အခွင့်အာဏာကို လေးစားမှု—အဘယ်ကြောင့်လိုအပ်သနည်း

မည်သူသည် မိမိတို့၏ပိုင်ဆိုင်ရာများကို ခိုးယူသူ သို့မဟုတ် မိသားစုများကို ခြိမ်းခြောက်သောရာဇဝတ်သားများကို ဖမ်းဆီးရန် ရဲသားများ၌ အခွင့်အာဏာရှိခြင်းအတွက် ကျေးဇူးမတင်ဘဲနေမည်နည်း။ ပြည်သူပြည်သားတို့ကို စောင့်ရှောက်ကာကွယ်ရန် ရာဇဝတ်သားများကို အပြစ်ဒဏ်ပေးဖို့ တရားရုံးများ၌ အခွင့်အာဏာရှိသည့်အတွက် ကျွန်ုပ်တို့ကျေးဇူးတင်ကြသည်မဟုတ်လော။

အစိုးရအာဏာပိုင်က အခွန်စည်းကြပ်ကောက်ခံခြင်းဖြင့် ရရှိသောငွေကိုအသုံးပြု၍ လမ်းများပြုပြင်ထိန်းသိမ်းရေး၊ ကျန်းမာသန့်ရှင်းရေး၊ ပညာရေးစသည့် အခြားလူထုအထောက်အကူပြု ဝန်ဆောင်မှုများကို သတိရကြပေမည်။ လျောက်ပတ်စွာခန့်အပ်ထားသော အခွင့်အာဏာကို မဖြစ်မနေလေးစားရမည်ဖြစ်ကြောင်း အသိအမှတ်ပြုရာတွင် စစ်မှန်သောခရစ်ယာန်များသည် ဦးဆုံးဖြစ်၏။ သို့သော် ထိုသို့သောလေးစားမှုမှာ မည်သည့်အတိုင်းအတာအထိ ဖြစ်ရမည်နည်း။ ဘဝအသက်တာ၏ မည်သည့်နယ်ပယ်များ၌ အခွင့်အာဏာကိုလေးစားရန် လိုအပ်သနည်း။

ရပ်ကွက်တွင် အခွင့်အာဏာ

သမ္မာကျမ်းစာက ယုံကြည်သူဖြစ်စေ၊ မယုံကြည်သူဖြစ်စေ ပြည်သူပြည်သား၏အကျိုးကိုဆောင်ရွက်ပေးလျက်ရှိသော နိုင်ငံ့အခွင့်အာဏာကို လူအားလုံးလေးစားရမည်ဟု မှာကြားသည်။ ခရစ်ယာန်တမန်တော်ပေါလုက ရောမမြို့ရှိ သူ၏ယုံကြည်သူချင်းတို့ထံ ဤအကြောင်းကိုရေးသားခဲ့ရာ ရောမ ၁၃:၁-၇ တွင်မှတ်တမ်းတင်ထားသော သူ၏စကားကို သုံးသပ်ကြည့်ခြင်းက အကူအညီဖြစ်စေမည်။

ပေါလုသည် ရောမနိုင်ငံသားဖြစ်ပြီး ထိုအချိန်က ရောမသည် ကမ္ဘာ့အာဏာစက်ဖြစ်ခဲ့၏။ စီ.အီး. ၅၆ ခုနှစ်ခန့်တွင်ရေးသားခဲ့သော ပေါလု၏စာက ခရစ်ယာန်များကို စံပြနိုင်ငံသားများဖြစ်ကြရန် အကြံပေးသည်။ သူဤသို့ရေးသားခဲ့သည်– “အစိုးရသောမင်းအာဏာစက်၏အုပ်စိုးခြင်းကို လူတိုင်းဝန်ခံစေ။ အကြောင်းမူကား၊ ဘုရားသခင်၏အခွင့်မရှိလျှင်၊ မင်းအာဏာစက်မရှိ။ အာဏာစက်ရှိသမျှသည် ဘုရားသခင်ခန့်ထားတော်မူရာဖြစ်သတည်း။”

