ယေဟောဝါနှင့်ခရစ်တော် အဓိကဆက်သွယ်သူများ

“အကယ်စင်စစ်အရှင်ထာဝရဘုရား [အချုပ်အခြာအာဏာရှင်ယေဟောဝါ၊ ] သည်မိမိကျွန်ပရောဖက်တို့အား မဖော်မပြဘဲ အဘယ်အမှုကိုမျှစီရင်တော်မမူ။”—အာမုတ် ၃:၇။NW.

၁။ ယနေ့ အဘယ်ဆက်သွယ်ရေးနည်းများကို အသုံးပြုထားသနည်း။

မျက်မှောက်အချိန်တွင် ဆက်သွယ်ရေးသည် သန်းကုဋေချီ စီးပွားရေးတစ်ခုဖြစ်နေပါသည်။ ထုတ်ဝေနေသမျှစာပေ၊ ရက်မှန်ပုံနှိပ်သော သတင်းစာနှင့်မဂ္ဂဇင်းများ၊ ထုတ်လွှင့်သည့် ရေဒီယို၊ ရုပ်မြင်သံကြားအစီအစဉ်နှင့်တကွ ရုပ်ရှင်နှင့်ဇာတ်သဘင်အပေါင်းသည် ဆက်သွယ်မှုပြုရန်အတွက်ဖြစ်သည်။ ရေးပို့သောစာများ၊ ဖုန်းဆက်စကားပြောသမျှတို့သည်လည်း ထပ်တူပင်ဖြစ်သည်။ ယင်းတို့အားလုံးမှာ ဆက်သွယ်မှုပြုရန် ကြိုးစားခြင်းသက်သက်ဖြစ်သည်။

၂။ စက်မှုပညာအရဆက်သွယ်ရေးဘက် တိုးတက်လာသည့် လူ့ကြိုးပမ်းဆောင်ရွက်မှုအချို့ကအဘယ်နည်း။

^၂ စက်မှုပညာအရဆက်သွယ်ရေးဘက် လူ့ကြိုးပမ်းဆောင်ရွက်မှုများသည် အံ့ချီးဖွယ်တိုးတက်ဖွံ့ဖြိုးနေပါသည်။ ဥပမာ၊ ကြေးနီနန်းကြိုးများထက် အဖက်ဖက်သာသော စက္ခုချည်မျှင်ကြိုးများသည် တစ်ကြိမ်တည်းတွင်ပြောဆိုသည့် တယ်လီဖုန်းဆက်သွယ်မှုသန်းပေါင်းများစွာကို ကူးလူးဆက်သွယ်ပေးနိုင်ပါသည်။ ထို့ပြင် လဟာပြင်တွင် ကမ္ဘာမြေကြီးကိုပတ်နေသော ဆက်သွယ်ရေးဂြိုဟ်တုများရှိသည်။ ၄င်းတို့တွင် တယ်လီဖုန်း၊ ကြေးနန်း၊ ရေဒီယိုနှင့်ရုပ်မြင်သံကြားအချက်ပြလှိုင်းများကို တစ်ဆင့်ခံဆက်သွယ်ပေးနိုင်ပါသည်။ ဤကဲ့သို့သောဂြိုဟ်တုတစ်လုံးသည် တစ်ချိန်တည်းတွင် တယ်လီဖုန်း ၃၀,၀၀၀ ကိုအဆက်အသွယ်ပြုလုပ်ပေးနိုင်ပါသည်။

၃။ ဆက်သွယ်ရေးပြတ်တောက်မှုများရှိလျှင် မည်သို့ဖြစ်ပျက်သနည်း။

^၃ သို့သော် ဤသို့သောကူးလူးဆက်သွယ်မှုနည်းမျိုးစုံရှိလျက်ပင် လူအချင်းချင်း ကူးလူးဆက်သွယ်မှုမရှိကြသောကြောင့် များစွာစိတ်ဆင်းရဲမှုရှိနေပါသည်။ သို့ဖြစ်၍ “အုပ်စိုးသူနှင့်အုပ်စိုးခံရသူများစပ်ကြား ‘ဆက်သွယ်ရေးကွာဟမှု’ သည် သာ၍ကျယ်ဝန်းလာနေပြီ” ဟုသိရ၏။ လူမျိုးဆက်ကွာဟမှုဆိုသည်မှာလည်း မိဘနှင့်သားသမီး ရင်းနှီးစွာဆက်သွယ်ခြင်းမရှိသောကြောင့်ဖြစ်သည်။ အိမ်ထောင်ရေးတွင် အကြီးမားဆုံးပြဿနာသည် လင်နှင့်မယားဆက်သွယ်မှုမရှိခြင်းကြောင့်ဖြစ်ကြောင်း အိမ်ထောင်ရေးအကြံပေးသူများကဆိုကြသည်။ သင့်လျော်သောဆက်သွယ်မှုမရှိခြင်းသည် လူအသက်ကိုပင်သေစေနိုင်သည်။ ၁၉၉၀ ခုနှစ်အစောပိုင်းက လူပေါင်း ၇၃ ဦးသည် လေယာဉ်ပျက်ကျ၍အသက်ဆုံးရှုံးခဲ့ကြသည်။ သို့ဖြစ်ရခြင်းကား လေယာဉ်မောင်းသူနှင့်မြေပြင်ထိန်းကွပ်ရေးစခန်းတို့စပ်ကြား ဆက်သွယ်မှုပြတ်စဲခဲ့၍ဖြစ်သည်။ သတင်းစာခေါင်းစဉ်တစ်ခုက “ဆက်သွယ်ရေးအဆင်မပြေမှုကား ကြေကွဲဖွယ်ရာဖြစ်စေသည်” ဟူ၍ကြေညာခဲ့သည်။

