သတင်းကောင်း ဝေငှခြင်း—လူတို့နှင့် စကားစမြည်ပြောဆိုခြင်းဖြင့်

^၁ အဘိဓာန်ကျမ်းတစ်ခုအရ စကားစမြည်ပြောဆိုခြင်းသည် “ခံစားချက်များ၊ တွေ့ရှိချက်များ၊ သဘောထားများ သို့မဟုတ်အကြံဉာဏ်များကို နှုတ်ဖြင့်ဖလှယ်ခြင်းဖြစ်သည်။” သို့သော် သင်တွေ့ဆုံသူတို့သည် ဘာသာရေးအတိုက်အခံပြုသူများ၊ သို့မဟုတ် ကိုယ်ရေးကိုယ်တာနှင့် အလုပ်ရှုပ်နေသူများဖြစ်နေမည်ဆိုလျှင် ကျမ်းစာပေါ်အခြေခံသည့်စကားစမြည်ပြောဆိုခြင်းကို မည်သို့စတင်နိုင်မည်နည်း။ နားထောင်သူတို့နှင့်ဆွေးနွေးနှီးနှောနိုင်ရန် ယေရှုမေးခွန်းများမေးမြန်းခဲ့သည်။​—ယော၊ ၄:၉-၁၅၊ ၄၁၊ ၄၂။

^၂ ရိုးသားသောနှလုံးရှိသူတို့ကိုရှာဖွေတွေ့ရှိကာ သူတို့နှင့်စကားစမြည်ပြောဆိုနိုင်ရန်နည်းလမ်းဖွင့်ပေးရန် ဘုရားသခင်ထံမှအကူအညီရဖို့ စေတနာစိတ်နှင့်ဆုတောင်းသင့်သည်။ အိမ်ရှင်တစ်ဦးစီသည် ယေဟောဝါ၏ကျေးကျွန်တစ်ဦးဖြစ်လာမည့်အလားအလာရှိသူအဖြစ် သဘောထားမည်ဆိုလျှင် သူ့အားသက်သေခံရန် လွယ်ကူစေသည်။ ဤစိတ်နေသဘောထားသည် စိတ်ဝင်စားသူအတွက် ဆွဲဆောင်မှုဖြစ်စေမည့် စိတ်ရင်းမှန်ဖြင့်ခင်မင်စွာ သမ္မာတရားကိုတင်ပြရန် အကူအညီဖြစ်စေမည်။

မိမိ၌ရှိရာကိုအသုံးပြု

^၃ Reasoning စာအုပ်၊ စာမျက်နှာ ၉-၁၅ တွင် အလွန်ကောင်းသောနိဒါန်းများပါသည်။ ယင်းတို့အနက်အများမှာ မေးခွန်းများကို ထိရောက်စွာအသုံးပြုထားသည်။ အိမ်ရှင်သည် မေးခွန်းတစ်ခုကိုတုံ့ပြန်သည့်အခါ ရိုသေစွာနားထောင်ပါ။ ထိုနောက် သူပြောလိုက်သည့်စကားကို ထည့်သုံးသပ်ခဲ့ကြောင်း အိမ်ရှင်အားသိစေပါ။​—ကော၊ ၄:၆။

^၄ မေးခွန်းမေးလိုက်သည့်အခါ အိမ်ရှင်မည်သို့ဖြေဆိုမည်ကို သင်သိချင်မှသိမည်။ ထိုက်သင့်လျော်ကန်စွာ စကားပြုပြင်ပြောဆိုရန် အသင့်ရှိပါ။ သူစိတ်ဝင်စားရာနှင့်ဆိုင်သော ကျမ်းစာမှအကြောင်းကို ထပ်ဆင့်ဖေါ်ပြပေးခြင်းဖြင့်၊ စဉ်းစားစရာအခြားမေးခွန်းများကိုထပ်မေးခြင်းဖြင့် အပြန်အလှန်စကားပြောဆိုနိုင်ရန်ကြိုးစားပါ။

