၁၉၉၆ ခုနှစ်အတွက် သီအိုကရက်တစ် ဓမ္မအမှုကျောင်း

ကျိုးကြောင်းဆင်ခြင် စာအုပ် [လိပ်] မှ နံပါတ် ၄ ကျောင်းသားအတွက်

မေ ၆ (ကက စ. ၃၅၂ အပိုဒ် ၁–စ. ၃၅၃ အပိုဒ် ၁)

လူတစ်ယောက် သူတော်စင်အဖြစ် အသိအမှတ်ပြုမခံရမီ အဦးဆုံး ကောင်းကင်ဘုန်းဝင်စားရမည်ဟု ကျမ်းစာသွန်သင်သလော

ကျမ်းစာ၌ ကောင်းကင်ရှိသန့်ရှင်းသူများ သို့မဟုတ် သူတော်စင်များအကြောင်း ဆိုထားသည်မှာ သေချာပါသည်။ ယေဟောဝါကို “သန့်ရှင်းသူ” (ကဘ) (ဂရိ၊ haʹgi·on [ဟေးဂျီးအော်န်]) အဖြစ်တင်ပြ၏။ (၁ ပေ. ၁:၁၅၊ ၁၆; ဝတ်ပြုရာ ၁၁:၄၅ ကိုရှု။) ယေရှုခရစ်ကမ္ဘာပေါ်ရှိစဉ် “ဘုရားသခင်၏သန့်ရှင်းတော်မူသောသူ [haʹgi·os ဟေးဂျီးအော့စ်]” အဖြစ်လည်းကောင်း၊ ကောင်းကင်၌ “သန့်ရှင်းသောသူ [haʹgi·os]” အဖြစ်လည်းကောင်း သမုတ်ခံရသည်။ (မာ. ၁:၂၄; ဗျာ. ၃:၇) ကောင်းကင်တမန်များလည်း “သန့်ရှင်း” ကြပေသည်။ (တ. ၁၀:၂၂) ကမ္ဘာပေါ်ရှိပုဂ္ဂိုလ်အတော်များများကို အခြေခံကျသော ထိုမူရင်းဂရိဝေါဟာရဖြင့် ခေါ်ဝေါ်ထားသည်။

တ. ၉:၃၂၊ ၃၆-၄၁– “ပေတရုသည် အရပ်ရပ်တို့ကို လှည့်လည်သည်တွင် သန့်ရှင်းသူတို့ (ha·giʹous ဟေးဂျီးရပ်စ်) ရှိရာ လုဒ္ဒမြို့သို့ရောက်လေ၏။ ယုပ္ပေမြို့၌ ဒေါ်ကာဟုဆိုလိုသော တဗိသအမည်ရှိသော တပည့်တော်မ တစ်ယောက်ရှိ၏။ [သူသေသွား၏။] . . . ပေတရုသည် ထိုအလောင်းသို့မျက်နှာလှည့်၍ တဗိသ၊ ထလော့ ဟုဆိုလေ၏။ ထိုမိန်းမသည် မျက်စိကိုဖွင့်၍ ပေတရုကိုမြင်လျှင် ထ၍ထိုင်၏။ ပေတရုသည် မိမိလက်ကို သူ့အားပေး၍ ချီကြွပြီးမှ သန့်ရှင်းသူတို့ [“သူတော်စင်တို့၊” JB] နှင့် မုဆိုးမတို့ကိုခေါ်၍ အသက်ရှင်လျက်ရှိသောထိုမိန်းမကို ပြလေ၏။” (ထိုသူတော်စင်တို့သည် ကောင်းကင်သို့မတက်သေးကြောင်း၊ သူတော်စင်အဖြစ် ယူမှတ်ခံရသောပေတရုကဲ့သို့ ထင်ပေါ်သူများလည်းမဟုတ်ကြောင်း သိသာလှပေသည်။)

၂ ကော. ၁:၁; ၁၃:၁၂၊ ၁၃– “ဘုရားသခင်၏အလိုတော်အားဖြင့် ယေရှုခရစ်၏တမန်တော်ဖြစ်သော ငါပေါလုနှင့်ငါ့ညီတိမောသေသည် ကောရိန္သုမြို့၌ရှိသော ဘုရားသခင်၏အသင်းတော်မှစ၍ အခါယပြည် အရပ်ရပ်တို့၌ရှိသော သန့်ရှင်းသူအပေါင်းတို့ [“သူတော်စင်တို့၊” JB; haʹgiʹois ဟေးဂျီးအွိုက်စ်] ကို ကြားလိုက်ပါ၏။” “အချင်းချင်း တစ်ယောက်ကိုတစ်ယောက် သန့်ရှင်းသောနမ်းခြင်းနှင့် နှုတ်ဆက်ကြလော့။ သန့်ရှင်းသူအပေါင်းတို့သည် သင်တို့ကိုနှုတ်ဆက်ကြ၏။” (ခရစ်တော်၏အသွေးတော်ဖြင့် ဆေးကြောသန့်စင်၍ ခရစ်တော်နှင့်အတူ အမွေခံကြရန် သီးသန့်ရွေးချယ်ခံရသော ဤရှေးခရစ်ယာန်များအားလုံးကို သူတော်စင် သို့မဟုတ် သန့်ရှင်းသူများဟုခေါ်ဝေါ်သည်။ သူတို့အား သူတော်စင်များအဖြစ်အသိအမှတ်ပြုသည့်ကိစ္စကို သူတို့သေလွန်သည့်အချိန်အထိ ရွှေ့ဆိုင်းမထားသည်မှာ သိသာ၏။)

မေ ၁၃ (ကက စ. ၃၅၃ အပိုဒ် ၂-၄)

ဘုရားသခင်နှင့်မိမိစပ်ကြား ကြားဖျန်အဖြစ်လုပ်ဆောင်ပေးပါရန် “သူတော်စင်” များထံ ဆုတောင်းခြင်းသည် ကျမ်းစာနှင့်ညီညွတ်သလော

ယေရှုခရစ်က “သင်တို့ဆုတောင်းရမည်မှာ ကောင်းကင်ဘုံ၌ရှိတော်မူသော အကျွန်ုပ်တို့အဘ၊ . . . ” ထို့ကြောင့် အဘခမည်းတော်ထံဆုတောင်းရန်ဖြစ်သည်။ “ငါသည် လမ်းခရီးဖြစ်၏။ သမ္မာတရားလည်းဖြစ်၏။ အသက်လည်းဖြစ်၏။ ငါ့ကိုအမှီမပြုလျှင် အဘယ်သူမျှ ခမည်းတော်ထံသို့ မရောက်ရ။ သင်တို့သည် ငါ၏နာမကိုအမှီပြု၍ တစ်စုံတစ်ခုသောဆုကိုတောင်းလျှင် တောင်းသည်အတိုင်း ငါပြုမည်” ဟူ၍လည်း မိန့်တော်မူ၏။ (မ. ၆:၉; ယော. ၁၄:၆၊ ၁၄) ထို့ကြောင့်၊ အခြားမည်သူမဆို ကြားဖျန်အဖြစ် ဆောင်ရွက်နိုင်သည် ဟူသောအယူအဆကို ယေရှုပယ်တော်မူ၏။ ခရစ်တော်နှင့်ပတ်သက်၍ တမန်တော်ပေါလု ဤသို့ဆိုသေး၏– “အသေခံ၍ ခံသည်သာမက၊ သေခြင်းမှထမြောက်၍ ဘုရားသခင်၏လက်ယာတော်ဘက်၌နေလျက် ငါတို့အဖို့ ဆုတောင်းသောသူကား ခရစ်တော်ပေတည်း။” “ကိုယ်တော်အားဖြင့် ဘုရားသခင့်ထံချဉ်းကပ်သူတို့အတွက် အသနားတော်ခံရန် အစဉ်ရှင်နေသည့်အလျောက် ထိုသူတို့ကို အဆုံးတိုင်ကယ်တင်တော်မူနိုင်၏။” (ရော. ၈:၃၄; ဟေဗြဲ ၇:၂၅၊ သမ) ကျွန်ုပ်တို့၏ပတ္ထနာကို ဘုရားသခင် အမှန်နားညောင်းစေလိုလျှင် အထံတော်သို့ချဉ်းကပ်ရာ၌ နှုတ်ကပါဌ်တော်ညွှန်ကြားသည့်အတိုင်း ပြုသင့်သည်မဟုတ်လော။ (“မာရိ” ဟူသောခေါင်းစဉ်အောက် စာမျက်နှာ ၂၅၈၊ ၂၅၉ ကိုလည်းရှု။)

