ရာခပ်—ယုံကြည်ခြင်းလုပ်ရပ်များအားဖြင့်ဖြောင့်မတ်ရာသို့ရောက်ခဲ့
စဉ်းစားကြည့်ပါ! ဘုရားသခင့်ရှေ့ ပြည့်တန်ဆာတစ်ဦး ဖြောင့်မတ်ရာသို့ရောက်ချေပြီ။ “မဖြစ်နိုင်ရာ!” ဟုအများက ဆိုကြမည်။ သို့သော် ရှေးခါနာန်မြို့တစ်မြို့ဖြစ်သည့် ယေရိခေါမြို့မှ ပြည့်တန်ဆာ ရာခပ်သည် ထိုသို့ပင်ဖြစ်လာပါသည်။
ကျမ်းရေးသူ ယာကုပ်က “လူသည် ယုံကြည်ခြင်းအားဖြင့်သာ ဖြောင့်မတ်ရာသို့ရောက်သည်မဟုတ်။ အကျင့်အားဖြင့် ရောက်သည်ကို သင်တို့ သိမြင်ရကြ၏။ ထိုနည်းတူ ပြည့်တန်ဆာရာခပ်သည် တမန်တို့ကို လက်ခံပြီးမှ အခြားသောလမ်းဖြင့် လွှတ်လိုက်၍ အကျင့်အားဖြင့် ဖြောင့်မတ်ရာသို့ရောက်သည်မဟုတ်လော။ ဝိညာဉ်နှင့်ကင်းသောကိုယ်သည် အသေဖြစ်သကဲ့သို့ အကျင့်နှင့်ကင်းသောယုံကြည်ခြင်းသည် အသေဖြစ်၏” ဟုမှတ်တမ်းတင်ခဲ့သည်။ (ယာကုပ် ၂:၂၄-၂၆) ရာခပ်သည် ဖြောင့်မတ်ရာသို့ အဘယ်ကြောင့်ရောက်သနည်း။ ဘုရားသခင့်ရှေ့မှောက်၌ ဤအခွင့်ထူးရရှိနိုင်ရန် သူမ အဘယ်အမှုကို ပြုခဲ့သနည်း။
ဣသရေလလူမျိုးများ လာကြပြီ!
ဘီ.စီ.အီး. ၁၄၇၃ ခုနှစ်သို့ ပြန်သွားကြစို့။ အခြေအနေကို မြင်ယောင်လိုက်ပါ။ ယေရိခေါမြို့သည် အလွန်ခိုင်ခံ့သောမြို့ဖြစ်သည်။ မြို့ရိုးပေါ်တွင် ပြည့်တန်ဆာ ရာခပ်အိမ် ရှိသည်။ ဤအပေါ်စီးနေရာမှ အရှေ့ဘက် ကမ်းတစ်လျှောက် လျှံနေသော ယော်ဒန်မြစ်ကို ရာခပ် တွေ့နိုင်မည်။ (ယောရှု ၃:၁၅) တပ်သား ၆၀၀,၀၀၀ ကျော်နှင့်အတူ ဣသရေလလူမျိုးများသည် အရှေ့ဘက်ကမ်းတွင် တပ်ချထားကြောင်းကိုလည်း သူမ သတိပြုမိမည်။ မိုင်အနည်းငယ် အကွာအဝေးတွင်သာ ရှိနေသည်တကား!