ဤတွင် ပေါလုက ဘုရားသခင်သာခွင့်မပြုလျှင် အဘယ်လူသားအာဏာပိုင်မျှ ရှိလိမ့်မည်မဟုတ်ကြောင်း ရှင်းပြသည်။ ဤသဘောမျိုးဖြင့် အထက်အာဏာပိုင်တို့သည် ဘုရားသခင့်ရည်ရွယ်တော်မူချက်၏ဘောင်အတွင်း သူ့နေရာသူရှိ၏။ ထိုကြောင့် “မင်းအာဏာကိုဆန်သောသူသည် ဘုရားသခင်စီရင်တော်မူရာကို ဆန်သောသူဖြစ်” ကြောင်းထင်ရှားသည်။

ကောင်းမှုပြုသော နိုင်ငံသားများသည် အထက်အာဏာပိုင်တို့၏ချီးမွမ်းခြင်းကို ခံရကြစဉ် အမှားပြုသူတို့ကို ဤအာဏာပိုင်တို့က အပြစ်ပေးပိုင်ခွင့်ရှိသည်။ အစိုးရများသည် “ဘုရားသခင်၏အစေခံ” ဖြစ်ခြင်းကြောင့် မကောင်းမှုပြုသူတို့ကို “ရာဇဝတ်ပေးပိုင်သောသူ” အဖြစ် ပြုလုပ်ပိုင်ခွင့်ရရှိထားရာ အာဏာပိုင်ကို ကြောက်ရန်အကြောင်းအမြောက်အမြားရှိသည်။

ပေါလုက မိမိ၏ကျိုးကြောင်းဆင်ခြင်မှုကို ဤသို့အဆုံးသတ်သည်– “ထိုကြောင့်၊ ရာဇဝတ်ကိုကြောက်သောကြောင့်သာ မင်းအာဏာစက်၏အုပ်စိုးခြင်းကို ဝန်ခံရမည်မဟုတ်။ ကိုယ်ကိုကိုယ်သိသောစိတ်ကိုထောက်၍ ဝန်ခံရမည်။ ထိုအကြောင်းကြောင့် အခွန်အတုတ်ကိုပေးကြလော့။ မင်းတို့သည် ဘုရားသခင်၏အမှုစောင့်ဖြစ်၍၊ အမှုတော်ကိုအမြဲထမ်းကြ၏။”

အခွန်များကို စီမံခန့်ခွဲခြင်းတာဝန်မှာ အခွန်ပေးသူနှင့်မဆိုင် အထက်အာဏာပိုင်တို့အပေါ်၌သာမူတည်သည်။ ရိုးဖြောင့်သောနိုင်ငံသားတစ်ဦးအနေဖြင့် ခရစ်ယာန်တစ်ဦးသည် ကြည်လင်သည့် ကိုယ်ကိုကိုယ်သိသောစိတ်ကို ထိန်းသိမ်းထား၏။ အထက်အာဏာပိုင်များကို လက်အောက်ခံခြင်းနှင့် ပေးသင့်ပေးထိုက်သောအခွန်များကို ပေးခြင်းအားဖြင့် သူသည် မိမိနေထိုင်ရာရပ်ကွက်၏စံနှုန်းကို ထောက်ခံနေရုံမက ဘုရားသခင့်တောင်းဆိုချက်များနှင့်အညီ အသက်ရှင်နေထိုင်ကြကြောင်းကိုလည်း သူသိထားသည်။

