သင်အံမှုအတွက် ကျမ်းစာကျောင်းသားများ ကြိုတင်ပြင်ဆင်ကြရန် အကူအညီပေး

^၁ ပတ်စဉ်သင်အံမှုအတွက် ပြင်ဆင်သောကျမ်းစာကျောင်းသားများသည် သင်အံမှုကို အမှန်စိတ်ဝင်စားကြောင်းတင်ပြကြ၍ မပြင်ဆင်သူများထက် ဝိညာဉ်ရေးဘက်တွင် ပိုလျင်မြန်စွာ တိုးတက်လေ့ရှိသည်။ တစ်ခါတစ်ရံ ကျောင်းသားသည် မပြင်ဆင်တတ်သဖြင့် ပြင်ဆင်မထားပါ။ ယင်းကြောင့် မည်သို့လေ့လာပြင်ဆင်ရမည်ကို သင်ပေးစရာ လိုကောင်းလိုပေမည်။ မည်သို့ပြုလုပ်နိုင်မည်နည်း။

^၂ အစကနဦးကပင် ကြိုတင်ပြင်ဆင်ထားတတ်ရန် ကျောင်းသားအား အချိန်ပေး၍ သွန်သင်ပါ။ ပြင်ဆင်မှုပြုလုပ်ရာတွင် လေ့လာခြင်းပါဝင်၍ များစွာသောသူတို့သည် ဖတ်ရှုနိုင်ကြသော်လည်း မည်သို့လေ့လာရမည်ကို သင်ယူထားခြင်းမရှိပါ။ သီအိုကရက်တစ် အမှုဆောင်ကျောင်း လမ်းညွှန်စာအုပ် သင်ခန်းစာ ၇ နှင့် ၈ တို့တွင် ကျောင်းသားလိုအပ်မှုကိုလုပ်ဆောင်ပေးနိုင်ရန် များစွာအကူအညီဖြစ်စေမည့် အကြံပြုချက်များပါရှိသည်။

^၃ သင်အံလေ့လာခြင်းတန်ဖိုးကို ကျောင်းသားအားပြ– အဓိကစကားလုံးများ၊ စကားစုများကို မှတ်သားထားသည့် သင့်စာအုပ်ကို ကျောင်းသားအား ပြနိုင်သည်။ မှတ်သားထားသည့်အပိုင်းများကို အမှတ်တမဲ့ကြည့်လိုက်ရုံဖြင့် အကြောင်းအရာများကို သတိရပြီး ကိုယ်ပိုင်စကားအသုံးပြုကာ ပြောဆိုနိုင်မည်အကြောင်း နားလည်စေပါ။ ဤနည်းဖြင့် မေးခွန်းများကိုဖြေဆိုရာတွင် စာအုပ်ထဲမှ စာစုများကို ဖတ်ပြနေမည်မဟုတ်ပါ။ ဤအချိန်အခါတွင် ကောင်းစွာလေ့ကျင့်ထားပါက အသင်းတော်အစည်းအဝေးများတွင် အဓိပ္ပာယ်ရှိရှိဖြေဆိုနိုင်ရန် အထောက်အကူရထားပါလိမ့်မည်။ လေ့လာနေသည့်အကြောင်းကို သူတန်ဖိုးထားလေးမြတ်ကြောင်း သူ၏အဖြေများက ဖော်ပြပါမည်။ သူ မည်မျှသဘောပေါက်နားလည်ကြောင်းကိုလည်း ထင်ရှားစေမည်။

