စိတ်ရှည်ခြင်းစံပြများကို ဆင်ခြင်သုံးသပ်ခြင်း

“ဘုရားသခင်သည် . . . ပျက်စီးခြင်းအဖို့ပြင်ဆင်သောအမျက်ခံရာအိုးများကို အလွန်ရှည်သောစိတ်နှင့် သည်းခံတော်မူသည်။”—ရောမ ၉:၂၂၊ သမ္မ။

၁။ (က) ဘုရားသခင့်မှုတ်သွင်းခံနှုတ်ကပါဌ်တော်သည် ကျွန်ုပ်တို့အကျိုးကိုမည်သို့ဆောင်ရွက်သနည်း။ (ခ) ယင်းနှင့်ပတ်သက်၍ ဤတွင်စိတ်ရှည်ခြင်းအရည်အချင်းကို အဘယ်ကြောင့်သုံးသပ်ခြင်းဖြစ်သနည်း။

ကျွန်ုပ်တို့၏ဖန်ဆင်းတော်မူရှင် ယေဟောဝါဘုရားသခင်သည် မိမိ၏မှုတ်သွင်းခံနှုတ်ကပါဌ်တော်တည်းဟူသော သမ္မာကျမ်းစာတော်ကို ကျွန်ုပ်တို့အားပေးတော်မူ၏။ ‘ကျွန်ုပ်တို့၏ခြေရှေ့မှာမီးခွက်ကဲ့သို့ လမ်းခရီးမှာအလင်းကဲ့သို့’ ထွန်းလင်းရန်အတွက်ဖြစ်သည်။ (ဆာလံ ၁၁၉:၁၀၅) ဘုရားသခင့်နှုတ်ကပါဌ်တော်သည် ‘ကျွန်ုပ်တို့အား ကောင်းမှုအမျိုးမျိုးအသင့်ပြင်ဆင်’ ထားရန်အတွက်အထောက်အကူပေးသည်။ (၂ တိမောသေ ၃:၁၆၊ ၁၇) ကျွန်ုပ်တို့အားအသင့်ပြင်ဆင်ပေးသည့်နည်းမှာ စိတ်ရှည်ခြင်းစံပြကောင်းများအကြောင်း ဖော်ပြပေးခြင်းအားဖြင့်ဖြစ်သည်။ ဤအရည်အချင်းသည် ဘုရားသခင့်ဝိညာဉ်တော်အသီးတစ်လုံးဖြစ်ပြီး ကိုယ်တော့်စိတ်တော်တွေ့အောင်ကြိုးစားရာတွင်လည်းကောင်း၊ လူလူချင်းစည်းလုံးညီညွတ်စွာနေထိုင်ရာတွင်လည်းကောင်း မရှိမဖြစ်လိုအပ်သောအရာတစ်ခုဖြစ်သည်။—ဂလာတိ ၅:၂၂၊ ၂၃။

၂။ “စိတ်ရှည်ခြင်း” ဟူ၍ပြန်ဆိုသည့်ဂရိစာလုံး၏အဓိပ္ပာယ်ကားအဘယ်နည်း။ ဤအရည်အချင်းတင်ပြရာတွင် မည်သူသည် ထိပ်ဆုံးမှပါဝင်သနည်း။

^၂ “စိတ်ရှည်ခြင်း” ဟူ၍ဘာသာပြန်ဆိုသည့်ဂရိစာလုံးမှာ စာသားအတိုင်းဆိုလျှင် “စိတ်ဓာတ်ရှည်ခြင်း” အဓိပ္ပာယ်ရသည်။ စိတ်ရှည်ခြင်းကို “အမျက်နှိုးဆော်ခြင်းခံရချိန်တွင် စိတ်လိုက်မာန်ပါလက်တုံ့ပြန်ခြင်း၊ အလျင်စလိုအပြစ်ဒဏ်ပေးခြင်းမပြုဘဲ ကိုယ့်ကိုယ်ကိုချုပ်တည်းနေသည့်အရည်အချင်း” အဖြစ်အဓိပ္ပာယ်ဖွင့်ဆိုထားသည်။ (Vine’s Expository Dictionary of Old and New Testament Words by W. E. Vine၊ အတွဲ ၃၊ စာမျက်နှာ ၁၂) စိတ်ရှည်ခြင်းဆိုသည်မှာ စိတ်ချုပ်တည်းခြင်းနှင့်အမျက်ထွက်နှေးခြင်းအဓိပ္ပာယ်ရသည်။ စိတ်ရှည်၍အမျက်ထွက်နှေးသူတို့တွင် ထိပ်ဆုံးမှမည်သူပါဝင်သနည်း။ ယေဟောဝါဘုရားသခင်အပြင် မည်သူမျှမရှိ။ ထို့ကြောင့် ထွက်မြောက်ရာ ၃၄:၆ တွင်ယေဟောဝါသည် “ချစ်သနားခြင်းမေတ္တာကရုဏာနှင့်ပြည့်စုံ၍ စိတ်ရှည်ခြင်း [အမျက်ထွက်နှေးခြင်း၊ NW ] ကျေးဇူးပြုခြင်း၊ သစ္စာစောင့်ခြင်းနှင့်ကြွယ်ဝတော်မူထသော” ဘုရားသခင်ဖြစ်ကြောင်းဖတ်ရသည်။ စင်စစ်ဆိုလျှင် ကျမ်းစာ၌ယေဟောဝါသည် “အမျက်ထွက်နှေး” ကြောင်း နောက်ထပ်ရှစ်နေရာတွင်ဖော်ပြထားသည်။—တောလည်ရာ ၁၄:၁၈။ နေဟမိ ၉:၁၇။ ဆာလံ ၈၆:၁၅။ ၁၀၃:၈။ ၁၄၅:၈။ ယောလ ၂:၁၃။ ယောန ၄:၂။ နာဟုံ ၁:၃၊ NW။