ဧ. ၆:၁၈၊ ၁၉– “ငါမှစ၍ သန့်ရှင်းသူအပေါင်းတို့အဖို့ ဆုတောင်းလျက် စောင့်ရှောက်ကြလော့။ ငါသည်ဧဝံဂေလိတရား . . . ၏နက်နဲသောအရာကို ဖော်ပြခြင်းငှာ . . . နှုတ်ကိုရဲရင့်စွာဖွင့်လှစ်ခြင်းအခွင့်ရှိမည်အကြောင်းကိုလည်းကောင်း၊ . . . ရဲရင့်စွာဟောပြောမည်အကြောင်းကိုလည်းကောင်း၊ ငါ့အဖို့လည်း ဆုတောင်းကြလော့။” (ဖြည့်စွက်စာလုံးစောင်း) (ဤတွင် သန့်ရှင်းသူတို့အဖို့ ဆုတောင်းရန်တိုက်တွန်း၏။ သူတို့ထံဖြစ်စေ၊ သူတို့ကိုအမှီပြု၍ ဖြစ်စေ ဆုတောင်းရန်မဟုတ်။) ကက်သလစ်စွယ်စုံကျမ်းသစ်၊ ၁၉၆၇၊ အတွဲ ၁၁၊ စာမျက်နှာ ၆၇၀ က ဤသို့ဝန်ခံသည်– “အများအားဖြင့် ဓမ္မသစ်ကျမ်း၌ တစ်ဦးချင်းဖြစ်စေ၊ ပရိသတ်အခမ်းအနားအလိုက်ဖြစ်စေ၊ ဆုတောင်းသမျှပတ္ထနာသည် ခရစ်တော်မှတစ်ဆင့် ​ဘုရား​သခင်ထံ တောင်းလျှောက်ခြင်းဖြစ်သည်။”)

ရော. ၁၅:၃၁– “ညီအစ်ကိုတို့၊ သင်တို့သည် . . . ငါ့အဖို့အလိုငှာ ဘုရားသခင်ကို ဆုတောင်းပတ္ထနာပြုကြလော့ဟု ငါတို့သခင်ယေရှုခရစ်နှင့်ဝိညာဉ်တော်၏မေတ္တာကရုဏာကို အကြောင်းပြု၍ သင်တို့ကို ငါတိုက်တွန်းနှိုးဆော်ပါ၏။” (ကိုယ်တိုင်သူတော်စင်ဖြစ်သူ တမန်တော်ပေါလုက မိမိအတွက် ဆုတောင်းကြပါဟု သူတော်စင် ခရစ်ယာန်ချင်းတို့အား မေတ္တာရပ်ခံပါသည်။ သို့သော် ပေါလုသည် သူတော်စင်ချင်းထံ ဆုမတောင်းကြောင်း သတိပြုပါ။ သူကိုယ်တိုင်ဘုရားသခင်ထံဆုတောင်းခြင်းဖြင့် ခံစားရသော ခမည်းတော်နှင့်ရင်းနှီးမှုကိုလည်း သူ့အဖို့ သူတို့ပြုသောပတ္ထနာက အစားမထိုးပါ။ ဧဖက် ၃:၁၁၊ ၁၂၊ ၁၄ တို့နှင့်နှိုင်း။)

မေ ၂၀ (ကက စ. ၃၅၄ အပိုဒ် ၁–စ. ၃၅၅ အပိုဒ် ၁)

“သူတော်စင်များ” ၏ဓာတ်တော်နှင့် ရုပ်တုများကိုးကွယ်သော အလေ့အထကို မည်သို့ ရှုမှတ်သင့်သနည်း

ကက်သလစ်စွယ်စုံကျမ်းသစ်က ဤသို့ဝန်ခံ၏– “ထို့ကြောင့် ဓာတ်တော်ကိုးကွယ်မှုအတွက် အကြောင်းပြချက်ကို ဓမ္မဟောင်းကျမ်း၌ ရှာလျှင် အချည်းနှီးပင်။ ဓမ္မသစ်ကျမ်း၌လည်း ဓာတ်တော်များအကြောင်းကို အရေးပေးလှသည်မဟုတ်။ . . . [အသင်းတော်၏ရှေးအာဏာပိုင်ဘာသာရေး စာရေးဆရာ] ဩရီဂျင်က ထိုအလေ့အထကို တိတ္ထိတို့၏ ရုပ်ပစ္စည်းကိုးကွယ်ခြင်းလက္ခဏာတစ်ရပ်အဖြစ် ယူမှတ်ပုံရသည်။”—(၁၉၆၇)၊ အတွဲ ၁၂၊ စာမျက်နှာ ၂၃၄၊ ၂၃၅။

မောရှေကို ဘုရားသခင်သင်္ဂြိုဟ်သဖြင့် သူ့သင်္ချိုင်း အဘယ်မှာရှိသည်ကို အဘယ်လူသားမျှ မသိရဟူသည့်အချက်မှာ မှတ်သားဖွယ်ဖြစ်၏။ (တရား. ၃၄:၅၊ ၆) သို့သော် ယုဒ ၉ က ကောင်းကင်တမန်မင်းမိက္ခေလသည် မောရှေ၏ခန္ဓာနှင့်ပတ်သက်၍ မာရ်နတ်နှင့်အငြင်းပွားသည်ဟု ဆို၏။ အဘယ်ကြောင့်နည်း။ လူသားများရှာ၍မတွေ့အောင် မောရှေ၏အလောင်းကိုဖျောက်ထားရန် ဘုရားသခင်ရည်ရွယ်သည်မှာ အထင်းသားပင်။ ရန်သူတော်က ထိုအလောင်းကို လူတို့တွေ့ရှိစေပြီး လူတကာမြင်အောင်ပြသကြစေကာ ကိုးကွယ်ရာဓာတ်တော်ဖြစ်စေရန် အလိုရှိ၍လော။

“သူတော်စင်များ” ၏ရုပ်ပွားများ ကိုကိုးကွယ်ခြင်းနှင့်ပတ်သက်၍ “ရုပ်တုဆင်းတု” ဟူသော အဓိကခေါင်းစဉ်ကိုရှု။

ကက်သလစ် “သူတော်စင်များ” ၏ပုံများ၌ အဘယ်ကြောင့် ရောင်ခြည်စက်ဝန်းများပါရှိသနည်း

ကက်သလစ်စွယ်စုံကျမ်းသစ်က ဤသို့ဝန်ခံ၏– “သူတော်စင်အားလုံးကိုသိဒ္ဓိတင်သော ဂုဏ်အင်္ဂါတစ်ရပ်မှာ ရောင်လျှံတော် (မိုးသား) ဖြစ်၍၊ ၎င်းမှာ သူတော်စင်တို့ဦးခေါင်းပတ်လည်ရှိ ထွန်းတောက်သောပုံသဏ္ဌာန်ပင်ဖြစ်၏။ ၎င်း၏ဇာစ်မြစ်သည် ခရစ်ယာန်ခေတ်မတိုင်မီကဖြစ်သည်။ ဥပမာများကို တိတ္ထိသြဇာလွှမ်းမိုးသော ဂရိယဉ်ကျေးမှုအနုပညာ၌ တွေ့နိုင်သည်။ မှန်စီရွှေချအနုပညာလက်ရာများနှင့် ဒ င်္ဂါးများသက်သေထူသည့်အတိုင်း၊ ဘုရားတစ်ပိုင်း လူတစ်ပိုင်းပုဂ္ဂိုလ်များ၊ နက်ပကျွန်း၊ ဂျူပီတာ၊ ဘက်ခပ်စ်နှင့် အထူးသဖြင့် အပိုလို (နေနတ်) စသောနတ်ဘုရားများအတွက် ရောင်ခြည်စက်ဝန်းကို အသုံးပြုကြသည်။”—(၁၉၆၇) အတွဲ ၁၂၊ စာမျက်နှာ ၉၆၃။

ဗြိတိန်စွယ်စုံကျမ်းသစ် က “ဂရိနှင့်ရောမအနုပညာတွင် နေဘုရား ဟီးလိအော့စ်နှင့် ရောမဧကရာဇ်တို့ကို ရောင်ခြည်သရဖူဆောင်းလျက် တွေ့လေ့ရှိသည်။ ၎င်း၏တိတ္ထိဇာစ်မြစ်ကြောင့် ရှေးခရစ်ယာန်အနုပညာ၌ ယင်းပုံစံကိုရှောင်ကြဉ်သည်။ သို့သော် ခရစ်ယာန်ဧကရာဇ်မင်းများက မိမိတို့၏မင်းခမ်းမင်းနားရုပ်ပုံအတွက် ရောင်ခြည်စက်ဝန်းရိုးရိုးကလေးကို လက်ခံကြသည်။ စတုတ္ထရာစုအလယ်မှစ၍ ခရစ်တော်ကိုလည်း ထိုဧကရာဇ်ကြန်အင်လက္ခဏာဖြင့် ပုံဖော်လာကြသည်။ . . . ဆဋ္ဌမရာစုရောက်ခါမှ ရောင်ခြည်စက်ဝန်းကို အပျိုစင်မာရိနှင့် အခြားသူတော်စင်များအတွက် အသုံးပြုသောအလေ့အထ ဖြစ်လာသည်။” (၁၉၇၆)၊ ကျမ်းငယ်၊ အတွဲ ၄၊ စ. ၈၆၄။