မိသားစုနှင့်အခွင့်အာဏာ

မိသားစုအခွင့်အာဏာနှင့်ပတ်သက်၍ကော အသို့နည်း။ ကလေးငယ်တစ်ဦးသည် သူ၏ဘဝအစရက်ပိုင်းများတွင် ငိုယို၍ဖြစ်စေ၊ စူးစူးဝါးဝါးပင်အော်ဟစ်၍ဖြစ်စေ ဂရုစိုက်မှုကို တောင်းဆိုလေ့ရှိသည်။ သို့သော် ပညာရှိသောမိဘတစ်ဦးသည် ကလေးငယ်၏အမှန်တကယ်လိုအပ်ရာများကို ပိုင်းခြားသိရှိပြီး ဒေါသအမျက်ထွက်ပြခြင်းကို လိုက်လျောလိမ့်မည်မဟုတ်ချေ။ ကလေးအချို့မှာ သူတို့အသက်ကြီးလာသည်နှင့်အမျှ အလိုလိုက်ခံရ၍ ကိုယ့်စံနှုန်းကိုယ်ချမှတ်ခွင့်ရကြသည်။ ထိုအခါ အတွေ့အကြုံမရှိသည့်အတွက် သူတို့သည် ရာဇဝတ်မှုကျူးလွန်ခြင်း၊ သို့မဟုတ် အမှားအယွင်းတစ်ခုခုပြုခြင်းတွင် ပါဝင်ပတ်သက်လာရာ ဒေသခံအာဏာပိုင်အများ ကောင်းစွာသိရှိထားသကဲ့သို့ မိသားစုနှင့်အတူ ရပ်ကွက်တစ်ခုလုံးကို အကြီးအကျယ်အနှောင့်အယှက်ဖြစ်စေကြသည်။

ကျွန်ုပ်တို့ရထိုက်သောကလေးများကိုရေးသားသူ ရိုစလင်း မိုင်လ်က “အချိန်နှောင်းမှသာ ကလေးများကို မိဘများဆုံးမပဲ့ပြင်ကြ၏” ဟုဆိုသည်။ “စတင်သင့်သောအချိန်မှာ ကလေးငယ်တစ်ဦး မွေးစကတည်းကဖြစ်သည်။” အစကတည်းက မိဘများသည် သနားကြင်နာ၊ အခွင့်အာဏာရှိသောလေသံဖြင့် စကားပြောဆိုမည်၊ တစ်သမတ်တည်းပြုမူလုပ်ကိုင်မည်ဆိုလျှင် များမကြာမီ သူတို့၏ကလေးများသည် ထိုအခွင့်အာဏာကိုလည်းကောင်း၊ ၎င်းမှရရှိသည့် မေတ္တာပါပဲ့ပြင်မှုကိုလည်းကောင်း လက်ခံတတ်လာလိမ့်မည်။

သမ္မာကျမ်းစာ၌ မိသားစုအခွင့်အာဏာနှင့်ပတ်သက်၍ သိသင့်သိအပ်ရာအကြောင်း အမြောက်အမြားပါရှိ၏။ နယပုံပြင်ကျမ်းတွင် ပညာရှိရှောလမုန်က သားသမီးများရှေ့၌ ဘုရားသခင်ကိုကြောက်ရွံ့သောမိဘများ၏ စည်းလုံးမှုအကြောင်း ဤသို့အာရုံစိုက်စေသည်– “ငါ့သား၊ အဘ၏နည်းဥပဒေသကိုနားထောင်လော့။ အမိ၏တရားကိုလည်း မပယ်နှင့်။” (သု. ၁:၈) မိဘတို့သည် သားသမီးများရှေ့၌ ထိုသို့ကျိုးကြောင်းညီသောစည်းလုံးစွာရပ်တည်မှုကို အမြဲတင်ပြသည့်အခါ သူတို့နေရမည့်အနေအထားကို ကလေးများသိကြ၏။ သူတို့သည် မိမိတို့လိုရာရဖို့ မိဘတစ်ဦးနှင့်တစ်ဦးကို ဆန့်ကျင်စေကာ ကြိုးဆွဲဖို့ကြိုးစားပေမည်၊ သို့သော် မိဘ၏စည်းလုံးသောအခွင့်အာဏာသည် လူငယ်များအတွက် အကာအကွယ်ဖြစ်၏။

