အခန်း နှစ်

ယေဟောဝါအား စစ်မှန်၍ တစ်ဆူတည်းဖြစ်သော ဘုရားသခင်အဖြစ် ချီးမြှောက်ကြလော့

၁။ စစ်မှန်၍ တစ်ဆူတည်းဖြစ်သော ဘုရားသခင်ကား အဘယ်သူနည်း။

ဘုရားဟူ၍ မှတ်ယူခံရသူ အများအပြား ရှိသော်လည်း “ခမည်းတော် ဘုရားသခင် တစ်ပါးတည်းသာ ငါတို့၌ ရှိတော်မူ၏” ဟူ၍ သမ္မာကျမ်းစာက ဆို၏။ (၁ ကောရိန္သု ၈:၅၊ ၆) ထို “ဘုရားသခင် တစ်ပါးတည်း” ကား အရာခပ်သိမ်းကို ဖန်ဆင်းသည့် ယေဟောဝါ ပင်ဖြစ်၏။ (တရားဟောရာ ၆:၄; ဗျာဒိတ် ၄:၁၁) ယေရှုက ကိုယ်တော်အား “ငါ၏ဘုရားသခင် တည်းဟူသော သင်တို့၏ ဘုရားသခင်“ ဟူ၍ ရည်ညွှန်းတော်မူခဲ့သည်။ (ယောဟန် ၂၀:၁၇) “ယေဟောဝါသည် မှန်သောဘုရားသခင် ဖြစ်တော်မူ၏၊ ကိုယ်တော့်အပြင် အခြားသော ဘုရားမရှိ” ဟူ၍ ရှေးယခင်က ဆိုခဲ့သည့် မောရှေနှင့် ယေရှု သဘောချင်း တိုက်ဆိုင်၏။ (တရားဟောရာ ၄:၃၅၊ ကဘ) ယေဟောဝါသည် ရုပ်တုဆင်းတုများ၊ နတ်ဘုရားအဖြစ် ကိုးကွယ်ခံရသော လူသားများ၊ သို့မဟုတ် “ဤအစီအစဉ်စနစ်၏ ဘုရား” ဖြစ်သည့် ရန်သူတော် စာတန်မာရ်နတ် အစရှိသော မည်သည့်ကိုးကွယ်ခံ အရာထက်မဆို ကြီးမြတ်တော်မူ၏။ (၂ ကောရိန္သု ၄:၃၊ ၄၊ ကဘ) ယေဟောဝါသည် ဤအရာအားလုံးတို့နှင့် ကွဲပြားလျက် ယေရှု ခေါ်ဆိုခဲ့သကဲ့သို့ “စစ်မှန်၍ တစ်ဆူတည်းဖြစ်သော ဘုရားသခင်” ဖြစ်တော်မူ၏။—ယောဟန် ၁၇:၃၊ ကဘ။

၂။ ဘုရားသခင့်အကြောင်း သိရှိလာသည်နှင့်အမျှ ကျွန်ုပ်တို့၏ အသက်တာအပေါ် အဘယ် အကျိုးသက်ရောက်မှု ရှိသင့်သနည်း။

^၂ ဘုရားသခင်၏ နှစ်လိုဖွယ်ကောင်းသော ဂုဏ်တော်များမှစ၍ ကျွန်ုပ်တို့အတွက် ကိုယ်တော် လုပ်ဆောင်ခဲ့ရာများနှင့် လုပ်ဆောင်ပေးလတ္တံ့သော အရာများကို သိရှိလာကြသည့် ကျေးဇူးတရား သိတတ်သူတို့သည် ကိုယ်တော်အား ခင်မင်တွယ်တာလာကြသည်။ ယေဟောဝါကိုချစ်သော သူတို့၏မေတ္တာ တိုးပွားလာသည်နှင့်အမျှ ကိုယ်တော်အား ချီးမြှောက်ရန် စေ့ဆော်ခံရကြ၏။ မည်သို့အားဖြင့်နည်း။ တစ်နည်းမှာ အခြားသူတို့အား ကိုယ်တော့်အကြောင်း ပြောပြခြင်းအားဖြင့်ဖြစ်သည်။ “ကယ်တင်ခြင်းသို့ရောက်ခြင်းငှာ နှုတ်ဖြင့်ဝန်ခံရ၏” ဟူ၍ ရောမ ၁၀:၁၀ ကဆို၏။ အခြားတစ်နည်းမှာ အပြောအဆိုနှင့် အကျင့်အကြံဘက်တွင် ကိုယ်တော်ကို တုပခြင်းဖြင့်ဖြစ်သည်။ “ချစ်တော်မူသော သားသမီးများအနေနှင့် ဘုရားသခင်ကို တုပကြလော့” ဟူ၍ ဧဖက် ၅:၁ (ကဘ) ကဆို၏။ ထိုသို့ ပို၍ပြည့်ပြည့်ဝဝ တုပနိုင်ရန် ယေဟောဝါအကြောင်းကို အမှန်အတိုင်း သိရှိရန် လိုအပ်သည်။

