Diciembre

Ta̱ Jesús chi̱táʼanra ña̱ viíní kítáʼanra xíʼin na̱ discípulora xíʼin ki̱ʼva ña̱ kítáʼan iin ta̱ pastor xíʼin ndikachi sa̱na̱ra (Juan 10:14). Ta ndixaní kúú ña̱ ni̱ka̱ʼa̱n ta̱ Jesús, saáchi tí ndikachi va̱ʼaní xíni̱rí ta̱ ndáarí ta ndákunirí tu̱ʼunra. Iin ta̱a ta̱ ni̱xa̱ʼa̱n xi̱tonde̱ʼé inka ñuu xi̱nira ndáa ki̱ʼva kúu ña̱yóʼo, ta̱yóʼo káchira: “Xi̱kuni̱ndi̱ tavándi̱ na̱ʼná sava tí ndikachi, ña̱kán ki̱xáʼandi̱ kánandi̱rí ña̱ ná kuyatinrí nu̱úndi̱, soo va̱ása níkuyatinrí saáchi va̱ása níndakunirí tu̱ʼunndi̱. Tasaá ki̱ta ta̱ loʼo ta̱ ndáarí ta ki̱xáʼara kánararí ta kamakaví ku̱yatinrí nu̱úra”. Ña̱ ndo̱ʼo ta̱ ta̱a yóʼo sándakaʼánña miíyó ña̱ ni̱ka̱ʼa̱n ta̱ Jesús keʼé ndikachi sa̱na̱ra á na̱ discípulora. Ta̱yóʼo ka̱chira: “Tíyóʼo kuniso̱ʼorí ña̱ káʼi̱n”. Soo chí ndivíva íyo ta̱ Jesús. Ña̱kán, ¿ndáa ki̱ʼva kuniso̱ʼoyó ña̱ káʼa̱nra? Iin ki̱ʼva ña̱ kuniso̱ʼoyóra kúú ña̱ keʼéyó ña̱ sa̱náʼa̱ra (Mat. 7:24, 25). w21.12 16 párr. 1, 2

Ta̱ apóstol Pablo xi̱ndiku̱nra sa̱tá na̱ hermano ta xi̱ ixandi̱va̱ʼara xíʼinna. Soo tándi̱ʼi na̱kunda̱a̱-inira ña̱ su̱ví ña̱ va̱ʼa kúú ña̱ níxi̱keʼéra (1 Tim. 1:12-16). Xa̱ʼa̱ ña̱ chi̱ndeétáʼan Jehová xíʼinra ni̱xa̱a̱ra ku̱ura iin anciano ta̱ va̱ʼaní-ini, ta̱ kúndáʼvi-ini xíni̱ inkana, ta̱ vitání-ini. Ni va̱ása va̱ʼa níxi̱kunira xa̱ʼa̱ ña̱ va̱ása va̱ʼa xi̱keʼéra, va̱ása níndakaniníxi̱níra xa̱ʼa̱ ña̱yóʼo chi xi̱kunda̱a̱-inira ña̱ koo káʼnuva-ini Jehová xa̱ʼa̱ra (Rom. 7:21-25). Xi̱kunda̱a̱-inira ña̱ xi̱kuura iin ta̱a ta̱ ku̱a̱chi, ña̱kán chi̱ka̱a̱níra ndee̱ ña̱ keʼéra nda̱a̱ táki̱ʼva kúni̱ mií Jehová. Ta vitá ni̱xi̱yo inira chi xi̱ndaa-inira ña̱ chindeétáʼan Jehová xíʼinra ña̱ saxínura chiñu ña̱ ta̱xira ndaʼa̱ra (1 Cor. 9:27; Filip. 4:13). Va̱ása ndáka̱xinna na̱ va̱ʼaní kéʼé ndiʼi ña̱ʼa ña̱ koona anciano chi na̱ ku̱a̱chi kúútu na̱yóʼova. Soo ña̱ kúni̱ Jehová kúú ña̱ ná ndakunina ña̱ va̱ása vií kéʼéna ndiʼi ña̱ʼa ta ná chika̱a̱nína ndee̱ ña̱ keʼéna ña̱ kúni̱ miíra (Efes. 4:23, 24). Na̱ anciano xíniñúʼu kaʼvina tu̱ʼun Ndióxi̱ ña̱ va̱ʼa chindeétáʼanña xíʼinna ña̱ kunda̱a̱-inina ndáaña kúú ña̱ va̱ása vií kéʼéna ta nasamana ña̱yóʼo. Saá kúú ña̱ chindeétáʼan Jehová xíʼinna ña̱ si̱íní koona ta kuchiñuna saxínuna chiñu ña̱ ta̱xira ndaʼa̱na (Sant. 1:25). w22.03 29, 30 párr. 13-15

¿Ndáaña xíniñúʼu keʼéyó tá ki̱ʼinyó kuenta ña̱ va̱ása vií ndákanixi̱níyó xa̱ʼa̱ iin na̱ hermano? Ná ndakaʼányó ña̱ xíniñúʼu kuʼvi̱-iniyó kuniyóna (Sant. 2:8). Ta xíniñúʼu keʼéyó oración nu̱ú Jehová, ta ka̱ʼa̱nyó xíʼinra ña̱ ná chindeétáʼanra xíʼinyó ña̱ va̱ása ka̱ʼa̱nyó ña̱ va̱ása va̱ʼa xa̱ʼa̱ inkana. Ta ña̱ va̱ʼa keʼéyó ña̱ ndúkúyó nu̱ú Jehová ti̱xin oración, siʼna miíyó ná kuyatin nu̱ú na̱ hermano kán ta ka̱ʼa̱nyó xíʼinna. Ta saátu kivi ka̱ʼa̱nyó xíʼinna ña̱ keena xíʼinyó natúʼunyó xa̱ʼa̱ Ndióxi̱ á kanayóna kuxuna xíʼinyó. Tá ná kuxini̱kayó na̱ hermano yóʼo, saá kivi kundiku̱nyó yichi̱ Jehová xíʼin ta̱ Jesús ta kotoyó ña̱ va̱ʼa ña̱ kéʼéna. Tasaá na̱ʼa̱yó ña̱ xíniso̱ʼoyó ña̱ ni̱ka̱ʼa̱n ta̱ Jesús xíʼinyó ña̱ va̱ása ndatiinyó ku̱a̱chi xíʼin inkana. Nda̱a̱ táki̱ʼva kéʼé tí ndikachi chi xíniso̱ʼorí tu̱ʼun ta̱ ndáa miírí, saátu miíyó na̱ discípulo ta̱ Jesús xíniso̱ʼoyó tu̱ʼunra. Ña̱kán, ni kúúyó na̱ ku̱ʼu̱n chí ndiví á na̱ kundoo nu̱ú ñuʼú yóʼo, ndiʼiyó ná chika̱a̱yó ndee̱ ña̱ kuniso̱ʼoyó tu̱ʼun ta̱ va̱ʼaní kúú pastor (Luc. 12:32; Juan 10:11, 14, 16). w21.12 19 párr. 11; 20, 21 párr. 17, 18

Tá ni̱xa̱a̱ ta̱ Rehoboam ndu̱ura rey ti̱xin ñuu Israel, na̱ ñuu ni̱ka̱ʼa̱nna xíʼinra ña̱ loʼoka ña̱ʼa ná ndukúra nu̱úna, saáchi yivára ta̱ Salomón ku̱a̱ʼání ña̱ʼa xi̱ndukúra nu̱úna. Ta va̱ʼava íyo ña̱ ke̱ʼé ta̱ Rehoboam, saáchi ni̱nda̱ka̱tu̱ʼunra na̱ anciano na̱ ni̱xi̱yo ti̱xin ñuu Israel xa̱ʼa̱ ña̱yóʼo. Ta na̱yóʼo ni̱ka̱ʼa̱nna xíʼinra ña̱ tá ná keʼéra ña̱ ni̱ka̱ʼa̱n na̱ ñuu xíʼinra, saá kúú ña̱ chindeétáʼanna xíʼinra ndiʼi tiempo (1 Rey. 12:3-7). Soo ta̱ Rehoboam va̱ása níkutóora consejo yóʼo, ña̱kán ni̱xa̱ʼa̱nra ni̱nda̱ka̱tu̱ʼunra na̱ ta̱a na̱ inkáchi xa̱ʼnu xíʼinra. Ni̱ka̱ʼa̱nna xíʼinra ña̱ ku̱a̱ʼáka ña̱ʼa ná ndukúra nu̱ú na̱ ñuu Israel (1 Rey. 12:9-11). Ta̱ Rehoboam, xi̱niñúʼu nda̱ka̱tu̱ʼunra Jehová ndáa consejo kúú ña̱ kundiku̱nra. Soo nu̱úka ña̱ kuniso̱ʼora Jehová, inkavana xi̱niso̱ʼora, ta xa̱ʼa̱ ña̱yóʼo ku̱a̱ʼání tu̱ndóʼo ki̱xi nu̱úra ta saátu nu̱ú na̱ ñuu. Ta sana saátu kivi kundoʼoyó, chi kivi taxina iin consejo ndaʼa̱yó ña̱ va̱ása kutóoyó. Soo tá nu̱ú tu̱ʼun Ndióxi̱ ta̱vánaña xíniñúʼu kundiku̱nvayóña. w22.02 9 párr. 6