၄။ (က) “ဆက်သွယ်ရေး” မည်သည်အဘယ်နည်း။ (ခ) ခရစ်ယာန်ဆက်သွယ်မှု၏ပန်းတိုင်ကားအဘယ်နည်း။

^၄ ခရစ်ယာန်အသိုင်းအဝိုင်းတွင် ဆက်သွယ်ရေးကားအဘယ်နည်း။ အဘိဓာန်တစ်ခုအရ “ဆက်သွယ်မှု” သည် “ကျေနပ်ဖွယ်ဖြစ်စေ၍ လက်သင့်ခံ၊ နားလည်နိုင်ဖွယ်ရှိသည်တိုင် အကြောင်းစုံကိုလည်းကောင်း၊ စိတ်နေသဘောထားကိုလည်းကောင်း၊ ခံစားချက်ကိုလည်းကောင်း ပေါ်လွင်သိရှိစေခြင်း” ဖြစ်သည်။ အခြားအဘိဓာန်ကျမ်းတစ်ခုကား “အကြံဉာဏ်များကို ထိရောက်စွာတင်ပြပြောဆိုနိုင်သည့်နည်း” ဟုရှင်းပြပါသည်။ “အကြံဉာဏ်များကို ထိရောက်စွာတင်ပြပြောဆို” ခြင်းဟုဆိုသည်ကိုသတိပြုပါ။ အထူးသဖြင့် ခရစ်ယာန်ဆက်သွယ်မှုသည် ထိရောက်ရမည်။ အကြောင်းမှာ ဆက်သွယ်မှုပြုသည့်ရည်ရွယ်ချက်ကား လူတို့၏နှလုံးသားကို ဘုရားသခင့်နှုတ်ကပါဌ်တော်သမ္မာတရားဖြင့်ထိမိစေရန်၊ သူတို့သင်ယူသည့်အတိုင်းပြုကျင့်ရန်မျှော်လင့်၍ဖြစ်သည်။ ယင်းသို့ပြုရခြင်းကား ကိုယ်ကျိုးမပါ မေတ္တာရှေ့ရှု၍ဖြစ်သည်ကား ထူးခြားလှပေသည်။

ကူးလူးဆက်သွယ်သူ ယေဟောဝါ

၅။ လူနှင့်ယေဟောဝါဘုရားသခင်ဆက်သွယ်သည့် ပထမနည်းလမ်းကားအဘယ်နည်း။

^၅ အကြီးဆုံးကူးလူးဆက်သွယ်ရှင်ကား ယေဟောဝါဘုရားသခင်ဖြစ်သည်မှာ သံသယရှိစရာမလိုချေ။ ကျွန်ုပ်တို့ကိုကိုယ်တော်၏ပုံသဏ္ဌာန်တော်နှင့်အညီဖန်ဆင်းထားသဖြင့် ကျွန်ုပ်တို့နှင့်ကိုယ်တော်ဆက်သွယ်နိုင်ပေသည်။ ကိုယ်တော်အကြောင်းလည်း သူတစ်ပါးအားတင်ပြပြောဆိုနိုင်ကြပါသည်။ လူကိုဖန်ဆင်းစဉ်ကတည်းက မြေကြီးသတ္တဝါများနှင့် ယေဟောဝါကူးလူးဆက်သွယ်တော်မူခဲ့သည်။ ယင်းသို့ကိုယ်တော်ပြုသည့်နည်းတစ်နည်းကား မျက်မြင်ရဖန်ဆင်းခြင်းအားဖြင့်ဖြစ်သည်။ သို့ဖြစ်၍ ဆာလံဆရာဤသို့ဆိုသည်။ “မိုးကောင်းကင်သည် ဘုရားသခင်၏ဘုန်းအသရေတော်ကိုကြားပြော၍ မိုးမျက်နှာကြက်သည် လက်တော်နှင့်လုပ်သောအရာများကိုပြသ၏။ တစ်နေ့ကိုတစ်နေ့မြွက်ဆို၍ တစ်ညကိုတစ်ည သွန်သင်၏။” (ဆာလံ ၁၉:၁၊ ၂) “မျက်မြင်မရသော ဘုရားသခင်၏အရာတို့သည် ကမ္ဘာတည်သည်ကာလမှစ၍ထင်ရှားလျက်ရှိကြ၏” ဟုရောမ ၁:၂၀ ကဆိုသည်။ “ထင်ရှားလျက်ရှိခြင်း” ကား အမှန်ပင်ထိရောက်သောဆက်သွယ်မှုဖြစ်သည်ကိုညွှန်ပြသည်။

၆။ ဧဒင်ဥယျာဉ်တွင်ရှိစဉ် မြေကြီးသတ္တဝါများနှင့်ဆက်သွယ်၍ အဘယ်အရာကိုယေဟောဝါသိစေတော်မူသနည်း။

