ခရစ္စမတ်သည် သင့်အတွက် အဘယ်အဓိပ္ပာယ်ရှိသနည်း

သင်မည်သို့ဖြေဆိုမည်နည်း။ ခရစ္စမတ်သည် (၁) သင့်မိသားစုနှင့်စုဆုံပေါင်းစည်းသည့် အခါသမယ တစ်ခုဖြစ်သည်; (၂) ပါတီပွဲများအတွက် အခါသမယတစ်ခုဖြစ်သည်; (၃) ဘာသာရေးဆိုင်ရာ အခါသမယတစ်ခုဖြစ်သည်; (၄) ဖိစီးမှု အခါသမယတစ်ခုဖြစ်သည်; (၅) တမ်းတမ်းတတဖြစ်ရမည့် အခါသမယတစ်ခုဖြစ်သည်; (၆) ပြောင်ပြောင်တင်းတင်း စီးပွားရေးအမြတ်ထုတ်ရမည့် အခါသမယတစ်ခုဖြစ်သည်။

အံ့သြစရာဖြစ်ပုံရသော်လည်း ဗြိတိန်တွင် လူ ၁,၀၀၀ ကျော်တို့ကို စစ်တမ်းကောက်ယူခဲ့ရာ ၆ ရာခိုင်နှုန်းသာလျှင် ခရစ္စမတ်ကို ဘာသာရေးဆိုင်ရာ အခါသမယအဖြစ် ထင်မှတ်ကြသည်။ ဆန့်ကျင်ဘက်အနေနှင့် ၄၈ ရာခိုင်နှုန်းသည် ခရစ္စမတ်ကို မိသားစုနှင့် စုဆုံပေါင်းစည်းသည့် အခါသမယဖြစ်သည်ဟူသော သဘောထားလွှမ်းမိုးနေသည်။ အမှန်အားဖြင့် လူများစွာတို့က ကလေးများအတွက် အထူးအခါသမယဖြစ်ကြောင်း အခိုင်အမာပြောဆိုကြသည်။ နမူနာအနေနှင့် ၁၁ နှစ်အရွယ် လုံမလေးတစ်ဦးကို ခရစ္စမတ်နှင့်ပတ်သက်၍ အကြိုက်ဆုံးဟာဘာလဲဟု မေးမြန်းသောအခါ “စိတ်လှုပ်ရှားမှု၊ ပျော်ရွှင်မှုခံစားရခြင်း၊ [နှင့်] လက်ဆောင်များပေးခြင်း” ဟု ဖြေခဲ့သည်။ “‘ရိုးရာ’ ခရစ္စမတ် . . . နှင့်ပတ်သက်၍ အလေးအနက်အထားဆုံးများမှာ အိမ်၊ မိသားစုနှင့် အထူးသဖြင့် ကလေးများအပေါ်ဖြစ်ကြောင်း သံသယဖြစ်စရာမရှိပါ” ဟု ခေတ်သစ်ခရစ္စမတ်ပွဲပြုလုပ်ပုံက ဝန်ခံသည်။

သို့သော် အထူးသဖြင့်အနောက်တိုင်းခရစ်ယာန်ဘောင်တွင် ခရစ္စမတ်သည် ဆွေမျိုးသားချင်းများ လက်ဆောင်များကို လှဲလှယ်ရန် စုဆုံကြသောမိသားစုရေးဆိုင်ရာအခါသမယဖြစ်သည်။ အရှေ့တိုင်းသြသဒေါက်စ်ချာ့ချ် ဩဇာလွှမ်းမိုးသောနိုင်ငံများတွင် လူများသည် အီစတာကို ပို၍အလေးအနက်ထားကြသည်; သို့တစေ၊ ခရစ္စမတ်အချိန်သည် အားလပ်အပန်းဖြေချိန်တစ်ခု ဖြစ်ဆဲပင်။

