မိုက်ခရိုနီးရှား—မှ သာသနာပြုများ

အဆုံးအစရှိဟန်မတူသည့် ပစိဖိတ်သမုဒ္ဒရာကြီးကာဆီးမှုကြောင့် တသီးတခြားဖြစ်နေသော်လည်း မိုက်ခရိုနီးရှားမှသာသနာပြုများသည် နှစ်စဉ် “မိသားစုပြန်လည်ပေါင်းစည်းရေး” တွေ့ဆုံမှုကို ကျင်းပမြဲဖြစ်သည်။ နေရာအနှံ့ရှိကျွန်းများမှ သတင်းကောင်းဟောပြောသူများသည် မည်သည့်အရပ်တွင်ဆုံတွေ့ကြသနည်း။ ဒေသခံအစိုးရက ဆီလျော်စွာပင် ယေဟောဝါလမ်းဟုအမည်ပေးထားသော ဂူအမ်ဌာနခွဲရုံးရှိရာနေရာတွင် စုရုံးကြခြင်းဖြစ်သည်။

၁၉၉၂ ခုနှစ်ဇွန်လတွင် သာသနာပြု ၅၆ ဦးတို့သည် “အလင်းဆောင်သူများ” ခရိုင်စည်းဝေးပွဲကိုတက်ရောက်ကြရန် ဌာနခွဲတွင်စုဆုံကြသည်။ မိတ်ဟောင်းဆွေဟောင်းများပြန်လည်တွေ့ဆုံသည်နှင့်အတူ လူသစ်များကိုလည်း အားပေးတည်ဆောက်ကြရင်း ရယ်မောသံများနှင့် အားတက်သရောစကားပြောဆိုသံများဖြင့် အုတ်အုတ်ကျက်ကျက်ဖြစ်နေသည်။ ခါတိုင်းကဲ့သို့ပင် စည်းဝေးခန်းမလှေခါးတွင်စီတန်းကာ ဓာတ်ပုံရိုက်ကြပြီး စားပွဲရှည်သုံးခုတွင် နှစ်ပတ်လည်သာသနာပြုစားသောက်ပွဲကိုကျင်းပရာ ဤနှစ်တွင် အုပ်ချုပ်ရေးအဖွဲ့ဝင် အဲလ်ဘတ်ရှရိုဒါ၏လည်ပတ်ခြင်းဖြင့် မှတ်မှတ်ရရဖြစ်စေသည်။

သာသနာပြုများစွာအတွက် ယခုကဲ့သို့ ဂူအမ်တွင် နှစ်ပတ်လည်ဆုံတွေ့ခြင်းသည် သူတို့၏သေးကွေးသော အပူပိုင်းဇုံနေရင်းဒေသများမှထွက်ရန် တစ်ခုတည်းသောအခွင့်အရေးဖြစ်သည်။ အမှန်ပင်သေးကွေးပါသည်။ မာရှယ်ကျွန်းစုအဝင်ဖြစ်သော အီဘီကျွန်းသည် ၇၈ ဧကသာကျယ်သည်။ မာရှယ်ကျွန်းစုရှိ မဂျူရိုသာသနာပြုအိမ်နှင့် ဂေးလ်ဘတ်ကျွန်းစုရှိ ကီရီဘာတီအိမ်နှစ်ခုလုံးတို့သည် မိုင်ဝက်ခန့်မျှပင်မကျယ်တတ်သော ရှည်မျောမျောသန္တာကျွန်းကလေးပေါ်တွင် တည်ရှိခြင်းဖြစ်သည်။ ထို့ကြောင့် ဂူအမ်သို့သွားရခြင်းသည် သာသနာပြုများအတွက် စိတ်တက်ကြွမှုအဖြစ်ဆုံးခရီးဖြစ်သည်။

ဝေးလံသည့်အပူပိုင်းဇုံကျွန်းများတွင် ဟောပြောရခြင်းသည် ဆွဲဆောင်မှုဖြစ်မည်ဟုထင်မှတ်ရသော်လည်း လက်တွေ့တွင်မူ ရင်ဆိုင်စရာစိန်ခေါ်မှုအနည်းငယ်ရှိသည်။ စိတ်ဝင်စားဖွယ်ကား သာသာနာပြု ၅၆ ဦးထဲမှ ၇ ဦးသာလျှင် ဂိလဒ်ကင်းမျှော်စင်ကျမ်းစာကျောင်းမှ ဖြစ်ကြသည်။ အများစုသည် ဟာဝိုင်ယီကျွန်း သို့မဟုတ် ဖိလစ်ပိုင်မှလာကြသည့် အပူပိုင်းဇုံတွင်နေသားကျနေသော ရှေ့ဆောင်များဖြစ်ကြသည်။ သူတို့သည် နေရင်းဒေသမှ သာသနာပြုခန့်အပ်ခံဒေသသို့ တိုက်ရိုက်သွားခဲ့သူများဖြစ်ကြသည်။