ခင်ပွန်းဖြစ်သူသည် မိမိ၏ကလေးများအတွက်သာမက ဇနီးသည်၏ဝိညာဉ်ရေးအတွက် တာဝန်ရှိကြောင်း သမ္မာကျမ်းစာက ရှင်းပြထားသည်။ ယင်းကို ဦးစီးမှုအဖြစ် ဖော်ပြ၏။ ဤဦးစီးမှုကို မည်သို့လက်တွေ့ အသုံးချရမည်နည်း။ ပေါလုက ယေရှုသည် အသင်းတော်ကိုဦးစီးသကဲ့သို့ ယောက်ျားသည် ဇနီးသည်ကို ဦးစီးရမည်ဟု ညွှန်ပြထားသည်။ ထို့နောက်တွင် ပေါလုက ဤသို့ဆက်ပြောသည်– “အချင်းယောက်ျားတို့၊ ခရစ်တော်သည် အသင်းတော်ကိုချစ်တော်မူသကဲ့သို့၊ သင်တို့လည်း ကိုယ်ခင်ပွန်းကိုချစ်ကြလော့။” (ဧဖက် ၅:၂၅) ယောက်ျားတစ်ဦးသည် ယေရှု၏ပုံသက်သေကိုအတုယူလိုက်လျှောက်၍ မေတ္တာပါပါ ဦးစီးမည်ဆိုလျှင် ဇနီးသည်၏ “အလွန်ရိုသေ” မှုကိုရရှိလိမ့်မည်။ (ဧဖက် ၅:၃၃၊ ကဘ) ယင်းသို့သော အိမ်ထောင်စုတွင်ရှိသောကလေးတို့သည် ဘုရားသခင်ပေးအခွင့်အာဏာ၏တန်ဖိုးကို သိမြင်ပြီး ၎င်းကို လက်ခံရန် တိုက်တွန်းလှုံ့ဆော်ခံရမည်။—ဧဖက် ၆:၁-၃။

မိမိ၏ကြင်ဖော်ကို သေခြင်း၌ဆုံးရှုံးခဲ့ရသူတို့အပါအဝင် ကြင်ဖော်မဲ့မိဘများသည် ဤကိစ္စကို မည်သို့ကိုင်တွယ်ဖြေရှင်းနိုင်မည်နည်း။ ဖခင်ဖြစ်စေ၊ မိခင်ဖြစ်စေ သူတို့သည် ယေဟောဝါဘုရားသခင်နှင့် ယေရှုခရစ်၏ အခွင့်အာဏာကို တိုက်ရိုက်ရည်ညွှန်းသုံးနိုင်ကြသည်။ ယေရှုသည် မိမိ၏ခမည်းတော်နှင့် မှုတ်သွင်းခံကျမ်းစာစောင်များ၏ အခွင့်အာဏာဖြင့် အမြဲတစေမိန့်တော်မူခဲ့သည်။—မဿဲ ၄:၁-၁၀; ၇:၂၉; ယောဟန် ၅:၁၉၊ ၃၀; ၈:၂၈။

ကလေးများ ကြုံတွေ့ကြရသော အခက်အခဲများနှင့်ပတ်သက်သည့် တန်ဖိုးရှိသည့် အခြေခံမူမြောက်မြားစွာကို သမ္မာကျမ်းစာက ဖော်ပြပေးသည်။ ဤမူများကို ရှာယူ၍ လက်တွေ့ကျင့်သုံးခြင်းအားဖြင့် မိဘသည် သားသမီးများကို မေတ္တာပါ၍အကူအညီဖြစ်စေသော ဆုံးမစကားပေးပေလိမ့်မည်။ (ကမ္ဘာဦး ၆:၂၂; သု. ၁၃:၂၀; မဿဲ ၆:၃၃; ၁ ကောရိန္သု ၁၅:၃၃; ဖိလိပ္ပိ ၄:၈၊ ၉) ကျမ်းစာ၏ အခွင့်အာဏာကိုလေးစားခြင်းနှင့်ဆိုင်သော အကျိုးကျေးဇူးများကို မိမိတို့၏ကလေးများ တန်ဖိုးထားလေးမြတ်တတ်ရန် လေ့ကျင့်ပေးရာ၌ အကူအညီဖြစ်စေဖို့ အထူးရည်ရွယ်၍ထုတ်ဝေထားသော ကျမ်းစာအခြေခံ စာအုပ်များကိုလည်း မိဘများအသုံးပြုနိုင်ကြသည်။a