ခရစ်ယာန်ဘာသာကို တိတ္ထိအထိမ်းအမှတ်နှင့် ရောနှောသင့်သလော

“အလင်းသည် မှောင်မိုက်နှင့် အဘယ်သို့ဆက်ဆံနိုင်မည်နည်း။ ခရစ်တော်သည် ဗေလျာလ [စာတန်] နှင့် အဘယ်သို့သင့်တင့်နိုင်မည်နည်း။ ယုံကြည်သောသူသည် မယုံကြည်သောသူနှင့်အတူ အဘယ်အကျိုးအပြစ်ကို ခံရမည်နည်း။ ဘုရားသခင်၏ဗိမာန်တော်သည် ရုပ်တုတို့နှင့် အဘယ်သို့စပ်ဆိုင်ရမည်နည်း။ . . . သင်တို့သည် အသက်ရှင်တော်မူသော ဘုရားသခင်၏ဗိမာန်တော်ဖြစ်ကြ၏။ . . . ထာဝရဘုရားမိန့်တော်မူပြန်သည်ကား သင်တို့သည် ထိုသူတို့အထဲမှထွက်၍ အသီးအခြားနေကြလော့။ မစင်ကြယ်သောအရာကို လက်နှင့်မျှမတို့ကြနှင့်။ ထိုသို့ပြုလျှင် သင်တို့ကို ငါသည် လက်ခံမည်။ သင်တို့၏အဘဖြစ်မည်။ သင်တို့သည်လည်း ငါ၏သားသမီးဖြစ်ကြလိမ့်မည်ဟု အနန္တတန်ခိုးနှင့်ပြည့်စုံသော ထာဝရ​ဘုရား​မိန့်တော်မူ၏။”—၂ ကော. ၆:၁၄-၁၈။

မေ ၂၇ (ကက စ. ၃၅၅ အပိုဒ် ၂)

ဘာသာရေးအုပ်စုတစ်စု၏ အသင်းသားအားလုံး သူတော်စင်ချည်းဖြစ်သည့်အလျောက် အပြစ်ကင်းသူများဖြစ်နိုင်သလော

ပထမရာစုခရစ်ယာန်အသင်းတော်သားအားလုံး သူတော်စင်များဖြစ်ကြသည်မှာ မှန်၏။ (၁ ကော. ၁၄:၃၃၊ ၃၄; ၂ ကော. ၁:၁; ၁၃:၁၃၊ RS,KJ) သူတို့သည် “အပြစ်လွှတ်ခြင်းကျေးဇူး” ကိုခံရ၍ ဘုရားသခင်အားဖြင့် “အပြစ်နှင့်ကင်းစင်” သူဖြစ်သည်ဟု ဖော်ပြထားပါသည်။ (တ. ၂၆:၁၈; ၁ ကော. ၁:၂) သို့သော် မိမိတို့သည် အပြစ်ရှိသမျှနှင့်ကင်းစင်သည်ဟူ၍ သူတို့မဆိုကြပါ။ အပြစ်သားအာဒံမှဆင်းသက်သူများဖြစ်ကြသည်။ တမန်တော်ပေါလုဝန်ခံသည့်အတိုင်း ထိုအပြစ်အမွေကြောင့် သူတို့သည် မှန်ရာလုပ်ဖို့ မနည်းရုန်းကန်ရကြသည်။ (ရော. ၇:၂၁-၂၅) တမန်တော်ယောဟန်ကလည်း “ကိုယ်အပြစ်မရှိဟု ငါတို့သည်ဆိုလျှင် ကိုယ်ကိုကိုယ်လှည့်ဖြားကြ၏။ ငါတို့၌ သစ္စာတရားမရှိ” ဟု ပြတ်သားစွာဆို၏။ (၁ ယော. ၁:၈) ထို့ကြောင့် ခရစ်တော်၏နောက်လိုက်စစ်များအတွက်သုံးသော အဓိပ္ပာယ်မျိုးဖြင့် သူတော်စင်ဖြစ်ခြင်းသည် အသွေးအသား၌ အပြစ်ရှိသမျှနှင့်ကင်းလွတ်သည်ကိုမဆိုလို။

ဇွန် ၃ (ကက စ. ၃၅၆ အပိုဒ် ၃)

ဘုရားသခင်သည် မဟာကရုဏာတော်ကြောင့် အဆုံးတွင် လူသားအားလုံးကို ကယ်တင်တော်မူမည်လော

၂ ပေတရု ၃:၉ က တစ်လောကလုံးကယ်တင်ခြင်းရမည်ကို အရိပ်အမြွက်ပြသလော။ ထိုကျမ်းချက်က ဤသို့ဆို၏– “ထာဝရဘုရားသည် နှောင့်နှေးတော်မူသည်ဟု အချို့တို့မှတ်ယူကြသည့်အတိုင်း ကတိတော်ကိုဖြည့်ရန် နှောင့်နှေးတော်မူသည်မဟုတ်။ မည်သူမျှမပျက်စီးဘဲ ရှိသမျှတို့နောင်တရခွင့်ရှိစေရန် သင်တို့အပေါ်တွင် စိတ်ရှည်တော်မူ၏။” (သမ) ဘုရားသခင်၏ ကရုဏာပြည့်ဝသည့်ဆန္ဒမှာ အာဒံ့သားမြေးအားလုံး နောင်တရကြရန်ဖြစ်၏။ နောင်တရသူတို့၏အပြစ်ကိုလွှတ်ဖို့လည်း ရက်ရောစွာစီစဉ်ထားလေပြီ။ သို့တစေ၊ ထိုအစီစဉ်ကိုလက်ခံရန် မည်သူ့ကိုမျှ အတင်းအကျပ်ပြုတော်မမူ။ (တရားဟောရာ ၃၀:၁၅-၂၀ နှင့်နှိုင်း။) ၎င်းကို လူများစွာတို့က ငြင်းပယ်ကြ၏။ ရေနစ်နေလျက်နှင့် ကယ်လိုသူစေတနာရှင်ပစ်ပေးသော အသက်ကယ်ပစ္စည်းကိုမယူ၊ တွန်းဖယ်လိုက်သူနှင့်တူသည်။ သို့ရာတွင် နောင်တမရလျှင် ထာဝရငရဲမီးဒဏ်ခံရမည်ဟူ၍ကား မဟုတ်ကြောင်းသတိပြုသင့်၏။ ၂ ပေတရု ၃:၉ ဆိုသည့်အတိုင်း နောင်တမရသူတို့သည် “ပျက်စီး” လိမ့်မည်။ အခန်းငယ် ၇ ကလည်း “အဓမ္မလူတို့ကိုဖျက်ဆီး” ခြင်းအကြောင်း ဆို၏။ တစ်လောကလုံး ကယ်တင်ခြင်းရမည်ဟုမဆိုပါ။—“ငရဲ” ဟူသောခေါင်းစဉ်ကိုလည်းရှု။

ဇွန် ၁၀ (ကက စ. ၃၅၇ အပိုဒ် ၁)

၁ ကောရိန္သု ၁၅:၂၂ က အဆုံး၌ လူသားအားလုံး ကယ်တင်ခြင်းရကြမည်ကို သက်သေထူသလော။ ၎င်းက “လူအပေါင်းတို့သည် အာဒံအားဖြင့် သေခြင်းသို့ရောက်သည်နည်းတူ၊ လူအပေါင်းတို့သည် ခရစ်တော်အားဖြင့် အသက်ရှင်ခြင်းသို့ရောက်ရကြလတ္တံ့” ဟုဆိုပါသည်။ ပတ်ဝန်းကျင်အခန်းငယ်များတင်ပြသည့်အတိုင်း ရှင်ပြန်ထမြောက်ခြင်းအကြောင်း ဆွေးနွေးနေခြင်းဖြစ်သည်။ မည်သူများထမြောက်မည်နည်း။ အာဒံ့အပြစ် ကြောင့်သေရ (အခန်းငယ် ၂၁ ကိုကြည့်။) သော်လည်း ဟေဗြဲ ၁၀:၂၆-၂၉ ပါ စိတ်လိုကိုယ်လျောက် လွန်ကျူးခြင်းအပြစ်ကို ကိုယ်တိုင်မပြုသူများ ထမြောက်လာမည်။ ယေရှုသည် ဟေးဒီးစ်မှ ထမြောက်တော်မူသည် (တ. ၂:၃၁) နည်းတူ၊ ဟေးဒီးစ်၌ရှိသမျှသူများလည်း ရှင်ပြန်ထမြောက်ခြင်းအားဖြင့် “အသက်ရှင်ခြင်းသို့ရောက်ရကြလတ္တံ့။” (ဗျာ. ၁:၁၈; ၂၀:၁၃) ဤသူများအားလုံး ထာဝရကယ်တင်ခြင်းရကြမည်လော။ သူတို့ရှေ့ ၌ ထိုအခွင့်အလမ်းပွင့်လျက်နေသော်လည်း ယောဟန် ၅:၂၈၊ ၂၉ ဆိုသည့်အတိုင်း လူတိုင်း စွဲကိုင်ကြမည်မဟုတ်။ ထိုကျမ်းချက်အရ အချို့တို့သည် “အပြစ်စီရင်” ခံရကြလိမ့်မည်။

ဇွန် ၁၇ (ကက စ. ၃၅၇ အပိုဒ် ၂)

