ကျွန်ုပ်တို့ခေတ်အတွက် အရေးပါသောမေးခွန်းများကို သမ္မာကျမ်းစာဖြေဆိုပေး

သမ္မာကျမ်းစာသည် မျက်မှောက်ခေတ်နှင့် စပ်ဆိုင်သလော။ စပ်ဆိုင်ကြောင်းအဖြေရရန် ဤရှေးဟောင်းစာအုပ်သည် လူတို့လောလောဆယ်စိတ်ဝင်စား၍ သူတို့နှင့်စပ်ဆိုင်သည့်အကြောင်းအရာများအတွက် လမ်းညွှန်မှုကို စာရှုသူတို့အား အမှန်ပင်ပေးနိုင်ရမည်။ သမ္မာကျမ်းစာသည် မျက်မှောက်ခေတ်လောကတွင် အမှန်အရေးပါသောအကြောင်းအရာများအတွက် အကျိုးရှိသည့်အကြံပြုချက်ပေးထားပါသလော။

လတ်တလောကိစ္စရပ်နှစ်ခုကို ကြည့်ကြပါစို့။ သို့ပြုခြင်းဖြင့် ၎င်းတို့နှင့်ပတ်သက်၍ ကျမ်းစာမည်သို့ဆိုသည်ကို ကျွန်ုပ်တို့သုံးသပ်ကြမည်။

ဆင်းရဲခြင်းကို ဘုရားသခင်အဘယ်ကြောင့်ခွင့်ပြုထားသနည်း

မျက်မှောက်ခေတ်အခြေအနေများကို သုံးသပ်ရာတွင် အများဆုံးမေးကြသည့် မေးခွန်းတစ်ခုမှာ– ဘုရားသခင်သည် အပြစ်မဲ့သူများကို အဘယ်ကြောင့်ဆင်းရဲခံစေရသနည်းဖြစ်သည်။ အကြမ်းဖက်ရာဇဝတ်မှု၊ အကျင့်ပျက်ပြားမှု၊ မျိုးဖြုတ်သတ်ဖြတ်မှု၊ ကိုယ်တိုင်ကြုံရသည့်ဝမ်းနည်းကြေကွဲမှု စသည်တို့ကိုခံရသူ များသည်ထက်များလာသောကြောင့် ဤမေးခွန်းကိုမေးစရာ အကြောင်းပေါ်နေသည်။

သာဓကအနေနှင့် ၁၉၉၈၊ ဇွန်လတွင် ဂျာမနီနိုင်ငံမြောက်ပိုင်း၌ အမြန်ရထားတစ်စီးသည် တံတားတစ်ခုကိုဝင်တိုက်ခဲ့ရာ ခရီးသည်တစ်ရာကျော်သေဆုံးခဲ့သည်။ ဒဏ်ရာရသူများနှင့် သေဆုံးသူများကို ကြည့်ရှုပြုစုခဲ့သည့် အတွေ့အကြုံရှိသောဆေးဘက်ဆိုင်ရာများနှင့် မီးသတ်သမားများပင် သေကျေမှုကြီးကြောင့် စိတ်အနှောင့်အယှက်ဖြစ်ခဲ့ကြသည်။ ဧဝံဂေလိချာ့ချ်မှ ဘိရှော့တစ်ဦးက– “အိုဘုရားသခင်၊ ဘာကြောင့်ဒီလိုဖြစ်ရတာလဲ” ဟုမေးမြန်းခဲ့သည်။ ဘိရှော့ကိုယ်တိုင်က အဖြေမပေးခဲ့ချေ။

အပြစ်မဲ့သူတို့သည် အကြောင်းရင်းကိုမသိရဘဲ ဘေးအန္တရာယ်ကြုံတွေ့ရသည့်အခါ တစ်ခါတစ်ရံ စိတ်နာကြည်းလာတတ်ကြကြောင်း အတွေ့အကြုံများကဖော်ပြသည်။ သမ္မာကျမ်းစာသည် ဆိုးသွမ်းမှုနှင့်ဆင်းရဲခြင်းများကို အပြစ်မဲ့သူများ အဘယ်ကြောင့်ခံရကြကြောင်း ရှင်းပြထားသောကြောင့် ဤတွင်အကူအညီဖြစ်သည်။