၃။ ဘုရားသခင်၏ အဓိက ဂုဏ်တော်များကား အဘယ်နည်း။

^၃ သမ္မာကျမ်းစာ တစ်အုပ်လုံးတွင် ဘုရားသခင်၏ အထင်ကရ ဂုဏ်တော်များကို သိသာထင်ရှားစေသည့် ဖော်ပြချက်များစွာ ပါရှိသည်။ ကိုယ်တော်၏ အဓိက ဂုဏ်တော် လေးရပ်မှာ ဉာဏ်ပညာ၊ တရားမျှတခြင်း၊ တန်ခိုးအာဏာနှင့် မေတ္တာ တို့ဖြစ်ကြသည်။ ‘ကိုယ်တော်၌ ဉာဏ်ပညာ ရှိတော်မူ၏။’ (ယောဘ ၁၂:၁၃၊ ကဘ) “နည်းလမ်းတော် ရှိသမျှသည် တရားမျှတ ၏။” (တရားဟောရာ ၃၂:၄၊ ကဘ) ကိုယ်တော်သည် “တန်ခိုး နှင့် ပြည့်စုံတော်မူ” ၏။ (ဟေရှာယ ၄၀:၂၆) “ဘုရားသခင်သည် ချစ်ခြင်းမေတ္တာ ဖြစ်တော်မူ၏။” (၁ ယောဟန် ၄:၈) သို့ရာတွင် ဘုရားသခင်၏ အဓိက ဂုဏ်တော် လေးရပ်အနက်မှ ဘုရားသခင်သည် အဘယ်သို့သော ဘုရားဖြစ်ကြောင်း အခြားဂုဏ်တော်များထက် ပို၍ သိသာထင်ရှားစေသည့် အထင်ကရ အကျဆုံးသော ဂုဏ်တော်ကား အဘယ်နည်း။

“ဘုရားသခင်သည် ချစ်ခြင်းမေတ္တာ ဖြစ်တော်မူ၏”

၄။ စကြဝဠာနှင့် သက်ရှိခပ်သိမ်းတို့ကို ဖန်ဆင်းရာ၌ ဘုရားသခင်အား လှုံ့ဆော်ပေးသည့် အခြေခံကျသော ဂုဏ်တော်ကား အဘယ်နည်း။

^၄ စကြဝဠာနှင့်တကွ အသိဉာဏ်ရှိသော ဝိညာဉ်သတ္တဝါနှင့် လူသတ္တဝါတို့ကို ဖန်ဆင်းရန် ယေဟောဝါအား အဘယ်အရာက စေ့ဆော်ပေးခဲ့ကြောင်း ဆင်ခြင်စဉ်းစားကြည့်ပါ။ ဉာဏ်ပညာ သို့မဟုတ် တန်ခိုးတော်က စေ့ဆော်ပေးခဲ့ခြင်းလော။ မဟုတ်ပါ၊ အဘယ်ကြောင့်ဆိုသော် ထိုဂုဏ်တော်များကို ဘုရားသခင် အသုံးပြုခဲ့သော်လည်း ၎င်းတို့သည် စေ့ဆော်အားများ မဟုတ်ပေ။ အသက်ဆုကျေးဇူးကို မျှဝေခံစားစေရန် ကိုယ်တော်၏ တရားမျှတခြင်းကလည်း မတောင်းဆိုချေ။ အသိဉာဏ်ရှိသော ပုဂ္ဂိုလ်အဖြစ် အသက်ရှင်ခြင်း၏ ပျော်ရွှင်မှုကို အခြားသူတို့ပါ ခံစားရစေရန် ဘုရားသခင်အား တိုက်တွန်းခဲ့သည်မှာ ကိုယ်တော်၏ မဟာမေတ္တာတော် ဖြစ်သည်။ နာခံမှုရှိသော လူသားများအား ပရဒိသုတွင် ထာဝစဉ် အသက်ရှင်နေထိုင်ရန် ရည်ရွယ်ချက် ထားရှိလာစေသည်မှာလည်း ထိုမေတ္တာတော်ကြောင့်ပင် ဖြစ်သည်။ (ကမ္ဘာဦး ၁:၂၈; ၂:၁၅) အာဒံ၏ လွန်ကျူးမှုကြောင့် လူသားများအပေါ် သင့်ရောက်သည့် ပြစ်ဒဏ်စီရင်ချက်ကို ပယ်ဖျက်ရန် စီစဉ်ပေးခဲ့သည်မှာလည်း ကိုယ်တော်၏ မေတ္တာတော်ကြောင့်ပင်ဖြစ်သည်။

၅။ သမ္မာကျမ်းစာ အလိုအရ ယေဟောဝါသည် အဘယ်ဂုဏ်တော်၏ ပြယုဂ်ဖြစ်တော်မူသနည်း။ အဘယ်ကြောင့်နည်း။

^၅ သို့ဖြစ်သောကြောင့် ဘုရားသခင့် ဂုဏ်တော်အားလုံးတို့တွင် အထူးခြား အထင်ရှားဆုံးမှာ မေတ္တာတော်ပင်ဖြစ်သည်။ ချစ်ခြင်းမေတ္တာသည် ကိုယ်တော်၏ အနှစ်သာရ၊ သို့မဟုတ် သဘာဝဗီဇပင်ဖြစ်၏။ ကိုယ်တော်၏ ဉာဏ်ပညာ၊ တရားမျှတမှုနှင့် တန်ခိုးတော်တို့သည် အရေးပါသော်လည်း ယေဟောဝါသည် ထိုဂုဏ်တော်တစ်ခုခု ဖြစ်သည် ဟုသမ္မာကျမ်းစာက လုံးဝမဆိုပေ။ သို့သော် ကိုယ်တော်သည် ချစ်ခြင်းမေတ္တာ ဖြစ်တော်မူ၏ ဟူ၍ကား ဆိုထားသည်။ မှန်ပေသည်၊ ယေဟောဝါသည် ချစ်ခြင်းမေတ္တာ၏ ပြယုဂ် ဖြစ်တော်မူ၏။ ဤကား စိတ်လှုပ်ရှားမှုအရ မဟုတ်ဘဲ မူအရ ထိန်းကျောင်းခံရသော မေတ္တာဖြစ်သည်။ ဘုရားသခင့် မေတ္တာတော်ကို သစ္စာတရားနှင့် ဖြောင့်မတ်ခြင်းတရားဆိုင်ရာ မူများက စိုးမိုးထားသည်။ ယေဟောဝါ ဘုရားသခင်၏ မေတ္တာတော်သည် အမြင့်ဆုံး ပုံသဏ္ဌာန်ဖြစ်ကြောင်း ကိုယ်တော်တိုင် နမူနာ ထားတော်မူ၏။ ထိုသို့သောမေတ္တာမျိုးသည် ကိုယ်ကျိုး လုံးဝမဖက်၊ လက်ဆုပ်လက်ကိုင်ပြနိုင်သော အထောက်အထားနှင့် အစဉ် ဒွန်တွဲလျက်ရှိသည်။