တိတု ၂:၁၁ ကိုမည်သို့ဆိုမည်နည်း။ RS ပြန်ဆိုချက်အတိုင်း ၎င်းက “လူအားလုံး၏ကယ်တင်ခြင်း” အကြောင်းကိုဆိုထားသည်။ ယောဟန် ၁၂:၃၂၊ ရောမ ၅:၁၈ နှင့် ၁ တိမောသေ ၂:၃၊ ၄ စသောအခြားကျမ်းချက်များလည်း RS, KJ, NE, TEV စသည်တို့၌ အလားတူသဘောကို တင်ပြ၏။ ထိုကျမ်းချက်များပါ “အားလုံး၊” “လူတိုင်း” ဟူသောဂရိအသုံးအနှုန်းသည် pas (ဖာ့စ်) ဟူသောစကားလုံး၏ ပြောင်းလဲသောပုံစံများဖြစ်ကြသည်။ Vine ပြုစုသော ဓမ္မသစ်ကျမ်းစကားဆိုင်ရာအဖွင့်အဘိဓာန် (လန်ဒန်၊ ၁၉၆၂၊ အတွဲ ၁၊ စ. ၄၆) ၌ တင်ပြသည့်အတိုင်း pas သည် “အမျိုးအစားတိုင်း” ဟူ၍လည်း အဓိပ္ပာယ်ရှိသည်။ ထို့ကြောင့် အထက်ကျမ်းချက်များ၌ “အားလုံး” ဟူသော စကားအစား၊ “အမျိုးတိုင်း” ဟူ၍ဖြစ်စေ၊ ကဘ သုံးစွဲသကဲ့သို့ “အမျိုးစုံသော” ဟူ၍ဖြစ်စေ သုံးစွဲနိုင်သည်။ အဘယ်အသုံးအနှုန်းမှန်ကန်သနည်း။ “အားလုံး” လော၊ “အမျိုးစုံသော” ဟူသောအသုံးအနှုန်း၏သဘောလော။ အဘယ်အသုံးအနှုန်းသည် ကျမ်းစာ၏ကျန်အပိုင်းများနှင့်လည်း ညီညွတ်သနည်း။ ဒုတိယအသုံးအနှုန်းတည်း။ တမန်တော် ၁၀:၃၄၊ ၃၅; ဗျာဒိတ် ၇:၉၊ ၁၀; ၂ သက်သာလောနိတ် ၁:၉ တို့ကိုသုံးသပ်ပါ။ (မှတ်ချက်– အခြားဘာသာပြန်သူများလည်း ဂရိစကားလုံး၏ထိုအဓိပ္ပာယ်ကို သတိပြုမိကြပေသည်။ မဿဲ ၅:၁၁ ၌သူတို့၏ပြန်ဆိုပုံက သာဓကပြနေသည်။—“အမျိုးစုံသော၊” RS, TEV; “အမျိုးတိုင်း၊” NE; “နည်းမျိုးစုံသော၊” KJ။)

ဇွန် ၂၄ (ကက စ. ၃၅၈ အပိုဒ် ၁-၃)

အချို့သူများ ဘယ်တော့မျှကယ်တင်ခြင်းရမည်မဟုတ်ဟု တပ်အပ်ဆိုသောကျမ်းချက်များရှိသလော

၂ သက်. ၁:၉၊ ၁၀– “ထိုသူတို့သည် သခင်ဘုရား၏မျက်နှာတော်နှင့်လည်းကောင်း၊ တန်ခိုးရှိသောဘုန်းတော်နှင့်လည်းကောင်း ကွာ၍ ထာဝရပျက်စီးခြင်းတည်းဟူသောအပြစ်ဒဏ်ကို ခံရကြလတ္တံ့။” (ဖြည့်စွက်စာလုံးစောင်း။)

ဗျာ. ၂၁:၈– “ကြောက်တတ်သောသူ၊ မယုံကြည်သောသူ၊ စက်ဆုပ်ရွံရှာဖွယ်သောသူ၊ လူအသက်ကိုသတ်သောသူ၊ မတရားသောမေထုန်၌မှီဝဲသောသူ၊ ပြုစားတတ်သောသူ၊ ရုပ်တုကိုကိုးကွယ်သောသူ၊ သစ္စာပျက်သောသူအပေါင်းတို့မူကား၊ ဒုတိယသေခြင်းတည်းဟူသော ကန့်နှင့်လောင်သောမီးအိုင်ထဲ၌ မိမိတို့အဖို့ကိုရကြလိမ့်မည်။”

မ. ၇:၁၃၊ ၁၄– “ကျဉ်းသောတံခါးကိုဝင်ကြလော့။ ပျက်စီးခြင်းသို့ရောက်သောလမ်းနှင့်တံခါးသည် ကျယ်ဝန်းသည်ဖြစ်၍ ဝင်သောသူတို့သည် များကြ၏။ အသက်ရှင်ခြင်းသို့ရောက်သောလမ်းနှင့်တံခါးသည် အလွန်ကျဉ်းမြောင်းသည်ဖြစ်၍ တွေ့ဝင်သောသူတို့သည် နည်းကြ၏။”

ဇူလိုင် ၁ (ကက စ. ၃၅၈ အပိုဒ် ၄–စ. ၃၅၉ အပိုဒ် ၁)

တစ်ကြိမ်ကယ်တင်ခြင်းရလျှင် အစဉ်ကယ်တင်ခြင်းရပြီလော

ယု. ၅– “ထိုကြောင့် သင်တို့သည် သိနှင့်သော်လည်း ငါသည် သတိပေး၍ပြောချင်သောအကြောင်းအရာဟူမူကား၊ ထာဝရဘုရားသည် ဣသရေလလူတို့ကို အဲဂုတ္တုပြည်မှ ကယ်လွှတ်တော်မူပြီးလျှင် မယုံကြည်သောသူတို့ကို တစ်ဖန်ဖျက်ဆီး တော်မူ၏။” (ဖြည့်စွက်စာလုံးစောင်း။)

မ. ၂၄:၁၃– “အကြင်သူသည် အဆုံးတိုင်အောင်တည်ကြည်၏၊ ထိုသူသည် ကယ်တင်ခြင်းသို့ ရောက်လိမ့်မည်။” (ထို့ကြောင့် လူတစ်ယောက် ယေရှုပေါ်စတင်ယုံကြည်စဉ် သူနောက်ဆုံးကယ်တင်ခြင်းရမည် မရမည်ဟူသောအချက် မဆုံးဖြတ်သေးချေ။)

ဖိ. ၂:၁၂– “သင်တို့သည် ငါ့မျက်မှောက်၌နားထောင်သည်သာမက၊ မျက်ကွယ်၌လည်း အစဉ်နားထောင်ကြသည်နှင့်အညီ၊ ကြောက်ရွံ့တုန်လှုပ်သောစိတ်နှင့် ကိုယ်ကိုကယ်တင်ခြင်းငှာ ကိုယ်တိုင်ကြိုးစားအားထုတ်ကြလော့။” (ဖိလိပ္ပိ ၁:၁ တင်ပြသည့်အတိုင်း ထိုစကားမှာ ဖိလိပ္ပိမြို့ရှိ “သူတော်စင်များ၊” သို့မဟုတ်၊ သန့်ရှင်းသူများထံ ရေးသည့်စကားဖြစ်သည်။ ကိုယ့်ကိုယ်ကို အယုံမကြီးလွန်းရန်၊ နောက်ဆုံး၌ မိမိတို့ကယ်တင်ခြင်းရမည်မရမည် မသေချာသေးဟူသောအချက်ကို သတိရကြရန် သူတို့ကို ပေါလုတိုက်တွန်းလိုက်သည်။)

ဟေဗြဲ ၁၀:၂၆၊ ၂၇– “အကြောင်းမူကား၊ သမ္မာတရားကိုသိပြီးမှ ကိုယ်အလိုသို့လိုက်၍ပြစ်မှားပြန်လျှင် နောက်တစ်ဖန်အပြစ်ဖြေသောယဇ်ကို ပူဇော်ရာအခွင့်မရှိဘဲ ဒဏ်စီရင်ခြင်းကိုခံရမည်ဟု ကြောက်မက်ဖွယ်သောမျှော်လင့်ရသောအကြောင်း၊ ငြင်းဆန်သောသူတို့ကိုဖျက်ဆီးဖို့ရာ အမျက်တော်မီးလောင်ခြင်းကိုခံရသောအကြောင်းရှိ၏။” (သို့ဖြစ်၍ လူတစ်ဦး “ကယ်တင်ခြင်း” ရပြီးနောက်၌ အဘယ်အပြစ်ကိုပြုစေကာမူ ကယ်တင်ခြင်းလက်လွတ်ဆုံးရှုံးရမည်မဟုတ် ဟူသောအချက်ကို ကျမ်းစာက သဘောမတူချေ။ သစ္စာစောင့်ထိန်းရန် ကျမ်းစာကတိုက်တွန်း၏။ ဟေဗြဲ ၆:၄-၆ ကိုလည်းရှု။ သန့်ရှင်းသောဝိညာဉ်တော်ဖြင့်ဘိသိက်ခံရသူပင် ကယ်တင်ခြင်းမျှော်လင့်ချက် ဆုံးရှုံးနိုင်ဖို့အကြောင်းရှိသည်ကို တင်ပြထားသည်။)