မိုက်ခရိုနီးရှားကျွန်းစုသည် အီကွေတာနှင့်အလွန်နီးကပ်သောကြောင့် မွန်းကြပ်သည့်ပူအိုက်စွတ်စိုမှုဒဏ်ကိုတွန်းလှန်ရင်း သာသနာပြုများသည် ကျွန်းသားများထံ သတင်းကောင်းရောက်အောင် ကြိုးစားကြသည်။ ဆက်သွယ်မှုသည် ကြီးမားသည့်စိန်ခေါ်မှုကြီးတစ်ခုဖြစ်သည်။ ကျွန်း သို့မဟုတ် ကျွန်းစုတစ်ခုတွင် ဘာသာစကားတစ်မျိုးစီရှိကြသည်။ အချို့ကျွန်းများသည် အဘိဓာန်များတွင်မှတ်သားခြင်းမခံရသည့်အထိ အလွန်သေးငယ်ကြသည်။ လူသစ်တစ်ဦးအဖို့ သွက်သွက်လက်လက်စကားပြောနိုင်ရန်မှာ နှစ်နှင့်ချီ၍ပင်ကြာနိုင်သည်။ အမျိုးမျိုးကွဲပြားနေသောယဉ်ကျေးမှုများအောက်ရှိလူများကို ကျမ်းစာအသိပညာနားလည်အောင်အကူအညီပေးရန် ဂူအမ်ဌာနခွဲမှ ဘာသာစကား ၁၁ မျိုးဖြင့် စာပေများထုတ်ဝေပြီး ယင်းတို့မှ ၉ မျိုးသည် မိုက်ခရိုနီးရှားတွင်သာ ပြောဆိုသောဘာသာစကားများဖြစ်သည်။

အချို့ကျွန်းများသည် အလွန်ဝေးလံရကား သင်္ဘောဖြင့်သာသွားလာနိုင်သည်။ ရွှတ်ခ် (ထရွတ်ခ်) ကျွန်းစုရှိ တိုးလ်သာသနာပြုအိမ်သည် ထိုကဲ့သို့သောကျွန်းမျိုးပေါ်တွင်တည်ရှိပြီး ထိုတွင်ရှိသောသာသနာပြုများသည် နေ့စဉ်နာရီအနည်းငယ်ခန့် လျှပ်စစ်ဓာတ်အားထုတ်လုပ်ပေးနိုင်သော နေရောင်ခံပြားများကို မှီတင်းနေထိုင်ကြသည်။

မိုက်ခရိုနီးရှားတစ်ခွင်တွင် သာသနာပြုအိမ်ပေါင်း ၁၄ အိမ်ရှိပြီး ယင်းသည် အကြမ်းအားဖြင့် အမေရိကန်ပြည်ထောင်စုခန့်ရှိသည့်ဒေသကို ဝန်းရံနိုင်သည့်အတိုင်းအတာဖြစ်သည်။ ထိုဒေသတွင် နေထိုင်သူ ၄၀၀,၀၀၀ ကျော်အနက် ၁,၀၀၀ မှာ အသင်းတော် ၂၀ နှင့် သီးခြားအုပ်စုသုံးစုခွဲထားသော သတင်းကောင်းကြေညာသူများဖြစ်ကြသည်။

မိုက်ခရိုနီးရှားရှိလူများသည် အများအားဖြင့် ဖော်ရွေမှုရှိကြသော်လည်း ဒေသန္တရဘာသာရေးထုံးတမ်းများနှင့် မိသားစုတွင်းဖိစီးမှုများက ဘုရားသခင့်နိုင်ငံတော်သတင်းကောင်းကိုလက်ခံရန် လူအများအားအဟန့်အတားဖြစ်စေသည်။ ထို့ကြောင့် ဟောပြောခြင်းလုပ်ငန်းသည် နေရာအနှံ့တွင် သီးပွင့်နေသည့်တိုင် (ထိုဘုရားသခင့်နိုင်ငံတော်ကြေညာသူ ၁,၀၀၀ တို့သည် အများဆုံးကျမ်းစာသင်အံမှု ၂,၀၀၀ ကျင်းပနေကြသည်) အချို့သောအသင်းတော်များနှင့် အုပ်စုများသည် ခပ်ငယ်ငယ်လေးသာဖြစ်ကြသည်။ ဥပမာအားဖြင့် တီနီယံကျွန်းပေါ်တွင် ကြေညာသူ ၅ ယောက်၊ နော်ရူးကျွန်းပေါ်တွင် ကြေညာသူ ၇ ယောက်၊ ယာ့ပ်၊ ကော့စ္စရီနှင့် ရိုတာကျွန်းများတွင် ကြေညာသူ ၄၀ ခန့်စီသာရှိကြသည်။ သို့ရာတွင် အချို့သာသနာပြုများသည် နှစ်ပေါင်း ၂၀ ကျော်ထိ မိမိတို့ခန့်အပ်ခံရသည့်တာဝန်ကို ထမ်းဆောင်လာခဲ့ကြပြီ။ မှတ်သားစရာကား ဘလိုကျွန်းသို့ရောက်နေသော သာသနာပြုခြောက်ဦးသည် ထိုတွင် ၁၂ နှစ်ကျော်ပင်ရှိချေပြီ။

