အမှုဆောင်လုပ်ငန်းမှာ အချိန်ကို အကျိုးရှိရှိအသုံးပြုပါ
၂၀၁၄ လုပ်ငန်းတော်နှစ်အတွင်း ယေဟောဝါသက်သေတွေဟာ အမှုဆောင်လုပ်ငန်းမှာ နာရီပေါင်း ၁,၉၄၅,၄၈၇,၆၀၄ ကို အသုံးပြုခဲ့ကြတယ်။ ယေဟောဝါဘုရားရဲ့အမှုတော်မှာ ကျွန်ုပ်တို့ အလုပ်များနေကြတယ်ဆိုတာ ထင်ရှားပါတယ်။ (ဆာ. ၁၁၀:၃; ၁ ကော. ၁၅:၅၈) “အချိန်အနည်းငယ်သာ ကျန်တော့” တဲ့အတွက် အမှုဆောင်လုပ်ငန်းမှာ လူများများနဲ့ တွေ့နိုင်အောင် ကိုယ်ရဲ့တန်ဖိုးရှိတဲ့အချိန်ကို အသုံးပြုနိုင်မလား။—၁ ကော. ၇:၂၉။
အမှုဆောင်လုပ်ငန်းမှာ အချိန်ကို အကျိုးရှိရှိအသုံးပြုနိုင်အောင် ပြောင်းသာလွဲသာ ရှိဖို့လိုတယ်။ ဥပမာ၊ အမှုဆောင်လုပ်ငန်းမှာ လူတစ်ယောက်နဲ့မှ စကားမပြောဖြစ်ဘဲ အချိန်တစ်နာရီ၊ နှစ်နာရီကုန်သွားမယ်ဆိုရင် လူများများကိုဟောပြောနိုင်အောင် အပြောင်းအလဲလုပ်နိုင်မလား။ တစ်နေရာနဲ့တစ်နေရာတော့ အခြေအနေချင်းတူမှာ မဟုတ်ဘူး။ ဒါပေမဲ့ “လေထဲကို လက်ဝှေ့ထိုး” သလိုမျိုး အချည်းနှီးမဖြစ်ရအောင် ကိုယ်ရဲ့အချိန်ကို အကျိုးရှိရှိအသုံးပြုနိုင်ဖို့ အောက်ပါအကြံပြုချက်တွေက ထောက်ကူပေးပါလိမ့်မယ်။—၁ ကော. ၉:၂၆။
တစ်အိမ်မှတစ်အိမ် သက်သေခံခြင်း– လုပ်ရိုးလုပ်စဉ်အရ အမှုဆောင်လုပ်ငန်းမှာ တစ်အိမ်မှတစ်အိမ် ဟောပြောခြင်းနဲ့အစပြုလာကြတာ ဆယ်စုနှစ်ချီရှိပါပြီ။ လူအတော်များများက နေ့ဘက်မှာ အလုပ်သွားကြတဲ့အတွက် အလုပ်ကနေပြန်လာချိန်၊ ဒါမှမဟုတ် နားချိန်ဖြစ်တဲ့ ညနေပိုင်းမှာ တစ်အိမ်မှတစ်အိမ် အမှုဆောင်ထွက်ဖို့ ကြိုးစားကြည့်ပါ။ နေ့ဘက်ဆိုရင် လမ်းပေါ် ဒါမှမဟုတ် စီးပွားရေးရပ်ကွက်မှာ အမှုဆောင် တာက ပိုပြီးအကျိုးဖြစ်ထွန်းနိုင်တယ်။
လူထုရှေ့သက်သေခံခြင်း– အသင်းတော်ပိုင် ရပ်ကွက်အတွင်း လူသွားလူလာများတဲ့နေရာမှာ စားပွဲတွေ၊ လက်တွန်းစင်တွေနဲ့ သက်သေခံသင့်တယ်။ (၂၀၁၃၊ ဇူလိုင်လထုတ် ကျွန်ုပ်တို့၏နိုင်ငံတော်ဓမ္မအမှု စာမျက်နှာ ၅ ကိုကြည့်ပါ။) စားပွဲတွေ၊ လက်တွန်းစင်တွေနဲ့ လူထုရှေ့သက်သေခံတဲ့ နေရာမှာ လူသွားလူလာနည်းသွားပြီဆိုရင် လူသွားလူလာများတဲ့ နောက်တစ်နေရာကိုရွှေ့ဖို့ အသင်းတော်လုပ်ငန်းတော်ကော်မတီက ဆုံးဖြတ်နိုင်ပါတယ်။
ပြန်လည်ပတ်မှုနဲ့ ကျမ်းစာသင်အံမှု– အမှုဆောင်လုပ်ငန်းရဲ့ တခြားကဏ္ဍတွေ အကျိုးမဖြစ်ထွန်းတဲ့အချိန်မှာ ပြန်လည်ပတ်မှုနဲ့ ကျမ်းစာသင်အံမှု သွားနိုင်မလား။ ဥပမာ၊ စနေနေ့ မနက်ပိုင်းတွေမှာ တစ်အိမ်မှတစ်အိမ် အမှုဆောင်ထွက်တာ အကျိုးတယ်ဆိုရင် နေ့လယ်ပိုင်း ဒါမှမဟုတ် ညနေပိုင်းမှာ သင်အံမှု သွားနိုင်မလား။ အမှုဆောင်လုပ်ငန်းမှာ ပိုပြီးအကျိုးရှိနိုင်အောင် ရပ်ကွက်တစ်ခုတည်း မှာရှိတဲ့ ပြန်လည်ပတ်မှုတွေကိုသွားဖို့ စီစဉ်နိုင်မလား။
အမှုဆောင်လုပ်ငန်းမှာ ပါဝင်တဲ့အချိန်တွေကို မှတ်တမ်းသွင်းလို့ရတာမှန်ပေမဲ့ အကျိုးဖြစ်ထွန်းတဲ့အခါတွေမှာ ကျွန်ုပ်တို့ ပိုပြီးပျော်ရွှင်ကြတယ်။ သတ်မှတ်ထားချိန်မှာ အမှုဆောင်လုပ်ငန်းရဲ့ကဏ္ဍတစ်ခု အကျိုးမဖြစ်ထွန်းဘူးဆိုရင် နောက်ကဏ္ဍတစ်ခုကို ပြောင်းလုပ်ဖို့ ကြိုးစားကြည့်ပါ။ အမှုဆောင်လုပ်ငန်းမှာ အချိန်ကို အကျိုးရှိရှိ အသုံးပြုနိုင်ဖို့ လမ်းညွှန်ပေးပါလို့ “စပါးရှင်” ယေဟောဝါဆီ ဆုတောင်းပါ။—မ. ၉:၃၈။