Iin na̱ yiví na̱ vitá-ini ta ndákunina ña̱ íyo ña̱ va̱ása kívika keʼéna, chíka̱a̱na ndee̱ ña̱ kotona ndáaña kúú ña̱ xíni̱ na̱ hermano na̱ válíka keʼéna, ta va̱ása ndíʼi̱ní-inina xa̱ʼa̱ ña̱ va̱ása kúchiñu na̱yóʼo keʼéna. Ta saátu va̱ása kéetáʼanna xíʼin na̱yóʼo, saáchi inkáchi káchíñuna xíʼinna. Na̱ hermano na̱ xa̱a̱ ku̱chée kúnda̱a̱-inina ña̱ iin regalo ña̱ táxi Jehová kúú na̱ hermano na̱ válíka nu̱úna, ta táxinína tíxa̱ʼvi ndaʼa̱ra xa̱ʼa̱ ña̱ kéʼé na̱yóʼo. Ta xa̱ʼa̱ ña̱ xa̱a̱ ku̱a̱ʼa̱n ndíʼi ndee̱na chíndayáʼvina chiñu ña̱ kivi keʼé na̱ válíka, ta saátu chíndayáʼvinína na̱yóʼo tá kúni̱na keʼéna ku̱a̱ʼáka chiñu ti̱xin congregación. Va̱ʼaní yichi̱ sa̱ndákoo ñá Noemí nu̱úyó, saáchi ta̱xiñá ña̱ ná chindeétáʼan ñá Rut xíʼinñá ta saátu ta̱xiníñá tíxa̱ʼvi ndaʼa̱ñá. Tá ni̱xi̱ʼi̱ se̱ʼe ñá Noemí ni̱ka̱ʼa̱nñá xíʼin ñá Rut ña̱ ná ndikóñá nu̱ú na̱ veʼeñá. Soo va̱ása níxiin ñá Rut keʼéñá ña̱yóʼo, ta ni̱ka̱ʼa̱nñá xíʼinñá ña̱ ku̱ʼu̱nñá xíʼinñá nda̱a̱ Belén, ta ka̱ndíxava ñá Noemí (Rut 1:7, 8, 18). Ta ku̱a̱ʼání ña̱ va̱ʼa nda̱kiʼin u̱vi̱ saá náyóʼo (Rut 4:13-16). Na̱ hermano na̱ vitá-ini ndíku̱nna yichi̱ ñá Noemí. w21.09 10, 11 párr. 9-11

Jehová kúnda̱a̱-inira ndáaña kúú ña̱ kivi taxiyó ndaʼa̱ra. Sana miíún kivi keʼún ku̱a̱ʼáka chiñu nu̱úra nu̱úka ña̱ kéʼé inkana. Á sanatu xa̱ʼa̱ ña̱ ku̱chéún, xa̱ʼa̱ ña̱ kúúmiíún iin kue̱ʼe̱ á xa̱ʼa̱ ña̱ xíniñúʼu kundaún na̱ veʼún va̱ása kivi keʼún ku̱a̱ʼá chiñu nu̱úra. Soo va̱ása ndakava-iniún (Gál. 6:4). Jehová va̱ása nandósó-inira xa̱ʼa̱ ndiʼi chiñu ña̱ kéʼún nu̱úra vitin. Tá ná chika̱ún ndee̱ ña̱ ndasakáʼnúnra xíʼin ndiʼi níma̱ún, kusi̱íníva-inira. Jehová kúnda̱a̱va-inira tá káchíñún nu̱úra xíʼin ndiʼi níma̱ún. Kúni̱ra ña̱ ná kusi̱í-iniún xíʼin chiñu ña̱ kivi keʼún nu̱úra. Vitin xa̱a̱ táxi̱n íyo iniyó chi kúnda̱a̱-iniyó ña̱ íyo Jehová ña̱ chindeétáʼanra xíʼinyó tá íyo tu̱ndóʼo nu̱úyó (Is. 41:9, 10). Kúsi̱íníva-iniyó tá ndásakáʼnuyó yiváyó Jehová, chi miíra kúú ta̱ xíniñúʼu ndukáʼnu ta ixato̱ʼóyóra (Apoc. 4:11). w22.03 24 párr. 16; 25 párr. 18

Ná va̱ása ndakava-iniyó tá va̱ása kúchiñuyó viíní kundiku̱nyó yichi̱ ta̱ Jesús (Sant. 3:2). Iin na̱ káʼvi, va̱ása kiviví xa̱a̱na koona nda̱a̱ táki̱ʼva íyo na̱ sánáʼa̱ miína, soo tá chíka̱a̱na ndee̱ ña̱ vií keʼéna ña̱ íxayo̱ʼvi̱ xíʼinna, ta saátu tá chíka̱a̱na ndee̱ ña̱ kundiku̱nna yichi̱ na̱ sánáʼa̱ miína, loʼo tá loʼo sakúaʼana keʼéna táʼan ña̱ kéʼé na̱yóʼo. Ta saátu miíyó, tá chíka̱a̱yó ndee̱ ña̱ keʼéyó ña̱ sákuaʼayó nu̱ú tu̱ʼun Ndióxi̱, ta ndásaviíyó ña̱ va̱ása va̱ʼa kéʼéyó, saá kúú ña̱ kuchiñuyó kundiku̱nyó yichi̱ ta̱ Jesús (Sal. 119:59). Na̱ ñuyǐví yóʼo iinlá xa̱ʼa̱ miívana ndíʼi̱-inina, soo su̱ví saá íyo miíyó na̱ ndásakáʼnu Jehová. Ndákanda̱ní-iniyó xíʼin ña̱ ke̱ʼé ta̱ Jesús saáchi chi̱ndeétáʼanra xíʼin inkana, ta kúni̱yó kundiku̱nyó yichi̱ra (1 Ped. 2:21). Tá ná chika̱a̱yó ndee̱ ña̱ chindeétáʼanyó xíʼin inkana nda̱a̱ táki̱ʼva ke̱ʼé ta̱ Jesús, saá kúú ña̱ kusi̱íní-ini Jehová xíʼinyó ta kusi̱ínítu-ini miívayó. w22.02 24 párr. 16; 25 párr, 18

Jehová xíniñúʼura Biblia ña̱ va̱ʼa kuniʼira yichi̱ nu̱ú na̱ ñuura tiempo vitin. Tá táváyó tiempo ña̱ ndakanixi̱níyó xa̱ʼa̱ ña̱ sánáʼa̱ Jehová miíyó, kivi kundiku̱nyó ña̱ káʼa̱nra ta saxínuyó chiñuyó ña̱ natúʼunyó xíʼin na̱ yiví (1 Tim. 4:15, 16). Inka ki̱ʼva ña̱ níʼi Jehová yichi̱ nu̱ú na̱ ñuura kúú ña̱ xíniñúʼura ta̱ “esclavo ta̱ nda̱kúní-ini ta̱ ndíchiní” (Mat. 24:45). Kivi ka̱ʼa̱nna xíʼinyó ña̱ keʼéyó iin ña̱ʼa ta kǒo kunda̱a̱-iniyó xíʼinña. Tá kúú, sana ka̱ʼa̱nna xíʼinyó ndáaña keʼéyó tá ndeéní ná kuun sa̱vi̱ á tá ná ta̱an, soo kivi ndakanixi̱níyó ña̱ va̱ása kuuví ña̱yóʼo ñuu nu̱ú íyoyó. Tá saá, ¿ndáaña kivi keʼéyó tá ni̱ka̱ʼa̱nna xíʼinyó keʼéyó iin ña̱ʼa soo ndákanixi̱níyó ña̱ va̱ása chindeétáʼanvíña xíʼinyó? Ná ndakanixi̱níyó xa̱ʼa̱ inkaka ña̱ ka̱ʼviyó nu̱ú Biblia. Na̱ xi̱kachíñu nu̱ú Ndióxi̱ ku̱a̱ʼá yichi̱ xi̱ka̱ʼa̱nna xíʼinna ndáaña xíniñúʼu keʼéna, ta sana xi̱ndakanixi̱nína ña̱ va̱ása chindeétáʼanña xíʼinna soo tándi̱ʼi sa̱kǎkuvaña miína (Juec. 7:7; 8:10). w22.03 18 párr. 15, 16