^၆ ဘုရားသခင်နှင့်ကိုယ်တော်၏အမိန့်တော်များကို မယုံကြည်လက်မခံနိုင်သူများက လူသည် အဘယ်ကြောင့်အသက်ရှင်ရသည်ကို ကိုယ့်နည်းကိုယ့်ဟန်ဖြင့် အဖြေရှာယူရမည်ဟုဆိုကြပေမည်။ သို့သော် အစကနဦးကတည်းက လူနှင့်ဘုရားသခင်ဆက်သွယ်ခဲ့ကြောင်း ဘုရားသခင်၏နှုတ်ကပါဌ်တော်၌ရှင်းလင်းစွာဖော်ပြထားသည်။ သို့ဖြစ်၍ ပထမလူယောက်ျားနှင့်မိန်းမအား မျိုးပွားရန်ပညတ်ကိုဘုရားပေးတော်မူခဲ့သည်။ “များပြားစွာမွေးဖွားကြလော့။ မြေကြီးကိုပြည့်စေ၍ နိုင်ကြလော့။ အသက်ရှင် . . . သောတိရစ္ဆာန်အပေါင်းတို့ကိုအုပ်စိုးကြလော့။” အပင်တစ်ပင်မှတစ်ပါး ဥယျာဉ်ရှိအပင်အားလုံး၏အသီးများကို ဝစွာစားသုံးခွင့်လည်း သူတို့အားပေးတော်မူခဲ့သည်။ သို့သော် အာဒံနှင့်ဧဝနားမထောင်ကြသောအခါ မေရှိယနှင့်ဆိုင်သော ပထမကတိတော်ကို ယေဟောဝါသိကြားစေခြင်းဖြင့် လူသားရှေ့မျှော်လင့်ချက်ရောင်ခြည်ပေါ်ပေါက်စေတော်မူသည်။ “သင်နှင့်မိန်းမကိုလည်းကောင်း၊ သင်၏အမျိုးအနွယ်နှင့် မိန်းမ၏အမျိုးအနွယ်ကိုလည်းကောင်း ငါသည်ရန်ငြိုးဖွဲ့စေမည်။ သူသည် သင်၏ခေါင်းကိုကြိတ်လိမ့်မည်၊ သင်သည် သူ၏ဖနောင့်ကိုကြိတ်လိမ့်မည်။”—ကမ္ဘာဦး ၁:၂၈။ ၂:၁၆၊ ၁၇။ ၃:၁၅။

၇။ ကိုယ်တော်၏ကျေးကျွန်များနှင့်ယေဟောဝါဆက်သွယ်ခြင်းအကြောင်း ကမ္ဘာဦးကျမ်းက ဘာဖော်ပြသနည်း။

^၇ အာဒံ၏သား ကာဣနသည် လူအသက်သတ်ချင်စိတ်ရှိသည်တိုင် မနာလိုနေသောအခါ ယေဟောဝါသည် သူနှင့်ဆက်သွယ်၍ ‘သတိယူ။ သင်ဒုက္ခရောက်မည်’ ဟုတစ်နည်းအားဖြင့်သတိပေးတော်မူသည်။ သို့သော် ထိုသတိပေးစကားများကို ကာဣနအမှုမထားဘဲ သူ့ညီကိုသတ်ပစ်ခဲ့သည်။ (ကမ္ဘာဦး ၄:၆-၈) ထိုနောက် ကမ္ဘာသည် အဓမ္မမှု၊ ဆိုးသွမ်းမှုနှင့်ပြည့်နှက်လာသောအခါ ကမ္ဘာကိုညစ်ညူးစေသောအရာခပ်သိမ်းကို ရှင်းပစ်မည်ဟု ဖြောင့်မတ်သူနောဧမှတစ်ဆင့် ကိုယ်တော်၏ရည်ရွယ်ချက်ကိုအသိပေးတော်မူခဲ့သည်။ (ကမ္ဘာဦး ၆:၁၃–၇:၅) ရေလွှမ်းမိုးဘေးပြီးနောက် သင်္ဘောအထဲက နောဧနှင့်သူ၏မိသားစုထွက်လာကြသောအခါ အသက်နှင့်အသွေး၏မြင့်မြတ်မှုနှင့်စပ်လျဉ်းသော ကိုယ်တော်၏ရည်ရွယ်ချက်ကို သူတို့အား ယေဟောဝါသိနားလည်စေတော်မူခဲ့သည်။ သက်ရှိအပေါင်းတို့ကို ရေလွှမ်းမိုးခြင်းအားဖြင့် နောက်တစ်ဖန်ဖျက်ဆီးတော့မည်မဟုတ်ကြောင်း သက်တံ့အားဖြင့်လည်း ကိုယ်တော်အာမခံတော်မူခဲ့သည်။ ရာစုနှစ်အတန်ကြာကုန်လွန်ပြီးနောက် အာဗြဟံ၏မျိုးနွယ်အားဖြင့် လူသားအပေါင်းတို့ကို ကိုယ်တော်ကောင်းချီးပေးရန်ရည်ရွယ်တော်မူကြောင်း အာဗြဟံမှတစ်ဆင့် ယေဟောဝါအကြောင်းကြားတော်မူခဲ့သည်။ (ကမ္ဘာဦး ၉:၁-၁၇။ ၁၂:၁-၃။ ၂၂:၁၁၊ ၁၂၊ ၁၆-၁၈) ညစ်ညူးသော သောဒုံနှင့်ဂေါမောရသားတို့ကို ဖျက်ဆီးတော်မူမည်အကြောင်း အာဗြဟံအားမိန့်တော်မူစဉ် “ငါပြုမည်အမှုကို အာဗြဟံအားမဖော်မပြဘဲ ဝှက်ထားရမည်လော” ဟူ၍မေတ္တာရှိစွာဆက်သွယ်တော်မူခဲ့သည်။—ကမ္ဘာဦး ၁၈:၁၇။