၆။ ဘုရားသခင်သည် ကျွန်ုပ်တို့ထက် ကြီးမြတ်တော်မူစေကာမူ ကိုယ်တော်အား တုပနိုင်အောင် အဘယ်အရာက ကျွန်ုပ်တို့ကို တတ်စွမ်းစေသနည်း။

^၆ ဤသို့သော ဘုရားသခင်ကို တုပနိုင်အောင် ကျွန်ုပ်တို့အား စွမ်းဆောင်စေသည့်အရာမှာ ဤအံ့ဖွယ် မေတ္တာအရည်အသွေး ပင်ဖြစ်သည်။ နိမ့်ကျ၍ မစုံလင်သော၊ မှားတတ်သည့် လူသားများအနေနှင့် ကျွန်ုပ်တို့သည် ဘုရားသခင်ကို အောင်မြင်စွာ တုပနိုင်မည်မဟုတ်ဟု ထင်ကောင်းထင်မည်။ သို့သော် ယေဟောဝါ၏ မဟာမေတ္တာတော် စံနမူနာ နောက်တစ်ရပ်ရှိသည်။ ကိုယ်တော်သည် ကျွန်ုပ်တို့၏ ကန့်သတ်ချက်များကို သိမှတ်သည့်အပြင် ကျွန်ုပ်တို့ထံမှ စုံလင်ခြင်းကို တောင်းဆိုတော်မမူ။ ယခုအချိန်တွင် ကျွန်ုပ်တို့သည် စုံလင်ခြင်းနှင့် အလှမ်းကွာဝေးနေကြောင်း သိတော်မူ၏။ (ဆာလံ ၅၁:၅) ယင်းကြောင့် ဆာလံ ၁၃၀:၃၊ ၄ က “အို ဘုရားရှင် ထာဝရဘုရား ကိုယ်တော်သည် ဒုစရိုက်အပြစ်များကို မှတ်တော်မူလျှင် အဘယ်သူ ခံရပ်နိုင်ပါမည်နည်း။ . . . [ကိုယ်တော်သည်] အပြစ်လွှတ်ခြင်းအခွင့်ကို ပိုင်တော်မူ၏” ဟူ၍ဆိုထားခြင်းဖြစ်သည်။ မှန်ပါသည်၊ ယေဟောဝါသည် “ငဲ့ညှာတတ်သော၊ သနားကြင်နာသော၊ အမျက်ထွက်နှေးသော၊ ချစ်ခင်ကြင်နာသော . . . သဘောနှင့် ကြွယ်ဝတော်မူသော . . . ဘုရားသခင်” ဖြစ်တော်မူ၏။ (ထွက်မြောက်ရာ ၃၄:၆၊ ကဘ) “အို ယေဟောဝါ၊ ကိုယ်တော်သည် ကောင်းမြတ်၍ အပြစ်လွှတ်ရန် အသင့်ရှိတော်မူ၏။” (ဆာလံ ၈၆:၅၊ ကဘ) စိတ်ချမ်းမြေ့ဖွယ်ရာပါတကား! အံ့ချီးဖွယ်ကောင်းသော ဤဘုရားသခင်ကို ဝတ်ပြု၍ မေတ္တာကရုဏာတော် အရိပ်အာဝါသအောက် ခိုလှုံခွင့်ရသည်မှာ ကြည်သာလန်းဆန်းဖွယ်ရာပင်!

၇။ ဖန်ဆင်းခြင်း လုပ်ငန်းများတွင် ယေဟောဝါ၏ မေတ္တာတော်ကို မည်သို့ တွေ့မြင်နိုင်သနည်း။