^၄ ကျမ်းစာကိုအသုံးပြုရန် သူ့အားသွန်သင်ပေး– ကျောင်သားသည်လေ့လာသည့်ဆောင်းပါးပါ ကျမ်းချက်များကို ရှာဖွေဖတ်ရှုတတ်ရန် သင်ယူဖို့လိုအပ်သည်။ ယင်းကို ကျင်လည်စွာတတ်မြောက်လာပြီဆိုလျှင် ကျမ်းစာကျောင်းသားတစ်ဦး အမှန်ဖြစ်နေခြင်းကို ပိုမိုပြည့်ဝစွာတန်ဖိုးထားပါလိမ့်မည်။ အစအဦးတွင် ကျမ်းစာအရှေ့တွင်ရှိ ကျမ်းစာစောင်စာရင်းများကို သူအသုံးပြုနေရမည်ဖြစ်သော်လည်း ကျမ်းစာစောင် ၆၆ စောင်၏အစီအရီကို ကောင်းစွာသိရှိလာရန် ကြိုးစားဖို့ သူ့အားတိုက်တွန်းသင့်သည်။ ကျမ်းချက်တစ်ခုကို သူဖွင့်၍ဖတ်ရှုသည့်အခါ လေ့လာနေသည့်အကြောင်းနှင့်မဆိုင်သည့် စကားစုကြောင့် အခြားအကြောင်းတစ်ခုသို့မရောက်သွားဘဲ ဆွေးနွေးနေသည့်အပိုဒ်ပါ အချက်ကိုထောက်ခံသည့် စကားစုကို ခွဲခြားသိမြင်နိုင်ရန် အကူအညီပေးပါ။

^၅ ကျောင်းသားသည် တိုးတက်လာစဉ် ကျမ်းစာကိုအစမှအဆုံးအထိ ဖတ်ရှုရန် အားပေးပါ။ သမ္မာကျမ်းစာတစ်အုပ်လုံးသည် မှုတ်သွင်းခံ ဘုရားသခင့်နှုတ်ကပါဌ်တော်ဖြစ်၍ ခရစ်ယာန်စစ်များသည် ယင်းအားဖြင့် ဝိညာဉ်ခွန်အားယူရမည်ဖြစ်ကြောင်းကို အလေးအနက်သဘောပေါက်စေပါ။​—မ. ၄:၄; ၂ တိ. ၃:၁၆၊ ၁၇။

^၆ ကိုးကားစရာ အခြားသီအိုကရက်တစ်စာပေများကို ညွှန်းပါ– ကျောင်းသားသည် အတော်အသင့်တိုးတက်လာပြီဆိုလျှင် အခြားသီအိုကရက်တစ်စာပေများကို စတင်အသုံးပြုနိုင်သည်။ အသင်းတော်အစည်းအဝေးများ တက်လာသည်နှင့်အမျှ သိရှိလာမည့် အသင်းမစာပေများမှ ထပ်ဆင့်အချက်အလက်များကို ရှာဖွေလေ့လာယူရန် ပိုင်းခြားသိမြင်ခြင်းဖြင့်အားပေးပါ။ ကမ္ဘာသစ်ဘာသာပြန်ကျမ်းပါ “ညွှန်ပြထားသည့် ကျမ်းစာစကားလုံးများ” အစရှိသည့် အထူးဖော်ပြချက်တို့ကို မည်သို့အသုံးပြုနိုင်ကြောင်း သွန်သင်ပေးပါ။ ကိုယ်ပိုင်သီအိုကရက်တစ်စာကြည့်တိုက်ကို စုဆောင်းလာရာတွင် မှန်ပြမာတိကာ၊ ကျမ်းစာဖြင့်ကျိုးကြောင်း ဆင်ခြင်ခြင်း၊ မာတိကာနှင့် ထိုးထွင်းသိမြင်ခြင်း ပထမနှင့်ဒုတိယတွဲတို့ကို အသုံးပြုတတ်ရန် သင်ပေးပါ။

^၇ ကျမ်းစာသင်အံမှုအတွက် မည်သို့ပြင်ဆင်နိုင်သည်ကို ကျမ်းစာကျောင်းသားများအား သွန်သင်ပေးမည်ဆိုလျှင် အိမ်တွင်းကျမ်းစာသင်အံမှု ပြီးဆုံးသည့်အခါတွင်ပင် တတ်ကျွမ်းသော ကျောင်းသားများအဖြစ် သမ္မာတရား၌ဆက်တိုးတက်နေရန် သူတို့အားပြင်ဆင်ပေးရာရောက်ပါလိမ့်မည်။