စစ်တိုက်ချိန်တွင် ဣသရေလလူမျိုး၏ စွန့်စားခန်းများအကြောင်း ရာခပ် ကြားဖူးခဲ့ပြီ။ အထူးသဖြင့် ဣသရေလလူမျိုးများ လွတ်မြောက်ရေးအတွက် ပင်လယ်နီကို ဖြတ်သွားသောလမ်းကြားကို ဖွင့်ပေးခြင်းဖြင့် ယေဟောဝါ၏ တန်ခိုးတော်တင်ပြခဲ့ပုံများအကြောင်းကိုလည်း သူမ ကြားခဲ့လိမ့်မည်။ ယင်းကြောင့် ယော်ဒန်မြစ်ရေလျှံနေခြင်းသည် အဘယ်နည်းဖြင့်မျှ အတားအဆီးဖြစ်လိမ့်မည်မဟုတ်ပါ။ အရေးပေါ်ကာလပါတကား! ရာခပ် မည်သို့တုံ့ပြန်မည်နည်း။
မိမိ၏ရပ်တည်ချက်ကို ရာခပ် တင်ပြ
မကြာမီပင် ရာခပ် မမျှော်လင့်သောဧည့်သည်နှစ်ဦး—ဣသရေလတပ်စခန်းမှ သူလျှိုများ—ကို လက်ခံလိုက်သည်။ တည်းခိုရာနေရာ ရှာနေကြ၍ သူမသည် မိမိအိမ်တွင် တည်းခိုခွင့်ပြုလိုက်လေသည်။ သို့သော် သူတို့ရောက်လာကြောင်း ယေရိခေါဘုရင် သတင်းရသဖြင့် သူတို့အား ဖမ်းဆီးရန် မင်းအရာရှိတို့ကို ချက်ချင်းစေလွှတ်ခဲ့သည်။—ယောရှု ၂:၁၊ ၂။
မင်းအရာရှိများ ရောက်လာလေသော် ရာခပ်သည် ယေဟောဝါဘုရားသခင်ဘက် ရပ်တည်ရန် ဆုံးဖြတ်ပြီးပြီဖြစ်သည်။ “သင့်ဆီသို့ရောက်လာ၍ သင့်အိမ်သို့ဝင်သောသူတို့ကို အပ်လော့” ဟုမင်းအရာရှိတို့က အမိန့်ပေးကြသည်။ ရာခပ်မူကား သူလျှိုတို့ကို အိမ်မိုးပေါ်ရှိ ခြောက်သွေ့ရန်ဖြန့်ထားသော ပိုက်ဆန်လျှော်ရိုးထဲ၌ ဝှက်ထားနှင့်ပြီ။ သူမက “ကျွန်မဆီသို့ လူရောက်သည်မှန်ပါ၏။ သို့ရာတွင် အဘယ်အရပ်ကလာသည်ကို မသိပါ။ မိုးချုပ်၍ တံခါးပိတ်ချိန်ရှိသောအခါ သူတို့သည် ထွက်သွားကြပါ၏။ အဘယ်အရပ်သို့ထွက်သွားသည်ကို မသိပါ။ အလျင်အမြန်လိုက်ကြလော့။ မီကောင်းမီပါလိမ့်မည်” ဟုဆိုသည်။ (ယောရှု ၂:၃-၅) ထိုအတိုင်းပင် ဘုရင့်လူတို့သည်ပြုခဲ့ကြ၏—အချည်းနှီးပေတည်း။
ရာခပ်သည် ရန်သူတို့အား လမ်းလွှဲပေးလိုက်ပါသည်။ ယေဟောဝါကိုယုံကြည်ကြောင်း အခြားလုပ်ရပ်များအားဖြင့် သူမချက်ချင်းဖော်ပြသေးသည်။ အိမ်မိုးပေါ်သို့တက်သွား၍ သူလျှိုတို့အား “ထာဝရဘုရား [ယေဟောဝါ၊ ကဘ] သည် သင်တို့အား ဤပြည်ကိုပေးတော်မူကြောင်းကို . . . ကျွန်မသိပါ၏” ဟုပြောသည်။ လွန်ခဲ့သောအနှစ် ၄၀ က ဣသရေလလူမျိုးများအတွက် ဘုရားသခင်သည် “ဧဒုံပင်လယ်ရေကို . . . ခန်းခြောက်စေတော်မူ” ခဲ့သည်ဟူသောသတင်းကြောင့် ပြည်သူပြည်သားအပေါင်းတို့သည် ကြောက်လန့်အားကြီးကြောင်း ရာခပ်ဝန်ခံပါသည်။ အာမောရိရှင်ဘုရင်နှစ်ပါးတို့အား ဣသရေလလူမျိုးများဖျက်ဆီးခဲ့ကြောင်းကိုလည်း သူတို့ကြားသိခဲ့ကြသည်။ “ထိုသတင်းကိုကြားသောအခါ အကျွန်ုပ်တို့သည် စိတ်ပျက်၍ သင်တို့ကြောင့် တစ်စုံတစ်ယောက်သောသူ၌မျှ ရဲရင့်ခြင်းသတ္တိ အလျှင်းမကျန်ကြွင်းပါ။ အကြောင်းမူကား သင်တို့၏ဘုရားသခင် ထာဝရဘုရား [ယေဟောဝါ၊ ကဘ] သည် အထက်ကောင်းကင်ဘုံ၌လည်းကောင်း၊ အောက်အရပ် မြေကြီး၌လည်းကောင်း အစိုးရသော ဘုရားသခင် ဖြစ်တော်မူ၏” ဟုရာခပ်ပြောသည်။—ယောရှု ၂:၈-၁၁။
ရာခပ် ဤသို့အသနားခံသည်– “သို့ဖြစ်၍ သင်တို့၌ ကျွန်မသည် ကျေးဇူးပြုသောကြောင့် သင်တို့သည် ကျွန်မပေါက်ဖော်တို့၌ ကျေးဇူးပြု၍ ကျွန်မမိဘ၊ ညီအစ်မ၊ မောင် အစရှိသောသူတို့နှင့်ဆိုင်သမျှသောသူတို့ကို မသတ်ဘဲ အသက်ချမ်းသာပေးမည်ဟု ထာဝရဘုရား [ယေဟောဝါ၊ ကဘ] ကိုတိုင်တည်၍ ကျိန်ဆိုကြပါ။ မှန်သောလက္ခဏာသက်သေကိုလည်း ပေးခဲ့ကြပါ။”—ယောရှု ၂:၁၂၊ ၁၃။
ထိုသူတို့က သဘောတူကြ၍ ရာခပ်ပြုရမည့်အမှုကို မှာကြားလေသည်။ ယေရိခေါမြို့ရိုးအပြင်သို့ သူလျှိုတို့အား လျှောချခဲ့သော ကြက်သွေးရောင်ကြိုးကို သူမ၏ ပြတင်းပေါက်တွင်ချည်ထား၍ သူ့မိသားစုကို အိမ်ထဲ၌ ကာကွယ်မှုရရှိရန် ခေါ်ထားရမည်ဖြစ်သည်။ ရာခပ်ကလည်း မြေမျက်နှာ အသွင်အပြင် အနေအထားအကြောင်းနှင့် လိုက်ရှာသူများကို မည်သို့ရှောင်တိမ်းနိုင်ကြောင်း သူလျှိုများအား ပြောပြသည့်အတိုင်း သူတို့ပြုမူခဲ့ကြသည်။ ကြက်သွေးရောင်ကြိုးကို ချည်ထား၍ အိမ်သူအိမ်သားတို့အား စုဝေးစေပြီးနောက် ရာခပ်သည် ဖြစ်ပျက်လတ္တံ့သောအမှုတို့ကို စောင့်မျှော်နေသည်။—ယောရှု ၂:၁၄-၂၄။
ရာခပ် အဘယ်အမှုကို ပြုခဲ့ပြီနည်း။ သူမသည် အနန္တတန်ခိုးကြီးရှင် ယေဟောဝါဘုရားသခင်ကို ယုံကြည်ကိုးစားကြောင်း သက်သေထူခဲ့ပြီ! ကိုယ်တော့်စံချိန်နှင့်အညီ သူမအသက်ရှင်တော့မည်။ မှန်သည်၊ ဤကဲ့သို့သော ယုံကြည်ခြင်းလုပ်ရပ်များကြောင့် သူမသည် ဖြောင့်မတ်ရာသို့ ရောက်လိမ့်မည်။
မြို့ရိုးများ ပြိုလဲပြီ!
