အရောင်အသွေးစုံသော ဟေတီ သမ္မတနိုင်ငံတွင် သတင်းကောင်း ပျံ့နှံ့စေခြင်း

ဟေတီနှင့် ဒိုမီနီကန်သမ္မတနိုင်ငံတို့သည် ကရစ်ဘီယံကျွန်းစု၏ ငွားငွားစွင့်စွင့်တောင်တန်းကြီးများရှိရာ ဟစ္စပေနီယိုလာအပူပိုင်းဇုန်ကျွန်းပေါ်တွင် တည်ရှိသည်။ တောင်ထိပ်အတော်များများသည် ပေ ၈,၀၀၀ ကျော်အထိ မြင့်မား၏။ “အေးသော” လများ၌ တောင်တန်းများပေါ်မှ ရေအိုင်ငယ်များတွင် ဆီးနှင်းခဲနှင့်ရေခဲလွှာများ ဖြစ်ပေါ်တတ်သည်။

ဟေတီနိုင်ငံတောင်ပိုင်းမှ တောင်တန်းနှင့်လျှိုမြောင်ချိုင့်ဝှမ်းများတွင် အပူပိုင်းသစ်တောများ ထူထပ်စွာဖုံးလွှမ်းထားသည်။ ကျန်ဒေသများတွင်မူ သစ်တောပြုန်းတီးမှုကြောင့် တောင်ကတုံးများဖြစ်နေသည်။ သင်သည် ဟေတီတောင်ပိုင်း သို့မဟုတ် မြောက်ပိုင်းသို့ သွားရောက်လည်ပတ်ပါက ရှုမငြီးဖွယ်အလှတရားကို ခံစားရပေမည်။ မြွေလိမ်မြွေကောက် တောင်ပေါ်လမ်းကျဉ်းကျဉ်းမှနေ၍ ထိုနိုင်ငံနှင့်အဏ္ဏဝါပြင်၏အလှကို မြင်ကွင်းအဖုံဖုံဖြင့် ရင်သပ်ရှုမောဖွယ် တွေ့မြင်ရပေမည်။ တောက်ပသော ပန်းရောင်စုံများကိုလည်း မျက်စိတစ်ဆုံး ရှုစားနိုင်သည်။

အရောင်အသွေးစုံသော ဟေတီနိုင်ငံတွင် လူဦးရေ ၈.၃ သန်း နေထိုင်လျက်ရှိပြီး အများစုမှာ အာဖရိကမျိုးနွယ်မှဆင်းသက်သော ကျေးလက်သားများဖြစ်ကြ၏။ အများစုမှာ နွမ်းပါးကြသော်လည်း သဘောကောင်းပြီး ဧည့်ဝတ်ပျူငှာကြသည်။ ထိုနိုင်ငံတွင် ယေဟောဝါသက်သေများ သတင်းကောင်းဟောပြောနေသည်မှာ အနှစ် ၆၀ ကျော်ရှိခဲ့ပြီး လူတို့ကလည်း လှိုက်လှဲစွာကြိုဆိုလက်ခံကြသည်။—မဿဲ ၂၄:၁၄။

တောမြို့လေးတွင် ဟောပြောခြင်း

တောမြို့လေးတစ်မြို့သို့ ဦးဆုံးအကြိမ်လည်ပတ်ခဲ့သော အတွေ့အကြုံကို သာသနာပြုတစ်ဦး ဤသို့ရေးခဲ့၏–

