ကျွန်ုပ်တို့ ဘုရားသခင်ကို အမှန်တကယ် သိကျွမ်းနိုင်သလော

“ထာဝရအသက်ဟူမူကား မှန်သောဘုရားသခင်တစ်ဆူတည်းဖြစ်တော်မူသော ကိုယ်တော်ကို . . . သိကျွမ်းခြင်းတည်း။”—ယောဟန် ၁၇:၃။

“ဘုရားသခင်၏ပညာနှင့်ဉာဏ်တော်သည် အလွန်ကျယ်ဝန်းနက်နဲစွတကား။ စီရင်တော်မူချက်တို့ကို အဘယ်သူမျှစစ်၍မကုန်နိုင်။ ကြွတော်မူရာလမ်းတို့ကို လိုက်၍ရှာသော်လည်း မတွေ့မမီနိုင်” ဟူ၍တမန်တော်ပေါလု ပြောခဲ့သည်။ (ရောမ ၁၁:၃၃) ထိုစကားများကိုထောက်၍ ဘုရားသခင်၏ပညာနှင့်ဉာဏ်တော်ကို သိရှိရန် လူ့ဉာဏ်ဖြင့်မမီနိုင်သောကြောင့် ကိုယ်တော်နှင့် ကိုယ်တော်၏ရည်ရွယ်တော်မူချက်များကို သိကျွမ်းရန် မဖြစ်နိုင်ဟု ကျွန်ုပ်တို့ကောက်ချက်ချရမည်လော။

အချို့သောဘာသာရေးအတွေးအခေါ်သမားများက ဘုရားသခင်ကို သိကျွမ်းရန် မဖြစ်နိုင်ဟု ယုံကြည်ကြသည်။ ဘာသာတရားဆိုင်ရာစွယ်စုံကျမ်း [လိပ်] က ဤသို့ဆိုသည်– “ဘုရားသခင်ကို လုံးဝ သိကျွမ်း၍မရနိုင်။ . . . ဘုရားသခင်ကို နာမဖြင့်ဖော်ပြ၍သော်လည်းကောင်း၊ သတ်မှတ်၍သော်လည်းကောင်း မရ။ ဘုရားသခင့်နှင့်ပတ်သက်သော မည်သည့်သတ်မှတ်ဖော်ပြချက်မဆိုသည် အကန့်အသတ်သာဖြစ်၏။ . . . ကိုယ်တော်ကို အသိပညာအားဖြင့် မသိကျွမ်းနိုင်သကဲ့သို့ သိနိုင်သည့်အရာလည်းမဟုတ်ပါ။”a

နယူးစ်ဝိခ် [လိပ်] မဂ္ဂဇင်းဖော်ပြချက်အရ၊ လောကအဖွဲ့အစည်းများရှိ လူများစွာတို့သည် “အသစ်သောယုံကြည်ခြင်းတစ်မျိုး” ကို ယုံကြည်လာကြသည်။ ယင်းမှာ “အမှန်တရားတစ်ခုသာရှိပြီး ယင်းအမှန်တရားမှာ အမှန်တရားမရှိဟူ၍ဖြစ်သည်။”

သို့သော် လူအများသည် ဘဝရည်ရွယ်ချက်နှင့်ပတ်သက်သော မေးခွန်းများ၏အဖြေကို မရရှိကြချေ။ သူတို့သည် ဆင်းရဲနွမ်းပါးမှု၊ ရောဂါနှင့် အကြမ်းဖက်မှုစသည့် စိတ်ကြေကွဲစရာပြဿနာများကို တွေ့မြင်ရကြသည်။ ဘဝ၏မသေချာမရေရာမှုသည်လည်း သူတို့အတွက် အလွန်စိတ်ပျက်စရာဖြစ်ပေမည်။ ထိုသို့ဖြစ်ရသည့်အကြောင်းရင်းနှင့်ပတ်သက်၍ အဖြေများကို သိလိုကြသော်လည်း မသိရသည့်အခါ အဖြေမရှိ၍သာဖြစ်မည်ဟု ယူမှတ်ကြပေမည်။ ထို့ကြောင့် ထိုသို့သောသူအများတို့သည် ဖွဲ့စည်းထားသောဘာသာရေးမှ မိမိသဘောဖြင့် ထွက်သွားကြသော်လည်း ဘုရားသခင်ရှိကြောင်း ယုံကြည်နေကြဆဲဖြစ်သောကြောင့် ကိုယ့်နည်းကိုယ့်ဟန်ဖြင့် ဘုရားသခင်ကို ရှာဖွေလာကြသည်။

