ယေဟောဝါဘုရားကို ယုံကြည်တဲ့ ရာခပ်

ရှေးခေတ်က ယေရိခေါမြို့ကို တို့တွေ ရောက်နေတယ်လို့ ဆိုပါစို့။ အဲဒီမြို့ဟာ ခါနန်ပြည်မှာရှိတယ်။ အဲဒီမှာ ယေဟောဝါဘုရားကို မယုံကြည်တဲ့သူတွေ နေကြတယ်။ အဲဒီမှာ ရာခပ်ဆိုတဲ့ အမျိုးသမီးလည်း နေတယ်။

သူ ငယ်ငယ်လေးကတည်းက မောရှေအကြောင်း ကြားဖူးတယ်။ မောရှေဟာ ပင်လယ်နီကို နှစ်ခြမ်းခွဲခဲ့တဲ့အကြောင်း၊ အစ္စရေးတွေကို အီဂျစ်ပြည်ကနေ ခေါ်ထုတ်ခဲ့တဲ့အကြောင်းတွေပေါ့။ ပြီးတော့ ရန်သူတွေကို အစ္စရေးတွေ အနိုင်ရအောင် ယေဟောဝါဘုရား ဘယ်လိုကူညီပေးခဲ့တဲ့အကြောင်းကိုလည်း သူကြားဖူးထားတယ်။ အခုတော့ အစ္စရေးတွေ ယေရိခေါမြို့နားမှာ စခန်းချနေတယ် ဆိုပါလား။

တစ်ညနေမှာ အစ္စရေးလူနှစ်ယောက် ယေရိခေါမြို့ကို လာစုံစမ်းကြတယ်။ တခြားမြို့တွေဆီသွားပြီး စုံစမ်းတဲ့သူတွေကို သူလျှိုလို့ခေါ်တယ်။ သူတို့ ရာခပ်အိမ်ကို ရောက်သွားတော့ ရာခပ်က အိမ်ထဲ ခေါ်ထားလိုက်တယ်။ ညပိုင်းမှာ ယေရိခေါမင်းကြီးက မြို့ထဲကို သူလျှိုတွေ ရောက်လာပြီး ရာခပ်အိမ်ထဲ ဝင်သွားတယ်လို့ သတင်းရသွားတယ်။ ဒါနဲ့ လူတွေလွှတ်ပြီး သူလျှိုတွေကို သွားဖမ်းခိုင်းတယ်။ ရာခပ်က အဲဒီသူလျှိုတွေကို အိမ်ခေါင်မိုးပေါ်မှာ ဝှက်ထားပြီး မင်းကြီးလွှတ်လိုက်တဲ့လူတွေကို ဒီလိုပြောလိုက်တယ်– ‘သူလျှိုတွေ ရောက်လာတာတော့ မှန်ပါတယ်။ အခုပဲ သူတို့ ထွက်သွားပြီ။ ခုချက်ချင်းလိုက်ရင် သူတို့ကို မီနိုင်တယ်။’ အဲဒီသူလျှိုတွေကို ရာခပ် ဘာလို့ ကာကွယ်ပေးနေတာလဲ သိလား။— ယေဟောဝါဘုရားကို သူ ယုံကြည်လို့ပေါ့။ ဘုရားက အစ္စရေးတွေကို ခါနာန်ပြည် ပေးမယ်လို့လည်း ရာခပ်ယုံတယ်။

ရာခပ်အိမ်ကနေ သူလျှိုတွေ ထွက်မသွားခင် ကတိတစ်ခုပေးခဲ့တယ်။ ယေရိခေါမြို့ ဖျက်ဆီးခံရတဲ့အခါ ရာခပ်နဲ့ သူ့မိသားစု ဘေးကင်းလုံခြုံမယ်ဆိုတဲ့ ကတိပဲ။ ဒါပေမဲ့ ရာခပ်ကို ဘာလုပ်ခိုင်းသလဲ သိလား။— ‘ဒီကြိုးနီကို ပြတင်းပေါက်မှာ ချည်ထားပါ။ ဒါဆိုရင် ခင်ဗျားအိမ်ထဲမှာရှိတဲ့ လူအားလုံး ဘေးကင်းလုံခြုံလိမ့်မယ်’ လို့ သူလျှိုတွေ ပြောသွားတယ်။ သူတို့ပြောတဲ့အတိုင်း ရာခပ်လုပ်ခဲ့တယ်။ ဘာဆက်ဖြစ်သလဲ သိသလား။—

ရက်အနည်းငယ် ကြာတော့ အစ္စရေးတွေ ယေရိခေါမြို့ကို အသံတိတ် လှည့်ပတ် ချီတက်ကြတယ်။ တစ်ရက်ကို တစ်ပတ်နှုန်းနဲ့ မြို့ကို ခြောက်ရက် လှည့်ပတ်ချီတက်ခဲ့တယ်။ ခုနစ်ရက်မြောက်နေ့မှာတော့ မြို့ကို ခုနစ်ပတ် ပတ်ပြီး ချီတက်တယ်။ အဲဒီနောက် သူတို့အားလုံး အသံအကျယ်ကြီးနဲ့ အော်ပါလေရော။ အဲဒီအခါ ယေဟောဝါဘုရားက မြို့ရိုးပြိုကျသွားအောင် လုပ်လိုက်တယ်။ ဒါပေမဲ့ အနီရောင်ကြိုး တွဲလောင်းကျနေတဲ့ အိမ်ကတော့ မပြိုသွားဘူး။ အဲဒီအိမ်ကို ပုံထဲမှာ တွေ့လား။— ရာခပ်နဲ့ သူ့မိသားစုကတော့ ကယ်တင်ခံခဲ့ရတယ်။

ရာခပ်ဆီကနေ  ဘာသင်ယူနိုင်သလဲ။— ရာခပ်က ယေဟောဝါဘုရား လုပ်ခဲ့တဲ့ အံ့ဖွယ်အမှုတွေအကြောင်း အများကြီး ကြားဖူးတယ်။ ဒါကြောင့် ယေဟောဝါဘုရားကို သူယုံကြည်သွားတယ်။ တို့တွေလည်း ယေဟောဝါဘုရားအကြောင်း အများကြီးသိအောင် သင်ယူရမယ်။ သားတို့သမီးတို့ကော၊ ဘုရားသခင်ကို ရာခပ်လို ယုံကြည်သလား။— ယေဟောဝါဘုရားကို သားတို့သမီးတို့ ယုံတယ်ဆိုတာ သိပါတယ်။