ပြန်လည်တည်ထောင်ထားသော “ပြည်တော်” တွင် အတူတကွနေထိုင်သူများ

“သင်တို့မူကား ယေဟောဝါ၏ယဇ်ပုရောဟိတ်ဟူ၍လည်းကောင်း၊ ငါတို့ဘုရားသခင်၏အမှုတော်ထမ်းဟူ၍လည်းကောင်း သမုတ်ခြင်းကို ခံရကြလိမ့်မည်။”—ဟေရှာယ ၆၁:၆၊ ကဘ။

၁၊ ၂။ (က) ဣသရေလနိုင်ငံတွင် ဘာသာဝင်များ၏အခြေအနေကား အဘယ်နည်း။ (ခ) မျက်မှောက်အချိန်တွင် “လူအုပ်ကြီး” အဝင်ဖြစ်သူများသည် အဘယ်စိတ်ဓာတ်တင်ပြခဲ့ပြီနည်း။

ရှေးအချိန်က ဣသရေလလူမျိုးသည် သစ္စာရှိစဉ်တွင် ကမ္ဘာ့ဇာတ်ခုံပေါ် ယေဟောဝါ၏ဘုန်းကိုသက်သေခံသူများ ဖြစ်ခဲ့ကြသည်။ (ဟေရှာယ ၄၁:၈၊ ၉; ၄၃:၁၀) တစ်ပါးအမျိုးသား မြောက်မြားစွာတို့သည် လက်ခံနာယူကာ ယေဟောဝါ၏ရွေးချယ်ထားသောလူမျိုးနှင့်အတူ ကိုယ်တော်ကိုကိုးကွယ်ဝတ်ပြုကြသည်။ အမှန်အားဖြင့်ဆိုလျှင် နောမိအား ရုသ ပြောဆိုခဲ့သည့်အတိုင်း သူတို့သည် ဣသရေလလူမျိုးအား ပြောဆိုသည်– “ကိုယ်တော်အမျိုးသည် ကျွန်မအမျိုး၊ ကိုယ်တော်ဘုရားသည် ကျွန်မဘုရားဖြစ်ပါစေ။” (ရုသ ၁:၁၆) သူတို့သည် ပညတ်ပဋိညာဉ်၏ စည်းကမ်းချက်များကို လိုက်နာကြပြီး ယောက်ျားများသည် အရေဖျားလှီးခံခဲ့သည်။ (ထွက်မြောက်ရာ ၁၂:၄၃-၄၈) မိန်းမအချို့တို့သည် ဣသရေလယောက်ျားတို့ကို ထိမ်းမြားခဲ့သည်။ ယေရိခေါမြို့သူ ရာခပ်နှင့် မောဘအမျိုးသမီး ရုသတို့သည် ယေရှုခရစ်တော်၏ ဘွားအေများဖြစ်ခဲ့ကြသည်။ (မဿဲ ၁:၅) ဤသို့သောဘာသာဝင်များသည် ဣသရေလပရိသတ်အဝင်ဖြစ်လာကြသည်။—တရားဟောရာ ၂၃:၇၊ ၈။

^၂ ဣသရေလနိုင်ငံရှိ ဘာသာဝင်များနည်းတူ ယနေ့ “လူအုပ်ကြီး” သည် ဘိသိက်ခံအကြွင်းအကျန်အား ဤသို့ပြောဆိုခဲ့ပြီ– “ဘုရားသခင်သည် သင်နှင့်အတူရှိတော်မူသည်ဟု အကျွန်ုပ်တို့သည် ကြားသိ၍ သင်တို့နှင့်အတူ လိုက်ပါမည်။” (ဗျာဒိတ် ၇:၉; ဇာခရိ ၈:၂၃) ဤဘိသိက်ခံခရစ်ယာန်များသည် ယေဟောဝါ၏ “သစ္စာနှင့်သတိပညာရှိသောကျွန်” ဖြစ်သည်ဟူ၍ သူတို့အသိအမှတ်ပြုကြသည်။ သူတို့သည် အလွန်ရင်းနှီးစွာ ပူးပေါင်းလုပ်ဆောင်ကြသဖြင့် ဘိသိက်ခံနှင့် “အခြားသိုး” သည် “သိုးခြံတစ်ခု၊ သိုးထိန်းတစ်ပါး” တည်းဖြစ်ကြ၏။ (မဿဲ ၂၄:၄၅-၄၇၊ သမ; ယောဟန် ၁၀:၁၆) သူတို့၏ဘိသိက်ခံညီအစ်ကိုအားလုံးတို့သည် ကောင်းကင်ဆုကျေးဇူးကို ခံယူရကြသည့်အခါ လူအုပ်ကြီးသည် မည်သို့ဖြစ်မည်နည်း။ စိုးရိမ်စရာမရှိပါ။ ဤ “နောက်ဆုံးကာလ” တစ်လျှောက် ထိုအချိန်အခါအတွက် ယေဟောဝါသည် အသင့်ပြင်ဆင်ထားတော်မူပြီ။—၂ တိမောသေ ၃:၁။

ဝိညာဏ “ပြည်တော်”

၃။ ပေတရု ပရောဖက်ပြုသော “မိုးကောင်းကင်သစ်” ကားအဘယ်နည်း။ ၎င်းကို အဘယ်အချိန်က တည်ထောင်ခဲ့သနည်း။

^၃ ဘိသိက်ခံခရစ်ယာန် ၁၄၄,၀၀၀ ပါဝင်မည့် ကောင်းကင်အုပ်ချုပ်ရေးအစီအစဉ်ကို တမန်တော်ပေတရုက ကြိုတင်ပရောဖက်ပြုထားသည်။ သူက ဤသို့ဆိုသည်– “ဖြောင့်မတ်ခြင်းတရားတည်နေရာ မိုးကောင်းကင်သစ်နှင့် မြေကြီးသစ်ကို ငါတို့သည် ကတိတော်နှင့်အညီ မျှော်လင့်ကြ၏။” (၂ ပေတရု ၃:၁၃) ခရစ်တော်သည် ကောင်းကင်နိုင်ငံတော်ဘုရင်အဖြစ် နန်းတင်ခံခဲ့ရချိန် ၁၉၁၄ ခုနှစ်တွင် ဤ “မိုးကောင်းကင်သစ်” ကို တည်ထောင်ခဲ့သည်။ သို့သော် “မြေကြီးသစ်” ကကော၊ အဘယ်သို့နည်း။