ဇူလိုင် ၈ (ကက စ. ၃၅၉ အပိုဒ် ၂-၅)

ကယ်တင်ခြင်းရရန် ယုံကြည်ခြင်းအပြင် အခြားအရာလိုသေးသလော

ဧ. ၂:၈၊ ၉– “ယုံကြည်သောအားဖြင့် ကျေးဇူးတော် (“မခံစားထိုက်သောကျေးဇူးတော်၊” ကဘ) ကြောင့် ကယ်တင်ခြင်းသို့ရောက်ရ၏။ ကိုယ်အလိုအလျောက် ရောက်သည်မဟုတ်။ ဘုရားသခင် သနားတော်မူရာဖြစ်သတည်း။ ကိုယ်ကုသိုလ်ကြောင့် ကယ်တင်တော်မူခြင်းသို့ ရောက်သည်မဟုတ်။ သို့ ဖြစ်၍ အဘယ်သူမျှ ဝါကြွားစရာအခွင့်မရှိ။” (ကယ်တင်ခြင်းအစီအစဉ်တစ်ရပ်လုံး ဘုရားသခင့်မခံစားထိုက်သော ကျေးဇူးတော်ကြောင့်ဖြစ်သည်။ အာဒံ့သားမြေးတစ်ဦးသည် မည်မျှပင်မွန်မြတ်သောကုသိုလ်ကိုပြုစေကာမူ ထိုကုသိုလ်ဖြင့် ကယ်တင်ခြင်းရဖို့အကြောင်း လုံးဝမရှိ။ ကယ်တင်ခြင်းသည် ဘုရားသခင့်လက်ဆောင်ဖြစ်၍ သားတော့်ယဇ်သကာ၏ အပြစ်ဖြေနိုင်စွမ်းတန်ဖိုးပေါ် ယုံကြည်သောသူတို့အား ပေးတော်မူ၏။)

ဟေဗြဲ ၅:၉– “[ယေရှုသည်] ယုံကြည်နားထောင် သူအပေါင်းတို့အား ထာဝရကယ်တင်ခြင်းကျေးဇူးကိုပြုသောသူ ဖြစ်တော်မူ [၏။]” (ဖြည့်စွက်စာလုံးစောင်း။) (ခရစ်ယာန်များ “ယုံကြည်သောအားဖြင့်” ကယ်တင်ခြင်းရသည်ဟူသောအချက်နှင့် ဖီလာဆန့်ကျင်သလော။ လုံးဝမဆန့်ကျင်ပါ။ နားထောင်ခြင်းမှာ ယုံကြည်ခြင်းစစ်မှန်ကြောင်းသာဓကပြခြင်းသာဖြစ်သည်။)

ယာ. ၂:၁၄၊ ၂၆– “တစ်စုံတစ်ယောက်သောသူက ငါသည် ယုံကြည်ခြင်းရှိ၏ဟုပြောလျက် အကျင့်ကိုမကျင့်ဘဲနေလျှင် အဘယ်အကျိုးရှိသနည်း။ ထိုယုံကြည်ခြင်းသည် ထိုသူကိုကယ်တင်နိုင်သလော။ ဝိညာဉ်နှင့်ကင်းသောကိုယ်သည် အသေဖြစ်သကဲ့သို့၊ အကျင့်နှင့်ကင်းသောယုံကြည်ခြင်းသည် အသေဖြစ်၏။” (လူသည် မိမိ၏အလုပ်ဖြင့် ကယ်တင်ခြင်းကို ရထိုက်၍ရ သည်မဟုတ်။ သို့တစေ၊ ယုံကြည်ခြင်းအစစ်ရှိလျှင် အလုပ်လည်းရှိလိမ့်မည်—ဘုရားသခင်နှင့်ခရစ်တော်အမိန့်များကို နာခံသောအလုပ်၊ မိမိယုံကြည်ခြင်းနှင့် မေတ္တာကို ထင်ရှားစေသောအလုပ်များဖြစ်ပေသည်။ ထိုသို့အလုပ်မျိုးမပါလျှင် သူ့ယုံကြည်ခြင်း အသေဖြစ်၏။)

တ. ၁၆:၃၀၊ ၃၁– “အကျွန်ုပ်သည် ကယ်တင်ခြင်းသို့ရောက်အံ့သောငှာ အဘယ်သို့ပြုရပါမည်နည်း။ . . . ထိုသူတို့ [ပေါလုနှင့်သိလ] ကလည်း သခင်ယေရှုခရစ်ကိုယုံကြည်လော့။ ယုံကြည်လျှင် သင်နှင့်သင်၏အိမ်သူအိမ်သားတို့သည် ကယ်တင်ခြင်းသို့ရောက်ကြလိမ့်မည်ဟု ပြောဆို [၏။]” (ထိုသူနှင့်သူ့အိမ်သားများ တကယ်ယုံကြည်ကြလျှင် ယုံကြည်သည့်အတိုင်း ပြုကြမည်မဟုတ်လော။ မုချ။)

ဇူလိုင် ၁၅ (ကက စ. ၃၆၁ အပိုဒ် ၂–စ. ၃၆၂ အပိုဒ် ၂)

ထိုသို့သောဝိညာဉ်သတ္တဝါတစ်ပါး တကယ်ရှိကြောင်း မည်သို့သိနိုင်သနည်း

သမ္မာကျမ်းစာက အဓိကအထောက်အထားဖြစ်သည်။ သူ့အကြောင်းကို အမည်နှင့်တကွ အဖန်တလဲလဲ ညွှန်းဆိုထားသည်။ (စာတန် ၅၂ ကြိမ်၊ မာရ်နတ် ၃၃ ကြိမ်။) စာတန်ရှိသည်နှင့်ပတ်သက်သော မျက်မြင်သက်သေထွက်ဆိုချက်ကိုလည်း မှတ်တမ်းတင်ထားသည်။ မည်သူသည် မျက်မြင်သက်သေနည်း။ မြေကြီးပေါ်သို့ကြွမလာမီ ကောင်းကင်၌နေခဲ့သောယေရှုခရစ်က ကြိမ်ဖန်များစွာ ထိုဆိုးယုတ်သူအကြောင်းကို အမည်နှင့်တကွ မိန့်ဆိုသည်။—လု. ၂၂:၃၁; ၁၀:၁၈; မ. ၂၅:၄၁။

စာတန်မာရ်နတ်ဆိုင်ရာကျမ်းစာအဆိုသည် အကျိုးအကြောင်းညီညွတ်၏။ လူသားတို့ကြုံကြိုက်သောဘေးဆိုးသည် လူလူချင်းရန်ငြိုး၏ပယောဂနှင့်မကင်းသော်လည်း ယင်းနှင့်အချိုးအစားမမျှအောင် ကြီးမားလှ၏။ စာတန်၏ဇာစ်မြစ်နှင့် သင်း၏လှုပ်ရှားမှုဆိုင်ရာ ကျမ်းစာရှင်းလင်းချက်ကို ထောက်လျှင် လူအများထုက ငြိမ်းချမ်းစွာနေလိုပါလျက်နှင့် လူသားတို့သည် အဘယ်ကြောင့် အနှစ်ထောင်နှင့်ချီ ပြီး မုန်းတီးမှု၊ ရမ်းကားသတ်ဖြတ်မှုနှင့် စစ်မက်တို့၏ဒဏ်ကို အလူးအလဲခံလျက်နေရကြောင်း၊ အဘယ်ကြောင့် ယခု လူသားတစ်မျိုးလုံး ပြုန်းတီးတော့မည့်ကိန်းပင်ဆိုက်နေသည့်အထိ ဆိုးရွားလာကြောင်း ရှင်းလင်းစွာနားလည်နိုင်သည်။

မာရ်နတ်တကယ်မရှိခဲ့ပါက သူနှင့်ပတ်သက်သောကျမ်းစာအဆိုကိုလက်ခံလျှင်လည်း ထာဝရအကျိုး ရမည်မဟုတ်။ သို့ရာတွင် အဖြစ်အပျက်များစွာတို့၌ မှော်အတတ်ကို အပျော်တမ်းလိုက်စားခဲ့သူများ၊ သို့မဟုတ်၊ နတ်ဝိဇ္ဇာအတတ်လိုက်စားသောအဖွဲ့ဝင်ဖြစ်ခဲ့သူများက မိမိတို့သည် ထိုယခင်အချိန်တွင် အရူပဌာနမှ “စကားသံများ” ကြားရခြင်း၊ “နတ်ပူး” ခံရခြင်း စသည်တို့ကြောင့် အလွန်စိတ်ဆင်းရဲခဲ့ရကြောင်း ဆိုကြပါသည်။ သူတို့သည် စာတန်နှင့်သူ၏နတ်ဆိုးများဆိုင်ရာ ကျမ်းစာတင်ပြချက်များကိုသိရှိပြီး ကျမ်းစာသြဝါဒကိုကျင့်သုံးကာ နတ်ဝိဇ္ဇာအတတ်များကိုရှောင်၍ ယေဟောဝါ၏မစမှုအတွက်ဆုတောင်းသောအခါ တကယ်ချမ်းသာရကြလေသည်။—“နတ်ဝိဇ္ဇာအတတ်” ခေါင်းစဉ်အောက် စာမျက်နှာ ၃၈၄-၃၈၉ ကိုရှု။