၃။ ယေဟောဝါစိတ်ရှည်တော်မူခြင်းမှာ အဘယ်ဂုဏ်ရည်တော်များကြောင့်ဖြစ်သနည်း။

^၃ စိတ်ရှည်ခြင်းသို့မဟုတ် အမျက်ထွက်နှေးခြင်းဆိုသည်မှာ ယေဟောဝါဘုရားသခင်ထံတော်မှ ကျွန်ုပ်တို့မျှော်လင့်နိုင်သောအရာဖြစ်သည်။ အဘယ်ကြောင့်ဆိုသော် ကိုယ်တော်သည်တန်ခိုးတော်နှင့် ဉာဏ်တော်အနန္တနှင့်ပြည့်စုံ၍ အကြွင်းမဲ့တရားမျှတတော်မူသည့်ပြင် မေတ္တာတော်၏ပကတိပြယုဂ်လည်းဖြစ်တော်မူသောကြောင့်တည်း။ (တရားဟောရာ ၃၂:၄။ ယောဘ ၁၂:၁၃။ ဟေရှာယ ၄၀:၂၆။ ၁ ယောဟန် ၄:၈) ကိုယ်တော်သည်မိမိ၏ဂုဏ်ရည်တော်များကို အခါခပ်သိမ်းတသမတ်တည်း အကြွင်းမဲ့ဖြစ်နေစေရန် ထိန်းသိမ်းထားတော်မူ၏။ မစုံလင်သောလူသားများအပေါ် ကိုယ်တော်အဘယ်ကြောင့်နှင့် အဘယ်သို့စိတ်ရှည်ခြင်းပြသတော်မူခဲ့ကြောင်းနှင့်စပ်လျဉ်း၍ ကိုယ်တော့်နှုတ်ကပါဌ်တော်က မည်သည့်အရာများဖေါ်ပြထားသနည်း။

နာမတော်ကိုထောက်၍ စိတ်ရှည်တော်မူခြင်း

၄။ အဘယ်ကောင်းမြတ်သောအကြောင်းရင်းများကြောင့် အပြစ်သားများအပေါ် ဘုရားသခင်စိတ်ရှည်တော်မူခြင်းဖြစ်သနည်း။

^၄ ယေဟောဝါအဘယ်ကြောင့် စိတ်ရှည်တော်မူသနည်း။ အပြစ်သားများကို အဘယ်ကြောင့်ချက်ချင်းအပြစ်ပေးတော်မမူသနည်း။ စိတ်မဝင်စားသောကြောင့်မဟုတ်ပါ။ ဖြောင့်မတ်ခြင်းတရားအတွက် စိတ်ဇောထက်သန်မှုမရှိသောကြောင့်လည်းမဟုတ်ပါ။ ကောင်းမြတ်သောအကြောင်းများစွာရှိ၍ ယေဟောဝါအမျက်တော်ထွက်ရန်နှေးကွေးနေခြင်း၊ လူတို့ကိုအလျင်စလိုအပြစ်ဒဏ်ပေးတော်မမူဘဲနေခြင်းဖြစ်သည်။ အကြောင်းတစ်ခုမှာ ကိုယ်တော့်နာမတော်ကျော်ကြားစေရန်အတွက်ဖြစ်သည်။ အခြားအကြောင်းတစ်ခုမှာ ဧဒင်ဥယျာဉ်၌ပုန်ကန်မှုကြောင့် ပေါ်ပေါက်ခဲ့သည့်ပြဿနာများဖြစ်သော ဘုရားသခင့်အချုပ်အခြာအာဏာတော်နှင့် လူသားတို့၏သမာဓိသစ္စာနှင့်ပတ်သက်သော ပြဿနာများကိုဖြေရှင်းရန်အတွက် အချိန်လိုအပ်သောကြောင့်ဖြစ်သည်။ ဘုရားသခင်စိတ်ရှည်တော်မူသည့်နောက်ထပ်အကြောင်းတစ်ခုမှာ ပြစ်မှားသူတို့အား မိမိတို့၏လမ်းစဉ်ကို ပြုပြင်ရန်အခွင့်အရေးပေးရန်ပင်ဖြစ်သည်။

၅၊ ၆။ လူ့ပုန်ကန်မှုနှင့်စပ်လျဉ်း၍ ယေဟောဝါအဘယ်ကြောင့်စိတ်ရှည်ခြင်းပြသတော်မူခဲ့သနည်း။

^၅ ယေဟောဝါသည်ဧဒင်ဥယျာဉ်တွင် ကနဦးလူသားမောင်နှံတို့နှင့်ဆက်ဆံရာတွင် စိတ်ရှည်တော်မူခဲ့၏။ ကောင်းမကောင်းသိကျွမ်းရာအပင်၏အသီးကိုမစားရ ဟူသောဘုရားသခင့်ပညတ်တော်ကို သူတို့ချိုးဖောက်ခဲ့ချိန်၌ သူတို့နှင့်တကွဧဝအားလှည့်ဖြားခဲ့သည့် ဖောက်ပြန်သည့်ကောင်းကင်တမန်တို့ကို ကိုယ်တော်ချက်ချင်းအဆုံးစီရင်ပစ်နိုင်သည်။ ယေဟောဝါ၏ဖြောင့်မတ်ခြင်းနှင့် တရားမျှတခြင်းသဘောသည် အလွန်အမင်းစော်ကားခံရသဖြင့် ထိုသူပုန်သုံးဦးအပေါ် အမျက်တော်စူးရှတော်မူခဲ့သည်မှာ သံသယရှင်းပါသည်။ သူတို့ကိုချက်ချင်းအဆုံးစီရင်ခဲ့လျှင်ပင် အကြွင်းမဲ့မှန်ကန်ပါသည်။ “ကောင်းမကောင်းသိကျွမ်းရာအပင်၏အသီးကိုကားမစားရ။ စားသောနေ့တွင်အမှန်သေရမည်” ဟုပထမလူအာဒံကို ဘုရားသခင်သတိပေးခဲ့ပြီးဖြစ်သည်။ (ကမ္ဘဦး ၂:၁၇၊ သမ္မ) အာဒံပြစ်မှားသည့်နေ့၌ပင် ဘုရားသခင်သည် အပြစ်ကျူးလွန်သူတို့ကို စစ်ကြော၍သေဒဏ်စီရင်ချက်ချမှတ်တော်မူသည်။ တရားဥပဒေအရ အာဒံနှင့်ဧဝတို့သည် ထိုနေ့၌ပင်သေဆုံးသည်။ သို့သော်စိတ်ရှည်တော်မူသော ကျွန်ုပ်တို့၏ဖန်ဆင်းရှင်သည် အာဒံအားနှစ်ပေါင်း ၉၃၀ ဆက်လက်အသက်ရှင်စေတော်မူ၏။—ကမ္ဘာဦး ၅:၅။

