ကမ္ဘာ့ဖြစ်ရပ် အကဲခတ်

အဖိုးထိုက်သည့်အရာကို တန်ဖိုးဖြတ်ခြင်း

နိုင်ငံများစွာမှ သိပ္ပံပညာရှင် ဆယ့်သုံးယောက်သည် သဘာဝတရား၏ကြွယ်ဝမှုကို ဒေါ်လာငွေဖြင့် တန်ဖိုးဖြတ်သည့်မှတ်တမ်းတစ်ခုကို ပြုစုထားကြသည်။ ထိုသိပ္ပံပညာရှင်တို့သည် ကမ္ဘာမြေကြီးကလုပ်ဆောင်ပေးသည့် ဝန်ဆောင်မှုအမျိုးမျိုးအတွက် တစ်ဟတ်တာလျှင် အစားထိုးကုန်ကျစရိတ်ကို ခန့်မှန်းရန် ထုတ်ပြန်ထားသောသုတေသနပြုချက် ၁၀၀ ကျော်နှင့် လုံးပန်းခဲ့ကြသည်။ (တစ်ဟက်တာသည် ၂.၅ ဧကနှင့်ညီမျှသည်။) ဥပမာ၊ လေ့လာမှုတစ်ခုက ဖော်ပြသည်မှာ အမေရိကန်ပြည်ထောင်စုတွင် ဖွံ့ဖြိုးမှုလုပ်ငန်းအတွက်အသုံးပြုသည့် စိုစွတ်မြေ တစ်ဟက်တာအတွက် “လွှမ်းမိုးသောရေကိုစုပ်ယူနိုင်စွမ်းဆုံးရှုံးမှုကြောင့် နှစ်စဉ်ရေလွှမ်းမိုးပျက်စီးဆုံးရှုံးရမှုမှာ ဒေါ်လာ ၃၃၀၀ မှ ၁၁,၀၀၀ အထိတိုးလာ” ရကြောင်း သိပ္ပံမဂ္ဂဇင်းက ဖော်ပြသည်။ လူအများသည် ကမ္ဘာ့သဘာဝကုန်ပစ္စည်းများနှင့် ဝန်ဆောင်မှုများကို တန်ဖိုးသိပ်မထားကြသော်လည်း ယင်းတို့၏နှစ်စဉ်ငွေကြေးတန်ဖိုးသည် ဒေါ်လာ ၃၃,၃၀၀,၀၀၀,၀၀၀,၀၀၀ ရှိသည်ဟု သိပ္ပံပညာရှင်တို့က ခန့်မှန်းကြသည်—ယင်းသည် တစ်ကမ္ဘာလုံးမှ နိုင်ငံအလိုက်ထွက်ကုန်စုစုပေါင်းတန်ဖိုး၏နှစ်ဆနီးပါးမျှရှိသည်။

ပုပ်ရဟန်းမင်း ကျူးဘားသို့သွားရောက်လည်ပတ်

၁၉၉၈ ဇန်နဝါရီလက ကျူးဘားသို့ သွားရောက်လည်ပတ်မှုတွင် ပုပ်ဂျွန်ပေါ ၂ သည် ကျူးဘားလူ့အဖွဲ့အစည်းတွင် တိုးချဲ့တာဝန်တစ်ခုအတွက် ကက်သလစ်ချာ့ချ်၏ မျှော်လင့်ချက်များကို အကြမ်းဖျင်းပြောပြခဲ့သည်။ လော်စာဗေတိုရာ ရိုမနိုသတင်းစာအရ မိဘတို့သည် “မိမိတို့၏သားသမီးများအတွက် . . . အဘက်ဘက်မှပြည့်စုံသည့်ပညာရေးကို တတ်မြောက်သွားစေမည့် လူမျိုးစုရေးရာ၊ နိုင်ငံသားရေးရာအကြောင်းအရာနှင့် ဘာသာရေး အတွေးအခေါ်များကို ရွေးပေးနိုင်သင့်သည်” ဟုသူဆိုခဲ့သည်။ ပုပ်အနေဖြင့် နိုင်ငံတွင် ကက်သလစ်စာသင်ကျောင်းကို ပြန်ဖွင့်ဖို့ဆန္ဒရှိသော်လည်း ကျူးဘားအရာရှိများက ပြည်သူ့ပညာရေးကို နိုင်ငံတော်ပိုင်အဖြစ်ဆက်၍ထားလိုကြောင်း ပြောကြသည်။ ပုပ်၏လာရောက်လည်ပတ်မှုအပေါ် ကျူးဘားအစိုးရ၏ရှုမြင်ပုံနှင့်ပတ်သက်ပြီး ပြင်သစ်ဘာသာဖြင့်ထုတ်ဝေသည့် လီမွန် ဒီပလိုမက်တစ်မဂ္ဂဇင်းက ဤသို့မှတ်ချက်ချသည်– “ဖီဒယ် ကက်စ်ထရိုက လည်ပတ်မှုသည် မိမိအစိုးရအား ဝိုင်းပယ်ထားမှုအပေါ် အောင်ပွဲဆင်မှုတစ်ခုအဖြစ် ရှုမြင်သည်။” ကျူးဘားတွင်ရှိနေစဉ် ပုပ်၏ပြောဆိုချက်တချို့သည် နိုင်ငံရေးအရိပ်အမြွက်များပါကြောင်းရှင်းနေသော်လည်း ယေဟောဝါသက်သေတို့မူ သူတို့၏ဘာသာရေးလုပ်ဆောင်မှုဖြင့် နိုင်ငံရေးတွင်ကြားနေကြပါသည်။