^၇ ယေဟောဝါ၏ မေတ္တာတော်ကို ဖန်ဆင်းခြင်းလုပ်ငန်းများ၌လည်း တွေ့မြင်နိုင်သည်။ လှပတင့်တယ်သော တောင်တန်းကြီးများ၊ သစ်တောများ၊ ရေကန်များနှင့် သမုဒ္ဒရာများ အစရှိသော ကျွန်ုပ်တို့ သာယာကြည်နူးမှုအတွက် ယေဟောဝါ ပေးသနားသည့် ကောင်းသောအရာ အများအပြားတို့အကြောင်းကို စဉ်းစားကြည့်ပါ။ ကျွန်ုပ်တို့၏ ရသာရုံ ကျေနပ်နှစ်သိမ့်မှု ရှိစေရန်နှင့် ကျွန်ုပ်တို့ ဆက်လက် အသက်ရှင်ရန်အတွက် အံ့မခန်းဖွယ် အမျိုးအမည် စုံလင်များပြားလှသော အစားအစာများကို ပေးသနားထားတော်မူ၏။ ၎င်းပြင် လှပမွှေးကြိုင်သည့် ပန်းများနှင့်တကွ အာရုံကို ညှို့ယူဖမ်းစားနိုင်သည့် တိရစ္ဆာန်များကိုလည်း မရေမတွက်နိုင်အောင် များပြားစုံလင်စွာ ဖန်ဆင်းပေးထားတော်မူ၏။ လုပ်ဆောင်ပေးရန် တာဝန်မရှိသော်လည်း လူသားတို့ကို ပျော်ရွှင်သာယာစေသည့် အရာများကို ကိုယ်တော် ပြုလုပ်ထားတော်မူ၏။ လက်ရှိ မစုံလင်သည့် အခြေအနေနှင့် ဤဆိုးယုတ်သည့် လောကကြီးတွင် အသက်ရှင်နေရသဖြင့် ကျွန်ုပ်တို့သည် ဖန်ဆင်းထားရာများကို အပြည့်အဝ မွေ့လျော်ခံစားနိုင်စွမ်း မရှိနိုင်ချေ။ (ရောမ ၈:၂၂) သို့သော်လည်း ပရဒိသုတွင် ကျွန်ုပ်တို့အတွက် ယေဟောဝါ လုပ်ဆောင်ပေးမည့်အရာများကို စိတ်ကူးမြင်ယောင် ကြည့်လိုက်ပါ။ ဘုရားသခင်သည် “လက်တော်ကိုဖွင့်၍ သက်ရှိတိုင်း၏ [လျော်ကန်သော] လိုအင်ဆန္ဒကို ပြည့်ဝရောင့်ရဲ စေတော်မူ၏” ဟူ၍ ဆာလံဆရာက ကျွန်ုပ်တို့ကို စိတ်ချစေ၏။—ဆာလံ ၁၄၅:၁၆၊ ကဘ။

၈။ ကျွန်ုပ်တို့အပေါ် ယေဟောဝါ ထားရှိသည့် မေတ္တာတော်ဆိုင်ရာ အထင်ရှားဆုံးသော စံနမူနာတော်ကား အဘယ်နည်း။

^၈ လူသတ္တဝါတို့အပေါ် ယေဟောဝါ ထားရှိသည့် မေတ္တာတော်ဆိုင်ရာ အထင်ရှားဆုံးသော စံနမူနာတော်ကား အဘယ်နည်း။ သမ္မာကျမ်းစာက ဤသို့ရှင်းပြ၏– “ဘုရားသခင်၏ သားတော်ကို ယုံကြည်သောသူ အပေါင်းတို့သည် ပျက်စီးခြင်းသို့မရောက်၊ ထာဝရအသက်ကို ရစေခြင်းငှာ၊ ဘုရားသခင်သည် မိမိ၌ တစ်ပါးတည်းသော သားတော်ကို စွန့်တော်မူသည်တိုင်အောင် လောကီသားတို့ကို ချစ်တော်မူ၏။” (ယောဟန် ၃:၁၆) လူတို့၏ ကောင်းမြတ်ခြင်းကြောင့် ယေဟောဝါ ဤသို့ပြုလုပ်ပေးခြင်း ဖြစ်သလော။ ရောမ ၅:၈ (သမ္မာ) ကဤသို့ဖြေဆို၏– “ငါတို့သည် အပြစ်ရှိနေသေးစဉ်၊ ခရစ်တော်သည် ငါတို့အတွက်ကြောင့် အသေခံတော်မူသည်ဖြစ်၍၊ ဘုရားသခင်သည် ငါတို့အား ချစ်တော်မူသည်ကို ထင်ရှားစွာ ပြတော်မူ၏။” မှန်ပါသည်၊ ဘုရားသခင်သည် ကျွန်ုပ်တို့ကို အပြစ်နှင့် သေခြင်းတို့၏ အပြစ်ဒဏ်စီရင်ချက်မှ ရွေးနုတ်ကယ်တင်ရန် ရွေးနုတ်ရာ ပူဇော်သကာအဖြစ် အသက်တော်ကို ပေးဆပ်စေရန် မိမိ၏ စုံလင်သော သားတော်အား ကမ္ဘာမြေကြီးသို့ စေလွှတ်တော်မူ၏။ (မဿဲ ၂၀:၂၈) ဤသို့ဖြင့် ဘုရားသခင်ကို ချစ်သောလူတို့အတွက် ထာဝရအသက် ရနိုင်သည့်လမ်း ပွင့်လာခဲ့သည်။ ဝမ်းသာစရာကား ဘုရားသခင့် မေတ္တာတော်သည် အလိုတော် ဆောင်လိုသူ အားလုံးတိုင်အောင် ကျယ်ဝန်းပေသည်။ “ဘုရားသခင်သည် လူမျက်နှာကို မှတ်တော်မမူ။ လူအမျိုးမျိုးတို့တွင် ဘုရားသခင်ကိုကြောက်ရွံ့၍ တရားသဖြင့် ကျင့်ဆောင်သောသူသည် အထံတော်၌ မျက်နှာရသည်ကို ငါသိမြင်၏” ဟူ၍ သမ္မာကျမ်းစာက ဆိုထား၍ဖြစ်သည်။—တမန်တော် ၁၀:၃၄၊ ၃၅။

