“ယုံကြည်ခြင်းလိုနေသည့်နေရာတွင် ကျွန်ုပ်အားကူညီပေးတော်မူပါ”

“သူငယ်၏အဘက ‘အကျွန်ုပ်ယုံကြည်ပါ၏။ ယုံကြည်ခြင်းလိုနေသည့်နေရာတွင် ကျွန်ုပ်အားကူညီပေးတော်မူပါ’ ဟု လျှောက်လေသည်။”—မာကု ၉:၂၄၊ NW။

၁။ ဖခင်တစ်ဦးအား “ယုံကြည်ခြင်းလိုနေသည့်နေရာတွင် ကျွန်ုပ်အားကူညီပေးတော်မူပါ” ဟုပြောဆိုရန် ဘာကဖြစ်စေသနည်း။

နတ်ဆိုးစွဲနေသောလူငယ်ကလေး၏ဖခင်သည် ယေရှုခရစ်ရှေ့မှောက်တွင် ရပ်နေသည်။ ထိုသူသည် မိမိသားငယ်အားပျောက်ကင်းစေရန် မည်မျှတောင့်တလိုက်လေခြင်း။ ယေရှု၏တပည့်တော်များသည် နတ်ဆိုးများကိုနှင်ထုတ်ရန် လုံလောက်သောယုံကြည်ခြင်း လစ်ဟင်းနေခဲ့သည်။ သို့သော်ဖခင်က “အကျွန်ုပ်ယုံကြည်ပါ၏။ ယုံကြည်ခြင်းလိုနေသည့်နေရာတွင် ကျွန်ုပ်အားကူညီပေးတော်မူပါ” ဟုလျှောက်ကြားခဲ့သည်။ ဘုရားပေးသောတန်ခိုးအားဖြင့် ယေရှုသည်နတ်ဆိုးကိုနှင်ထုတ်ခဲ့ပြီး၊ သူငယ်ဖခင်၏ယုံကြည်ခြင်းကို အမှန်ပင်ခွန်အားရှိစေခဲ့ပေမည်။—မာကု ၉:၁၄-၂၉။

၂။ ယုံကြည်ခြင်းနှင့်ပတ်သက်၍ခရစ်ယာန်များသည် မည်သည့်နှစ်နည်းတွင်မရှက်ကြသနည်း။

^၂ မျှော်လင့်ချက်ထားသောသူငယ်၏ဖခင်ပမာ၊ ယေဟောဝါ၏သစ္စာစောင့်သော ကျေးကျွန်တစ်ဦးသည် “အကျွန်ုပ်ယုံပါ၏” ဟုဆိုရန်မရှက်ချေ။ ကဲ့ရဲ့သူများသည် ဘုရားရှင်၏တန်ခိုးတော်၊ ကိုယ်တော့်နှုတ်ကပါဌ်တော်၏မှန်ကန်မှုနှင့် ကိုယ်တော်ကိုယ်နှိုက်၏တည်ရှိခြင်းကိုပင် ငြင်းဆန်ပေမည်။ သို့သော်ခရစ်ယာန်စစ်များသည် ယေဟောဝါဘုရားရှင်၌ သူတို့ယုံကြည်ကြောင်း အလွယ်တကူပင်ဝန်ခံကြသည်။ သို့ပင်ငြားလည်း၊ သူတို့၏ကောင်းကင်ခမည်းတော်ထံ ဆုတောင်းခြင်း၌ သီးသန့်စကားပြောသောအခါ ထိုသူများအနေနှင့် “ယုံကြည်ခြင်းလိုအပ်နေသည့်နေရာတွင် ကျွန်ုပ်အားကူညီပေးတော်မူပါ” ဟုတောင်းလျှောက်ပေမည်။ ယင်းသို့သူတို့မရှက်ဘဲတောင်းကြကာ ယေရှုခရစ်၏တမန်တော်များပင်၊ “အကျွန်ုပ်တို့ယုံကြည်ခြင်းစိတ်ကို တိုးပွားစေတော်မူပါ” ဟုတောင်းလျှောက်ခဲ့ကြကြောင်း သူတို့သိရှိကြသည်။—လုကာ ၁၇:၅။

၃။ ယောဟန်သည်သူ၏ခရစ်ဝင်ကျမ်းတွင် “ယုံကြည်ခြင်း” စကားလုံးကိုအသုံးပြုရာ၌ ဘာထူးခြားပါသနည်း။ ယင်းသည်အဘယ်ကြောင့် လျောက်ပတ်ပါသနည်း။

^၃ အထူးသဖြင့်ခရစ်ယာန်ဂရိကျမ်းစောင်များသည် ယုံကြည်ခြင်းအကြောင်းပြောစရာ များစွာရှိလေသည်။ အမှန်တွင်၊ ယောဟန်ခရစ်ဝင်ကျမ်းသည် “ယုံကြည်ခြင်း” နှင့်ဆက်နွယ်နေသော ဂရိစကားလုံးအမျိုးမျိုးကို အခြားခရစ်ဝင်ကျမ်းသုံးခုစုစုပေါင်းသည်ထက် ၄၀ ရာခိုင်နှုန်းပိုမိုအသုံးပြုလေသည်။ ယောဟန်ကယုံကြည်ခြင်း ရှိ ရုံနှင့်မလုံလောက်ကြောင်း ပေါ်လွင်စေခဲ့သည်၊ ယင်းကိုကျင့်သုံး ခြင်းသည် အရေးကြီးသည်။ စီအီး ၉၈ ခုနှစ်ခန့်တွင်ရေးသား၍ ယုံကြည်ခြင်းတွင်အားနည်းသော ခရစ်ယာန်များကိုသွေးဆောင်ရန် မိစ္ဆာအဆိပ်အတောက်အမျှင်များ လက်လှမ်းနေသည်ကို သူမြင်တွေ့ခဲ့သည်။ (တမန်တော် ၂၀:၂၈-၃၀။ ၂ ပေတရု ၂:၁-၃။ ၁ ယောဟန် ၂:၁၈၊ ၁၉) ထို့ကြောင့်ယုံကြည်ခြင်းတင်ပြရန်အရေးကြီးပြီး၊ ဘုရားရေးရာလုပ်ရပ်များဖြင့် သာဓကပြရန်ဖြစ်သည်။ ခဲယဉ်းသောအချိန်များ ရှေ့တွင်ရှိနေသည်။