၄။ (က) ၁၉၁၉ ခုနှစ်တွင် အဘယ်မမျှော်လင့်ထားသော အဖြစ်အပျက်တစ်ခု ဖြစ်ပျက်ခဲ့သနည်း။ (ခ) ‘တစ်ပြိုင်နက်တည်းဖွားတတ်သော လူမျိုးတစ်မျိုး’ ကား အဘယ်နည်း။ ‘သားဖွားခြင်းဝေဒနာဖြင့် ဖွားသောပြည်တော်’ ကား အဘယ်နည်း။

^၄ ၁၉၁၉ ခုနှစ်တွင် မဟာဗာဗုလုန်၏ချုပ်နှောင်မှုအောက်မှ ဘိသိက်ခံအကြွင်းအကျန်ကို ယေဟောဝါကယ်နုတ်တော်မူခဲ့သည်။ (ဗျာဒိတ် ၁၈:၄) ခရစ်ယာန်ဘောင်ခေါင်းဆောင်များသည် ဤထူးခြားသောအဖြစ်အပျက်ကို လုံးဝမမျှော်လင့်ခဲ့ပါ။ ယင်းအကြောင်းနှင့်စပ်လျဉ်း၍ သမ္မာကျမ်းစာက ဤသို့ဆိုသည်– “ထိုသို့သောအမှုကို အဘယ်သူကြားဖူးသနည်း။ ထိုသို့သောအမှုတို့ကို အဘယ်သူသည် မြင်ဖူးသနည်း။ ပြည်တော်ကို သားဖွားခြင်းဝေဒနာဖြင့် တစ်နေ့ခြင်းတွင် ဖွားတတ်သလော။ လူမျိုးတစ်မျိုးကို တစ်ပြိုင်နက်တည်းဖွားတတ်သလော။” (ဟေရှာယ ၆၆:၈၊ ကဘ) ဘိသိက်ခံအသင်းတော်သည် တိုင်းနိုင်ငံများရှေ့လွတ်မြောက်လာသောလူမျိုးတစ်မျိုးအဖြစ် ရုတ်တရက်ဖြစ်ပေါ်လာသောအခါ ယင်းသည် “တစ်ပြိုင်နက်တည်းဖွား” သောလူမျိုးတစ်မျိုး အမှန်ပင်ဖြစ်လာပါသည်။ သို့သော် “ပြည်တော်” ကားအဘယ်နည်း။ တစ်နည်းအားဖြင့်ဆိုလျှင် ယင်းသည် ရှေးဣသရေလလူမျိုးပြည်တော်၏ ဝိညာဏတူညီချက်ဖြစ်သည်။ ယင်းသည် ဖွားခါစ “လူမျိုး” ၏လှုပ်ရှားခွင့်ရှိနယ်ပယ်၊ ဟေရှာယအနာဂတ္တိကျမ်းပါ ပရဒိသုနှင့်ဆိုင်သော ပရောဖက်ပြုချက်များ မျက်မှောက်အချိန်တွင် ဝိညာဏသဘောအရ ပြည့်စုံနိုင်သော နယ်ပယ်ဖြစ်သည်။ (ဟေရှာယ ၃၂:၁၆-၂၀; ၃၅:၁-၇; ဟေဗြဲ ၁၂:၁၂-၁၄ နှိုင်းယှဉ်။) ကာယသဘောအရ ခရစ်ယာန်တစ်ဦးသည် မည်သည့်နေရာ၌ပင်ရှိစေကာမူ သူသည် ထို “ပြည်တော်” တွင်ရှိသည်။

၅။ ၁၉၁၉ ခုနှစ်တွင် အဘယ်မဏ္ဍိုင်သည် ထင်ရှားပီပြင်လာသနည်း။ ရှင်းပြပါ။

^၅ ယင်းသည် ပေတရုပရောဖက်ပြုထားသော “မြေကြီးသစ်” နှင့် မည်သို့သက်ဆိုင်သနည်း။ ဤသို့ဖြစ်သည်။ ၁၉၁၉ ခုနှစ်တွင် ပြန်လည်တည်ထောင်ထားသော “ပြည်တော်” ၌ဖွားသည့် ထို “လူမျိုး” အသစ်သည် ယေဟောဝါအား ချီးမွမ်းထောမနာပြုသူ ဘိသိက်ခံများနှင့် ဘိသိက်ခံမဟုတ်သူတို့ဖြင့်ဖွဲ့ထားသော ကမ္ဘာချီအဖွဲ့အစည်းတစ်ခုအဖြစ်သို့ ကြီးထွားတိုးတက်လာရမည်ဖြစ်သည်။ ဤအဖွဲ့အစည်းသည် အာမဂေဒုန်ကပ်ကိုကျော်ပြီး ဘုရားသခင်၏ကမ္ဘာသစ်ထဲသို့ဝင်မည်ဖြစ်သည်။ ဤနည်းအားဖြင့် စာတန်၏လောကပျက်စီးပြီးနောက်တည်ရှိမည့် ဖြောင့်မတ်သောလူ့အဖွဲ့အစည်း၏မဏ္ဍိုင်အနေနှင့်မြေကြီးသစ်အဖြစ် ထိုလူမျိုးအား ယူမှတ်နိုင်မည်ဖြစ်သည်။a ၁၉၃၀ ပြည့်လွန်နှစ်များအလယ်လောက်တွင် ဘိသိက်ခံသူတို့သည် အုပ်စုလိုက်အနေနှင့် ထိုပြန်လည်တည်ထောင်သောပြည်တော်တွင် စုသိမ်းခံရပြီဖြစ်သည်။ ယနေ့ ငါးသန်းနီးပါးရှိနေသော အခြားသိုးမှလူအုပ်ကြီးအား ထိုအချိန်ကတည်းက အရေးပေးစုသိမ်းနေသည်။ (ဗျာဒိတ် ၁၄:၁၅၊ ၁၆) “ပြည်တော်” တွင် လူဦးရေအလွန်များနေပါသလော။ မများပါ။ ယင်း၏နယ်နိမိတ်တို့ကို လိုအပ်သလို အကျယ်ချဲ့ပေးနိုင်ပါသည်။ (ဟေရှာယ ၂၆:၁၅) အမှန်မှာ၊ ဘိသိက်ခံအကြွင်းအကျန်သည် “ပြည်တော်” တွင် “အသီး”—ကျန်းခံ့အားပြည့်ဖြိုးစေသောဝိညာဏအစာ—နှင့်ပြည့်နေစေရာ ယင်း၏လူဦးရေ တိုးပွားများပြားလာသည်ကိုတွေ့ရှိရ၍ ဝမ်းသာအားရစရာဖြစ်ကြရသည်။ (ဟေရှာယ ၂၇:၆) သို့သော် ဘုရားသခင့်လူမျိုး၏ ပြန်လည်တည်ထောင်ထားသော “ပြည်တော်” တွင် ဤအခြားသိုးတို့၏အခြေအနေကား အဘယ်နည်း။

