ñuu Israel xa̱ʼa̱ ña̱ ni̱xa̱ʼa̱nra nda̱kayara titu̱n ki̱vi̱ sábado. Soo nu̱ú Segundo libro ña̱ Samuel káʼa̱nña ña̱ i̱xakáʼnuva-ini Jehová xa̱ʼa̱ ta̱ rey David ni ni̱ki̱si̱ra xíʼin ñá síʼi inka ta̱a ta xa̱ʼníra ta̱ ta̱a kán (Núm. 15:32, 35; 2 Sam. 12:9, 13). Sana kivi ndakanixi̱níyó xa̱ʼa̱ ña̱yóʼo: “¿Nda̱chun i̱xakáʼnu-ini Jehová xa̱ʼa̱ ta̱ David tá ndeéní ku̱a̱chi ni̱ki̱ʼvira? Ta, ¿nda̱chun va̱ása ní ixakáʼnu-inira xa̱ʼa̱ ta̱ ta̱a ta̱ ni̱xa̱ʼa̱n nda̱kaya kuití titu̱n?”. Tu̱ʼun Ndióxi̱ va̱ása káʼa̱nña xa̱ʼa̱ ndiʼi ña̱ ku̱u. Ta kúú, kúnda̱a̱-iniyó ña̱ nda̱ndikóníva-ini ta̱ David xa̱ʼa̱ ku̱a̱chi ña̱ ni̱ki̱ʼvira (Sal. 51:2-4). Soo va̱ása kúnda̱a̱ví-iniyó ndáaña xi̱keʼé ta̱ ta̱a ta̱ va̱ása ní ixato̱ʼó ki̱vi̱ sábado. ¿Á nda̱ndikó-inira xa̱ʼa̱ ña̱ ke̱ʼéra? ¿Á xa̱a̱ i̱xaso̱ʼora nu̱ú Jehová savaka yichi̱? ¿Á xa̱a̱ ya̱chi̱ka ni̱ka̱ʼa̱nna xíʼinra ña̱ va̱ása va̱ʼa íyo ña̱ kéʼéra soo va̱ása níxiniso̱ʼora? Ña̱kán tá káʼviyó tu̱ʼun Ndióxi̱ ta va̱ása kúnda̱a̱ káxi iniyó nda̱chun kúú ña̱ ke̱ʼéra sava ña̱ʼa, ná va̱ása kaka-iniyó, saáchi ña̱ xa̱a̱ xíni̱yó xa̱ʼa̱ra kúú ña̱ chindeétáʼan xíʼinyó kandíxayó ña̱ nda̱kúní íyo ndiʼi ña̱ kéʼéra (Sal. 145:17). w22.02 2, 3 párr. 3, 4

Na̱ yiví na̱ ndákuni ña̱ íyo sava ña̱ va̱ása kívika keʼéna, kúsi̱íka-inina ta va̱ʼaní kána chiñu ña̱ kéʼéna. Kivi chitáʼanyóna xíʼin iin na̱ yiví na̱ ku̱a̱ndaa iin xi̱kí súkun, ña̱ va̱ʼa kundeéna xa̱a̱na xi̱níña xíniñúʼu kúee ku̱ʼu̱nna. Ta ki̱ʼva saá íyo ña̱ kéʼé na̱ yiví na̱ ndákuni ña̱ íyo sava ña̱ va̱ása kívika keʼéna. Saáchi kúnda̱a̱-inina ama kúú ña̱ xíniñúʼu kúeeka ku̱ʼu̱nna ña̱ va̱ʼa ndakundeéna kachíñuna nu̱ú Jehová, ta chindeétáʼanna xíʼin inkana (Filip. 4:5). Ná ka̱ʼa̱nyó xa̱ʼa̱ ña̱ ndo̱ʼo ta̱ Barzilái, tá kúúmiíra 80 ku̱i̱ya̱ ta̱ rey David ni̱ka̱ʼa̱nra xíʼinra ña̱ ná kachíñura xíʼinra ña̱ va̱ʼa taxira consejo ndaʼa̱ra. Ta̱ Barzilái xi̱kunda̱a̱-inira ña̱ va̱ása kívika keʼéra sava chiñu, ta xa̱ʼa̱ ña̱yóʼo va̱ása níxiinra kachíñura xíʼin ta̱ rey David. Xa̱ʼa̱ ña̱ va̱ása níkivi keʼéra chiñu yóʼo, ni̱ka̱ʼa̱nra xa̱ʼa̱ ta̱ Kimham, iin ta̱ loʼoka nu̱úra ña̱ ná ku̱ʼu̱nra kachíñura xíʼin ta̱ rey David (2 Sam. 19:35-37). Na̱ hermano na̱ xa̱a̱ ku̱chée kéʼéna nda̱a̱ táki̱ʼva ke̱ʼé ta̱ Barzilái, saáchi xíʼin ña̱ si̱í-ini táxina ña̱ ná keʼé na̱ hermano na̱ válíka chiñu ña̱ íyo ti̱xin congregación. w21.09 10 párr. 6, 7