၄။ ယုံကြည်ခြင်းရှိသူများအတွက် အဘယ်ကြောင့်မတတ်နိုင်သောအရာ ဘာမျှမရှိသနည်း။

^၄ ယုံကြည်ခြင်းသည် ခရစ်ယာန်များအား မည်သည့်ခက်ခဲမှုကိုမဆို တွန်းလှန်နိုင်စေသည်။ ယေရှုကမိမိ၏တပည့်တော်များအား သူတို့သည် “မုန်ညင်းစေ့ခန့်မျှလောက်သော ယုံကြည်ခြင်းရှိလျှင်” သူတို့အတွက်ဘာမျှမတတ်နိုင်သည်ဟူ၍ ရှိမည်မဟုတ်ကြောင်း မိန့်ဆိုခဲ့သည်။ (မဿဲ ၁၇:၂၀) ထိုသို့ဖြင့်၊ သန့်ရှင်းသောဝိညာဉ်တော်အသီးဖြစ်သည့် ယုံကြည်ခြင်းတန်ခိုးကို အလေးအနက်တင်ပြခဲ့သည်။ ထို့ကြောင့်ယေရှုက လူဘာလုပ်နိုင်သည်ကိုမဟုတ်ဘဲ ဘုရားရှင်၏ဝိညာဉ်တော် သို့မဟုတ်လှုပ်ရှားသည့်တန်ခိုးတော်၏ စွမ်းဆောင်နိုင်မှုကို အဓိကတင်ပြခြင်းဖြစ်သည်။ ယင်း၏ဦးဆောင်မှုခံရသူများသည် အခက်အခဲနှင့်ပြဿနာတစ်ဆိတ်ကို တစ်အိတ်မလုပ်ကြချေ။ ဘုရားသခင့်ဝိညာဉ်တော်ကပေးသော ဉာဏ်ပညာကိုအသုံးပြုခြင်းဖြင့် အရာများကိုသူ့နေရာနှင့်သူထားရန် ကူညီပေးသည်။ ကြီးလေးသောပြဿနာများပင် ထောက်မသောယုံကြည်ခြင်း၏တန်ခိုးအောက်တွင် ပျက်ပြယ်သွားသည်။—မဿဲ ၂၁:၂၁၊ ၂၂။ မာကု ၁၁:၂၂-၂၄။ လုကာ ၁၇:၅၊ ၆။

ယုံကြည်ခြင်းမလဲကျရန်ဆုတောင်းခြင်း

၅-၇။ (က) ယေရှုသည်အောက်မေ့ရာပွဲတော်ကို အစပြုခဲ့စဉ်ကိုယ်တော်သည် ယုံကြည်ခြင်းနှင့်စပ်လျဉ်း၍ မည်သည့်သတိပေးစကားများ ပြောကြားခဲ့သနည်း။ (ခ) ညီအစ်ကိုများအားခိုင်ခံ့စေရန် ပေတရု၏ယုံကြည်ခြင်းသည် မည်သို့တတ်နိုင်ခဲ့သနည်း။

^၅ စီအီး ၃၃ ခုနှစ်တွင်၊ ယေရှုသည်ပသခါပွဲတော်ကို မိမိ၏တပည့်တော်များနှင့် နောက်ဆုံးကျင်းပခဲ့သည်။ ထို့နောက်၊ ယုဒရှကာရုတ်ကို ထွက်သွားစေပြီးနောက် ကိုယ်တော်သည်အောက်မေ့ရာပွဲတော်ကိုကျင်းပကာ ဤသို့မိန့်ဆိုခဲ့သည်။ “ငါ့ခမည်းတော်သည် ငါ့အားနိုင်ငံကိုပေးတော်မူသည်နှင့်အညီ . . . ငါသည်သင်တို့အားပေးမည်။ . . . ရှိမုန်၊ ရှိမုန်၊ ဂျုံဆန်ကိုဆန်ခါနှင့်ချသကဲ့သို့ စာတန်သည်သင်တို့ကိုချရမည့်အကြောင်း အခွင့်တောင်းသည်ဖြစ်၍ သင်၏ယုံကြည်သောစိတ်မပျက်စေခြင်းငှာ ငါသည်သင့်အဖို့ဆုတောင်းလေပြီ။ သင်သည်သတိရပြန်သောအခါ သင်၏ညီအစ်ကိုတို့ကို တည်ကြည်စေလော့။”—လုကာ ၂၂:၂၈-၃၂။

^၆ ရှိမုန်ပေတရု၏ယုံကြည်ခြင်း မကျဆုံးသွားရန် ယေရှုဆုတောင်းပေးခဲ့သည်။ ပေတရုသည် စိတ်ချမှုလွန်ကဲစွာဖြင့် ယေရှုကိုဘယ်တော့မျှ မငြင်းပယ်ဟုဝါကြွားခဲ့သော်လည်း ထိုမှများမကြာမီ သုံးကြိမ်တိုင်သူငြင်းပယ်ခဲ့သည်။ (လုကာ ၂၂:၃၃၊ ၃၄၊ ၅၄-၆၂) အမှန်တွင်၊ ကြိုတင်ဟောကြားထားသည့်အတိုင်း သိုးထိန်းကိုသတ်ပစ်လိုက်သောအခါ သိုးများသည်ကွဲလွင့်ခဲ့ရသည်။ (ဇာခရိ ၁၃:၇။ မာကု ၁၄:၂၇) သို့သော်၊ ပေတရုသည် ကြောက်ရွံ့ခြင်းထောင်ချောက်ထဲသို့ကျပြီးနောက် ပြန်သတိဝင်လာသောအခါ သူသည်သူ၏ဝိညာဏညီအစ်ကိုများကို အားပေးခဲ့လေသည်။ သစ္စာမဲ့ယုဒရှကာရုတ်၏နေရာကို ပြန်လည်အစားထိုးရန်ကိစ္စကို သူတင်ပြခဲ့သည်။ စီအီး ၃၃ ခုနှစ်ပင်တေကုတ္တေပွဲနေ့တွင် တမန်တော်များ၏ပြောရေးဆိုခွင့်ရှိသူအဖြစ် ပေတရုသည်သူ့အားယေရှုပေးခဲ့သော “သော့” တို့မှတစ်ချောင်းကိုအသုံးပြုကာ၊ ဂျူးများကိုနိုင်ငံတော်အဖွဲ့ဝင်များဖြစ်လာရန် လမ်းဖွင့်ပေးခဲ့သည်။ (မဿဲ ၁၆:၁၉။ တမန်တော် ၁:၁၅–၂:၄၁) စာတန်သည်တမန်တော်များကို ဂျုံဆန်ကဲ့သို့ဆန်ခါချရန်တောင်းဆိုခဲ့သည်။ သို့သော်သူတို့၏ယုံကြည်ခြင်းမလဲကျရန် ဘုရားရှင်ကြည့်ရှုခဲ့သည်။

