သူတို့ဟာ သိုးတွေကို ကိုယိုတီဝံပုလွေရန်ကနေ ကာကွယ်ပေးတယ်

ကိုယိုတီဝံပုလွေများသည် အမေရိကန်ပြည်ထောင်စုအနောက်ပိုင်းရှိ သိုးခြံပိုင်ရှင်များ၏အသက်မွေးဝမ်းကြောင်းအတွက် အဓိကအန္တရာယ်တစ်ခုဖြစ်သည်။ ၁၉၉၆ ခုနှစ်တစ်နှစ်တည်းတွင် အခွင့်ရထောင်ဖမ်းရေးသမားများသည် ကိုယိုတီဝံပုလွေ ၈၂,၀၀၀ ကျော်ကိုသတ်ပစ်ခဲ့ကြပြီး ၁၉၉၀ မှစ၍အကောင်ရေ ၆၀၀,၀၀၀ ကျော်ကိုသတ်ဖြတ်ခဲ့ကြသည်။ သို့သော် အချို့သောသိုးမွေးမြူသူများသည် သူတို့၏သိုးအုပ်ကိုကာကွယ်သည့် အခြားနည်းလမ်းကို ရှာဖွေတွေ့ရှိခဲ့သည်။ သူတို့သည် တောင်အမေရိကမှ လာမာများကို တင်သွင်းခဲ့ကြသည်။

လာမာသည် ကုလားအုတ်အမျိုးဝင်ဖြစ်သည်။ ဤနှစ်အစောပိုင်းတွင် ကုလားအုတ်အထီးတစ်ကောင်ကို လာမာအမတစ်ကောင်နှင့် မျိုးစပ်သည့်အခါ အဖတူသားပေါက်တစ်ကောင်ပေါက်လာသည်ဟု သတင်းရရှိခဲ့သည်။ လာမာသည် ပေါင် ၂၅၀ ခန့်လေးပြီး ပခုံးအထိပျမ်းမျှလေးပေခန့်မြင့်သည်။ ယင်းတွင် အများအားဖြင့် အဖြူရောင်အမွေးရှည်များရှိသော်လည်း အညိုရောင်နှင့် အနက်ရောင်လည်းရှိတတ်သည်။ သို့သော် သိုးမွေးမြူသူများအတွက် သာ၍အရေးပါသည်မှာ လာမာသည် သိုးများကိုဂရုစိုက်ပြီး ကိုယိုတီများကိုမောင်းထုတ်ကြသည်။

“သူတို့ဟာ ခြေထောက်နဲ့ကန်ပြီး သူတို့ရဲ့ခေါင်းကိုခါယမ်းကြတယ်၊ ကျွန်မတို့သိုးတွေ ကိုယိုတီကြောင့်မပျောက်တာ လေးနှစ်ရှိပြီ” ဟုသိုးမွေးမြူသူ ဘက်ကီ ဝက်ဒ်ကပြောပြသည်။ သို့သော် လာမာကိုသုံးခြင်းသည် အပြည့်အဝဖြေရှင်းနည်းမဟုတ်ကြောင်းကိုဝန်ခံကာ ဝက်ဒ်ဤသို့ပြောခဲ့သည်– “ဝက်ဝံတစ်ကောင်ကြောင့် ကျွန်မတို့သိုးအုပ်ထဲက သိုးလေးကောင်ပျောက်ခဲ့တယ်။”

ပတ်ဝန်းကျင်ထိန်းသိမ်းလိုစိတ်ရှိသည့် သိုးမွေးမြူရေးအုပ်စုတစ်စုသည် သိုးမွေးထုတ်လုပ်ရေးပူးပေါင်းဆောင်ရွက်မှုအဖွဲ့ကို ဖွဲ့စည်းခဲ့ကြသည်။ ၎င်းသည် သိုးမွေးမြူရေးသမားများထံမှ သားရဲတိရစ္ဆာန်ကိုမသေစေဘဲ သိုးများကိုကြည့်ရှုစောင့်ရှောက်ခြင်းဖြစ်သည့် “သားရဲကိုရန်မမူ” ဘဲရရှိသည့်သိုးမွေးများကိုရောင်းချသော အဖွဲ့အစည်းတစ်ခုဖြစ်သည်။ သိုးများကိုကာကွယ်ပေးရန် လာမာများအပြင် သိုးထိန်းခွေးများနှင့် မြည်းများကိုလည်း အသုံးပြုကြသည်။

သိုးမွေးထုတ်လုပ်ရေးပူးပေါင်းဆောင်ရွက်မှုအဖွဲ့သည် သိုးမွေးထည်များကိုထုတ်လုပ်ရန် အိမ်တွင်းလုပ်ငန်းခွင်မှ ဇာထိုးသူများနှင့် စာချုပ်ချုပ်ခဲ့သည်။ ထိုသိုးမွေးဈေးကိုမြှင့်လိုက်ရာ သိုးမွေးဆွယ်တာ၊ ဦးထုပ်၊ စောင်နှင့် အခြားအရာများမှာ ဈေးတက်သွားသည်။ ၎င်းပစ္စည်းများအတွက် အပိုကုန်ကျငွေကို ဝယ်သူများပေးနိုင်ပါမည်လော။ နယူးယောက်ရှိ ချာတန်မြို့လေးမှ စတိုးဆိုင်ပိုင်ရှင်တစ်ဦးက “ဒါဟာ မွေးမြူရေးခြံကလာတဲ့ သိုးမွေးထည်လို့ပြောပြလိုက်တဲ့အခါ လူတွေဝယ်ကြတယ်။ သိုးမွေးဆွယ်တာမှာ နောက်ကြောင်းရာဇဝင်ရှိတဲ့အတွက် လူတွေသဘောကျကြတယ်” ဟုပြောပြခဲ့သည်။