“ပေါ့တ်အိုပရင့်စ်မြို့တော်မြောက်ပိုင်း မိုင် ၂၀ အကွာ ခါဘာရာမြို့မှာ ကျွန်မတို့ရဲ့ သာသနာပြုနေအိမ်ရှိတယ်။ အဲဒီကနေ နာရီဝက်ကားစီးသွားရတဲ့ ခါဇာလီတောမြို့လေးမှာ ၂၀၀၃၊ မတ်လတုန်းက ကျွန်မတို့ သွားဟောပြောခဲ့ကြတယ်။ အဲဒီမြို့မှာ သက်သေခံတွေ နောက်ဆုံးဟောပြောခဲ့တာ ၁၉၉၉ ခုနှစ်ကဆိုတော့ ကျွန်မတို့ အရမ်းစိတ်ထက်သန်နေကြတယ်။ မနက် ၇ နာရီမှာ ဗန်ကားနှစ်စီးနဲ့ ခရီးစထွက်ခဲ့ကြတယ်။ အားလုံး ၂၂ ယောက်ဆိုတော့ အသင်းတော်တစ်ခုလုံးနီးပါးပဲ။ မတ်စောက်ပြီး ဖုန်ထူတဲ့လမ်းတွေတစ်လျှောက် ကားစီးရင်း စကားပြောလိုက်၊ ရယ်မောလိုက်နဲ့ သစ်ပင်ကြီးတွေအုပ်ဆိုင်းနေတဲ့ တောင်ကြားတစ်ခုဆီ ရောက်လာတယ်။ တောင်ကြားတစ်လျှောက်စီးဆင်းနေတဲ့ မြစ်ကိုခွပြီး ခါဇာလီမြို့တည်ထားတယ်။”

“အေးချမ်းတဲ့ ဒီမြို့လေးရဲ့ရာဇဝင်ကို ပြောရရင် ၁၈၀၀ ပြည့်လွန်နှစ်အစောပိုင်းမှာ ဟေတီနိုင်ငံကကျွန်တွေ လွပ်လပ်ခွင့်ရဖို့ ကူညီတဲ့အနေနဲ့ ပိုလန်စစ်သားတချို့ ဒီကိုရောက်လာကြတယ်။ ပြီးတော့ ဟေတီအမျိုးသမီးတွေနဲ့ အိမ်ထောင်ကျပြီး မြေသြဇာကောင်းတဲ့ ဒီတောင်ကြားဒေသမှာ အခြေချခဲ့ကြတယ်။ ဒီလိုနဲ့ ကပြားချောချောလေးတွေ မွေးဖွားလာတယ်။ အသားဖြူ၊ အသားနီ၊ အသားညို၊ မျက်ဝန်းစိမ်း၊ မျက်ဝန်းညိုစတဲ့ ကျေးလက်သားမျိုးစုံက တကယ့်ကို စိတ်ဝင်စားစရာပဲ။”

“ကျွန်မတို့ ဦးဆုံးတွေ့တဲ့အိမ်က လူတစ်ယောက်တော့ သတင်းကောင်းကို လုံးဝစိတ်မဝင်စားဘူး။ ကျွန်မတို့ပြန်ထွက်လာတဲ့အခါ အမျိုးသားတစ်ယောက် ကျွန်မတို့ဆီလျှောက်လာတယ်။ ယေရှုနဲ့ဘုရားသခင် ကွာခြားတယ်လို့ ကျွန်မတို့ ယုံကြည်ထားတာဟုတ်မဟုတ် သူသိချင်တယ်။ ဒါနဲ့ သူ့ကျမ်းစာကိုသွားယူခိုင်းပြီး ဆွေးနွေးကြတယ်။ အဲဒီနောက် ယေရှုက ဘုရားသခင့်သားတော်၊ ယေဟောဝါက ‘စစ်မှန်ပြီး တစ်ဆူတည်းသောဘုရားသခင်’ ဆိုတာ သူယုံကြည်သွားတယ်။ (ယောဟန် ၁၇:၃) အများစုက ကျွန်မတို့ကို အေးအေးဆေးဆေးထိုင်ဟောပြောခွင့် ပေးကြတယ်။ တချို့က ‘ခင်ဗျားတို့ ဘယ်တော့ပြန်လာပြီး ကျမ်းစာသင်ပေးမလဲ’ လို့မေးကြတယ်။”