ကမ္ဘာ့အရှည်ဆုံးဆံပင်

ထိုင်းနိုင်ငံမြောက်ပိုင်းရှိ မုန်အနွယ်ဝင် အသက် ၈၅ နှစ်အရွယ်ရှိ ဟူစက်တီးယိုသည် သူ၏ဆံပင်ကို မညှပ်သည်မှာ အနှစ် ၇၀ နီးပါးကြာပေပြီ။ “ကျွန်တော် ၁၈ နှစ်အရွယ်တုန်းက ဆံပင်ညှပ်တာ တစ်ခါတည်းဖျားတော့တာပဲ” ဟူ၍ ဟူကပြောသည်။ ဂင်းနက်စ် ကမ္ဘာ့စံချိန်စာအုပ်၏ အကဲဖြတ်ပုဂ္ဂိုလ်က မကြာသေးမီက တိုင်းတာရာ ၁၇ ပေနှင့် ၂ လက်မရှည်သည်၊ ယခုအခါ သူ၏ဆံပင်သည် ကမ္ဘာ့အရှည်ဆုံးဆံပင်ဟုယုံကြည်ရကြောင်း အဆိုဆီရိတ်တက်စ်ပရက်စ္စက သတင်းပို့သည်။ ဟူသည် တစ်နှစ်တစ်ခါသာ ခေါင်းလျှော်ပြီး ခြောက်သွားစေရန် ရာဇမတ်ကွက်ပေါ်တွင် ဖြန့်ထားရသည်။ အသက် ၈၇ နှစ်အရွယ်ရှိ ဟူ၏အကို ယီလည်း သူ၏ဆံပင်ကို ၁၉၅၇ ခုနှစ်တွင် နောက်ဆုံးညှပ်ခဲ့ရာ ဟူ၏ အနီးဆုံးပြိုင်ဘက်ဖြစ်နေသည်။ သို့သော် ယီ၏ဆံပင်သည် ယခင်က ဆံပင်အရှည်ဆုံးမှတ်တမ်းတင်ထားသည့် ၁၃ ပေနှင့် ၈ လက်မရှည်သော အိန္ဒိယအမျိုးသမီး၏ဆံပင်ထက် ရှည်ပါသည်။ ဤကဲ့သို့ ရှည်လျားသည့်ဆံပင်ခွေများရှိထားခြင်းသည် တစ်ပန်းသာကြောင်း ဟူက ယူမှတ်ထားသည်၊ အထူးသဖြင့် ထိုင်းနိုင်ငံ၏အေးစိမ့်သောတောင်တန်းဒေသ အမြင့်ပိုင်းတွင်ဖြစ်သည်။ “ဒီဆံပင်ကြောင့် ကျုပ်နွေးထွေးနေတာပဲ” ဟုသူဆိုသည်။