^၆ ဤကိစ္စတွင် ဘုရားသခင်အနေဖြင့်စိတ်ရှည်ရန်၊ အမျက်ထွက်နှေးရန်အတွက် ကောင်းမြတ်သောအကြောင်းရှိသည်။ ထိုသူပုန်တို့ကို ချက်ချင်းသာသုတ်သင်ပစ်ခဲ့ပါက ယေဟောဝါဘုရားသခင်သည် ကိုးကွယ်ခြင်းမခံထိုက်ကြောင်း၊ မည်သို့သောအခြေအနေ၌မဆို ကိုယ်တော်အပေါ်အစဉ်သစ္စာစောင့်သိမည့် လူသားအစေခံများရှိနိုင်မည်မဟုတ်ကြောင်း မာရ်နတ်မသိမသာကဲ့ရဲ့ပြစ်တင်ထားသည့် အချက်အတွက်ဖြေရှင်းချက်ရရှိနိုင်မည်မဟုတ်ပေ။ ထိုမျှမက၊ အောက်ပါကဲ့သို့သော မေးခွန်းများသည်လည်း အဖြေမရဘဲကျန်နေပေမည်။ အာဒံနှင့်ဧဝအပြစ်ကျူးလွန်ခြင်းသည် မည်သူ့အပြစ်နည်း။ ယေဟောဝါသည်ရှေးဦးစွာသူတို့ကို စာရိတ္တမဏ္ဍိုင်ချိနဲ့စွာဖန်ဆင်းခဲ့သဖြင့် သူတို့သည်သွေးဆောင်မှုကို မတွန်းလှန်နိုင်ဘဲဖြစ်သည့်အခါ ကိုယ်တော်ကဤသို့ဖြစ်ရကောင်းလားဟူ၍ သူတို့ကိုအပြစ်ဒဏ်ပေးခဲ့ခြင်းလော။ ယောဘဝတ္တုအခန်းကြီး ၁ နှင့်၂ မှတ်တမ်းမှ ဤအချက်အားလုံးကို အထင်အရှားတွေ့ရသည်။ လူသားမျိုးနွယ်ကို ဆက်လက်တိုးပွားစေခြင်းအားဖြင့် ယေဟောဝါသည်စာတန်၏စွပ်စွဲချက်များအခြေအမြစ်မရှိကြောင်းသက်သေပြရန် လူသားတို့အားအခွင့်အရေးပေးတော်မူ၏။

၇။ ဖာရောမင်းကိုတစ်ခါတည်း ယေဟောဝါအဘယ်ကြောင့်သေဒဏ်စီရင်ခြင်းမပြုခဲ့သနည်း။

^၇ မိမိလူမျိုးတော်ဖြစ်သော ဣသရေလလူမျိုးကို အီဂျစ်လူမျိုး၏အချုပ်အနှောင်မှလွတ်မြောက်ရန် ကယ်နှုတ်တော်မူခါနီးအချိန်၌ ယေဟောဝါသည်စိတ်ရှည်တော်မူကြောင်း ထပ်မံပြသတော်မူခဲ့သည်။ ဖာရောမင်းနှင့်တကွ သူ၏စစ်သည်ဗိုလ်ခြေတို့ကို ယေဟောဝါတစ်ခါတည်း ဖျက်ဆီးပစ်လိုက်နိုင်သည်။ သို့သော်ထိုသို့ပြုတော်မမူဘဲ သူတို့ကိုအတန်ကြာသည်းခံတော်မူ၏။ အဘယ်ကောင်းမြတ်သောအကြောင်းများကြောင့်နည်း။ အချိန်ကုန်လွန်လာသည်နှင့်အမျှ ဖာရောမင်းသည် ဣသရေလလူမျိုးအား ယေဟောဝါ၏လွတ်လပ်သောလူမျိုးအဖြစ် အီဂျစ်ပြည်မှထွက်ခွာခွင့်မပေးဘဲ ငြင်းဆန်ရာတွင် ပို၍ခေါင်းမာလာသည်။ ဤသို့ဖြင့်သူသည် ယေဟောဝါကိုအန်တုသည့်အတွက် ဖျက်ဆီးခံထိုက်သော ‘အမျက်ခံရာအိုး’ ဖြစ်ကြောင်းပြသလိုက်သည်။ (ရောမ ၉:၁၄-၂၄) သို့သော်ဤကိစ္စ၌ ဘုရားသခင်စိတ်ရှည်တော်မူသည့် သာ၍အရေးပါသောအကြောင်းတစ်ခုရှိသည်။ မောရှေမှတစ်ဆင့်ဖာရောမင်းအားအောက်ပါအတိုင်း ကိုယ်တော်မိန့်တော်မူခဲ့သည်။ “သင့်အားငါ့တန်ခိုးကိုပြခြင်းငှာလည်းကောင်း၊ ငါ့နာမကိုမြေတစ်ပြင်လုံးအနှံ့ကြေညာခြင်းကိုလည်းကောင်း သင့်ကိုတည်နေခွင့်ငါပေးခဲ့ပြီ။ သို့မဟုတ်လျှင်၊ လက်တော်ကိုဆန့်၍ သင်နှင့်ပြည်သူပြည်သားတို့ပါသင့်စေသောကပ်ဘေး မြေကြီးပေါ်မှကွယ်ပျောက်စေခဲ့ပြီ။”—ထွက်မြောက်ရာ ၉:၁၅၊ ၁၆၊ သမ။

၈။ တောကန္တာရအတွင်း၌ ပုန်ကန်သောဣသရေလလူမျိုးကို ဘုရားသခင်အဘယ်အကြောင်းကြောင့် သေဒဏ်မစီရင်ခဲ့သနည်း။