¿Á íxayo̱ʼvi̱ña xíʼinyó kotoyó Jehová nda̱a̱ táki̱ʼva íyo yiváyó? Savayó íxayo̱ʼvi̱vaña xíʼinyó saáchi sana i̱xandi̱va̱ʼa yiváyó xíʼinyó tá ni̱xi̱yo loʼoyó. Soo va̱ʼaníva kúniyó tá kúnda̱a̱-iniyó ña̱ kúnda̱a̱ní-ini Jehová xíʼin ña̱ ndóʼoyó, ta kúni̱ra koo yatinra xíʼinyó. Ña̱kán, Biblia káʼa̱nña ña̱yóʼo xíʼinyó: “Kuyatinndó nu̱ú Ndióxi̱ ta ta̱kán kuyatinra nu̱úndó” (Sant. 4:8). Jehová kúʼvi̱-inira xínira miíyó ta kúni̱ra koora yiváyó ta va̱ása ixandi̱va̱ʼara xíʼinyó. Ta̱ Jesús kivi chindeétáʼanra xíʼinyó ña̱ kuyatinkayó nu̱ú Jehová. Saáchi va̱ʼaní xíni̱ra Jehová ta va̱ʼaní náʼa̱ra ña̱ va̱ʼa ña̱ kúúmií Jehová. Ña̱kán ni̱ka̱ʼa̱nra ña̱yóʼo: “Na̱ xa̱a̱ xi̱ni yi̱ʼi̱ xa̱a̱ xi̱nituna yivái̱” (Juan 14:9). Ta̱ Jesús íyora táki̱ʼva íyo ñaniyó á ku̱ʼvayó ta̱ kúchée nu̱úyó, ta sánáʼa̱ra miíyó ña̱ ixato̱ʼóyó yiváyó ta kandíxayó ña̱ káʼa̱nra, ta saátu keʼéyó ña̱ sákusi̱í-inira. Ta xíʼin ña̱ ke̱ʼé ta̱ Jesús tá ni̱xi̱yora nu̱ú ñuʼú yóʼo ni̱na̱ʼa̱ra ña̱ va̱ʼaní-ini Jehová, ta kúʼvi̱-inira xínira miíyó. w21.09 21 párr. 4, 5

Na̱ ñuu Ndióxi̱ inkáchi kítáʼanna ña̱ ndasakáʼnuna Jehová. Ta saátu ta̱xira chiñu ndaʼa̱ na̱ anciano ña̱ kundaana na̱ congregación nu̱ú ña̱ va̱ása va̱ʼa. Ña̱kán, tá iin na̱ hermano ni̱ki̱ʼvina ku̱a̱chi ndeé, Jehová kúni̱ra ña̱ ná koto na̱ anciano á xíniñúʼu kundika̱a̱kana ti̱xin congregación. Ta saátu xíniñúʼu kotona á ndixa nda̱ndikó-inina xa̱ʼa̱ ku̱a̱chi ña̱ ni̱ki̱ʼvina. Ña̱kán, xíniñúʼu ndakanixi̱nína xa̱ʼa̱ ña̱yóʼo: ni káʼa̱n na̱ ni̱ki̱ʼvi ku̱a̱chi kán ña̱ ndándikóní-inina xa̱ʼa̱ ña̱ ke̱ʼéna, ¿á ndixa kúndasína ña̱ ke̱ʼéna? ¿Á chi̱ka̱a̱-inina ña̱ va̱ása ndandikókana keʼénaña? Tá na̱ yiví na̱ kítáʼan xíʼinna kúú na̱ chi̱ndaʼá-ñaʼá ña̱ ke̱ʼéna ña̱ va̱ása va̱ʼa, ¿á chi̱ka̱a̱-inina ña̱ va̱ása kutáʼankana xíʼinna? Na̱ anciano siʼna káʼa̱nna xíʼin Jehová tasaá xítona ndáaña káʼa̱n tu̱ʼunra xa̱ʼa̱ ña̱ ke̱ʼé na̱yóʼo, ta saátu kíʼinna kuenta ndáaña ndákanixi̱ní na̱yóʼo xa̱ʼa̱ ña̱ ke̱ʼéna. Tasaá kúú ña̱ xítona á kundika̱a̱kana ti̱xin congregación á va̱ása. Ña̱kán, sava yichi̱ távávanana ti̱xin congregación (1 Cor. 5:11-13). w22.02 5 párr. 11, 12