ခရစ်ယာန်အသင်းတော်နှင့် အခွင့်အာဏာ

“ဤသူသည် ငါနှစ်သက်မြတ်နိုးရာ၊ ငါ၏ချစ်သားပေတည်း။ သူ၏စကားကိုနားထောင်ကြလော့။” (မဿဲ ၁၇:၅) ယေဟောဝါဘုရားသခင်ကိုယ်တော်တိုင် မိန့်တော်မူသော ဤစကားများသည် ယေရှုအား ဘုရားသခင့်အခွင့်အာဏာနှင့်အညီ မိန့်တော်မူသူတစ်ဦးအဖြစ် အတည်ပြုထောက်ခံပေးခဲ့၏။ ယေရှုမိန့်တော်မူခဲ့ရာများကို ခရစ်ဝင်ကျမ်းလေးစောင်တွင် မှတ်တမ်းတင်ထားခဲ့ပြီး ၎င်းကို ကျွန်ုပ်တို့အလွယ်တကူ ရည်ညွှန်းကိုးကားနိုင်ကြသည်။

ကောင်းကင်သို့ ယေရှုမတက်ကြွမီတွင် ယေရှုက မိမိ၏တပည့်တော်များကို ဤသို့ဆိုသည်– “ကောင်းကင်ဘုံ၌လည်းကောင်း၊ မြေကြီးပေါ်၌လည်းကောင်း စီရင်ပိုင်သောအခွင့်တန်ခိုးရှိသမျှတို့ကို ငါခံရပြီ။” (မဿဲ ၂၈:၁၈) အသင်းတော်၏ဦးခေါင်းအနေဖြင့် ယေရှုသည် မြေကြီးပေါ်ရှိ မိမိ၏ခြေရာကိုလိုက်လျှောက်သည့် ဘိသိက်ခံများကိုစောင့်ကြပ်ရုံမက စီ.အီး. ၃၃၊ ပင်တေကုတ္တေပွဲနေ့၌ သန့်ရှင်းသောဝိညာဉ်တော် သွန်းလောင်းပေးပြီးကတည်းက သူတို့ကို “သစ္စာနှင့်သတိပညာရှိသောကျွန်၊” အမှန်တရား၏ဆက်သွယ်ရေးလမ်းကြောင်းအဖြစ်လည်း ကိုယ်တော်အသုံးပြုတော်မူလျက်ရှိသည်။ (မဿဲ ၂၄:၄၅-၄၇; တမန်တော် ၂:၁-၃၆) ခရစ်ယာန်အသင်းတော်ကို ခိုင်မြဲစေရန် အဘယ်အရာများကို ကိုယ်တော်ပြီးမြောက်စေခဲ့ပြီနည်း။ “မြင့်သောအရပ်သို့တက်ကြွတော်မူ၍ . . . လူ့အသွင်ဆုလာဘ်များကို ပေးသနားတော်မူသည်။” (ဧဖက် ၄:၈၊ ကဘ) “လူ့အသွင်ဆုလာဘ်များ” မှာ သန့်ရှင်းသောဝိညာဉ်တော်ဖြင့် ခန့်အပ်ခံရသော ခရစ်ယာန်အကြီးအကဲများဖြစ်ပြီး ယုံကြည်သူချင်းတို့၏ ဝိညာဉ်ရေးရာကို ဂရုစိုက်ပေးရန် အခွင့်အာဏာပေးအပ်ခြင်းခံရသည်။—တမန်တော် ၂၀:၂၈။

