“အလွန်တောင့်တမျှော်လင့်လျက်” စောင့်နေခြင်း

“ဖန်ဆင်းတော်မူသောအရာများသည် ဘုရားသခင့်သားတို့၏ပေါ်ထွန်းခြင်းကို အလွန်တောင့်တမျှော်လင့်လျက်စောင့်နေကြ၏။”—ရောမ ၈:၁၉၊ သမ္မာ။

၁။ ယနေ့ခရစ်ယာန်များ၏အခြေအနေနှင့် ပထမရာစုရှိခရစ်ယာန်များ၏အခြေအနေသည် အဘယ်နည်းဖြင့်ဆင်တူသနည်း။

ယနေ့ စစ်မှန်သောခရစ်ယာန်များ၏အခြေအနေသည် ပထမရာစုခရစ်ယာန်များ၏အခြေအနေနှင့်ဆင်တူ၏။ မေရှိယပေါ်ထွန်းချိန်ကိုခွဲခြားသိမြင်ရန် ထိုခေတ်ရှိခရစ်ယာန်များအား ပရောဖက်ပြုချက်တစ်ခုကထောက်ကူခဲ့သည်။ (ဒံယေလ ၉:၂၄-၂၆) ထိုပရောဖက်ပြုချက်က ယေရုရှလင်မြို့ပျက်စီးမည့်အကြောင်း ကြိုဟောထားသော်လည်း ထိုမြို့ပျက်စီးမည့်အချိန်ကိုမူ ခရစ်ယာန်များအား ကြိုတင်သိရှိစေနိုင်သည့် အချက်များမပါရှိခဲ့ချေ။ (ဒံယေလ ၉:၂၆ခ၊ ၂၇) အလားတူစွာ ပရောဖက်ပြုချက်တစ်ခုသည် ၁၉ ရာစုရှိ စိတ်ရင်းမှန်သော ကျမ်းစာကျောင်းသားများကို စောင့်မျှော်နေစေခဲ့သည်။ ဒံယေလ ၄:၂၅ ပါ “ခုနစ်ကာလ” နှင့် “တစ်ပါးအမျိုးသားတို့ . . . အချိန်ကာလ” ကိုဆက်စပ်ခြင်းအားဖြင့် ခရစ်တော်သည် ၁၉၁၄ ခုနှစ်တွင် ဘုရားသခင့်နိုင်ငံတော်အာဏာရရှိလိမ့်မည်ဟု မှန်းဆနိုင်ခဲ့ကြသည်။ (လုကာ ၂၁:၂၄; ယေဇကျေလ ၂၁:၂၅-၂၇) ဒံယေလကျမ်းတွင် ပရောဖက်ပြုချက်များစွာပါရှိသော်လည်း ယင်းတို့အနက်တစ်ခုမျှ စာတန့်စနစ်တစ်ခုလုံးပျက်စီးမည့်အချိန်ကို မျက်မှောက်ခေတ်ကျမ်းစာကျောင်းသားများ တိကျစွာတွက်ချက်နိုင်ရန် အထောက်အကူမပြုပါ။ (ဒံယေလ ၂:၃၁-၄၄; ၈:၂၃-၂၅; ၁၁:၃၆၊ ၄၄၊ ၄၅) သို့ရာတွင် ကျွန်ုပ်တို့သည် ‘ဆုံးခန်းကာလ’ တွင်အသက်ရှင်နေကြသောကြောင့် ထိုအမှုသည် မကြာခင်ဖြစ်ပျက်တော့မည်ဖြစ်သည်။—ဒံယေလ ၁၂:၄။a

ခရစ်တော်ရောက်ရှိနေခြင်းအတွင်း သတိရှိခြင်း

၂၊ ၃။ (က) ဘုရင်အာဏာဖြင့် ခရစ်တော်ရောက်ရှိနေခြင်းကာလတွင် ကျွန်ုပ်တို့အသက်ရှင်နေကြကြောင်း အဘယ်အချက်ကအဓိကသက်သေထူသနည်း။ (ခ) ခရစ်ယာန်များသည် ယေရှုခရစ်ရောက်ရှိနေခြင်းအတွင်း သတိနှင့်ဆက်စောင့်နေရမည်ဖြစ်ကြောင်း အဘယ်အချက်ကပြသနည်း။

^၂ မှန်ပါသည်၊ ၁၉၁၄ ခုနှစ်တွင် ခရစ်တော်သည် [ဘုရားသခင့်] နိုင်ငံတော်အာဏာအပ်နှင်းမခံရမီ ပရောဖက်ပြုချက်တစ်ခုက ခရစ်ယာန်များကိုမျှော်တလင့်လင့်ရှိစေခဲ့သည်။ သို့သော် ခရစ်တော်ပေးခဲ့သော မိမိရောက်ရှိနေခြင်းနှင့် အစီအစဉ်စနစ်ဆုံးခန်းဆိုင်ရာ “နိမိတ်” တွင်ဖြစ်ရပ်မှန်များပါဝင်သည်။ ယင်းတို့အနက်အများစုကို ကိုယ်တော်ရောက်ရှိခြင်းစတင်ပြီးနောက်တွေ့ရမည်ဖြစ်သည်။ ထိုအဖြစ်အပျက်များ—စစ်၊ အစာခေါင်းပါးမှု၊ မြေငလျင်၊ ရောဂါ၊ တိုးပွားနေသောမတရားမှု၊ ခရစ်ယာန်များကိုနှိပ်စက်ညှဉ်းပန်းခြင်းနှင့် ဘုရားသခင့်နိုင်ငံတော်သတင်းကောင်းကို ကမ္ဘာချီဟောပြောခြင်းတို့—က ယနေ့ ကျွန်ုပ်တို့သည် ဘုရင့်အာဏာဖြင့် ခရစ်တော်ရောက်ရှိနေခြင်းကာလတွင် အသက်ရှင်နေကြကြောင်းကို အဓိကသက်သေထူသည်။—မဿဲ ၂၄:၃-၁၄; လုကာ ၂၁:၁၀၊ ၁၁။