မြေကြီးနှင့် မြေကြီးပေါ်ရှိသမျှအရာအားလုံးကို ယေဟောဝါဘုရားသခင် ဖန်ဆင်းခဲ့စဉ်က ဆိုးသွမ်းမှုနှင့်ဆင်းရဲခြင်းများကို လူသားတို့ခံစားရဖို့ ကိုယ်တော်မရည်ရွယ်ခဲ့ချေ။ ကျွန်ုပ်တို့ မည်သို့သေချာနိုင်သနည်း။ အကြောင်းမှာ ဖန်ဆင်းခြင်းကိုလက်စသတ်ပြီးနောက် “ဘုရားသခင်သည် မိမိဖန်ဆင်းသမျှသောအရာတို့ကိုကြည့်ရှုလျှင်၊ အလွန်ကောင်းသည်ကို မြင်တော်မူ” သောကြောင့်ဖြစ်၏။ (ကမ္ဘာဦး ၁:၃၁) မိမိကိုယ်ကို မေးကြည့်ပါ၊ ‘ဆိုးသွမ်းရာတစ်စုံတစ်ခုကို ကျွန်ုပ်တွေ့မြင်မည်ဆိုလျှင် “အလွန်ကောင်းသည်” ဟုဆိုမည်လော။’ လုံးဝဆိုမည်မဟုတ်ပါ! ထိုနည်းအတိုင်းပင် အရာခပ်သိမ်း “အလွန်ကောင်းသည်” ဟုဘုရားသခင်ကြေညာခဲ့ချိန်က မြေကြီးပေါ်တွင် ဆိုးသွမ်းမှုစိုးစဉ်းမျှမရှိချေ။ သို့ဖြစ်လျှင် ဆိုးသွမ်းမှုသည် မည်သည့်အချိန်၌ မည်သို့စတင်လာသနည်း။

ကျွန်ုပ်တို့၏ကနဦးမိဘ အာဒံနှင့်ဧဝတို့ကို ဖန်ဆင်းပြီး မကြာမီတွင် တန်ခိုးကြီးသောနာမ်ဝိညာဉ်တစ်ပါးသည် မိန်းမဖြစ်သူထံချဉ်းကပ်၍ ယေဟောဝါ၏ဖြောင့်မတ်မှုနှင့် ကိုယ်တော့်ပိုင်သအုပ်စိုးမှု၏မှန်ကန်မှုကို စိန်ခေါ်ခဲ့သည်။ (ကမ္ဘာဦး ၃:၁-၅) နောက်ပိုင်းတွင် ဤသတ္တဝါစာတန်က လူသားတို့သည် ဆင်းရဲမှုအောက်တွင် ဘုရားသခင်အား သစ္စာရှိကြမည်မဟုတ်ဟု စွပ်စွဲခဲ့သည်။ (ယောဘ ၂:၁-၅) ဤအခြေအနေကို ယေဟောဝါ မည်သို့တုံ့ပြန်ခဲ့သနည်း။ လူသားတို့သည် ကိုယ်တော်မပါဘဲ မိမိတို့ခြေလှမ်းကို အောင်မြင်စွာမစီရင်နိုင်ကြောင်း ထင်ရှားလာစေရန် ကိုယ်တော်အချိန်ပေးခဲ့သည်။ (ယေရမိ ၁၀:၂၃) ဖန်ဆင်းရာတို့သည် ဘုရားသခင့်ပညတ်များ၊ မူများနှင့် ဆန့်ကျင်ဘက်ကျင့်ကြံကြသောအခါ အကျိုးရလဒ်မှာ အပြစ်တရားဖြစ်ပြီး ယင်းက ဘေးသင့်စေသောအခြေအနေများကို ဖြစ်ပေါ်စေသည်။ (ဒေ. ၈:၉; ၁ ယောဟန် ၃:၄) သို့သော် ဤဆိုးဝါးသောအခြေအနေများကြား၌ပင် လူအချို့သည် ကိုယ်တော်အား သမာဓိစောင့်သိမည်ကို ယေဟောဝါသိတော်မူ၏။

