ကျွန်ုပ်တို့၏ ယုံကြည်ခြင်း စမ်းသပ်ခံခဲ့ရစဉ် ထီးထီးကြီးမဟုတ်

ဗစ်ကီသည် ချစ်စရာကောင်းပြီး ကျန်းမာသွက်လက်ချက်ချာသော သမီးလေးဖြစ်သည်။ မှန်၏၊ သမီးလေးကို ၁၉၉၃၊ နွေဦးပေါက်တွင် မွေးဖွားချိန်၌ ကျွန်ုပ်တို့ အတိုင်းမသိပျော်ရွှင်ခဲ့ကြသည်။ ဆွီဒင်တောင်ပိုင်းမှ မြို့လေးတစ်မြို့တွင် ကျွန်ုပ်တို့နေထိုင်ကြပြီး ဘဝသည် ဖြောင့်ဖြူးသာယာခဲ့၏။

သို့သော် ဗစ်ကီအသက်တစ်နှစ်ခွဲတွင် ကျွန်ုပ်တို့ကမ္ဘာလေးသည် ပျက်စီးသွားပုံရသည်။ သမီးလေးသည် အတန်ကြာကျန်းမာရေးချူချာလာရာ ဆေးရုံသို့ခေါ်သွားခဲ့သည်။ သမီးလေးသည် သွေးဖြူဆဲလ်များကိုထိခိုက်စေသည့် ကလေးကင်ဆာမျိုးဖြစ်သော ပြန်ရည်ဆဲလ်လျာသွေးကင်ဆာ ခံစားနေရသည်ဟု ဆရာဝန်ပြောပြချိန်ကို ဘယ်တော့မှမေ့မည်မဟုတ်ပါ။

ကျွန်ုပ်တို့၏သမီးလေး ဤကြောက်မက်ဖွယ်ရောဂါ ခံစားနေရသည်ကို လက်ခံရခက်နေသည်။ သမီးလေးသည် လောကကြီးကိုသတိပြုမိခါစပင်ရှိသေးသည်၊ ယခု သေရတော့မည်ပုံဖြစ်သည်။ ထိုအခါ ဆရာဝန်က ကျွန်ုပ်တို့ကို ကြိုးစားနှစ်သိမ့်ပေးလို၍ သွေးအနည်းငယ်သွင်းပြီး ဓာတုကုထုံးဖြင့်ကုသပါက အတော်အတန်အောင်မြင်နိုင်သည်ဟု ပြောလေသည်။ ယင်းသည် ကျွန်ုပ်တို့အတွက် နောက်ထပ်ချောက်ချားစရာပင်။

ကျွန်ုပ်တို့၏ယုံကြည်ခြင်း စမ်းသပ်ခံရ

သမီးလေးကို ကျွန်ုပ်တို့တကယ့်ကိုချစ်ကြရာ အကောင်းဆုံးဆေးကုသမှုကို လိုလားခဲ့ကြသည်။ သို့တိုင် သွေးသွင်းခြင်းကို လုံးဝလက်မခံနိုင်ခဲ့ချေ။ ခရစ်ယာန်များသည် ‘အသွေးကိုကြဉ်ရှောင်’ ရမည်ဟု ရှင်းလင်းစွာဖော်ပြထားသော ဘုရားသခင့်စကားတော် သမ္မာကျမ်းစာကို ကျွန်ုပ်တို့အခိုင်အမာယုံကြည်ကြသည်။ (တမန်တော် ၁၅:၂၈၊ ၂၉) သွေးသွင်းခြင်းကိုယ်နှိုက်သည်လည်း အန္တရာယ်ရှိကြောင်း ကျွန်ုပ်တို့သိထားကြသည်။ သွေးသွင်းခြင်းမှ ရောဂါများရရှိသူ ထောင်နှင့်ချီ၍သေဆုံးခဲ့ကြပြီ။ အစားထိုးကုသမှုသာလျှင် သွေးမသွင်းဘဲ အဆင့်မြင့်ကုသနည်းဖြစ်သည်။ ဤကိစ္စနှင့်ပတ်သက်၍ ယခု ကျွန်ုပ်တို့၏ယုံကြည်ခြင်းတိုက်ပွဲ စတင်တော့သည်။