^၃ သို့တိုင် တပည့်တော်များအတွက် ယေရှု၏ခွဲခွာခါနီးနှုတ်ဆက်စကားသံသည် “စောင့်နေကြလော့၊ နိုးနိုးကြားကြားရှိကြလော့။ . . . သတိနှင့်စောင့်နေကြလော့” ဟူ၍ဖြစ်ခဲ့သည်။ (မာကု ၁၃:၃၃၊ ၃၇၊ သတင်းကောင်း; လုကာ ၂၁:၃၆) သတိရှိနေရန် ဤတိုက်တွန်းချက်၏ရှေ့နောက်စကားများကို အသေအချာဖတ်ရှုပါက ခရစ်တော်သည် မိမိစတင်ရောက်ရှိနေခြင်း၏နိမိတ်ကို သတိနှင့်စောင့်နေရန်အဓိကပြောနေခြင်းမဟုတ်ကြောင်း ဖော်ပြသည်။ ယင်းအစား မိမိရောက်ရှိနေခြင်းအတွင်း သတိနှင့်စောင့်နေရန် စစ်မှန်သောတပည့်တော်များကို မိန့်မှာနေခြင်းဖြစ်သည်။ အဘယ်အရာအတွက် စစ်မှန်သောခရစ်ယာန်များ သတိနှင့်စောင့်နေကြရမည်နည်း။

၄။ ယေရှုပေးခဲ့သောနိမိတ်အားဖြင့် အဘယ်အရာကိုသိရှိရမည်နည်း။

^၄ ‘ထိုအမှုအရာ [ဂျူးစနစ်ပျက်စီးခြင်းသို့ ဦးတည်သည့်ဖြစ်ရပ်များ] တို့သည် အဘယ်အချိန်တွင်ဖြစ်ပြီး ကိုယ်တော်၏ရောက်ရှိနေခြင်းနှင့် ဤစနစ်ဆုံးခန်း၏နိမိတ်သည် အဘယ်နိမိတ်ဖြစ်မည်နည်း’ ဟူသောမေးခွန်းကိုဖြေဆိုရာ၌ ယေရှုသည် မဟာပရောဖက်ပြုချက်ကိုမိန့်တော်မူခဲ့သည်။ (မဿဲ ၂၄:၃၊ ကဘ) ကြိုဟောထားသောနိမိတ်သည် ခရစ်တော်ရောက်ရှိနေခြင်းကိုသာမက လက်ရှိစနစ်ဆိုး၏ဆုံးခန်းသို့ဦးတည်စေသည့် အဖြစ်အပျက်များကိုလည်း ဖော်ပြပေမည်။

၅။ ဝိညာဉ်ရေးအရရောက်ရှိနေစဉ် ကိုယ်တော် “ကြွလာ” ရလိမ့်ဦးမည်ဖြစ်ကြောင်း ယေရှုမည်သို့ဖော်ပြခဲ့သနည်း။

^၅ ယေရှုက ကိုယ်တော့် “ရောက်ရှိနေခြင်း” (ဂရိ၊ ပါရိုစီးယား) အတွင်း ဘုန်းတန်ခိုးဖြင့်ကြွလာမည်ဖြစ်ကြောင်း ဖော်ပြခဲ့သည်။ အဆိုပါ “ကြွလာခြင်း” (ဂရိဝေါဟာရအဲရ်ခိုမိုင်၏ပုံစံများကဖော်ပြ) နှင့်ပတ်သက်၍ ကိုယ်တော်ဤသို့ဖော်ပြသည်– “ထိုအခါ လူသား၏နိမိတ်လက္ခဏာသည် ကောင်းကင်၌ထင်ရှားလိမ့်မည်။ မြေကြီးပေါ်မှာ လူအပေါင်းတို့သည်ငိုကြွေးမြည်တမ်းကြ၍၊ လူသားသည် ကြီးစွာသောဘုန်းတန်ခိုးအာနုဘော်ကိုဆောင်လျက်၊ မိုးတိမ်ကိုစီး၍ကြွလာတော်မူသည်ကို မြင်ရကြလိမ့်မည်။ . . . သင်္ဘောသဖန်းပင်ကိုအစွဲပြု၍ ပုံသက်သေတစ်ခုမှတ်ကြလော့။ သင်္ဘောသဖန်းပင်သည် အခက်အလက်နု၍ အရွက်ပေါက်သောအခါ နွေကာလနီးသည်ကိုသင်တို့သိကြ၏။ ထိုနည်းတူ၊ ထိုအကြောင်းအရာအလုံးစုံတို့ကိုမြင်ရလျှင် လူသား [ခရစ်တော်] သည် တံခါးဝတိုင်အောင်အနီးသို့ရောက်တော်မူသည်ကို သိမှတ်ကြလော့။ . . . သင်တို့အရှင်သည် အဘယ်အချိန်နာရီ၌ ရောက်လာမည်ကို သင်တို့မသိသောကြောင့် စောင့်နေကြလော့။ . . . ထိုကြောင့် သင်တို့သည်ပြင်ဆင်လျက်နေကြလော့။ အကြောင်းမူကား၊ သင်တို့မထင်မမှတ်သောအချိန်နာရီ၌ လူသားသည်ကြွလာလိမ့်မည်။”—မဿဲ ၂၄:၃၀၊ ၃၂၊ ၃၃၊ ၄၂၊ ၄၄။

