ဝိညာဏအကျင့်ကောင်းများကို ပြုစုပျိုးထောင်၍ ကြွယ်ဝသောကောင်းချီးများကို ရိတ်သိမ်းလော့

၁။ သင့်ဝိညာဏလုပ်ရိုးလုပ်စဉ်ကို ဆန်းစစ်ခြင်းသည် အဘယ်ကြောင့်အကျိုးရှိသနည်း။

^၁ သင် ခရစ်ယာန်တစ်ဦးဖြစ်စတွင် ကျမ်းစာလေ့လာခြင်း၊ ခရစ်ယာန်အစည်းအဝေးများ၊ လယ်ကွင်းဓမ္မအမှုနှင့် ဆုတောင်းခြင်းစသည့် ဝိညာဏလုပ်ရိုးလုပ်စဉ်များရှိလာရန် အလွန်ကြိုးစားအားထုတ်ခဲ့ပေမည်။ သင့်ကြိုးစားမှုအပေါ် ယေဟောဝါ ကောင်းချီးသွန်းလောင်းသောကြောင့် သင် ဝိညာဉ်ရေးတိုးတက်လာသည်။ ယခုဆိုလျှင် သင်နှစ်ခြင်းခံပြီးသည်မှာ နှစ်အတန်ကြာရှိပေမည်။ ခရစ်ယာန်တစ်ဦးဖြစ်လာစဉ်က ရှိခဲ့သော ဝိညာဏအကျင့်ကောင်းများ သင့်တွင် ဆက်ရှိနေသလော။

၂။ နေ့စဉ်ကျမ်းစာဖတ်ရှုခြင်းမှ ကျွန်ုပ်တို့ မည်သို့အကျိုးခံစားရသနည်း။

^၂ သင့်လုပ်ရိုးလုပ်စဉ်ကို ဆန်းစစ်ပါ– သင်သည် သမ္မာကျမ်းစာမှ အပိုင်းတစ်ပိုင်းကို နေ့စဉ်ဖတ်ရှုသည့်အကျင့်ရှိသလော။ ထိုသို့ဖတ်ရှုခြင်းဖြင့် ကြွယ်ဝသောကောင်းချီးများကို ကျွန်ုပ်တို့ ရိတ်သိမ်းကြရသည်။ (ယောရှု ၁:၈; ဆာ. ၁:၂၊ ၃) ရှေးဣသရေလဘုရင်များသည် ပညတ်တရားကို ကူးရေး၍ “တစ်သက်လုံး စောင့်ရှောက်ကြည့်ရှုဖတ်ရွတ်” ကြရသည်။ မည်သည့်အကျိုးများရရှိသနည်း။ စိတ်နှလုံးနှိမ့်ချလာပြီး ယေဟောဝါကို ကြောက်ရွံ့တတ်လာသဖြင့် ကိုယ်တော့်ပညတ်တော်များမှ သွေဖည်သွားမည်မဟုတ်ပေ။ (တရား. ၁၇:၁၈-၂၀) အလားတူ ယနေ့လည်း နေ့စဉ်ကျမ်းစာဖတ်ရှုခြင်းဖြင့် ဤယိုယွင်းဖောက်ပြန်သော လောကအလယ်တွင် အပြစ်တင်ခွင့်မရှိဘဲနေနိုင်မည်ဖြစ်သည်။ ထို့ပြင် ဓမ္မအမှုအတွက် ကောင်းစွာပြင်ဆင်လေ့ကျင်ခံရပြီးသား ဖြစ်စေသည်။—ဖိ. ၂:၁၅၊ ၁၆; ၂ တိ. ၃:၁၇။