သမိုင်းနှင့်ပတ်သက်သည့် ရှုမြင်ချက်သုံးရပ်

ဘော့စနီးယားရှိ ကျောင်းသားလူငယ်များသည် ဒေသန္တရ သမိုင်း၊ အနုပညာနှင့် ဘာသာစကားဆိုင်ရာ ရှုထောင့်သုံးမျိုးကို သင်ယူကြရသည်။ သူတို့ကြားရသည့်အရာများမှာ အဓိကလူမျိုးစုကြီးသုံးစုအနက် မည်သည့်အုပ်စုက ယင်းတို့၏သင်ရိုးညွှန်းတမ်းအပေါ် ထိန်းချုပ်ထားသည်ဟူသည့်အပေါ်တွင် တည်မှီနေကြောင်း နယူးယောက်တိုင်းမ်စ်က သတင်းပို့သည်။ သာဓကအနေနှင့် ဆာ့ဘ်များထိန်းချုပ်ထားသည့် အရှေ့ပိုင်းသြသဒေါက်စ်ဒေသရှိ ကျောင်းသားများအနေဖြင့် ၁၉၁၄ ခုနှစ်၌ ဩစတြီးယားမင်းသား ဖာဒီနန်ကို သတ်ဖြတ်ခဲ့ပြီး ပထမကမ္ဘာစစ်ကို အစပျိုးပေးခဲ့သူမှာ “သူရဲကောင်းလည်းဖြစ်၊ ကဗျာဆရာလည်းဖြစ်” ကြောင်း သင်ယူကြရသည်။ ရိုမင်ကက်သလစ် ခရိုအေးရှန်းကျောင်းသားများမူ ထိုသူမှာ “ဤအကြမ်းဖက်အပြုအမူကို ပြုရန် ဆာ့ဘ်တို့က လေ့ကျင့်သွန်သင်ပေးထားသည့် လူသတ်သမား” ဖြစ်ကြောင်း သင်ယူကြရသည်။ ဤအဖြစ်အပျက်အပေါ် မွတ်စလင်တို့၏ရှုထောင့်မှာ ထိုသူသည် “လူမျိုးစုသုံးစုစလုံးမှ ရဲများကြောင့်သာ ရပ်သွားသည့် ဆာ့ဘ်ဆန့်ကျင်ရေး အဓိကရုဏ်းကိုဆွပေးသော အမျိုးသားရေးဝါဒီတစ်ဦး” အဖြစ် ဖော်ပြသည်။ ကျောင်းသားများမှာ လူမျိုးစုအရကွဲပြားသည့် စာသင်ခန်းများတွင် မိမိတို့ကိုယ်ကို ဆာ့ဘ်၊ မွတ်စလင် သို့မဟုတ် ခရိုအက်များအဖြစ် ခွဲခြားဖော်ပြရန် တောင်းဆိုခံနေကြရကြောင်း ထိုသတင်းက ဆိုသည်။

စိမ်းလန်းသော ကစားကွင်းမြက်ခင်းပြင်

ဒတ်ချ်ဘောလုံးကလပ် ဗက်တီးစ် အာနန်အသင်းအတွက် တည်ဆောက်ထားသော ထိုင်ခုံ ၂၈,၀၀၀ ဆံ့သည့်အားကစားကွင်းတစ်ခုတွင် မြက်ခင်းကောင်းကောင်းကစားကွင်းတစ်ခုနှင့် အမိုးပါ ပါရှိသည်။ ဤအင်္ဂါရပ်နှစ်ခုရရှိအောင် ညှိပေးရန်ခက်လှပေသည်၊ အကြောင်းမှာ မြက်ခင်းသည် သဘာဝအလင်းရောင်နှင့် မိုးရရှိမှသာ အကောင်းဆုံးရှင်သန်နိုင်သောကြောင့်ဖြစ်သည်။ ယင်းတို့မရှိလျှင် မြက်များမှာ ဝါပြီးညှိုးနွမ်းသွားလေသည်။ အဆောက်အအုံ၏ဒီဇိုင်းဖြင့် အဆိုပါပြဿနာကို ဖြေရှင်းခဲ့ကြောင်း နယူးဆိုင်းယင်းတစ် မဂ္ဂဇင်းက ဖော်ပြသည်။ ကစားကွင်းကို လျှောထွက်ပလပ်စတစ်ခြေထောက်များပေါ်ရှိ ကွန်ကရစ်ပြားပေါ်တွင် အထိုင်ချထားသည်။ အသုံးမပြုသည့်အခါ တစ်ခုလုံးအလေးချိန်တန် ၁၁,၀၀၀ ရှိသော ကစားကွင်းကို ဟိုက်ဒရောလစ်ဆောင့်တုံးလေးတုံးဖြင့် အားကစားရုံမှထုတ်ကာ လေသလပ်ခံသည်။ ဤအစီအမံ၏နောက်ထပ်တစ်ပန်းသာမှုမှာ ထိုအချိန်တွင် အားကစားရုံ၏မာကျောသောကြမ်းပြင်ကို ကပွဲများနှင့် အလားတူပွဲလမ်းများအတွက် အသုံးပြုနိုင်ခြင်းဖြစ်သည်။