^၈ ဣသရေလလူမျိုး တောကန္တာရအတွင်းရောက်နေစဉ်၌လည်းယေဟောဝါသည် ကောင်းမြတ်သောအကြောင်းများကြောင့် စိတ်ရှည်ခြင်းကိုပြသတော်မူခဲ့သည်။ သူတို့သည်ရွှေနွားရုပ်ကိုကိုးကွယ်ခြင်းအားဖြင့်လည်းကောင်း၊ သူလျှိုဆယ်ယောက်မကောင်းသောသတင်းဖြင့် ပြန်လာကြသောအခါ၌ ယုံကြည်ခြင်းဆက်၍မပြဘဲနေခြင်းအားဖြင့်လည်းကောင်း ဘုရားသခင်၏ခန္တီတော်ကိုအဘယ်မျှလောက် စုံစမ်းခဲ့ကြသည်တကား။ ဘုရားသခင်သည်မိမိနာမတော်နှင့် ဂုဏ်အသရေတော်ပတ်သက်နေသောကြောင့် သူတို့ကိုမိမိလူမျိုးတော်အဖြစ်မှ ပယ်ရှားတော်မမူခဲ့ချေ။ မှန်ပေသည်၊ ယေဟောဝါသည် မိမိ၏နာမတော်ကိုထောက်၍ စိတ်ရှည်ခြင်းကိုပြသတော်မူခဲ့သည်။—ထွက်မြောက်ရာ ၃၂:၁၀-၁၄။ တောလည်ရာ ၁၄:၁၁-၂၀။

လူသားတို့၏အကျိုးကိုထောက်၍ စိတ်ရှည်တော်မူခြင်း

၉။ နောဧလက်ထက်၌ ယေဟောဝါအဘယ်ကြောင့်စိတ်ရှည်ခြင်းပြသတော်မူခဲ့သနည်း။

^၉ အာဒံ၏နောင်လာနောက်သားများ၏အကျိုးကို အာဒံအပြစ်ပြုလုပ်ခြင်းဖြင့် နစ်နာခဲ့သည့်အချိန်မှစ၍ ယေဟောဝါသည်လူသားများ၏အကျိုးကိုထောက်၍ တစ်လျှောက်လုံးစိတ်ရှည်တော်မူလာခဲ့သည်။ ဘုရားသခင်၏စိတ်ရှည်တော်မူခြင်းကြောင့် ထိုနစ်နာမှုပြန်၍ကောင်းလာနိုင်သည့်ပြင် နောင်တတရားရသောလူသားများကို ဘုရားသခင်နှင့်ပြန်လည်သင့်မြတ်နိုင်ရန် အချိန်ရရှိစေသည်။ (ရောမ ၅:၈-၁၀) နောဧလက်ထက်မှလူသားများအပေါ်၌လည်း ယေဟောဝါဘုရားသခင်စိတ်ရှည်တော်မူခဲ့သည်။ ထိုခေတ်၌ “မြေကြီးပေါ်မှာလူအပြစ်ကြီး၍၊ သူ၏စိတ်နှလုံးအကြံအစည်ရှိသမျှတို့သည် အစဉ်မပြတ်ဆိုးညစ်ခြင်းသက်သက်ရှိကြောင်းကို [ယေဟောဝါ] မြင်တော်မူ” ၏။ (ကမ္ဘာဦး ၆:၅) ထိုအခြေအနေကိုဘုရားသခင်တွေ့လျှင်တွေ့ခြင်း လူသားမျိုးနွယ်တစ်ရပ်လုံးကို ပယ်ရှင်းပစ်နိုင်ခဲ့သော်ငြားလည်း ထိုအခြေအနေကိုနှစ်ပေါင်း ၁၂၀ အတွင်းအဆုံးသတ်ပစ်မည့်အကြောင်း ကိုယ်တော်အမိန့်တော်ချမှတ်တော်မူခဲ့သည်။ (ကမ္ဘာဦး ၆:၃) ဤသို့စိတ်ရှည်တော်မူခြင်းကြောင့် နောဧအဖို့သားသုံးယောက်ရရှိရန်အတွက်လည်းကောင်း၊ ထိုသားသုံးယောက်ကြီးပြင်း၍ အိမ်ထောင်ပြုရန်အတွက်လည်းကောင်း၊ ထိုမိသားစုဝင်တို့၏အသက်ကိုကယ်တင်ရန်နှင့် တိရစ္ဆာန်များမပျက်ပြုန်းစေရန် သင်္ဘောဆောက်ရန်အတွက်လည်းကောင်း အချိန်ရရှိခဲ့ကြသည်။ ဤနည်းအားဖြင့် မြေကြီးနှင့်ပတ်သက်သော ဘုရားသခင်မူလရည်ရွယ်ချက်အကောင်အထည်ပေါ်လာရန် အခွင့်အလမ်းရှိလာသည်။

၁၀၊ ၁၁။ ဣသရေလလူမျိုးအပေါ် ယေဟောဝါအဘယ်ကြောင့်ဤမျှစိတ်ရှည်တော်မူရသနည်း။

^၁၀ စိတ်ရှည်ခြင်း၏အနက်ဖွင့်ဆိုချက်နောက်တစ်မျိုးသည် လူမျိုးတော်နှင့်ဘုရားသခင်၏ ဆက်ဆံပုံနှင့်အထူးသက်ဆိုင်၏။ ၄င်းမှာ “ပြစ်မှားခြင်းသို့မဟုတ်အမျက်နှိုးဆော်ခြင်းကို ကြိတ်မှိတ်၍သည်းခံလျက်အဖုအထစ်ဖြစ်နေသော ဆက်ဆံရေးတိုးတက်ကောင်းမွန်လာမည်ဟူသော မျှော်လင့်ချက်ကို လက်မလျှော့ဘဲနေခြင်း” ဖြစ်သည်။ (Insight on the Scriptures) ဤအချက်က ဣသရေလလူမျိုးအပေါ် ဘုရားသခင်စိတ်ရှည်ရသည့်အကြောင်းနောက်တစ်ခုကိုညွှန်ပြသည်။ သူတို့သည်ကြိမ်ဖန်များစွာ ယေဟောဝါကိုကျောခိုင်းစွန့်ခွာပြီး လူမျိုးခြားတို့၏ကျွန်ဖြစ်ခဲ့ကြသည်။ သို့နှင့်ပင်ကိုယ်တော်သည် ဣသရေလလူမျိုးကို ကယ်တင်၍သူတို့အား နောင်တရခြင်းအခွင့်ပေးတော်မူခြင်းအားဖြင့် စိတ်ရှည်ခြင်းကိုပြသတော်မူခဲ့သည်။—တရားသူကြီး ၂:၁၆-၂၀။