Ni xa̱a̱ ku̱a̱ʼá ku̱i̱ya̱ á loʼo ku̱i̱ya̱ nda̱kuchiyó ndiʼiyó kúni̱yó chika̱a̱yó ndee̱ ña̱ kooyó nda̱a̱ táki̱ʼva kúni̱ mií Jehová. Ta ña̱ va̱ʼa keʼéyó ña̱yóʼo xíniñúʼu kiʼinyó kuenta xíʼin ña̱ ndákanixi̱níyó. ¿Nda̱chun? Saáchi ña̱ ndákanixi̱níyó kúú ña̱ náʼa̱ ndáa ki̱ʼva íyoyó. Tá ndiʼi tiempo ná ndakanixi̱níyó xa̱ʼa̱ ña̱ kútóo ku̱ñuyó nina ña̱ va̱ása va̱ʼa ka̱ʼa̱nyó xa̱ʼa̱ ta xa̱a̱yó keʼéyóña (Efes. 4:17-19). Soo tá nina ña̱ va̱ʼa ná ndakanixi̱níyó xa̱ʼa̱, va̱ása ixayo̱ʼvi̱ña xíʼinyó natúʼunyó xa̱ʼa̱ nina ña̱ va̱ʼa ta keʼéyó ña̱ kútóo yiváyó Jehová (Gál. 5:16). Soo kiviva chika̱a̱yó ndee̱ ña̱ va̱ása xa̱a̱yó keʼéyó ña̱ va̱ása va̱ʼa yóʼo. Tá kúma̱ní ndakuchiyó xíniñúʼu sandákooyó ka̱ʼa̱nyó á keʼéyó ña̱ kúndasí Jehová xínira. Ta ña̱yóʼo kúu ña̱ siʼna xíniñúʼu keʼéyó ña̱ va̱ʼa sandákooyó ki̱ʼva ña̱ ni̱xi̱yoyó tá ya̱chi̱. w22.03 8 párr. 1, 2

Íxayo̱ʼvi̱vaña xíʼin na̱ anciano kunda̱a̱-inina á ndixa ndándikó-ini iin na̱ ni̱ki̱ʼvi ku̱a̱chi. ¿Nda̱chun íxayo̱ʼvi̱ña xíʼinna? Saáchi va̱ása kívi kunda̱a̱-inina ndáaña ndíka̱a̱ níma̱na. Ña̱kán xíniñúʼu ndukúna ki̱ʼva ña̱ kunda̱a̱-inina á ndixa nda̱ndikó-ini iin na̱ ni̱ki̱ʼvi ku̱a̱chi, ta kúndasína xínina ña̱ ke̱ʼéna. Xíniñúʼu kotona á ndixa na̱samana ña̱ ndákanixi̱nína, ña̱ ndóʼona xíʼin ña̱ kéʼéna. Ta sana xíniñúʼu ya̱ʼa ku̱a̱ʼá tiempo ña̱ va̱ʼa na̱ʼa̱ra ña̱ ndixa ndándikó-inira. ¿Ndáaña xíniñúʼu keʼé na̱ ki̱ta ti̱xin congregación ña̱ va̱ʼa na̱ʼa̱na ña̱ ndixa ndándikó-inina? Xíniñúʼu ku̱ʼu̱n ni̱ʼina reunión, ta kundiku̱nna consejo ña̱ táxi na̱ anciano ndaʼa̱na, ka̱ʼa̱n ni̱ʼina xíʼin Ndióxi̱, ta kaʼvina Biblia. Saátu xíniñúʼu kuxíkána nu̱ú ña̱ʼa ña̱ kivi sandákavañaʼá ña̱ keʼé tukuna ña̱ va̱ása va̱ʼa. Tá chíka̱a̱na ndee̱ ña̱ ndakutáʼan vií tukuna xíʼin Jehová, va̱ása kaka-inina ña̱ ixakáʼnu-inira xa̱ʼa̱na, ta saátu na̱ anciano chindeétáʼanna xíʼinna ña̱ ndandikóna ti̱xin congregación. w21.10 6 párr. 16-18