^၇ ယေရှုက၊ “သင်၏ယုံကြည်သောစိတ်မပျက်စေခြင်းငှာ ငါသည်သင့်အဖို့ဆုတောင်းလေပြီ” ဟုပြောသည်ကိုကြားခဲ့စဉ် ပေတရုမည်သို့ခံစားရသည်ကို တွေးကြည့်ပါ။ စဉ်းစားကြည့်ပါ။ သူ၏အရှင်သခင်သည် ပေတရု၏ယုံကြည်ခြင်းမပျက်ရန် ဆုတောင်းပေးခဲ့သည်။ ယင်းသည်မပျက်ခဲ့၊ အရှုံးမပေးခဲ့။ အမှန်တွင်၊ ပင်တေကုတ္တေပွဲနေ့တွင် ပေတရုနှင့်အခြားသူများသည် ကောင်းကင်ဘုန်းတော်တွင် ခရစ်တော်နှင့်အတူပူးတွဲအမွေခံများအဖြစ် ကောင်းကင်ဝိညာဏသားများဖြစ်လာရန် သန့်ရှင်းသောဝိညာဉ်တော်ဖြင့် ပထမဦးဆုံးဘိသိက်ပေးခံရသူများ ဖြစ်လာခဲ့သည်။ ထိုအချိန်တွင် ယခင်ကမသိရှိခဲ့သောအတိုင်းအတာဖြင့် သန့်ရှင်းသောဝိညာဉ်တော်သည် သူတို့အပေါ်လှုပ်ရှားကာ သူတို့သည်ယုံကြည်ခြင်းအပါအဝင် ယင်း၏အသီးကို တစ်ခါကမျှနှင့်မတူအောင် တင်ပြနိုင်ခဲ့သည်။ “အကျွန်ုပ်တို့ယုံကြည်ခြင်းစိတ်ကို တိုးပွားစေတော်မူပါ” ဟူသည့်သူတို့၏တောင်းလျှောက်ချက်အပေါ် ထူးမြတ်သောဖြေကြားချက်ပါတကား။—လုကာ ၁၇:၅။ ဂလာတိ ၃:၂၊ ၂၂-၂၆။ ၅:၂၂၊ ၂၃။

ယုံကြည်ခြင်းဖြင့် ရှေ့တွင်ရှိစုံစမ်းခြင်းများကို ရင်ဆိုင်ခြင်း

၈။ ၁ သက်သာလောနိတ် ၅:၃ ပြည့်စုံခြင်းနှင့်စပ်လျဉ်း၍ အဖွဲ့အစည်းသည် မည်သည့်အချိန်မီသတိပေးချက်ကိုကျွန်ုပ်တို့အား ပေးခဲ့သနည်း။

^၈ သမ္မာကျမ်းပရောဖက်ပြုချက်ပြည့်စုံလျက် ကျွန်ုပ်တို့သည်မကြာမီ “ငြိမ်ဝပ်ခြင်းရှိ၏၊ ဘေးအန္တရာယ်နှင့်ကင်းလွတ်၏” ဟူသောဟစ်ကြွေးသံကိုကြားရမည်။ (၁ သက်သာလောနိတ် ၅:၃) ယင်းသည်ကျွန်ုပ်တို့ယုံကြည်ခြင်းကို စမ်းသပ်မှုဖြစ်နိုင်ပါသလော။ မှန်ပါသည်၊ တိုင်းနိုင်ငံများက ငြိမ်းချမ်းလာရန်စွမ်းဆောင်သည်တွင် အောင်မြင်ပုံရခြင်းက ကျွန်ုပ်တို့အားသတိလက်လွတ်ဖြစ်သွားစေနိုင်သော အန္တရာယ်ရှိလေသည်။ သို့သော်ထိုပန်းတိုင်သို့ဆိုက်ရောက်ရန် ယေဟောဝါဘုရားသည် ဤလောက၏မည်သည့်အဖွဲ့အစည်းကိုမှ အသုံးမပြုကြောင်း ကျွန်ုပ်တို့စိတ်ထဲသိရှိနေလျှင် ထိုသို့သောငြိမ်းချမ်းရေးကြွေးကြော်သူများ၏ စိတ်ဓာတ်မျိုးကျွန်ုပ်တို့ပြသမည်မဟုတ်ချေ။ စစ်မှန်သောငြိမ်းချမ်းရေးရရှိစေရန် ကိုယ်တော်ကိုယ်နှိုက်၏နည်းလမ်းတော်ရှိပြီး၊ ယင်းသည်ယေရှုခရစ်အောက် ကိုယ်တော်၏နိုင်ငံတော်အားဖြင့်သာဖြစ်သည်။ ထို့ကြောင့်၊ ငြိမ်းချမ်းရေးတည်ထောင်ရာ၌ မည်သို့သောအောင်မြင်မှုမျိုးရရှိစေကာမူ၊ ယင်းသည်တိုတောင်းပြီးအပေါ်ယံသာဖြစ်မည်။ ဤအစီအစဉ်စနစ်ဟောင်းတိုင်းနိုင်ငံများ၏ “ငြိမ်ဝပ်ခြင်းရှိ၏၊ ဘေးအန္တရာယ်နှင့်ကင်းလွတ်၏” ဟူသည့်လာလတံ့သော အယောင်ဆောင်ကြွေးကြော်သံအားဖြင့် ယေဟောဝါ၏ကျေးကျွန်များ သတိလက်လွတ်ဖြစ်မသွားဘဲ ယင်းနှင့်စပ်လျဉ်း၍ကျွန်ုပ်တို့သတိရှိနေရန် “သစ္စာနှင့်လည်းကောင်း၊ သတိပညာနှင့်လည်းကောင်း ပြည့်စုံသောကျွန်” သည် ဆက်လက်၍အချိန်မီ သတိပေးချက်များကို ထုတ်ဝေသွားမည်။—မဿဲ ၂၄:၄၅-၄၇။

