ခရစ်တော်နည်းတူ ဘုရားရေးရာဆက်ကပ်အပ်နှံခြင်းဝတ်ကို ပြုကျင့်လော့

^၁ “ဘုရားရေးရာဆက်ကပ်အပ်နှံခြင်း” ဟူသည့် ကျမ်းစာစကားသည် ယေဟောဝါဘုရားသခင်အပေါ် ကျွန်ုပ်တို့၏ရိုသေကိုင်းရှိုင်းမှုနှင့် ကိုယ်တော့်အမှုတော်ကို သစ္စာရှိရှိဆောင်ရွက်ခြင်းကိုဆိုလိုသည်။ ဘုရားရေးရာဆက်ကပ်အပ်နှံခြင်းဝတ်ကို ဦးဆုံးတင်ပြခဲ့သူကား သခင်ယေရှုခရစ်ဖြစ်သည်။

^၂ မြေကြီးပေါ် ကိုယ်တော်၏ဘဝလမ်းစဉ်အားဖြင့် ဘုရားရေးရာဆက်ကပ်အပ်နှံခြင်းဝတ်ကို အပြည့်အဝထမ်းဆောင်သူဖြစ်ကြောင်း ယေရှုအထူးထင်ရှားပြသည်။ ထိုကြောင့် ယေဟောဝါဘုရားသခင်၏ ဦးဆုံးပြောရေးဆိုခွင့်ရှိသူအဖြစ် ကိုယ်တော်၏ကဏ္ဍနှင့်ပတ်သက်သည့် ကိုယ်တော့်ဘဝအကြောင်း ကျွန်ုပ်တို့သုံးသပ်ကြည့်လျှင်ကောင်းသည်။

ဇွဲလုံ့လနှင့်သတ္တိရှိလော့

^၃ ဟေရှာယ ၆၁:၂ ဖေါ်ပြသည့် ‘ယေဟောဝါ၏ ကရုဏာတော်ပြရာနှစ်’ အကြောင်း ယေရှုဇွဲရှိရှိကြွေးကြော်ခဲ့သည်။ ယေရှု၏ပုံသက်သေအတိုင်း ဤအစီအစဉ်၏နောက်ဆုံးနေ့ရက်များအတွင်း အသက်ကယ်ဆယ်ရေးလုပ်ငန်းတွင် ကျွန်ုပ်တို့ဇွဲရှိရှိပါဝင်သင့်သည်။ ယေရှုနည်းတူ သတ္တိလည်းရှိရမည်။ အဘယ်ကြောင့်နည်း။ အကြောင်းမှာ၊ ကျွန်ုပ်တို့ကြွေးကြော်သော နိုင်ငံတော်သတင်းသည် လူအများကိုအထိနာစေသည်။ အထူးသဖြင့် ယေဟောဝါ၏တရားစီရင်ရာနေ့အကြောင်း ပြောကြားရာတွင် အချို့သူတို့အတွက် နှစ်မြို့ဖွယ်မဟုတ်ပါ။

^၄ သတ္တိရှိရှိပြောဆိုနိုင်ရန်နှင့် ဘုရားရေးရာဆက်ကပ်အပ်နှံခြင်းဝတ်ကိုတင်ပြနိုင်ရန် ယေဟောဝါ၏ဝိညာဉ်တော်လမ်းပြမှုလိုအပ်နေပါသည်။ လုကာ ၄:၁၈ တွင်ယေရှုဤသို့ဆိုသည်။ ‘ယေဟောဝါ၏ဝိညာဉ်တော်သည် ငါ၏အပေါ်၌တည်၏။’ ယေဟောဝါ၏ဝိညာဉ်တော်နှင့်ကောင်းချီးအားဖြင့် ကျွန်ုပ်တို့လည်း ဘုရားရေးရာဆက်ကပ်အပ်နှံခြင်းဝတ်ကိုကျင့်သုံးကာ ယေဟောဝါအလိုတော်နှင့်တွေ့နိုင်ကြသည်။ အရာတစ်ခုကိုကျင့်သုံးခြင်းဟူမူကား ထိုသို့ပြုကျင့်လျက်ရှိခြင်း၊ ကျွန်ုပ်တို့၏နေ့စဉ်ဘဝအသက်တာအဝင်ဖြစ်နေခြင်းကိုဆိုလိုသည်။ ဘုရားရေးရာဆက်ကပ်အပ်နှံခြင်းဝတ်သည် ဘုရားသခင့်ကျေးကျွန်များအတွက် ဘဝပုံစံဖြစ်လာရမည်။ တမန်တော်ပေါလု ဤသို့ဆိုသည်။ “သင်တို့သည် စားသော်လည်းကောင်း၊ သောက်သော်လည်းကောင်း၊ မည်သည့်အမှုကိုပြုသော်လည်းကောင်း ဘုရားသခင်၏ဘုန်းတော်ကိုထောက်၍ ခပ်သိမ်းသောအမှုကိစ္စကိုပြုကြလော့။”​—၁ ကော၊ ၁၀:၃၁။