“ပြည်တော်” ရှိတက်ကြွလှုပ်ရှားသော ဧည့်သည်အာဂန္တုများ

၆။ ဘုရားသခင့်လူမျိုး၏ “ပြည်တော်တွင်” တစ်ကျွန်းတစ်နိုင်ငံသားတို့သည် မည်သို့တက်ကြွလှုပ်ရှားလာသနည်း။

^၆ ဣသရေလပြည်၌ ဘာသာဝင်များသည် မောရှေ၏ပညတ္တိကျမ်းစာကို လိုက်နာကျင့်သုံးကြသည်နည်းတူ ယနေ့ပြန်လည်တည်ထောင်ထားသော “ပြည်တော်” တွင်ရှိ လူအုပ်ကြီးသည် ယေဟောဝါ၏မိန့်မှာချက်များကို နာခံကြပါသည်။ ဘိသိက်ခံညီအစ်ကိုများ၏ သွန်သင်ပို့ချမှုကို ခံရကြ၍ သူတို့သည် မှောက်မှားသောဝတ်ပြုရေးရှိရှိသမျှကို ကြဉ်ရှောင်ပြီး အသွေး၏မြင့်မြတ်မှုကို တန်ဖိုးထားလေးမြတ်ကြသည်။ (တမန်တော် ၁၅:၁၉၊ ၂၀; ဂလာတိ ၅:၁၉၊ ၂၀; ကောလောသဲ ၃:၅) သူတို့သည် ယေဟောဝါကို စိတ်နှလုံးအကြွင်းမဲ့၊ စိုးလ်ရှိသမျှ၊ ခွန်အားရှိသမျှနှင့် ချစ်မြတ်နိုးပြီး ကိုယ်နှင့်စပ်ဆိုင်သူကိုလည်း ကိုယ်နှင့်အမျှ ချစ်ကြသည်။ (မဿဲ ၂၂:၃၇; ယာကုပ် ၂:၈) ရှေးဣသရေလလူမျိုးတွင် ဘာသာဝင်များသည် ရှောလမုန်၏ဗိမာန်တော်ဆောက်လုပ်ရေးတွင် ပါဝင်ကူညီပြီး စစ်မှန်သောဝတ်ပြုရေး ပြန်လည်ထူထောင်ခြင်းကို ထောက်ခံခဲ့ကြသည်။ (၁ ရာဇဝင်ချုပ် ၂၂:၂; ၂ ရာဇဝင်ချုပ် ၁၅:၈-၁၄; ၃၀:၂၅) ယနေ့ လူအုပ်ကြီးသည် ဆောက်လုပ်ရေးစီမံကိန်းများတွင်လည်း ပါဝင်ကြသည်။ ဥပမာ၊ အသင်းတော်များနှင့် တိုက်နယ်များကို တည်ထောင်ပြုစုခြင်းအပြင် ဘုရားသခင့်နိုင်ငံတော်ခန်းမများ၊ စည်းဝေးပွဲခန်းမများနှင့် ဌာနခွဲအဆောက်အအုံများ အစရှိသည့် အရေးပါသောဆောက်လုပ်ရေးစီမံကိန်းများ၌ ပါဝင်ကူညီပေးကြသည်။

၇။ ပြည်နှင်ခံဘဝမှပြန်လာပြီးနောက် ယေရုရှလင်မြို့တွင် ဗိမာန်တော်လုပ်ငန်းများကို ထမ်းဆောင်မည့် လေဝိသား အလုံအလောက်မရှိသောအခါ မည်သို့ပြုလုပ်ကြသနည်း။

^၇ ဘီ. စီ. အီး. ၅၃၇ ခုနှစ်၊ ဗာဗုလုန်နိုင်ငံတွင် ပြည်နှင်ခံရသောအဖြစ်မှ ဣသရေလလူမျိုး ပြန်ရောက်လာသောအခါ ပြန်ပြုပြင်ဆောက်လုပ်သောဗိမာန်တော်၌ အမှုထမ်းရန် သူတို့စီမံခန့်ခွဲကြသည်။ သို့ရာတွင် ပြန်လာသောလေဝိသားများအရေအတွက်သည် အလွန်နည်းပါသည်။ သို့ဖြစ်သောကြောင့် နက်သနင်—ယခင်က လေဝိသားများကို အကူအညီပေးခဲ့သော အရေဖျားလှီးခံသူ ဧည့်သည်အာဂန္တုများ—တို့ကို ဗိမာန်တော်လုပ်ငန်းဆောင်တာများ၌အခွင့်အရေး ထပ်တိုးပေးခဲ့ရသည်။ သို့ရာတွင် သူတို့သည် အာရုန်အနွယ်မှဆင်းသက်သော ဘိသိက်ခံယဇ်ပုရောဟိတ်များနှင့် တန်းတူညီတူဖြစ်သူများ မဟုတ်ကြပါ။b—ဧဇရ ၇:၂၄; ၈:၁၅-၂၀; နေဟမိ ၃:၂၂-၂၆။