Xíʼin ndinuʼu-ini ta̱ Jesús ni̱ka̱ʼa̱nra tu̱ʼun ña̱ va̱xi nu̱ú texto ña̱ ki̱vi̱ vitin. Xi̱kunda̱a̱-inira ña̱ iinlá yivára kúú ta̱ kivi sandátaku miíra, ta xi̱kandíxara ña̱ ndakaʼánva yivára xa̱ʼa̱ra. Ña̱kán, ¿ndáaña sákuaʼayó xíʼin ña̱ ni̱ka̱ʼa̱n ta̱ Jesús? Xíniñúʼu chika̱a̱-iniyó ña̱ nda̱kú koo iniyó xíʼin Jehová ni ná kuviyó. Ta ña̱ va̱ʼa keʼéyó ña̱yóʼo, xíniñúʼu kundaa-iniyóra xíʼin ndiʼi níma̱yó (Prov. 3:5). Ná ndakanixi̱níyó xa̱ʼa̱ ta̱ Joshua, iin ta̱ loʼo ta̱ xi̱kuumií 15 ku̱i̱ya̱, ta̱yóʼo xi̱kuumiíra iin kue̱ʼe̱ ña̱ kǒo kívi ndaʼara xíʼin. Ta̱yóʼo va̱ása níxiinra kutátanra xíʼin ña̱ʼa ña̱ yáʼandosó ley Ndióxi̱. Tá kúma̱ní si̱lóʼo kuvira, tu̱ʼun yóʼo kúú ña̱ ni̱ka̱ʼa̱nra xíʼin siʼíra: “Iinlá Jehová kúú ta̱ xíni̱ xa̱ʼíi̱. Ta kándíxavai̱ ña̱ sandátakura yi̱ʼi̱, chi xíni̱vara ndáaña ndíka̱a̱ níma̱i̱ ta kúnda̱a̱-inira ña̱ kúʼvi̱ní-inii̱ xínii̱ra”. Ndiʼiyó xíniñúʼu ndakanixi̱níyó xa̱ʼa̱ ña̱yóʼo: “Tá ná ya̱ʼi̱ nu̱ú iin tu̱ndóʼo ta nda̱a̱ sana kivi kuvii̱, ¿á na̱ʼi̱ ña̱ nda̱kú-íyo inii̱ xíʼin Jehová ta kandíxai̱ ña̱ ndakaʼánra xa̱ʼíi̱ ta sandátakura yi̱ʼi̱?”. w21.04 12, 13 párr. 15, 16

Tá nátúʼunyó xíʼin na̱ yiví xa̱ʼa̱ Ndióxi̱. Ña̱yóʼo chíndeétáʼan xíʼinyó ña̱ va̱ʼa kuniyó ta ndásandakúña-iniyó, ni xíniso̱ʼo na̱ yiví ña̱ nátúʼunyó á va̱ása. Xa̱ʼa̱ ña̱ ndóʼoyó sana túviyó ña̱ va̱ása kuchiñuyó natúʼunyó ku̱a̱ʼá tiempo xíʼin na̱ yiví. Soo ná ndakaʼányó ña̱ ni loʼo á ku̱a̱ʼá kúú ña̱ kéʼéyó kúsi̱íva-ini Jehová xíʼinyó. Tá va̱ása kívi keeyó ti̱xin veʼeyó xa̱ʼa̱ ña̱ ndeé ndóʼoyó, kúnda̱a̱va ini Jehová ña̱ kúni̱yó natúʼunyó xíʼin na̱ yiví xa̱ʼa̱ra. Ña̱kán kivi chindeétáʼanra xíʼinyó ña̱ natúʼunyó xíʼin na̱ ndáa miíyó á na̱ médico. Tá ná chitáʼanyó ña̱ kéʼéyó vitin xíʼin ña̱ xi̱keʼéyó tá ya̱chi̱ kivi ndakava-iniyó. Soo tá ná kotoyó ndáa ki̱ʼva xa̱a̱ chíndeétáʼan Jehová xíʼinyó vitin, koova ndee̱yó ña̱ va̱ʼa kundeé-iniyó ya̱ʼayó nu̱ú nda̱a̱ ndáaka tu̱ndóʼo, ta ndakundeéyó kusi̱í-iniyó. Tá nátúʼunyó xíʼin na̱ yiví va̱ása kúnda̱a̱-iniyó ndáana kúú na̱ ndakundeé sakúaʼa xa̱ʼa̱ Ndióxi̱ (Ecl 11:6). w21.05 24, 25 párr. 14-17

Ná ka̱ʼa̱nyó xa̱ʼa̱ ña̱ ndo̱ʼo ta̱ rey David. Jehová ta̱xira ku̱a̱ʼání ña̱ʼa ndaʼa̱ra, tá kúú ta̱xira ña̱ ku̱i̱ká ndaʼa̱ra, ku̱a̱ʼání na̱ yiví xi̱xininara ta ku̱chiñura ka̱nitáʼanra xíʼin ku̱a̱ʼání na̱ xi̱sa̱a̱-ini xi̱xiniñaʼá. Ta̱ David xi̱taxiníra tíxa̱ʼvi xa̱ʼa̱ ndiʼi ña̱yóʼo, ta ni̱ka̱ʼa̱nra ña̱ ku̱a̱ʼání ña̱ʼa ta̱xi Ndióxi̱ ndaʼa̱ra (Sal. 40:5). Soo ni̱xi̱yo iin tiempo ña̱ ki̱xáʼa ta̱ David kúni̱ra kuumiíra ku̱a̱ʼáka ña̱ʼa, ta na̱ndósó-inira xa̱ʼa̱ ndiʼi ña̱ xa̱a̱ ta̱xi Jehová ndaʼa̱ra. Ni ku̱a̱ʼá ni̱xi̱yo ná síʼi ta̱ David soo xi̱kuni̱ra ñá síʼi inka ta̱a. Ñáyóʼo xi̱naníñá Bat-Seba ta yiíñá xi̱naníra Urías. Ni xi̱kunda̱a̱-ini ta̱ David ña̱ va̱ása kútóo Jehová ña̱yóʼo, soo ni saá xi̱kuni̱ra sákusi̱íra-ini miíra, ña̱kán ni̱ki̱si̱ra xíʼin ñá Bat-Seba ta ni̱ke̱e se̱ʼeñá. Soo su̱ví ña̱yóʼo kúú ndiʼi ña̱ ke̱ʼéra, saáchi nda̱a̱ ndu̱kúra ki̱ʼva ña̱ ná kaʼnína ta̱ Urías (2 Sam. 11:2-15). ¿Nda̱chun ke̱ʼéra ña̱yóʼo? ¿Á va̱ása níndakanixi̱níra ña̱ xítova Jehová ña̱ kéʼéra? Ni ku̱a̱ʼání ku̱i̱ya̱ nda̱kú ni̱xi̱yo inira xíʼin Jehová, soo xi̱kuni̱ra sákusi̱íra-ini miíra ta xi̱kuni̱ra kuumiíra ñá síʼi inka ta̱a, ta ni̱xo̱ʼvi̱níra xa̱ʼa̱ ña̱ va̱ása va̱ʼa ke̱ʼéra. Soo tá ni̱ya̱ʼa tiempo ta̱ David na̱túʼunra xa̱ʼa̱ ña̱ va̱ása va̱ʼa ke̱ʼéra ta nda̱ndikó-inira. Tasaá i̱xakáʼnu-ini Jehová xa̱ʼa̱ra ta ni̱kusi̱íní-ini ta̱ David xa̱ʼa̱ ña̱yóʼo (2 Sam. 12:7-13). w21.06 17 párr. 10