၈။ ကမ္ဘာပေါ်ရှိကျေးကျွန်များနှင့် အဘယ်နည်းလေးမျိုးဖြင့် ယေဟောဝါဆက်သွယ်ခဲ့သနည်း။

^၈ မောရှေမှစတင်၍ ဣသရေလလူမျိုးနှင့်အဆက်အသွယ်ပြုရန် ပရောဖက်ပေါင်းများစွာကို ယေဟောဝါအဆက်မပြတ်အသုံးပြုတော်မူခဲ့သည်။ (ဟေဗြဲ ၁:၁) မောရှေအား “ဤစကားများကိုရေးထားလော့” ဟူ၍ဆင့်ဆိုသကဲ့သို့ တစ်ခါတစ်ရံ နှုတ်တိုက်ဆင့်ဆိုတော်မူသည်။ (ထွက်မြောက်ရာ ၃၄:၂၇) အာဗြဟံနှင့်ကိုယ်တော်ဆက်သွယ်ခဲ့သည့်နည်းအတိုင်းပင် မိမိကိုယ်စားလှယ်တော်များကိုရူပါရုံအားဖြင့်မကြာခဏ ယေဟောဝါဆက်သွယ်တော်မူသည်။aလူတို့နှင့်ဆက်သွယ်ရာတွင် အိပ်မက်များကိုလည်း ယေဟောဝါအသုံးပြုတော်မူ၏။ ကိုယ်တော်၏ကျေးကျွန်များကိုသာမဟုတ်ဘဲ ကျေးကျွန်တော်တို့နှင့်ဆက်ဆံရသူတို့ကိုလည်း အိပ်မက်မြင်စေတော်မူသည်။ ဥပမာ၊ ယောသပ်၏အကျဉ်းကျဖော်တို့အား အိပ်မက်မြင်စေတော်မူပြီး ယင်းကိုယောသပ်အားအနက်ဖွင့်စေသည်။ ဖာရောနှင့်နေဗုခဒ်နေဇာတို့အားလည်း အိပ်မက်မြင်စေခဲ့ပြီး ကျေးကျွန်ယောသပ်နှင့်ဒံယေလတို့ကား အနက်ဖွင့်ပြခွင့်ရရှိခဲ့သည်။ (ကမ္ဘာဦး ၄၀:၈–၄၁:၃၂။ ဒံယေလ အခန်းကြီး ၂ နှင့် ၄) ထို့ပြင် ကျေးကျွန်များနှင့်ဆက်သွယ်ရာတွင် ကောင်းကင်တမန်များကို ယေဟောဝါကြိမ်ဖန်များစွာအသုံးပြုတော်မူခဲ့သည်။—ထွက်မြောက်ရာ ၃:၂။ တရားသူကြီး ၆:၁၁။ မဿဲ ၁:၂၀။ လုကာ ၁:၂၆။

၉။ ကိုယ်တော်၏အဘယ်မိန့်တော်မူချက်များအရ ဣသရေလလူမျိုးတော်နှင့်ယေဟောဝါဆက်သွယ်ရန် ဘာကလှုံ့ဆော်ပေးခဲ့သနည်း။

^၉ ပရောဖက်များမှတစ်ဆင့် ယေဟောဝါဆက်သွယ်ခဲ့ခြင်းကား ကိုယ်တော်၏ဣသရေလလူမျိုးကို ယေဟောဝါချစ်မြတ်နိုးတော်မူကြောင်း ထင်ရှားစေသည်။ ပရောဖက်ယေဇကျေလအားဖြင့် ဤသို့မိန့်တော်မူသည်။ “ဆိုးသောသူသည် မိမိဆိုးသောလမ်းမှလွှဲ၍ အသက်ရှင်ခြင်းအမှုကိုသာငါနှစ်သက်၏။ အိုဣသရေလအမျိုးသားတို့ သင်တို့လိုက်သောလမ်းဆိုးမှ လွှဲကြလော့။ လွှဲကြလော့။ အဘယ်ကြောင့်အသေခံလိုကြသနည်း။” (ယေဇကျေလ ၃၃:၁၁) ၂ ရာဇဝင်ချုပ် ၃၆:၁၅၊ ၁၆ တင်ပြသည်အတိုင်း ယေဟောဝါရှင်သည် ပုန်ကန်သောရှေးလူမျိုးတော်အပေါ် စိတ်ရှည်စွာသည်းခံဆက်သွယ်တော်မူကြောင်း ထင်ရှားသည်။ “ဘိုးဘေးတို့၏ဘုရားသခင် ထာဝရဘုရား [ယေဟောဝါ၊ NW] သည်မိမိလူမျိုးနှင့်မိမိနေတော်မူရာအရပ်ကိုသနားသောကြောင့် . . . အထပ်ထပ်စေလွှတ်သောတမန်တို့အားဖြင့် မှာလိုက်တော်မူသော်လည်း ဘုရားသခင်၏တမန်တို့ကိုပြက်ရယ်ပြု၍ အမိန့်တော်ကိုနားမထောင် . . . သောကြောင့် အမျက်တော်မငြိမ်းနိုင်” ပေ။