၈၊ ၉။ နောက်ဆုံးကာလအတွင်း အခြားသိုးသည် မြင့်မြတ်သောလုပ်ငန်းတော်ဆောင်ရွက်ခြင်းအမှုကို မည်သို့တိုး၍ တာဝန်ယူခဲ့ရသနည်း။

^၈ ယနေ့ ဘိသိက်ခံခရစ်ယာန်များသည် ဤပုံစံအတိုင်း ပြုမူဆောင်ရွက်ခဲ့ပြီ။ “နောက်ဆုံးကာလ” သည် ကြာရှည်လေ ဘုရားသခင့်လူမျိုး၏ “ပြည်တော်” တွင် ဘိသိက်ခံအကြွင်းအကျန်၏အရေအတွက်သည် လျော့နည်းသည်ထက် လျော့နည်းလာလေပြီဖြစ်သည်။ (ဒံယေလ ၁၂:၉; ဗျာဒိတ် ၁၂:၁၇) ယင်းကြောင့် ယခု “ဘုရားဝတ်” ကို လူအုပ်ကြီးက အများဆုံးတာဝန်ယူ ဆောင်ရွက်နေပါသည်။ (ဗျာဒိတ် ၇:၁၅) ဘိသိက်ခံညီအစ်ကိုများ၏ဦးဆောင်လမ်းညွှန်မှုကိုလိုက်၍ သူတို့သည် “နာမတော်ကို လူအများရှေ့ဝန်ခံရာနှုတ်ခမ်းအသီးတည်းဟူသော ချီးမွမ်းခြင်းယဇ်ကို . . . ဘုရားသခင်ထံ အစဉ်မပြတ်ပူဇော်ဆက်ကပ်ကြ” သည်။ သူတို့သည် “အခြားသူတို့အားကျေးဇူးပြုခြင်း၊ ဥစ္စာဝေမျှခြင်းအမှုတို့ကို မမေ့မလျော့” ကြပါ။ “ထိုသို့သောယဇ်ကို ဘုရားသခင်သည် အားရနှစ်သက်တော်မူ” ကြောင်းကို သူတို့သိထားကြသည်။—ဟေဗြဲ ၁၃:၁၅၊ ၁၆၊ ကဘ။

^၉ ထို့ပြင် နှစ်စဉ်ပင် လူအုပ်ကြီး၏အရေအတွက်သည် ထောင်ပေါင်းများစွာ တိုးများလာနေသောကြောင့် ကြီးကြပ်ကွပ်ကဲပေးဖို့ရန်အကြောင်းသည် တိုးများလာနေပါသည်။ တစ်ချိန်တစ်ခါက ယင်းအမှုကို ဘိသိက်ခံခရစ်ယာန်များသာ တာဝန်ယူဆောင်ရွက်ခဲ့ကြသည်။ ယခုမူကား အသင်းတော်အများစုနှင့် တိုက်နယ်၊ ခရိုင်နှင့် ဌာနခွဲများကို အခြားသိုးတို့က တာဝန်ယူ ကြီးကြပ်ကွပ်ကဲပေးစေရန် အကြောင်းပေါ်လာပါသည်။ ၁၉၉၂ ခုနှစ်တွင် အုပ်ချုပ်ရေးအဖွဲ့၏ ကော်မတီအစည်းအဝေးများကို ထိုသူတို့မှ အချို့သောသူများအား တက်ရောက်ခွင့်ပေးပြီး မဲမပေးသည့်ကူညီသူများအဖြစ် အမှုထမ်းခဲ့ကြရသည်။ သို့ပြုခွင့်ရသည့်တိုင် အခြားသိုးတို့သည် မိမိတို့၏ဘိသိက်ခံခရစ်ယာန်ချင်းတို့အား သစ္စာရှိပြီး ယေဟောဝါ၏သစ္စာနှင့်သတိပညာရှိသောကျွန်အဖြစ် သူတို့အား ထောက်မကူညီပေးခွင့်ရခြင်းကို တန်ဖိုးထားမြတ်နိုးကြသည်။—မဿဲ ၂၅:၃၄-၄၀။

“ဗိုလ်မင်းကဲ့သို့ ဖြစ်လိမ့်မည်”

၁၀၊ ၁၁။ ဖိလိတ္တိလူမျိုး၏ပုံစံအတိုင်း တစ်ချိန်က ဘုရားသခင့်လူမျိုး၏ရန်သူအချို့သည် မည်သို့စိတ်ပြောင်းလဲလာခဲ့သနည်း။ အဘယ်အကျိုးရလဒ် ဖြစ်ထွန်းသနည်း။

^၁၀ သစ္စာနှင့်သတိပညာရှိသောကျွန်သည် အခြားသိုးကို တာဝန်အပ်နှင်းမည်အကြောင်း ဇာခရိ ၉:၆၊ ၇ (ကဘ) က ပရောဖက်ပြုထားပါသည်။ ထိုတွင် ဤသို့ဖတ်ရ၏– “ဖိလိတ္တိအမျိုး၏မာနကိုလည်း ငါချိုးဖဲ့မည်။ သူစားသောအသွေးကို သူ၏ပါးစပ်ထဲမှလည်းကောင်း၊ သူကိုက်သောရွံရှာဖွယ်တို့ကို သူ၏သွားကြားမှလည်းကောင်း ငါနုတ်ပယ်မည်။ ကျန်ကြွင်းသောသူသည်လည်း ငါတို့ဘုရားသခင်အဖို့ ကျန်ကြွင်း၍ ယုဒပြည်၌ ဗိုလ်မင်းကဲ့သို့ နေလိမ့်မည်။ ဧကြုန်မြို့သားလည်း ယေဗုသိလူကဲ့သို့ ဖြစ်လိမ့်မည်။”cယနေ့ စာတန်၏လောကနည်းတူပင် ဖိလိတ္တိလူမျိုးသည် ယေဟောဝါလူမျိုး၏ ဥဒါန်းမကျေသောရန်သူဖြစ်သည်။ (၁ ယောဟန် ၅:၁၉) နောက်ဆုံးတွင် ဖိလိတ္တိလူမျိုးအနေနှင့် ဖျက်ဆီးခံခဲ့ရသည်နည်းတူ ဤလောကကြီးနှင့်ယင်း၏ ဘာသာရေး၊ နိုင်ငံရေးနှင့် စီးပွားရေးအစိတ်အပိုင်းများပါအပါအဝင် တို့သည် ယေဟောဝါ၏ဖျက်ဆီးခြင်းခံရာ အမျက်ဒေါသကို မကြာမီခံစားရတော့မည်ဖြစ်သည်။—ဗျာဒိတ် ၁၈:၂၁; ၁၉:၁၉-၂၁။

