သင့်ဆုတောင်းချက်များကို မည်သို့အရည်အသွေးတိုးတက်စေနိုင်သနည်း

ယေဟောဝါဘုရားသခင်၏ မေတ္တာပါပြင်ဆင်ပေးချက်များတွင် ဆုတောင်းခြင်းသည် သူမတူထူးခြားသည်။ ဆန့်ကျင်သူများက သင့်ကျမ်းစာကို သိမ်းယူမည် သို့မဟုတ် ဝတ်ပြုသူချင်းများနှင့် စည်းဝေးခြင်းကို တားဆီးပေမည်။ သို့သော် သင့်ဆုတောင်းခြင်းကိုမူ မည်သူတစ်ဦးတစ်ယောက်မျှ တားဆီးပိတ်ပင်နိုင်မည်မဟုတ်ချေ။ ဆုတောင်းခြင်း၏တန်ဖိုးကို ပြောမကုန်နိုင်ပေ။ ယင်းကို ကျွန်ုပ်တို့တစ်ဦးစီမြတ်နိုးပြီး ဤအခွင့်ထူးမှ အကျိုးအပြည့်အဝရယူရန် အလွန်အရေးကြီးသည်။ သင့်ဆုတောင်းချက်များကို အရည်အသွေးတိုးတက်စေရန် မည်သည့်အရာက ထောက်ကူနိုင်သနည်း။

ကျမ်းစာသည် ဆုတောင်းစာအုပ် မဟုတ်ပါ။ သို့တိုင် ယင်းကို လူသားတို့၏ အကြီးကျယ်ဆုံးသော ဆုတောင်းပြဋ္ဌာန်းစာအုပ်အဖြစ်ဖော်ပြနိုင်သည်။ ဟေဗြဲကျမ်းစောင်များအပိုင်းတစ်ခုတည်းတွင် ဆုတောင်းချက်ပေါင်း ၁၅၀ ကျော်ပါဝင်သည်။ တချို့ကတိုသည်; အခြားမှာမူ ရှည်သည်။ ယင်းတို့ကို လူထုအနေနှင့် သို့မဟုတ် တစ်ဦးချင်းအနေဖြင့်သော်လည်းကောင်း၊ ဘုရင်များ သို့မဟုတ် သုံ့ပန်းများအားဖြင့်သော်လည်းကောင်း၊ အောင်ပွဲခံခြင်းတွင် သို့မဟုတ် ဒုက္ခရောက်သည့်အခါတွင်လည်းကောင်း ရွတ်ဆိုကြသည်။ ဆာလံ ၆၅:၂ တွင် ဒါဝိဒ်သီဆိုခဲ့သကဲ့သို့ “ပတ္ထနာစကားကို နားထောင်တော်မူသော” ယေဟောဝါထံတော်သို့ “လူသားအပေါင်းတို့” လှည့်လာကြသည်။ ဘုရားသခင်သည် ကျမ်းရေးသူများအား ဤမျှများပြားလှသော လက်ရွေးစင်ဆုတောင်းချက်များကို မှတ်တမ်းတင်ရန် အဘယ့်ကြောင့် မှုတ်သွင်းလှုံ့ဆော်ခဲ့သနည်း။

ဤမေးခွန်းကို ဖြေဆိုရန် ၂ တိမောသေ ၃:၁၆ (ကဘ) ကိုဆင်ခြင်ကြည့်ပါ။ ယင်းက ဤသို့ဆိုသည်– “ကျမ်းစာရှိသမျှသည် ဘုရားသခင်ဝိညာဉ်တော်မှုတ်သွင်းထား၍ . . . အကျိုးရှိ၏။” သို့ဖြစ်၍ ကျွန်ုပ်တို့ကို လမ်းပြညွှန်ကြားရန် ကျမ်းစာပရောဖက်ပြုချက်၊ ကျင့်ဝတ်မူများနှင့် ရာဇဝင်မှတ်တမ်းကို ထားရှိသကဲ့သို့ ကျမ်းစာဆုတောင်းချက်များကိုလည်း ဤတွင်မှတ်တမ်းတင်ထားခြင်းဖြစ်သည်။ ဤဆုတောင်းချက်များသည် ကျွန်ုပ်တို့အတွက် မည်သို့အကျိုးရှိနိုင်သနည်း။