၉။ မဟာဗာဗုလုန်ကိုဖျက်ဆီးရာတွင် ကျွန်ုပ်တို့အပိုင်းကရဲစွမ်းသတ္တိနှင့်ယုံကြည်ခြင်း အဘယ်ကြောင့်လိုအပ်သနည်း။

^၉ “ငြိမ်ဝပ်ခြင်းရှိ၏၊ ဘေးအန္တရာယ်နှင့်ကင်းလွတ်၏” ဟူသောကြွေးကြော်သံသည် မှောက်မှားသောဘာသာရေးကမ္ဘာ့အင်ပါယာဖြစ်သည့် မဟာဗာဗုလုန်အပေါ် “လျင်မြန်စွာသောပျက်စီးခြင်း” ဆိုက်ရောက်ရန် အချက်ပြခြင်းဖြစ်မည်။ (ဗျာဒိတ် ၁၇:၁-၆၊ ၁၈:၄၊ ၅) ယင်းသည်လည်း ခရစ်ယာန်ယုံကြည်ခြင်းကို စမ်းသပ်မည်။ မှောက်မှားသောဘာသာရေးပျက်စီးပြိုလဲသောအခါ ယေဟောဝါသက်သေများသည် ယုံကြည်ခြင်းတွင်ခိုင်မြဲလျက်နေမည်လော။ သူတို့သည်အမှန်ပင်ခိုင်မြဲလျက်နေမည်။ ဤဖြစ်ရပ်သည် လူအများအတွက် မမျှော်လင့်ထားသောအရာ၊ သဘောမပေါက်သောအရာဖြစ်၍ လူ၏လုပ်ရပ်လည်းမဟုတ်ချေ။ အမှန်တွင်ယင်းသည်မှောက်မှားသောဘာသာက ကြာမြင့်စွာရှုတ်ချခဲ့သောနာမတော်ကို သန့်စင်လေးမြတ်စေရန် ယေဟောဝါ၏တရားစီရင်ချက်ဖြစ်ကြောင်း လူများသိရှိရမည်။ သို့သော်တစ်ဦးတစ်ယောက်ကလာ၍မပြောဘဲ လူများမည်သို့သိရှိမည်နည်း။ ထို့ပြင်ယေဟောဝါသက်သေများမှလွဲ၍ သူတို့အားထိုသို့ပြောပြမည့်သူ မည်သူရှိပါမည်နည်း။—ယေဇကျေလ ၃၅:၁၄၊ ၁၅ နှင့်နှိုင်းယှဉ်။ ရောမ ၁၀:၁၃-၁၅။

၁၀။ ယေဟောဝါ၏လူမျိုးအပေါ် ဂေါဂ၏တိုက်ခိုက်မှုသည်လည်း ယုံကြည်ခြင်းအတွက် အဘယ်ကြောင့်စမ်းသပ်မှုဖြစ်သနည်း။

^၁၀ ယေဟောဝါ၏ဘိသိက်ခံသက်သေများနှင့် မြေကြီးမျှော်လင့်ချက်ရှိသော သူတို့၏အပေါင်းအဖော်များသည် မဟာဗာဗုလုန်နှင့်ကျန်ကြွင်းသောစာတန်၏အစီအစဉ်များအပေါ် သင့်ရောက်လုဆဲဆဲ ယေဟောဝါ၏တရားစီရင်ချက်ဖြစ်သော သုတ်သင်ခြင်းအကြောင်းကို အခြားသူများအားဟောပြောရန် လိုအပ်သောရဲစွမ်းသတ္တိရှိကြသည်။ (၂ ကောရိန္သု ၄:၄) သူ၏လက်ရှိနိမ့်ကျသောနေရာကိုဖော်ပြသည့် မာဂေါဂပြည်သားဂေါဂအဖြစ်စာတန်သည် ဘုရားလူမျိုးအပေါ် မီးကုန်ယမ်းကုန်တိုက်ခိုက်ရန်စစ်ခင်းမည်။ ယေဟောဝါသက်သေများအပေါ် ဘုရားသခင့်ကာကွယ်မှုတန်ခိုး၌ယုံကြည်ခြင်းသည် စမ်းသပ်ခံရမည်။ သို့သော်ဘုရားနှုတ်ကပါဌ်တော်ကြိုတင်ဟောထားသည့်အတိုင်း ကိုယ်တော်သည်မိမိ၏လူမျိုးကို ကာကွယ်မည့်အကြောင်း ကျွန်ုပ်တို့ယုံကြည်နိုင်သည်။—ယေဇကျေလ ၃၈:၁၆။ ၃၉:၁၈-၂၃။

၁၁၊ ၁၂။ (က) ရေလွှမ်းမိုးချိန်တွင် နောဧနှင့်သူ၏မိသားစုကယ်တင်ခြင်းကို ဘာကသေချာစေခဲ့သနည်း။ (ခ) ကြီးစွာသောဒုက္ခတွင် ကျွန်ုပ်တို့ဘာအတွက် စိတ်ပူစရာမလိုသနည်း။

^၁၁ ယနေ့တွင်ယေဟောဝါသည် မိမိ၏လူများကို “ကြီးစွာသောဒုက္ခ” တွင်မည်သို့ကာကွယ်မည်ကို ကျွန်ုပ်တို့မသိရှိကြပေ။ ထို့အတွက်ကြောင့် ကိုယ်တော်ကာကွယ်မည့်အပေါ် ယုံမှားဖို့အကြောင်းမရှိချေ။ (မဿဲ ၂၄:၂၁၊ ၂၂) ဘုရားသခင့်မျက်မှောက်ခေတ်ကျေးကျွန်များ၏ အခြေအနေသည် ရေလွှမ်းမိုးစဉ်အတွင်း နောဧနှင့်သူ၏မိသားစုကိုယ်နှိုက်တွေ့ကြုံရသော အခြေအနေနှင့်တူမည်။ သူတို့ဝန်းကျင်တွင် ဖျက်ဆီးခြင်းရေထုသည် ဝန်းရံလျက်သင်္ဘောထဲတွင် တံခါးပိတ်လျက်နေစဉ် သူတို့သည်ဤတန်ခိုးတော်ပြသချက်ကြောင့်မိန်းမောကာ အားသွန်ခွန်စိုက်ဆုတောင်းခဲ့ပေမည်။ သူတို့သည်ပူပန်လျက်သူတို့ကိုယ်ကိုသူတို့ ‘ဖျက်ဆီးခြင်းဘေးဒဏ်တွေကို သင်္ဘောဟာကြံ့ကြံ့ခံနိုင်ပါ့မလား။ ရေလွှမ်းမိုးပြီးတဲ့အထိ အစားအစာလုံလောက်ပါ့မလား။ ကပ်ဘေးပြီးတဲ့နောက်မြေကြီးပေါ်မှာ ပြောင်းလဲလာတဲ့အခြေအနေတွေကို ငါတို့ခံရပ်နိုင်ပါ့မလား’ ဟုမမေးခဲ့ချေ။ နောက်ပိုင်းဖြစ်ပျက်မှုများက ထိုသို့သောပူပင်မှုများသည် အခြေအမြစ်မရှိကြောင်း သက်သေထူခဲ့လေသည်။