ဘုရားရေးရာဆက်ကပ်အပ်နှံခြင်းဝတ်၊ ကျွန်ုပ်တို့၏ဘဝပုံစံ

^၅ သတင်းကောင်းကိုသူတစ်ပါးအားပြောဆိုရန် ရသမျှအခွင့်အရေးများကိုယူခြင်းအားဖြင့် ခရစ်တော်ကိုအတုယူရန် အမြဲနိုးကြားနေရမည်။ ဇွန်လအတွင်း ယင်းသို့ကျွန်ုပ်တို့ပြုရာတွင် Mankind’s Search for God စာအုပ်ကိုအထူးဖေါ်ပြပါ။ ဤစာအုပ်ကိုအင်္ဂလိပ်နှင့်တရုတ်ဘာသာစကားဖြင့်ရရှိနိုင်သည်။ ဤစကားမတတ်သူများအတွက် တခြားရှိသည့် မည်သည့်စာအုပ်ကိုမဆို အသုံးပြုပါ။

^၆ အဓိကဘာသာရေးအုပ်စု၏အသင်းသားများဖြစ်ကြောင်း လူတို့တင်ပြကြသောအခါ ယင်းကိုအသိအမှတ်ပြုပြီး ဤသို့ဆိုနိုင်သည်။ “ဘာသာအသီးသီးမှလူတို့နှင့်တွေ့ဆုံရခြင်းသည် စိတ်ဝင်စားစရာကောင်းပါသည်။ ဘုရားကိုလူတို့ရှာရာတွင် နည်းလမ်းအမျိုးစုံရှိခဲ့ပြီ။ [ဤနေရာတွင် လျောက်ပတ်ပါက တမန်တော် ၁၇:၂၆၊ ၂၇ ကိုကိုးကားနိုင်သည် ] လူအများသည် ဘုရားကိုကိုယ်တိုင်ရှာမည့်အစား မိဘဘာသာကိုလိုက်စားတတ်ကြသည်မဟုတ်လော။ တစ်နည်းပြောရလျှင် ဘာသာတစ်ခု၌ဖွားမြင်ကြသည်။ Mankind’s Search for God စာအုပ်၏ပထမအခန်းတွင် ဤအချက်ကိုဖေါ်ပြထားသည်။ [စာမျက်နှာ ၈ အပိုဒ် ၁၂ ကိုပြပါ ] အခြားဘာသာတရားများအကြောင်း ပိုမိုသိရှိခြင်းမှ ပညာအလင်းပိုရရှိပါသည်။ ဤစာအုပ်က ကမ္ဘာ့ဘာသာရပ်ကြီးများ၏ မူလအစ၊ အကျင့်ဓလေ့များနှင့်သွန်သင်ချက်များကို ရှင်းပြပါသည်။”

^၇ ကျွန်ုပ်တို့ဘဝပုံစံတွင် ယေဟောဝါ၏တရားစီရင်ရာနေ့ရက်နှင့် မျက်နှာသာတော်ပြရာနှစ်ကိုကြွေးကြော်ရုံမက ကိုယ်ရေးကိုယ်တာနှင့်မိသားစုဘဝ၌ ဘုရားရေးရာဆက်ကပ်အပ်နှံခြင်းဝတ်ကိုတင်ပြခြင်းလည်းပါဝင်သည်။ ယေရှုကိုကျွန်ုပ်တို့အတုယူရမည်။ ဘုရားရေးရာဆက်ကပ်အပ်နှံခြင်းဝတ် မည်သည်ကား အဘယ်အရာဖြစ်ကြောင်း ပုံသက်သေအားဖြင့် သူတစ်ပါးကိုသွန်သင်ရမည်။ ခရစ်တော်၏ ဘုရားရေးရာဆက်ကပ်အပ်နှံခြင်းဝတ် ပုံသက်သေကို လိုက်လျှောက်ခြင်းဖြင့် လုပ်ကိုင်လေသမျှတွင် ရည်ရွယ်ချက်အမှန်ရှိရန် အမြဲကြိုးစားပြီး ယေဟောဝါကိုချီးမွမ်းကာ ကိုယ်တော်၏သစ္စာရှိကျေးကျွန်များဖြစ်ကြောင်း သက်သေတင်ပြပါမည်။

^၈ ဘုရားရေးရာဆက်ကပ်အပ်နှံခြင်းဝတ်ကို ကျွန်ုပ်တို့ပြုကြရာတွင် ဘုရားကိုရှာတွေ့လိုသူများအတွက် အထောက်အကူဖြစ်ပါလေစေ။ စိတ်ရင်းမှန်သူများအား စစ်မှန်သောဘုရားသခင် ယေဟောဝါထံသို့ လမ်းညွှန်ပို့ဆောင်ပေးပါလေစေ။