ထိုအကြောင်းကြောင့် ပေါလုက ဤသို့ဆုံးမသည်– “ဘုရားသခင်၏နှုတ် [မြွက်စကား] တရားတော်ကို သင်တို့အားဟောပြော၍၊ သင်တို့ကိုအုပ်သောသူတို့ကို အောက်မေ့ကြလော့။ သူတို့သည် အဘယ်သို့ကျင့်ကြံပြုမူ၍[သေဆုံး]သည်ကို စေ့စေ့ဆင်ခြင်လျက်၊ သူတို့၏ယုံကြည်ခြင်းကို မီအောင်လိုက်ကြလော့။” ဤသစ္စာရှိသူတို့သည် ယေရှု၏ခြေရာကို အနီးကပ်လိုက်လျှောက်ကြခြင်းကြောင့် သူတို့၏ယုံကြည်ခြင်းကို အတုယူခြင်းက အမှန်ပင်ပညာရှိလမ်းစဉ်ဖြစ်သည်။ ထို့နောက် ထပ်ဆင့်၍ပေါလုက ဤသို့ဆိုသည်– “သင်တို့ကိုအုပ်သော သူတို့၏စကားကိုနားထောင်၍ နှိမ့်ချလျက်နေကြလော့၊ [“သင်တို့အပေါ် သူတို့၏အခွင့်အာဏာကို မပြတ်အသိအမှတ်ပြုလော့၊” အကျယ်ဖွင့်ဆိုသည့်သမ္မာကျမ်း] သူတို့သည် ကိုယ်တိုင်စစ်ကြောခြင်းကို ခံရသောသူကဲ့သို့၊ သင်တို့စိတ်ဝိညာဉ်၏အကျိုးအလိုငှာ စောင့်နေကြ၏။ သင်တို့အကျိုးကို မဖြစ်စေတတ်သော ဝမ်းနည်းခြင်းမရှိ၊ ဝမ်းမြောက်ခြင်းရှိ၍၊ သူတို့သည် စစ်ကြောခြင်းကိုခံရမည်အကြောင်း သတိပြုလျက်နေကြလော့။”—ဟေဗြဲ ၁၃:၇၊ ၁၇။

ထိုညွှန်ကြားချက်ကို လျစ်လျူရှုသောအခါ အဘယ်အရာဖြစ်သွားသနည်း။ အစောပိုင်းခရစ်ယာန်အသင်းတော်မှ အဖွဲ့ဝင်အချို့သည် ထိုသို့ပြုခဲ့ကြရာ အယူဖောက်ပြန်သူများဖြစ်လာကြ၏။ ဟုမေနဲနှင့်ဖိလက်တို့မှာ အချို့၏ယုံကြည်ခြင်းကို မှောက်လှန်ခဲ့ကာ အချည်းနှီးစကားဖြင့် “တရားမဲ့” စေခဲ့ကြသည်။ သူတို့အတိအလင်းပြောဆိုသောစကားများမှ တစ်ခုမှာ သေလွန်သူတို့သည် ဝိညာဉ်ရေးအရ သို့မဟုတ် ပုံဆောင်သဘောဖြင့် ထမြောက်နှင့်ကြပြီဖြစ်ရာ ဘုရားသခင့်နိုင်ငံတော်အောက် အနာဂတ်တွင် ထပ်မံထမြောက်စရာ လုံးဝမလိုဟူ၍ဖြစ်သည်။—၂ တိမောသေ ၂:၁၆-၁၈။