ရက်သတ္တပတ်အနည်းငယ် ကုန်လွန်လေပြီ။ ယဇ်ပုရောဟိတ်များနှင့်အတူ—အချို့မှာ သိုးချိုတံပိုး၊ အခြားသူတို့မူ မြင့်မြတ်သောပဋိညာဉ်သေတ္တာတော်ကို ဆောင်ကြဉ်းကာ—ဣသရေလစစ်သူရဲတို့သည် ယေရိခေါမြို့ကို လှည့်ပတ်ကြသည်။ ထိုသို့ပင် ခြောက်ရက်တိုင် နေ့စဉ် တစ်ကြိမ်စီ ယခုပြုမူပြီးပြီဖြစ်သည်။ သို့ရာတွင် ဤသတ္တမနေ့ရက်တွင် မြို့ကို ခြောက်ကြိမ်တိုင် လှည့်ပတ်ပြီးခဲ့ပြီ။ နောက်တစ်ဖန် ပြန်လှည့်ပတ်နေ၏!
သတ္တမအကြိမ် လှည့်ပတ်ပြီးသည်နှင့် ရှည်လျားသောတံပိုးမှုတ်သံများကလေထုကိုလွှမ်းနေသည်။ ဣသရေလလူများကလည်း ယခုကျယ်လောင်စွာ ကြွေးကြော်လေသည်။ သို့နှင့် ယေရိခေါခံတပ် မြို့ရိုးတို့သည် ကြောက်ရွံ့ဖွယ်မြည်ဟည်းသံများဖြင့် အကုန်အစင်ပြိုလဲသွားစေရန် ယေဟောဝါစီရင်တော်မူသည်။ ရာခပ်အိမ်ရှိရာ မြို့ရိုးတစ်ပိုင်းသာလျှင် မတ်မတ်ကျန်ရှိလေသည်။ မြို့နှင့်တကွ မြို့သူမြို့သားတို့သည် ပျက်စီးလေသည်။ လုပ်ရပ်များအားဖြင့် ထင်ရှားသော သူမ၏ယုံကြည်ခြင်းကြောင့် နောင်တရသူ ပြည့်တန်ဆာသည် မိသားစုနှင့်တကွ အသက်ချမ်းသာရခဲ့ပါသည်။ ထို့နောက် ယေဟောဝါလူတို့နှင့်အတူ သူမနေထိုင်လေသည်။—ယောရှု ၆:၁-၂၅။
ရာခပ်၏ အရည်အချင်းများကို စိစစ်ကြည့်ရှုခြင်း
ရာခပ်သည် ကာမဂုဏ်လိုက်စားလွန်းသော ပျင်းရိသူ မဟုတ်ပါ။ အကြောင်းမှာ သူမ၏အိမ်မိုးပေါ်တွင် နေလှန်းထားသည့် ပိုက်ဆံလျှော်ရိုးများရှိသည်။ ပိုက်ဆံလျှော်မျှင်တို့ဖြင့် အထည်များကို ပြုလုပ်လိမ့်မည်ဖြစ်သည်။ ရာခပ်အိမ်တွင် ကြက်သွေးရောင် ချည်မျှင်ကြိုးခွေလည်း ရှိသည်။ (ယောရှု ၂:၆၊ ၁၈) သို့ဖြစ်၍ ပိတ်ထည်များကို သူမထုတ်လုပ်တတ်ရုံမက ဆေးဆိုးသည့်အတတ်ပညာကိုသိထားပုံလည်း ရှိသည်။ မှန်သည်။ ရာခပ်သည် ဝီရိယရှိသော အမျိုးသမီးတစ်ဦးဖြစ်ပါသည်။ ထိုထက်အရေးကြီးသည်ကား ယေဟောဝါအား ကြောက်ရွံ့ကြည်ညိုသောသဘောပိုက်ထားသူတစ်ဦးလည်း ဖြစ်လာပါသည်။—သု. ၃၁:၁၃၊ ၁၉၊ ၂၁၊ ၂၂၊ ၃၀ နှိုင်းယှဉ်။