Sana ndákanixi̱níyó ña̱ va̱ása xíni̱níyó xa̱ʼa̱ ña̱ káʼa̱n Biblia á túviyó ña̱ kúma̱níka nu̱úyó ña̱ va̱ʼa kixáʼayó sanáʼa̱yó na̱ yiví. Tá saá íyo ña̱ ndóʼoyó ná ndakanixi̱níyó xa̱ʼa̱ u̱ni̱ ña̱ʼa ña̱ sáxi̱nu̱-iniyó ña̱ kuchiñuvayó kaʼviyó xíʼin na̱ yiví. Ña̱ nu̱ú, Jehová kúnda̱a̱-inira ña̱ kuchiñuvayó sanáʼa̱yó na̱ yiví. Ña̱ u̱vi̱, ta̱ Jesús ta̱ kíʼin kuenta xíʼin ndiʼi ña̱ʼa ña̱ íyo chí ndiví xíʼin ña̱ íyo nu̱ú ñuʼú yóʼo, xa̱ʼndara chiñu nu̱úyó ña̱ sanáʼa̱yó na̱ yiví (Mat. 28:18). Ta ña̱ u̱ni̱, va̱ása íyo mitúʼunyó saáchi nda̱a̱ táki̱ʼva chi̱ndeétáʼan Jehová xíʼin ta̱ Jesús, saátu chindeétáʼanra xíʼin miíyó ña̱ kunda̱a̱-iniyó ndáaña ka̱ʼa̱nyó xíʼin na̱ yiví (Juan 8:28; 12:49). Ta saátu kivi ka̱ʼa̱nyó xíʼin ta̱ superintendente ña̱ grupo nu̱ú ndíka̱a̱yó, á xíʼin na̱ kúú precursor á iin na̱ xa̱a̱ ku̱a̱ʼání ku̱i̱ya̱ kúú publicador ña̱ va̱ʼa chindeétáʼanna xíʼinyó ña̱ kaʼviyó xíʼin iin na̱ yiví. Tá ná ku̱ʼu̱nyó xíʼin na̱yóʼo tá ku̱a̱ʼa̱nna kaʼvina xíʼin iin na̱ yiví, ña̱yóʼo kivi chindeétáʼanña xíʼinyó ña̱ viíka sanáʼa̱yó. w21.07 6 párr. 12

Xa̱a̱ ku̱yatinní ndiʼi-xa̱ʼa̱ ñuyǐví yóʼo. Ña̱kán ndáyáʼviní kandíxayó ña̱ viíní íyo ndiʼi ña̱ ndáka̱xin Jehová keʼéra. ¿Nda̱chun? Saáchi tá ná kixáʼa ña̱ gran tribulación, sana ka̱ʼa̱n na̱ ñuu Ndióxi̱ xíʼinyó keʼéyó iin ña̱ʼa ña̱ kivi ixayo̱ʼvi̱ xíʼinyó keʼéyó. Saáchi va̱ása kunda̱a̱-iniyó nda̱chun kúú ña̱ káʼa̱nna xíʼinyó keʼéyóña, á sana ndakanixi̱níyó ña̱ yo̱ʼvi̱ní ña̱ ndúkúna nu̱úyó keʼéyó. Tá ná kuu ña̱yóʼo, va̱ása ka̱ʼa̱nví Jehová xíʼin iin tá iinyó ndáaña xíniñúʼu keʼéyó. Chi sana kuniñúʼura na̱ nda̱kaxinra ña̱ ka̱ʼa̱nna xíʼinyó ndáaña xíniñúʼu keʼéyó. Su̱ví iin tiempo ña̱ xíniñúʼu kaka-iniyó koo ña̱yóʼo ta kixáʼayó ndakanixi̱níyó ña̱ káʼa̱nna xíʼinyó keʼéyó ña̱ kúni̱ miína su̱ví ña̱ kúni̱ Jehová. ¿Á kandíxayó Jehová xíʼin na̱ ñuura ti̱xin ña̱ gran tribulación? Iin ña̱ chindeétáʼan xíʼinyó kunda̱a̱-iniyó xa̱ʼa̱ ña̱yóʼo kúú ña̱ kotoyó ndáa ki̱ʼva ndíku̱nyó ndiʼi ña̱ káʼa̱n na̱ ñuu Ndióxi̱ xíʼinyó tiempo vitin. Tá kándíxayó ndiʼi ña̱ káʼa̱n na̱ ñuu Jehová xíʼinyó tiempo vitin ta kama kéʼéyóña, saátu keʼéyó ti̱xin ña̱ gran tribulación. w22.02 6 párr. 15

Jehová chi̱ndeétáʼanra xíʼin ta̱ Gedeón ta saátu xíʼin u̱ni̱ ciento na̱ ta̱a na̱ xi̱kitáʼan xíʼinra ña̱ va̱ʼa ku̱chiñuna ka̱nitáʼanna xíʼin na̱ xi̱sa̱a̱-ini xi̱xiniñaʼá, ta kivi xa̱a̱na kuta̱a-inina xa̱ʼa̱ ña̱ ke̱ʼéna. Ta na̱ ta̱a na̱ ke̱e ti̱xin tribu ta̱ Efraín, ni̱xa̱ʼa̱nna ni̱na̱ána xíʼin ta̱ Gedeón (Juec. 8:1). Ta̱ Gedeón ni̱ka̱ʼa̱nra xíʼinna ndáa ki̱ʼva xa̱a̱ táxi Jehová bendición ndaʼa̱na. Xa̱ʼa̱ ña̱yóʼo va̱ása nísa̱a̱kana xíʼinra (Juec. 8:3). Ta̱ Gedeón vitá ni̱xi̱yo inira saáchi xi̱kuni̱ra vií kutáʼan na̱ ñuu Ndióxi̱. Xíʼin ña̱ ke̱ʼé na̱ ta̱a na̱ ke̱e ti̱xin tribu ta̱ Efraín, sákuaʼayó ña̱ va̱ása xíniñúʼu kundi̱ʼi̱níka-iniyó xa̱ʼa̱ ña̱ ka̱ʼa̱n va̱ʼana xa̱ʼa̱ miíyó nu̱úka ña̱ ka̱ʼa̱n va̱ʼana xa̱ʼa̱ Jehová. Ta xíʼin ña̱ ke̱ʼé ta̱ Gedeón kivi sákuaʼa na̱ níʼi yichi̱ nu̱ú na̱ veʼena á na̱ anciano, ña̱ xíniñúʼu chika̱a̱na ndee̱ ña̱ kunda̱a̱-inina nda̱chun kúú ña̱ sáa̱ inkana xíʼinna sava yichi̱. Ta saátu kivi taxina tíxa̱ʼvi ndaʼa̱ na̱ yiví kán xa̱ʼa̱ ña̱ va̱ʼa kéʼéna. Sana ixayo̱ʼvi̱ña xíʼinna keʼéna ña̱yóʼo soo xíniñúʼu vitá koo-inina. Ña̱ ndáyáʼviníka kúú ña̱ vií kutáʼanna ti̱xin veʼena á ti̱xin congregación, nu̱úka ña̱ na̱ʼa̱na ña̱ kǒo ku̱a̱chi kúúmiína. w21.07 16, 17 párr. 10-12

Jehová i̱xava̱ʼara miíyó nda̱a̱ táki̱ʼva íyora. Xa̱ʼa̱ ña̱yóʼo kivi na̱ʼa̱yó táʼan ña̱ va̱ʼa ña̱ kúúmiíra, tá kúú ña̱ kuʼvi̱-iniyó kuniyó inkana, ña̱ kundáʼvi-iniyó kuniyóna, xíʼin ña̱ nda̱kú koo iniyó (Sal. 86:15; 145:17). Tá chíka̱a̱yó ndee̱ ña̱ na̱ʼa̱yó ña̱yóʼo, saá kúú ña̱ íxato̱ʼóyó Jehová ta táxiyó tíxa̱ʼvi ndaʼa̱ra (1 Ped. 1:14-16). Tá kéʼéyó ña̱ kútóo mií Jehová saá kúú ña̱ kúsi̱íní-iniyó. Saátu xa̱ʼa̱ ña̱ ke̱ʼé Jehová miíyó nda̱a̱ táki̱ʼva íyora, kivi xa̱a̱yó keʼéyó nda̱a̱ táki̱ʼva kúni̱ra ná keʼé na̱ se̱ʼera. Jehová i̱xava̱ʼara nu̱ú kundooyó. Tá kúma̱níka ixava̱ʼara ta̱ Adán, siʼna i̱xava̱ʼara ñuʼú yóʼo ña̱ va̱ʼa kundoo na̱ yiví nu̱úña (Job 38:4-6; Jer. 10:12). Ta xa̱ʼa̱ ña̱ va̱ʼaní-ini Jehová, i̱xava̱ʼara ku̱a̱ʼání ña̱ʼa nu̱úña ña̱ va̱ʼa si̱íní kundooyó (Sal. 104:14, 15, 24). Ta ta̱vára tiempo ña̱ xi̱tora ndiʼi ña̱ i̱xava̱ʼara, ta ki̱ʼinra kuenta ña̱ va̱ʼaní íyoña. Gén. 1:10, 12, 31. w21.08 3 párr. 5, 6