^၁၁ သို့ရာတွင် ဇာခရိပြောသည့်အတိုင်းဆိုလျှင် ဖိလိတ္တိလူအချို့သည် စိတ်ပြောင်းလဲလာသည်။ ယင်းက ယနေ့ လောကီသားအချို့သည် ယေဟောဝါအပေါ် ရန်ငြိုးဆက်ထားမည်မဟုတ်ကြောင်းကို ပုံဆောင်ပါသည်။ ဤသူတို့သည် ဘာသာရေးအရုပ်ကိုးကွယ်ခြင်းနှင့်တကွ ရွံရှာဖွယ်ထုံးတမ်းများ၊ စက်ဆုပ်ဖွယ် ယဇ်ပူဇော်သကာများကို စွန့်ပစ်ရပ်စဲပြီး ယေဟောဝါ၏မျက်မှောက်တော်တွင် သန့်ရှင်းလာကြမည်ဖြစ်သည်။ ကျွန်ုပ်တို့ခေတ်တွင် ဤကဲ့သို့သော ပြုပြင်ပြောင်းလဲလာသည့် “ဖိလိတ္တိလူများ” ကို လူအုပ်ကြီးအတွင်း တွေ့ရှိရပါသည်။

၁၂။ မျက်မှောက်ခေတ်တွင် “ဧကြုန်မြို့သည်” အဘယ်နည်းဖြင့် “ယေဗုသိကဲ့သို့ဖြစ်” လာသနည်း။

^၁၂ ပရောဖက်ပြုချက်အရ ဖိလိတ္တိမြို့တော် ဧကြုန်မြို့သည် “ယေဗုသိကဲ့သို့ဖြစ်လိမ့်မည်။” ယေဗုသိလူတို့သည်လည်း တစ်ချိန်က ဣသရေလလူမျိုး၏ ရန်သူများဖြစ်ခဲ့ဖူးသည်။ ယေရုရှလင်မြို့ကို ဒါဝိဒ်မသိမ်းပိုက်မီ ထိုမြို့တော်ကို သူတို့ပိုင်ဆိုင်ခဲ့သည်။ မည်သို့ဆိုစေကာမူ ဣသရေလလူမျိုးနှင့်တိုက်ခိုက်ခဲ့သောစစ်များတွင် အသက်ချမ်းသာရရှိသူအချို့သည် ဘာသာဝင်များဖြစ်လာပုံရှိသည်။ ဤသူတို့သည် ဣသရေလနိုင်ငံတွင် ကျွန်များအဖြစ် အမှုထမ်းခဲ့ကြကာ ဗိမာန်တော်ဆောက်လုပ်ရေးတွင်ပင် ပါဝင်ခွင့်ရရှိခဲ့ကြသည်။ (၂ ဓမ္မရာဇဝင် ၅:၄-၉; ၂ ရာဇဝင်ချုပ် ၈:၁-၁၈) ယနေ့ ယေဟောဝါကိုဝတ်ပြုကိုးကွယ်လာကြသော “ဧကြုန်မြို့သား” များလည်း သစ္စာနှင့်သတိပညာရှိသောကျွန်၏ ဦးစီးကွပ်ကဲမှုအောက်ရှိ “ပြည်တော်” တွင် အမှုတော်ထမ်းခွင့်ရရှိကြသည်။

၁၃။ ရှေးခေတ်ဗိုလ်မင်းများကား အဘယ်နည်း။

^၁၃ ဖိလိတ္တိပြည်သားသည် ယုဒပြည်၌ ဗိုလ်မင်းကဲ့သို့ဖြစ်မည်ဟု ဇာခရိက ဆိုသည်။ ဟေဗြဲစကားလုံး အဲလွပ်ကို “ဗိုလ်မင်း” ဟုဘာသာပြန်ဆိုသည့်အခါ “တစ်ထောင်အုပ်” (သို့မဟုတ်၊ “စစ်သည် ၁,၀၀၀ တပ်မှူး”) ဟူ၍အဓိပ္ပာယ်ရှိသည်။ ယင်းသည်အလွန်မြင့်မားသောရာထူးဖြစ်သည်။ အစောပိုင်း ဧဒုံနိုင်ငံတွင် ဗိုလ်မင်း ၁၃ ဦးသာရှိပုံပေါက်သည်။ (ကမ္ဘာဦး ၃၆:၁၅-၁၉) ဣသရေလလူမျိုးနှင့်ပတ်သက်၍ “ဗိုလ်မင်း” ဟူသောစကားလုံးကို အသုံးပြုလေ့မရှိချေ။ သို့သော် “လူတစ်ထောင်စီအုပ်ရသောသူ” ဟူသောအသုံးအနှုန်းကိုကား မကြာခဏတွေ့ရှိရသည်။ ဣသရေလလူမျိုး၏ကိုယ်စားလှယ်များကို မောရှေဆင့်ခေါ်ချိန်တွင် သူသည် “ဣသရေလအမျိုး၌ လူတစ်ထောင်ကိုအုပ်သောသူတို့” ကို ခေါ်ခဲ့သည်။dယင်း၌ ၁၂ ဦးရှိပြီး သူတို့အားလုံးသည် မောရှေကိုသာ လက်အောက်ခံရပုံရှိသည်။ (တောလည်ရာ ၁:၄-၁၆) ထိုနည်းတူစွာ စစ်တပ်တွင် လူတစ်ထောင်ကို အကဲအမှူးပြုရသူတို့သည် ဗိုလ်ချုပ်ကြီး သို့မဟုတ် ရှင်ဘုရင်ကိုသာ ဝန်ခံကြရ၏။—၂ ဓမ္မရာဇဝင် ၁၈:၁၊ ၂; ၂ ရာဇဝင်ချုပ် ၂၅:၅။