Tá ni̱xi̱yo ta̱ Jesús chí ndiví ta saátu tá ni̱xi̱yora nu̱ú ñuʼú yóʼo, iinlá Jehová nda̱sakáʼnura saáchi kúʼvi̱ní-inira xínirara (Luc. 4:8). Ta sa̱náʼa̱ra na̱ discípulora ña̱ saátu xi̱niñúʼu keʼé na̱yóʼo. Ni miíra ta ni na̱ discípulora va̱ása níxiniñúʼuna imagen ña̱ va̱ʼa ndasakáʼnuna Ndióxi̱. Iin espíritu kúú Ndióxi̱, ña̱kán nda̱a̱ ni iin na̱ yiví va̱ása kúchiñuna ndanaʼa̱nara saáchi ku̱a̱ʼání ndee̱ kúúmiíra (Is. 46:5). Soo, ¿á va̱ʼa ndakuatiyó nu̱ú na̱ santo? Nu̱ú texto ña̱ káʼviyó ki̱vi̱ vitin náʼa̱ñá nu̱úyó ña̱ na̱ kúni̱ sakúsi̱í-ini Ndióxi̱ va̱ása ndásakáʼnuna ña̱yóʼo. Iin libro ña̱ káʼa̱n xa̱ʼa̱ na̱ cristiano na̱ xi̱ndoo tá siglo nu̱ú, káʼa̱nña ña̱ ni loʼoví va̱ása níxiniñúʼuna imagen ña̱ va̱ʼa ndasakáʼnuna Ndióxi̱. Ta tiempo vitin ndíku̱nyó yichi̱na. w21.10 19, 20 párr. 5, 6

Ta̱ Jesús ni̱ka̱ʼa̱nra xíʼin na̱ xi̱ndoo chí Judea ña̱ kixaa̱ iin ki̱vi̱ ña̱ kasi na̱ soldado iníí sa̱tá ñuu Jerusalén (Lucas 21:20-24). Tá ná kuu ña̱yóʼo xi̱niñúʼu kununa ku̱ʼu̱nna chí yuku̱. Ta tá ná keʼéna ña̱yóʼo saá kúú ña̱ ka̱kuna, soo xi̱niñúʼu sandákoona ku̱a̱ʼání ña̱ʼa ña̱ xi̱kuumiína. Xa̱a̱ íyo loʼo ku̱i̱ya̱ chí sa̱tá, tutu La Atalaya ka̱chiña: “Sa̱ndákoona veʼena, ñuʼúna, ta nda̱a̱ ni iin ña̱ʼa ña̱ íyo ti̱xin veʼena va̱ása níxa̱ʼa̱nña xíʼinna. Ta xa̱ʼa̱ ña̱ xi̱kandíxanína ña̱ kundaa Jehová miína ta chindeétáʼanra xíʼinna, siʼnaka chiñura ni̱ndi̱ʼi̱-inina xa̱ʼa̱ nu̱ú inkaka ña̱ʼa”. Ta ka̱chikaña: “Sana ya̱ʼayó nu̱ú tu̱ndóʼo ña̱ yo̱ʼvi̱ní chí nu̱únínu, tasaá na̱ʼa̱yó á ña̱ nda̱kú koo iniyó xíʼin Jehová kúú ña̱ kundayáʼvika nu̱úyó á ña̱ʼa ña̱ kúúmiívayó. Tá ná kixaa̱ ki̱vi̱ yóʼo, sana xo̱ʼvi̱yó ta sana sandákooyó sava ña̱ʼa ña̱ kúúmiíyó. Ña̱kán xíniñúʼu koo tu̱ʼvayó sandákooyó nda̱a̱ ndáaka ña̱ʼa”. w22.01 4 párr. 7, 8