^၁၂ သူတို့၏ကယ်တင်ခြင်းသေချာစေရန်၊ နောဧနှင့်သူ၏မိသားစုသည် ယုံကြည်ခြင်းကျင့်သုံးရန်လိုအပ်သည်။ ယင်းကညွှန်ကြားချက်နှင့် ဘုရားသခင့်သန့်ရှင်းသောဝိညာဉ်တော်၏ ဦးဆောင်မှုကိုလိုက်နာရန်ဆိုလိုသည်။ ကြီးစွာသောဒုက္ခတွင်၊ သန့်ရှင်းသောဝိညာဉ်တော်၏ဦးဆောင်မှုကိုလိုက်လျှောက်၍ ယေဟောဝါ၏အဖွဲ့အစည်းမှတစ်ဆင့် ကိုယ်တော်၏ညွှန်ကြားချက်များကိုလိုက်နာရန် မလွှဲရှောင်နိုင်ချေ။ သို့ပြုလျှင်ကျွန်ုပ်တို့သည်ပူပန်ပြီး ‘ကျွန်ုပ်တို့ရဲ့ဝိညာဏနဲ့ရုပ်ပစ္စည်းလိုအပ်ချက်တွေကို ဘယ်လိုရရှိမလဲ။ အသက်ကြီးရင့်သူတွေ သို့မဟုတ် အထူးစောင့်ရှောက်ဆေးဝါးကုသမှုလိုအပ်သူတွေအတွက် ဘာအစီအစဉ်တွေလုပ်ပေးမလဲ။ ကျွန်ုပ်တို့ကမ္ဘာသစ်ထဲလွတ်မြောက်သွားနိုင်အောင် ယေဟောဝါဘယ်လိုစီမံပေးမလဲ’ ဟုမေးစရာလိုမည်မဟုတ်ချေ။ ခိုင်မြဲသောယုံကြည်ခြင်းဖြင့် ယေဟောဝါ၏သစ္စာရှိကျေးကျွန်များသည် အရာခပ်သိမ်းကို ကိုယ်တော်၏တတ်စွမ်းနိုင်သောလက်တော်၌ထားမည်။—မဿဲ ၆:၂၅-၃၃ နှင့်နှိုင်းယှဉ်။

၁၃။ ကြီးစွာသောဒုက္ခစသည့်အခါ ကျွန်ုပ်တို့သည်အာဗြဟံ၏ယုံကြည်ခြင်းမျိုးကဲ့သို့ အဘယ်ကြောင့်လိုအပ်မည်နည်း။

^၁၃ ကြီးစွာသောဒုက္ခစသည့်အခါ ဘုရားသခင်အပေါ်ကျွန်ုပ်တို့၏ယုံကြည်ခြင်းသည် ကြီးစွာအားပေးခံရမည်မှာ ယုံမှားဖွယ်မရှိချေ။ နောက်ဆုံးတွင်၊ ယေဟောဝါသည်မိမိပြုလုပ်မည်ဟုပြောသည်ကို လုပ်ဆောင်သွားပုံအားကျွန်ုပ်တို့တွေ့ရမည်။ ကိုယ်တော်၏တရားစီရင်သုတ်သင်ပုံကို ကျွန်ုပ်တို့၏ကိုယ်နှိုက်မျက်စိနှင့် မြင်တွေ့ရပါမည်တကား။ သို့သော်ဆိုးယုတ်သူများကိုဖျက်ဆီးစဉ် ဘုရားရှင်သည်ကိုယ်တော်၏လူမျိုးအား ကယ်တင်မည်ကိုယုံကြည်လောက်အောင် ကျွန်ုပ်တို့တစ်ဦးစီတွင် ယုံကြည်ခြင်းရှိပါမည်လော။ ဖြောင့်မတ်သူများကို ဆိုးယုတ်သူများနှင့်အတူမဖျက်ဆီးဘဲ ‘မြေကြီးလုံးကိုစီရင်တော်မူသောသခင်သည် တရားသဖြင့်ပြုတော်မူမည်’ ဟုယုံကြည်သော အာဗြဟံနှင့်ကျွန်ုပ်တို့တူမည်လော။—ကမ္ဘာဦး ၁၈:၂၃၊ ၂၅။

၁၄။ အဘယ်မေးခွန်းများက ကျွန်ုပ်တို့၏ယုံကြည်ခြင်းကိုသုံးသပ်ရန်နှင့် ယင်းကိုခိုင်ခံ့စေရန်ကြိုးပမ်းဖို့ ဖြစ်စေသင့်သနည်း။