သမ္မာကျမ်းစာအမြင်

သမ္မာကျမ်းစာအပေါ် အကောင်းမြင်သဘောထားရှိပြီး ယေရှုခရစ်ကို ဘုရားသခင်၏ပြောရေးဆိုခွင့်ရှိသူအဖြစ် လက်ခံလိုကြသူတို့သည် သမ္မာကျမ်းစာအမြင်ကို သိရှိရန် စိတ်ဝင်စားသင့်သည်။ လမ်းနှစ်သွယ်အကြောင်း တစ်ချိန်က ယေရှုမိန့်ဆိုခဲ့သည့်စကားများကို သင်သတိရပေမည်။ “ပျက်စီးခြင်းသို့ရောက်သော လမ်းနှင့်တံခါးသည် ကျယ်ဝန်း . . . ၏။ အသက်ရှင်ခြင်းသို့ရောက်သော လမ်းသည် အလွန်ကျဉ်းမြောင်း . . . ၏။” ထိုလမ်းတစ်လမ်းစီတွင် လျှောက်လှမ်းသူတို့အား ခွဲခြားသိနိုင်ပုံကို ရှင်းပြကာ ကိုယ်တော်ဤသို့မိန့်တော်မူ၏– ‘ထိုသူတို့၏အကျင့်ကိုထောက်သော် သူတို့၏သဘောကို သိရကြလိမ့်မည်။’ မည်သည့်အကျင့်များနည်း။ “သခင်၊ သခင်ဟု ငါ့ကိုလျှောက်သောသူတိုင်း ကောင်းကင်နိုင်ငံတော်သို့ဝင်ရလိမ့်မည်မဟုတ်။ ကောင်းကင်ဘုံ၌ရှိတော်မူသော ငါ့ခမည်းတော်၏အလိုကိုဆောင်သောသူသာလျှင် ဝင်ရလိမ့်မည်” ဟု ယေရှုရှင်းပြခဲ့သည့်အတိုင်း သူတို့၏အပြောမဟုတ်ဘဲ သူတို့လုပ်ရပ်ဖြစ်သည်။ ဘုရားသခင်ကို ယုံကြည်ပါသည်ဟု ဆိုရုံနှင့် မလုံလောက်ပါ။ ဘုရားသခင့်အလိုတော်ကို ကျွန်ုပ်တို့လုပ်ဆောင်ရမည်။ ဘုရားသခင့်အလိုတော်နှင့်ပတ်သက်သည့် တိကျမှန်ကန်သောအသိပညာကို ဦးစွာသိရမည်မှာ သင့်လျော်လှပါသည်။—မဿဲ ၇:၁၃-၂၃။

ဘုရားသခင်နှင့်ပတ်သက်သည့် အသိပညာရရှိရန်မှာ လူသားတို့အတွက် ဖြစ်နိုင်ကြောင်း ယေရှု ရှင်းလင်းစွာဖော်ပြခဲ့သည်။ ကိုယ်တော်ဤသို့မိန့်တော်မူခဲ့သည်– “ထာဝရအသက်ဟူမူကား မှန်သောဘုရားသခင်တစ်ဆူတည်းဖြစ်တော်မူသော ကိုယ်တော်ကိုလည်းကောင်း၊ စေလွှတ်တော်မူသော ယေရှုခရစ်ကိုလည်းကောင်း သိကျွမ်းခြင်းတည်း။” (ယောဟန် ၁၇:၃) ဘုရားသခင်ဖော်ပြသည့် ဉာဏ်ပညာနှင့် အသိပညာကို ကြိုးစားဆည်းပူးလေ့လာမှသာ ရရှိနိုင်ကြောင်း ထင်ရှားသည်။ သို့သော် ထိုသို့ကြိုးစားဆည်းပူးလေ့လာသူတို့ကို ဘုရားသခင့်ပေးသည့်ဆုကျေးဇူးမှာ ထာဝရအသက်ဖြစ်သောကြောင့် ထိုသို့ကြိုးစားရှာဖွေခြင်းသည် အမှန်ပင်အကျိုးနပ်လှသည်။

[အောက်ခြေမှတ်ချက်]

[စာမျက်နှာ ၄ ပါ ရုပ်ပုံ]

အသက်ရှင်ခြင်းသို့ရောက်သောလမ်းသည် အလွန်ကျဉ်းမြောင်း၏ဟု ယေရှုမိန့်တော်မူခဲ့