စပရင်ဘောင် ပတ္တူဖျင်စကြောင့် ထိခိုက်အနာတရဖြစ်မှုများ

စပရင်ဘောင်ပတ္တူဖျင်စများကစားမှုများသည် မကြာသေးမီနှစ်များတွင် ပို၍လူကြိုက်များလာသည်၊ သို့သော် ကလေးသူငယ်များ ထိခိုက်အနာတရဖြစ်မှုတိုးများလာကြောင်း သည်နယူးယောက်တိုင်းမ်စ်က ဖော်ပြသည်။ “စပရင်ဘောင်ပတ္တူဖျင်စများသည် အကျသက်သာအောင် အရှိန်သတ်ပေးသည်ဟု လူတို့အမြင်မှားနေကြကြောင်း” အမေရိကန်ပြည်ထောင်စု၊ အိုဟိုင်းယိုးပြည်နယ်၊ ကိုလမ်ဘစ်မြို့ရှိ ကလေးဆေးရုံမှ ဒေါက်တာ ဂယ်ရီ အေ. စမစ်ကဆိုသည်။ စပရင်ဘောင်ပတ္တူဖျင်စပေါ်ခုန်ချခြင်း၊ ဖျင်စပေါ်သို့ အလွဲလွဲအချော်ချော်ခုန်ချခြင်း၊ တစ်ပြိုင်တည်းခုန်ချသည့် အခြားကလေးတစ်ယောက်နှင့် တိုက်မိခြင်း၊ ပျော့ပျောင်းမှုမရှိသော မျက်နှာပြင်နှင့်ရိုက်မိခြင်းကြောင့် ကလေးများ အနာတရဖြစ်ကြရသည်ဟု ဒေါက်တာစမစ်ကဆိုသည်။ လှေကားများဖြင့်တပ်ဆင်ထားသော စပရင်ဘောင်ပတ္တူဖျင်စများသည် အထူးအန္တရာယ်ရှိသည်၊ အကြောင်းမှာ ယင်းတို့သည် စပရင်ဘောင်ပတ္တူဖျင်စများကို အထိအခိုက်လုံးဝမခံနိုင်သည့် ငယ်ရွယ်သောကလေးများ ပါဝင်ကစားနိုင်အောင် လုပ်ထားသောကြောင့်ဖြစ်သည်။ သုံးစွဲပစ္စည်းထုတ်ကုန်အန္တရာယ်ကင်းရှင်းရေးကော်မရှင်မှ အန်းဘရောင်က ခြောက်နှစ်အောက်ကလေးများသည် စပရင်ဘောင်ပတ္တူဖျင်စပေါ် ခုန်မချသင့်ကြောင်း၊ တစ်ကြိမ်လျှင် ကလေးတစ်ယောက်သာခုန်ချသင့်ကြောင်း အကြံပြုသည်။ “ရေကူးကန်တွင်ကဲ့သို့ပင် စပရင်ဘောင်ပတ္တူဖျင်စကစားမှုတွင်လည်း ကလေးကို အဆက်မပြတ် ဂရုစိုက်ကြီးကြပ်ပေးဖို့လိုအပ်သည်” ဟုသူက မှတ်ချက်ချသည်။