၁၀။ ယနေ့ မိမိလူမျိုးနှင့်ယေဟောဝါမည်သို့ဆက်သွယ်သနည်း။ ကိုယ်တော်သည် အဘယ်အတိုင်းအတာထိ ကူးလူးဆက်သွယ်သောဘုရားဖြစ်သနည်း။

^၁၀ ယနေ့ ကိုယ်တော်အကြောင်း၊ ရည်ရွယ်တော်မူချက်များနှင့်အလိုတော်အကြောင်း ကျွန်ုပ်တို့အားသိရှိစေရန် ကျွန်ုပ်တို့သည် ကိုယ်တော်၏မှုတ်သွင်းခံနှုတ်ကပါဌ်တော် သမ္မာကျမ်းစာကိုရရှိထားကြပြီ။ (၂ တိမောသေ ၃:၁၆၊ ၁၇) အမှန်မှာ ကြီးမြတ်တော်မူသောကူးလူးဆက်သွယ်ရှင်အဖြစ် ယေဟောဝါဤသို့မိန့်တော်မူသည်။ “အကယ်စင်စစ် အရှင်ထာဝရဘုရား [ယေဟောဝါ၊ NW] သည်မိမိကျွန်ပရောဖက်တို့အား မဖော်မပြဘဲ အဘယ်အမှုကိုမျှစီရင်တော်မမူ။” (အာမုတ် ၃:၇) ကိုယ်တော်၏ရည်ရွယ်တော်မူချက်များကို ကျေးကျွန်များအား ဖော်ပြသည်။

ကူးလူးဆက်သွယ်သူ ဘုရားသခင်၏သားတော်

၁၁။ လူနှင့်ဆက်သွယ်ရာတွင် ယေဟောဝါအဓိကအသုံးပြုသူကား မည်သူနည်း။ “နှုတ်ကပါဌ်တော်” ဟူသောကိုယ်တော်၏ဘွဲ့နာမသည် အဘယ်ကြောင့်လျောက်ပတ်သနည်း။

^၁၁ ကိုယ်တော်၏အလိုတော်ကိုတင်ပြပေးရန် ယေဟောဝါအသုံးပြုသောကိုယ်စားလှယ်များအနက် အဓိကပုဂ္ဂိုလ်မှာ ယေရှုခရစ်ဖြစ်လာသူ နှုတ်ကပါဌ်တော်၊ လိုဂေါ့စ်ဖြစ်သည်။ နှုတ်ကပါဌ်တော် သို့မဟုတ် လိုဂေါ့စ်ဟုအမည်ရခြင်းကဘာကိုရည်ညွှန်းသနည်း။ ကိုယ်တော်သည် ယေဟောဝါ၏အဓိကပြောရေးဆိုခွင့်ရှိသူဖြစ်သောကြောင့်တည်း။ ပြောရေးဆိုခွင့်ရှိသူဆိုသည်ကား အဘယ်နည်း။ အခြားတစ်ဦး၏လိုအပ်ရာကို တင်ပြပြောဆိုသူဖြစ်သည်။ ယင်းကြောင့် လိုဂေါ့စ်သည် အသိဉာဏ်ရှိသောမြေကြီးသတ္တဝါများအား ယေဟောဝါဘုရား၏နှုတ်ကပါဌ်တော်ကို ဖော်ပြပေးသူဖြစ်လာလေသည်။ ထိုတာဝန်သည် အရေးကြီးလွန်းသဖြင့် ကိုယ်တော်အား နှုတ်ကပါဌ်တော်ဟုခေါ်ဝေါ်လေသည်။—ယောဟန် ၁:၁၊ ၂၊ ၁၄။

၁၂။ (က) အဘယ်ရည်ရွယ်ချက်ကိုဖြည့်စွက်ရန် ကမ္ဘာပေါ်သို့ယေရှုကြွလာတော်မူသနည်း။ (ခ) ထိုရည်ရွယ်ချက်ကို ကိုယ်တော်သစ္စာရှိရှိဖြည့်စွက်ခဲ့ကြောင်း အဘယ်အရာကသက်သေထူသနည်း။