ကြိုတင်ပြင်ဆင်ပါ

^၅ သင့်ရပ်ကွက်ရှိသူတို့၏ စဉ်းစားဆင်ခြင်ပုံကို သင်ကြိုသိပြီးသားဖြစ်နေမည်။ ထိုသို့ဆိုလျှင် သင့်ရပ်ကွက်အတွက် အထိရောက်ဆုံးဖြစ်မည့်နိဒါန်းကိုပြင်ဆင်ပါ။ သို့မဟုတ် Reasoning စာအုပ်ပါနိဒါန်းတစ်ခုကို ရွေးချယ်ပါ။ နောက်ဆုံးအပြန်အလှန်စကားအတွက်အကြောင်းအရာနှင့်ကိုက်ညီရန် ဤနိဒါန်းတစ်ခုကိုပြုပြင်ပြောဆိုခြင်းကား သင့်လိုအပ်ရာဖြစ်နေပေမည်။ အိမ်ရှင်စိတ်ဝင်စားမည်ထင်သည့်အကြောင်းနှင့် စကားစမြည်စပြောဆိုပြီး ပြဿနာတစ်ခုကိုတင်ပြကာ ကျမ်းစာ၏ဖြေရှင်းချက်ကို ဆက်ပြောပြပါ။ သူ့သဘောထားကိုတင်ပြသည့်အခါ ယင်းနှင့်စပ်လျဉ်း၍ အပြုသဘောရှိရှိမှတ်ချက်ချပြောဆိုပါ။ သူ၏သဘောနှင့်ခံစားချက်ကို သင်စိတ်ဝင်စားကြောင်းတင်ပြခြင်းက သင်နှင့်ဆက်စကားပြောဆိုချင်စိတ်ရှိပါလိမ့်မည်။ သဘောတူညီနိုင်သည့် အချက်များရှာတွေ့ရန်ကြိုးစားပါ။ ယင်းတို့ကိုထည့်ဆွေးနွေးပါ။ လူ့ပြဿနာများ၏ ကျမ်းစာဖြေရှင်းနည်းကား နိုင်ငံတော်မှရမည့်ကောင်းချီးများဖြစ်ကြောင်း အလေးအနက်တင်ပြခြင်းဖြင့် အပြုသဘောပါပါစကားပြောဆိုပါ။

^၆ သဘောထားကွဲလွဲချက်များကို ဆက်စကားပြောနိုင်ရန် လမ်းကြောင်းများအဖြစ် သဘောထားပါ။ အိမ်ရှင်အနေနှင့် ဆင်ခြင်ကြည့်လိုစိတ်ရှိက ဤသို့မေးမြန်းနိုင်သည်။ “ဤရှုဒေါင့်မှ သင်တွေးကြည့်ဖူးသလော။” ထိုနောက် ယင်းအကြောင်း ဘုရားသခင့်နှုတ်ကပတ်တော်က မည်သို့ဖေါ်ပြထားကြောင်း တင်ပြပါ။ အိမ်ရှင်သည် စိတ်ခိုင်မာပါက သင့်စကားကိုသူလက်ခံရမည်ဟု အခိုင်အမာ မပြောပါနှင့်။ ထိုသို့ပြောမည့်အစား ခင်မင်သောစကားများဖြင့် နိဂုံးချုပ်ကာ သတင်းကောင်းကို နောက်တစ်ကြိမ်ပြန်တင်ပြခွင့်ရနိုင်ရန် လမ်းဖွင့်ထားခဲ့ပါ။​—သု၊ ၁၂:၈၊ ၁၈။

^၇ အချို့သူတို့သည် ကြုံတုန်းဆုံခိုက်စကားစမြည်ပြောဝံ့ဆိုဝံ့ရှိကြသည်။ လမ်းပေါ်၊ သို့မဟုတ် မိမိတို့ခြံဝင်းအတွင်း အလုပ်လုပ်နေသူ၊ အပန်းဖြေနေသူတို့နှင့် စကားစပြောရန်မဝံ့မရဲမရှိပါနှင့်။ သူတို့လုပ်ကိုင်နေသည့်အလုပ်ကို သင်တကယ်စိတ်ဝင်စားသည်ကို သူတို့ကြိုက်နှစ်သက်ပေမည်။ သို့မှဆက်၍ ကမ္ဘာသည် များမကြာမီ ပရဒိသုဖြစ်လုပြီဟူသော ကျမ်းစာကတိကို ဆွေးနွေးနိုင်ပေမည်။ စကားစမြည်စလိုက်သည့်အခါ အိမ်ရှင်အတွက် သာယာနာပျော်ဖွယ်ဖြစ်ပါလေစေ။ အိမ်ရှင်သည်ဘုရားသခင်၊ ကိုယ်တော်၏နှုတ်ကပတ်တော်နှင့် ကိုယ်တော့်ကျေးကျွန်များကို နှစ်ခြိုက်သောသဘောထားရှိနေရန် သင့်ဖက်မှအတတ်နိုင်ဆုံး ကြိုးစားပါလေ။ ဤနည်းဖြင့် သူ့နှလုံးကို သင်ထိမိရန်ကြိုးစားသော်လည်း မအောင်မြင်ခဲ့သည်တိုင် နောက်တစ်ကြိမ်သက်သေခံတစ်ဦး သူ့ထံရောက်သည့်အခါ လက်သင့်ခံလိုစိတ်များလာပေမည်။