စာတန်ရှိ၏ဟုယုံကြည်သည်ဆိုရာတွင် သူ၌ ချိုနှစ်ချောင်းနှင့်အမြီးချွန်ချွန်ပါပြီး ဆူးထောက်ခွကြီးကိုင်ကာ မီးငရဲထဲ၌ လူကိုမြှိုက်သည်ဟူသောအယူအား လက်ခံခြင်းကိုမဆိုလိုပါ။ စာတန်သည် ဤပုံမျိုးဖြစ်၏ဟု ကျမ်းစာမဆို။ အလယ်ခေတ်ကအနုပညာရှင်များ၏စိတ်ကူးလက်ရာများသာဖြစ်သည်။ ထိုပညာရှင်တို့သည် ဒဏ္ဍာရီထဲမှဂရိနတ်ဘုရား ပန် နှင့်ပတ်သက်သောသရုပ်ဖော်ချက်နှင့်၊ အီတာလျံကဗျာဆရာ ဒန်းတီးအလီဂျယ်ရီ (Dante Alighieri) ရေးသည့် Inferno (ငရဲ) အမည်ရှိကဗျာ၏ ဩဇာလွှမ်းမိုးမှုကိုခံရ၍ဖြစ်သည်။ ကျမ်းစာက မီးငရဲအယူကိုမသွန်သင်ဘဲ “သေသောသူမူကား အဘယ်အရာကိုမျှမသိ” ဟု ရှင်းလင်းစွာတင်ပြ၏။—ဒေ. ၉:၅။

ဇူလိုင် ၂၂ (ကက စ. ၃၆၂ အပိုဒ် ၃–စ. ၃၆၃ အပိုဒ် ၁)

စာတန်ဟူသည် လူ့ကိုယ်တွင်းထဲကဉာဉ်ဆိုးပင်ဖြစ်သလော

ယောဘ ၁:၆-၁၂ နှင့် ၂:၁-၇ က ယေဟောဝါဘုရားသခင်နှင့်စာတန် အပြန်အလှန်ပြောဆိုသည်ကို ဖော်ပြထားသည်။ စာတန်သည် ကိုယ်တွင်းမှဉာဉ်ဆိုးမှန်လျှင် ထိုဉာဉ်ဆိုးသည် ယေဟောဝါ၏ကိုယ်တွင်းကဖြစ်ရလိမ့်မည်။ သို့ဆိုလျှင် ကိုယ်တော်သည် “မတရားသောအမှုနှင့် ကင်းလွတ်တော်မူသည်” ဟူသော ကျမ်းစာဖော်ပြချက်နှင့် လားလားကြီးဆန့်ကျင်ချေမည်။ (ဆာ. ၉၂:၁၅; ဗျာ. ၄:၈) မှတ်သားဖွယ်အချက်မှာ၊ ယောဘမှတ်တမ်း၌ ဟေဗြဲကျမ်းက has·Sa·tanʹ (ဟက်စ်စာတန်း [ထိုစာတန်]) ဟူ၍ သုံးနှုန်းထားသဖြင့် ဘုရားသခင်ကိုအန်တုခြင်း၌ ပေါ်လွင်ထင်ရှားသောထိုသူကို ရည်ညွှန်းကြောင်းသိသာစေ၏။—ကဘ ကျမ်းညွှန်းပါအတွဲမှ ဇာခရိ ၃:၁၊ ၂ ၏အောက်ခြေမှတ်ချက်ကိုလည်းရှု။

လုကာ ၄:၁-၁၃ က စာတန်သည် ယေရှုအား မိမိခိုင်းသည့်အတိုင်းလုပ်ဖို့ သွေးဆောင်ကြောင်းဖော်ပြသည်။ မာရ်နတ်အဆိုနှင့် ယေရှု၏အဖြေကို တင်ပြထားသည်။ ယေရှုသည် မိမိကိုယ်တွင်းမှ မကောင်းမှု၏သွေးဆောင်ခြင်းကိုခံနေရခြင်းလော။ ဤသို့ယူဆလျှင် ယေရှုသည် အပြစ်ကင်းသူဖြစ်သည်ဟူသော ကျမ်းစာဖော်ပြချက်နှင့် ကိုက်ညီတော့မည်မဟုတ်။ (ဟေဗြဲ ၇:၂၆; ၁ ပေ. ၂:၂၂) ယောဟန် ၆:၇၀ ၌ ဂရိစကား di·aʹbo·losʹ (ဒိုင်အားဘိုလော့စ်) ကို ယုဒရှကာရုတ်စိတ်တွင်းဖြစ်ပေါ်လာသည့် မကောင်းသောအရည်အသွေးတစ်ခုအဖြစ် သုံးသော်လည်း လုကာ ၄:၃ ၌ ho di·aʹbo·los (ဟိုဒိုင်အားဘိုလော့စ် [ထိုမာရ်နတ်]) ကိုအသုံးပြုသည်ဖြစ်၍ တစ်စုံတစ်ယောက်ကိုရည်ညွှန်းပေသည်။

စာတန်ကိုအပြစ်ဖို့ခြင်းမှာ တာဝန်ရှောင်လွှဲနည်းတစ်မျိုးမျှသာဖြစ်သလော

အချို့လူတို့သည် ကိုယ်လုပ်ပြီးမှ၊ စာတန်ပေါ်အပြစ်ပုံချကြသည်။ ကျမ်းစာကမူ လူသည် အခြားလူသားများကြောင့်ဖြစ်စေ၊ မည်သူမပြု မိမိမှုကြောင့်ဖြစ်စေ ဒုက္ခတွေ့ကြရခြင်းဖြစ်သည်မှာ အကြိမ်မနည်းကြောင်း တင်ပြ၏။ (ဒေ. ၈:၉; ဂလ. ၆:၇) သို့တစေ သမ္မာကျမ်းစာက လူသားတို့အပေါ် များစွာသောပူဆွေးမှုကျရောက်စေသော လူ့ထက်စွမ်းသည့် ရန်သူတစ်ပါးရှိကြောင်း၊ သူ၌ဉာဏ်နီဉာဏ်နက်များကြောင်း ကျွန်ုပ်တို့အား အသိမပေးဘဲမနေပါ။ သူ့လက်ခုပ်ထဲမှလွတ်မြောက်အောင် မည်သို့ ပြုရမည်ကို ဖော်ပြပေသည်။

ဇူလိုင် ၂၉ (ကက စ. ၃၆၃ အပိုဒ် ၂)

စာတန်အဘယ်ကလာသနည်း

ယေဟောဝါ၏အမှုတော်အားလုံး စုံလင်ပေသည်။ ကိုယ်တော်သည် မဖြောင့်မတ်မှုကို အစပျိုးသူမဟုတ်။ ထို့ကြောင့် ဆိုးသွမ်းသူတစ်ဦးကိုမျှ ဖန်ဆင်းတော်မမူခဲ့။ (တရား. ၃၂:၄; ဆာ. ၅:၄) စာတန်ဖြစ်လာသူသည် အစ၌ စုံလင်သောဘုရားသားတစ်ပါးဖြစ်၏။ သူသည် “သစ္စာတရား၌ မတည်မနေ” ဟု ယေရှုဆိုရာ၌ တစ်ချိန်က ‘သစ္စာတရား၌တည်’ ဖူးကြောင်း ပြသည်။ (ယော. ၈:၄၄) သို့သော် ဤဝိညာဉ်သားသည် ဘုရားသခင်၏ အသိဉာဏ်ရှိသတ္တဝါများအားလုံးနည်းတူ စိတ်ကြိုက်ရွေးချယ်ပြုလုပ်နိုင်ခွင့် ရထားသည်။ သူသည် ကြိုက်ရာလုပ်နိုင်သောလွတ်လပ်မှုကို အလွဲသုံးခဲ့၏။ နှလုံးထဲ၌ မာနစိတ်ပေါ်ခွင့်ပြု၏။ ဘုရားသခင်သာခံထိုက်သော သူတစ်ပါး၏ဝတ်ပြုခြင်းကို ခုံမင်လာသဖြင့် ဘုရားသခင်ကိုနားထောင်မည့်အစား မိမိကိုနာခံကြရန် အာဒံနှင့်ဧဝတို့အား သွေးဆောင်လေတော့သည်။ ထို့ကြောင့် မိမိလုပ်ရပ်ဖြင့် မိမိကိုယ်ကို စာတန်ဖြစ်စေ၏။ စာတန်၏အဓိပ္ပာယ်မှာ “ရန်ဘက်” ပင်ဖြစ်၏။—ယာ. ၁:၁၄၊ ၁၅; “အပြစ်” ခေါင်းစဉ်အောက် စာမျက်နှာ ၃၇၂ ကိုလည်းရှု။

ဩ ၅ (ကက စ. ၃၆၃ အပိုဒ် ၃–စ. ၃၆၄ အပိုဒ် ၁)

