“နှစ်လိုဖွယ် တောင်ဆိတ်”

ကျွန်ုပ်တို့အများစုသည် ဆိတ်တစ်ကောင်ကိုဖော်ညွှန်းရန် နှစ်လိုဖွယ်သောဟူသည့် နာမဝိသေသနကို အသုံးပြုမည်မဟုတ်ပေ။ ဆိတ်များကို တွေ့မြင်ရာအကုန်လိုက်စားသည့်၊ အရသာရှိသောအသားများနှင့် အာဟာရဖြစ်သောနို့ရရှိသည့် အသုံးဝင်သောတိရစ္ဆာန်များဟု ကျွန်ုပ်တို့ယူမှတ်နိုင်သော်လည်း သူတို့ကို နှစ်လိုဖွယ်သောဟူ၍ခေါ်ဆိုရန်မူ ခဲယဉ်းပေမည်။

သို့သော်လည်း သမ္မာကျမ်းစာက ဇနီးသည်တစ်ဦးကို “စုံမက်တတ်သောသမင်မ၊ နှစ်လိုဖွယ်သောဒရယ်မ [“တောင်ဆိတ်၊” ကဘ]” ဟုဖော်ပြထားသည်။ (သု. ၅:၁၈၊ ၁၉) နယပုံပြင်ကျမ်းရေးသူ ရှောလမုန်သည် ဣသရေလနိုင်ငံ၏တောရိုင်းတိရစ္ဆာန်များကို နှိုက်နှိုက်ချွတ်ချွတ်လေ့လာသူတစ်ဦးဖြစ်သောကြောင့် အဆိုပါဥပစာကို အသုံးပြုခြင်းသည် ခြေမြစ်သောအကြောင်းရှိခဲ့မည်မှာ ယုံမှားဖွယ်မရှိချေ။ (၃ ဓမ္မရာဇဝင် ၄:၃၀-၃၃) ဖခင်ဒါဝိဒ်နည်းတူ သူသည် ပင်လယ်သေကမ်းရိုးတန်းအနီး အင်္ဂေဒိဒေသဝန်းကျင်တွင် တောင်ဆိတ်များကို မကြာခဏ တွေ့ရှိခဲ့နိုင်သည်။

ယုဒကန္တာရအနီးတွင် ကျက်စားကြသော တောင်ဆိတ်အုပ်စုငယ်လေးများသည် အင်္ဂေဒိချောင်းသို့ မှန်မှန်လာတတ်ကြသည်။ အင်္ဂေဒိသည် ဤကျတ်တီးဒေသတွင် တစ်ခုတည်းသောအားထားရာ ရေထွက်ရာနေရာဖြစ်သောကြောင့် ရာစုနှစ်များစွာအထိ တောင်ဆိတ်များအတွက် အနှစ်သက်ဆုံးရေရရှိသောနေရာဖြစ်ခဲ့သည်။ အမှန်မှာ အင်္ဂေဒိအမည်သည် ၎င်းဒေသသို့ ဆိတ်သငယ်များ မှန်မှန်ရောက်ရှိခြင်းကို ထောက်၍ “ဆိတ်ကလေးများ၏စမ်းရေ” ဟုအဓိပ္ပာယ်ဖြစ်နိုင်ဖွယ်ရှိသည်။ ဘုရင်ဒါဝိဒ်သည် “တောဆိတ် [“တောင်ဆိတ်၊” ကဘ] နေရာ ကျောက်တောင်တို့အပေါ်” တွင်ဝရမ်းပြေးတစ်ဦးကဲ့သို့ နေထိုင်ခဲ့ရသော်လည်း ဘုရင်ရှောလု၏နှိပ်စက်ညှဉ်းပန်းမှုမှလွတ်မြောက်ရန် ဤနေရာတွင် ခိုလှုံရာကိုရှာတွေ့ခဲ့သည်။—၁ ဓမ္မရာဇဝင် ၂၄:၁၊ ၂။