၃။ အစည်းအဝေးများကို မှန်မှန်တက်ရောက်ခြင်းမှ မည်သို့အကျိုးခံစားရသနည်း။

^၃ ယေရှုသည် ကျမ်းစာအကြောင်း ဆွေးနွေးပြောဆိုသော တရားဇရပ်သို့ သွားသည့်ထုံးစံရှိသည်။ (လု. ၄:၁၆) ယင်းက ကိုယ်တော်ကြုံတွေ့ရမည့် စုံစမ်းမှုများကို ရင်ဆိုင်နိုင်ရန် အသင့်ပြင်ဆင်ပေးမည်မှာ သေချာပါသည်။ ကျွန်ုပ်တို့လည်း အသင်းတော်အစည်းအဝေးများတွင် တင်ဆက်သော ဝိညာဏသွန်သင်ချက်နှင့် အကျိုးဖြစ်ထွန်းစေသော ‘အချင်းချင်းအားပေး’ တည်ဆောက်ခြင်းတို့ဖြင့် ခွန်အားရရှိကြသည်။ (ရော. ၁:၁၂) ကျွန်ုပ်တို့၏ ညီအစ်ကိုများနှင့် အတူတကွစုဝေးခြင်းသည် ဤနောက်ဆုံးနေ့ရက်များ၏ ပြဿနာများကို ခံနိုင်ရည်ရှိစေပါသည်။ (ဟေဗြဲ ၁၀:၂၄၊ ၂၅) အစည်းအဝေးအားလုံးကို တက်ရောက်ခြင်းသည် သင့်အတွက် ထုံးစံဖြစ်နေဆဲလော။

၄။ လယ်ကွင်းလုပ်ငန်းတွင် ပတ်စဉ်ပါဝင်ခြင်းက ကျွန်ုပ်တို့ကို မည်သို့အကျိုးပြုသနည်း။

^၄ တမန်တော်များသည် “ဗိမာန်တော်၌လည်းကောင်း၊ အိမ်၌လည်းကောင်း နေ့တိုင်း” သတင်းကောင်းဟောပြောကြကြောင်း ကျမ်းစာက ဖော်ပြသည်။ (တ. ၅:၄၂) ဟောပြောခြင်းလုပ်ငန်းတွင် နေ့စဉ်မပါဝင်နိုင်သည့်တိုင် ဓမ္မအမှု၏ပုံစံအချို့တွင် ပတ်စဉ်ပါဝင်ခြင်းကို အကျင့်ဖြစ်စေနိုင်သလော။ ထိုသို့ပြုလုပ်ခြင်းဖြင့် ဘုရားသခင့်နှုတ်ကပါဌ်တော်ကို ပိုမိုကျွမ်းကျင်စွာကိုင်တွယ်တတ်လာမည်။ အခြားသူများကို ကျမ်းစာအမှန်တရား ဝေမျှခြင်းနှင့်ပတ်သက်သော အားရှိဖွယ်တွေ့ကြုံမှုများ ရှိလာပေမည်။

၅။ ယေဟောဝါထံ မှန်မှန်ဆုတောင်းရန် အဘယ်ကြောင့်အရေးကြီးသနည်း။

^၅ ပရောဖက်ဒံယေလသည် သူ့အသက်တာတစ်လျှောက်လုံး ယေဟောဝါအမှုတော်ကို “မပြတ်” ထမ်းဆောင်ခဲ့ခြင်းကြောင့် ကြွယ်ဝစွာဆုချခံခဲ့ရ၏။ ယင်းတွင် ယေဟောဝါထံ မှန်မှန်ဆုတောင်းသည့်အကျင့်လည်း ပါဝင်သည်။ (ဒံ. ၆:၁၀၊ ၁၆၊ ၂၀) အလားတူ၊ ကျွန်ုပ်တို့လည်း ယေဟောဝါထံ နှလုံးပါပါ မှန်မှန်ဆုတောင်းပါက သန့်ရှင်းသောဝိညာဉ်တော်ကို သွန်းလောင်းပေးပါလိမ့်မည်။ (လု. ၁၁:၉-၁၃) ထို့ပြင် ကျွန်ုပ်တို့ထံ ကိုယ်တော် ချဉ်းကပ်လာမည်ဖြစ်ပြီး ကိုယ်တော်နှင့် ရင်းနှီးသောဆက်ဆံရေး ရရှိပေမည်။ (ဆာ. ၂၅:၁၄; ယာ. ၄:၈) ကြီးမြတ်လှသည့် ဆုကျေးဇူးပါတကား။ ထို့ကြောင့် ဝိညာဏအကျင့်ကောင်းများဆက်ရှိစေရန် ကျွန်ုပ်တို့ အားထုတ်လုပ်ဆောင်ကြပြီး ယေဟောဝါထံမှ ကြွယ်ဝသောကောင်းချီးများကို ရိတ်သိမ်းကြပါစို့။