^၁၁ ဣသရေလရှင်ဘုရင်အများသည် မိမိတို့၏တိုင်းသူပြည်သားတို့ကို မှောက်မှားသောကိုးကွယ်မှုပြုရန် ဦးဆောင်ခဲ့ကြသည်။ ထိုလူမျိုးကိုဘုရားသခင်တစ်ခါတည်းစွန့်ပစ်တော်မူခဲ့သလော။ မစွန့်ပစ်ခဲ့ပါ။ အဖုအထစ်ဖြစ်နေသောဆက်ဆံရေး ပြန်လည်တိုးတက်ကောင်းမွန်လာမည်ဟူသောမျှော်လင့်ချက်ကို ကိုယ်တော်လွယ်လွယ်နှင့်အလျှော့ပေးတော်မမူခဲ့ချေ။ ထိုသို့ပေးမည့်အစား ယေဟောဝါသည်အမျက်ထွက်ရန် နှေးကွေးတော်မူခဲ့သည်။ စိတ်ရှည်ရှည်ထား၍ သူတို့အားနောင်တရခွင့်အဖန်ဖန်ပေးတော်မူခဲ့သည်။ ၂ ရာဇဝင်ချုပ် ၃၆:၁၅၊ ၁၆ (သမ္မ) တွင်ဤသို့ဖတ်ရသည်။ “ဘိုးဘေးတို့၏ဘုရားသခင် [ယေဟောဝါ] သည်မိမိလူမျိုးနှင့် မိမိနေတော်မူရာဌာနကိုနှမြောသောကြောင့်၊ စောစောထ၍တမန်တို့ကို သူတို့ထံသို့အထပ်ထပ်စေလွှတ်တော်မူသော်လည်း၊ ဘုရားသခင်၏တမန်တို့ကိုသရော်၍၊ စကားတော်ကိုမထီမဲ့မြင်ပြုလျက် ပရောဖက်တို့ကိုပြောင်လှောင်သောကြောင့်၊ [ယေဟောဝါ] ၏အမျက်တော်မငြိမ်းနိုင်အောင်၊ မိမိလူမျိုးတော်အပေါ်သို့ရောက်” လေ၏။

၁၂။ ယေဟောဝါစိတ်ရှည်တော်မူရခြင်းနှင့်ပတ်သက်၍ ခရစ်ယာန်ဂရိကျမ်းပိုင်း၌ အဘယ်သက်သေခံချက်ပေးထားသနည်း။

^၁၂ ခရစ်ယာန်ဂရိကျမ်းပိုင်း၌လည်း ပြစ်မှားသောမိမိလူမျိုးကို ကူညီမစရန်အတွက် ယေဟောဝါစိတ်ရှည်ခြင်း ပြသသည့်သာဓကများဖေါ်ပြထားသည်။ ဥပမာဆိုသော်၊ တမန်တော်ပေါလုကလွန်ကျူးသောခရစ်ယာန်များအားဤသို့မေးခွန်းထုတ်ခဲ့သည်။ “ဘုရားသခင်၏ကျေးဇူးတော်သည် သင့်ကိုနောင်တလမ်းသို့သွေးဆောင်သည်ကိုမသိမမှတ်ဘဲ ကြွယ်ဝစွာကျေးဇူးပြုခြင်း၊ သည်းခံတော်မူခြင်း၊ စိတ်ရှည်တော်မူခြင်းတို့ကို မထီမဲ့မြင်ပြုသလော။” (ရောမ ၂:၄) ပေတရု၏အောက်စကားများမှာလည်း ထိုသဘောအတိုင်းပင်ဖြစ်သည်။ “လူအချို့တို့သည် နှေးခြင်းကိုမှတ်သည်အတိုင်း ထာဝရဘုရားသည်ကတိတော်အရာမှာနှေးတော်မမူ။ ငါတို့တွင်အဘယ်သူမျှမပျက်စီးဘဲ ရှိသမျှတို့သည် နောင်တရစေခြင်းငှာအလိုတော်ရှိ၍ ငါတို့ကိုသည်းခံတော်မူ၏။” (၂ ပေတရု ၃:၉) ထို့ကြောင့် “ငါတို့သခင်ဘုရားသည်းခံတော်မူခြင်းသည် ကယ်တင်မည်အကြောင်းဖြစ်သည်ဟု မှတ်ကြလော့” ဟူ၍ကျွန်ုပ်တို့ မှာကြားခံရသည်မှာ အထူးဆီလျော်လှပေသည်။ (၂ ပေတရု ၃:၁၅) သို့ဖြစ်သောကြောင့် ယေဟောဝါသည်အစွဲအလမ်းကြီးခြင်း သို့မဟုတ် လျော့ပေါ့ခြင်းကြောင့်မဟုတ်ဘဲ မိမိ၏နာမတော်နှင့်ရည်ရွယ်တော်မူချက်များ အကျုံးဝင်ပတ်သက်ခြင်းကြောင့်သော်လည်းကောင်း၊ ကရုဏာတော်နှင့်မေတ္တာတော်ကြီးမားသောကြောင့်သော်လည်းကောင်း စိတ်ရှည်တော်မူခြင်းဖြစ်ကြောင်း ကျွန်ုပ်တို့တွေ့ရသည်။