“မွန်းတည့်ချိန်ရောက်တော့ အရိပ်ကောင်းတဲ့နေရာမှာ နေ့လယ်စာပြင်ကြတယ်။ ညီအစ်မနှစ်ယောက်က ငါးဟင်းတစ်အိုးကြီး ချက်တယ်။ အရသာရှိမှရှိ! စားသောက်ရင်း၊ စကားပြောရင်းနဲ့ လမ်းသွားလမ်းလာတွေကိုလည်း ဟောပြောခဲ့ကြတယ်။ အဲဒီနောက် မြစ်တစ်ဖက်ကမ်းကို ကူးခဲ့ကြတယ်။ ကိုယ့်တဲအိမ်အနားက သစ်ပင်အောက်တွေမှာထိုင်နေကြတဲ့ ဖော်ရွေသူတွေကို ဟောပြောရတာ သိပ်ကောင်းတာပဲ။ ကလေးတွေ ဆော့ကစားသံ၊ မြစ်ကမ်းမှာ အမျိုးသမီးတွေ အဝတ်လျှော်ဖွပ်သံ၊ အမယ်အိုတွေရဲ့ ကော်ဖီကြိတ်သံတွေက နားဝင်ချိုလိုက်တာ!”

“ပျော်လို့မဆုံးဖြစ်နေတဲ့ ကျွန်မတို့အုပ်စုက လေးနာရီထိုးတော့မယ်ဆိုတော့ ခါဘာရာမြို့ကိုပြန်ဖို့ ဗန်ကားတွေဆီ ဦးတည်နေကြပါပြီ။ လှိုက်လှဲဖော်ရွေသူတွေနေထိုင်တဲ့ ခါဇာလီမြို့လေးကို ဦးဆုံးအကြိမ်ရောက်ခဲ့တာ ကျွန်မတို့လင်မယား သိပ်ပျော်တယ်။”

၁၉၄၅ ခုနှစ်တွင် ဦးဆုံးသာသနာပြုများ ဟေတီနိုင်ငံသို့ ရောက်လာခဲ့ချိန်မှစ၍ ကြေညာသူများ မှန်မှန်တိုးများလျက်ရှိသည်။ ယခုအခါ ဟောပြောခြင်းလုပ်ငန်းတွင် လူ ၁၄,၀၀၀ ကျော်ပါဝင်နေပြီး သတင်းကောင်းကို ဆက်လက်ကြွေးကြော်နေကြသည်။ ကျမ်းစာသင်အံမှု ၂၂,၀၀၀ ကျော်ကျင်းပနေသည်။ ၂၀၀၅၊ မတ်လတွင် အောက်မေ့ပွဲတက်ရောက်ခဲ့သူ ၅၉,၃၇၂ ယောက် ရှိခဲ့သည်။ ယေဟောဝါသက်သေများ၏လုပ်ငန်းကြောင့် လူတို့အကျိုးခံစားခဲ့ရသော နည်းလမ်းအသွယ်သွယ်ကို သုံးသပ်ကြည့်ပါ။

ရောင်စုံအနုပညာလက်ရာများမှ သတင်းကောင်း

ဟေတီနိုင်ငံသားများသည် တောက်ပသောအရောင်ကို နှစ်ခြိုက်ကြကြောင်း သူတို့၏ဝတ်စုံ၊ ဆေးရောင်စုံအိမ်များ၊ ဥယျာဉ်ထဲမှပန်းရောင်စုံနှင့် အနုပညာလက်ရာများတွင် တွေ့မြင်နိုင်သည်။ လားရ်ဟေဂျန်ဟုခေါ်သော အရောင်တောက်တောက် ဆီဆေးပန်းချီများကို ပေါ့တ်အိုပရင့်စ်တစ်မြို့လုံးအနှံ့ လမ်းများတွင် ပြသထား၏။ ယင်းတို့ကို ကမ္ဘာ့ဒေသအသီးသီးမှ လာရောက်ဝယ်ယူကြသည်။