ကျွန်ုပ်တို့ အဘယ်အရာပြုလုပ်နိုင်သနည်း။ ယေဟောဝါသက်သေများ၏ ဆွီဒင်ဌာနခွဲရုံးမှ ဆေးရုံအချက်အလက်ဝန်ဆောင်လုပ်ငန်းနှင့် ဆက်သွယ်ကာ အကူအညီတောင်းခဲ့ကြသည်။a ချက်ချင်းပင် သွေးမသွင်းဘဲ ဓာတုကုထုံးဖြင့် ကုသပေးလိုသော ဆေးရုံနှင့်ဆရာဝန်ကိုရှာဖွေနေကြောင်း ဥရောပတစ်ခွင်ရှိ ဆေးရုံအသီးသီးထံ ဖက်စ်များ ပို့ခဲ့ကြသည်။ ကျွန်ုပ်တို့ကို ကြိုးစားကူညီပေးရာတွင် ခရစ်ယာန်ညီအစ်ကိုများပြသကြသော စိတ်ထက်သန်မှုနှင့်မေတ္တာသည် အလွန်အားရှိစရာဖြစ်ခဲ့သည်။ ကျွန်ုပ်တို့၏ယုံကြည်ခြင်းတိုက်ပွဲတွင် ကျွန်ုပ်တို့ချည်းသာတိုက်ခိုက်ရခြင်းမဟုတ်ပါ။

နာရီပိုင်းအတွင်း ဆေးရုံတစ်ရုံနှင့် ဆရာဝန်တစ်ဦးကို ဂျာမနီနိုင်ငံ၊ ဟမ်းဘတ်/ဆာရ်မြို့တွင် တွေ့ရှိခဲ့သည်။ နောက်တစ်နေ့တွင် ဗစ်ကီကိုဆေးစစ်ဖို့ ကျွန်ုပ်တို့ခရီးထွက်ရန် အစီအစဉ်များပြုလုပ်ခဲ့ကြသည်။ ဟမ်းဘတ်မြို့သို့ ကျွန်ုပ်တို့ရောက်သောအခါ ယေဟောဝါသက်သေများ၏ ဒေသခံအသင်းတော်မှ ခရစ်ယာန်ညီအစ်ကိုများသာမက ဆွေမျိုးအချို့လည်း ကြိုဆိုခဲ့ကြသည်။ ထို့ပြင် ဒေသခံဆေးရုံဆက်သွယ်ရေးကော်မတီမှ ကိုယ်စားလှယ်တစ်ဦးကလည်း လှိုက်လှိုက်လှဲလှဲကြိုဆိုခဲ့၏။ သူသည် ကျွန်ုပ်တို့နှင့်အတူ ဆေးရုံသို့လိုက်လာကာ အတတ်နိုင်ဆုံးကူညီပေးခဲ့သည်။ တိုင်းတစ်ပါးနိုင်ငံ၌ပင် ကျွန်ုပ်တို့ကိုကူညီပေးမည့် ဝိညာဉ်ရေးညီအစ်ကိုများကို တွေ့ရခြင်းက ကျွန်ုပ်တို့ကိုစိတ်အားတက်စေခဲ့သည်။

ဆေးရုံတွင် ဒေါက်တာဂရာဖ်နှင့်တွေ့ဆုံသောအခါ တစ်ဖန် စိတ်အားတက်ခဲ့ရပြန်သည်။ သူသည် ကျွန်ုပ်တို့အပေါ် နားလည်မှုအပြည့်ရှိသည့်အပြင် ဗစ်ကီကို သွေးမသွင်းဘဲ အတတ်နိုင်ဆုံးကုသပေးမည်ဟုလည်း အာမခံခဲ့သည်။ ဗစ်ကီ၏ဟီမိုဂလိုဗင်အဆင့် ၅ g/dl အထိလျှော့ကျသွားလျှင်ပင် သွေးမသွင်းဘဲ ဆက်ကုသပေးရန် တလိုတလားရှိသည်။ ဗစ်ကီ၏ရောဂါကို စောစောသိရှိခဲ့ပြီး သူ့အားချက်ချင်းဆေးရုံတင်ခဲ့လျှင် ကုသမှုအောင်မြင်ဖို့ အခွင့်ကောင်းရှိသည်ဟု သူကပြောပြခဲ့သည်။ ဗစ်ကီ၏ရောဂါမျိုးကို သွေးမသွင်းဘဲ ဓာတုကုထုံးဖြင့် ကုသပေးခြင်းသည် သူ့အတွက် ပထမဆုံးအကြိမ်ဖြစ်မည်ဟု သူဝန်ခံခဲ့သည်။ ဒေါက်တာဂရာဖ်၏သတ္တိနှင့် ကူညီပေးဖို့သန္နိဋ္ဌာန်ကို ကျွန်ုပ်တို့ကျေးဇူးတင်ပြီး ချီးမွမ်းခဲ့သည်။