ယေရှု၏စိတ်ရှည်ခြင်းပုံသက်သေ

၁၃။ ယေရှုခရစ်တော်သည် စိတ်ရှည်တော်မူကြောင်း အဘယ်ကျမ်းစာသာဓကများရှိသနည်း။

^၁၃ စိတ်ရှည်ခြင်းဘက်တွင် ဘုရားသခင်ပြသတော်မူသည့်ပုံသက်သေပြီးလျှင် သားတော်မေရှိယ၊ ယေရှုခရစ်တော်၏ပုံသက်သေမှာ ဒုတိယဖြစ်သည်။ ကိုယ်တော်သည်အမျက်နှိုးဆွခံရစေကာမူ အလျင်စလိုလက်တုံ့ပြန်ခြင်းမပြုဘဲ ကိုယ့်ကိုယ်ကိုချုပ်တည်းနှိမ်နင်းခြင်းဘက်တွင် အထူးပြောင်မြောက်သော ပုံသက်သေဖြစ်သည်။ aဟေရှာယ၏အောက်ပါပရောဖက်စကားများ၌ မေရှိယသည်စိတ်ရှည်တော်မူမည်အကြောင်း တင်ကူးဟောပြောထားသည်။ “ထိုသူသည်ညှဉ်းဆဲခြင်းနှင့် နှိမ့်ချခြင်းကိုခံ၍ နှုတ်ကိုမဖွင့်ဘဲနေ၏။ အသေသတ်ခြင်းငှာ ဆောင်သွားသောသိုးသငယ်ကဲ့သို့ သူ့ကိုဆောင်သွား၍၊ သိုးသည်အမွေးညှပ်သောသူရှေ့မှာ မမြည်ဘဲနေသကဲ့သို့ သူသည်နှုတ်ကိုမဖွင့်ဘဲနေ၏။” (ဟေရှာယ ၅၃:၇) အောက်ပါပေတရု၏စကားကလည်း ဤအမှန်တရားကိုထောက်ခံထားသည်။ “ကဲ့ရဲ့ခြင်းကိုခံရသောအခါ ပြန်၍မကဲ့ရဲ့။ အသေခံရသောအခါ ခြိမ်းခြောက်ခြင်းကိုမပြု။ တရားသဖြင့်စီရင်တော်မူသောသူ၌ ကိုယ်ကိုယ်ကိုအပ်နှံတော်မူ၏။” (၁ ပေတရု၂:၂၃) ယေရှု၏တပည့်တော်များသည် မည်သူအကြီးမြတ်ဆုံးဖြစ်ကြောင်း အကြိမ်ကြိမ်ငြင်းခုံခြင်းအားဖြင့် ယေရှုကိုအဘယ်မျှလောက် စုံစမ်းခဲ့ကြသည်တကား။ သို့သော်သူတို့အပေါ် ကိုယ်တော်မည်မျှစိတ်ရှည်သည်းခံခဲ့သည်တကား။—မာကု ၉:၃၄။ လုကာ ၉:၄၆။ ၂၂:၂၄။

၁၄။ စိတ်ရှည်ခြင်းဆိုင်ရာ ယေရှု၏ပုံသက်သေက ကျွန်ုပ်တို့အားအဘယ်အရာပြုလုပ်ရန် စေ့ဆော်ပေးသင့်သနည်း။

^၁၄ စိတ်ရှည်ရာတွင်ယေရှုထားတော်မူသည့် ပုံသက်သေကိုကျွန်ုပ်တို့လိုက်သင့်သည်။ အောက်ပါအတိုင်းပေါလုရေးသားခဲ့သည်။ “ငါတို့မျက်မှောက်၌ထားသောပန်းတုံးတိုင်သို့ရောက်ခြင်းငှာ၊ အားမလျော့ဘဲပြေးကြကုန်အံ့။ ယုံကြည်ခြင်းကိုအစအဦးစီရင်၍ စုံလင်စေတော်မူသောသခင်ယေရှုကို စေ့စေ့ထောက်ရှုကြကုန်အံ့။ ထိုသခင်သည် မိမိရှေ့၌ထားသောဝမ်းမြောက်ခြင်းအကြောင်းကြောင့်၊ ရှက်ကြောက်သောအရာကိုမမှတ်ဘဲ လက်ဝါးကပ်တိုင်၌ခံပြီးမှ ဘုရားသခင်၏ပလ္လင်တော်လက်ယာဘက်၌ထိုင်နေတော်မူ၏။ အပြစ်ရှိသောသူတို့လက်တွင် ထိုမျှလောက်ကြီးစွာသောဆီးတားနှောင့်ယှက်ခြင်းကိုခံတော်မူသောသခင်ကို ထောက်ရှုဆင်ခြင်သောအားဖြင့် အားလျော့စိတ်ပျက်ခြင်းနှင့်ကင်းလွတ်အံ့သောငှာ ကြိုးစားကြလော့။”—ဟေဗြဲ ၁၂:၁-၃။

၁၅။ ယေရှုသည် စိတ်ရှည်၍စုံစမ်းခြင်းများကို စိတ်လိုကိုယ်လျောက်ခံယူရန် အသင့်ရှိကြောင်း ကျွန်ုပ်တို့မည်သို့သိရသနည်း။

^၁၅ ယေရှုစိတ်ရှည်တော်မူကြောင်း၊ စုံစမ်းခြင်းကိုစိတ်လိုကိုယ်လျောက်ခံယူကြောင်းကို အဖမ်းခံရချိန်၌ပြသတော်မူခဲ့သော ကိုယ်တော့်စိတ်သဘောထားမှ တွေ့မြင်နိုင်သည်။ မိမိအရှင်သခင်ကိုကာကွယ်ရန် ဓားကိုစွဲကိုင်ခြင်းအတွက် ပေတရုကိုပြစ်တင်ဆုံးမပြီးနောက် ယေရှုဤသို့မိန့်တော်မူ၏။ “ယခုပင်ငါ့အဘကို ငါတောင်းနိုင်သည်ကိုလည်းကောင်း၊ တောင်းလျှင်ကောင်းကင်တမန်တစ်ဆယ့်နှစ်တပ်မက ငါ့ထံသို့စေလွှတ်တော်မူမည်ကိုလည်းကောင်း သင်သည်မထင်သလော။ သို့ဖြစ်လျှင် ဤသို့သောအမှုအရာတို့သည်ဖြစ်ရမည်ဟူသောကျမ်းစာချက်သည် အဘယ်သို့ပြည့်စုံအံ့နည်း။”—မဿဲ ၂၆:၅၁-၅၄။ ယောဟန် ၁၈:၁၀၊ ၁၁။