“စီးပွားရေးလုပ်ငန်း” တစ်ခု

ခရစ္စမတ်သည် “ထင်ထင်ပေါ်ပေါ် . . . စီးပွားရေးအမြတ်ထုတ်သည့်ပွဲတစ်ခုဖြစ်လာသည်” ဟု ဗြိတဲန်နစ်ကာစွယ်စုံကျမ်းသစ်ကဖော်ပြသည်။ မည်သည့်နေရာ၌မျှ ဂျပန်နိုင်ငံထက် ယင်းအချက်ပို၍မှန်ကန်နိုင်ဖွယ်မရှိပါ။

“ဂျပန်လူမျိုးများသည် ဘာသာရေးအရေခြုံမှုအားလုံးကို စွန့်လွှတ်ပြီး ခရစ္စမတ်ကို သဲသဲမဲမဲ စီးပွားရေးလှုပ်ရှားမှုအသွင်သို့ ပြောင်းခဲ့ကြပြီ” ဟု ဝါရှင်တန် Daily Record က သတင်းပို့သည်။ ယင်းကဆက်ပြောသည်မှာ ဂျပန်နိုင်ငံတွင်ရှိ ခရစ္စမတ်သည် “စီးပွားရေးအမြတ်ထုတ်မှုပေါ်တွင် အလေးအနက်ထားသည့် အဓိက အခမ်းအနားကြီးတစ်ခုဖြစ်ပြီး ဘာသာရေးအသွင်အပြင်အပေါ်တွင်မူ ပေါ့ပေါ့တန်တန်သဘောထားကြသည်။”

ခရစ်ယာန်နိုင်ငံများဟု အခေါ်ခံသည့် နိုင်ငံများစွာ၌ပင် ဤ “ဘာသာရေးအသွင်အပြင်” ကို တွေ့မြင်ရန် ခက်ခဲလေ့ရှိသည်။ လွန်ခဲ့သောနှစ်ပေါင်း ၄၀ ခန့်တွင် ခရစ္စမတ်ဆန့်ကျင်ရေး စာစောင်ငယ်တစ်ခုက ဤသို့မြည်တမ်းခဲ့သည်–“ခရစ္စမတ်ကို စီးပွားရေးလောကက တွန်းအားပေးခဲ့သည်။ ယင်းသည် နှစ်၏ အကြီးကျယ်ဆုံး ငွေရှာသည့်ရာသီဖြစ်သည်။ ခရစ်ယာန်အမည်ခံထားသည့် စီးပွားရေးသမားများသည် ခရစ္စမတ်ရာသီကို မျှော်လင့်ကြခြင်းမှာ ခရစ်တော်အတွက်ကြောင့်မဟုတ်ဘဲ ငွေကြေးအမြတ်အစွန်းအတွက်ကြောင့်ဖြစ်သည်။” ဤစကားများသည် ယနေ့မည်မျှမှန်ကန်လိုက်လေခြင်း! နိုင်ငံများစွာတွင် နှစ်၏နောက်ဆုံးသုံးလပိုင်းမှစ၍ ခရစ္စမတ်အတွက် လက်ဆောင်များဝယ်ရန် ရက်ပေါင်းမည်မျှသာကျန်တော့ကြောင်း သတိပေးနိုးဆော်ချက်များကို ကြားရလေ့ရှိသည်။ နှစ်ကုန်လာသည်နှင့်အမျှ စီးပွားရေးမှာ လှုပ်လှုပ်ရွရွဖြစ်လာပြီး စတိုးဆိုင်များ၏ နှစ်ပတ်လည်ရောင်းရငွေ၏ လေးပုံတစ်ပုံသည် ခရစ္စမတ်အချိန်တွင် ဖြစ်သည်။

ခရစ္စမတ်သည် ယခုတွင် သင့်အတွက် မည်သို့ပင်ရှိစေကာမူ ယင်းစတင်လာပုံကို သင်ကောင်းစွာသိလိုပေမည်။ အမှန်အားဖြင့် ခရစ္စမတ်လက်ဆောင်ပေးခြင်းကို ကျမ်းစာကထောက်ခံပါသလော။ ယနေ့ ခရစ္စမတ်အခမ်းအနားများသည် အမှန်ပင် ခရစ်ယာန်ဆန်သလော။ ကြည့်ကြစို့။

[Picture Credit Line on page 2]

Cover: Thomas Nast/​Dover Publications, Inc., 1978