ခန့်အပ်ခံအခွင့်အာဏာသည် ကယ်တင်ရန်ရောက်ရှိလာခဲ့သည်။ ခရစ်ယာန်အကြီးအကဲများသည် ခရစ်တော်၏ကိုယ်စားလှယ်တော်များအဖြစ် သမ္မာကျမ်းစာ၏အခွင့်အာဏာကို အသုံးပြုခဲ့ကြခြင်းကြောင့် ထိုသို့သော အငြင်းပွားမှုများ မှားကြောင်းကို ချေပနိုင်ခဲ့ကြသည်။ (၂ တိမောသေ ၃:၁၆၊ ၁၇) ‘အမှန်တရား၏အမှီတံကဲနှင့် တည်ရာ’ အဖြစ်ဖော်ပြခံရသော ခရစ်ယာန်အသင်းတော်သည်လည်း ယနေ့ အလားတူပင်ဖြစ်သည်။ (၁ တိမောသေ ၃:၁၅) ကျွန်ုပ်တို့အတွက် သမ္မာကျမ်းစာ စာမျက်နှာများအတွင်း ထိန်းသိမ်းထားပေးသော ယုံကြည်စိတ်ချရသည့် “စင်ကြယ်သောတရားစကားအချုပ်အခြာကို” မှားယွင်းသောသွန်သင်ချက်များက ဘယ်သောအခါမျှ လုယူဖျက်ဆီးခွင့်ရမည်မဟုတ်ပါ။—၂ တိမောသေ ၁:၁၃၊ ၁၄။

ဤလောက၌ အခွင့်အာဏာအပေါ်လေးစားမှုမှာ လျင်မြန်စွာပျောက်ကွယ်သွားနေစဉ် ခရစ်ယာန်များအနေဖြင့် ကျွန်ုပ်တို့သည် ရပ်ကွက်အတွင်း၊ မိသားစုအတွင်း၊ ခရစ်ယာန်အသင်းတော်အတွင်းရှိ လျောက်ပတ်သည့်အခွင့်အာဏာများသည် ကျွန်ုပ်တို့အကျိုးအတွက်တည်ရှိနေကြောင်းကို အသိအမှတ်ပြုကြသည်။ အခွင့်အာဏာကိုလေးစားခြင်းသည် ကျွန်ုပ်တို့၏ ကာယရေး၊ စိတ်ဓာတ်ရေးနှင့် ဝိညာဉ်ရေးကျန်းမာဖို့အတွက် မရှိမဖြစ်လိုအပ်ပါသည်။ ယင်းကဲ့သို့ ဘုရားသခင်ပေးအခွင့်အာဏာကို လက်ခံ၍လေးစားခြင်းဖြင့် ကျွန်ုပ်တို့၏ထာဝရကောင်းကျိုးအတွက် အကြီးမြတ်ဆုံးသောအခွင့်အာဏာပိုင်များဖြစ်သည့် ယေဟောဝါဘုရားသခင်နှင့် ယေရှုခရစ်တို့၏ကာကွယ်မှုကို ခံရကြမည်။—ဆာလံ ၁၁၉:၁၆၅; ဟေဗြဲ ၁၂:၉။

[အောက်ခြေမှတ်ချက်များ]

[စာမျက်နှာ ၅ ပါ အကျဉ်းဖော်ပြချက်]

သမ္မာကျမ်းစာ၌ မိသားစုအခွင့်အာဏာနှင့်ပတ်သက်၍ သိသင့်သိအပ်ရာ မြောက်မြားစွာပါရှိ

[စာမျက်နှာ ၆ ပါ ရုပ်ပုံ]

ကြင်ဖော်မဲ့မိဘများသည် ယေဟောဝါဘုရားသခင်နှင့် ယေရှုခရစ်၏ အခွင့်အာဏာကို တိုက်ရိုက်ရည်ညွှန်းသုံးနိုင်ကြ

[စာမျက်နှာ ၇ ပါ ရုပ်ပုံ]

ခရစ်ယာန်များအနေဖြင့် မိသားစုအတွင်း၊ ခရစ်ယာန်အသင်းတော်အတွင်း၊ ရပ်ကွက်များအတွင်းရှိသော လျောက်ပတ်သည့် အခွင့်အာဏာများမှာ သူတို့၏အကျိုးအတွက်တည်ရှိနေကြောင်းကို အသိအမှတ်ပြုကြ

[Picture Credit Line on page 4]

Photo by Josh Mathes, Collection of the Supreme Court of the United States