ယေရမိ ၃၃:၃—“ငါ့ကို ခေါ်ပါ။ ပြန်ထူးမယ်”

“ငါ့ကို ခေါ်ပါ။ ပြန်ထူးမယ်။ ကြီးမြတ်တဲ့အရာ၊ မင်း မသိနားမလည်နိုင်တဲ့အရာတွေကို ငါပြောပြမယ်။”—ယေရမိ ၃၃:၃၊ ကမ္ဘာသစ်ဘာသာပြန်ကျမ်း။

“ငါ့ကိုခေါ်လော့။ ငါထူးမည်။ ကြီးသောအရာ၊ သင်မသိနိုင်အောင် နက်နဲသောအရာတို့ကို ငါပြမည်။”—ယေရမိ ၃၃:၃၊ ယုဒသန်ကျမ်း။

ယေရမိ ၃၃:၃ ရဲ့အဓိပ္ပာယ်

မိမိဆီ ဆုတောင်းကြဖို့ ဘုရားသခင် ဖိတ်ခေါ်နေတာပါ။ ဒီဖိတ်ခေါ်ချက်ကို လက်ခံသူတွေကို ဘုရားသခင်က အနာဂတ်အကြောင်း ဖွင့်ပြပေးမယ်။

“ငါ့ကို ခေါ်ပါ။ ပြန်ထူးမယ်။” ဘုရားသခင့်နာမည်ကို အသံထွက် ခေါ်ရုံနဲ့ ဘုရားကို ခေါ်တယ်လို့ ပြောလို့မရဘူး။ ဆုတောင်းခြင်းအားဖြင့် ဘုရားသခင့်အကူအညီနဲ့ လမ်းပြမှု ရှာဖွေရမယ်။—ဆာလံ ၄:၁။ ယေရမိ ၂၉:၁၂။

ရှေးခေတ်အစ္စရေးလူမျိုးကို ဒီစကားတွေ ဦးတည်ပြောခဲ့ပုံပါပဲ။ အစ္စရေးတွေက ဘုရားသခင်အပေါ် သစ္စာမရှိလို့ ဗာဗုလုန်စစ်တပ်ရဲ့ ခြိမ်းခြောက်မှု ခံနေရတယ်။ (ယေရမိ ၃၂:၁၊ ၂) ဒါကြောင့် ယေဟောဝါa က သူတို့ကို မိမိဆီ ဆုတောင်းခေါ်ဖို့၊ ပြန်လှည့်လာဖို့ ဖိတ်ခေါ်နေတာ။

“ကြီးမြတ်တဲ့အရာ၊ မင်း မသိနားမလည်နိုင်တဲ့အရာတွေကို ငါပြောပြမယ်။” လူတွေ “မသိနားမလည်နိုင်တဲ့” အရာတွေ၊ တစ်နည်းအားဖြင့် ကိုယ့်ကြိုးစားအားထုတ်မှု၊ ကိုယ့်ဉာဏ်နဲ့ ဘယ်တော့မှ သိလာမှာမဟုတ်တဲ့အရာတွေကို ဘုရားသခင် ဖွင့်ပြမယ်လို့ ကတိပေးနေတာ။ “မသိနားမလည်နိုင်တဲ့အရာတွေ” ဆိုတဲ့အသုံးအနှုန်းကို “ဖုံးကွယ်ထားရာတွေ” လို့လည်း ပြန်ဆိုနိုင်တယ်။

ဘုရားသခင် ဖွင့်ပြမယ့် “ဖုံးကွယ်ထား” တဲ့ အရာတွေက ဘာလဲ။ ရှေးဂျေရုဆလင်မြို့ ပျက်စီးခြင်း၊ လူသူဆိတ်သုဉ်းခြင်း၊ မြို့ပြန်လည်ထူထောင်ခြင်း စတဲ့ အနာဂတ်ဖြစ်ရပ်တွေပါ။ (ယေရမိ ၃၀:၁-၃။ ၃၃:၄၊ ၇၊ ၈) မိမိကိုဝတ်ပြုသူအားလုံး ပျက်စီးပျောက်ကွယ်သွားမှာ မဟုတ်ဘူးလို့လည်း ဘုရားသခင် ကတိပြုတယ်။—ယေရမိ ၃၂:၃၆-၃၈။

ယေရမိ ၃၃:၃ အထက်အောက်စကား

ဘီစီ ၆၀၈၊ ဘုရင်ဇေဒကိနန်းစံ ၁၀ နှစ်မှာ ယေဟောဝါဆီက ဒီသတင်းစကားကို ပရောဖက်ယေရမိ ရရှိခဲ့တယ်။ အဲဒီမတိုင်ခင်မှာ သူက ဂျေရုဆလင်မြို့ ပျက်စီးမယ့်အကြောင်း၊ ဇေဒကိကို သုံ့ပန်းအဖြစ် ဖမ်းခေါ်သွားမယ့်အကြောင်း ကြိုဟောခဲ့တယ်။ ဘုရင့်အကြိုက် သတင်းစကား မဟုတ်တဲ့အတွက် သူ အချုပ်ကျသွားတယ်။—ယေရမိ ၃၂:၁-၅။ ၃၃:၁။ ၃၇:၂၁။

ဒီလိုအခြေအနေတွေ ဖြစ်နေတုန်းမှာပဲ ဘုရားသခင်က ယေရမိ ၃၃:၃ မှာပါတဲ့ ဖိတ်ခေါ်ချက်ကို ကမ်းလှမ်းခဲ့တာပါ။ ဝမ်းနည်းစရာက ဘုရင်ဇေဒကိနဲ့ ပြည်သူအများစုက ဘုရားရဲ့ ဖိတ်ခေါ်ချက်ကို လျစ်လျူရှုပြီး သစ္စာမဲ့မြဲ မဲ့ခဲ့ကြတယ်။ (ယေရမိ ၇:၂၆။ ၂၅:၄) ဘုရားသခင်ကို မခေါ်ခဲ့ဘူး၊ ဘုရားရဲ့လမ်းညွှန်ချက်ကို မရှာခဲ့ဘူး။ ဒါကြောင့် တစ်နှစ်အကြာမှာ ဇေဒကိ နန်းကျသွားတယ်။ ဂျေရုဆလင်မြို့ ဖျက်ဆီးခံရပြီး အသက်ရှင်ကျန်ရစ်သူအများစုလည်း ဗာဗုလုန်ကို သုံ့ပန်းအဖြစ် ဖမ်းဆီးခေါ်ဆောင်သွားခံရတယ်။—ယေရမိ ၃၉:၁-၇။

ယေရမိ ၃၃:၃ ပါစကားတွေက ကျွန်တော်တို့နဲ့လည်း သက်ဆိုင်တယ်။ ဘုရားသခင်က ကျမ်းစာကို ဆုတောင်းလေ့လာသူတွေ “အလိုတော်ကို တိကျမှန်ကန်စွာ သိကျွမ်း” နိုင်အောင်၊ “နက်နဲတဲ့” အရာတွေ နားလည်နိုင်အောင် ကူညီပေးမယ်။ (ကောလောသဲ ၁:၉။ ၁ ကောရိန္သု ၂:၁၀) နက်နဲတဲ့အရာတွေထဲမှာ ဘုရားသခင် ဆောင်ကြဉ်းပေးမယ့် ကတိတွေလည်း ပါဝင်တယ်။—ဗျာဒိတ် ၂၁:၃၊ ၄။

ယေရမိကျမ်း ခြုံငုံသုံးသပ်ချက်ကို သိနိုင်ဖို့ ဒီဗီဒီယိုကို ကြည့်ပါ။