၉။ ကျွန်ုပ်တို့အတွက် ရွေးနုတ်ဖိုးအဖြစ် သားတော်ကို ယေဟောဝါ ပေးတော်မူသည့်အချက်က ကျွန်ုပ်တို့အပေါ် မည်သို့အာနိသင် သက်ရောက်သင့်သနည်း။

^၉ ယေဟောဝါသည် ကျွန်ုပ်တို့အတွက် ရွေးနုတ်ဖိုးအဖြစ် သားတော်ကို ပေးတော်မူခြင်းအားဖြင့် ထာဝရအသက်လမ်း ပွင့်လာစေသည့်အချက်က ယခု ကျွန်ုပ်တို့၏ အသက်တာကို အသုံးပြုပုံအပေါ် မည်သို့အာနိသင် သက်ရောက်စေသင့်သနည်း။ စစ်မှန်သော ဘုရားသခင် ယေဟောဝါအပေါ် ထားရှိသည့် ကျွန်ုပ်တို့၏မေတ္တာကို ပိုမို နက်ရှိုင်းစေသင့်သည်။ တစ်ချိန်တည်းတွင် ဘုရားသခင်အား ကိုယ်စားပြုသူ ယေရှုကို နာယူလိုစိတ် ဖြစ်ပေါ်စေသင့်သည်။ “အသက်ရှင်သောသူတို့သည် တစ်ဖန် ကိုယ်အလိုသို့လိုက်၍မရှင်၊ သူတို့အတွက်ကြောင့် အသေခံ . . . တော်မူသောသူ၏ အလိုသို့လိုက်၍ ရှင်စေမည်အကြောင်း၊ [ယေရှုသည်] လူအပေါင်းတို့အတွက်ကြောင့် အသေခံတော်မူသည်။” (၂ ကောရိန္သု ၅:၁၅) ယေရှုသည် ယေဟောဝါ၏ မေတ္တာတော်နှင့် ကရုဏာတော်ကို တုပရာ၌ စံပြဖြစ်သောကြောင့် ယေရှု၏ ခြေတော်ရာကို လိုက်လျှောက်ခြင်းသည် ပျော်ရွှင်ကြည်နူးဖွယ်ရာပါတကား! စိတ်နှိမ့်ချသူတို့အား ယေရှု မိန့်ဆိုသည့် အောက်ပါစကားတွင် ဤအချက်ကို တွေ့မြင်ရသည်– “ဝန်လေး၍ ပင်ပန်းသောသူအပေါင်းတို့၊ ငါ့ထံသို့ လာကြလော့။ ငါသည် ချမ်းသာပေးမည်။ ငါ့ထမ်းပိုးကိုတင်၍ ထမ်းကြလော့။ ငါ့ထံ၌ နည်းခံကြလော့။ ငါသည် နူးညံ့သိမ်မွေ့နှိမ့်ချသော စိတ်သဘောရှိ၏။ သင်တို့စိတ်နှလုံးသည် သက်သာခြင်းကိုရလိမ့်မည်။ အကြောင်းမူကား၊ ငါ့ထမ်းပိုးသည် ထမ်းလွယ်၏။ ငါ့ဝန်လည်းပေါ့၏။”—မဿဲ ၁၁:၂၈-၃၀။

အခြားသူတို့အား မေတ္တာပြခြင်း

၁၀။ ခရစ်ယာန်ချင်းတို့အား မေတ္တာပြနိုင်သည့် နည်းလမ်းအချို့ကား အဘယ်နည်း။

^၁၀ ကျွန်ုပ်တို့အပေါ် ယေဟောဝါနှင့် ယေရှုတို့ ထားရှိသည့် မေတ္တာမျိုးကို ခရစ်ယာန်ချင်းတို့အပေါ် ကျွန်ုပ်တို့ထားရှိကြောင်း မည်သို့တင်ပြနိုင်သနည်း။ နည်းလမ်းများစွာရှိကြောင်း ဂရုပြုပါ– “မေတ္တာသည် စိတ်ရှည်တတ်၏။ ကျေးဇူးပြုတတ်၏။ မေတ္တာသည် ဂုဏ်ပြိုင်ခြင်းမရှိ၊ ဝါကြွားခြင်းမရှိ၊ မာန်မာနမရှိ။ မလျောက်ပတ်စွာ မကျင့်တတ်၊ ကိုယ်အကျိုးကို မရှာတတ်၊ ဒေါသအမျက် မထွက်တတ်၊ အပြစ်ရှိသည်ဟု မထင်တတ်၊ မတရားသောအမှု၌ ဝမ်းမြောက်ခြင်းမရှိတတ်၊ သမ္မာတရား၌ ဝမ်းမြောက်တတ်၏။ ခပ်သိမ်းသောအရာကို ဖုံးအုပ်တတ်၏။ ခပ်သိမ်းသောအရာကို ယုံတတ်၏။ ခပ်သိမ်းသောအရာကို မျှော်လင့်တတ်၏။ ခပ်သိမ်းသောအရာကို သည်းခံတတ်၏။ မေတ္တာသည် ဖောက်ပြန်ခြင်းသဘောနှင့် အစဉ်ကင်းလွတ်၏။”—၁ ကောရိန္သု ၁၃:၄-၈; ၁ ယောဟန် ၃:၁၄-၁၈; ၄:၇-၁၂။