တောက်ပသောဆေးရောင်စုံကို ပန်းချီကားများပေါ်တွင်သာ မြင်တွေ့ရသည်မဟုတ်ပါ။ ဒီဇိုင်းဆန်းဆန်း ဆေးခြယ်မွမ်းမံထားသည့် ကာမီယိုနက်တ်ဟုခေါ်သော ခရီးသည်တင်ယာဉ်များလည်း ပေါ့တ်အိုပရင့်စ်မြို့ လမ်းများပေါ်တွင် ပျားပန်းခတ်သွားလာနေသည်။ ထိုယာဉ်များတွင် ကျမ်းစာအကြောင်းများကိုအခြေခံ၍ ရေးခြယ်ထားသောပန်းချီများ တွေ့ရတတ်သည်။

ဧဒင်ဥယျာဉ်မှ အာဒံနှင့်ဧဝကဲ့သို့သော သင်ရင်းနှီးပြီးသားရုပ်ပုံများကို လမ်းတစ်လျှောက် တွေ့မြင်နိုင်သည်။ ဖြတ်သန်းသွားသော ကားနောက်မှန်တွင် ထိုရုပ်ပုံများ ရေးခြယ်ထားသည်ကို တွေ့ရပေမည်။ ယေဟောဝါ၏နာမတော်ပါသော ကျမ်းချက် သို့မဟုတ် ဆောင်ပုဒ်များကို ယာဉ်များ၊ စီးပွားရေးလုပ်ငန်းအမည်များတွင် တွေ့ရလေ့ရှိသည်။

ကျောင်းတွင် သတင်းကောင်းဟောပြောခြင်း

ဟေတီရှိ သက်သေခံလူငယ်များသည် ကျောင်းနေဖက်များ ကျမ်းစာလေ့လာရန် ကူညီပေးနိုင်သော အခွင့်ကောင်းများရရှိကြသည်။ သာဓကအနေနှင့် ၁၇ နှစ်အရွယ် သက်သေခံမိန်းမငယ်တစ်ဦး၏ တွေ့ကြုံမှုကို သုံးသပ်ကြည့်ပါ–

“တစ်နေ့မှာ အတန်းသားတစ်ယောက်က ‘မတရားမေထုန်’ ဆိုတာ ဘာလဲလို့ ကျွန်မကိုလာမေးတယ်။ ငါ့ကို ရိသဲ့သဲ့လုပ်ချင်တာပဲလို့တွေးမိပြီး သူ့ကိုအရေးမလုပ်ခဲ့ဘူး။ ဒါပေမဲ့ သူက နောက်ကျောင်းသားတစ်ဦးကို ဒီမေးခွန်းပဲ ထပ်မေးတော့ တစ်တန်းလုံး စိတ်ဝင်စားလာကြတယ်။ ဒါနဲ့ အဲဒီအကြောင်းကို ရှာဖွေလေ့လာပြီး နောက်အပတ်မှာ ယေဟောဝါသက်သေတွေက ကိုယ်ကျင့်တရား၊ ဝိညာဉ်ရေး၊ ကာယရေးတွေမှာ ဘာကြောင့်သန့်ရှင်းစင်ကြယ်ကြတယ်ဆိုတာ တစ်တန်းလုံးကို ရှင်းပြခဲ့တယ်။”