ယေရှုခရစ် အဘယ်ကြောင့်ကြွလာသနည်း

၆။ “မဟာဗာဗုလုန်” ပျက်စီးခြင်းသည် မည်သို့ဖြစ်လာမည်နည်း။

^၆ ၁၉၁၄ ခုနှစ်မှစ၍ ယေရှုခရစ်သည် ဘုရင်အဖြစ်ရောက်ရှိနေပြီဖြစ်သော်လည်း ဆိုးညစ်သူများကိုစီရင်ချက်မချမီ လူ့အဖွဲ့အစည်းများနှင့် တစ်ဦးချင်းစီကို တရားစီရင်ရဦးမည်ဖြစ်သည်။ (၂ ကောရိန္သု ၅:၁၀ နှိုင်းယှဉ်။) ယေဟောဝါသည် ကမ္ဘာ့မှောက်မှားသောဘာသာရေးအင်ပါယာ “မဟာဗာဗုလုန်” ကိုဖျက်ဆီးဖို့ နိုင်ငံရေးခေါင်းဆောင်များ၏စိတ်ထဲ မကြာမီစိတ်ကူးပေါ်စေလိမ့်မည်။ (ဗျာဒိတ် ၁၇:၄၊ ၅၊ ၁၆၊ ၁၇) ယေရှုခရစ်သည် “ဒုစရိုက်လူ”—“မဟာဗာဗုလုန်” ၏ထင်ရှားသောအစိတ်အပိုင်းဖြစ်သည့် ခရစ်ယာန်ဘောင်၏ဖောက်ပြန်သောဓမ္မဆရာများ—ကို ဖျက်ဆီးလိမ့်မည်ဟု တမန်တော်ပေါလုက အတိအကျဖော်ပြခဲ့သည်။ ပေါလု ဤသို့ရေးခဲ့သည်– “ထိုအဓမ္မလူသည် ထင်ရှားလိမ့်မည်။ ထိုအဓမ္မလူကို သခင်ယေရှုသည် နှုတ်ထွက်ဝိညာဉ်တော်အားဖြင့်ဖျက်ဆီး၍၊ ကြွလာတော်မူခြင်း၏ရောင်ခြည်အားဖြင့် ပယ်ရှားတော်မူလိမ့်မည်။”—၂ သက်သာလောနိတ် ၂:၃၊ ၈။

၇။ လူသားသည် မိမိဘုန်းဖြင့်ကြွလာသောအခါ အဘယ်စီရင်ချက်ကို ချမည်နည်း။

^၇ မဝေးတော့သောအနာဂတ်၌ ခရစ်တော်သည် ကမ္ဘာပေါ်ရှိဆဲ ညီတော်များနှင့်ဆက်ဆံပုံပေါ်မူတည်၍ လူမျိုးတို့ကို တရားစီရင်ပါလိမ့်မည်။ ကျွန်ုပ်တို့ ဤသို့ဖတ်ရ၏– “လူသားသည် မိမိဘုန်းအာနုဘော်ကိုဆောင်လျက်၊ သန့်ရှင်းသောကောင်းကင်တမန်များ အခြံအရံနှင့်တကွ ကြွလာတော်မူသောအခါ ဘုန်းရှိသောပလ္လင်တော်ပေါ်မှာထိုင်၍၊ ရှေ့တော်၌ လူမျိုးအပေါင်းတို့ကို စုဝေးစေသဖြင့်၊ သိုးထိန်းသည် သိုးနှင့်ဆိတ်တို့ကို တခြားစီခွဲထားသကဲ့သို့၊ လူအပေါင်းတို့ကို အသီးအခြားခွဲ၍၊ သိုးတို့ကိုလက်ယာတော်ဘက်၊ ဆိတ်တို့ကိုလက်ဝဲတော်ဘက်၌ထားတော်မူလတ္တံ့။ ထိုအခါ . . . [သိုးများ] အား . . . မင်းကြီးက ‘ငါအမှန်ဆိုသည်ကား၊ သင်တို့သည် ဤသူတည်းဟူသောငါ့ညီတို့တွင် အငယ်ဆုံးသောသူတစ်ယောက်အား ပြုကြသမျှတို့ကို ငါ့အားပြုကြပြီ’ . . . [ဆိတ်] တို့သည် ထာဝရအပြစ်ဒဏ်ခံရာသို့လည်းကောင်း၊ ဖြောင့်မတ်သောသူတို့မူကား ထာဝရအသက်ရှင်ရာသို့လည်းကောင်း သွားကြလတ္တံ့။”—မဿဲ ၂၅:၃၁-၄၆။

၈။ ဘုရားတရားမဲ့သူများအပေါ်စီရင်ချက်ချရန် ခရစ်တော်ကြွလာခြင်းကို ပေါလုမည်သို့ဖော်ပြသနည်း။