ဧဒင်၌ ထိုဝမ်းနည်းဖွယ်ပုန်ကန်မှုဖြစ်ပြီးချိန်မှစ၍ အနှစ် ၆,၀၀၀ ခန့်ကုန်လွန်ခဲ့ပေပြီ။ ယင်းသည် ကြာရှည်လွန်းသလော။ ယေဟောဝါသည် လွန်ခဲ့သောရာစုနှစ်များစွာကတည်းက စာတန်နှင့် သူ၏အပေါင်းပါများကို ဖျက်ဆီးနိုင်၏။ သို့သော် ယေဟောဝါပိုင်သအုပ်စိုးထိုက်ကြောင်းနှင့် ကိုယ်တော်အားလူသားတို့ သမာဓိစောင့်ခြင်းနှင့်ပတ်သက်၍ သံသယရှိသမျှ ပပျောက်ရန်စောင့်ခဲ့ခြင်းက သာ၍ကောင်းသည်မဟုတ်ပေလော။ လက်ရှိတရားရုံးစနစ်၌ တရားရုံးအမှုတစ်ခုတွင် မည်သူမှန်၍ မည်သူမှားကြောင်းသက်သေထူရန် နှစ်ချီကြာနိုင်သည် မဟုတ်ပေလော။

ယေဟောဝါနှင့် လူသားတို့ရင်ဆိုင်နေရသောကိစ္စရပ်များ—စကြဝဠာပိုင်သအုပ်စိုးမှုနှင့် လူသားတို့၏သမာဓိစောင့်သိမှု—၏အရေးကြီးမှုကိုထောက်ရှုလျှင် ဘုရားသခင်အချိန်ပေးခဲ့ခြင်းသည် ပညာရှိလှသည်တကား! ဘုရားသခင့်ပညတ်တော်များကို လူသားတို့ လျစ်လျူရှုကြပြီး မိမိတို့အရေးကိစ္စများကို အရေးယူဆောင်ရွက်သောအခါ မည်သို့ဖြစ်ပျက်သည်ကို ယခုကျွန်ုပ်တို့သိမြင်ကြရပြီ။ အကျိုးဆက်မှာ နေရာအနှံ့ဆိုးသွမ်းလာခြင်းဖြစ်၏။ ယင်းကြောင့် ယနေ့ အပြစ်မဲ့သူများစွာတို့သည် ဆင်းရဲခံကြရခြင်းဖြစ်သည်။

သို့သော် ဝမ်းသာစရာမှာ ဆိုးသွမ်းမှု အစဉ်ရှိလိမ့်မည်မဟုတ်ကြောင်း ဘုရားသခင့်နှုတ်မြွက်စကားတော်က ဖော်ပြထားခြင်းဖြစ်သည်။ အမှန်ဆိုလျှင် ယေဟောဝါသည် ဆိုးသွမ်းမှုသာမက ယင်းကိုဖြစ်ပေါ်စေသူများကိုပါ မကြာမီအဆုံးတိုင်စေတော့မည်ဖြစ်သည်။ နယပုံပြင်ကျမ်း ၂:၂၂ ကဤသို့ဆို၏– “အဓမ္မ [မတရားသော] လူတို့မူကား ပြည်တော်မှပယ်ရှင်းခြင်း၊ လွန်ကျူးသောသူတို့သည် နုတ်ပစ်ခြင်းကိုခံရကြလိမ့်မည်။” အခြားတစ်ဖက်တွင်မူ ဘုရားသခင်အားသစ္စာရှိသူများသည် ယခုနီးကပ်လာလျက်ရှိသည့် “နောက်တစ်ဖန် သေဘေးမရှိရ။ စိတ်မသာညည်းတွားခြင်း၊ အော်ဟစ်ခြင်း၊ ပင်ပန်းခြင်းလည်းမရှိ” တော့မည့်အချိန်တစ်ချိန်ကို စောင့်မျှော်နေနိုင်ကြသည်။—ဗျာဒိတ် ၂၁:၄။

သို့ဖြစ်၍ အပြစ်မဲ့သူများ အဘယ်ကြောင့်ဆင်းရဲခံကြရကြောင်း သမ္မာကျမ်းစာက ရှင်းလင်းစွာဖော်ပြထားသည်။ ဆိုးသွမ်းမှုနှင့်ဆင်းရဲခြင်းတို့သည် မကြာမီ အဆုံးတိုင်မည်ကိုလည်း ယင်းကစိတ်ချစေသည်။ သို့သော် လက်ရှိဘဝအခက်အခဲများကို ကျွန်ုပ်တို့ကြုံတွေ့နေကြရစဉ် အရေးကြီးသော အခြားမေးခွန်းတစ်ခု၏ အဖြေကိုရဖို့လိုသည်။