ဘုရားသခင်သည် စာတန်ပုန်ကန်လျှင်ပုန်ကန်ချင်း အဘယ်ကြောင့် သူ့ကိုမဖျက်ဆီးလိုက်သနည်း

စာတန်သည် ကြီးလေးသောအောက်ပါပုစ္ဆာများကို ဖြစ်ပေါ်စေခဲ့သည်။ (၁) ယေဟောဝါ၏အချုပ်အခြာအာဏာသည် ဖြောင့်မတ်ခြင်းရှိမရှိ၊ ၄င်းအာဏာကို ကိုယ်တော် ရပိုင်ခွင့်ရှိမရှိ။ ယေဟောဝါသည် ပျော်ရွှင်မှုကိုအထောက်အကူပြုသော လွတ်လပ်ခွင့်ကို လူသားတို့အား မပေးဘဲနေသလော။ လူသားတို့သည် အမှန်ပင် ဘုရားသခင်ကိုနာခံမှသာ မိမိတို့အမှုအရေးကို ပိုင်နိုင်စွာထိန်းကွပ်ပြီး ဆက်လက်အသက်ရှင်သွားနိုင်မည်လော။ ကိုယ်တော်သည် မနာခံလျှင်သေရမည် ဟူသောပညတ်ကို ထုတ်ပြန်တော်မူရာ၌ မရိုးသားသည့်သဘောပါသလော။ (က. ၂:၁၆၊ ၁၇; ၃:၃-၅) ထို့ကြောင့် ယေဟောဝါ၌ အုပ်စိုးပိုင်ခွင့် တကယ်ပင်ရှိ၏လော။ (၂) အသိဉာဏ်ရှိသတ္တဝါများ ယေဟောဝါပေါ်သစ္စာရှိမရှိ။ အာဒံနှင့်ဧဝတို့၏ဖောက်ပြန်မှုကြောင့် အောက်ပါမေးခွန်းပေါ်လာသည်။ ယေဟောဝါ၏ကျေးကျွန်တို့သည် ကိုယ်တော်ကိုတကယ်ပင်ချစ်၍ အမိန့်တော်ကိုနာခံကြခြင်းလော။ သို့မဟုတ်၊ သူတို့အားလုံး ဘုရားသခင်ကိုစွန့်၍ စာတန့်နောက်သို့ လိုက်ကြမည်လော။ စာတန်သည် ယောဘလက်ထက်၌ ထိုပြဿနာကို ဆင့်ပွားစေခဲ့သည်။ (က. ၃:၆; ယောဘ ၁:၈-၁၁; ၂:၃-၅; လုကာ ၂၂:၃၁ ကိုလည်းရှု။) သူပုန်များကို အဆုံးစီရင်လိုက်ရုံနှင့် ထိုပြဿနာများ ပြေလည်သွားမည်မဟုတ်။

ဘုရားသခင်သည် ကိုယ့်အဖို့ တစ်ခုခုသက်သေပြရန် လို၍မဟုတ်။ သို့တစေ၊ ထိုပြဿနာများကြောင့် စကြဝဠာ၏ငြိမ်းချမ်းရေးနှင့်ကောင်းကျိုး နောက်တစ်ဖန် အနှောင့်အယှက်မတွေ့ရလေအောင် ၎င်းတို့ကို သံသယကင်းသည်တိုင် အပြီးဖြေရှင်းဖို့ အချိန်လုံလောက်စွာ ပေးတော်မူ၏။ အာဒံနှင့်ဧဝတို့ ဘုရားသခင်ကိုပုန်ကန်သည်နှင့်အမျှ သေကြရကြောင်း နောက်ပိုင်း၌ ထင်ရှားလာသည်။ (က. ၅:၅) သို့သော် ပြဿနာမှာ ဤမျှသာမဟုတ်။ ထို့ကြောင့် မိမိတို့ဖန်တီးသော အဘယ်အစိုးရဖြင့်မဆို စမ်းသပ်အုပ်ချုပ်ကြည့်ရန် စာတန်နှင့်လူသားတို့အား အခွင့်ပေးတော်မူ၏။ အဘယ်အစိုးရကမျှ အဓွန့်ရှည်သောပျော်ရွှင်မှုကို မဖြစ်ထွန်းစေခဲ့ပါ။ မိမိ၏ဖြောင့်မတ်သောစံများကိုဥပေက္ခာပြုပြီး ထင်သလိုနေရန် လူသားတို့အား အဆုံးစွန် ခွင့်ပြုတော်မူခဲ့ပြီ။ အကျိုးရလဒ်ကား အထင်းသား။ ကျမ်းစာဆိုသည့်အတိုင်း မှန်လှပေ၏။ လူသည် “သွားစဉ်အခါ မိမိခြေရာတို့ကို မစီရင်တတ်။” (ယေ. ၁၀:၂၃) တစ်ချိန်တည်းတွင် ဖြားယောင်းသွေးဆောင်မှုနှင့် စာတန်မီးထိုးသောညှဉ်းဆဲမှုကို ရင်ဆိုင်ရလျက်ကယ် ဘုရားသခင်ကိုချစ်၍နာခံခြင်းဖြင့် ကိုယ်တော်ပေါ်မိမိတို့သစ္စာစောင့်ကြောင်း သက်သေပြနိုင်သောအခွင့်အရေးကို ကျေးကျွန်တော်တို့အား ပေးတော်မူလေပြီ။ ယေဟောဝါက ကျေးကျွန်တော်တို့အား ဤသို့တိုက်တွန်းတော်မူ၏– “ငါ့သား၊ ပညာရှိလော့။ ကဲ့ရဲ့သောသူ၏စကားကို ငါချေနိုင်အောင်၊ ငါ့စိတ်ကို ရွှင်လန်းစေလော့။” (သု. ၂၇:၁၁) သစ္စာမြဲသူတို့သည် ယခုပင် ကြီးစွာသောအကျိုးကိုရိတ်သိမ်းရပြီး နောင်၌လည်း စုံလင်သောထာဝရအသက်ရဖို့မျှော်လင့်ချက်ရှိ၏။ သူတို့သည် ထိုအသက်တာကိုအသုံးပြုပြီး ယေဟောဝါအလိုတော်ကိုဆောင်ရွက်ကြလိမ့်မည်။ သူတို့သည် ကိုယ်တော့်ပင်ကိုစရိုက်နှင့် နည်းလမ်းတော်ကို တကယ်မြတ်နိုးကြ၍တည်း။

ဩ ၁၂ (ကက စ. ၃၆၄ အပိုဒ် ၂–စ. ၃၆၅ အပိုဒ် ၂)

စာတန်သည် ယနေ့လောကတွင် မည်မျှတန်ခိုးသြဇာကြီးသောသူဖြစ်သနည်း

ယေရှုခရစ်က စာတန့်ကို “လောကမင်း” အဖြစ်ညွှန်းဆို၏။ လူသားအများသည် စာတန်တိုက်တွန်းသည့်အတိုင်း ဘုရားသခင့်တောင်းဆိုချက်များကို ဥပေက္ခာပြုပြီး သူ့ကို နာခံကြသည်။ (ယော. ၁၄:၃၀၊ သမ; ဧ. ၂:၂) ကျမ်းစာက သူ့ကို “ဤစနစ်၏ဘုရား” ဟူ၍လည်း သမုတ်သည်။ ဤစနစ်ကိုဆည်းကပ်သူတို့က မိမိတို့၏ဘာသာတရားဓလေ့များကိုကျင့်သုံးခြင်းဖြင့် သူ့ကိုရှိခိုးကိုးကွယ်ကြသည်။—၂ ကော. ၄:၄၊ ကဘ; ၁ ကော. ၁၀:၂၀။

စာတန်သည် ယေရှုခရစ်ကိုဖြားယောင်းလိုသဖြင့် သူ့ကို “ဆောင်သွား၍ ဤလောက၌ရှိသမျှသော တိုင်းနိုင်ငံတို့ကို တစ်ခဏချင်းတွင် ပြညွှန်၍ ဤဘုန်းတန်ခိုးအာနုဘော်ရှိသမျှကို ငါ၌အပ်ခဲ့ပြီ။ ငါသည် ပေးလိုသောသူအား ပေးရသည်ဖြစ်၍ ကိုယ်တော်အား ပေးပါမည်။ ငါ့ကိုကိုးကွယ်လျှင် ဤအလုံးစုံတို့သည် ကိုယ်တော်၏ဥစ္စာဖြစ်လိမ့်မည်ဟု လျှောက်လေ၏။” (လု. ၄:၅-၇) ဗျာဒိတ် ၁၃:၁၊ ၂ က စာတန်သည် ‘မိမိတန်ခိုး၊ ပလ္လင်နှင့် ကြီးစွာသောအာဏာစက်’ ကို ကမ္ဘာ့နိုင်ငံရေးအုပ်ချုပ်မှုစနစ်အား ပေးကြောင်း ဖော်ပြ၏။ သူ့လက်အောက်၌ ကမ္ဘာ့အဓိကနိုင်ငံများအပေါ်စိုးမိုးသော နတ်ဆိုးမင်းများရှိကြောင်း ဒံယေလ ၁၀:၁၃၊ ၂၀ က ထုတ်ဖော်တင်ပြ၏။ ၎င်းတို့ကို ဧဖက် ၆:၁၂ က ‘အစိုးရများ၊ အာဏာပိုင်များ၊ အမှောင်ထုကိုအစိုးရသော ကမ္ဘာ့မင်းစိုးရာဇာများ၊ ကောင်းကင်အရပ်ရှိနတ်ဆိုးအင်အားစုများ’ ဟူ၍ ညွှန်းဆိုသည်။