၁၄။ ယနေ့ “ဖိလိတ္တိ” တစ်ဦးသည် ဗိုလ်မင်းကဲ့သို့ မည်သို့ဖြစ်လာသနည်း။

^၁၄ နောင်တယူသောဖိလိတ္တိပြည်သားသည် ဣသရေလနိုင်ငံတွင် တကယ်ပင်ဗိုလ်မင်းဖြစ်ရမည်ဟူ၍ ဇာခရိပရောဖက်မပြုပါ။ ဤသူသည် ဣသရေလတိုင်းရင်းသား မဟုတ်သောကြောင့် ထိုသို့ဖြစ်ဖို့ရန် မသင့်တော်ပါ။ သို့သော် သူသည် ဗိုလ်မင်းကဲ့သို့ဖြစ်မည်။ ဗိုလ်မင်းတစ်ဦး၏အခွင့်အာဏာနှင့် နှိုင်းယှဉ်နိုင်သည့်ရာထူးကို ခံရသူတစ်ဦးဖြစ်ပါမည်။ ထိုသို့ပင်ဖြစ်ပျက်ခဲ့ပေသည်။ ဘိသိက်ခံခရစ်ယာန်အကြွင်းအကျန်အရေအတွက်သည် လျော့နည်းသည်ထက် လျော့နည်းလာ၊ ကျန်ကြွင်းသူများကလည်း အသက်အရွယ်ကြောင့် အားနည်းလာနေသောကြောင့် လေ့ကျင့်သွန်သင်မှုကောင်းစွာရရှိထားသော အခြားသိုးတို့က လိုအပ်သလိုထောက်ကူပေးပါသည်။ ဤသူတို့သည် ဘိသိက်ခံညီအစ်ကိုများကိုထုတ်ပယ်ပြီး သူတို့၏နေရာအစားဝင်လိုကြသည်မဟုတ်ပါ။ သို့သော် ဘုရားသခင်၏အဖွဲ့အစည်းသည် စည်းစနစ်ကျနစွာ ဆက်တိုးတက်နိုင်ရန် သစ္စာနှင့်သတိပညာရှိသောကျွန်က “ပြည်တော်” တွင်သူတို့အား လိုအပ်သလို အခွင့်အာဏာပေးပါသည်။ ဤကဲ့သို့သော တိုးတက်ကြီးထွားမှုအစီအစဉ်ကို အခြားပရောဖက်ပြုချက်တစ်ခုတွင်လည်း တွေ့ရှိရသည်။

ယဇ်ပုရောဟိတ်များနှင့် လယ်သမားများ

၁၅။ (က) ဟေရှာယ ၆၁:၅၊ ၆ ၏ပြည့်စုံချက်တွင် “ယေဟောဝါ၏ယဇ်ပုရောဟိတ်များ” ကား မည်သူများဖြစ်သနည်း။ ပြီးပြည့်စုံသောသဘောမျိုးဖြင့် ဤနည်းအတိုင်း အဘယ်အချိန်တွင် သူတို့အမှုထမ်းကြသနည်း။ (ခ) ဣသရေလလူမျိုး၏ စိုက်ပျိုးရေးလုပ်ငန်းကိုပြုစုသော “တစ်ပါးအမျိုးသားများ” ကား မည်သူများဖြစ်သနည်း။ ထို့ပြင်—ဝိညာဏသဘောမျိုးအရ—ဤလုပ်ငန်းတွင် အဘယ်အမှုများပါဝင်သနည်း။

^၁၅ ဟေရှာယ ၆၁:၅၊ ၆ (ကဘ) က ဤသို့ဆိုသည်– “တစ်ပါးအမျိုးသားတို့သည်ရပ်လျက် သင်တို့သိုးစုများကို ထိန်းကျောင်းကြလိမ့်မည်။ တစ်ကျွန်းတစ်နိုင်ငံသားတို့သည် သင်တို့အဖို့ လယ်လုပ်၍ စပျစ်ဥယျာဉ်ကိုလည်း ပြုစုကြလိမ့်မည်။ သင်တို့မူကား ယေဟောဝါ၏ ယဇ်ပုရောဟိတ်များဟူ၍လည်းကောင်း၊ ငါတို့ဘုရားသခင်၏ အမှုတော်ထမ်းဟူ၍လည်းကောင်း သမုတ်ခြင်းကိုခံရကြလိမ့်မည်။ တစ်ပါးအမျိုးသားတို့၏စည်းစိမ်ကိုစား၍ သူတို့၏ဘုန်းအသရေ၌ ဝါကြွားဝမ်းမြောက်ကြလိမ့်မည်။” ယနေ့ “ယေဟောဝါ၏ ယဇ်ပုရောဟိတ်များ” သည် ဘိသိက်ခံခရစ်ယာန်များ ဖြစ်ကြသည်။ နောက်ဆုံး ပြီးပြည့်စုံသောသဘောမျိုးဖြင့် သူတို့သည် ကောင်းကင်နိုင်ငံတော်တွင် “ယေဟောဝါ၏ ယဇ်ပုရောဟိတ်များ . . . ငါတို့ဘုရားသခင်၏ အမှုတော်ထမ်းများ” အဖြစ်အမှုတော် ဆောင်ရွက်ကြပါလိမ့်မည်။ (ဗျာဒိတ် ၄:၉-၁၁) စိုက်ပျိုးရေးလုပ်ငန်းကို တာဝန်ယူမည့် “တစ်ပါးအမျိုးသား” တို့ကား မည်သူများနည်း။ ဤသူတို့သည် ဘုရားသခင့်ဣသရေလလူမျိုး၏ “ပြည်တော်” တွင် နေထိုင်ကြမည့် အခြားသိုးများဖြစ်သည်။ သူတို့အား တာဝန်ပေးသည့် သိုးစုများကို ထိန်းကျောင်းခြင်း၊ လယ်လုပ်ခြင်း၊ စပျစ်ဥယျာဉ်ကိုပြုစုခြင်းတို့ကား အဘယ်နည်း။ အရေးကြီးသော ဝိညာဏသဘောအရ ဤတာဝန်များသည် လူတို့ကို မစကူညီခြင်း၊ ပြုစုပျိုးထောင်ပေးခြင်း၊ ရိတ်သိမ်းခြင်းနှင့်ပတ်သက်ပါသည်။—ဟေရှာယ ၅:၇; မဿဲ ၉:၃၇၊ ၃၈; ၁ ကောရိန္သု ၃:၉; ၁ ပေတရု ၅:၂။