Tá ni̱ya̱ʼa loʼo tiempo ña̱ ke̱e na̱ ñuu Israel ñuu Egipto, Jehová ni̱ka̱ʼa̱nra xíʼin ta̱ Moisés xa̱ʼa̱ ki̱vi̱ra xíʼin ña̱ va̱ʼa ña̱ kúúmiíra. Ka̱chira xíʼinra: “Jehová, Jehová, iin Ndióxi̱ ta̱ íxakáʼnu-ini xa̱ʼa̱ na̱ yiví ta kúndáʼvi-inira xínirana, kúee íyo inira, ndiʼi tiempo ndixaní kúʼvi̱-inira xínirana ta nda̱kúní íyo inira, ta náʼa̱ra ña̱ ndixaní kúʼvi̱-inira xínira ku̱a̱ʼání na̱ yiví, íxakáʼnu-inira xa̱ʼa̱ ña̱ kéʼéna xíʼin xa̱ʼa̱ ku̱a̱china” (Éx. 34:6, 7). Xíʼin tu̱ʼun yóʼo ni̱na̱ʼa̱ Jehová nu̱ú ta̱ Moisés ndáa ki̱ʼva ndixaní kúʼvi̱-inira xínira miíyó. Ná ka̱ʼa̱nyó xa̱ʼa̱ ña̱yóʼo. Va̱ása níka̱ʼa̱n kuití Jehová ña̱ kúʼvi̱-inira xínira miíyó, saáchi ni̱ka̱ʼa̱nra ña̱ “ndiʼi tiempo ndixaní kúʼvi̱-inira xínira miíyó”. Ta ña̱ tu̱ʼun yóʼo u̱xa̱ yichi̱ka va̱xiña nu̱ú tu̱ʼun Ndióxi̱ (Núm. 14:18; Neh. 9:17; Sal. 86:15; 103:8; Joel 2:13; Jon. 4:2). Ta iinlá xa̱ʼa̱ Jehová káʼa̱n ña̱yóʼo, ta su̱ví xa̱ʼa̱ miíyó na̱ yiví káʼa̱nña. ¿Á va̱ása ndákanda̱-iniyó xa̱ʼa̱ ña̱ ku̱a̱ʼání yichi̱ káʼa̱n Jehová nu̱ú tu̱ʼunra ña̱ ndixaní kúʼvi̱-inira xínira miíyó? Ta ndáyáʼviní ña̱yóʼo nu̱ú Jehová. w21.11 2, 3 párr. 3, 4

Saátu ta̱ apóstol Pedro xíʼin ñá síʼira, va̱ʼaní yichi̱ sa̱ndákoona nu̱ú na̱ xa̱a̱ ti̱ndaʼa̱. Tá ni̱ya̱ʼa iin ku̱i̱ya̱ sava ña̱ xi̱nitáʼan ta̱ Pedro xíʼin ta̱ Jesús, xi̱niñúʼu ndaka̱xinra keʼéra iin ña̱ ndáyáʼviní. Chiñu ña̱ xi̱kuumií ta̱ Pedro kúú ña̱ xi̱tiinra ti̱a̱ká, ta ña̱yóʼo chi̱ndeétáʼan xíʼinra ña̱ va̱ʼa xi̱ndaara na̱ veʼera (Luc. 5:1-11). Ña̱kán, tá ni̱ka̱ʼa̱n ta̱ Jesús xíʼinra ña̱ koora apóstolra, xi̱niñúʼu viíní ndakanixi̱níra ndáaña kivi keʼéra ña̱ va̱ʼa chindeétáʼanra xíʼin na̱ veʼera. Soo ni saá chi̱ka̱a̱-inira ku̱ʼu̱nra xíʼin ta̱ Jesús ña̱ natúʼunna xíʼin na̱ yiví xa̱ʼa̱ Ndióxi̱. Ta saátu chi̱ndeétáʼanva ñá síʼira xíʼinra. Saáchi tu̱ʼun Ndióxi̱ káʼa̱nña ña̱ tá xa̱a̱ nda̱taku ta̱ Jesús, ni̱xi̱yo iin tiempo ña̱ ni̱xi̱kañá xíʼin ta̱ Pedro tá ni̱xi̱kara na̱túʼunra xíʼin na̱ yiví xa̱ʼa̱ Ndióxi̱ (1 Cor. 9:5). Ta xa̱ʼa̱ ña̱ va̱ʼaní ni̱xi̱yo chiñu ña̱ xi̱keʼé ñáyóʼo, ta̱ Pedro va̱ása níkukaʼan nu̱úra taxira consejo ndaʼa̱ na̱ xa̱a̱ ti̱ndaʼa̱ (1 Ped. 3:1-7). Ña̱yóʼo náʼa̱ña nu̱úyó ña̱ xi̱kandíxaní ta̱ Pedro ta saátu ñá síʼira ña̱ mií Jehová taxi ndiʼi ña̱ xíniñúʼuna, tá siʼna chiñura ná kundi̱ʼi̱-inina xa̱ʼa̱ (Mat. 6:31-34). w21.11 18 párr. 14

