“ကျွန်တော် ဒါမျိုးတစ်ခါမှမမြင်ဖူးဘူး!”

၁၉၉၃ ခုတွင် အာဂျင်တီးနားနိုင်ငံရှိ ကင်းမျှော်စင်အသင်းရုံးသည် ချီလီနိုင်ငံ၊ စံတီယားဂိုးမြို့တွင် လေးရက်ကြာကျင်းပမည့် ယေဟောဝါသက်သေများ၏ “မြင့်မြတ်သောသွန်သင်ခြင်း” ခရိုင်စည်းဝေးပွဲကြီးသို့ ကိုယ်စားလှယ်တစ်ထောင်စေလွှတ်ရန် ခေါ်ဖိတ်ခံခဲ့ရသည်။ ယင်းသည် အာဂျင်တီးနားရှိသက်သေခံများအတွက် နိုင်ငံခြားတွင်ကျင်းပသောစည်းဝေးပွဲကြီးသို့ ကြီးမားသောအုပ်စုလိုက်တက်ရောက်ရန် ပထမဆုံးအကြိမ်ခေါ်ဖိတ်ခံရခြင်းဖြစ်သည်။a တုံ့ပြန်မှုကား မည်သို့နည်း။ လျှောက်လွှာပေါင်း ၈,၅၀၀ ကျော်စုပြုံရောက်ရှိလာရာ ကိုယ်စားလှယ် ၁,၀၃၉ ယောက် ရွေးချယ်ခံရသည်။

ဘွဲနိုစ်အေရီစ်မှ စံတီယားဂိုးအထိ မိုင်ပေါင်း ၈၇၀ ရှည်လျားသောခရီးစဉ်အတွက် ဘတ်စကားပေါင်း ၁၄ စီးကို ငှားရမ်းကြသည်။ ၂၆ နာရီကြာမြင့်သောခရီးစဉ်ကို အလွန်လှပသောရှုခင်းက တန်ဆာဆင်သည်။ အင်ဒီးစ်တောင်တန်းများကို ဖြတ်ကျော်စဉ် ကိုယ်စားလှယ်များသည် အနောက်ကမ္ဘာခြမ်းတွင် အမြင့်ဆုံးဖြစ်သော ၂၂,၈၃၄ ပေမြင့်သည့် အကန်ကာဂွာတောင်အနီးမှ ဖြတ်သွားကြသည်။ အထူးအမှတ်တရဖြစ်စရာမှာ ချီလီနိုင်ငံထဲသို့ မတ်စောက်ပြီး ကွေ့ကွေ့ကောက်ကောက်ဆင်းသွားရခြင်းဖြစ်သည်။ ယာဉ်မောင်းသူများသည် အန္တရာယ်များသော ပထဝီအနေအထားထူးခြားသည့်ဒေသကို ကျွမ်းကျင်စွာ ကျော်ဖြတ်မောင်းနှင်နိုင်ခဲ့ခြင်းအတွက် ရှည်လျားသည့်လက်ခုပ်သြဘာပေးမှုကို ရရှိခဲ့ကြပါသည်တကား!

သို့သော် အလှပဆုံးမြင်ကွင်းကို စည်းဝေးပွဲကြီးတွင် တွေ့မြင်ရမည်ဖြစ်သည်။ လူမျိုးရေးပဋိပက္ခနှင့် လူမျိုးစုများစပ်ကြား တင်းမာမှုဖြစ်နေသည့်ဝန်းကျင်တွင် နိုင်ငံ ၂၄ နိုင်ငံမှ စည်းလုံးညီညွတ်သည့် လူ ၈၀,၀၀၀ ရှိအုပ်စုကြီးကိုမြင်ရခြင်းက မည်မျှလန်းဆန်းကြည်နူးဖွယ်ဖြစ်လိုက်လေခြင်း—မှန်ပေစွ၊ အပြည်ပြည်ဆိုင်ရာ ညီအစ်ကိုများအသင်းအပင်းပါတကား! စည်းဝေးကြီးတက်ရောက်သူများစပ်ကြားရှိ စည်းလုံးညီညွတ်မှုကို မျက်ဝါးထင်ထင်တွေ့မြင်လိုက်ရသောကြောင့် ယာဉ်မောင်းသူအချို့တို့သည် ယေဟောဝါသက်သေတို့၏အကြောင်းကို တိုး၍လေ့လာလိုသည့် စိတ်ဝင်စားမှုများကို တင်ပြလာကြသည်။ သူတို့ထဲမှတစ်ဦးက “ကျွန်တော်ဒါမျိုးတစ်ခါမှမမြင်ဖူးဘူး!” ဟု အာမေဍိတ်သံထွက်သွားသည်။

[အောက်ခြေမှတ်ချက်များ]