ဘဝရည်ရွယ်ချက်ကား အဘယ်နည်း

လူ့သမိုင်းတွင် ယခုအခါ၌ တစ်ကြိမ်တစ်ခါနှင့်မျှမတူအောင် လူတို့သည် ဘဝ၏အဓိပ္ပာယ်ကိုရှာဖို့ ကြိုးစားနေကြသည်။ လူအများက ‘ငါဘာကြောင့်အသက်ရှင်နေတာလဲ။ ဘဝအဓိပ္ပာယ်ကို ငါဘယ်လိုရှာတွေ့နိုင်မလဲ’ ဟုမိမိကိုယ်ကိုမေးနေကြသည်။ အခြေအနေအမျိုးမျိုးကြောင့် ဤမေးခွန်းများကိုမေးမြန်းခဲ့ကြရသည်။

ကိုယ်တိုင်ကြုံတွေ့ခဲ့ရသော ဆင်းရဲခြင်းတစ်ခုခုကြောင့် လူတစ်ဦး၏ဘဝ ကစဉ့်ကလျားဖြစ်ခဲ့ပေမည်။ သာဓကအနေနှင့် ၁၉၉၈ ခုနှစ်အစောပိုင်း၌ ဂျာမနီနိုင်ငံ၊ ဘဗေးရီးယားပြည်နယ်တွင်နေထိုင်သော ၁၂ နှစ်အရွယ်မိန်းမငယ်တစ်ဦးသည် ပြန်ပေးဆွဲခံခဲ့ရပြီး အသတ်ခံခဲ့ရသည်။ တစ်နှစ်ကြာပြီးနောက် သူ့မိခင်က မိမိသည်နေ့စဉ်လိုလို ဘဝရည်ရွယ်ချက်ကိုရှာနေသော်လည်း မအောင်မြင်ကြောင်း ဝန်ခံခဲ့သည်။ လူငယ်အချို့သည် ဘဝ၏အဓိပ္ပာယ်ကိုတွေးတောရန် လှုံ့ဆော်ခံရကြသည်။ သူတို့သည် လုံခြုံမှု၊ ကျေနပ်ရောင့်ရဲမှုနှင့် ရင်းနှီးဖော်ရွေမှုတို့ကို ရှာဖွေကြသော်လည်း ပျံ့နှံ့လျက်ရှိသည့် ဟန်ဆောင်မှုနှင့် လာဘ်ပေးလာဘ်ယူမှုတို့ကြောင့် စိတ်ဓာတ်ကျလျက်သာရှိကြသည်။ အခြားသူတို့မှာမူ မိမိတို့ဘဝကို အလုပ်အကိုင်တစ်ခုတွင် တည်ဆောက်ထားခဲ့ကြသော်လည်း ဩဇာအာဏာ၊ ဂုဏ်သိက္ခာနှင့် ပိုင်ဆိုင်မှုတို့သည် မိမိတို့တည်ရှိရခြင်း၏အကြောင်းရင်းကို သိလိုသည့်အတွင်းစိတ်အတွက် အဖြေမပေးနိုင်ကြောင်း သူတို့တွေ့ ရှိခဲ့ကြ၏။