Ta̱ apóstol Pablo xi̱kuʼvi̱ní-inira xi̱xinira na̱ hermano, ta xa̱ʼa̱ ña̱yóʼo xi̱chika̱a̱níra ndee̱ ña̱ kachíñura xa̱ʼa̱na (Hech. 20:31). Ña̱kán xi̱kuni̱nína xi̱xininara. Tá kúú, iin yichi̱ tá na̱kunda̱a̱-ini na̱ anciano na̱ ñuu Éfeso ña̱ va̱ása ndikókana kuninara “ndiʼina ki̱xáʼana xákuna” (Hech. 20:37). Saátu kéʼé na̱ anciano tiempo vitin, chi kúʼvi̱-inina xínina na̱ hermano ta chíka̱a̱nína ndee̱ ña̱ chindeétáʼanna xíʼinna (Filip. 2:16, 17). Soo sava yichi̱ íyo ña̱ íxayo̱ʼvi̱ xíʼinna. ¿Ndáaña kivi chindeétáʼan xíʼinna? Na̱ anciano ku̱a̱ʼání chiñu kúúmiína, soo va̱ʼaníva keʼéna tá ná kundiku̱nna yichi̱ ta̱ Pablo. Ta̱ Pablo nda̱a̱ táki̱ʼva íyo miívayó saá ni̱xi̱yora; chi ta̱ ku̱a̱chi xi̱kuura ta sava yichi̱ xi̱ ixayo̱ʼvi̱ña xíʼinra keʼéra ña̱ va̱ʼa (Rom. 7:18-20). Ni ku̱a̱ʼáníva tu̱ndóʼo ni̱ya̱ʼara nu̱ú soo va̱ása níndakava-inira ta xi̱kusi̱íníva-inira. Ta saátu na̱ anciano, ni ku̱a̱ʼáníva tu̱ndóʼo yáʼana nu̱ú, kiviva kusi̱í-inina kachíñuna nu̱ú Jehová tá ná kundiku̱nna yichi̱ ta̱ Pablo. w22.03 26 párr. 1, 2

Levítico 19:3 xi̱ka̱ʼa̱nña xíʼin na̱ ñuu Israel ña̱ xi̱xiniñúʼu ixato̱ʼóna ki̱vi̱ sábado. Miíyó na̱ cristiano va̱ása ndíku̱nkayó ley yóʼo, soo ku̱a̱ʼání ña̱ kivi sakúaʼayó xíʼin ña̱ xi̱keʼé na̱ ñuu Israel ki̱vi̱ kán, ta saátu ku̱a̱ʼá ña̱ sákuaʼayó xíʼin bendición ña̱ xi̱ndakiʼinna tá xi̱ ixato̱ʼóna ki̱vi̱ kán. Na̱yóʼo va̱ása níxiniñúʼu kachíñuna ki̱vi̱ sábado, chi ña̱ xi̱niñúʼu keʼéna kúú ña̱ ndasakáʼnuna Jehová. Ña̱kán, xi̱xa̱ʼa̱n ta̱ Jesús sinagoga ki̱vi̱ sábado ta xi̱kaʼvira tu̱ʼun Ndióxi̱ (Éx. 31:12-15; Luc. 4:16-18). Tá káʼviyó ña̱ káʼa̱n Levítico 19:3 xa̱ʼa̱ ki̱vi̱ sábado, ña̱yóʼo chindeétáʼan xíʼinyó ña̱ taváyó tiempo ña̱ ndasakáʼnuyó Ndióxi̱. ¿Á túviyó ña̱ íyo iin ña̱ xíniñúʼu keʼéyó ña̱ viíka kundiku̱nyó consejo yóʼo? Tá ná taváyó tiempo ndiʼi ki̱vi̱ ña̱ kundi̱ʼi̱ka-iniyó xa̱ʼa̱ chiñu Ndióxi̱, saá kúú ña̱ viíka xa̱a̱yó kutáʼanyó xíʼinra. Ta ndáyáʼviní keʼéyó ña̱yóʼo ña̱ va̱ʼa yi̱i̱ kooyó. w21.12 5 párr. 13

