ပြန်လှည့်ရန်ခြေတစ်လှမ်း

‘ဥပမာစကားကို မိန့်တော်မူသည်ကား’ ဟုအစချီပြီး ကရုဏာနှင့်ပတ်သက်၍စွဲမြဲစေသော ပျောက်သောသိုးတစ်ကောင်၊ ပျောက်သောဒ င်္ဂါး၊ အသုံးအဖြုန်းကြီးသောသားအကြောင်း ယေရှု၏မှတ်သားဖွယ်ပုံဥပမာသုံးခုကို ကျမ်းစာဆက်လက်ဖော်ပြသည်။—လုကာ ၁၅:၃-၃၂။

၁၉၉၁ ခုနှစ်၊ ဧပြီ ၁၅ ရက်ထုတ် ကင်းမျှော်စင် မဂ္ဂဇင်းပါဆောင်းပါးနှစ်ပိုဒ်တို့သည် ထိုပုံဥပမာများကို ပိုင်းခြားစိတ်ဖြာသုံးသပ်ထားပြီး ယနေ့ ကရုဏာမည်သို့တိုးချဲ့နိုင်ကြောင်းကိုသိမြင်ရန် စာရှုသူများစွာအား အကူအညီပေးခဲ့သည်။ ဝိညာဏသိုးထိန်းများသည် ကြင်နာမှုသက်ဝင်သည့်လည်ပတ်မှုကိုလက်ခံတုံ့ပြန်မည့် နှင်ထုတ်ခံထားရသူများအား စတင်အဆက်အသွယ်ပြုခြင်းကို အဓိကအာရုံစူးစိုက်စေသည်။ ဤဆောင်းပါးများနှင့် အစီအစဉ်အသစ်တို့မှ မည်သည့်အကျိုးရရှိသနည်း။

မဂ္ဂဇင်းထုတ်ဝေပြီးမကြာမီမှာပင် အမေရိကန်ပြည်ထောင်စု ဝါရှင်တန်ပြည်နယ်မှ လူတစ်ဦးက “ယေဟောဝါရဲ့ကြွယ်ဝတဲ့ချစ်ခင်ကြင်နာမှုအထောက်အထားဟာ ဒီနေ့ကျွန်တော့်စာကနေရောက်လာတယ်။ အမြင့်မြတ်ဆုံးဘုရားသခင်ထံတော်ကအစီအစဉ်နဲ့ ပြုပြင်ပြောင်းလဲမှုတွေကြောင့် အဲဒီမှာပဲ ကျွန်တော်မျက်ရည်ရွဲလည်နဲ့ နှလုံးထဲမှာဝမ်းမြောက်ဝမ်းသာဖြစ်ခဲ့ရတယ်။ အမှန်တကယ်တရားမျှတတဲ့ဘုရားသခင်သာလျှင် သိုးနဲ့တူတဲ့ပျောက်သွားတဲ့သူတွေအတွက် အကူအညီကိုပေးကမ်းနိုင်တယ်။ . . . ဟုတ်ပါတယ်။ ကျွန်တော်ဟာ နှင်ထုတ်ခံထားရပါတယ်။ ဒါပေမယ့် ပြန်လည်လက်ခံခြင်းခံရဖို့လမ်းပေါ်မှာရောက်နေပါတယ်” ဟုစာရေးသားလာသည်။ အောက်တိုဘာလတွင် သူ့အားပြန်လည်လက်ခံခဲ့သည်။

အသင်းတော်အကြီးအကဲနှစ်ဦး၏လည်ပတ်မှုကော မည်သို့နည်း။ ခရစ်ယာန်ဇနီးသည်တစ်ဦးဤသို့စာရေးသည်။ “ကျွန်မဘယ်လိုခံစားရတယ်ဆိုတာ မပြောပြတတ်အောင်ပါပဲ။ ကျွန်မယောက်ျားနှင်ထုတ်ခံထားရတာ ၁၃ နှစ်လောက်ရှိပါပြီ။ ဆောင်းပါးမှာပါတဲ့အတိုင်း အကြီးအကဲတွေသူ့ဆီလာလည်ပတ်ကြတယ်။ လွန်ခဲ့တဲ့ညက နှစ်ပေါင်းများစွာတစ်လျှောက်အတွင်း ပထမဆုံးအကြိမ်အစည်းအဝေးတစ်ခုသူတက်ရောက်ခဲ့တယ်။ အခုသူ့ဘဝကိုပြောင်းလဲပြီး ပြန်လှည့်လာဖို့ကြိုးစားနေပြီ။”