^၈ သိုးနှင့်ဆိတ်ပုံပမာတွင် ဖော်ပြထားသကဲ့သို့ ယေရှုသည် ဘုရားတရားမဲ့သူအားလုံးကို နောက်ဆုံးစီရင်ချက်ချသည်။ “သခင်ယေရှုသည် တန်ခိုးရှိသောကောင်းကင်တမန်တို့နှင့်အတူ၊ ကောင်းကင်ဘုံကပေါ်ထွန်းတော်မူ၍၊ ဘုရားသခင်ကိုမသိသောသူ၊ ငါတို့သခင်ယေရှုခရစ်၏ဧဝံဂေလိတရားကို နားမထောင်သောသူတို့ကို မီးလျှံအားဖြင့်ဒဏ်ပေးတော်မူသောအခါ . . . ငါတို့နှင့်အတူချမ်းသာခြင်းကို . . . ပေး . . . တော်မူလိမ့်မည်။ ထိုသခင်သည် မိမိသန့်ရှင်းသူတို့အားဖြင့် ဂုဏ်အသရေတော်ကိုထင်ရှားခြင်း . . . ခံအံ့သောငှာကြွလာတော်မူသောနေ့ရက်၌၊ ထိုသူတို့သည် သခင်ဘုရား၏မျက်နှာတော်နှင့်လည်းကောင်း၊ တန်ခိုးရှိသောဘုန်းတော်နှင့်လည်းကောင်းကွာ၍၊ ထာဝရပျက်စီးခြင်းတည်းဟူသောအပြစ်ဒဏ်ကို ခံရကြလတ္တံ့” ဟုဆင်းရဲခံနေရသောယုံကြည်သူချင်းများအား စိတ်ချစေခဲ့သည်။ (၂ သက်သာလောနိတ် ၁:၇-၁၀) မကြာမီ ဤစိတ်လှုပ်ရှားဖွယ်ဖြစ်ရပ်များဖြစ်မည်ဖြစ်ရာ ကျွန်ုပ်တို့သည် ယုံကြည်ခြင်းကိုတင်ပြကာ ခရစ်တော်ကြွလာခြင်းကို အလွန်တောင့်တလျက်သတိနှင့်စောင့်မနေသင့်ပေလော။

ခရစ်တော်ပေါ်ထွန်းချိန်ကို အလွန်တောင့်တ မျှော်လင့်နေခြင်း

၉၊ ၁၀။ ကမ္ဘာပေါ်ရှိနေကြဆဲဖြစ်သော ဘိသိက်ခံများသည် ယေရှုခရစ်၏ပေါ်ထွန်းခြင်းကို အဘယ်ကြောင့်အလွန်တောင့်တကြရသနည်း။

^၉ ‘ကောင်းကင်ဘုံမှ သခင်ယေရှု၏ပေါ်ထွန်းခြင်း’ သည်ဆိုးသွမ်းသူတို့ကိုဖျက်ဆီးဖို့သာမက ဖြောင့်မတ်သောသူများကိုဆုချဖို့လည်းဖြစ်သည်။ ကမ္ဘာပေါ်ရှိနေကြဆဲ ခရစ်တော်၏ဘိသိက်ခံညီတော်အကြွင်းအကျန်သည် ခရစ်တော်၏ပေါ်ထွန်းချိန်မတိုင်မီအထိ ဆင်းရဲခြင်းခံရဦးမည်ဖြစ်သော်လည်း သူတို့၏ဘုန်းအသရေရှိကောင်းကင်မျှော်လင့်ချက်၌ ဝမ်းမြောက်နေကြသည်။ ဘိသိက်ခံခရစ်ယာန်များထံ တမန်တော်ပေတရုက ဤသို့ရေးသားခဲ့သည်– “သင်တို့သည် ခရစ်တော်၏ဆင်းရဲခြင်းကိုဆက်ဆံကြသည်ဖြစ်၍၊ ဘုန်းတော်ပေါ်ထွန်းသောအခါ အလွန်ဝမ်းမြောက်ရွှင်လန်းမည်အကြောင်း၊ ယခုပင် ဝမ်းမြောက်ကြလော့။”—၁ ပေတရု ၄:၁၃။

^၁၀ ဘိသိက်ခံများသည် ခရစ်တော်က ‘သူတို့ကို အထံတော်၌စည်းဝေး’ စေသည်အထိ သစ္စာရှိရန် စိတ်ပိုင်းဖြတ်ထားကြသည်။ ဤသို့အားဖြင့် သူတို့ယုံကြည်ခြင်း၏ “စစ်ကြောခံအရည်အသွေး” သည် “ယေရှုခရစ်ပေါ်ထွန်းတော်မူသောအခါ အချီးအမွမ်း၊ ဂုဏ်အသရေ၊ ဘုန်းအာနုဘော်အလိုငှာဖြစ်မည်အကြောင်း” တည်း။ (၂ သက်သာလောနိတ် ၂:၁; ၁ ပေတရု ၁:၇) အဆိုပါသစ္စာရှိဝိညာဉ်တော်ဖွားခရစ်ယာန်များနှင့်ပတ်သက်၍ ဤသို့ဆိုနိုင်သည်– “ခရစ်တော်၏သက်သေကို သင်တို့တွင်တည်စေသည်ရှိသော် . . . သင်တို့သည် ငါတို့သခင်ယေရှုခရစ်၏ပေါ်ထွန်းတော်မူခြင်းကို မျှော်လင့်၍နေစဉ်၊ ဆုတော်တစ်စုံတစ်ခုမျှမလျော့ဘဲ စုံလင်လျက်ရှိကြ၏။”—၁ ကောရိန္သု ၁:၄-၇။