မေတ္တာသည် မည်သည့်အခါမျှမရှုံး

“မိဘနှင့် ဆရာသမားတို့အပေါ် အလွန်သံယောဇဉ်တွယ်သော ဆယ်ကျော်သက်တို့သည် မူးယစ်ဆေးနှင့် အရက်သောက်သုံးမှု၊ ကိုယ့်ကိုယ်ကို သတ်သေရန်ကြိုးစားမှု၊ အကြမ်းဖက်မှုတွင် ပါဝင်မှု သို့မဟုတ် ငယ်ငယ်ရွယ်ရွယ်နှင့် လိင်စိတ်ထကြွမှု အလွန်အဖြစ်နည်းဖို့ အကြောင်းများ” ကြောင်း သည် ဝါရှင်တန်ပို့စ် ကဆိုသည်။ ချာပယ်ဟေးမြို့ရှိ မင်နီစိုတာတက္ကသိုလ်နှင့် မြောက်ကယ်ရိုလိုင်းနာတက္ကသိုလ်ရှိ သုတေသီတို့ကလည်း မိဘတစ်ယောက်တည်းနှင့်ဖြစ်စေ၊ မိစုံဖစုံနှင့်ဖြစ်စေ အတူနေသည့်ကလေးသည် ဤအတိုင်းပင်မှန်ကန်ကြောင်း တွေ့ရှိခဲ့သည်။ အရေးကြီးသောအရာမှာ ကလေးဖြစ်သူသည် မေတ္တာခံစားရဖို့၊ တန်ဖိုးထားခံရဖို့နှင့် နားလည်ပေးမှုရှိဖို့ဖြစ်သည်။ လေ့လာမှုက အထူးတင်ပြသည့်နောက်တစ်ချက်မှာ “ကျန်ရစ်သူမိဘတို့အတွက်အရေးကြီးသောအရာမှာ မိမိသားသမီး၏ ဆယ်ကျော်သက်နှစ်များတစ်လျှောက် သူတို့၏အသက်တာတွင် အလွန်အရောတဝင်နေခြင်း၊ မိမိတို့၌ တာဝန်သိပ်မရှိတော့ဟု ယူဆထားလျှင်ပင်ထိုသို့နေခြင်းဖြစ်သည်” ဟု ပို့စ် ကဆိုသည်။

စံပြထိန်းသိမ်းရေးသမားများ

ဗြိတိန်ဘုရင့်ရေတပ်သည် သမိုင်းဝင်ကမ်းခြေခံတပ်၏အုတ်လက်ရာ ထိန်းသိမ်းမှုကို ထောက်ကူရန် ဆိတ်များကိုအသုံးပြုနေကြောင်း သည်ဆန်းဒေးတယ်လီဂရပ်က ဖော်ပြသည်။ ဆူးပင်များ၊ သစ်ပင်များနှင့် ချုံပင်များ၏အမြစ်တို့သည် အုတ်များနှင့် အင်္ဂတေကို ပျက်စီးစေသည်။ ယင်းတို့ကို ဖယ်ရှားပစ်ဖို့ပြုနေကျနည်းများတွင် တန်ဖိုးကြီးချိန်းလွှများနှင့် အန္တရာယ်ရှိနိုင်သည့် ပေါင်းသတ်ဆေးများပါဝင်သည်။ ထို့အပြင် ဤနည်းများသည် ရှားပါးသောအပင်များ၊ လိုက်ကင်ပင်များနှင့် အင်ဆက်ပိုးများကို ပျက်သုဉ်းစေသည်။ သို့သော် ပေါ့ပါးလျင်မြန်သောဆိတ်များသည် အသုံးချစရိတ်သက်သာရုံမျှမက အပင်နှင့် တောရိုင်းသက်ရှိများကိုအန္တရာယ်ပြုသည့် ပျက်စီးမှုကိုလည်း လျော့နည်းစေပါသည်။ စီမံချက်အတိုင်ပင်ခံ မိုက် ဘီချန်းက “၁၀ နှစ်အတွင်း သဘာဝထိန်းသိမ်းရေးအဖွဲ့အများစုသည် ဆူးချုံနယ်မြေများကို မူလအတိုင်းပြန်တည်ပေးဖို့အတွက် ဆိတ်များကို အသုံးပြုသွားမည်” ဟုဆိုသည်။