Ndiʼi miíyó na̱ ndásakáʼnu Ndióxi̱ kúúmiíyó iin chiñu ña̱ natúʼunyó xa̱ʼa̱ra xíʼin na̱ yiví, ta chindeétáʼanyó xíʼinna ña̱ xa̱a̱na koona discípulo ta̱ Jesús (Mat. 28:19, 20; Rom. 10:14). ¿Á kúni̱yó viíka keʼéyó chiñu ña̱ ndáyáʼviní yóʼo? Tá saá, ná kaʼviyó folleto ña̱ naní Na̱ sánáʼa̱, ta ná chika̱a̱yó ndee̱ keʼéyó ña̱ sákuaʼayó nu̱ú ña̱yóʼo. Iin ña̱ ndáyáʼviní chika̱a̱-iniyó keʼéyó kúú ña̱ kuumiíyó ña̱ va̱ʼa ña̱ kúni̱ Ndióxi̱ ná kuumiíyó (Col. 3:12; 2 Ped. 1:5-8). Ndiʼivayó kúni̱yó keʼéyó ku̱a̱ʼáka chiñu nu̱ú Jehová, soo loʼovaña kéʼéyó vitin. Nu̱ú ñuyǐví xa̱á keʼéyó ku̱a̱ʼáníkaña ta kǒo ña̱ kasi nu̱úyó keʼéyó ña̱yóʼo. Nani ndátuyó ná kixaa̱ ña̱ ki̱vi̱ yóʼo ná chika̱a̱níyó ndee̱ keʼéyó chiñu ña̱ kúchiñuyó keʼéyó, tasaá kusi̱íníka-iniyó ta va̱ása ndakava-iniyó. Ta mií ña̱ ndáyáʼvi va̱ʼaka kúú ña̱ ndasakáʼnuyó Jehová xíʼin ña̱ kéʼéyó, chi ta̱yóʼo kúúra iin Ndióxi̱ ta̱ si̱í-ini (1 Tim. 1:11). Ña̱kán ná kusi̱íní-iniyó xíʼin chiñu ña̱ kívi keʼéyó nu̱ú Jehová. w21.08 25 párr. 18-20

¿Á xa̱a̱ testigo Jehová kúú na̱ veʼún tá ka̱kún? Tá saá, nda̱a̱ tá loʼoviún sa̱náʼa̱na yóʼó xa̱ʼa̱ Jehová. Ta ku̱ndaa̱-iniún ña̱ i̱xava̱ʼara ndiʼi ña̱ʼa, ta ku̱a̱ʼání ña̱ va̱ʼa kúúmiíra, ta saátu kúni̱ra ña̱ ná kundooyó nu̱ú iin ñuʼú livi (Gén. 1:1; Hech. 17:24-27). Ku̱a̱ʼání na̱ yiví va̱ása kándíxana ña̱ íyo Ndióxi̱, ta saátu va̱ása kándíxana ña̱ i̱xava̱ʼara ndiʼi ña̱ʼa. Saáchi káʼa̱nna ña̱ iin sana ku̱ʼva ndiʼi ña̱ʼa ña̱ íyo nu̱ú ñuʼú yóʼo, tasaá loʼo tá loʼo ki̱xáʼaña na̱samaña. Sava na̱yóʼo na̱ ka̱ʼvi va̱ʼa kúúna, ta káʼa̱nna ña̱ ciencia náʼa̱ña ña̱ su̱ví ña̱ nda̱a̱ kúú ña̱ va̱xi nu̱ú Biblia. Káʼa̱ntuna ña̱ na̱ kíʼvi, na̱ va̱ása níkaʼvi á na̱ va̱ása xíni̱ kúú na̱ kándíxa ña̱ íyo iin ta̱ i̱xava̱ʼa ndiʼi ña̱ʼa. Ni loʼo á xa̱a̱ ku̱a̱ʼá ku̱i̱ya̱ ndásakáʼnuyó Jehová, ndiʼivayó xíniñúʼu chika̱a̱ ndee̱ ña̱ kandíxakayóra. Tá ná keʼéyó ña̱yóʼo va̱ása taxiyó sandáʼvi na̱ ñuyǐví yóʼo miíyó xíʼin tu̱ʼun ndíchi ña̱ káʼa̱nna, ta saátu xíʼin tu̱ʼun vatá ña̱ va̱ása ndáyáʼvi. Saáchi na̱yóʼo káʼa̱nna ña̱ su̱ví ña̱ nda̱a̱ kúú ña̱ káʼa̱n tu̱ʼun Ndióxi̱ (Col. 2:8). w21.08 14 párr. 1-3

Ta̱ Abel, ta̱ Noé, ta̱ Abrahán xíʼin ta̱ Job. Na̱yóʼo xi̱xiniso̱ʼonara, xi̱kandíxanara ta xi̱sokóna ña̱ʼa nu̱úra. Soo chi̱ka̱a̱nívana ndee̱ ña̱ ixato̱ʼónara ta ku̱si̱í-inira xíʼin ki̱ʼva ña̱ nda̱sakáʼnunara. Tá ni̱ya̱ʼa tiempo, Ndióxi̱ ta̱xira Ley ta̱ Moisés ndaʼa̱ na̱ se̱ʼe ta̱ Abrahán, ta nu̱ú Ley yóʼo ni̱ka̱ʼa̱n káxira xíʼinna ndáa ki̱ʼva xi̱kuni̱ra ña̱ ndasakáʼnunara. Tá xa̱a̱ ni̱xi̱ʼi̱ ta̱ Jesús ta nda̱takura, Jehová va̱ása níka̱ʼa̱nkara xíʼin na̱ ñuura ña̱ kundiku̱nna Ley ta̱ Moisés (Rom. 10:4). Xi̱niñúʼu kundiku̱n na̱ cristiano iin ley xa̱á, ña̱yóʼo kúú “ley ta̱ Cristo” (Gál. 6:2). Ña̱ va̱ʼa kundiku̱nna ña̱yóʼo, kǒo níxiniñúʼu sakúaʼa xíʼin xi̱nína ndáaña xi̱niñúʼu keʼéna ta ndáaña va̱ása níxiniñúʼu keʼéna, saáchi ña̱ xi̱niñúʼu kundiku̱nna kúú yichi̱ ta̱ Jesús xíʼin ña̱ xi̱sanáʼa̱ra. Tiempo vitin na̱ cristiano ndíku̱nna yichi̱ ta̱ Jesús ña̱ va̱ʼa sakúsi̱ína-ini Jehová tasaá va̱ʼa kunina (Mat. 11:29). w22.03 20, 21 párr. 4, 5

Va̱ʼaní xíniso̱ʼo Jehová ña̱ káʼa̱n na̱ se̱ʼera xíʼinra. Jehová xi̱niso̱ʼora tá ni̱ka̱ʼa̱n ta̱ Jesús xíʼinra ña̱ ná chindeétáʼanra xíʼinra ndaka̱xinra na̱ koo apóstolra (Luc. 6:12, 13). Ta saátu xi̱niso̱ʼora ña̱ ni̱ka̱ʼa̱n ta̱ Jesús xíʼinra tá ni̱ndi̱ʼi̱-inira. Tá kúma̱ní xi̱kó ta̱ Judas ta̱ Jesús, xa̱kundáʼvira nu̱ú yivára ña̱ ná chindeétáʼanra xíʼinra ya̱ʼara nu̱ú tu̱ndóʼo ña̱ kixi nu̱úra. Ta va̱ása níxiniso̱ʼo kuití Jehová ña̱ ni̱ka̱ʼa̱n ta̱ Jesús xíʼinra, saáchi chi̱ndaʼára iin ángel nu̱úra ña̱ va̱ʼa ndasandakúra-inira (Luc. 22:41-44). Ta saátu tiempo vitin, xíniso̱ʼova Jehová ña̱ káʼa̱nyó xíʼinra, ta ndákuiinra mií tiempo ña̱ xíniñúʼuyóña, ta va̱ʼaní chíndeétáʼanra xíʼinyó (Sal. 116:1, 2). Iin ñá hermana ñá íyo chí India ku̱nda̱a̱-iniñá ña̱ ndixa kúú ña̱yóʼo. Saáchi ñáyóʼo xi̱kuumiíñá iin kue̱ʼe̱ ña̱ xi̱sandíʼi̱ní-iniñá, ta ni̱ka̱ʼa̱nñá xíʼin Jehová ña̱ ná chindeétáʼanra xíʼinñá. Káchiñá: “Programa ña̱ JW Broadcasting^® ña̱ ka̱na yo̱o̱ mayo ña̱ ku̱i̱ya̱ 2019, ni̱ka̱ʼa̱nña ndáaña xíniñúʼu keʼéyó ña̱ va̱ʼa ya̱ʼayó nu̱ú ña̱ sándi̱ʼi̱-iniyó. Ta ña̱yóʼo va̱ʼaní chi̱ndeétáʼanña xíʼi̱n. Saá ki̱ʼi̱n kuenta ña̱ nda̱kuiinva Jehová oración ña̱ ke̱ʼíi̱ nu̱úra”. w21.09 21, 22 párr. 6, 7