^၁၄ ကျွန်ုပ်တို့သည်ယခုတွင် မိမိတို့၏ယုံကြည်ခြင်းကိုတည်ဆောက်ရန် မည်မျှအရေးကြီးလှပါသည်တကား။ ဤဆိုးယုတ်သောအစီအစဉ်များအဆုံးသည် နီးကပ်လှသောကြောင့် ဘုရားရှင်၏ဝိညာဉ်တော်သည်ကျွန်ုပ်တို့အား “သန့်ရှင်းသောအကျင့်ကိုကျင့်ခြင်း၊ ဘုရားဝတ်၌မွေ့လျော်’ ရန်လှုံ့ဆော်ဖို့ခွင့်ပြုကြပါစို့။ (၂ ပေတရု ၃:၁၁-၁၄) သို့ဖြစ်လျှင်ကျွန်ုပ်တို့သည် ကြီးစွာသောဒုက္ခကြီးအတွင်း၌ အောက်ပါစိတ်မငြိမ်သက်ဖွယ်အတွေးများဖြင့် သောကရောက်နေမည်မဟုတ်ချေ။ ‘ငါဟာယေဟောဝါရဲ့ကာကွယ်မှုရဖို့ ခိုင်လုံရဲ့လား။ ကိုယ်တော်ရဲ့အမှုတော်မှာ ငါဟာပိုပြီးထမ်းဆောင်နိုင်ခဲ့လေမလား။ ငါဟာ “ပုံသဏ္ဌာန်သစ်” ကိုယူတင်ဝတ်ဆင်ဖို့ တကယ်ဘဲကြိုးပမ်းခဲ့ရဲ့လား။ ငါဟာကမ္ဘာသစ်မှာ ယေဟောဝါအလိုရှိတဲ့လူစားမျိုးလား။’ ထိုသို့သောဆင်ခြင်တုံတရားနှင့်ညီသောမေးခွန်းများက ကျွန်ုပ်တို့အားမိမိတို့၏ယုံကြည်ခြင်းကိုသုံးသပ်ကာ ယခုပင်လျှင်ယင်းကိုခိုင်ခံ့စေရန် ကြိုးပမ်းအားထုတ်သင့်ပါသည်တကား။—ကောလောသဲ ၃:၈-၁၀။

ကျွန်ုပ်တို့အား ကျန်းမာစေသည့်ယုံကြည်ခြင်း

၁၅။ တစ်ခါတစ်ရံ၊ ယေရှုသည်မိမိကုသပျောက်ကင်းစေသူများအား ဘာပြောခဲ့သနည်း။ သို့သော်ယင်းသည် မျက်မှောက်ခေတ်ယုံကြည်ခြင်းကုထုံးကို အဘယ်ကြောင့်မထောက်ခံသနည်း။

^၁၅ ယေရှုသည်မိမိ၏ရောဂါကုသခြင်းကို ယုံကြည်ခြင်းရှိသူများအတွက်သာ မကန့်သတ်ထားခဲ့ချေ။ (ယောဟန် ၅:၅-၉၊ ၁၃) ထို့ကြောင့်ကိုယ်တော်၏လုပ်ရပ်သည် ကျမ်းစာနှင့်မညီသောအယူဖြစ်သည့် ယုံကြည်ခြင်းကုထုံးကိုမထောက်ခံချေ။ မှန်ပါသည်၊ ယေရှုကကိုယ်တော်ပျောက်ကင်းစေသောသူများအား၊ “သင်၏ယုံကြည်ခြင်းသည် သင့်အနာကိုငြိမ်းစေပြီ” ဟုမိန့်ဆိုသောအခါရှိခဲ့သည်။ (မဿဲ ၉:၂၂။ မာကု ၅:၃၄။ ၁၀:၅၂။ လုကာ ၈:၄၈။ ၁၇:၁၉။ ၁၈:၄၂) ထိုသို့ပြောခြင်းဖြင့်ကိုယ်တော်သည် ရှင်းနေသောအမှန်တရားကို ထောက်ပြနေခြင်းသာဖြစ်သည်။ အကယ်၍ရောဂါစွဲနေသောထိုသူများသည် ယေရှု၏ကုသနိုင်စွမ်းတွင် အယုံအကြည်မရှိပါက သူတို့သည်ကိုယ်တော်ထံကုသရန် အစကတည်းကလာမည်မဟုတ်ချေ။

၁၆။ ယနေ့တွင်ယေရှုသည် မည်သည့်ကုသခြင်းအစီအစဉ်ကို ညွှန်ကြားနေသနည်း။

^၁၆ ယနေ့တွင်ယေရှုခရစ်သည် ဝိညာဏကုသခြင်းအစီအစဉ်ကို ညွှန်ကြားလျက်ရှိကာ ၄,၀၀၀,၀၀၀ ကျော်သောသူများသည် ယင်းမှအကျိုးခံစားရရန် လုပ်ဆောင်ကြသည်။ ယေဟောဝါသက်သေများအဖြစ် သူတို့သည်ခန္ဓာပိုင်းဆိုင်ရာမစွမ်းသန်မှုများရှိသော်လည်း သူတို့သည်ဝိညာဏကျန်းမာမှုခံစားနေရကြသည်။ သူတို့အထဲမှဘိသိက်ခံခရစ်ယာန်များသည် ကောင်းကင်မျှော်လင့်ချက်ရှိကာ၊ သူတို့သည် ‘မထင်ရှားသော . . . အစဉ်အမြဲတည် . . . သောအရာတို့ကိုကြည့်မှတ်ကြ’ သည်။ (၂ ကောရိန္သု ၄:၁၆-၁၈၊ ၅:၆၊ ၇) မြေကြီးမျှော်လင့်ချက်ရှိသော ခရစ်ယာန်များသည် ဘုရားသခင့်ကမ္ဘာသစ်တွင်ဖြစ်ပေါ်မည့် ကိုယ်ကာယကုသခြင်းဖြစ်သည့် ထူးခြားလှသောလုပ်ရပ်များကို စောင့်မျှော်လျက်ရှိသည်။

၁၇၊ ၁၈။ ဗျာဒိတ် ၂၂:၁၊ ၂ တွင်ယေဟောဝါ၏မည်သည့်ပြင်ဆင်ပေးချက်ကို ဖော်ပြထားခဲ့ပြီး၊ ယင်းမှအကျိုးခံစားနိုင်ရန် ယုံကြည်ခြင်းမည်သို့လိုအပ်သနည်း။