ကြံ့ကြံ့ခံသူများအတွက် ဆုလာဘ်ကား ကြီးမားလှသည်။ ယေဟောဝါ၏ဖန်ဆင်းရာများကို တအံ့တသြကြည့်မြင်ရသည့်အခွင့်အရေးကို နေ့စဉ်ခံစားကြရသည်။ စိမ်းလန်းစိုပြည်သော မိုက်ခရိုနီးရှား၏ကျွန်းများသည် အပြာရောင်နောက်ခံပစိဖိတ်သမုဒ္ဒရာကြီးတွင် ပြန့်ကြဲနေသော အစိမ်းရောင်ရတနာများနှင့်ပင် တူတော့သည်။ မိုင်ပေါင်းများစွာရှည်သည့် လူသူကင်းရှင်းသောပင်လယ်ကမ်းခြေနှင့် သန္တာကျောက်တန်းများ၊ ရောင်စုံငါးများတို့က ရေငုပ်ဝါသနာပါသူများအား ကမ္ဘာတွင် အကောင်းဆုံးရေငုပ်အားကစားနည်းများကို စူးစမ်းရန် ဆွဲဆောင်လျက်ရှိသည်။ တစ်နေ့တာကုန်ဆုံးသွားတိုင်း ပင်လယ်ပြင်ထဲသို့ နေမင်းကြီးငုပ်လျှိုးပျောက်ကွယ်သွားသည့်မြင်ကွင်းမှာ ရင်သပ်ရှုမောဖွယ်ရာပင်ဖြစ်သည်။

မည်သို့ဆိုစေ အကြီးမြတ်ဆုံးဆုလာဘ်မှာ အခြားသူများကို အနာဂတ်နှင့်ဆိုင်သော ယေဟောဝါ၏အံ့ဖွယ်ကတိတော်များအကြောင်းပြောပြခြင်းအားဖြင့် ကိုယ်တော်အားအမှုဆောင်ရသည့်အခွင့်ထူးပင်ဖြစ်သည်။ မိုက်ခရိုနီးရှားရှိသာသနာပြုများသည် ထိုဆုလာဘ်ကိုရယူရန် အမြဲအားထုတ်ကြသောကြောင့် သူတို့သည် “ကျွန်းကြီးကျွန်းငယ်များ၌ ထာဝရဘုရား [ယေဟောဝါ၊ ကဘ] ၏ဘုန်းတော်ဂုဏ်တော်ကို ဖော်ပြချီးမွမ်းကြစေ” ဟူသောဟေရှာယ ၄၂:၁၂ (သမ) ပါစကားများအတိုင်း အသက်ရှင်နေကြသည်။

[စာမျက်နှာ ၃၁ ပါ မြေပုံ/ရုပ်ပုံ]

(ကားချပ်အပြည့်အစုံကို စာစောင်တွင်ကြည့်ပါ)

ဖိလစ်ပိုင်

ကိုရို၊ ဘလို

ယာ့ပ်

အီကွေတာ

စပိန်

စောင်းစောင်း၊ ရိုတာ

ဘာရီဂါဒါ၊ ဂူအမ်

စဲန်တာရီတာ၊ ဂူအမ်

ရွှတ်ခ် (ထရွတ်ခ်) ကျွန်းစု

ကိုလိုနီးယား၊ ပွန်ပေး

ကော့စ္စရီ

အီဘဲဗီး

မာရှယ်ကျွန်းစု

မဂျူရို

တာရဝါး၊ ကီရီဘာတီ

နယူးဂီနီ

ပစိဖိတ်သမုဒ္ဒရာ

မိုက်ခရိုနီးရှား

ကယ်ရလိုင်းကျွန်းစု

မယ်လနီးရှား

[ရုပ်ပုံ]

၁၉၉၂ ဇွန်လတွင် သာသနာပြုများ ဂူအမ်တွင်စုရုံးကြ