ကျမ်းစာဆုတောင်းချက်များကို အနီးကပ်ကြည့်ရှုခြင်းအားဖြင့် ကျွန်ုပ်တို့ကိုယ်တွေ့အခြေအနေများနှင့် ဆင်တူသည့် အခြေအနေများအောက်တွင် ယင်းတို့ကိုပြောဆိုခဲ့ကြကြောင်း သိရှိနိုင်သည်။ ကျွန်ုပ်တို့သည် ရည်ရွယ်ချက်အမျိုးမျိုး စကားလုံးသီကုံးပုံအဖုံဖုံဖြင့် ဆုတောင်းကြပုံများကို လေ့လာနိုင်သည်။ ထို့အပြင် ကျွန်ုပ်တို့သည် ချီးမွမ်းခြင်းနှင့် ကျေးဇူးတင်ခြင်း အသုံးအနှုန်းသစ်များကို တွေ့ရှိနိုင်ပြီး ကျွန်ုပ်တို့၏တိုးလျှိုးတောင်းခံခြင်းနှင့် အသနားခံပန်ကြားခြင်းအတွက် ထူးခြားပေါ်လွင်သော စကားလုံးများကို တွေ့ရှိမည်ဖြစ်သည်။ အတိုချုပ်အနေနှင့် ကျမ်းစာဆုတောင်းချက်များသည် ကျွန်ုပ်တို့ကိုယ်ပိုင်ဆုတောင်းချက်များကို အရည်အသွေးတိုးတက်စေရန် ထောက်ကူနိုင်ပေသည်။

ယေရှု၏မိခင်ဖြစ်လာသူ မာရိသည် ကျမ်းစာတွင်မှတ်တမ်းတင်ထားသည့် ဆုတောင်းချက်တစ်ခုတွင် အသုံးပြုထားသော အသုံးအနှုန်းများမှ အကျိုးရရှိခဲ့သူတစ်ဦးဖြစ်ပုံရသည်။ ဘုရားသခင့်အထောက်အမဖြင့် သူမတို့ကိုယ်စီ သားတစ်ယောက်စီကို ကိုယ်ဝန်ဆောင်ပြီးနောက်ပိုင်း သူမသည် အမျိုးတော်စပ်သူ ဧလိရှဗက်ထံ အလည်သွားခဲ့သည်။ မာရိသည် ဘုရားသခင်ကို ချီးမွမ်းကျေးဇူးတင်ကြောင်းဖော်ပြခဲ့ရာ သူမ၏စကားတချို့သည် ဟေဗြဲကျမ်းစောင်များတွင်ရှိ ဆုတောင်းချက်တစ်ခုပါ စကားများနှင့် တူညီနေသည်မှာ မှတ်သားဖွယ်ရာဖြစ်သည်။ မာရိသည် ပရောဖက်ရှမွေလ၏မိခင် ဟန္နရွတ်ခဲ့သည့် ဆုတောင်းချက်နှင့် အကျွမ်းတဝင်ရှိပုံရသည်။ နှစ်ပေါင်း ၁,၀၀၀ အထက်ကျော်ကာလပိုင်းက ဟန္နသည်လည်း ဘုရားသခင့်အကူအညီဖြင့် သားတစ်ယောက်ကို ကိုယ်ဝန်ဆောင်ခဲ့ရသည်။ မာရိသည် မိမိ၏ခံစားချက်များကို ယင်းက ထင်ဟပ်စေသောကြောင့် ဤဆုတောင်းချက်ကို စဉ်းစားတွေးတောနိုင်ခဲ့ခြင်းလော။—၁ ဓမ္မရာဇဝင် ၂:၁-၁၀; လုကာ ၁:၄၆-၅၅။

အသင်ကော အသို့နည်း။ သင်ကိုယ်တိုင် ထပ်တူအခြေအနေအောက်တွင် ကျမ်းဆိုင်ရာဆုတောင်းချက်တစ်ခုကို ပြန်သတိရနိုင်ပါသလော။ ဤကဲ့သို့သော ဆုတောင်းချက်မျိုးကို တွေ့ရှိခြင်း၊ ဖတ်ရှုခြင်းနှင့် တွေးတောဆင်ခြင်ခြင်းသည် ဘုရားသခင်နှင့် သင့်ဆက်ဆံရေးကို အရည်အသွေးတိုးတက်ကောင်းမွန်စေရန် ထောက်ကူပါလိမ့်မည်။ နောက်ဆောင်းပါးတွင် သမ္မာကျမ်းစာမှ ဆုတောင်းချက် သုံးခုကို ဆင်ခြင်သုံးသပ်ကြရန် သင့်အား ကျွန်ုပ်တို့ဖိတ်ခေါ်ပါသည်။ ယင်းတို့ကို သင်နှင့်ဆင်တူကောင်းတူမည့် ခြားနားသောအခြေအနေများအောက်တွင် တောင်းခိုင်းခြင်းဖြစ်သည်။