ရေရှိရာသို့သွားရာတွင် ဆိတ်ထီးနောက်သို့လိုက်ကာ ကျောက်ဆောင်ပေါများသော လျှိုမြောင်သို့ လှပတင့်တယ်စွာ ဂရုတစိုက်ဆင်းနေသည့် တောင်ဆိတ်မတစ်ကောင်ကို အင်္ဂေဒိတွင် သင်စောင့်ကြည့်နိုင်သည်။ ထို့နောက် တောင်ဆိတ်မကို သစ္စာစောင့်သိသောဇနီးနှင့် နှိုင်းယှဉ်ကြည့်သော် စ၍သဘောပေါက်လာပါလိမ့်မည်။ သူ၏နူးညံ့သိမ်မွေ့သောသဘောသဘာဝနှင့် လှပကြော့ရှင်းသော ဟန်ပန်တို့ကလည်း မိန်းမပီသသောအရည်အသွေးရှိကြောင်း ထင်ရှားစေသည်။ “နှစ်လိုဖွယ်သော” ဟူသည့်စကားသည် တောင်ဆိတ်၏တင့်တယ်ပြီး လှပကြော့ရှင်းသောအသွင်အပြင်ကို ရည်ညွှန်းနေသည်မှာ ပေါ်လွင်ပါသည်။a

တောင်ဆိတ်မသည် ကြံ့ခိုင်နေရမည်ဖြစ်သည့်အပြင် ကြော့မော့တင့်တယ်နေရမည်။ ယောဘကို ယေဟောဝါညွှန်းပြသကဲ့သို့ တောင်ဆိတ်သည် အစာရေစာရှားပါးကာ အပူချိန်အလွန်ပြင်းထန်သော ကြမ်းတမ်းမတ်စောက်သောတောင်ချွန်းများ၊ ကျောက်ဆောင်များ၊ ခရီးမပေါက်နိုင်သောနေရာများတွင် မွေးဖွားကြသည်။ (ယောဘ ၃၉:၁) အဆိုပါအခက်အခဲများရှိသော်ငြားလည်း သူသည် သားသမီးများကို ကြည့်ရှုစောင့်ရှောက်ကာ သူကဲ့သို့ ကျောက်ဆောင်များကြားတွင် ပေါ့ပါးသွက်လက်စွာ ခုန်ပျံကျော်လွှားတတ်အောင် သင်ပေးသည်။ ထို့ပြင် တောင်ဆိတ်မသည် သားရဲတိရစ္ဆာန်များ၏ရန်မှ သူ၏သားငယ်များကို သတ္တိရှိရှိကာကွယ်ပေး၏။ သားငယ်သည် အကာအကွယ်အတွက် တောင်ဆိတ်မ၏အောက်တွင် ဝပ်နေစဉ် သူသည် လင်းယုန်ငှက်နှင့် နာရီဝက်အထိ တိုက်ခဲ့သည်ကို လေ့လာသူတစ်ဦး တွေ့မြင်ခဲ့သည်။

ခရစ်ယာန်ဇနီးများနှင့် မိခင်များသည် သူတို့၏ကလေးများကို ဆိုးရွားသောအခြေအနေမျိုးအောက်၌ပင် ကျွေးမွေးပြုစုခဲ့ကြသည်။ တောင်ဆိတ်နည်းတူ သူတို့သည် ဘုရားသခင်ပေးတာဝန်ကိုထမ်းဆောင်ရာ၌ မြှုပ်နှံလုပ်ကိုင်ကာ ကိုယ်ကျိုးစွန့်မှုကို ပြသကြသည်။ ထို့ပြင် သူတို့၏သားသမီးများကို ဝိညာဉ်ရေးအန္တရာယ်များမှ ကာကွယ်ရန် ရဲရဲရင့်ရင့်ကြိုးစားကြသည်။ ထို့ကြောင့် ဤသို့တင်စားထားသော အမျိုးသမီးများကို အထင်သေးဖို့ဝေးစွ ရှောလမုန်က အမျိုးသမီးတစ်ဦး၏ကျက်သရေနှင့်အလှအပ—အခက်ခဲဆုံးအခြေအနေမျိုး၌ပင် ထင်ရှားပြသည့် ဝိညာဉ်ရေးအရည်အသွေးများ—ကိုအာရုံစိုက်စေခဲ့သည်မှာအမှန်ပင်။

[အောက်ခြေမှတ်ချက်များ]

[စာမျက်နှာ ၃၀, ၃၁ ပါ ရုပ်ပုံ]

ခရစ်ယာန်ဇနီးနှင့်မိခင်တို့သည် ဘုရားသခင်ပေးတာဝန်များကို ထမ်းဆောင်သောအခါ လှပတင့်တယ်သောဝိညာဉ်ရေးအရည်အသွေးများကို တင်ပြကြ