ငွေကြေးပြဿနာများ

ယခု မေးစရာကား ဗစ်ကီ၏ကုသစရိတ်ကို ကျွန်ုပ်တို့မည်သို့ပေးဆပ်မည်နည်း ဟူ၍ဖြစ်သည်။ နှစ်နှစ်စာကုသစရိတ် ဒုရှ်မာခ် ၁၅၀,၀၀၀ ခန့်ကုန်ကျမည်ဟု သိရသောအခါ ကျွန်ုပ်တို့အံ့အားသင့်ခဲ့ရသည်။ ကျွန်ုပ်တို့တွင် ထိုငွေပမာဏအလုံးအရင်း အမှန်မရှိသော်လည်း ဗစ်ကီကို မဖြစ်မနေချက်ချင်းစတင်ကုသရပေမည်။ ဂျာမနီတွင်ဆေးကုသရန် ဆွီဒင်မှထွက်လာခဲ့ကြသောကြောင့် ပြည်သူ့ကျန်းမာရေးအာမခံကြေး တစ်ပြားမှမရနိုင်တော့ချေ။ ယခု ကျွန်ုပ်တို့သည် ဆေးရုံတွင် အလွန်မမာမကျန်းဖြစ်နေသောသမီးလေးနှင့် ကူညီပေးရန်အသင့်ရှိနေသော ဆေးဘက်ဆိုင်ရာကျွမ်းကျင်သူတို့ရှေ့ ရောက်ရှိနေကြ၏၊ သို့သော်လည်း ကျွန်ုပ်တို့မှာ ငွေအလုံအလောက်မရှိကြချေ။

ဆေးရုံအမှုထမ်းများက ကျွန်ုပ်တို့သည် မာခ် ၂၀,၀၀၀ စရန်ပေးကာ ကျန်ငွေကိုပေးဆပ်ပါမည်ဟု လက်မှတ်ထိုးအာမခံလျှင် ကုသမှုကို ချက်ချင်းစတင်နိုင်မည်ဟုပြောကာ ကျွန်ပ်တို့ကိုကယ်မခဲ့သည်။ ကျွန်ုပ်တို့မှာ စုဆောင်းထားသောငွေအချို့ရှိပြီး မိတ်ဆွေများနှင့်ဆွေမျိုးများ၏ မေတ္တာပါအကူအညီဖြင့် မာခ် ၂၀,၀၀၀ ကိုပေးနိုင်ခဲ့ကြသော်လည်း ကျန်ငွေနှင့်ပတ်သက်၍ကော အသို့နည်း။

တစ်ဖန် ကျွန်ုပ်တို့၏ယုံကြည်ခြင်းတိုက်ပွဲတွင် ကျွန်ုပ်တို့ချည်းသာမဟုတ်ကြောင်းကို သိရှိခဲ့ရပြန်သည်။ ထိုစဉ်က ကျွန်ုပ်တို့မသိသေးသော ဝိညာဉ်ရေးညီအစ်ကိုတစ်ဦးသည် လက်ကျန်ငွေကို တလိုတလားတာဝန်ယူပေးခဲ့သည်။ သို့သော် ကျွန်ုပ်တို့သည် တခြားအစီအစဉ်များပြုလုပ်နိုင်ခဲ့သောကြောင့် သူ၏စေတနာရှိရှိပေးကမ်းမှုကို လက်ခံယူစရာ မလိုအပ်ခဲ့တော့ချေ။

ဆေးဘက်ဆိုင်ရာကျွမ်းကျင်မှု အကျိုးသက်ရောက်

ဓာတုကုထုံး စတင်လေသည်။ ရက်များ၊ အပတ်များကုန်လွန်ခဲ့၏။ တစ်ခါတစ်ရံ သမီးလေးရော ကျွန်ုပ်တို့ပါ အလွန်စိတ်ဆင်းရဲခက်ခဲပင်ပန်းခဲ့ကြရသည်။ တစ်ဖက်တွင်မူ၊ သမီးလေး၏အခြေအနေ တိုးတက်ကောင်းမွန်လာသည်ကိုတွေ့ရှိရတိုင်း ကျွန်ုပ်တို့အကြီးအကျယ်ပျော်ရွှင်ပြီး ကျေးဇူးတင်ခဲ့ကြရသည်။ ဓာတုကုထုံးဖြင့် ရှစ်လတိုင်ကုသခဲ့၏။ ဗစ်ကီ၏ဟီမိုကလိုဗင် နောက်ဆုံးအဆင့် ၆ g/dl ရောက်ခဲ့ပြီး ဒေါက်တာဂရာဖ်သည် သူ့ကတိအတိုင်း ဆက်ကုသပေးခဲ့သည်။