ရာခပ်၏ အခြားဝမ်းစာရှာ လုပ်ငန်းကော။ သူမသည် တည်းခိုခန်းပိုင်ရှင်မျှသာမဟုတ်ပါ။ ပြည့်တန်ဆာ အဓိပ္ပာယ်ရှိသည့် ဟေဗြဲနှင့်ဂရိစကားလုံးများကို အသုံးပြုကာ သူမအား ကျမ်းစာက ဖော်ပြထားပါသည်။ ဥပမာ၊ ဟေဗြဲစကားလုံး ဇိုနာသည် တရားမဝင်သောဆက်ဆံမှုနှင့် အမြဲပတ်သက်သည်။ အကြောင်းအားလျော်စွာ၊ ခါနာန်လူမျိုးများအတွက် ပြည့်တန်ဆာလုပ်ငန်းသည် နာမည်ပျက်စီးပွားရေးတစ်ခု မဟုတ်ချေ။
ပြည့်တန်ဆာတစ်ဦးကို ယေဟောဝါအသုံးပြုတော်မူခဲ့ခြင်းကား ကိုယ်တော်၏ ကြီးမားသော ကရုဏာတော်ကို ထင်ရှားစေသည်။ ပြင်ပန်းလက္ခဏာများက ကျွန်ုပ်တို့ကိုအထင်မှားစေနိုင်သော်လည်း ဘုရားသခင်သည် “နှလုံးကို ကြည့်ရှုတတ်သည်။” (၁ ဓမ္မရာဇဝင် ၁၆:၇) သို့ဖြစ်သောကြောင့် စိတ်နှလုံးဖြောင့်မှန်သော ပြည့်တန်ဆာများသည် မိမိတို့၏ ပြည့်တန်ဆာလုပ်ငန်းကို စွန့်လွှတ်မည်ဆိုလျှင် ယေဟောဝါဘုရားသခင်၏ ခွင့်လွှတ်ခြင်းကို ရရှိနိုင်လိမ့်မည်။ (မဿဲ ၂၁:၂၃၊ ၃၁၊ ၃၂ နှိုင်းယှဉ်။) ရာခပ်ကိုယ်တိုင်လည်း အပြစ်ပြုရာမှ ဖြောင့်မတ်သောလမ်းစဉ်သို့ ပြောင်းလဲခဲ့သဖြင့် ဘုရားသခင်နှစ်သက်လက်ခံတော်မူခဲ့သည်။
ထိုဣသရေလသူလျှိုများသည် ဘုရားသခင့်ပညတ်တရားနှင့်အညီ နေထိုင်သူများဖြစ်ကြရာ ရာခပ်အိမ်၌ အကျင့်ပျက်လို၍ တည်းခိုခဲ့ခြင်းမဟုတ်ပါ။ ပြည့်တန်ဆာအိမ်တွင် သူတို့ရှိနေခြင်းက သူတို့အား မယုံသင်္ကာဖြစ်ဖို့အကြောင်းနည်းမည်ဟု သူတို့တွေးတောခဲ့ပေမည်။ မြို့ရိုးပေါ် ရှိနေခြင်းက ထွက်ပြေးရန်လည်း လွယ်ကူစေမည်ဖြစ်သည်။ ဣသရေလလူမျိုးများနှင့် ဘုရားသခင်ဆက်ဆံခဲ့သည့် သတင်းများကြောင့် ဤမျှစိတ်ထိခိုက်ပြီး နောင်တယူ ပြောင်းလဲခဲ့သော အပြစ်သားတစ်ဦးထံ သူတို့အား ယေဟောဝါ စေလွှတ်တော်မူခဲ့ခြင်းသာဖြစ်ကြောင်း ထင်ရှားပါသည်။ စာရိတ္တယိုယွင်းသောအကျင့်များကြောင့် ခါနာန်လူမျိုးကို ဖျက်ဆီးပစ်ရမည်ဟု ဣသရေလလူမျိုးအား ဘုရားသခင် မိန့်တော်မူခဲ့ပြီး ရာခပ်ကိုလည်းကောင်း၊ ယေရိခေါမြို့ကို အနိုင်ယူ သိမ်းပိုက်နိုင်ရန်လည်းကောင်း ကိုယ်တော်ကောင်းချီးပေးတော်မူခဲ့ခြင်းက သူလျှိုတို့သည် အကျင့်ပျက်ခြင်း၌ မပါဝင်ခဲ့ကြောင်း ထင်ရှားစေသည်။—ဝတ်ပြုရာ ၁၈:၂၄-၃၀။