အသင်းတော်များသို့ တိုက်နယ်ကြီးကြပ်မှူးများလည်ပတ်ရာတွင်လည်း အကျိုးအမြတ်ကိုမြင်တွေ့ခဲ့ကြရသည်။ မကြာမီက တိုက်နယ်ကြီးကြပ်မှူးတစ်ဦးဤသို့စာရေးလာသည်။

“၁၉၉၁ ခုနှစ်၊ ဧပြီ ၁၅ ရက်ထုတ် ကင်းမျှော်စင် မဂ္ဂဇင်းထုတ်ဝေတုန်းက အကြီးအကဲတွေရဲ့အဆက်အသွယ်လုပ်တာကို ဘယ်လိုတုံ့ပြန်ကြမလဲလို့ လူများစွာသိချင်နေခဲ့ကြတယ်။ အဖြေကတော့ တော်တော့်ကိုထင်ရှားခဲ့ပါတယ်။

“ကျွန်တော်တို့ရဲ့တိုက်နယ်အတွင်း ကျွန်တော်နောက်ဆုံးလည်ပတ်ခဲ့တဲ့အသင်းတော်လေးခုမှာ ဘုရားသခင့်နိုင်ငံတော်ခန်းမကို ပြန်လာတဲ့သူပေါင်းကိုးယောက်ရှိတာကို တွေ့ခဲ့ရတယ်။ တစ်ယောက်ပဲပြန်လက်ခံပြီးခဲ့ပေမဲ့ ကျန်တဲ့ရှစ်ယောက်က ကောင်းကောင်းကြီးတိုးတက်နေပါတယ်။ အကြီးအကဲတွေနဲ့အသင်းတော်တွေဟာ သူတို့ရဲ့ကြိုးစားလုပ်ဆောင်မှုနဲ့ သီအိုကရက်တစ်လမ်းညွှန်မှုကိုလိုက်နာခြင်းရဲ့အသီးအပွင့်တွေကို မြင်ရဖို့စိတ်ထက်သန်နေကြတယ်။

“ဒီလိုကရုဏာပါတဲ့အစီအစဉ်ကောင်းအတွက် ကျွန်တော်တို့ဝမ်းသာကြပါတယ်။ ပြန်လက်ခံခြင်းခံရတဲ့ညီအစ်မတစ်ယောက်က ‘ယေဟောဝါရှေ့မှာ ကျွန်မဟာအပြစ်တင်ခံနေရတယ်လို့ခံစားရတဲ့အတွက် ကျွန်မကိုယ်တိုင်ပြန်လာဖို့သတ္တိမရှိခဲ့ပါဘူး။ ဒါပေမယ့် အကြီးအကဲတွေလည်ပတ်ရောက်ရှိတဲ့အခါ ကျွန်မပြန်လာနိုင်ဖို့လိုအပ်တဲ့အားပေးမှုတွေရရှိလာခဲ့တယ်’ လို့ပြောခဲ့တယ်။ သူမရဲ့စိတ်အားထက်သန်မှုဟာ အသင်းတော်အတွက် အများကြီးအားရှိစေခဲ့တယ်။”

လည်ပတ်ခံရသူအချို့မတုံ့ပြန်သည့်တိုင် ဤသို့ကရုဏာပြည့်ဝသည့်အစပြုလည်ပတ်မှုမှ ကောင်းကျိုးများသေချာပေါက်ဖြစ်ထွန်းအောင်မြင်ခဲ့သည်။ ထို့ကြောင့် စက်တင်ဘာလမှစ၍ အသင်းတော်တစ်ခုစီရှိအကြီးအကဲများသည် မိမိတို့ရပ်ကွက်အတွင်းရှိ နှင်ထုတ်ခံထားရသူများ၏အမည်များကို ပြန်လည်စစ်ဆေးပြီး ကရုဏာတိုးချဲ့မှုအစီအစဉ်ကို လက်ခံတုံ့ပြန်မည်ဟုသူတို့ယူဆသည့်သူများထံ လည်ပတ်ရန်စီစဉ်ကြမည်။