ဘဝရည်ရွယ်ချက်ကိုမေးမြန်းရန် လူတစ်ဦးအား အဘယ်အရာကပင်လှုံ့ဆော်ပေးပါစေ ဤမေးခွန်းအတွက် အရေးကြီး၍ ကျေနပ်ဖွယ်အဖြေရထိုက်သည်။ ဤတွင်တစ်ဖန် သမ္မာကျမ်းစာသည် များစွာအထောက်အကူ ပြုနိုင်သည်။ ယင်းက ယေဟောဝါအား ပြုလေရာရာ၌ အကြောင်းကောင်းရှိသောအရှင်၊ ရည်ရွယ်ချက်ရှိသောဘုရားသခင်အဖြစ် ဖော်ပြထားသည်။ အကြောင်းမရှိဘဲ အိမ်တစ်ဆောင်ကို သင်ဆောက်လုပ်မည်လောဟု ကျွန်ုပ်တို့မေးလိုသည်။ အိမ်တစ်ဆောင်ကိုဆောက်လုပ်ခြင်းသည် ငွေအရင်းအနှီး အမြောက်အမြားလိုအပ်ပြီး လချီ၊ နှစ်ချီကြာနိုင်သောကြောင့် အကြောင်းမရှိဘဲဆောက်မည်မဟုတ်ပါ။ အိမ်တစ်ဆောင်ကို အသင် သို့မဟုတ် တစ်ဦးဦးနေနိုင်ဖို့ သင်ဆောက်ထားသည်။ ယေဟောဝါနှင့်ပတ်သက်၍လည်း အလားတူဆင်ခြင်နိုင်ပါသည်။ ကိုယ်တော်သည် အကြောင်းမဲ့၊ ရည်ရွယ်ချက်မရှိဘဲ ကမ္ဘာမြေကြီးနှင့် သက်ရှိများကို ဖန်ဆင်းခဲ့ခြင်းမဟုတ်ပါ။ (ဟေဗြဲ ၃:၄ နှိုင်းယှဉ်။) မြေကြီးအတွက် ကိုယ်တော့်ရည်ရွယ်ချက်ကား အဘယ်နည်း။

ဟေရှာယ၏ပရောဖက်ပြုချက်က ယေဟောဝါအား “မှန်တော်မူသောဘုရားသခင်၊ မြေကြီးကိုပြုပြင်ဖန်ဆင်း” သောအရှင်အဖြစ်ဖော်ပြထားသည်။ ကိုယ်တော်သည် ‘[မြေကြီးကို] အမြဲတည်စေတော်မူသောအရှင်၊ အချည်းနှီးဖန်ဆင်းသည်မဟုတ်၊ သတ္တဝါနေစရာဖို့ဖန်ဆင်းတော်မူ’ သောအရှင် အမှန်တကယ်ဖြစ်သည်။ (ဟေရှာယ ၄၅:၁၈၊ သမ္မာ) မှန်ပါသည်၊ မြေကြီးကိုဖန်ဆင်းကတည်းက ယေဟောဝါ၏ရည်ရွယ်ချက်မှာ သတ္တဝါနေဖို့ဖြစ်သည်။ ဆာလံ ၁၁၅:၁၆ က “ကောင်းကင်ကား၊ ထာဝရဘုရား၏ကောင်းကင်ဖြစ်၏။ မြေကြီးကိုကား လူသားတို့အား ပေးတော်မူပြီ” ဟုဆိုသည်။ သို့ဖြင့် သမ္မာကျမ်းစာက မြေကြီးကိုကြည့်ရှုပြုစုမည့် နာခံသောလူသားများနေထိုင်ဖို့ ၎င်းကို ယေဟောဝါဖန်ဆင်းခဲ့ကြောင်း ဖော်ပြသည်။—ကမ္ဘာဦး ၁:၂၇၊ ၂၈။

ယေဟောဝါသည် အာဒံနှင့်ဧဝတို့၏ပုန်ကန်မှုကြောင့် မိမိ၏ရည်ရွယ်ချက်ကို ပြောင်းလဲခဲ့သလော။ မပြောင်းခဲ့ပါ။ မည်သို့သေချာသိနိုင်သနည်း။ ဤအချက်ကိုဆင်ခြင်သုံးသပ်ကြည့်ပါ– သမ္မာကျမ်းစာကို ဧဒင်၌ပုန်ကန်မှုဖြစ်ပြီး နှစ်ပေါင်းထောင်ချီကြာပြီးနောက်မှ ရေးသားခဲ့ခြင်းဖြစ်၏။ ဘုရားသခင်သည် မိမိ၏မူလရည်ရွယ်ချက်ကို စွန့်ပယ်ခဲ့လျှင် ကျမ်းစာ၌အဘယ်ကြောင့် မဖော်ပြထားသနည်း။ သိသာထင်ရှားသည့်အချက်မှာ မြေကြီးနှင့် လူသားတို့အတွက် ကိုယ်တော်၏ရည်ရွယ်ချက် မပြောင်းမလဲရှိနေခြင်းဖြစ်သည်။