၁၁။ အခြားမည်သူတို့ကိုလည်း မေတ္တာပြသင့်သနည်း။ မည်သို့အားဖြင့်နည်း။

^၁၁ နောက်ထပ် မည်သူတို့ကို မေတ္တာပြသင့်သနည်း။ မည်သို့ပြသင့်သနည်း။ ယေရှုက “သင်တို့သွား၍ လူမျိုးတကာတို့ကို ငါ့တပည့်ဖြစ်စေလျက်၊ ခမည်းတော်၊ သားတော်၊ သန့်ရှင်းသောဝိညာဉ်တော်၏နာမ၌ ဗတ္တိဇံကိုပေးကြလော့။ ငါသည် သင်တို့အား ပေးသမျှသော ပညတ်တော်တို့ကို စောင့်ရှောက်စေခြင်းငှာ ဆုံးမသြဝါဒပေးကြလော့” ဟုမိန့်တော်မူ၏။ (မဿဲ ၂၈:၁၉၊ ၂၀) ဤလုပ်ငန်းတွင် ခရစ်ယာန်ချင်း ဖြစ်မလာသေးသူတို့အား ဘုရားသခင်၏ လာလတ္တံ့သော ပရဒိသု ကမ္ဘာသစ်ဆိုင်ရာ သတင်းကောင်း ဝေမျှပေးခြင်း အကျုံးဝင်သည်။ ယုံကြည်ခြင်းတူသော သူတို့အတွက်သာ ကျွန်ုပ်တို့၏မေတ္တာကို ကန့်သတ်မထားသင့်ကြောင်း ယေရှုက ရှင်းလင်းစွာ ဤသို့ဖော်ပြခဲ့သည်။ “သင်တို့ကိုချစ်သော သူတို့အားသာ ချစ်တုံ့ပြုလျှင် အဘယ်ကျေးဇူးတင်သနည်း။ အခွန်ခံသူတို့ပင် ဤမျှလောက် ပြုကြသည်မဟုတ်လော။ အဆွေအမျိုးတို့အားသာ လောကဝတ်ပြုလျှင် အဘယ်သို့ထူးမြတ်သနည်း။ သာသနာပလူတို့ပင် ထို့အတူ ပြုကြသည်မဟုတ်လော။”—မဿဲ ၅:၄၆၊ ၄၇; ၂၄:၁၄; ဂလာတိ ၆:၁၀။

“ယေဟောဝါ၏ နာမတော်ကို အမှီပြုလျက်လိုက်လျှောက်လော့”

၁၂။ ဘုရားသခင့် နာမတော်သည် ကိုယ်တော်တစ်ပါးတည်းနှင့်သာ အဘယ်ကြောင့် သက်ဆိုင်နိုင်သနည်း။

^၁၂ စစ်မှန်သော ဘုရားသခင်အား ချီးမြှောက်ခြင်းဆိုင်ရာ အရေးကြီးသော အခြားကဏ္ဍတစ်ရပ်မှာ ကိုယ်တော်၏ အတုမရှိသော နာမတော်ကို သိကျွမ်း၍ သုံးစွဲခြင်း၊ အခြားသူတို့အားလည်း သွန်သင်ပေးခြင်းဖြစ်သည်။ ဆာလံဆရာက သူ၏ ပြင်းပြသောဆန္ဒကို ဤသို့ထုတ်ဖော်ခဲ့သည်– “ထာဝရဘုရား [ယေဟောဝါ] ဟူ၍ နာမတော်ရှိသော ကိုယ်တော်တစ်ပါးတည်းသာလျှင် မြေကြီးတစ်ပြင်လုံးအပေါ်မှာ အမြင့်ဆုံးသောဘုရား ဖြစ်တော်မူကြောင်းကို သိကြပါစေသော။” (ဆာလံ ၈၃:၁၈) ယေဟောဝါဟူသော နာမတော်သည် “ကိုယ်တော် ဖြစ်လာစေသည်” ဟူ၍အဓိပ္ပာယ်ရှိသည်။ ကိုယ်တော်သည် မဟာရည်ရွယ်ရှင်ဖြစ်လျက် မိမိ၏ ရည်ရွယ်ချက်များကို အစဉ်သဖြင့် အောင်မြင်စွာအကောင်အထည် ပေါ်စေတော်မူ၏။ စစ်မှန်သော ဘုရားသခင် တစ်ပါးတည်းသာလျှင် ထိုနာမတော်ကို တရားသဖြင့် ဆောင်ယူပိုင်ခွင့်ရှိသည်။ အဘယ်ကြောင့်ဆိုသော် လူသားများသည် မိမိတို့၏ ကြိုးပမ်းမှုများ မုချအောင်မြင်မည်ဟု တပ်အပ်မပြောနိုင်ကြချေ။ (ယာကုပ် ၄:၁၃၊ ၁၄) ယေဟောဝါ တစ်ပါးတည်းသာလျှင် မိမိ၏ နှုတ်ထွက်စကားသည် စေခိုင်းသည့်အတိုင်း “အထမြောက်စေလိမ့်မည်” ဟုမိန့်ဆိုနိုင်၏။ (ဟေရှာယ ၅၅:၁၁၊ သမ္မာ) လူများစွာတို့သည် သူတို့၏ ကိုယ်ပိုင်ကျမ်းစာ၌ ဘုရားသခင့် နာမတော်ကို ပထမအကြိမ် တွေ့မြင်၍ နာမတော်၏ အဓိပ္ပာယ်ကို သိရှိလိုက်ရသည့်အခါ များစွာ နှစ်ထောင်းအားရ ဖြစ်မိကြသည်။ (ထွက်မြောက်ရာ ၆:၃) သို့သော် “ယေဟောဝါ၏ နာမတော်ကို အမှီပြုလျက် ကာလအစဉ် လိုက်လျှောက်” မှသာလျှင် ဤအသိပညာမှ အကျိုးကျေးဇူး ခံစားရမည်ဖြစ်သည်။—မိက္ခာ ၄:၅၊ ကဘ။