“ကျောင်းသားတွေ မေးခွန်းအများကြီးမေးကြပြီး ကျွန်မက ကျမ်းစာသုံးပြီး အဖြေပေးတဲ့အခါ လက်ခံကြတယ်။ အစပိုင်းမှာ မေးခွန်းမေးဖို့တွန့်ဆုတ်နေတဲ့ ကျောင်းအုပ်ကြီးတောင် မေးခွန်းအများကြီးမေးခဲ့ပြီး တခြားအတန်းတွေမှာ ကျွန်မ ရှင်းပြနိုင်ဖို့ စီစဉ်ပေးတယ်။ လူငယ်များအမေး—တာသွားသည့်အဖြေaစာအုပ်ကိုပြတဲ့အခါ အများစုက စိတ်ဝင်စားကြတယ်။ နောက်တစ်နေ့မှာ အတန်းသားတွေကို ၄၅ အုပ်ဝေငှနိုင်ခဲ့တယ်။ အများစုက ချက်ချင်းပဲ အပြီးဖတ်ကြပြီး တချို့က သူတို့အိမ်အနီးအနားက သက်သေခံတွေနဲ့ ကျမ်းစာလေ့လာနေကြပြီ။ အခုဆိုရင် ကျွန်မရပ်ကွက်ထဲက ကျောင်းသားတစ်ယောက် အစည်းအဝေးအားလုံးကို မှန်မှန်တက်နေပြီ။”

ကရီအောလ်ဘာသာစကားကို အသုံးပြုခြင်း

ဟေတီနိုင်ငံနှင့် ထိုနိုင်ငံသားတို့သည် အရောင်အသွေးစုံပြီး စိတ်ဝင်စားဖွယ်ကောင်းသကဲ့သို့ ပြင်သစ်စကားလုံးနှင့် အနောက်အာဖရိကသဒ္ဒါ ပေါင်းစပ်ထားသော ကရီအောလ်ဘာသာစကားလည်း ထို့အတူပင်။ ယင်းသည် ဟေတီလူမျိုးတို့ အနှစ်သက်ဆုံး မိခင်ဘာသာစကားဖြစ်၏။ ယေဟောဝါသက်သေများသည် အမှုဆောင်လုပ်ငန်းတွင် ထိုဘာသာစကားကို အဓိကထားသုံးကြပြီး ဟေတီကရီအောလ်စကားဖြင့် ကျမ်းစာစာပေများ ပိုမိုထွက်ရှိရန် စီစဉ်နေကြသည်။

၁၉၈၇ ခုနှစ်တွင် ကမ္ဘာသားဘဝ ထာဝရစံစားကြ! ဘရိုရှာကို ဟေတီကရီအောလ်ဘာသာစကားဖြင့် ပြန်ဆိုခဲ့ပြီးနောက် ထာဝရအသက်ရစေသော အသိပညာစာအုပ်၊ ကျွန်ုပ်တို့ထံမှ ဘုရားသခင် အဘယ်အရာတောင်းဆိုတော်မူသနည်းဘရိုရှာတို့ကို ပြန်ဆိုခဲ့သည်။ ယင်းစာပေများက ကျမ်းစာအခြေခံအသိပညာရလိုသော သင်သားအသစ်များအတွက် များစွာအထောက်အကူပြုသည်။ ၂၀၀၂၊ စက်တင်ဘာ ၁ ရက်မှစ၍ ကင်းမျှော်စင်ကို ဟေတီကရီအောလ်ဘာသာစကားဖြင့် ထုတ်ဝေခဲ့သည်။ ပြင်သစ်ဘာသာစကားဖြင့် စာပေများကို အသုံးပြုဆဲဖြစ်သော်လည်း လူများစွာမှာ မိခင်ဘာသာစကားဖြင့် ဖတ်ရှုရသည်ကို ပိုနှစ်ခြိုက်ကြ၏။

အကျဉ်းထောင်တွင် သတင်းကောင်းဝေမျှခြင်း

ယေဟောဝါသက်သေများသည် အကျဉ်းထောင်များတွင် မကြာသေးမီက သတင်းကောင်းဟောပြောခဲ့ကြ၏။ ထိုစိတ်ပျက်ဝမ်းနည်းဖွယ်အခြေအနေကို ရင်ဆိုင်နေရသူများထံ နှစ်သိမ့်မှုပေးသောသတင်းကောင်း ဝေမျှရသည်ကို သက်သေခံများ ဝမ်းမြောက်ကြသည်။ ခရစ်ယာန်ညီအစ်ကိုတစ်ဦး ဤသို့သတင်းပို့၏–