သူလျှိုများကို လိုက်ရှာနေသူများအား လမ်းလွှဲစေသည့် ရာခပ်၏စကားများကကော။ သူမ၏လုပ်ရပ်ကို ဘုရားသခင် နှစ်သက်တော်မူခဲ့သည်။ (ရောမ ၁၄:၄ နှိုင်းယှဉ်။) ကိုယ်တော့်ကျေးကျွန်များကို ကာကွယ်ပေးရန် သူမသည် စွန့်စားပြုမူခြင်းဖြင့် သူမ၏ယုံကြည်ခြင်းကို ထင်ရှားစေခဲ့သည်။ ယေဟောဝါ၏ရှေ့မှောက်တော်တွင် မလိုတမာစိတ်နှင့်လိမ်လည်ပြောဆိုခြင်းသည် မှားယွင်းသည်မှန်သော်လည်း သတင်းအမှန်ကို သိရန်မလိုသူများအား ဖွင့်ဟပြောဆိုစရာမလိုပါ။ ယေရှုခရစ်တော်ပင်လျှင် အသေးစိတ်အချက်အလက်များကို ပြောဆိုခဲ့မည် သို့မဟုတ် တိုက်ရိုက်ဖြေဆိုခဲ့မည်ဆိုလျှင် ဒုက္ခပိုရောက်စရာအကြောင်းရှိသည့်အတွက် ထိုသို့ပြုတော်မမူခဲ့ပါ။ (မဿဲ ၇:၆; ၁၅:၁-၆; ၂၁:၂၃-၂၇; ယောဟန် ၇:၃-၁၀) ရန်သူမင်းအရာရှိတို့အား လမ်းလွှဲခဲ့သည့် ရာခပ်၏လုပ်ရပ်ကို ဤသဘောထားမျိုးဖြင့် ရှုမြင်ကြရမည်။
ရာခပ်ရသော ဆုကျေးဇူး
ယုံကြည်ခြင်းတင်ပြခဲ့သောကြောင့် ရာခပ်သည် အဘယ်ဆုကျေးဇူးကို ခံစားခဲ့ရသနည်း။ ယေရိခေါမြို့ ပျက်စီးချိန်တွင် သူမ အသက်ချမ်းသာရခဲ့ခြင်းကား ယေဟောဝါထံတော်မှ ကောင်းချီး အမှန်ပင်ဖြစ်သည်။ နောင်တွင် တောအရပ်၌ အကြီးအမှူးဖြစ်သူ ယုဒအမျိုးသား၊ နာရှုန်၏သား စာလမုန်ကို သူမ ထိမ်းမြားခဲ့သည်။ ဘုရားတရားကြည်ညိုသော ဗောဇ၏မိဘများအဖြစ် စာလမုန်နှင့်ရာခပ်တို့သည် ဣသရေလရှင်ဘုရင် ဒါဝိဒ်၏ မျိုးစဉ်မျိုးဆက်အဝင် ဖြစ်ကြပါသည်။ (၁ ရာဇဝင်ချုပ် ၂:၃-၁၅; ရုသ ၄:၂၀-၂၂) ထိုထက်ထူးခြားသည်ကား ယခင်က ပြည့်တန်ဆာဖြစ်ခဲ့ဖူးသူ ရာခပ်သည် မဿဲဖော်ပြထားသည့် ယေရှုခရစ်၏ မျိုးစဉ်မျိုးဆက်စာရင်းတွင်ပါသော အမျိုးသမီးလေးဦးအနက် တစ်ဦးအဝင်ဖြစ်သည်။ (မဿဲ ၁:၅၊ ၆) ယေဟောဝါထံတော်မှ တကယ့်ကောင်းချီးပါတကား!