၁၃။ ယေဟောဝါ၏ နာမတော်ကိုသိခြင်းနှင့် နာမတော်ကို အမှီပြုလျက် လျှောက်လိုက်ခြင်းတွင် အဘယ်အရာများ ပါဝင်သနည်း။

^၁၃ ဘုရားသခင့် နာမတော်နှင့်စပ်လျဉ်း၍ ဆာလံ ၉:၁၀ (သမ္မာ) က ဤသို့ဆို၏– “နာမတော်ကို သိသောသူတို့သည် ကိုယ်တော်၌ ကိုးစားကြပါလိမ့်မည်။” ယေဟောဝါ၏ နာမတော်ကို သိရုံမျှနှင့် ကိုယ်တော်ကို ကိုးစားသည့်သဘော အလိုအလျောက် မသက်ရောက်သောကြောင့် သိရုံသိခြင်းထက်မက အကျုံးဝင်ပေသည်။ ဘုရားသခင့် နာမတော်ကို သိခြင်းဆိုရာ၌ ယေဟောဝါသည် မည်သို့သော ဘုရားသခင်ဖြစ်ကြောင်း နားလည်သိရှိခြင်း၊ ကိုယ်တော်၏ အခွင့်အာဏာကို လေးစားခြင်း၊ ပညတ်တော်များကို နာခံခြင်း၊ အရာရာတိုင်း၌ ကိုယ်တော်ကို ကိုးစားခြင်းဟူ၍ အဓိပ္ပာယ်ရှိ၏။ (သုတ္တံ ၃:၅၊ ၆) အလားတူစွာ ယေဟောဝါ၏ နာမတော်ကို အမှီပြုလျက် လိုက်လျှောက်ခြင်း ဆိုရာ၌ ကိုယ်တော်ထံ ဆက်ကပ်အပ်နှံ၍ ကိုယ်တော်အား ကိုးကွယ်ဝတ်ပြုသူ တစ်ဦးအဖြစ် ကိုယ်တော်ကို ကိုယ်စားပြုခြင်း၊ အလိုတော်နှင့်အညီ အသက်တာကို မှန်ကန်စွာ အသုံးပြုခြင်း ဟူ၍လည်း အဓိပ္ပာယ်သက်ရောက်သည်။ (လုကာ ၁၀:၂၇) သင် ထိုသို့ ပြုလုပ်နေပါသလော။

၁၄။ ယေဟောဝါအား အစဉ်ထာဝရ ဝတ်ပြုသွားမည်ဆိုပါက တာဝန်သိစိတ်အပြင် အဘယ်အရာ လိုအပ်သနည်း။

^၁၄ ကျွန်ုပ်တို့သည် ယေဟောဝါအား အစဉ်ထာဝရ ဝတ်ပြုသွားမည်ဆိုပါက တာဝန်သိစိတ်၏ စေ့ဆော်တိုက်တွန်းမှု တစ်ခုတည်းနှင့် မလုံလောက်ပေ။ တမန်တော်ပေါလုက ယေဟောဝါကို နှစ်ပေါင်းများစွာ ဝတ်ပြုခဲ့ပြီဖြစ်သော တိမောသေအား “ဘုရားတရား ဆည်းကပ်မြှုပ်နှံခြင်းကို ရည်မှန်းချက်ထားကာ ကိုယ်ကို လေ့ကျင့်လျက်နေလော့” ဟု တိုက်တွန်းခဲ့သည်။ (၁ တိမောသေ ၄:၇၊ ကဘ) ဆည်းကပ်မြှုပ်နှံခြင်းမှာ ဆည်းကပ်မြှုပ်နှံခံပုဂ္ဂိုလ်၏ ကျေးဇူးတရားကို သိတတ်သော နှလုံးသားမှ ပေါက်ဖွားလာရာဖြစ်သည်။ “ဘုရားတရား ဆည်းကပ်မြှုပ်နှံခြင်း” ဆိုသည်မှာ ယေဟောဝါအား အလေးအနက် ကြည်ညိုလေးစားကြောင်း ကိုယ်တိုင်ကိုယ်ကျ ဖွင့်ဟဝန်ခံခြင်းဖြစ်သည်။ ကိုယ်တော်နှင့် ကိုယ်တော့်နည်းလမ်းတော်များအတွက် အတိုင်းထက်အလွန် တန်ဖိုးထားလေးစားခြင်းကြောင့် ကိုယ်တော်အား ချစ်ခင်တွယ်တာခြင်းဖြစ်သည်။ ကိုယ်တော့်နာမတော်ကို လူတကာ အထင်ကြီးလေးစား စေလိုသည့်ဆန္ဒ ကျွန်ုပ်တို့တွင် ဖြစ်ပေါ်စေသည်။ စစ်မှန်၍ တစ်ဆူတည်းဖြစ်သော ဘုရားသခင် ယေဟောဝါ၏ နာမတော်ကို အမှီပြုလျက် အစဉ်ထာဝရ လိုက်လျှောက်သွားမည်ဆိုလျှင် ကျွန်ုပ်တို့၏ အသက်တာတွင် ဘုရားတရား ဆည်းကပ်မြှုပ်နှံခြင်းကို ပြုစုပျိုးထောင်ရပေမည်။—ဆာလံ ၃၇:၄; ၂ ပေတရု ၃:၁၂။