Tá ni̱xi̱yo ta̱ Jesús nu̱ú ñuʼú yóʼo va̱ʼa xi̱kitáʼanra xíʼin ndiʼi na̱ yiví. Xi̱xira xíʼin na̱ kúiká á na̱ ndáyáʼvi ta xi̱táʼanra xíʼin na̱ ndáʼvi. Ta ku̱ndáʼvi-inira xi̱nira na̱ yiví na̱ xi̱ka̱ʼa̱nna xa̱ʼa̱ ña̱ kúúna na̱ ku̱a̱chi. Ta na̱ yiví na̱ ni̱nuní xi̱kuni va̱ása níxiinna kandíxana ta̱ Jesús xa̱ʼa̱ ña̱ xi̱keʼéra ña̱yóʼo. Chi nda̱a̱ ni̱nda̱ka̱tu̱ʼunna na̱ discípulora: “¿Nda̱chun xíxindó ta xíʼindó xíʼin na̱ ndákaya xu̱ʼún ña̱ impuesto, ta saátu xíʼin na̱ yiví ku̱a̱chi?”. Soo, ta̱ Jesús nda̱kuiinra tu̱ʼun ña̱ va̱xi nu̱ú texto ña̱ káʼviyó ki̱vi̱ vitin (Luc. 5:29-31). Tá kúma̱níka kixi ta̱ Mesías nu̱ú ñuʼú yóʼo, ta̱ Isaías ni̱ka̱ʼa̱nra ña̱ va̱ása kandíxa na̱ yiví ta̱yóʼo. Ña̱yóʼo ka̱ʼyíra: “Na̱ yiví ku̱ndasína xi̱ninara ta kǒo níxiinna kutáʼanna xíʼinra [...]. Va̱ása níxiinyó kuniyóra. Ku̱ndasíyóra, nda̱a̱ táki̱ʼva íyo iin ta̱ kǒo ndáyáʼvi saá ni̱xi̱yora nu̱úyó” (Is. 53:3). Nda̱a̱ táki̱ʼva káchi ña̱ profecía yóʼo, na̱ yiví va̱ása kandíxana kutáʼanna xíʼin ta̱ Mesías. Ña̱kán na̱ judío na̱ xi̱ndoo tá siglo nu̱ú va̱ása níxi̱xiniñúʼu ndakanda̱-inina xa̱ʼa̱ ña̱ va̱ása níxiin na̱ yiví kutáʼanna xíʼin ta̱ Jesús. w21.05 8, 9 párr. 3, 4

Sava na̱ cristiano va̱ása níxi̱ndiku̱nna consejo ña̱ va̱xi nu̱ú tu̱ʼun Ndióxi̱ (Sant. 1:22). Inkana viíka xi̱keʼéna xíʼin na̱ ku̱i̱ká nu̱ú na̱ ndáʼvi (Sant. 2:1-3). Ta inkana xi̱ ixayo̱ʼvi̱níña xíʼinna kiʼinna kuenta xíʼin tu̱ʼun ña̱ xi̱ka̱ʼa̱nna (Sant. 3:8-10). Su̱ví ña̱ va̱ʼa kúú ña̱ níxi̱keʼé na̱ cristiano kán, soo xi̱kunda̱a̱va-ini ta̱ Santiago ña̱ kiviva sandákoona ña̱ kéʼéna. Ña̱kán viíní ta̱xira consejo ndaʼa̱na, ta káxiní ni̱ka̱ʼa̱nra xíʼinna ndáaña xi̱niñúʼu keʼéna. Ta saátu ni̱ka̱ʼa̱nra xíʼin na̱ ku̱a̱ʼa̱n kúxíká nu̱ú Ndióxi̱ ña̱ ná ka̱ʼa̱nna xíʼin na̱ anciano ña̱ chindeétáʼanna xíʼinna (Sant. 5:13-14). Ña̱ sákuaʼayó: Ná kotoyó ndáaña íxayo̱ʼvi̱ xíʼin na̱ káʼviyó xíʼin, ta ná va̱ása kaka-iniyó ña̱ kuchiñuvana nasa̱mana. Ku̱a̱ʼání na̱ káʼviyó xíʼin íxayo̱ʼvi̱ña xíʼinna kundiku̱nna consejo ña̱ va̱xi nu̱ú tu̱ʼun Ndióxi̱ (Sant. 4:1-4). Ta sana ku̱a̱ʼá ku̱i̱ya̱ xíniñúʼu ya̱ʼa tasaá kixáʼana keʼéna ña̱ kúni̱ Ndióxi̱. Nda̱a̱ táki̱ʼva ke̱ʼé ta̱ Santiago ná va̱ása yi̱ʼvíyó ka̱ʼa̱nyó xíʼin na̱ káʼviyó xíʼin ndáaña xíniñúʼu viíka keʼéna. Ta ná va̱ása kaka-iniyó ña̱ kuchiñuvana nasa̱mana chi mií Jehová kúú ta̱ kánana, ta taxira ndee̱ ndaʼa̱na ña̱ sandákoona ña̱ va̱ása va̱ʼa kéʼéna (Sant. 4:10). w22.01 11 párr. 11, 12