၁၁။ ယေရှုခရစ်၏ပေါ်ထွန်းခြင်းကိုစောင့်နေကြစဉ် ဘိသိက်ခံခရစ်ယာန်များသည် အဘယ်အရာကိုလုပ်ဆောင်ကြသနည်း။

^၁၁ ဘိသိက်ခံအကြွင်းအကျန်သည် “ငါတို့အား ပေါ်ထွန်းလတ္တံ့သောဘုန်းကိုထောက်သော်၊ ယခုမျက်မှောက်ကာလ၌ခံရသောဆင်းရဲဒုက္ခကို ပမာဏမပြုထိုက်ဟု ငါသဘောရှိ၏” ဟုရေးသားခဲ့သူပေါလု၏သဘောထားမျိုးရှိကြသည်။ (ရောမ ၈:၁၈) သူတို့၏ယုံကြည်ခြင်းကို အချိန်တွက်ချက်မှုများဖြင့် ထောက်မပေးစရာမလိုချေ။ သူတို့သည် ယေဟောဝါ၏လုပ်ငန်းတော်တွင် အလုပ်များနေကြရာ သူတို့၏အပေါင်းအဖော် “အခြားသိုးများ” အတွက်ပုံသက်သေကောင်းတင်ပြကြသည်။ (ယောဟန် ၁၀:၁၆) ဤစနစ်ဆိုး၏ဆုံးခန်းနီးပြီဖြစ်ကြောင်း ဘိသိက်ခံခရစ်ယာန်များသိထားကြရာ ပေတရု၏ဤတိုက်တွန်းချက်ကို လိုက်နာကြ၏– “သင်တို့စိတ်နှလုံးကိုခါးပန်းစည်း၍ သမ္မာသတိရှိကြလော့။ ယေရှုခရစ်ပေါ်ထွန်းတော်မူသောအခါ၊ သင်တို့ဆီသို့ရောက်လတ္တံ့သောဆုကျေးဇူးကို အဆုံးတိုင်အောင်မျှော်လင့်ကြလော့။”—၁ ပေတရု ၁:၁၃။

‘ဖန်ဆင်းတော်မူရာများ၏ တောင့်တမျှော်လင့်ခြင်း’

၁၂၊ ၁၃။ ဖန်ဆင်းတော်မူရာလူသားသည် “အနိစ္စနိုင်ငံသို့” မည်သို့လိုက်ကြပြီး အခြားသိုးများသည် အဘယ်အရာကိုတောင့်တကြသနည်း။

^၁၂ အခြားသိုးများလည်း တောင့်တမျှော်လင့်နေဖို့ အကြောင်းတစ်စုံတစ်ရာရှိသလော။ အမှန်တကယ်ပင်ရှိသည်။ ယေဟောဝါ၏ဝိညာဉ်တော်ဖွား “သားများ” နှင့် ကောင်းကင်နိုင်ငံတွင် ‘ခရစ်တော်နှင့်အတူအမွေခံ’ မည့်သူများအဖြစ် မွေးစားခံရသူများ၏ ဘုန်းအသရေရှိမျှော်လင့်ချက်အကြောင်းပြောပြီးနောက် ပေါလုက ဤသို့ဆက်ဆိုသည်– “ဖန်ဆင်းတော်မူသောအရာများသည် ဘုရားသခင့်သားတို့၏ပေါ်ထွန်းခြင်းကို အလွန်တောင့်တမျှော်လင့်လျက်စောင့်နေကြ၏။ အကြောင်းမူကား ထိုအရာများသည် အနိစ္စနိုင်ငံသို့ အလိုလိုလိုက်ကြသည်မဟုတ်။ ဘုရားသခင်သားတို့၏ ဘုန်းဖြစ်သောလွှတ်ခြင်းချမ်းသာတည်းဟူသော ဖောက်ပြန်ပျက်စီးခြင်းအနှောင်အဖွဲ့မှ ကယ်လွှတ်ခြင်းချမ်းသာကိုဝင်စားမည်ဟု မျှော်လင့်ရသောအခွင့်ကိုပေး၍ အနိစ္စနိုင်ငံသို့လိုက်စေတော်မူသောအရှင်၏အလိုတော်ကြောင့်သာ လိုက်ရကြ၏။”—ရောမ ၈:၁၄-၂၁၊ သမ္မာ; ၂ တိမောသေ ၂:၁၀-၁၂။

^၁၃ အာဒံ၏အပြစ်ကြောင့် သူ၏သားစဉ်မြေးဆက်အားလုံးသည် အပြစ်နှင့်သေခြင်း၏အနှောင်အဖွဲ့ဖြင့်မွေးဖွားခဲ့ကြကာ “အနိစ္စနိုင်ငံသို့လိုက်” ခဲ့ကြရသည်။ သူတို့သည် ထိုအနှောင်အဖွဲ့မှကိုယ်ကိုကိုယ်လွတ်မြောက်စေရန် မတတ်နိုင်ခဲ့ကြချေ။ (ဆာလံ ၄၉:၇; ရောမ ၅:၁၂၊ ၂၁) အခြားသိုးများသည် “ဖောက်ပြန်ပျက်စီးခြင်းအနှောင်အဖွဲ့မှ ကယ်လွှတ်ခြင်းချမ်းသာကို” မည်မျှဝင်စားလိုကြမည်တကား! သို့သော် ထိုသို့မဖြစ်မီ ယေဟောဝါ၏ကာလအချိန်ဥတုများအတိုင်း တစ်စုံတစ်ရာသောအရာများဖြစ်ပျက်ရမည်။