ဣသရေလအမျိုးသမီးမဟုတ် တစ်ချိန်က ပြည့်တန်ဆာဖြစ်ခဲ့သော်လည်း ယေဟောဝါ၌ ယုံကြည်ခြင်းအပြည့်ရှိကြောင်း သူမ၏လုပ်ရပ်များအားဖြင့် တင်ပြရာတွင် ရာခပ်သည် ထူးခြားသောပုံသက်သေဖြစ်ပါသည်။ (ဟေဗြဲ ၁၁:၃၀၊ ၃၁) ပြည့်တန်ဆာဘဝကို စွန့်လွှတ်ခဲ့သူအချို့အပါအဝင်ဖြစ်မည့် အခြားသူများနည်းတူပင် သူမသည် နောက်ထပ်ဆုကျေးဇူးတစ်ခု—သေခြင်းမှ ရှင်ပြန်ထမြောက်၍ ပရဒိသုကမ္ဘာပေါ် အသက်ရှင်ခွင့်—ကို ရရှိဦးမည်။ (လုကာ ၂၃:၄၃) လုပ်ရပ်များအားဖြင့် တင်ပြသော သူမ၏ယုံကြည်ခြင်းကြောင့် ရာခပ်သည် မေတ္တာရှင်၊ ခွင့်လွှတ်တော်မူသော ကောင်းကင်ခမည်းတော်၏ နှစ်သက်လက်ခံမှုကို ခံစားခဲ့ရပါသည်။ (ဆာလံ ၁၃၀:၃၊ ၄) သူမ၏ကောင်းသောပုံသက်သေသည် ထာဝရအသက်ရလိုသော ဖြောင့်မတ်ခြင်းတရားကို မြတ်နိုးသူအပေါင်းအား ယေဟောဝါကိုမျှော်ကိုးရန် အားပေးတည်ဆောက်မှု အမှန်တကယ်ပင်ဖြစ်ပါသည်။
[စာမျက်နှာ ၂၃ ပါ ရုပ်ပုံ]
ရာခပ်၏လုပ်ရပ်များက သူမ၌ ယုံကြည်ခြင်းရှိကြောင်း သက်သေထူသောကြောင့် သူမသည် ဖြောင့်မတ်ရာသို့ရောက်ခဲ့သည်
[စာမျက်နှာ ၂၄ ပါ ရုပ်ပုံ]
အစောပိုင်းအချိန်က မြို့ရိုးတစ်ပိုင်းပါအပါအဝင် ရှေးခေတ် ယေရိခေါမြို့ပျက်ကို ရှေးဟောင်းပစ္စည်းသုတေသနပညာရှင်များ တူးဖော်တွေ့ ရှိခဲ့
[Credit Line]
Pictorial Archive (Near Eastern History) Est.