ဟေဗြဲကျမ်းပိုင်းမှစိတ်ရှည်ခြင်းပုံသက်သေများ

၁၆။ ယာကုပ်၏သားယောသပ်သည် စိတ်ရှည်သူဖြစ်ကြောင်း ကျမ်းစာကမည်သို့ဖော်ပြထားသနည်း။

^၁၆ မစုံလင်သော၊ အပြစ်ရှိသောလူသားများပင်လျှင် စိတ်ရှည်ခြင်းတင်ပြနိုင်ကြသည်။ ဟေဗြဲကျမ်းပိုင်းတွင် မစုံလင်သောသူများပြစ်မှားခံရခြင်းကို စိတ်ရှည်သည်းခံခဲ့သည့်ပုံသက်သေများပါရှိသည်။ ဥပမာအားဖြင့်၊ ဟေဗြဲဘိုးဘေးယာကုပ်၏သားယောသပ်ကိုကြည့်ပါ။ ဖတူမိကွဲအစ်ကိုများနှင့် ပေါတိဖာ၏မယားတို့ကသက်ရောက်စေသည့် မတရားမှုများကို ကြိတ်မှိတ်၍ခံခဲ့ရရှာသည်။ (ကမ္ဘာဦး ၃၇:၁၈-၂၈၊ ၃၉:၁-၂၀) ယောသပ်သည် ထိုစုံစမ်းခြင်းများကြောင့် မခံချိမခံသာဖြစ်ခဲ့ပေမည်။ “သင်တို့သည် ကျွန်ုပ်ကိုဤအရပ်သို့ရောင်းလိုက်မိသောကြောင့် စိတ်မညှိုးငယ်ကြနှင့်။ ကိုယ်ကိုအမျက်မထွက်ကြနှင့်။ အကြောင်းမူကား၊ ဘုရားသခင်သည် လူတို့အသက်ကိုစောင့်မစေခြင်းငှာ သင်တို့ရှေ့မှာ ကျွန်ုပ်ကိုစေလွှတ်တော်မူပြီ” ဟူ၍အစ်ကိုဖြစ်သူတို့အားပြောဆိုရာတွင် ထိုသို့မခံချိမခံသာမဖြစ်ခဲ့ကြောင်း သိသာထင်ရှားသည်။ (ကမ္ဘာဦး ၄၅:၄၊ ၅) ယောသပ်သည် စိတ်ရှည်ခြင်းဘက်တွင် အလွန်ကောင်းသည့်ပုံသက်သေထားခဲ့သည်တကား။

၁၇၊ ၁၈။ ဒါဝိဒ်ကိစ္စ၌ အဘယ်စိတ်ရှည်သည့်သာဓကများ ကျွန်ုပ်တို့၌ရှိသနည်း။

^၁၇ ဒါဝိဒ်သည်ပြစ်မှားခြင်းကို စိတ်ရှည်ရှည်နှင့်ကြိတ်မှိတ်သည်းခံရာတွင် ပုံသက်သေပြခဲ့သော ယေဟောဝါ၏သစ္စာရှိအစေခံနောက်တစ်ယောက်ဖြစ်သည်။ အမဲလိုက်သကဲ့သို့ ရှောလု၏လိုက်လံဖမ်းဆီးခြင်းခံနေရချိန်အတွင်း ဒါဝိဒ်သည်ရှောလုကိုသတ်၍ လက်စားချေနိုင်ခွင့်နှစ်ကြိမ်ရရှိခဲ့သည်။ (၁ ဓမ္မရာဇဝင် ၂၄:၁-၂၂၊ ၂၆:၁-၂၅) သို့သော် ဒါဝိဒ်သည် ဘုရားသခင်ကိုစောင့်ဆိုင်းခဲ့၏။ အဘိရှဲကိုပြောခဲ့သည့် အောက်ပါစကားများမှ ထိုသဘောကိုတွေ့နိုင်သည်။ “[ယေဟောဝါ] အသက်ရှင်တော်မူသည်အတိုင်း [ရှောလုကို] ဒဏ်ခတ်တော်မူမည်။ သို့မဟုတ် သူသေချိန်ရောက်လိမ့်မည်။ သို့မဟုတ် စစ်တိုက်ရာ၌ အသက်ဆုံးလိမ့်မည်။ [ယေဟောဝါ] ပေးတော်မူသောဘိသိက်ခံသူကို ငါမထိခိုက်မည်အကြောင်း [ယေဟောဝါ] ဆီးတားတော်မူပါစေသော။” (၁ ဓမ္မရာဇဝင် ၂၆:၁၀၊ ၁၁) မှန်ပါသည်၊ ဒါဝိဒ်သည်ရှောလု၏လိုက်လံဖမ်းဆီးခံနေရသော မိမိ၏ဝရမ်းပြေးဘဝကို အဆုံးသတ်နိုင်သည့်အခွင့်အရေးရရှိပါလျက်နှင့် စိတ်ရှည်ခြင်းကိုသာရွေးချယ်ခဲ့သည်။

^၁၈ သစ္စာမဲ့သောသားတော် အဗရှလုံ၏ရန်မှ ရှင်ဘုရင်ဒါဝိဒ်ထွက်ပြေးတိမ်းရှောင်နေရချိန်က အဖြစ်အပျက်ကိုလည်းဆင်ခြင်သုံးသပ်ကြည့်ပါ။ ရှောလု၏အဆွေအမျိုး ဗင်ယာမိန်အနွယ်ဝင်ဖြစ်သော ရှိမိသည် ဒါဝိဒ်ကိုကျောက်ခဲနှင့်ပေါက်၍ “သွားဟဲ့၊ သွားဟဲ့၊ လူအသက်ကိုသတ်သောအဓမ္မလူ” ဟုကျိန်ဆဲ၏။ အဘိရှဲက ရှိမိကိုသတ်ပစ်ချင်သော်လည်း ဒါဝိဒ်ကလက်စားချေရန်မလိုလားခဲ့ပေ။ လက်စားချေမည့်အစား စိတ်ရှည်ခြင်းအရည်အချင်းကို ထပ်မံ၍ပြသခဲ့လေသည်။—၂ ဓမ္မရာဇဝင် ၁၆:၅-၁၃။

