မိက္ခာ ၆:၈—‘ဘုရားသခင်နဲ့အတူ ကျိုးနွံစွာ လျှောက်လှမ်းပါ’

“ဘယ်အရာ ကောင်းတယ်ဆိုတာ ဘုရားသခင် ပြောပြပြီးပြီပဲ။ တရားမျှတစွာ ကျင့်ဖို့၊ သစ္စာစောင့်သိမှုကို မြတ်နိုးဖို့၊ ဘုရားသခင်နဲ့အတူ ကျိုးနွံစွာ လျှောက်လှမ်းဖို့ကလွဲလို့ ယေဟောဝါ ဘာများ တောင်းဆိုနေလို့လဲ။”—မိက္ခာ ၆:၈၊ ကမ္ဘာသစ်ဘာသာပြန်ကျမ်း။

“အချင်းလူ ကောင်းသောလမ်းကို ပြတော်မူပြီ။ တရားသဖြင့် ပြုခြင်း၊ ကရုဏာကို နှစ်သက်ခြင်း၊ သင်၏ ဘုရားသခင့်ရှေ့တော်၌ နှိမ့်ချသော စိတ်နှင့် ကျင့်နေခြင်းမှတစ်ပါး အဘယ် ပူဇော်သက္ကာကို ထာဝရဘုရား တောင်းတော်မူသနည်း။”—မိက္ခာ ၆:၈၊ ယုဒသန်ကျမ်း။

မိက္ခာ ၆:၈ ရဲ့ အဓိပ္ပာယ်

ယေဟောဝါaဘုရား နှစ်သက်တာကို လုပ်ဖို့ သိပ်မခက်ပါဘူးလို့ ပရောဖက် မိက္ခာ ရှင်းပြနေခြင်း ဖြစ်တယ်။ (၁ ယောဟန် ၅:၃) ကျွန်တော်တို့ ဘာလုပ်ဖို့ လိုကြောင်းကို အဓိပ္ပာယ် လေးနက်တဲ့ အသုံးအနှုန်း သုံးခုနဲ့ အကျဉ်းချုပ် ဖော်ပြထားတယ်။ ပထမ နှစ်ခုက လူလူချင်း ဆက်ဆံရေးနဲ့ သက်ဆိုင်ပြီး တတိယ တစ်ခုက ဘုရားသခင်နဲ့ သက်ဆိုင်တယ်။

“တရားမျှတစွာ ကျင့်” ပါ။ ဘုရားသခင်က မိမိကို ကိုးကွယ်သူတွေကို တရားမျှတစွာ ကျင့်စေချင်တယ်။ ဘုရားရဲ့ အမှားအမှန် စံနှုန်းတွေနဲ့အညီ တွေးတောဖို့၊ ကျင့်ကြံပြုမူဖို့ လိုတယ်။ (တရားဟောရာ ၃၂:၄) ဥပမာ၊ ဘုရားစံနှုန်းတွေကို လိုက်နာသူတွေဟာ လူတိုင်းကို ရိုးရိုးသားသား၊ မျက်နှာမလိုက်ဘဲ ဆက်ဆံရမယ်။ နောက်ခံ၊ လူမျိုး၊ လူနေမှုအဆင့်ပေါ် မူတည်ပြီး ခွဲခြားဆက်ဆံတာကို ရှောင်ရမယ်။—ဝတ်ပြုရာ ၁၉:၁၅။ ဟေရှာယ ၁:၁၇။ ဟီဘရူး ၁၃:၁၈။

“သစ္စာစောင့်သိမှုကို မြတ်နိုး” ပါ။ ဒီအသုံးအနှုန်းကို “ခိုင်မြဲတဲ့ မေတ္တာကို မြတ်နိုးပါ” လို့လည်း ပြန်ဆိုလို့ရတယ်။ မူရင်းဟီဘရူးမှာ “ခိုင်မြဲ” ဆိုတဲ့ စကားလုံးဟာ ဆက်ဆံရေးတစ်ခုမှာ သစ္စာရှိတဲ့အပြင် တာဝန်အရလောက်သာ မဟုတ်ဘဲ ကြင်နာမှုနဲ့ ကရုဏာ ပြတယ်။ ဘုရားမျက်နှာသာ ရချင်သူတွေဟာ ကြင်နာဖို့၊ ကရုဏာပြဖို့သာမက ဒီအရည်အချင်းတွေကို ချစ်မြတ်နိုးကြပါလို့လည်း ဘုရား တောင်းဆိုတယ်။ တစ်နည်းအားဖြင့် ဘုရားကို ဝတ်ပြုသူတွေဟာ အထူးသဖြင့် လိုအပ်နေသူတွေကို ကူညီပေးခြင်းကနေ ပျော်ရွှင်မှု ရသင့်တယ်။ ပေးကမ်းခြင်းက ပိုပျော်ရွှင်စေလို့ပဲ။—တမန်တော် ၂၀:၃၅။