^၁၂ ကမ္ဘာပေါ်သို့လာရသည့် အဓိကရည်ရွယ်ချက်မှာ လူသားတို့အား သမ္မာတရားကိုတင်ပြပေးရန်အတွက်ဖြစ်ကြောင်း ပုန္တိပိလတ်အား ယေရှု ဤသို့ဆိုသည်။ “သမ္မာတရားဘက်၌သက်သေခံခြင်းငှာ ငါသည် မွေးဖွားခြင်းကိုခံ၍ ဤလောကသို့ကြွလာပြီ။” (ယောဟန် ၁၈:၃၇) ထိုတာဝန်ကိုမည်မျှကျေပွန်စွာဆောင်ရွက်ခဲ့ကြောင်း ခရစ်ဝင်ကျမ်းများက မှတ်တမ်းတင်ထားသည်။ ကိုယ်တော်၏တောင်ပေါ်ဒေသနာကို လူတို့အားဟောသမျှတရားတွင် အကောင်းဆုံးသောဒေသနာအဖြစ် အသိအမှတ်ပြုထားကြသည်။ ထိုဒေသနာမှတစ်ဆင့် ကိုယ်တော်ကောင်းစွာဆက်သွယ်ခဲ့သည်တကား။ “အဆုံး၌ [ကြားနာခဲ့သော] ပရိသတ်အပေါင်းတို့သည် ဆုံးမသြဝါဒပေးတော်မူခြင်းကို လွန်စွာအံ့သြကြ၏။” (မဿဲ ၇:၂၈) အခြားတစ်ချိန်အကြောင်း ဤသို့ဖတ်ရသည်။ “လူများအပေါင်းတို့သည် အားရဝမ်းမြောက်သောစိတ်နှင့် စကားတော်ကိုနားထောင်ကြ၏။” (မာကု ၁၂:၃၇) ယေရှုကိုဖမ်းဆီးရန် စေလွှတ်ခံရသောအရာရှိအချို့တို့သည် ကိုယ်တော်မပါဘဲ ပြန်သွားကြ၏။ အဘယ်ကြောင့်နည်း။ ဖာရိရှဲတို့အား သူတို့က “ထိုသူဟောပြောသကဲ့သို့ အဘယ်သူမျှမဟောစဖူးပါ” ဟုလျှောက်ကြ၏။—ယောဟန် ၇:၄၆။

ဆက်သွယ်ပေးသူများဖြစ်ရန် ခရစ်တော်၏တပည့်များတာဝန်ရထား

၁၃။ တစ်ဦးတည်းသောဆက်သွယ်ပေးသူဖြစ်ရန် ခရစ်တော်မရည်ရွယ်ကြောင်း အဘယ်အရာကတင်ပြသနည်း။

^၁၃ မိမိသာလျှင်ဆက်သွယ်ပေးသူမဖြစ်လိုသဖြင့် ယေရှုသည် ဦးစွာ တမန်တော် ၁၂ ပါး၊ ထိုနောက် ဧဝံဂေလိဟောသူ ၇၀ တို့အား နိုင်ငံတော်သတင်းကောင်းဟောပြောဖို့အတွက် စေလွှတ်တော်မူသည်။ (လုကာ ၉:၁။ ၁၀:၁) ထိုနောက် ကောင်းကင်သို့မတက်ကြွမီအချိန်တွင်ပင် အထူးတာဝန်တစ်ခုကိုဆောင်ရွက်ရန် တပည့်တော်များအားသူတာဝန်အပ်နှင်းခဲ့သည်။ အဘယ်တာဝန်နည်း။ မဿဲ ၂၈:၁၉၊ ၂၀ တွင်ကျွန်ုပ်တို့ဖတ်ရသည့်အတိုင်း သူတို့အားဆက်သွယ်ပေးသူများဖြစ်ကြရန် ကိုယ်တော်သွန်သင်ပေးခဲ့သည်။ ထပ်ဆင့်၍ သူတို့ကလည်း အခြားသူများအား ဆက်သွယ်ပေးသူများဖြစ်ကြရန် သွန်သင်ပေးကြရမည်ဖြစ်သည်။

၁၄။ ရှေးခေတ်ခရစ်ယာန်ဆက်သွယ်သူများ မည်မျှတိုင်ထိရောက်ခဲ့သနည်း။

^၁၄ တပည့်တော်များသည် ထိရောက်စွာဆက်သွယ်ပေးခဲ့သူများလော။ အမှန်ပင်ထိရောက်သည်။ စီအီး ၃၃ ပင်တေကုတ္တေပွဲနေ့တွင် သူတို့၏ဟောပြောခြင်းကြောင့် တည်ထောင်ခါစခရစ်ယာန်အသင်းတော်သစ်သို့ အသင်းသား ၃၀၀၀ တိုးများလာသည်။ မကြာမီပင် အမျိုးသား ၅၀၀၀ တိုးလာပြန်သည်။ (တမန်တော် ၂:၄၁။ ၄:၄) ယင်းကြောင့်လည်း ယေရုရှလင်မြို့ကို သူတို့၏အယူဝါဒနှင့်ပြည့်စေသည်၊ နောင်တစ်ကြိမ်တွင် သူတို့ဟောပြောခြင်းဖြင့် လောကီနိုင်ငံကိုမှောက်လှန်သည်ဟု သူတို့၏ဂျူးရန်သူများ စွပ်စွဲခဲ့ကြခြင်းသည် အံ့ဩစရာမဟုတ်ပေ။—တမန်တော် ၅:၂၈။ ၁၇:၆။

၁၅။ လူတို့နှင့်ဆက်သွယ်ရန် မျက်မှောက်ခေတ်တွင် ယေဟောဝါအဘယ်လူစုကိုအသုံးပြုတော်မူသနည်း။