“အကျဉ်းထောင်တစ်ခုကို သွားလည်ပတ်တဲ့အခါ ကျွန်တော်တို့နဲ့ဆုံတွေ့နိုင်ဖို့ အကျဉ်းသားတွေကို အခန်းကျယ်တစ်ခုထဲ ခေါ်လာပေးတယ်။ သူတို့ဘယ်လိုများတုံ့ပြန်မလဲလို့ စိုးရိမ်မိတယ်။ ကျမ်းစာကိုနားလည်နိုင်အောင် ကူညီပေးဖို့ ကျွန်တော်တို့ရောက်လာတဲ့အကြောင်း ရှင်းပြတဲ့အခါ အကျဉ်းသား ၅၀ စလုံးက ကောင်းကောင်းလက်ခံကြတယ်။ ဒါနဲ့ ကရီအောလ်ဘာသာစကားနဲ့ထုတ်ဝေထားတဲ့ ရေးတတ်ဖတ်တတ်ရန် ကိုယ်တိုင်လုံ့လထုတ်၊ ကမ္ဘာသားဘဝ ထာဝရစံစားကြ! စတဲ့ဘရိုရှာတွေကိုသုံးပြီး အကျဉ်းသား ၂၆ ယောက်နဲ့ ကျမ်းစာလေ့လာနိုင်ခဲ့တယ်။ ဆယ်ယောက်က စာမတတ်ပေမဲ့ စကားလုံးတွေကိုနားလည်နိုင်ဖို့ ဘရိုရှာမှာပါတဲ့ ရုပ်ပုံတွေကို ဘယ်လိုအသုံးပြုရမယ်ဆိုတာ ကျွန်တော်တို့ရှင်းပြတဲ့အခါ စိတ်ဝင်စားကြတယ်။”

သက်သေခံများ ပြန်ရောက်လာသောအခါ အကျဉ်းသားတစ်ဦးက ဤသို့ပြောပြ၏– “ဘရိုရှာကို ကျွန်တော် အခေါက်ခေါက်ဖတ်ပြီးပြီ။ ဘာကိုဆိုလိုတယ်ဆိုတာ အမြဲစဉ်းစားပြီး အခု ခင်ဗျားပြန်အလာကို မျှော်နေတာ။” လက်နက်ကိုင်ဓားပြမှုကြောင့် အဖမ်းခံရသော အကျဉ်းသားတစ်ဦးက သူပြုပြင်ပြောင်းလဲလိုကြောင်းပြောကာ သူ့ဇနီးကို ကျမ်းစာသင်ပေးရန် တောင်းဆိုခဲ့သည်။ ထောင်ကျနေသော ကလေးနှစ်ယောက်ဖခင်တစ်ဦးလည်း ယုံကြည်ချက်အမှန်နှင့်အမှားကို သူ့ဇနီးခွဲခြားသိနိုင်ဖို့ ကူညီပေးရန် ထပ်တူတောင်းဆိုခဲ့သည်။ ချာ့ချ်အသင်းသားများထံမှ ငွေအမြောက်အမြား လိမ်ယူခဲ့သော ခရစ်ယာန်ဘုန်းကြီးတစ်ဦးက ယခု အမှန်တရားကိုတွေ့ရှိပြီဖြစ်၍ သူထောင်မှလွတ်လာသည့်အခါ မိမိအသင်းသားများကို ယေဟောဝါသက်သေဖြစ်လာရန် ကူညီလိုသည်ဟုဆိုခဲ့၏။