ထို့အပြင် ယေဟောဝါ၏ရည်ရွယ်ချက်သည် ဘယ်သောအခါမျှမရှုံးနိမ့်ပါ။ ဘုရားသခင်သည် ဟေရှာယမှတစ်ဆင့် ဤအာမခံချက်ပေးခဲ့သည်– “မိုးရေနှင့်မိုးပွင့်တို့သည် မိုးကောင်းကင်မှဆင်းသက်၍ နောက်တစ်ဖန်မပြန်၊ မြေသည်မျိုးစေ့ကြဲသောသူအား မျိုးစေ့ကိုလည်းကောင်း၊ အစာစားသောသူအား အစာကိုလည်းကောင်း ပေးမည်အကြောင်း၊ မြေကိုစိုစေသဖြင့် အပင်ပေါက်စေ၍ အသီးကိုသီးစေသကဲ့သို့၊ ထိုအတူ ငါ၏နှုတ် [မြွက်] စကားသည်ဖြစ်လိမ့်မည်။ အကျိုးမရှိဘဲ ငါ့ထံသို့မပြန်ရ။ ငါ့အလိုကို ပြည့်စုံစေမည်။ ငါစေခိုင်းသောအမှု၌ အောင်လိမ့်မည်။”—ဟေရှာယ ၅၅:၁၀၊ ၁၁။

ကျွန်ုပ်တို့ထံမှ ဘုရားသခင်မျှော်လင့်ရာ

သို့ဖြစ်၍ နာခံသောလူသားများ မြေကြီးပေါ်ထာဝစဉ်နေဖို့ဟူသော ဘုရားသခင့်ရည်ရွယ်ချက်ပြည့်စုံမည်ကို ကျွန်ုပ်တို့စိတ်ချနိုင်သည်မှာ ရှင်းပါသည်။ မြေကြီးပေါ်ထာဝစဉ်နေခွင့်ရသူများ၌ ကျွန်ုပ်တို့ပါဝင်လိုလျှင် ပညာရှိရှောလမုန်ဘုရင်၏ ဤစကားအတိုင်း ပြုရပေမည်– “ဘုရားသခင်ကိုကြောက်ရွံ့၍၊ ပညတ်တော်တို့ကိုစောင့်ရှောက်လော့။ ဤရွေ့ကား၊ လူနှင့်ဆိုင်သောအမှုအရာအလုံးစုံတို့ကိုချုပ်ခြာသတည်း။”—ဒေ. ၁၂:၁၃; ယောဟန် ၁၇:၃။

လူသားတို့အတွက် ယေဟောဝါ၏ရည်ရွယ်ချက်နှင့်အညီနေထိုင်ခြင်းဟူသည် မှန်သောဘုရားသခင်အားသိကျွမ်းလာခြင်းနှင့် သမ္မာကျမ်းစာ၌ ဖော်ပြထားသည့် ကိုယ်တော့်တောင်းဆိုချက်များကို လိုက်နာနေခြင်းဖြစ်၏။ ထိုသို့ယခုပြုလုပ်ကြမည်ဆိုလျှင် မြေကြီးပရဒိသုပေါ် ထာဝစဉ်အသက်ရှင်ရန် မျှော်လင့်နိုင်သည်၊ ထိုတွင် ဘုရားသခင်နှင့် ကိုယ်တော့်အံ့ဖွယ်ဖန်ဆင်းရာများနှင့်ပတ်သက်သော သင်ယူစရာအသစ်များ မည်သည့်အခါမျှကုန်ခန်းမည်မဟုတ်ပါ။ (လုကာ ၂၃:၄၃) ပီတိဖြစ်စရာ အလားအလာပါတကား!