၁၆။ နောက်ဆုံး၌ဘုရားသခင့်လူမျိုး၏ “ပြည်တော်” တွင် လုပ်ငန်းအားလုံးကို ထမ်းဆောင်မည့်သူကား မည်သူများဖြစ်မည်နည်း။

^၁၆ မျက်မှောက်အချိန်တွင် ဝိညာဏဣသရေလလူနည်းစုသာ ကမ္ဘာပေါ်ကျန်ကြွင်းပြီး ဝိညာဏသိုးထိန်းကျောင်းခြင်း၊ လယ်လုပ်ခြင်းနှင့် စပျစ်ဥယျာဉ်ပြုစုခြင်းလုပ်ငန်းတွင် ပါဝင်နေကြပါသည်။ ဘိသိက်ခံလူစုတစ်ရပ်လုံးသည် ခရစ်တော်နှင့်အတူ နောက်ဆုံးပူးပေါင်းသည့်အခါ ဤလုပ်ငန်းအားလုံးကို အခြားသိုးတို့ဆောင်ရွက်ကြရမည်။ “ပြည်တော်” ကိုကွပ်ကဲရသောအခွင့်ပင်လျှင် အရည်အချင်းပြည့် အခြားသိုးများတာဝန်ဖြစ်မည်။ သူတို့အား ယေဇကျေလကျမ်းက မင်းသားအတန်းအစားဟု သတ်မှတ်ထားပါသည်။—ယေဇကျေလ၊ အခန်းကြီး ၄၅၊ ၄၆။e

“ပြည်တော်” သည်အစဉ်အမြဲတည်၏

၁၇။ ဤနောက်ဆုံးနေ့ရက်များအတွင်း အဘယ်ပြင်ဆင်ချက်များကို ယေဟောဝါပြုစုစီရင်နေတော်မူသနည်း။

^၁၇ မှန်ပါသည်၊ လူအုပ်ကြီးသည် စိုးရိမ်စရာအကြောင်းမရှိပါတကား! ယေဟောဝါသည် သူတို့အတွက် လုံလောက်စွာအသင့်ပြင်ဆင်ပေးထားတော်မူသည်။ ဤနောက်ဆုံးနေ့ရက်များအတွင်း ကမ္ဘာပေါ်ဖြစ်ပျက်နေသည့် အရေးအကြီးဆုံးအဖြစ်အပျက်တစ်ခုမှာ ဘိသိက်ခံသူများကို စုသိမ်းပြီး တံဆိပ်ခတ်ခြင်းလုပ်ငန်းဖြစ်သည်။ (ဗျာဒိတ် ၇:၃) သို့သော် ဤလုပ်ငန်းကိုဆောင်ရွက်ပြီးမြောက်နေစဉ် ယေဟောဝါသည် အခြားသိုးတို့အား ပြန်တည်ထောင်ထားသော ဝိညာဏပြည်တော်ထဲသို့ ခေါ်သွင်းတော်မူခဲ့သည်။ ဤပြည်တော်တွင် သူတို့သည် ဝိညာဉ်အစာကျွေးမွေးခံရပြီး ခရစ်ယာန်အသက်တာလမ်းစဉ်အတိုင်း နေထိုင်တတ်ရန် လေ့ကျင့်မှုရရှိနေကြသည်။ ထို့ပြင် သူတို့သည် ကြီးကြပ်ကွပ်ကဲမှုအပါအဝင် မြင့်မြတ်သောလုပ်ငန်းတော်၏ အခြေခံအချက်အလက်များကို ကောင်းစွာသင်ကြားနာယူနေကြသည်။ ယင်းအတွက် ယေဟောဝါကိုလည်းကောင်း၊ သူတို့၏ဘိသိက်ခံညီအစ်ကိုများကိုလည်းကောင်း အလွန်ကျေးဇူးတင်နေကြပါသည်။

၁၈။ အဘယ်အဖြစ်အပျက်များတစ်လျှောက် ဝိညာဏဣသရေလ “ပြည်တော်” တွင် အခြားသိုးတို့သည် သစ္စာတည်ကြည်စွာ နေထိုင်မည်နည်း။

^၁၈ မာဂေါဂပြည်မှ ဂေါဂမင်းသည် ဘုရားသခင်၏လူမျိုးကို နောက်ဆုံးတိုက်ခိုက်သည့်အခါ အခြားသိုးတို့သည် ဘိသိက်ခံအကြွင်းအကျန်နှင့်အတူ “ကျေးလက်တောရွာဒေသပြည်တော်” တွင် တည်ကြည်ကြလိမ့်မည်။ သူတို့သည် လူမျိုးအပေါင်းတို့ဖျက်ဆီးခံရခြင်းကို ကပ်ကျော်ပြီး ဘုရားသခင့်ကမ္ဘာသစ်ထဲသို့ဝင်ကြသောအခါ အခြားသိုးတို့သည် ထို “ပြည်တော်” တွင် ရှိနေဆဲဖြစ်မည်။ (ယေဇကျေလ ၃၈:၁၁၊ ကဘ; ၃၉:၁၂၊ ၁၃; ဒံယေလ ၁၂:၁; ဗျာဒိတ် ၇:၉၊ ၁၄) ဆက်လက်၍ သစ္စာတည်ကြည်ကြသည့်အတွက် ထိုကြည်နူးဖွယ်ကောင်းသောအရပ်ဒေသမှ ဘယ်သောအခါမျှ သူတို့ထွက်ခွာသွားကြရမည်မဟုတ်ပါ။—ဟေရှာယ ၁၁:၉။

၁၉၊ ၂၀။ (က) ကမ္ဘာသစ်တွင် “ပြည်တော်” သားတို့သည် အဘယ်ကြီးမြတ်သော ကြီးကြပ်ကွပ်ကဲမှုကို ခံကြရမည်နည်း။ (ခ) အဘယ်အရာကို ကျွန်ုပ်တို့မျှော်လင့်တကြီး စောင့်မျှော်နေကြသနည်း။