အကျဉ်းသားတစ်ဦးက ကရီအောလ်ဘာသာစကားဖြင့် တောင်းဆိုဘရိုရှာ မရရှိသောကြောင့် အခြားတစ်ဦးထံမှ တစ်စောင်လုံးမိတ္တူကူးပြီး အလွတ်ကျက်မှတ်ခဲ့သည်။ အကျဉ်းကျနေသော အမျိုးသမီးတစ်ဦးသည် မိမိလေ့လာသိရှိခဲ့ရာများကို အခန်းဖော်ကိုးဦးအား ပြောပြပြီး သူတို့နှင့် ကျမ်းစာသင်အံခဲ့သည်။ အကျဉ်းသားတစ်ဦးသည် ဘရိုရှာကိုလေ့လာပြီးသည်နှင့် အသိပညာစာအုပ်ဖြင့် ဆက်လေ့လာနေကာ အခြားအကျဉ်းသားများကို စတင်ဟောပြောနေပြီဖြစ်သည်။ မကြာမီ၊ အကျဉ်းသားလေးဦး သူနှင့်ကျမ်းစာလေ့လာခဲ့သည်။

မာကိုနီသည်b ကျမ်းစာလေ့လာခဲ့ဖူးပြီး သူ၏ဆွေမျိုးများမှာ ယေဟောဝါသက်သေများဖြစ်သည်။ မိမိဆွေမျိုးများ ယူလာပေးသော ကျမ်းစာ,စာပေများဖတ်ရှုရန် အခြားအကျဉ်းသားများကို သူတိုက်တွန်းသည်။ သူဤသို့ပြောပြ၏– “အကျဉ်းသားတွေကို စာပေတွေဝေငှတဲ့အခါ ကျွန်တော့်ကို ယေဟောဝါသက်သေလို့ ခေါ်ကြတယ်။ သက်သေခံတစ်ယောက်ဖြစ်တယ်ဆိုတာ ဘာကိုဆိုလိုမှန်း သိထားတဲ့အတွက် ကျွန်တော် သက်သေခံတစ်ယောက်မဟုတ်ဘူးလို့ ပြန်ရှင်းပြခဲ့တယ်။ အခု ကျွန်တော်ကျမ်းစာလေ့လာပြီး နှစ်ခြင်းခံနိုင်ဖို့ အလေးအနက်ထားစဉ်းစားချင်တယ်။ ငယ်ငယ်တုန်းကသာ ကျွန်တော့်အစ်ကိုတွေလို လိမ္မာခဲ့ရင် ထောင်ကျရတဲ့ဘဝမျိုးရောက်မှာ မဟုတ်ဘူး။”

မာကိုနီထံမှ စာပေများရရှိခဲ့သော အကျဉ်းသားတစ်ဦးက သူ့ထံလာလည်ပတ်သော သက်သေခံကို ဤသို့ပြောခဲ့၏– “ပြီးခဲ့တဲ့တနင်္လာနေ့က ခင်ဗျားရောက်မလာခင် ကျွန်တော်စိတ်ဓာတ်ကျပြီး သေကြောင်းကြံခဲ့တယ်။ ဒါပေမဲ့ ဒီမဂ္ဂဇင်းဖတ်လိုက်ရတော့ ကျွန်တော့်လုပ်ရပ်ကို ခွင့်လွှတ်ဖို့နဲ့ လမ်းမှန်ပြသမယ့် လူတစ်ဦးကိုစေလွှတ်ပေးဖို့ ဘုရားသခင်ဆီ ဆုတောင်းခဲ့တယ်။ နောက်တစ်နေ့၊ ခင်ဗျားရောက်လာပြီး အကျဉ်းသားတွေကို ကျမ်းစာလေ့လာဖို့ ကမ်းလှမ်းတဲ့အခါ ကျွန်တော်ပျော်လိုက်တာ! ယေဟောဝါကို ဘယ်လိုဝတ်ပြုကိုးကွယ်ရမယ်ဆိုတာ ကျွန်တော့်ကို သင်ပေးပါဗျာ။”