၁၄။ “ဘုရားသခင့်သားတို့၏ပေါ်ထွန်းခြင်း” တွင်အဘယ်အရာပါဝင်ပြီး၊ မည်သို့ “ဖောက်ပြန်ပျက်စီးခြင်းအနှောင်အဖွဲ့မှကယ်လွှတ်” ခြင်းခံရမည်နည်း။

^၁၄ “ဘုရားသခင့်သား” များဖြစ်သော ဘိသိက်ခံအကြွင်းအကျန်သည် ဦးဆုံး ‘ပေါ်ထွန်း’ ရမည်။ ယင်းတွင် အဘယ်အရာပါဝင်မည်နည်း။ ဘုရားသခင်သတ်မှတ်ထားချိန်တိုင်လေသော် ဘိသိက်ခံများသည်နောက်ဆုံး “တံဆိပ်ခတ်ခြင်းခံ” ခဲ့ကြရပြီး ခရစ်တော်နှင့်အတူအုပ်စိုးရန်ဘုန်းဝင်စားခဲ့ကြကြောင်း အခြားသိုးများသိမြင်လာပါလိမ့်မည်။ (ဗျာဒိတ် ၇:၂-၄) စာတန့်စနစ်ဆိုးကိုဖျက်ဆီးရာတွင် ခရစ်တော်နှင့်အတူပါဝင်ကြသောအခါတွင်လည်း ရှင်ပြန်ထမြောက်သော “ဘုရားသခင့်သား” များသည် ‘ပေါ်ထွန်း’ ကြပါလိမ့်မည်။ (ဗျာဒိတ် ၂:၂၆၊ ၂၇; ၁၉:၁၄၊ ၁၅) ထို့နောက် ခရစ်တော်၏အနှစ်တစ်ထောင်အုပ်စိုးမှုအတွင်း “ဖန်ဆင်းတော်မူသောအရာ” လူသားများအား ယေရှု၏ရွေးဖိုးပူဇော်သကာအကျိုးကျေးဇူးများကို ဝေငှပေးကမ်းရန်အတွက် ယဇ်ပုရောဟိတ်များအဖြစ် ထပ်ဆင့် ‘ပေါ်ထွန်း’ ကြပါလိမ့်မည်။ ယင်းကြောင့် လူသားများသည် “ဖောက်ပြန်ပျက်စီးခြင်းအနှောင်အဖွဲ့မှကယ်လွှတ်” ခံရပြီး နောက်ဆုံး၌ “ဘုရားသခင့်သားတို့၏ဘုန်းဖြစ်သောလွတ်ခြင်းချမ်းသာ” ကိုဝင်စားကြမည်ဖြစ်သည်။ (ရောမ ၈:၂၁; ဗျာဒိတ် ၂၀:၅; ၂၂:၁၊ ၂) ဤထူးမြတ်သောအလားအလာများရှိနေရာ အခြားသိုးများသည် “ဘုရားသခင့်သားတို့၏ပေါ်ထွန်းခြင်းကို အလွန်တောင့်တမျှော်လင့်လျက်စောင့်နေ” ကြခြင်းကိုအံ့သြစရာရှိပါမည်လော။—ရောမ ၈:၁၉။

ယေဟောဝါ၏စိတ်ရှည်ခြင်းသည် ကယ်တင်ခြင်းရရှိစေ

၁၅။ အဖြစ်အပျက်များကို ယေဟောဝါဖြစ်ပျက်စေချိန်နှင့်ပတ်သက်၍ အဘယ်အရာကို ကျွန်ုပ်တို့မမေ့သင့်သနည်း။

^၁၅ ယေဟောဝါသည် မဟာအချိန်စောင့်သိရှင်ဖြစ်၏။ ကိုယ်တော်သည် အဖြစ်အပျက်များကို အချိန်အတိအကျဖြစ်ပျက်စေမည်အကြောင်း တွေ့ရပါလိမ့်မည်။ အရာခပ်သိမ်းသည် ကျွန်ုပ်တို့မျှော်လင့်သည့်အတိုင်း အမြဲပင်ဖြစ်ပျက်လာမည့်ပုံမရှိပါ။ သို့ရာတွင် ဘုရားသခင့်ကတိတော်အားလုံးသည် ပြည့်စုံလိမ့်မည်ဖြစ်ကြောင်း ကျွန်ုပ်တို့လုံးလုံးယုံကြည်စိတ်ချနိုင်ပါသည်။ (ယောရှု ၂၃:၁၄) လူအများထင်သည်ထက် အချိန်ကြာမြင့်စွာ အရာအချို့ကို ခွင့်ပြုထားပေမည်။ သို့သော် ကိုယ်တော့်နည်းလမ်းများကိုနားလည်ပြီး ကိုယ်တော့်ဉာဏ်ပညာကိုလေးမြတ်တန်ဖိုးထားကြစို့။ ပေါလု ဤသို့ရေးသားခဲ့သည်– “ဘုရားသခင်၏ပညာနှင့်ဉာဏ်တော်သည် အလွန်ကျယ်ဝန်းနက်နဲစွတကား။ စီရင်တော်မူချက်တို့ကို အဘယ်သူမျှစစ်၍မကုန်နိုင်။ ကြွတော်မူရာလမ်းတို့ကိုလိုက်၍ရှာသော်လည်း မတွေ့မမီနိုင်။ ‘ထာဝရဘုရား၏စိတ်တော်ကို အဘယ်သူသိသနည်း။ ထာဝရဘုရားနှင့် အဘယ်သူသည်တိုင်ပင်ဘက်ပြုသနည်း။’”—ရောမ ၁၁:၃၃၊ ၃၄။