ပေါလု၏ပုံသက်သေကိုဆင်ခြင်သုံးသပ်ပါ

၁၉၊ ၂၀။ တမန်တော်ပေါလုက မိမိစိတ်ရှည်ကြောင်း မည်သို့ပြသခဲ့သနည်း။

^၁၉ ခရစ်ယာန်ဂရိကျမ်းပိုင်း၌ မစုံလင်သောလူသားတစ်ဦး စိတ်ရှည်ခြင်းပုံသက်သေကောင်း နောက်တစ်ခုကိုတွေ့ရသည်။ ထိုသူမှာ တမန်တော်ပေါလုဖြစ်သည်။ သူသည် ဘာသာရေးရန်သူများနှင့်ရော၊ ခရစ်ယာန်အမည်ခံပုဂ္ဂိုလ်အချို့နှင့်ပါ စိတ်ရှည်ရှည်ထား၍ ကြိတ်မှိတ်သည်းခံဆက်ဆံခဲ့သည်။ ကောရိန္သုအသင်းတော်မှအချို့သူတို့က “ထိုသူ၏စာသည် လေးလံသောစာ၊ တန်ခိုးနှင့်ပြည့်စုံသောစာဖြစ်၏။ ကိုယ်တိုင်ရှိလျှင်မူကား သတ္တိမရှိသောသူ၊ အချည်းနှီးသောစကားကိုပြောသောသူဖြစ်သည်” ဟုပြောခဲ့ကြသော်လည်း ပေါလုသည်စိတ်ရှည်ခြင်းကိုပြသခဲ့သည်။—၂ ကောရိန္သု ၁၀:၁၀။ ၁၁:၅၊ ၆၊ ၂၂-၃၃။

^၂၀ ထို့ကြောင့် ကောရိန္သုမြို့သားများအား အောက်ပါအတိုင်းပေါလုပြောခဲ့သည်မှာ ခိုင်လုံသောအကြောင်းရှိပေသည်။ “[ငါတို့သည်] ဘုရားသခင့်အမှုတော်ဆောင်များအဖြစ် အနည်းနည်းအားဖြင့် ကိုယ်ကိုထောက်ခံကြသည်မှာ ဖိစီးခြင်း၊ ညှဉ်းပန်းခြင်း၊ ရုန်းရင်းခတ်ပြုခြင်း၊ ပင်ပန်းခြင်း၊ အအိပ်ပျက်ခြင်း၊ အစားပျက်ခြင်းကိုခံရာ၌ လွန်ကဲစွာတည်ကြည်ခြင်းအားဖြင့်လည်းကောင်း၊ စင်ကြယ်ခြင်း၊ အသိပညာရှိခြင်း၊ စိတ်ရှည်ခြင်း၊ ကရုဏာပြခြင်းများဖြင့်လည်းကောင်း၊ သန့်ရှင်းသောဝိညာဉ်တော်၊ အယောင်မဆောင်သောမေတ္တ၁ . . . အားဖြင့်လည်းကောင်း ကိုယ်ကိုထောက်ခံကြသတည်း။” (၂ ကောရိန္သု ၆:၄-၆၊ သမ) အလားတူသဘောမျိုးဖြင့် တမန်တော်ပေါလုသည် လုပ်ဖော်ကိုင်ဖက်ချင်း တိမောသေထံ ဤသို့ရေးသားနိုင်ခဲ့ခြင်းဖြစ်သည်။ “သင်မူကား၊ ငါ၏သြဝါဒပေးခြင်း၊ အကျင့်ကျင့်ခြင်း၊ ကြံစည်ခြင်း၊ ယုံကြည်ခြင်း၊ စိတ်ရှည်ခြင်း၊ ချစ်ခြင်း၊ သည်းခံခြင်းများကိုလည်းကောင်း၊ . . . ညှဉ်းဆဲခြင်း၊ ဆင်းရဲခြင်းများကိုလည်းကောင်း လိုက်နာ၍နားလည်ခဲ့ရပြီ။ ထိုအမှုရှိသမျှမှလည်း အရှင်ဘုရားသည် ငါ့ကိုကယ်နှုတ်တော်မူ၏။” (၂ တိမောသေ ၃:၁၀၊ ၁၁၊ သမ္မ) စိတ်ရှည်ခြင်းဘက်တွင် တမန်တော်ပေါလုသည် ကျွန်ုပ်တို့အတွက် မည်မျှကောင်းသောပုံသက်သေထားခဲ့သည်တကား။

၂၁။ လာမည့်ဆောင်းပါးက ကျွန်ုပ်တို့အား အဘယ်အရာပြုလုပ်ရန် ကူညီပေးမည်နည်း။

^၂၁ သမ္မာကျမ်းစာစောင်များတွင် စိတ်ရှည်ခြင်းဆိုင်ရာပုံသက်သေကောင်းများစွာရှိနေသည်မှာထင်ရှားပါသည်။ ယေဟောဝါနှင့်ကိုယ်တော်ချစ်လှစွာသောသားတော်တို့သည် အမွန်မြတ်ဆုံးပုံသက်သေများဖြစ်တော်မူကြသည်။ သို့သော် ယောသပ်၊ ဒါဝိဒ်နှင့်တမန်တော်ပေါလုတို့ကဲ့သို့သော မစုံလင်သည့်လူသားများလည်း ဤအရည်အချင်းကိုတင်ပြနိုင်ကြောင်းသိရသည်မှာ မည်မျှအားရဖွယ်ရာပါတကား။ လာမည့်ဆောင်းပါးက ထိုပုံသက်သေကောင်းများကို အတုယူရန် ကျွန်ုပ်တို့အားအထောက်အကူပြုပေမည်။

[အောက်ခြေမှတ်ချက်များ]

သင်မည်သို့ဖြေမည်နည်း

▫ စိတ်ရှည်ခြင်းဆိုသည်မှာ အဘယ်အဓိပ္ပာယ်ရှိသနည်း။

▫ ယေဟောဝါသည် အဓိကအဘယ်အကြောင်းများကြောင့် စိတ်ရှည်တော်မူခြင်းဖြစ်သနည်း။

▫ ယေရှုသည် စိတ်ရှည်တော်မူကြောင်း အဘယ်နည်းများဖြင့်ပြသတော်မူသနည်း။

▫ မစုံလင်သောလူသားများလည်း စိတ်ရှည်ခြင်းပြသနိုင်ကြောင်း အဘယ်ကျမ်းစာသာဓကများရှိသနည်း။

[စာမျက်နှာ ၁၀ ပါ ရုပ်ပုံ]

ယောသပ်၊ ယေရှု၊ ဒါဝိဒ်၊ ပေါလုနှင့်ယောဘတို့သည် စိတ်ရှည်ခြင်းစံပြများဖြစ်ကြသည်

[စာမျက်နှာ ၁၂ ပါ ရုပ်ပုံ]

တပည့်တော်များအပေါ် ယေရှုစိတ်ရှည်တော်မူခဲ့၏