^၁၉ ရှေးဣသရေလနိုင်ငံကို လူသားရှင်ဘုရင်များ အုပ်စိုးခဲ့ပြီး ထိုတွင် လေဝိအနွယ်ကိုဆက်ခံသူ ယဇ်ပုရောဟိတ်များ ရှိခဲ့သည်။ ကမ္ဘာသစ်တွင် ထိုထက်ကြီးမြတ်သော ကြီးကြပ်ကွပ်ကဲမှုကို ခရစ်ယာန်များ ခံကြရမည်။ ယေဟောဝါဘုရားသခင့်လက်တော်အောက်တွင် သူတို့သည် မဟာယဇ်ပုရောဟိတ်မင်းကြီး ဘုရင်ယေရှုခရစ်နှင့် တွဲဖက်ယဇ်ပုရောဟိတ်နှင့် ဘုရင်များ—မြေကြီးပေါ်ရှိစဉ်က ခရစ်ယာန်ညီအစ်ကိုညီအစ်များအဖြစ် အချို့ကိုသိကျွမ်းခဲ့ဖူးမည်—ဖြစ်သူ ၁၄၄,၀၀၀ တို့ကိုလက်အောက်ခံကြပါလိမ့်မည်။ (ဗျာဒိတ် ၂၁:၁) သစ္စာရှိ ဝိညာဏပြည်တော်သားများသည် တကယ့်ပရဒိသုအဖြစ်သို့ ပြန်လည်တည်ထောင်ထားသော ကမ္ဘာမြေကြီးပေါ်တွင် နေထိုင်ကြကာ ယေရုရှလင်မြို့သစ်မှတစ်ဆင့်ရရှိသော ရောဂါပျောက်ကင်းခြင်းကောင်းချီးများ၌ ပျော်မွေ့ကြပါလိမ့်မည်။—ဟေရှာယ ၃၂:၁; ဗျာဒိတ် ၂၁:၂; ၂၂:၁၊ ၂။

^၂၀ ယေဟောဝါ၏ ရည်ရွယ်တော်မူချက်များ ပြီးမြောက်အောင်မြင်ရေးအတွက် ကြီးမြတ်တော်မူသော ကောင်းကင်ရထားသည် မရပ်မနား ရှေ့သို့ရွေ့လျားသွားစဉ် ကျွန်ုပ်တို့အားလုံးသည် မိမိတို့၏တာဝန်ကို ကျေပွန်စွာထမ်းဆောင်ရန် စိတ်အားထက်သန်စွာ စောင့်မျှော်နေကြသည်။ (ယေဇကျေလ ၁:၁-၂၈) ထိုရည်ရွယ်တော်မူချက်များသည် နောက်ဆုံးပြီးပြည့်စုံသည့်အခါ ယေဟောဝါ၏ သန့်ရှင်းမြင့်မြတ်မှုအောင်ပွဲကို မည်မျှအားရဝမ်းသာစွာ ခံကြရလိမ့်မည်အကြောင်း စဉ်းစားကြည့်ပါလေ! ထိုအခါ ဗျာဒိတ် ၅:၁၃ တွင်မှတ်တမ်းတင်ထားသည့် အလွန်ထူးမြတ်သောဓမ္မသီချင်းကို ဝေနေယျသတ္တဝါအပေါင်းတို့သည် ကျူးဧသီဆိုကြပါလိမ့်မည်– “ပလ္လင်တော်ပေါ်မှာ ထိုင်တော်မူသောသူနှင့် သိုးသငယ်သည် ကမ္ဘာအဆက်ဆက်ကောင်းချီးမင်္ဂလာ၊ ဂုဏ်အသရေ၊ ဘုန်းအာနုဘော်၊ အစွမ်းသတ္တိရှိတော်မူစေသတည်း!” ကျွန်ုပ်တို့၏နေရာသည် ကောင်းကင်တွင်ဖြစ်စေ၊ မြေကြီးပေါ်တွင်ဖြစ်စေ၊ ထိုတွင်ရောက်ရှိပြီး အလွန်ကြီးကျယ်ခမ်းနားသော ၎င်းချီးမွမ်းထောမနာသီချင်းကို ပါဝင်သီဆိုရန် တမ်းတကြသည်မဟုတ်ပေလော။

[အောက်ခြေမှတ်ချက်များ]

သင်မည်သို့ဖြေဆိုသနည်း

◻ ၁၉၁၉ ခုနှစ်တွင် အဘယ် “ပြည်တော်” သည်ပြန်လည်တည်ထောင်လာသနည်း။ ၎င်းတွင် ပြည်သားတို့နှင့် မည်သို့ပြည့်နှက်နေသနည်း။

◻ ဘုရားသခင့် ပြန်လည်တည်ထောင်ထားသောလူမျိုး၏ “ပြည်တော်” တွင် အခြားသိုးတို့အား မည်သို့တာဝန်ထပ်တိုးပေးခဲ့ရသနည်း။

◻ လူအုပ်ကြီးအဝင်ဖြစ်သူများသည် အဘယ်နည်းဖြင့် “ယေဗုသိလူကဲ့သို့” ဖြစ်သနည်း။ အဘယ်နည်းဖြင့် “ယုဒပြည်၌ ဗိုလ်မင်းကဲ့သို့” ဖြစ်သနည်း။

◻ သစ္စာရှိအခြားသိုးတို့သည် “ပြည်တော်” တွင် အဘယ်အချိန်တိုင် နေထိုင်မည်နည်း။

[စာမျက်နှာ ၂၃ ပါ ရုပ်ပုံ]

မျက်မှောက်ခေတ် ဖိလိတ္တိသားသည် “ယုဒပြည်၌ ဗိုလ်မင်းကဲ့သို့” ဖြစ်လိမ့်မည်

[စာမျက်နှာ ၂၄ ပါ ရုပ်ပုံ]

ဘိသိက်ခံနှင့် အခြားသိုးတို့သည် ဝိညာဏပြည်တော်တွင် အတူတကွအမှုထမ်းကြသည်