Sana i̱xayo̱ʼvi̱vaña xíʼin na̱ cristiano kán sandákoona ndiʼi ña̱ xi̱kuumiína ta ku̱ʼu̱nna koona inka ñuu. Ta xi̱niñúʼu kandíxana ña̱ taxi Jehová ña̱ xi̱xiniñúʼuna. Soo tá kúma̱ní u̱ʼu̱n ku̱i̱ya̱ ña̱ kixaa̱ na̱ ñuu Roma kasina sa̱tá ñuu Jerusalén, ta̱ apóstol Pablo ta̱xira sava consejo ndaʼa̱na. Ka̱chira: “Kǒo kutóoníndó kuumiíndó xu̱ʼún, va̱ʼaka kusi̱í-inindó xíʼin ña̱ʼa ña̱ xa̱a̱ kúúmiíndó. Saáchi ta̱kán káchira: Nda̱a̱ ni iin yichi̱ va̱ása sandákoi̱ yóʼó ta nda̱a̱ ni iin yichi̱ va̱ása sañándaʼíi̱ yóʼó. Ña̱kán ni kǒo xíka-iniyó káʼa̱nyó ña̱yóʼo: ‘Jehová kúú ta̱ chindeétáʼan xíʼi̱n. Va̱ása yi̱ʼvíi̱. ¿Ndáaña kivi keʼé na̱ yiví xíʼi̱n?’” (Heb. 13:5, 6). Na̱ xi̱ndiku̱n consejo yóʼo, ¿ndáa ki̱ʼva chi̱ndeétáʼanña xíʼinna? Sana va̱ása ní ixayo̱ʼvi̱ña xíʼinna ka̱anna koona inka ñuu, ta saátu va̱ása ní ixayo̱ʼvi̱ña xíʼinna loʼoka ña̱ʼa kuumiína. Ta xi̱kandíxana ña̱ taxi Jehová ña̱ kuniñúʼuna. w22.01 4 párr. 7, 9

Tá ndákanixi̱níyó xa̱ʼa̱ iin na̱ yiví na̱ kúndáʼvi-ini xíni inkana, sana ndákanixi̱níyó xa̱ʼa̱ iin na̱ va̱ʼaní-ini xíʼin inkana, ta kúsuchí-inina xíʼinna tá xóʼvi̱na. Sana ndákaʼányó xa̱ʼa̱ ta̱ samaritano ta̱ na̱túʼun ta̱ Jesús xa̱ʼa̱, chi viíní ke̱ʼéra xíʼin ta̱ judío ta̱ ka̱ni na̱ kui̱ʼná. Ta ku̱ndáʼviní-inira xi̱nira ta̱ judío kán, ta xa̱ʼa̱ ña̱ ni̱kuʼvi̱-inira xi̱nirara cha̱ʼvira inkana ña̱ va̱ʼa ná kundaanara (Luc. 10:29-37). Parábola yóʼo náʼa̱ña ña̱ kúʼvi̱-ini Ndióxi̱ xínira miíyó ta xa̱ʼa̱ ña̱yóʼo kúndáʼviní-inira xínira miíyó, ta ndiʼi ki̱vi̱ náʼa̱ra ña̱yóʼo. Inka ki̱ʼva ña̱ na̱ʼa̱ iin na̱ yiví ña̱ kúndáʼvi-inina xínina inkana kúú ña̱ va̱ása taxina castigo ndaʼa̱na, ni xíniñúʼu ndakiʼinvanaña. Ta ki̱ʼva saátu kéʼé Jehová xíʼin miíyó, saáchi nda̱a̱ táki̱ʼva ka̱chi iin ta̱ ka̱ʼyí salmo, “su̱ví tá íyo míí ku̱a̱chiyó saá íxaara xíʼinyó” (Sal. 103:10). Soo sava yichi̱ xíniñúʼuva ndatiin Jehová ku̱a̱chi xíʼin iin na̱ ke̱ʼé ña̱ va̱ása va̱ʼa. w21.10 8 párr. 1, 2

Jehová ndixaní kúʼvi̱-inira xínira na̱ viíní kítáʼan xíʼinra, ta na̱yóʼo kúú na̱ káchíñu nu̱úra. Kúnda̱a̱-iniyó ña̱yóʼo, saáchi saá íyo ña̱ ni̱ka̱ʼa̱n ta̱ rey David ta saátu ta̱ profeta Daniel. Tá kúú, ña̱yóʼo kúú ña̱ ka̱ʼyí ta̱ David: “Ndakundeéún na̱ʼún ña̱ ndixaní kúʼvi̱-iniún xíniún na̱ xíni̱ yóʼó”, ta “ndiʼi tiempo ndixaní kuʼvi̱-ini Jehová kunira na̱ íxato̱ʼó-ñaʼá”. Ta̱ Daniel ka̱chira: “Jehová Ndióxi̱ ta̱ nda̱a̱, ta̱ káʼnuní, [...] kúʼvi̱-iniún xíniún na̱ kúʼvi̱-ini xíni yóʼó ta kándíxana ña̱ káʼún” (Sal. 36:10; 103:17; Dan. 9:4). Ña̱yóʼo náʼa̱ña nu̱úyó ña̱ ndixaní kúʼvi̱-ini Jehová xínira na̱ káchíñu nu̱úra, saáchi xíni̱nara, íxato̱ʼónara, kúʼvi̱-inina xíninara ta kándíxana ña̱ káʼa̱nra. Iinlá na̱ ñuura ndixaní kúʼvi̱-inira xínira, saáchi ndásakáʼnunara nda̱a̱ táki̱ʼva kúni̱ miíra. Tá kúma̱níka xa̱a̱yó kachíñuyó nu̱ú Jehová, xa̱a̱ xi̱kuʼvi̱va-inira xi̱xinira miíyó nda̱a̱ táki̱ʼva kúʼvi̱-inira xínira inkaka na̱ yiví (Sal. 104:14). Soo tá ki̱xáʼayó ndásakáʼnuyóra, ki̱xáʼara náʼa̱ra ña̱ ndixaní kúʼvi̱-inira xínira miíyó. w21.11 3, 4 párr. 8, 9

Tiempo vitin ku̱a̱ʼání na̱ yiví ndíku̱nna na̱ su̱tu̱ ta nda̱a̱ kúni̱na ndasakáʼnuna na̱yóʼo. Ku̱a̱ʼánína xáʼa̱n veʼe-ñu̱ʼuna, ta sátána libro ña̱ tává na̱yóʼo, ta savana táxina ku̱a̱ʼání xu̱ʼún ña̱ va̱ʼa chindeétáʼanna xíʼin veʼe-ñu̱ʼu yóʼo. Savana kándíxanína ndiʼi ña̱ káʼa̱nna. Ta ni ná kuninu̱úna ta̱ Jesús va̱ása kusi̱íní-inina xíʼinra nda̱a̱ táki̱ʼva kúsi̱í-inina xíʼin na̱ su̱tu̱ yóʼo. Soo miíyó na̱ ndásakáʼnu Jehová, va̱ása ndíku̱nyó nda̱a̱ ni iin na̱ yiví na̱ íyo nu̱ú ñuʼú yóʼo. Ta ni íxato̱ʼóyó na̱ níʼi yichi̱ nu̱úyó ti̱xin congregación, soo ndíku̱nyó ña̱ sa̱náʼa̱ ta̱ Jesús tá ka̱chira: “Ñani kúú ndiʼivandó” (Mat. 23:8-10). Ta ni va̱ása ndásakáʼnuyó nda̱a̱ ni iin na̱ yiví, kúúna na̱ níʼi yichi̱ ti̱xin veʼe-ñu̱ʼu á na̱ chíñu. Ta tá kúni̱na keʼéna iin ña̱ʼa, va̱ása chíndeétáʼanyó xíʼinna, saáchi va̱ása kíʼviyó xíʼin ña̱ política ta ni xíʼin na̱ veʼe-ñu̱ʼu. Ku̱a̱ʼání na̱ káʼa̱n ña̱ ndíku̱nna ta̱ Jesús kéʼéna ña̱yóʼo, soo miíyó va̱ása kéʼéyóña (Juan 18:36). w21.10 20 párr. 6, 7