^၁၇ တမန်တော်ယောဟန်ကဗျာဒိတ် ၂၂:၁၊ ၂ တွင်ထာဝရအသက်အတွက် ကိုယ်တော်၏ပြင်ဆင်ပေးချက်များကို ဤသို့ရည်ညွှန်းဖော်ပြသည်။ “တစ်ဖန်ကျောက်သလင်းကဲ့သို့ကြည်လင်၍ ဘုရားသခင်နှင့်သိုးသငယ်၏ပလ္လင်တော်ထဲကထွက်သော အသက်ရေစီးရာမြစ်ကို ကောင်းကင်တမန်သည် ငါ့အားပြလေ၏။ မြို့လမ်းမအလယ်၌လည်းကောင်း၊ ထိုမြစ်နှစ်ဘက်၌လည်းကောင်း အသက်ပင်ရှိ၏။ ထိုအသက်ပင်သည် အသီးတစ်ဆယ့်နှစ်မျိုးကိုသီးတတ်၏။ မိမိအသီးကိုလည်းလတိုင်းပေးတတ်၏။ အရွက်သည်လည်းလူအမျိုးမျိုးတို့၏ အနာရောဂါငြိမ်းစရာဖို့ဖြစ်၏။” “အသက်ရေ” တွင်ဘုရားသခင်၏နှုတ်ကပါဌ်တော်သမ္မာတရားနှင့် အပြစ်၊ သေခြင်းမှနလံထလာသော နာခံမှုရှိသည့်လူသားများအတွက် ယေဟောဝါ၏ပြင်ဆင်ပေးချက်အားလုံးပါဝင်ကာ ယေရှု၏ရွေးနှုတ်ဖိုးပူဇော်သက္ကာအပေါ်အခြေခံလျက် သူတို့အားထာဝရအသက်ပေးမည်။ (ဧဖက် ၅:၂၆။ ၁ ယောဟန် ၂:၁၊ ၂) မြေကြီးပေါ်တွင်ရှိစဉ်၊ ယေရှု၏ ၁၄၄,၀၀၀ သောဘိသိက်ခံနောက်လိုက်များသည် အသက်အတွက်ဘုရားရှင်၏ပြင်ဆင်ပေးချက်များကို ခရစ်တော်မှတစ်ဆင့်သောက်သုံးကြပြီး၊ သူတို့အား “ဖြောင့်မတ်ခြင်းသပိတ်ပင်” ဟုခေါ်ခဲ့ကြသည်။ (ဟေရှာယ ၆၁:၁-၃။ ဗျာဒိတ် ၁၄:၁-၅) သူတို့သည်မြေကြီးပေါ်တွင်ရှိစဉ် ဝိညာဏအသီးများစွာ သီးခဲ့ကြသည်။ ခရစ်တော်၏အနှစ်တစ်ထောင်အုပ်ချုပ်မှုအတွင်း ကောင်းကင်တွင်ရှင်ပြန်ထမြောက်သူများအနေနှင့် သူတို့သည် အပြစ်နှင့်သေခြင်းမှ “လူအမျိုးမျိုးတို့၏အနာရောဂါငြိမ်းစရာဖို့” ဖြစ်စေသည့်ရွေးနှုတ်ဖိုးပြင်ဆင်ပေးချက်ကို ဝေငှပေးကမ်းရာ၌သူတို့ပါဝင်လိမ့်မည်။

^၁၈ ဘုရားရှင်၏ဤပြင်ဆင်ပေးချက်များတွင် ကျွန်ုပ်တို့၏ယုံကြည်ခြင်းကြီးမားလေလေ ကိုယ်တော်၏ဝိညာဉ်တော်ဦးဆောင်မှုကို ခံယူလိုက်လျှောက်ရန် ပို၍အသင့်ဖြစ်လေလေဖြစ်သည်။ လူတစ်ဦးသည်ခရစ်တော်၌ ယုံကြည်ခြင်းကျင့်သုံး၍ ဝိညာဏအရတိုးတက်စဉ် ကိုယ်ခန္ဓာစုံလင်မှုကိုအမှန်ပင် ရရှိပါလိမ့်မည်။ လူတစ်ဦးသည် အံ့ဖွယ်နည်းဖြင့် အဓိကမစွမ်းသန်မှုများကို ပျောက်ကင်းစေမည်ဖြစ်သော်လည်း သူသည်မှန်ကန်ရာကိုပြုကျင့်စဉ် ပို၍စုံလင်သောအခြေအနေသို့ ဆိုက်ရောက်စေပေမည်။ သူသည်ခရစ်တော်၏ပူဇော်သက္ကာအားဖြင့် ဘုရားရှင်၏ကုသခြင်းအစီအစဉ်ကို မှန်မှန်ခံယူနေပေမည်။ ထို့ကြောင့်ကျွန်ုပ်တို့၏ ရောဂါပျောက်ကင်းမှုနှင့် ကိုယ်ခန္ဓာအရစုံလင်မှုတွင် ယုံကြည်ခြင်းသည်သြဇာလွှမ်းမိုးမည်။

“ယုံကြည်သောအားဖြင့် . . . ကယ်တင်ခြင်းသို့ရောက်ရ၏”

၁၉။ ယုံကြည်ခြင်းတွင်ခိုင်မြဲစွာရှိနေရန် အဘယ်ကြောင့်အရေးကြီးသနည်း။

^၁၉ ဘုရားသခင်၏ကမ္ဘာသစ်အရုဏ်ဦးသည် လက်ရှိဆိုးယုတ်သောကမ္ဘာ၏ မှောင်မိုက်ကိုထာဝစဉ်မဖျက်ဆီးမီတိုင်အောင် ယေဟောဝါ၏ကျေးကျွန်များသည် ယုံကြည်ခြင်းတွင်ခိုင်မြဲနေရန် မည်မျှအရေးကြီးလှပါသည်တကား။ “မယုံကြည်” သောသူများသည် ဒုတိယသေခြင်းဖြစ်သော “ကန့်နှင့်လောင်သောမီးအိုင်” ထဲသို့ချပစ်ခံရမည်။ နောက်အကျဆုံး၊ ယင်းသည်ခရစ်တော်၏အနှစ်တစ်ထောင်အုပ်ချုပ်မှုအဆုံးပိုင်း နောက်ဆုံးစမ်းသပ်ခြင်းပြီးနောက်ဖြစ်မည်။ (ဗျာဒိတ် ၂၀:၆-၁၀၊ ၂၁:၈) ဆက်လက်ယုံကြည်ခြင်းကျင့်သုံးကာ မကုန်ဆုံးနိုင်သောအနာဂတ်ကိုခံစားရန် လွတ်မြောက်သူများ၏ရလဒ်ကား မည်မျှကောင်းချီးမင်္ဂလာပါတကား။

၂၀။ ၁ ကောရိန္သု ၁၃:၁၃ သည်ခရစ်တော်၏အနှစ်တစ်ထောင်အုပ်ချုပ်ခြင်းတွင် မည်သို့အထူးအဓိပ္ပာယ်သက်ရောက်မည်နည်း။