“ဘုရားသခင်နဲ့အတူ ကျိုးနွံစွာ လျှောက်လှမ်း” ပါ။ “လျှောက်လှမ်း” လို့ ကျမ်းစာ ဆိုတဲ့အခါ “လမ်းစဉ်တစ်ခုအတိုင်း လုပ်ဆောင်ခြင်း” ကို ဆိုလိုနိုင်တယ်။ ဘုရားသခင့်လမ်းစဉ်အတိုင်း လုပ်ဆောင်သူဟာ ဘုရား ကြိုက်နှစ်သက်တဲ့ ဘဝပုံစံမျိုးအတိုင်း အသက်ရှင်နေထိုင်တယ်။ ဒါနဲ့ပတ်သက်ပြီး နောဧ စံနမူနာကောင်း ပြခဲ့တယ်။ နောဧဟာ “ဘုရားသခင့်လမ်းစဉ်အတိုင်း လျှောက်လှမ်း” တယ်။ ဘုရားရှေ့မှောက်မှာ နောဧဟာ ဖြောင့်မတ်သူ၊ “တစ်ခေတ်တည်းသားတွေထဲမှာ အမှားကင်းသူ” ဖြစ်နေလို့ပါ။ (ကမ္ဘာဦး ၆:၉) အခု ကျွန်တော်တို့ဟာ သမ္မာကျမ်းစာ ချမှတ်တဲ့ သွန်သင်ချက်တွေအတိုင်း အသက်ရှင်ကြတဲ့အတွက် ‘ဘုရားသခင်နဲ့အတူ လျှောက်လှမ်း’ နေကြတယ်။ အဲဒီလိုလုပ်နိုင်ဖို့ ကိုယ့်အားနည်းချက်ကို အသိအမှတ်ပြုရမယ်၊ ကိစ္စအားလုံးကို ဘုရားအကူအညီ မပါရင် မစွမ်းဆောင်နိုင်ဘူးဆိုတာ ကျိုးနွံစိတ်နဲ့ အသိအမှတ်ပြုရမယ်။—ယောဟန် ၁၇:၃။ တမန်တော် ၁၇:၂၈။ ဗျာဒိတ် ၄:၁၁။

မိက္ခာ ၆:၈ ရဲ့ အထက်အောက်စကား

မိက္ခာဟာ ဘီစီ ရှစ်ရာစုအတွင်း ရှေးအစ္စရေးလူမျိုးရဲ့ ပရောဖက် ဖြစ်တယ်။ အဲဒီအချိန်က တစ်ပြည်လုံး ရုပ်တု ကိုးကွယ်မှု၊ မသမာမှု၊ ဖိနှိပ်မှုတွေ အပြည့်ပဲ။ (မိက္ခာ ၁:၇။ ၃:၁-၃၊ ၉-၁၁။ ၆:၁၀-၁၂) အစ္စရေးအများစုက မောရှေပညတ်လို့ ခေါ်တဲ့ မောရှေကတစ်ဆင့် ဘုရားပေးတဲ့ ပညတ်တွေကို လျစ်လျူရှုကြတယ်။ တစ်ချိန်တည်းမှာ ဘာသာရေးထုံးစံတွေ လိုက်ရုံ၊ ပူဇော်သက္ကာတွေ ဆက်သရုံနဲ့ ဘုရားမျက်နှာသာ ရမယ်လို့ အထင်မှားနေကြတယ်။—ပညာအလိမ္မာ ၂၁:၃။ ဟောရှေ ၆:၆။ မိက္ခာ ၆:၆၊ ၇။

မိက္ခာလက်ထက်နောက်ပိုင်း နှစ်ပေါင်းများစွာအကြာမှာ ယေရှုက မိမိဖခင်ဟာ လူလူချင်း ချစ်တာ၊ တရားမျှတတာ၊ သနားကရုဏာ ပြတာကို နှစ်သက်တယ်လို့ ထပ်ပြောတယ်။ လူမြင်ကောင်းအောင် ဘုရားတရား ကြည်ညိုဟန်ဆောင်တာကို ရွံမုန်းတယ်လို့ ပြောတယ်။ (မဿဲ ၉:၁၃။ ၂၂:၃၇-၃၉။ ၂၃:၂၃) ယနေ့ ယေဟောဝါကို ကိုးကွယ်သူတွေ ဘယ်လိုလူစားမျိုး ဖြစ်သင့်ကြောင်း ယေရှုစကားတွေကတစ်ဆင့် ကျွန်တော်တို့ သိရတယ်။

မိက္ခာကျမ်း ခြုံငုံသုံးသပ်ချက်ကို သိနိုင်ဖို့ ဒီဗီဒီယိုအတိုကို ကြည့်ပါ။