၁၆။ ယေဟောဝါ၏စိတ်ရှည်ခြင်းမှ မည်သူအကျိုးရရှိနိုင်သနည်း။

^၁၆ ပေတရုက ဤသို့ရေးသားခဲ့သည်– “ထိုသို့ [လက်ရှိ “ကောင်းကင်” နှင့် “မြေကြီး” ကိုဖျက်ဆီးပြီး ဘုရားသခင့်ကတိထားရာ “ကောင်းကင်သစ်” နှင့် “မြေကြီးသစ်” ရောက်ရှိမည်ကို] မျှော်လင့်ခြင်းရှိသောကြောင့် ချစ်သူတို့၊ သင်တို့သည် အညစ်အကြေးနှင့်ကင်းစင်၍ အဘယ်အပြစ်မျှမပါဘဲ၊ ရှေ့တော်သို့ငြိမ်ဝပ်စွာရောက်မည်အကြောင်း ကြိုးစားအားထုတ်ကြလော့။ . . . ငါတို့သခင်ဘုရားသည်းခံတော်မူခြင်းသည် ကယ်တင်မည်အကြောင်းဖြစ်သည်။” ယေဟောဝါ၏စိတ်ရှည်သည်းခံခြင်းကြောင့် သန်းပေါင်းများစွာသောသူတို့သည် ‘သူခိုးကဲ့သို့’ မမျှော်လင့်ဘဲရောက်ရှိလာမည့် ယေဟောဝါ၏နေ့ကြီးမှ လွတ်မြောက်ရန်အခွင့်အရေးပေးခြင်းခံရကြမည်။ (၂ ပေတရု ၃:၉-၁၅) ကိုယ်တော့်စိတ်ရှည်ခြင်းသည် ကျွန်ုပ်တို့တစ်ဦးစီကိုလည်း “ကြောက်ရွံ့တုန်လှုပ်သောစိတ်နှင့် ကိုယ်ကိုကိုယ်ကယ်တင်ခြင်းငှာ ကြိုးစားအားထုတ်” ခွင့်ပြု၏။ (ဖိလိပ္ပိ ၂:၁၂) တရားစီရင်ရန် ကိုယ်တော်ကြွလာမည့်အချိန်တွင် “လူသားထံသို့ရောက်ခြင်းကို ခံထိုက်သောသူ” များဖြစ်လိုကြလျှင် ကျွန်ုပ်တို့သည် “ကိုယ်ကိုကိုယ်သတိပြုကြ” ပြီး “စောင့်နေကြ” ရမည်ဟု ယေရှုမိန့်မှာခဲ့သည်။—လုကာ ၂၁:၃၄-၃၆; မဿဲ ၂၅:၃၁-၃၃။

ခံနိုင်ရည်ရှိရှိဖြင့် ဆက်၍စောင့်နေခြင်း

၁၇။ တမန်တော်ပေါလု၏အဘယ်စကားများကို ကျွန်ုပ်တို့နှလုံးသွင်းသင့်သနည်း။

^၁၇ ပေါလုက မိမိ၏ဝိညာဉ်ရေးညီအစ်ကိုများအား “ထင်ရှားသောအရာတို့ကိုမကြည့်မမှတ်ဘဲ မထင်ရှားသောအရာတို့ကိုကြည့်မှတ်ကြ” ရန်တိုက်တွန်းခဲ့သည်။ (၂ ကောရိန္သု ၄:၁၆-၁၈) သူတို့ရှေ့ရှိ ကောင်းကင်ဆုကျေးဇူးအပေါ်ထားသောအမြင်ကို မှုန်ဝါးမသွားစေလိုခဲ့ချေ။ ကျွန်ုပ်တို့သည် ဘိသိက်ခံခရစ်ယာန်များဖြစ်စေ၊ အခြားသိုးများဖြစ်စေ ကျွန်ုပ်တို့ရှေ့ရှိအံ့ဖွယ်မျှော်လင့်ချက်ကို စိတ်စွဲလမ်းပြီး မစွန့်လွှတ်ကြစို့နှင့်။ “ငါတို့မူကား၊ ပျက်စီးခြင်းသို့ရောက်အံ့သောငှာ ရွေ့လျော့သောသူမဟုတ်။ စိတ်ဝိညာဉ်သည် ကယ်တင်ခြင်းသို့ရောက်အံ့သောငှာ ယုံကြည်သောသူဖြစ်ကြ” ကြောင်းသက်သေထူရန် ‘ခံနိုင်ရည်ရှိရှိဖြင့်ဆက်စောင့်နေ’ ကြစို့။—ရောမ ၈:၂၅; ဟေဗြဲ ၁၀:၃၉။

၁၈။ ကျွန်ုပ်တို့သည် ယေဟောဝါ၏လက်တော်၌ ကာလအချိန်ဥတုများကို အဘယ်ကြောင့်ယုံကြည်စိတ်ချစွာပုံအပ်ထားနိုင်သနည်း။