Tá kúni̱yó yi̱i̱ kooyó, ña̱ xíniñúʼu kundayáʼvika nu̱úyó kúú ña̱ kutáʼan viíyó xíʼin Ndióxi̱, ta va̱ása kundayáʼvi inkaka ña̱ʼa nu̱úyó. Ta xa̱ʼa̱ ña̱ naníyó testigo Jehová, va̱ása kúni̱yó keʼéyó nda̱a̱ ni iin ña̱ʼa ña̱ kivi sakúyaku̱a̱ ki̱vi̱ra (Lev. 19:12; Is. 57:15). Tá xi̱kandíxa na̱ ñuu Israel ley ña̱ ta̱xi Jehová ndaʼa̱na, saá xi̱na̱ʼa̱na ña̱ xi̱kuu Jehová Ndióxi̱na. Levítico 18:4 káchiña: “Saxínundó ndiʼi ña̱ ndáka̱xii̱n keʼíi̱, ta kundiku̱nndó ley ña̱ táxii̱ ndaʼa̱ndó, ta kandíxandóña. Yi̱ʼi̱ kúú Jehová Ndióxi̱ndó”. Sava ley yóʼo va̱xiña nu̱ú Levítico 19. Tá kúú versículo 5 nda̱a̱ 8, ta saátu versículo 21 xíʼin 22 káʼa̱nña xa̱ʼa̱ kití tí xi̱taxina ndaʼa̱ Jehová. Viíní xi̱xiniñúʼu taxina tíyóʼo ndaʼa̱ra chi tí yi̱i̱ xi̱kuurí nu̱úra. Tá ná kaʼviyó versículo yóʼo chindeétáʼanña xíʼinyó ña̱ kuni̱yó sakúsi̱íyó-ini Jehová, ta ndasakáʼnuyóra nda̱a̱ táki̱ʼva kúni̱ miíra, táki̱ʼva káchi Hebreos 13:15. w21.12 5 párr. 14, 15

Ndóʼó na̱ sa̱kán ti̱ndaʼa̱, ku̱a̱ʼání ña̱ kivi sakúaʼandó xíʼin na̱ matrimonio na̱ kándíxaní Jehová. Sava na̱yóʼo xa̱a̱ ku̱a̱ʼání ku̱i̱ya̱ káchíñuna nu̱úra. Ndukúndó consejo nu̱ú na̱yóʼo tá kúni̱ndó ná chindeétáʼanna xíʼinndó ña̱ kotondó ndáa inkaka chiñu kivi keʼéndó nu̱ú Jehová, tá ná keʼéndó ña̱yóʼo saá na̱ʼa̱ndó ña̱ kándíxandóra (Prov. 22:17, 19). Na̱ ti̱ndaʼa̱, iin regalo ña̱ ta̱xi Jehová ndaʼa̱na kúú ña̱yóʼo ta kúni̱ra si̱íní ná koona (Mat. 19:5, 6). Tá sa̱kán ti̱ndaʼa̱ndó, ¿á kivi ndakanixi̱níndó xa̱ʼa̱ ña̱ kéʼéndó? ¿Á chíka̱a̱ndó ndee̱ ña̱ na̱ʼa̱ndó nu̱ú Jehová ña̱ táxiníndó tíxa̱ʼvi ndaʼa̱ra xa̱ʼa̱ ndiʼi ña̱ va̱ʼa ña̱ táxira ndaʼa̱ndó? Ka̱ʼa̱nndó xíʼin Jehová, nandukúndó ña̱ kivi chindeétáʼan xíʼinndó nu̱ú tu̱ʼunra, ta kundiku̱nndó consejo ña̱ táxira ndaʼa̱ndó. Ta kivi kandíxandó ña̱ si̱íní koondó tá iinlá chiñu Jehová ná kundi̱ʼi̱-inindó xa̱ʼa̱. w21.11 18, 19 párr. 16, 18

Va̱ása níndakanixi̱ní ta̱ Santiago ña̱ va̱ʼaníka íyo ña̱ kéʼéra nu̱ú inkana. Va̱ása níndakanixi̱níra ña̱ ndáyáʼviníra nu̱ú inka na̱ hermano xa̱ʼa̱ ña̱ xi̱kuura ñani ta̱ Jesús á xa̱ʼa̱ ña̱ xi̱kuumiíra chiñu ña̱ ndáyáʼviní ti̱xin congregación. Chi siaʼava xi̱ka̱ʼa̱nra xíʼinna: “Ñani miíi̱ na̱ kúʼvi̱ní-inii̱ xínii” (Sant. 1:16, 19; 2:5). Ta va̱ása níka̱ʼa̱nra ña̱ va̱ʼaní íyo ndiʼi ña̱ kéʼéra. Ña̱ sákuaʼayó: Ná ndakaʼányó chi ndiʼivayó kúúyó na̱ yiví ku̱a̱chi. Ná va̱ása ndakanixi̱níyó ña̱ xíni̱níka miíyó nu̱ú na̱ káʼviyó xíʼin. Saáchi kivi kixáʼana ndakanixi̱nína ña̱ va̱ʼaní íyo ndiʼi ña̱ kéʼéyó ta va̱ása kuchiñuna saxínuna ña̱ kúni̱ Ndióxi̱. Soo tá ná ka̱ʼa̱nyó xíʼinna ña̱ íxayo̱ʼvi̱tuña xíʼin miíyó kundiku̱nyó ña̱ káʼa̱n tu̱ʼun Ndióxi̱, ta saátu tá ná ka̱ʼa̱nyó xíʼinna ndáa ki̱ʼva xa̱a̱ chi̱ndeétáʼan Jehová xíʼinyó na̱samayó ña̱ xi̱keʼéyó, saá kúú ña̱ chindeétáʼanyó xíʼinna kunda̱a̱-inina ña̱ kuchiñutu miína kachíñuna nu̱ú Jehová. w22.01 11 párr. 13, 14

Tá ná chika̱a̱yó ndee̱ ña̱ ndakanixi̱níyó nda̱a̱ táki̱ʼva ndákanixi̱ní ta̱ Jesús, saá kúú ña̱ keʼéyó táʼan ña̱ kéʼéra ta xa̱a̱yó kooyó nda̱a̱ táki̱ʼva íyora (Heb. 1:3). Sana kivi ndakanixi̱níún ña̱yóʼo: “Kǒoví ku̱a̱chi níxi̱kuumií ta̱ Jesús ña̱kán va̱ása kuchiñuvíi̱ xa̱i̱ koi̱ nda̱a̱ táki̱ʼva ni̱xi̱yora”. Tá saá ndákanixi̱níún, ndakaʼán xa̱ʼa̱ ña̱yóʼo: Ña̱ nu̱ú, Jehová i̱xava̱ʼara yóʼó ña̱ va̱ʼa koún táki̱ʼva íyo miíra ta saátu ta̱ Jesús. Ña̱kán tá ná chika̱a̱-iniún kundiku̱ún yichi̱na kuchiñuvaún, ni su̱ví nda̱a̱ táki̱ʼva kéʼévína saá keʼún (Gén. 1:26). Ña̱ u̱vi̱, ndakúní espíritu santo Ndióxi̱ ña̱kán tá ná chindeétáʼanña xíʼún kuchiñuvaún keʼún ña̱ʼa ña̱ va̱ása kuchiñu iinlá miíún keʼún. Ña̱ u̱ni̱, Jehová kúnda̱a̱-inira ña̱ íxayo̱ʼvi̱níña xíʼún ña̱ vií na̱ʼún ña̱ va̱ʼa ña̱ táxi espíritu santora saáchi kúún na̱ yiví ku̱a̱chi. Soo ndakanixi̱ní xa̱ʼa̱ ña̱yóʼo, Jehová káʼa̱nra taxira 1,000 ku̱i̱ya̱ ndaʼa̱yó ña̱ va̱ʼa nasamayó ña̱ kéʼéyó tasaá va̱ása kookayó na̱ yiví ku̱a̱chi (Apoc. 20:1-3). Soo Jehová kúni̱ra ña̱ ná chika̱a̱níyó ndee̱ ña̱ ndasaxa̱áyó ki̱ʼva ña̱ kéʼéyó tiempo vitin ta kandíxayó ña̱ chindeétáʼanra xíʼinyó. w22.03 9 párr. 5, 6