Ndiʼi miíyó na̱ ndásakáʼnu Jehová kúni̱yó kundáʼvi-iniyó kuniyó inkana nda̱a̱ táki̱ʼva kéʼé miíra. ¿Nda̱chun? Saáchi Ndióxi̱ va̱ása xíniso̱ʼora ña̱ káʼa̱n na̱ va̱ása kúndáʼvi-ini xíni inkana. Xa̱ʼa̱ ña̱ kúni̱yó ná kuniso̱ʼo Jehová oraciónyó, kíʼinníyó kuenta ña̱ va̱ása ndeé koo iniyó xíʼin inkana, ta va̱ása ndásiyó so̱ʼoyó “tá kána na̱ kúma̱ní ña̱ʼa nu̱ú”. Saáchi íyo tu̱ʼvayó ña̱ kuniso̱ʼoyó ña̱ káʼa̱n na̱ hermanoyó na̱ xóʼvi̱. Ta kándíxayó ña̱ káʼa̱n tu̱ʼun Ndióxi̱: “Na̱ va̱ása kúndáʼvi-ini xíni inkana, va̱ása kundáʼvi-inina kuninana tá ná ndatiinna ku̱a̱chi xíʼinna” (Sant. 2:13). Tá vitá íyo iniyó ta ndákuniyó ña̱ xíniñúʼu kundáʼvi-ini inkana kunina miíyó, ña̱yóʼo chindeétáʼanña xíʼinyó ña̱ saátu kundáʼvi-iniyó kuniyó inkana. Ta kúni̱yó na̱ʼa̱yó ña̱yóʼo xíʼin na̱ ndándikó ti̱xin congregación, xa̱ʼa̱ ña̱ nda̱ndikó-inina. Nu̱ú tu̱ʼun Ndióxi̱ kivi ndani̱ʼíyó ña̱ kivi chindeétáʼan xíʼinyó ña̱ kundáʼvi-iniyó kuniyó inkana, ta va̱ása ndeé koo iniyó xíʼinna. w21.10 12 párr. 16, 17

Ñuú tá kúma̱ní kuvi ta̱ Jesús, na̱ndukúra iin lugar nu̱ú kǒo na̱ yiví íyo ña̱ va̱ʼa ka̱ʼa̱nra xíʼin Jehová ta ndakanixi̱níra, ña̱kán ni̱xa̱ʼa̱nra jardín ña̱ Getsemaní ña̱ va̱ʼa ka̱ʼa̱nra xíʼinra. Ta kán sa̱náʼa̱ra na̱ apóstolra ña̱ ndáyáʼviní ka̱ʼa̱nna xíʼin Jehová. Tá xa̱a̱ ni̱xa̱a̱na jardín ña̱ Getsemaní sana xa̱a̱ yáʼaka sava ñuú kúúña, ta ni̱ka̱ʼa̱n ta̱ Jesús xíʼinna ña̱ ná kunditona, tasaá nda̱kiʼinra ku̱a̱ʼa̱nra ka̱ʼa̱nra xíʼin yivára (Mat. 26:37-39). Soo tá nda̱ndikóra na̱ kísi̱va kúúna, ña̱kán tuku ni̱ka̱ʼa̱nra ña̱yóʼo xíʼinna: “Kundito va̱ʼa nu̱úndó ta ka̱ʼa̱nníndó xíʼin Ndióxi̱” (Mat. 26:40, 41). Ta̱kán xi̱kunda̱a̱-inira ña̱ xi̱ndi̱ʼi̱ní-inina ta ku̱naánína. Ña̱kán ku̱ndáʼviní-inira xi̱nirana ta ni̱ka̱ʼa̱nra ña̱yóʼo xíʼinna: “Na̱ yiví kúni̱vana keʼéna ña̱ va̱ʼa, soo vitánína”. Ta u̱vi̱ka yichi̱ ni̱xa̱ʼa̱nra ni̱ka̱ʼa̱nra xíʼin Ndióxi̱, ta tá nda̱ndikóra su̱ví xíʼin Ndióxi̱ káʼa̱nna chi na̱ kísi̱va kúúna (Mat. 26:42-45). w22.01 28 párr. 10, 11