ခြောက်နှစ်ကျော်ကြာပြီးနောက် သမီးလေး၏ကျောရိုးအရည်ကို နောက်ဆုံးစစ်ဆေးရာတွင် သွေးကင်ဆာလုံးဝမရှိတော့ချေ။ ယခု မည်သည့်ရောဂါလက္ခဏာမျှမရှိတော့သည့် ပျော်ရွှင်သောသမီးလေးဖြစ်နေပြီ။ မှန်သည်၊ ဗစ်ကီ လုံးဝကျန်းမာလာခြင်းကား အံ့ဖွယ်တစ်ပါးပမာပင်။ အလားတူရောဂါမျိုးရှိကြသော ကလေးငယ်များစွာသည် ဓာတုကုထုံးဖြင့်ကုသကာ သွေးသွင်းကြသော်လည်း သေဆုံးခဲ့ကြသည်ကို ကျွန်ုပ်တို့သိကြသည်။

ကျွန်ုပ်တို့၏ယုံကြည်ခြင်းတိုက်ပွဲ အောင်မြင်ခဲ့ပြီ၊ သို့သော် ကျွန်ုပ်တို့၏ဆွေမျိုးများ၊ ခရစ်ယာန်ညီအစ်ကို၊ ညီအစ်မများနှင့် ဆေးဘက်ဆိုင်ရာကျွမ်းကျင်သူများ၏ အကူအညီလည်းပါသည်။ ဆေးရုံအချက်အလက်ဝန်ဆောင်လုပ်ငန်းက တစ်နေ့လျှင် ၂၄ နာရီလုံးလုံး ကူညီပေးခဲ့သည်။ ဒေါက်တာဂရာဖ်နှင့် သူ၏လုပ်ဖော်ကိုင်ဖက်များသည် ဗစ်ကီအား ပြန်ကျန်းမာလာစေရန် သူတို့၏အစွမ်းအစများကို အသုံးချခဲ့ကြ၏။ ယင်းတို့အားလုံးအတွက် ကျွန်ုပ်တို့အမှန်ပင် ကျေးဇူးတင်ကြပါသည်။

ကျွန်ုပ်တို့၏ယုံကြည်ခြင်း ခိုင်ခံ့လာ

သို့သော် ထို့ထက်ကား ယေဟောဝါဘုရားသခင်၏ မေတ္တာပါဂရုစိုက်မှုနှင့် ကိုယ်တော်၏စကားတော် သမ္မာကျမ်းစာမှတစ်ဆင့် ရရှိခဲ့သည့်ခွန်အားအတွက် ဘုရားသခင်ကို ကျွန်ုပ်တို့ကျေးဇူးတင်မဆုံးပါ။ နောက်ကြောင်းပြန်ကြည့်သော် ဘဝတွင်ကြုံတွေ့ခဲ့ရသည့် ဤပူပင်သောကမှ ကျွန်ုပ်တို့များစွာသင်ယူခဲ့ရပြီး ကျွန်ုပ်တို့၏ယုံကြည်ခြင်း ပိုမိုခိုင်ခံ့လာခဲ့ကြောင်း သဘောပေါက်ကြပါသည်။

ယခု ကျွန်ုပ်တို့၏အဖြစ်ချင်ဆုံးဆန္ဒမှာ ယေဟောဝါဘုရားသခင်နှင့် ကျွန်ုပ်တို့၏ရင်းနှီးသောဆက်ဆံရေးကို ထိန်းသိမ်းထားပြီး သမီးလေးကို ကိုယ်တော်၏တောင်းဆိုချက်များနှင့်အညီ အသက်ရှင်နေထိုင်ခြင်း၏တန်ဖိုးကို သွန်သင်ပေးခြင်းတို့ဖြစ်သည်။ မှန်ပါသည်၊ ကျွန်ုပ်တို့၏ သမီးလေးအား လာမည့်မြေကြီးပရဒိသုတွင် ထာဝရအသက်၏ဝိညာဉ်ရေးအမွေအနှစ်မွန်ကို ပေးလိုကြပါသည်။—ဆောင်းပါးရှင်ရေးသားပေးပို့သည်။

[အောက်ခြေမှတ်ချက်]