ကြမ်းတမ်းသော ကွန်ပျူတာဂိမ်းများ

တီထွင်ခဲ့သမျှတွင် အကြမ်းတမ်းဆုံးကွန်ပျူတာဂိမ်းတစ်ခုမှာ ကွိတ်ခ် ၂ ဖြစ်ပြီး ပြုပြင်လိုက်ရာ ပို၍ပင် ကြမ်းတမ်းလာသည်။ ပရိုဂရမ်မှာ “ကစားသူများ၏ ကွန်ပျူတာဖန်သားပြင်တွင် သွေးနှင့် ခန္ဓာကိုယ်အပိုင်းအစများလွင့်စဉ်လာခြင်းကြောင့် လူကြိုက်များလာခဲ့” ကြောင်း သည်ဝေါစထရိဂျာနယ် ကဆိုသည်။ “ကျွန်တော်တို့ နောက်တစ်ကျော့ပြန်စတဲ့အခါ သွေး မလောက်တော့ဘူး၊ ဒါကြောင့် ထပ်ထည့်ပေးထားတယ်” ဟု ပရိုဂရမ်တီထွင်ဦးဆောင်သူ ဂျွန် ကာမက်ကဆိုသည်။ ကွိတ်ခ် ၂ နည်းက ကစားသမားများအား အသေပွဲများဟုခေါ်သည့် စီးချင်းထိုးပွဲများဖြင့် အင်တာနက်ပေါ်တွင် ဒါဇင်နှင့်ချီသော အခြားကစားသမားကို တိုက်ခိုက်ခြင်းဖြင့် “ပလုံးပထွေးရောနှောသတ်ဖြတ်မှု” တစ်ခုတွင် ဝင်နွှဲစေသည်။ အခန်းတစ်ခန်းတွင် ကစားသူများအနေဖြင့် မိမိတို့၏ပြိုင်ဘက်များကို ညစ်ညမ်းသောအပြုအမူပြနိုင်သည်။ ဤဂိမ်းကို စထွင်သည့် ပရိုဂရမ်တီထွင်သူများနှင့် အနုပညာသည်များက “ဂိမ်းကစားသူ၏သုခဘုံတစ်ခုကို ဖန်တီးပေးထားသည်၊ ယင်းတွင် အလေးမခန်းနှင့် အကျိုးမဲ့အစာများထည့်ထားသည့် မီးဖိုဆောင်တစ်ခုပါဝင်သည်။ အခန်းနံပါတ်မှာ ကျမ်းစာပါ ဗျာဒိတ်ကျမ်းတွင် . . . ရည်ညွှန်းထားသည့် ၆၆၆ ဖြစ်သည်။”

ဘုရားသခင်မပါသော ကျမ်းစာတစ်အုပ်

ဒိန်းမတ်သမားတော်တစ်ယောက်သည် ပြန်လည်ရေးသားထားသော ဟေဗြဲကျမ်းစောင်တစ်ခုကို ပုံနှိပ်ထုတ်ဝေလိုက်သည်၊ ယင်းတွင် ဘုရားသခင်ကိုညွှန်းသည့် ရည်ညွှန်းချက်အားလုံးကို ထုတ်ပစ်ထားသည်။ ဒေါက်တာစဗန်းလင်းစ်က ဘုရားသခင်နှင့် ယုံကြည်ခြင်းတို့သည် “ကျွန်ုပ်တို့ကို တုပ်နှောင်ထားနိုင်သည့် အတိတ်ကအရာများဖြစ်သည်” ဟုယုံကြည်ကြောင်း ဒိန်းမတ်သတင်းစာ ခရစ်တယ်လက် ဒေါ်ဗလိတ် တွင်ရေးသားထားသည်။ လူများစွာမှာ မပျော်ကြဘဲ အထီးကျန်နေကြသည်ဟု လင်းစ်က မှတ်ချက်ချသည်။ “ကျွန်ုပ်တို့ဟာ ဂျူးခရစ်ယာန်ယဉ်ကျေးမှုထဲမှာ အသက်ရှင်နေကြပါတယ်” ဟုလင်းစ်ကဆိုသည်။ “ထို့ကြောင့် ကျွန်ုပ်တို့မပျော်ရွှင်မှုအတွက် ဂျူးခရစ်ယာန်ယဉ်ကျေးမှုက တာဝန်ခံရမည်။” ထိုသတင်းစာအရ လင်းစ်၏ ဘာသာပြန်ကျမ်းသစ်နှင့်အတူ သူ၏ပန်းတိုင်မှာ “ကျွန်ုပ်တို့ယဉ်ကျေးမှု၏အုတ်မြစ်ကို လှုပ်ခါပစ်” ရန်ဖြစ်သည်။ လင်းစ်၏ ဘုရားသခင်မပါသော ကျမ်းစာတွင် ကမ္ဘာဦး ၃:၁၂ ကိုဤသို့ဖတ်ရသည်– “အာဒံသည် မိမိဘာသာ ဤသို့တွေးသည်– ‘ငါ့နံဘေးမှ မိန်းမသည် အပင်က အသီးကို ငါ့အား ပေး၏၊ သို့နှင့် ငါလည်းစား၏။’” ခရစ်တယ်လက် ဒေါ်ဗလိတ်က ဤသို့မေးသည်– “နှင်းခဲထဲကရေကိုထုတ်လိုက်ပြီး ဘာကျန်သလဲဆိုတာကို ကြည့်တာနဲ့မတူဘူးလား။”