ဘဝရည်ရွယ်ချက်ကို ရှာဖွေကြသူများစွာတို့သည် ကျမ်းစာသို့ဦးလှည့်ကြကာ ယခုပင် ပျော်ရွှင်မှုများစွာရရှိခဲ့ကြပြီ။ ဥပမာ၊ အဲလ်ဖရက်အမည်ရှိလူငယ်တစ်ဦးသည် ဘဝအဓိပ္ပာယ်ရှာမတွေ့နိုင်ခဲ့ချေ။ စစ်တွင် ဘာသာတရားပါဝင်ပက်သက်ခြင်းကို သူစက်ဆုပ်ရွံရှာ၍ . . . အရေခြုံမှုနှင့် လာဘ်ပေးလာဘ်ယူမှုတို့ကြောင့် စိတ်အနှောင့်အယှက်ဖြစ်ခဲ့သည်။ အဲလ်ဖရက်သည် ဘဝရည်ရွယ်ချက်နှင့်ပတ်သက်သော ထွန်းလင်းမှုရရှိရန်မျှော်လင့်လျက် မြောက်အမေရိကရှိ အင်းဒီးယန်းများထံလည်ပတ်ခဲ့ပြီး ဥရောပသို့ စိတ်ဓာတ်ကျလျက်သာ ပြန်လာခဲ့သည်။ စိတ်ပျက်ပြီး မူးယစ်ဆေးဝါးနှင့် ပေါက်လွှတ်ပဲစားတေးဂီတဘက်သို့ ဦးလှည့်ခဲ့သည်။ သို့သော် ကျမ်းစာကိုမှန်မှန်နှင့် ဂရုတစိုက်စစ်ဆေးလေ့လာခြင်းက နောက်ပိုင်းတွင် အဲလ်ဖရက်အား ဘဝ၏ရည်ရွယ်ချက်အမှန်ကိုသိရှိစေပြီး ကျေနပ်ရောင့်ရဲမှုပေးခဲ့သည်။

ကျွန်ုပ်တို့၏လမ်းခရီးအတွက် အားကိုးအားထားရာအလင်း

သို့ဖြစ်လျှင် ကျမ်းစာနှင့်ပတ်သက်၍ ကျွန်ုပ်တို့မည်သို့ကောက်ချက်ချနိုင်သနည်း။ ယင်းသည် မျက်မှောက်ခေတ်နှင့် စပ်ဆိုင်သလော။ အမှန်ပင် စပ်ဆိုင်၏၊ အကြောင်းမှာ ယင်းသည် လတ်တလောဆွေးနွေးရန် ပြဿနာများအတွက် လမ်းညွှန်မှုပေးသောကြောင့်ပင်။ ဆိုးသွမ်းမှုသည် ဘုရားသခင်ဖန်တီးရာမဟုတ်ကြောင်း ကျမ်းစာရှင်းပြပြီး ကျေနပ်ဖွယ်ဘဝရည်ရွယ်ချက်ရှာတွေ့ရန် ထောက်ကူပေး၏။ ထို့ထက်ကား ယနေ့အကြီးအကျယ်စိတ်ဝင်စားကြသည့် အခြားကိစ္စရပ်များနှင့်ပတ်သက်၍ သမ္မာကျမ်းစာက ပြောဆိုစရာများစွာရှိသည်။ အိမ်ထောင်ရေး၊ သားသမီးမွေးမြူရေး၊ လူမှုဆက်ဆံရေးနှင့် သေလွန်သူများအတွက်မျှော်လင့်ချက် စသည့်အကြောင်းများ သမ္မာကျမ်းစာတွင် ပါဝင်သည်။

ကျမ်းစာကိုသင်မဖတ်ရသေးလျှင် ၎င်း၌ပါဝင်သည့်အကြောင်းများကို ကျေးဇူးပြု၍အနီးကပ်လေ့လာစစ်ဆေးကြည့်ပါလေ။ ယင်း၏ ဘဝလမ်းညွှန်များ၏ စစ်မှန်သောတန်ဖိုးကို သင်တွေ့ ရှိသည်နှင့် ယေဟောဝါထံမှလမ်းညွှန်မှုကိုမျှော်ကိုး၍ “နှုတ် [မြွက်စကား] တော်သည် အကျွန်ုပ်ခြေရှေ့မှာ မီးခွက်ဖြစ်၍၊ အကျွန်ုပ်လမ်းခရီးကို လင်းစေပါ၏” ဟုသီဆိုခဲ့သူ ဆာလံဆရာကဲ့သို့ သင်ခံစားရပေမည်။—ဆာလံ ၁၁၉:၁၀၅။

[စာမျက်နှာ ၆ ပါ ရုပ်ပုံ]

ဘုရားသခင်သည် အပြစ်မဲ့သူတို့ကိုအဘယ်ကြောင့်ဆင်းရဲခံစေကြောင်း သင်သိပါသလော

[စာမျက်နှာ ၇ ပါ ရုပ်ပုံ]

အဓိပ္ပာယ်ပြည့်ဝသောဘဝကို သင်ပျော်မွေ့နိုင်