နိုးလော့!က လူများစွာကို သတင်းကောင်းကြားသိစေ

၂၀၀၁၊ ဒီဇင်ဘာ ၈ ရက်ထုတ် နိုးလော့!တွင် သူနာပြုအတတ်ပညာအကြောင်း ဖော်ပြထား၏။ အမျိုးသမီးတစ်ဦးသည် စောင်ရေ ၂,၀၀၀ ရယူပြီး ပေါ့တ်အိုပရင့်စ်မြို့တွင် ဆွေးနွေးပွဲတက်ရောက်နေကြသော သူနာပြုများကို ဝေငှခဲ့သည်။ ရဲသားနှင့် ၎င်းတို့၏လုပ်ဆောင်မှုအကြောင်း ဆောင်းပါးများပါရှိသော ၂၀၀၂၊ ဇူလိုင် ၈ ရက်ထုတ် နိုးလော့! [လိပ်] ကို ပေါ့တ်အိုပရင့်စ်မြို့ရှိ ရဲများထံ အနှံ့အပြားဝေငှခဲ့ရသည်။ ထိုမဂ္ဂဇင်းများအတွက် သူတို့ကျေးဇူးတင်ပြီး ယခုတိုင် သက်သေခံများနှင့်ဆုံလျှင် ယင်းကို တောင်းတတ်ကြသည်။

မကြာသေးမီက ကမ္ဘာ့ကျန်းမာရေးအဖွဲ့မှ အရာရှိတစ်ဦးသည် အေ့ဒ်စ်ရောဂါအကြောင်းပညာပေးရန် စီစဉ်ခဲ့သည်။ ယေဟောဝါသက်သေဌာနခွဲရုံးသည် သူ့ကိုဖိတ်ခေါ်ကာ နိုးလော့!မှ ထိုရောဂါအကြောင်းဆောင်းပါးများကို ပြသခဲ့သည်။ အေ့ဒ်စ်ရောဂါကိုကာကွယ်ရန် အကောင်းဆုံးနည်းလမ်းနှင့် ထိုရောဂါကူးစက်ခံရသူများကို မည်သို့ကူညီနိုင်ကြောင်း ကျမ်းစာဖြင့်ဆွေးနွေးထားသော ဆောင်းပါးများ ဖတ်ရှုရသောကြောင့် သူသဘောကျသွားသည်။ ထိုရောဂါအကြောင်း ပညာပေးရာတွင် နိုးလော့!သည် ရှေ့တန်းမှပါဝင်ကြောင်း သူမှတ်ချက်ချခဲ့၏။

ယေဟောဝါသက်သေများသည် ကမ္ဘာတစ်ဝန်းမှ ၂၃၄ နိုင်ငံတွင် သတင်းကောင်းပျံ့နှံ့စေသည့်နည်းတူ အရောင်အသွေးစုံသော ဟေတီနိုင်ငံတွင်လည်း နည်းလမ်းအသွယ်သွယ်ဖြင့် ဟောပြောနေကြသည်။ လူများစွာသည် မျှော်လင့်ခြင်းသတင်းကောင်းကို လက်ခံနေကြပြီး လက်ရှိဘဝပြဿနာများကိုကျော်လွန်၍ ကမ္ဘာသစ်ကိုရှုမျှော်နိုင်ရန် အကူအညီရရှိနေကြသည်။ ထိုတွင် စစ်မှန်သောဘုရားသခင် ယေဟောဝါအား ဝတ်ပြုသူခပ်သိမ်း ပြည့်ဝစုံလင်သောအသက်တာကို မွေ့လျော်ခံစားရပေလိမ့်မည်။—ဗျာ. ၂၁:၄။

[အောက်ခြေမှတ်ချက်များ]

[Picture Credit Line on page 9]

Background: ©Adalberto Rios Szalay/​photodisc/​age fotostock