အမျိုးသမီးများ ပိုကြာရှည်စွာအသက်ရှင်နေကြသို့သော် ပို၍ကောင်းသောအသက်တာဟုမဆိုသာ

ကမ္ဘာတစ်ဝန်းရှိအမျိုးသမီးများသည် အသက်ကြီးမှအိမ်ထောင်ပြုနေကြပြီး ကလေးလျော့ယူကာ အသက်တိုးရှည်နေကြသည်။ “အမျိုးသမီးများ၏အသက်တာသည် ပြောင်းလဲလျက်ရှိသည်” ဟုယူနက်စကိုအကြောင်းရင်းခံများ မဂ္ဂဇင်းက သတင်းပေးပို့သည်။ ၁၉၇၀ နှင့် ၁၉၉၀ အတွင်း ဖွံ့ဖြိုးပြီးကမ္ဘာတွင် မွေးဖွားချိန်၌ အမျိုးသမီးများ၏သက်တမ်းရှည်နှုန်းသည် လေးနှစ်နှင့် ဖွံ့ဖြိုးဆဲနိုင်ငံများတွင်မူ ကိုးနှစ်နီးပါးခန့်တိုးလာပါသည်။ “ယင်းက ယနေ့ ဖွံ့ဖြိုးပြီးသောအရပ်ဒေသများရှိ အမျိုးသမီးများ၏အသက်သည် အမျိုးသားများထက် ပျမ်းမျှအားဖြင့် ၆.၅ နှစ်ပိုရှည်ကြောင်းဆိုလို၏။ ဖွံ့ဖြိုးဆဲဒေသများဖြစ်သော လက်တင်အမေရိကနှင့် ကာရစ်ဘီယံတွင်မူ ငါးနှစ်၊ အာဖရိကတွင် ၃.၅ နှစ်နှင့် အာရှနှင့်ပစိဖိတ်တွင် သုံးနှစ် ကွာခြားကြသည်။”

သို့သော်ငြားလည်း များစွာသောအမျိုးသမီးများအတွက် အသက်ပိုရှည်ခြင်းသည် သာ၍ကောင်းသောဘဝဖြင့်နေထိုင်ရသည်ဟု မဆိုလိုပါ။ ကုလသမဂ္ဂ၏မဂ္ဂဇင်းဖြစ်သော ကျွန်ုပ်တို့၏မြေကမ္ဘာ က အမျိုးသမီးအများစုအတွက် အခြေခံလူ့အခွင့်အရေးများသည် “သူတို့တစ်ခါမျှမမြည်းစမ်းခဲ့ရသည့် အလွန်လိုလားရာ” ဖြစ်ဆဲဖြစ်သည်ဟုဖော်ပြသည်။ သူတို့သည် ရိုးရိုးလေးဖြစ်သော သာမန်အစားအစာနှင့်ရေတို့ကိုရရှိဖို့ ကြိုးစားနေကြရဆဲဖြစ်သည်။” သို့တိုင် ကမ္ဘာ့စာမတတ်မြောက်သူများ၊ ဒုက္ခသည်များနှင့် ဆင်းရဲနွမ်းပါးသူ အများစုသည် အမျိုးသမီးများဖြစ်နေဆဲပင်ဖြစ်ရာ ထိုအခြေခံအရာများကို သန်းပေါင်းများစွာတို့သည် လက်လှမ်းမမီနိုင်ပါဟု ယူအဲန်ကဆို၏။ တိုးတက်မှုအချို့ရှိသည့်ကြားမှပင် “အမျိုးသမီးများအတွက် အခြေအနေကို ခြုံငုံကြည့်လျှင် . . . အားတက်ဖွယ်မမြင်ရသောရှေ့ရေးဖြစ်သည်” ဟူ၍ ယူနက်စကိုအကြောင်းရင်းခံ မဂ္ဂဇင်းကကောက်ချက်ချပါသည်။