^၁၅ မျက်မှောက်ခေတ်တွင်ကော။ မဿဲ ၂၄:၃၊ ၄၅-၄၇ တွင်ကြိုတင်ဟောထားသည့်အတိုင်းပင် သခင်ယေရှုခရစ်သည် ဘိသိက်ခံခရစ်ယာန်များဖြင့်ဖွဲ့စည်းထားသော “သစ္စာနှင့်သတိပညာရှိကျေးကျွန်” ကိုခန့်အပ်ထားပါသည်။ ဤသူတို့ကား ကိုယ်တော်ရောက်ရှိနေချိန်တွင် ကမ္ဘာပေါ်ရှိ ကိုယ်တော့်ဥစ္စာရှိသမျှတို့ကို စောင့်ရှောက်ပေးရန်တာဝန်ရှိသည်။ ထိုသစ္စာနှင့်သတိပညာရှိကျေးကျွန်ကို ယနေ့ ယေဟောဝါသက်သေများ၏အုပ်ချုပ်ရေးအဖွဲ့က ကိုယ်စားပြုသည်။ ကင်းမျှော်စင်ကျမ်းစာနှင့်ဝေစာအသင်းမှာ ပြည်သူလူထုသိအပ်ရာတို့ကိုသိစေသည့်ကိုယ်စားလှယ်ဖြစ်သည်။ ထိုသစ္စာသမာဓိရှိကျေးကျွန်ကို ဘုရားသခင်၏ဆက်သွယ်ရေးလမ်းကြောင်းဟူ၍လည်း လျောက်ပတ်စွာခေါ်ဆိုထားပြီ။ ကျွန်ုပ်တို့လည်း ကောင်းစွာဆက်သွယ်ပေးသူများဖြစ်ကြရန် ယင်းကတိုက်တွန်းထားသည်။ အမှန်မှာ ဤပထမစာစောင်တွင်ပင် စာရှုသူများအားဤသို့မှာကြားထားသည်။ “သင့်အိမ်နီးချင်းသို့မဟုတ်မိတ်ဆွေတစ်ဦးသည် ဤ [မဂ္ဂဇင်းပါ] ညွှန်ကြားချက်များကြောင့် အကျိုးခံစားရမည်ဟုယူမှတ်လျှင် ယင်းကို သူတို့အားတင်ပြပါ။ ဤနည်းဖြင့် အခွင့်အရေးရတိုင်း နှုတ်ကပါဌ်တော်ကိုဟောပြောပြီး လူတို့အားအကျိုးပြုပါ။”

၁၆။ မြေကြီးပေါ်ရှိကျေးကျွန်များနှင့် ထိရောက်စွာဆက်သွယ်ရန် ကျမ်းစာဖတ်ရုံဖြင့်မလုံလောက်ကြောင်း အဘယ်အရာကတင်ပြသနည်း။

^၁၆ သို့ရာတွင် ဘုရားသခင့်နှုတ်ကပါဌ်တော်ကိုရရှိထားပြီး ကိုယ်တိုင်ဖတ်ရှုရုံဖြင့် အသက်လမ်းပေါ်လျှောက်စေသည့် မှန်သောအသိပညာကိုရရန် လုံလောက်မည်မဟုတ်ပါ။ ဟေရှာယပရောဖက်ပြုချက်ကိုဖတ်ရှုနေသော်လည်း နားမလည်ခဲ့သော အဲသရောပိအမတ်ကိုသတိရပါ။ ဧဝံဂေလိတရားဟောသူ ဖိလိပ္ပုက ပရောဖက်ပြုချက်ကိုသူ့အားရှင်းပြခဲ့သည်။ ထိုနောက် ခရစ်တော်၏တပည့်တစ်ဦးအဖြစ် နှစ်ခြင်းယူရန် သူအသင့်ရှိနေသည်။ (တမန်တော် ၈:၂၇-၃၈) မိမိဘာသာ ကျမ်းစာကိုဖတ်ရှုရုံထက်မကလိုအပ်ကြောင်း ဧဖက် ၄:၁၁-၁၃ တင်ပြသည်။ ထိုတွင် ပေါလုပြောသည်ကား ခရစ်တော်သည် အချို့ကိုမှုတ်သွင်းခံတမန်တော်များ၊ ပရောဖက်များဖြစ်စေရုံမက ‘ခရစ်တော်၏ကိုယ်တော်ကိုတည်ဆောက်၍ ဓမ္မအမှုကိုပြုတတ်မည်အကြောင်း သန့်ရှင်းသူတို့ကို ပြင်ဆင်ခြင်းအလိုငှာ အချို့တို့ကို ဧဝံဂေလိတရားဟောသူအရာ၊ အချို့တို့ကို သိုးထိန်းအရာ၊ ဆရာအရာ၌ခန့်တော်မူပြီ။ ငါတို့ရှိသမျှသည် ယုံကြည်ခြင်းသို့လည်းကောင်း၊ ဘုရားသခင်၏သားတော်ကိုသိကျွမ်းခြင်းသို့လည်းကောင်း၊ တညီတညွတ်တည်းရောက်၍ ခရစ်တော်၏ပြည့်စုံခြင်းပမာဏအရပ်တည်းဟူသော ကြီးရင့်သောလူအဖြစ်သို့ရောက်ကြသည်တိုင်အောင်’ အတွက်ဟုဆိုသည်။

၁၇။ လူတို့အား ကိုယ်တော်၏ရည်ရွယ်တော်မူချက်များကိုကြားသိစေရန် ယေဟောဝါအသုံးပြုနေသောအဖွဲ့ကို အဘယ်နည်းဖြင့်မှတ်သားနိုင်မည်နည်း။