၁၅။ ဘုရားသခင်အား သီးသန့် ဆည်းကပ်မြှုပ်နှံခြင်း မည်သို့ပြုနိုင်သနည်း။

^၁၅ ဘုရားသခင်သည် “သီးသန့် ဆည်းကပ်မြှုပ်နှံခြင်းကို တင်းကျပ်စွာတောင်းဆိုသော ဘုရားသခင်” ဖြစ်သောကြောင့် ကိုယ်တော် နှစ်သက်လက်ခံသည့်နည်းဖြင့် ဝတ်ပြုလိုပါက ကိုယ်တော်အား လုံးလုံးလျားလျား ကိုးကွယ်ရပေမည်။ (ထွက်မြောက်ရာ ၂၀:၅၊ ကဘ) တစ်ချိန်တည်း၌ ဘုရားသခင်ကိုရော၊ စာတန် ဘုရားဖြစ်နေသည့် ဤဆိုးယုတ်သော လောကကိုရော တစ်ပြိုင်တည်း မချစ်နိုင်။ (ယာကုပ် ၄:၄; ၁ ယောဟန် ၂:၁၅-၁၇) ကျွန်ုပ်တို့ တစ်ဦးစီသည် မည်သို့သောပုဂ္ဂိုလ်ဖြစ်အောင် ကြိုးစားနေသည်ကို ယေဟောဝါ အတိအကျ သိတော်မူ၏။ (ယေရမိ ၁၇:၁၀) ကျွန်ုပ်တို့သည် ဖြောင့်မတ်ခြင်းတရားကို တကယ် ချစ်မြတ်နိုးသည်ဆိုလျှင် ဤအချက်ကို ဘုရားသခင် သိမြင်၍ နေ့စဉ်ကြုံတွေ့နေရသည့် စမ်းသပ်မှုများကို ကြံ့ကြံ့ခံနိုင်အောင် အကူအညီ ပေးတော်မူမည်။ တန်ခိုးကြီးသည့် သန့်ရှင်းသော ဝိညာဉ်တော်အားဖြင့် ကျွန်ုပ်တို့ကို ကျောထောက်နောက်ခံ ပြုခြင်းဖြင့် ဤလောကတွင် ပျံ့နှံ့လျက်ရှိသည့် ဆိုးယုတ်မှုများကို အောင်နိုင်စေမည်ဖြစ်သည်။ (၂ ကောရိန္သု ၄:၇) ကိုယ်တော်သည် ပရဒိသု မြေကြီးပေါ် ထာဝရ အသက်ရှင်ခြင်းဆိုင်ရာ ကျွန်ုပ်တို့၏ ခိုင်မြဲသော မျှော်လင့်ချက်ကို ထိန်းသိမ်းနိုင်အောင်လည်း ကူညီပေးတော်မူမည်။ ခမ်းနားထည်ဝါလှသော မျှော်လင့်ချက်ပါတကား! ယင်းအတွက် လှိုက်လှိုက်လှဲလှဲ ကျေးဇူးတင်လေးမြတ်ပြီး ယင်းမျှော်လင့်ချက်ကို အကောင်အထည်ဖော်ပေးသည့် စစ်မှန်သောဘုရားသခင် ယေဟောဝါအား တလိုတလား ဝတ်ပြုသင့်ပေသည်။

၁၆။ သန်းပေါင်းများစွာသော အခြားသူတို့နှင့်အတူ သင်၌ အဘယ်အရာ ပြုလိုသည့်ဆန္ဒ ရှိသင့်သနည်း။

^၁၆ “ငါနှင့်အတူ ထာဝရဘုရား [ယေဟောဝါ] ကို ချီးမြှောက်ကြလော့။ နာမတော်ကို တညီတညွတ်တည်း ချီးမြှင့်ကြကုန်အံ့” ဟူ၍ရေးသားခဲ့သည့် ဆာလံဆရာ၏ ဖိတ်ကြားချက်ကို ကမ္ဘာတစ်ဝန်းရှိ သန်းပေါင်းများစွာသောသူတို့က ဝမ်းမြောက်စွာ လက်ခံလျက်ရှိကြသည်။ (ဆာလံ ၃၄:၃၊ သမ္မာ) ဤသို့ပြုနေသော လူမျိုးအပေါင်းတို့မှ တိုးပွားလျက်ရှိသည့် မြောက်မြားလှစွာသော လူအုပ်ကြီးတွင် ပါဝင်ရန် သင့်အား ယေဟောဝါ ဖိတ်ခေါ်လျက်ရှိ၏။

ပြန်လည်သုံးသပ်ဆွေးနွေးခြင်း

• ယေဟောဝါသည် မည်သို့သောပုဂ္ဂိုလ် ဖြစ်တော်မူသနည်း။ ကိုယ်တော့် ဂုဏ်တော်များကို ရှင်းလင်းစွာ သိရှိခြင်းဖြင့် မည်သို့ အကျိုးကျေးဇူး ရရှိသနည်း။

• ဘုရားသခင့်အကြောင်း အမှန်တရားကို အခြားသူတို့ သိရှိနားလည်အောင် မည်သို့ကူညီပေးနိုင်သနည်း။

• ယေဟောဝါအားသိခြင်းနှင့် နာမတော်ကို အမှီပြုလျက် လျှောက်လိုက်ခြင်းတွင် အဘယ်အရာများ အကျုံးဝင်သနည်း။