^၂၀ ထိုအခါတွင် ၁ ကောရိန္သု ၁၃:၁၃ ရှိဤစကားများသည် အထူးသက်ရောက်ပေမည်။ “ယခုတွင်ယုံကြည်ခြင်း၊ မျှော်လင့်ခြင်း၊ ချစ်ခြင်း၊ ဤသုံးပါးတည်လျက်ရှိ၏။ ဤသုံးပါးတို့တွင်ချစ်ခြင်းမေတ္တာသည် အမြတ်ဆုံးဖြစ်သတည်း။” ထိုအခါတွင်ကမ္ဘာဦး ၃:၁၅ ရှိပရောဖက်ပြုချက်ကတိတော်သည် အမှန်တကယ်ဖြစ်လာပါမည်လော သို့မဟုတ် ပြည့်စုံလာပါမည်လောဟု ယုံကြည်မျှော်လင့်နေစရာမလိုတော့ချေ။ ယင်းသည်ဖြစ်ခဲ့ပြီးသောအရာဖြစ်မည်။ တည်ကြည်သူများအဖြစ်ကျွန်ုပ်တို့သည် ဆက်လက်၍ယေဟောဝါတွင်မျှော်လင့်ကာ၊ ဤပရောဖက်ပြုချက်ကို ပြည့်စုံစေသောသူများအဖြစ် ကိုယ်တော်နှင့်ကိုယ်တော်၏သားတော်ကိုချစ်၍ သူတို့အပေါ်ယုံကြည်သွားကြမည်။ ထို့ပြင်ကျွန်ုပ်တို့၏ကယ်တင်ခြင်းအတွက် နက်ရှိုင်းသောမေတ္တာနှင့် နှလုံးသားထဲမှကျေးဇူးတင်ခြင်းက ကျွန်ုပ်တို့အားဘုရားရှင်ထံ ထာဝစဉ်မပြတ်တောက်နိုင်သောဆက်ကပ်အပ်နှံခြင်း၌ ချည်နှောင်ထားပေမည်။—၁ ပေတရု ၁:၈၊ ၉။

၂၁။ “ယုံကြည်ခြင်းအားဖြင့် ကယ်တင်ခြင်းခံရ” ရန်ယနေ့ကျွန်ုပ်တို့ ဘာပြုလုပ်သင့်သနည်း။

^၂၁ ကိုယ်တော်၏မျက်မြင်ရအဖွဲ့အစည်းအားဖြင့် ယေဟောဝါသည်ယုံကြည်ခြင်းကို ခိုင်ခံ့စေသောထူးမြတ်လှသည့်ပြင်ဆင်ပေးချက်များ စီမံထားပေးခဲ့သည်။ ယင်းတို့အားလုံးမှ အကျိုးအပြည့်အဝခံယူပါ။ ဘုရားလူမျိုးတော်၏စည်းဝေးများတွင် မှန်မှန်တက်ရောက်ပါဝင်ပါ။ (ဟေဗြဲ ၁၀:၂၄၊ ၂၅) ကိုယ်တော်၏နှုတ်ကပါဌ်တော်နှင့် ခရစ်ယာန်စာပေများကို အပတ်တကုတ်လေ့လာပါ။ ယေဟောဝါထံ ကိုယ်တော်၏သန့်ရှင်းသောဝိညာဉ်တော်အတွက် တောင်းလျှောက်ပါ။ (လုကာ ၁၁:၁၃) အသင်းတော်တွင် နှိမ့်ချစွာဦးဆောင်နေသူများ၏ ယုံကြည်ခြင်းကိုတုပါ။ (ဟေဗြဲ ၁၃:၇) လောကသွေးဆောင်မှုများကို တွန်းလှန်ပါ။ (မဿဲ ၆:၉၊ ၁၃)မှန်ပါသည်၊ ဖြစ်နိုင်သည့်နည်းအားလုံးတွင် ယေဟောဝါနှင့်သင်၏နှစ်ကိုယ်ကြားဆက်ဆံရေးကို နက်ရှိုင်းစေပါ။ အချုပ်မှာ၊ ဆက်လက်၍ယုံကြည်ခြင်း ကျင့်သုံးပါ။ ထိုသို့ဖြစ်လျှင်သင်သည် ယေဟောဝါစိတ်တော်နှင့်တွေ့သောသူများထဲတွင် ပါဝင်နိုင်မည်ဖြစ်ပြီး၊ ကယ်တင်ခြင်းရရှိမည်။ အကြောင်းမှာပေါလုက “ယုံကြည်သောအားဖြင့် ကျေးဇူးတော်ကြောင့် ကယ်တင်ခြင်းသို့ရောက်ရ၏။ ကိုယ်အလိုအလျောက်ရောက်သည်မဟုတ်။ ဘုရားသခင်၏သနားတော်မူရာဖြစ်သတည်း” ဟုဖော်ပြခဲ့သည်။—ဧဖက် ၂:၈။

သင်၏အဖြေများကား မည်သို့နည်း

▫ ကျွန်ုပ်တို့၏ရှေ့တည့်တည့်တွင် မည်သည့်ယုံကြည်ခြင်းစမ်းသပ်မှုများ ရှိသနည်း။

▫ မည်သည့်နှစ်နည်းဖြင့် ကျွန်ုပ်တို့၏ယုံကြည်ခြင်းသည် ကျွန်ုပ်တို့အားကျန်းမာစေနိုင်သနည်း။

▫ ၁ ပေတရု ၁:၉ အရကျွန်ုပ်တို့သည်ယုံကြည်ခြင်းကို မည်မျှကြာရှည်စွာ ထိန်းသိမ်းထားရမည်နည်း။

▫ ကျွန်ုပ်တို့၏ယုံကြည်ခြင်းကို ခိုင်ခံ့စေရန်ကျွန်ုပ်တို့တွင် မည်သည့်ပြင်ဆင်ပေးချက်များရှိသနည်း။

[စာမျက်နှာ ၁၈ ပါ ရုပ်ပုံ]

ယေရှုကုသပေးခဲ့သောသူငယ်၏ဖခင်ကဲ့သို့ အသင်ကိုယ်နှိုက်ယုံကြည်ခြင်းပိုမိုလိုအပ်ကြောင်း ခံစားရပါသလော

[စာမျက်နှာ ၂၀ ပါ ရုပ်ပုံ]

“ကြီးစွာသောဒုက္ခ” ကိုလွတ်မြောက်နိုင်ရန် နောဧနှင့်သူ၏မိသားစုကဲ့သို့သောယုံကြည်ခြင်း လိုအပ်ပေမည်