^၁၈ ကျွန်ုပ်တို့သည် ယေဟောဝါ၏လက်တော်၌ ကာလအချိန်ဥတုများကိုယုံကြည်စိတ်ချစွာ ပုံအပ်ထားနိုင်ကြပါသည်။ ကိုယ်တော်၏အချိန်ဇယားအရ ကိုယ်တော့်ကတိတော်များသည် “နောက်မကျဘဲ” ပြည့်စုံပါလိမ့်မည်။ (ဟဗက္ကုတ် ၂:၃) ဤအချိန်အတောအတွင်း တိမောသေအား ပေါလုပေးခဲ့သည့်တိုက်တွန်းချက်သည် ကျွန်ုပ်တို့အတွက်အဓိပ္ပာယ်ပိုရှိလာပါသည်။ သူက ဤသို့ဆိုသည်– “ကိုယ်တိုင်ပေါ်ထွန်း၍ နိုင်ငံတော်ထင်ရှားသောကာလ၊ အသက်ရှင်သောသူ၊ သေသောသူတို့ကို စစ်ကြောစီရင်တော်မူသော သခင်ယေရှုခရစ်ရှေ့မှာလည်းကောင်း၊ ဘုရားသခင့်ရှေ့မှာလည်းကောင်း၊ ငါသည် သင့်ကိုသစ္စာပေးသည်ကား၊ နှုတ်ကပါဌ်တရားတော်ကိုဟောပြောလော့။ အချိန်ရှိသည်ဖြစ်စေ၊ မရှိသည်ဖြစ်စေ ကြိုးစားအားထုတ်လော့။ . . . ဆရာအရာ၌ခန့်ထား၍ပြုရသောဝတ်များကို အကုန်အစင်ပြုလော့။”—၂ တိမောသေ ၄:၁-၅။

၁၉။ ယေဟောဝါ၏လူမျိုးတော်သည် အဘယ်အမှုကိုပြုလုပ်ရန်အချိန်ရှိနေဆဲဖြစ်သနည်း၊ အဘယ်ကြောင့်နည်း။

^၁၉ ကျွန်ုပ်တို့ကိုယ်တိုင်နှင့် အိမ်နီးချင်းများ၏သေရေးရှင်ရေးအကြောင်းဖြစ်နေသည်။ ပေါလု ဤသို့ရေးသားခဲ့သည်– “ကိုယ်ကိုလည်းကောင်း၊ ကိုယ်ဆုံးမသြဝါဒကိုလည်းကောင်း သတိပြု၍ အမြဲတည်နေလော့။ ထိုသို့ပြုလျှင်၊ ကိုယ်ကိုလည်းကောင်း၊ နားထောင်သောသူတို့ကိုလည်းကောင်း ကယ်တင်လိမ့်မည်။” (၁ တိမောသေ ၄:၁၆) မိုက်မဲသောစနစ်အတွက် အချိန်အနည်းငယ်သာကျန်ရှိတော့သည်။ ကျွန်ုပ်တို့ရှေ့ရှိ စိတ်လှုပ်ရှားဖွယ်ဖြစ်ရပ်များကို အလွန်တောင့်တမျှော်လင့်နေစဉ် ယေဟောဝါ၏လူမျိုးသည် ဘုရားသခင့်နိုင်ငံတော်သတင်းကောင်းဟောပြောဖို့ ကိုယ်တော်၏ကာလအချိန်ဥတုဖြစ်နေသေးကြောင်း အမြဲသတိရနေကြစို့လေ။ ကိုယ်တော့်စိတ်တော်ကျေနပ်သည်အထိ ထိုအလုပ်ကို ပြီးမြောက်စေရမည်ဖြစ်သည်။ “သို့ပြီးမှ အဆုံးသည်ဖြစ်လတ္တံ့” ဟုယေရှုမိန့်တော်မူခဲ့သည့်အတိုင်းဖြစ်ပေမည်။—မဿဲ ၂၄:၁၄။

[အောက်ခြေမှတ်ချက်များ]

ပြန်လည်သုံးသပ်ခြင်းအားဖြင့်

◻ အချိန်တွက်ချက်ခြင်းများနှင့်ပတ်သက်၍ ကျွန်ုပ်တို့၏အခြေအနေသည် ပထမရာစုခရစ်ယာန်များ၏အခြေအနေနှင့် မည်သို့ဆင်တူသနည်း။

◻ ခရစ်ယာန်များသည် ခရစ်တော်ရောက်ရှိနေစဉ်၌ပင် အဘယ်ကြောင့် “သတိနှင့်စောင့်နေ” ကြရမည်နည်း။

◻ ဖန်ဆင်းတော်မူရာလူသားသည် “ဘုရားသခင့်သားတို့၏ပေါ်ထွန်းခြင်း” ကိုအဘယ်ကြောင့်အလွန်တောင့်တမျှော်လင့်နေကြသနည်း။

◻ ကျွန်ုပ်တို့သည် ယေဟောဝါ၏လက်တော်၌ ကာလအချိန်ဥတုများကိုအဘယ်ကြောင့် ယုံကြည်စိတ်ချစွာပုံအပ်နိုင်ကြသနည်း။

[စာမျက်နှာ ၁၇ ပါ ရုပ်ပုံ]

ခရစ်ယာန်များသည် ယေရှုကြွလာခြင်းကိုမျှော်လင့်ကာ နိုးကြားနေကြရမည်

[စာမျက်နှာ ၁၈ ပါ ရုပ်ပုံ]

ဘိသိက်ခံအကြွင်းအကျန်သည် ယေဟောဝါ၏လုပ်ငန်းတော်တွင် အလုပ်များလျက်ရှိနေကြ၊ သူတို့၏ယုံကြည်ခြင်းသည် အချိန်တွက်ချက်မှုများအပေါ်အခြေမခံပါ