ထို့ကြောင့် ၁ ယောဟန် ၅:၁၉ (သမ) က “တစ်လောကလုံးသည် မာရ်နတ်၏လက်တွင်း၌ ရှိနေ” သည်ဟုဆိုခြင်းမှာ အဆန်းမဟုတ်။ သို့ရာတွင် သူ၏အာဏာသည် အချိန်အကန့်အသတ်နှင့်ဖြစ်၏။ အနန္တတန်ခိုးရှင်ဘုရားသခင်ဖြစ်သော ယေဟောဝါ သည်းခံလျက်နေ၍သာ တည်နေခြင်းဖြစ်သည်။

ဩ ၁၉ (ကက စ. ၃၆၅ အပိုဒ် ၄–စ. ၃၆၆ အပိုဒ် ၃)

စာတန့်သြဇာဆိုးမှလွတ်မြောက်ခြင်းအစီအစဉ်ကို အောက်ပါပုံဆောင်စကားဖြင့်တင်ပြထား၏။ “တစ်ဖန် ကောင်းကင်တမန်သည် အနက်ဆုံးသောတွင်း၏သော့နှင့် သံကြိုးကြီးကိုကိုင်လျက် ကောင်းကင်ကဆင်းသက်သည်ကို ငါမြင်၏။ ရှေးမြွေဟောင်း၊ မာရ်နတ်စာတန်တည်းဟူသော နဂါးကိုကိုင်ဖမ်း၍ အနှစ်တစ်ထောင်ဖို့ချည်နှောင်လေ၏။ အနှစ်တစ်ထောင်မကုန်မီတိုင်အောင် လူအမျိုးမျိုးတို့ကို မလှည့်ဖြားရမည်အကြောင်း၊ အနက်ဆုံးသောတွင်းထဲသို့ ချပစ်လှောင်ထား၍ တံဆိပ်ခတ်လေ၏။ အနှစ်တစ်ထောင်ကုန်ပြီးမှ တစ်ဖန် ခဏလွှတ်ရဦးမည်။” (ဗျာ. ၂၀:၁-၃) ထို့နောက် ဘာဖြစ်မည်နည်း။ “သူတို့ကိုလှည့်ဖြားသောမာရ်နတ်ကို . . . ကန့်နှင့်ရောနှောသောမီးအိုင်ထဲသို့ချပစ်” လိမ့်မည်။ (ဗျာ. ၂၀:၁၀) ၎င်းသည် ဘာကိုဆိုလိုသနည်း။ ဗျာဒိတ် ၂၁:၈ က “ဒုတိယသေခြင်း” ဖြစ်သည်ဟု ဆို၏။ သူသည် ထာဝစဉ်ပျောက်ကွယ်သွားမည်တည်း။

စာတန်ကို ‘တွင်းနက်ထဲချပစ်ခြင်း’ မှာအနှစ် ၁,၀၀၀ အတွင်းလူတစ်ယောက်ကိုမျှမလှည့်ဖြားစေနိုင်အောင် သူ့အား လူမဲ့ကမ္ဘာတွင် အကျယ်ချုပ်ထားခြင်းလော

အချို့က ဤအယူကိုထောက်ခံရန် (စာမျက်နှာ ၃၆၅ ၌ကိုးကားသော) ဗျာဒိတ် ၂၀:၃ ကိုညွှန်းကြ၏။ “တွင်းနက်ကြီး” (သက) ဟူသည် လူမနေသည့်ကမ္ဘာကိုပုံခိုင်းသည်ဟု ဆိုကြသည်။ မှန်သလော။ ဗျာဒိတ် ၁၂:၇-၉၊ ၁၂ အရ၊ စာတန်သည် ကောင်းကင်မှမြေကြီးသို့ “ချ” ခြင်းခံရ၍ အချိန်အတန်ကြာကုန်လွန်ပြီးမှ “တွင်းနက်ကြီး” ထဲသို့ချပစ်ခြင်းခံရမည်ဖြစ်၏။ ထို့ကြောင့် ဗျာဒိတ် ၂၀:၃ က စာတန်ကို “တွင်းနက်ကြီးထဲသို့ပစ်ချ” သည်ဆိုရာ၌ သူ့ကိုလူတို့မမြင်ရသော်လည်း နဂိုအချုပ်ခံရာကမ္ဘာ့ဝန်းကျင်၌ ထားမြဲထားရစ်ခြင်းသာဖြစ်မည်မဟုတ်။ “အနှစ်တစ်ထောင်မကုန်မီတိုင်အောင် လူအမျိုးမျိုးတို့ကို မလှည့်ဖြားရမည်အကြောင်း” သူ့ကို ထိုနေရာမှ အဝေးသို့ဖယ်ရှားလိုက်မည်။ ဗျာဒိတ် ၂၀:၃ အရ၊ အနှစ်တစ်ထောင်ကုန်သောအခါ တွင်းနက်ကြီးထဲမှလွတ်လာမည့်သူမှာ လူအမျိုးမျိုးမဟုတ်၊ စာတန်သာဖြစ်ကြောင်း သတိပြုပါ။ စာတန်လွတ်လာသောအခါ ထိုလူအမျိုးမျိုးအဖြစ်ဖွဲ့စည်းသောလူတို့သည် ရှိနှင့်ပြီးဖြစ်မည်။

ဆိုခဲ့သည့်အယူကိုထောက်ခံရန် တစ်ခါတစ်ရံ ဟေရှာယ ၂၄:၁-၆ (သမ) နှင့် ယေရမိ ၄:၂၃-၂၉ တို့ကို ကိုးကားကြသည်။ ထိုကျမ်းချက်များက ဤသို့ဆို၏– “ကြည့်လော့။ . . . ထာဝရဘုရားသည် မြေပထဝီကိုမှောက်လှန်၍ လဟာသက်သက်ဖြစ်စေတော်မူ [မည်။] . . . မြေပထဝီသည် လုယက်ဖျက်ဆီးခြင်းခံရလျက် လဟာသက်သက်ဖြစ်လိမ့်မည်ဟု ထာဝရဘုရားမိန့်တော်မူ [၏။]” “ငါသည် မြေကြီးကိုကြည့်ရှု၍ လွတ်လပ်လဟာဖြစ်၏။ . . . ငါကြည့်ရှု၍ လူမရှိ။ . . . ထာဝရဘုရားမိန့်တော်မူသည်ကား၊ တစ်ပြည်လုံးပျက်စီးရာဖြစ်လိမ့်မည်။ . . . မြို့ရှိသမျှတို့ကို စွန့်ပစ်၍ နေသောသူတစ်ယောက်မျှမရှိရ။” ဤအနာဂတ္တိစကားများက ဘာကိုဆိုလိုသနည်း။ ၎င်းတို့သည် ယေရုရှလင်မြို့နှင့်ယုဒပြည်အပေါ် အဦးဆုံးပြည့်စုံခဲ့သည်။ ယေဟောဝါသည် ထိုပြည်ကိုတရားစီရင်သည့်အနေနှင့် ဗာဗုလုန်လူတို့အား ချင်းနင်းဝင်ရောက်စေသည်။ ၎င်းသည် အဆုံး၌ လူမနေသည့်အဖြစ်သို့ရောက်ခဲ့ရသည်။ (ယေရမိ ၃၆:၂၉ ကိုရှု။) သို့ရာတွင် တစ်ကမ္ဘာလုံး လူမနေအောင် ပြုတော်မမူခဲ့။ ယခုလည်း ထိုသို့ပြုတော်မူမည်မဟုတ်။ (“မြေကြီး” ခေါင်းစဉ်အောက်၊ စာမျက်နှာ ၁၁၂-၁၁၅ နှင့် “ကောင်းကင်” ခေါင်းစဉ်တို့ကိုလည်းရှု။) သို့သော်၊ သစ္စာမဲ့ယေရုရှလင်မြို့၏ပုံတူဖြစ်သော၊ မိမိ၏ညစ်ညမ်းသောအကျင့်များဖြင့် ဘုရားသခင့်နာမတော်ကိုကဲ့ရဲ့ဖွယ်ဖြစ်စေသော ခရစ်ယာန်ဘောင်ကို စာတန့်ရူပအဖွဲ့အစည်း၏ကျန်အပိုင်းများနှင့်တကွ ဖျက်ဆီးသဖြင့် လူခြေတိတ်စေတော်မူမည်။

ကမ္ဘာတစ်ဝန်းလုံးသည် လူနေမဲ့ဖြစ်မည့်အစား၊ ခရစ်တော်၏အနှစ်တစ်ထောင်အုပ်ချုပ်မှုအတွင်း၊ စာတန်တွင်းနက်ကြီးထဲ၌ရှိခိုက် ပရဒိသုဖြစ်လာလိမ့်မည်။