Ña̱ chindeétáʼan xíʼinyó ña̱ kutáʼanyó xíʼin Ndióxi̱ kúú ña̱ kaʼviyó tu̱ʼunra ta ku̱ʼu̱nyó reunión. Ña̱kán viíní ná kuniñúʼuyó tiempoyó tá ku̱a̱ʼa̱nyó reunión á tá káʼviyó. Ná ndakanixi̱níyó xa̱ʼa̱ ña̱yóʼo: “¿Ndáaña sási nu̱úi̱ tá káʼvii̱? ¿Á ndáaña sási nu̱úi̱ ña̱ viíka kuniso̱ʼi̱ tá ku̱a̱ʼi̱n reunión?”. ¿Á ña̱ sási nu̱úyó kúú llamada, correo, mensaje ña̱ kíxaa̱ nu̱ú teléfono á inkaka ña̱ʼa? Tá na̱ káʼvi kúúyó á na̱ ndóo iin reunión kúúyó, ta kíʼinyó kuenta ña̱ kíxáʼayó ndákanixi̱níyó xa̱ʼa̱ inka ña̱ʼa, ná ka̱ʼa̱nyó xíʼin Jehová ña̱ chindeétáʼanra xíʼinyó. Tá íyo iin ña̱ sándi̱ʼi̱-iniyó, ña̱yóʼo kivi kasiña nu̱úyó tá káʼviyó á kivi kasituña nu̱úyó ña̱ viíka kuniso̱ʼoyó tá íyoyó reunión, soo ná va̱ása taxiyó kasiña nu̱úyó. Ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ va̱ása kundi̱ʼi̱ní-iniyó, ta saátu ná kundaara níma̱yó xíʼin ña̱ ndákanixi̱níyó (Filip. 4:6, 7). w22.01 29 párr. 12-14

Ta̱ rey Uzías va̱ása níxiinra kundiku̱nra consejo ña̱ ta̱xina ndaʼa̱ra. Iin yichi̱ va̱ása va̱ʼa íyo ña̱ ke̱ʼéra, saáchi ni̱ki̱ʼvira ti̱xin templo ña̱ va̱ʼa kaʼmira incienso nu̱ú Jehová, soo na̱ su̱tu̱ kuitíva kúú na̱ xi̱kiʼvi yóʼo. Ña̱kán ni̱ka̱ʼa̱nna xíʼinra ña̱ su̱ví ta̱yóʼo kúú ta̱ xíniñúʼu kaʼmi incienso nu̱ú Jehová, saáchi chiñu na̱ su̱tu̱va xi̱kuu ña̱kán. ¿Ndáaña ke̱ʼéra? Tu̱ʼun Ndióxi̱ káʼa̱nña ña̱ ndeéní ni̱sa̱a̱ra ta va̱ása níxi̱ndiku̱nra consejo ña̱ ta̱xina ndaʼa̱ra. ¿Nda̱chun? Sana nda̱kanixi̱níra ña̱ kivi keʼéra nda̱a̱ ndáaka ña̱ kúni̱ miíra, saáchi rey xi̱kuura. Soo su̱ví saá níxi̱ndakanixi̱ní Jehová xa̱ʼa̱ra. Tá vitá níxi̱yo ini ta̱ Uzías, ta tá níxi̱ndiku̱nra consejo ña̱ ta̱xina ndaʼa̱ra ta saátu tá kama níkitara ti̱xin templo, sana ixakánuva-ini Jehová xa̱ʼa̱ra. Soo xa̱ʼa̱ ña̱ ke̱ʼéra iin ña̱ va̱ása níxiniñúʼu keʼéra, Jehová ta̱xira kue̱ʼe̱ lepra ndaʼa̱ra ta xi̱kuumiíra kue̱ʼe̱ yóʼo nda̱a̱ tá ni̱xi̱ʼi̱ra (2 Crón. 26:16-21). ¿Ndáaña sákuaʼayó xíʼin ña̱ ndo̱ʼo ta̱ Uzías? Tá ná va̱ása kundiku̱nyó consejo ña̱ va̱xi nu̱ú tu̱ʼun Ndióxi̱, va̱ása kusi̱íka-inira xíʼinyó ni nda̱a̱ ndáaka chiñu kúúmiíyó ti̱xin ñuura. w22.02 9 párr. 7

Na̱ yiví na̱ va̱ása násama ki̱ʼva ña̱ ni̱xi̱yona tá ya̱chi̱, nina ña̱ va̱ása va̱ʼa ndákanixi̱nína ta kéʼéna ña̱ kútóo ku̱ñuna (Col. 3:9). Sana kamaní sáa̱na ta va̱ása ndíʼi̱-inina xa̱ʼa̱ inkana, va̱ása táxina tíxa̱ʼvi xa̱ʼa̱ ña̱ kúúmiína ta ni̱nuní kúnina. Sana kútóonína kotonde̱ʼéna pornografía xíʼin película nu̱ú kée na̱ kísi̱ xíʼin táʼan á nu̱ú kée na̱ kánitáʼan. Sana ndíka̱a̱va ña̱ va̱ʼa níma̱na ta nda̱a̱ sava yichi̱ va̱ása va̱ʼa kúnina xíʼin ña̱ káʼa̱nna á xíʼin ña̱ kéʼéna, soo va̱ása chíka̱a̱na ndee̱ ña̱ nasamana ña̱ ndákanixi̱nína xíʼin ña̱ kéʼéna (Gál. 5:19-21; 2 Tim. 3:2-5). Xa̱ʼa̱ ña̱ kúúyó na̱ yiví ku̱a̱chi, íxayo̱ʼvi̱níña xíʼinyó taváyó ña̱ va̱ása va̱ʼa xi̱níyó xíʼin níma̱yó. Sava yichi̱ keʼévayó á ka̱ʼa̱nyó iin ña̱ va̱ása va̱ʼa ta ndandikóní-iniyó xa̱ʼa̱ña (Jer. 17:9; Sant. 3:2). Soo tá xa̱a̱ sa̱ndákooyó ki̱ʼva ña̱ ni̱xi̱yoyó tá ya̱chi̱, ña̱yóʼo kúni̱ kachiña ña̱ va̱ása táxikayó kaʼndachíñu ña̱ va̱ása va̱ʼa nu̱úyó ta ni va̱ása kéʼékayó ña̱ kútóo ku̱ñuyó, tasaá xáa̱yó ndúuyó iin na̱ yiví va̱ʼa (Is. 55:7). w22.03 3 párr. 4, 5

Ndóʼó na̱ anciano, kiʼinndó kuenta xíʼin ña̱ va̱ʼa ña̱ kúúmií na̱ hermano. Ni na̱ yiví ku̱a̱chi kúúvana soo íyo ku̱a̱ʼání ña̱ va̱ʼa kéʼéna. Sava yichi̱ taxivandó consejo ndaʼa̱na. Soo nda̱a̱ táki̱ʼva ke̱ʼé ta̱ Pablo, saátu ndóʼó chika̱a̱ndó ndee̱ ña̱ kǒo kiʼinndó kuenta xíʼin tu̱ʼun ña̱ káʼa̱nna á ña̱ kéʼéna ña̱ kivi sasáa̱ inkana. Nu̱úka ña̱yóʼo ndakaʼánndó ña̱ kúʼvi̱ní-inina xínina Jehová, ta saátu ña̱ chíka̱a̱nína ndee̱ ña̱ kachíñuna nu̱úra ta kiviva nasamana ña̱ kéʼéna. Na̱ anciano na̱ kíʼin kuenta xíʼin ña̱ va̱ʼa ña̱ kéʼé na̱ hermano chíndeétáʼanna xíʼinna ña̱ va̱ʼa ná kusi̱í-inina kuñuʼuna ti̱xin congregación ta kuʼvi̱-inina kunitáʼanna. Ndóʼó na̱ anciano, ndakaʼánndó ña̱ kúnda̱a̱va-ini Jehová ña̱ su̱ví ndiʼiví ña̱ kéʼéndó viíní kanaña, soo ña̱ kúni̱ra kúú ña̱ nda̱kúní ná koo inindó xíʼinra (1 Cor. 4:2). Ta̱ Pablo xi̱ndayáʼviníra nu̱ú Jehová xa̱ʼa̱ ndiʼi ña̱ ke̱ʼéra ta saátu xa̱ʼa̱ ña̱ nda̱kúní ni̱xi̱yo inira xíʼinra. Saátu ndóʼó kǒo kaka-inindó ña̱ ndáyáʼviníva chiñu ña̱ kéʼéndó nu̱ú Jehová, saáchi nda̱a̱ táki̱ʼva káchi Hebreos 6:10 ta̱kán, “va̱ása nándósó-inira xa̱ʼa̱ ndiʼi chiñu ña̱ ke̱ʼéndó, saátu ña̱ ni̱na̱ʼa̱ndó ña̱ kúʼvi̱ní-inindó xínindó ki̱vi̱ra xa̱ʼa̱ ña̱ ka̱chíñundó nu̱ú na̱ nda̱kaxinra ta ndákundeéndó káchíñundó nu̱úna”. w22.03 31 párr. 19, 21