^၁၇ ကြီးရင့်သောလူအဖြစ်သို့ရောက်ကြသည်တိုင် ခရစ်ယာန်များကိုကူညီပေးမည့်သူများအဖြစ် ယေဟောဝါဘုရားသခင်နှင့်ယေရှုခရစ်အသုံးပြုနေတော်မူသောသူများသည် မည်သူများဖြစ်ကြောင်း မည်သို့သိနိုင်မည်နည်း။ ယေရှုပြောသည့်အမှတ်အသားတစ်ခုမှာ ဤသူတို့သည် တပည့်တော်များကိုခရစ်တော်ချစ်သကဲ့သို့အချင်းချင်းချစ်ကြလိမ့်မည်။ (ယောဟန် ၁၃:၃၄၊ ၃၅) အခြားအမှတ်အသားတစ်ခုမှာ ယေရှုသည် ဤလောကနှင့်မစပ်ဆိုင်သကဲ့သို့ သူတို့လည်း စပ်ဆိုင်လိမ့်မည်မဟုတ်ပါ။ (ယောဟန် ၁၅:၁၉။ ၁၇:၁၆) ထပ်ဆင့်အမှတ်အသားကား ယေရှုနည်းတူ ဘုရားသခင်၏နှုတ်ကပါဌ်တော်ကို သမ္မာတရားအဖြစ်အသိအမှတ်ပြုကာ မိမိစကားကိုထောက်ခံပေးရန် ယင်းကိုအမြဲအသုံးပြုခြင်းဖြစ်သည်။ (မဿဲ ၂၂:၂၉။ ယောဟန် ၁၇:၁၇) ယေရှုကဲ့သို့ပင် ဘုရားသခင်၏နာမတော်ကိုရှေ့ဦးထားခြင်းသည်လည်း အမှတ်အသားနောက်တစ်ခုဖြစ်သည်။ (မဿဲ ၆:၉။ ယောဟန် ၁၇:၆) ထပ်ဆင့်အမှတ်အသားတစ်ခုရှိသေးသည်ကား ယေရှုပုံသက်သေအရ ဘုရားသခင်၏နိုင်ငံတော်သတင်းကောင်းကို ဟောပြောခြင်းဖြစ်သည်။ (မဿဲ ၄:၁၇။ ၂၄:၁၄) ဤလိုအပ်ချက်များကိုဖြည့်စွက်ပေးနိုင်သည့်လူစုတစ်စုတည်းသာရှိ၍ ၄င်းကား ယေဟောဝါ၏ခရစ်ယာန်သက်သေများဟုအမည်ရထားသော အပြည်ပြည်ဆိုင်ရာဆက်သွယ်ပေးသူများဖြစ်ကြသည်။

၁၈။ အဘယ်ဆက်သွယ်ရေးကဏ္ဍသုံးခုအကြောင်း နောက်ဆက်တွဲဆောင်းပါးများတွင် ဆွေးနွေးတင်ပြမည်နည်း။

^၁၈ သို့ရာတွင် ဆက်သွယ်ပေးခြင်းကား သူတစ်ထူးအပေါ်တာဝန်ရှိခြင်းကိုတင်ပြသည်။ ခရစ်ယာန်များသည် မည်သူတို့ထံဆက်သွယ်ရန်တာဝန်ရှိသနည်း။ ဆက်သွယ်ရေးလမ်းကြောင်း အစဉ်ပွင့်နေရန် ခရစ်ယာန်များဂရုစိုက်ရမည့်ကဏ္ဍသုံးခုရှိသည်။ မိသားစုအတွင်း၊ ခရစ်ယာန်အသင်းတော်အတွင်းနှင့် ခရစ်ယာန်လယ်ကွင်းဓမ္မအမှုတွင်ဖြစ်သည်။ နောက်ဆက်တွဲဆောင်းပါးများက ကျွန်ုပ်တို့ဆွေးနွေးနေသော ဤကဏ္ဍများနှင့်သက်ဆိုင်လိမ့်မည်။

သင်မည်သို့ဖြေမည်နည်း

▫ ဆက်သွယ်မှုမရှိခြင်းမှ အဘယ်အန္တရာယ်ရှိနိုင်မည်နည်း။

▫ အဓိကဆက်သွယ်ပေးသူနှစ်ဦးကား မည်သူတို့နည်း။

▫ လူတို့နှင့်ဆက်သွယ်ရန် အဘယ်နည်းအမျိုးမျိုးကို ဘုရားသခင်အသုံးပြုတော်မူခဲ့သနည်း။

▫ ဆက်သွယ်သူတစ်ဦးအနေနှင့် ယေရှုမည်သို့ထူးချွန်သနည်း။

▫ ဆက်သွယ်ရေးတွင် ရှေးခရစ်ယာန်များမည်မျှထိတိုင် အောင်မြင်ခဲ့သနည်း။

[အောက်ခြေမှတ်ချက်များ]

[စာမျက်နှာ ၁၅ ပါ ရုပ်ပုံ]

ကောင်းကင်ခမည်းတော်နည်းတူ ယေရှုသည်မေတ္တာရှိသော ဆက်သွယ်ပေးသူဖြစ်