စာရှုသူများထံမှမေးခွန်းလွှာ

သေလွန်သူတို့အတွက် နှစ်ခြင်းကားအဘယ်နည်း။

တမန်တော်ပေါလုသည် ကောင်းကင်ထမြောက်ခြင်းအကြောင်း ရေးသားရာတွင် အလွန်စိတ်ဝင်စားစရာ အပိုဒ်တစ်ပိုဒ်ကို ရေးခဲ့သည်။ ကျွန်ုပ်တို့ ဤသို့ဖတ်ရသည်– “သေလွန်သောသူတို့သည် ထမြောက်ခြင်းအလျှင်းမရှိလျှင် သေလွန်သောသူတို့၏ကိုယ်စား [နှစ်ခြင်း]ကိုခံသောသူတို့သည် အဘယ်သို့ပြုရမည်နည်း။ သေလွန်သောသူတို့၏ကိုယ်စား အဘယ်ကြောင့် [နှစ်ခြင်း]ကိုခံရကြသနည်း။” ထို့ပြင် အဆိုပါအပိုဒ်ကို ယေရုရှလင်ကျမ်းစာသစ် ကဤသို့ပြန်ဆိုသည်– “သေလွန်သောသူတို့အတွက် နှစ်ခြင်းခံသူများသည် အဘယ်အရာပြုနေကြသနည်း။ သေလွန်သောသူတို့သည် ထမြောက်ခြင်းအလျှင်းမရှိလျှင် သူတို့အတွက် နှစ်ခြင်းခံခြင်းသည် အဘယ်အကျိုးရှိမည်နည်း။”—၁ ကောရိန္သု ၁၅:၂၉။

ဤတွင် နှစ်ခြင်းမခံဘဲ သေလွန်သွားသောသူများ၏ကိုယ်စား အသက်ရှင်နေသူများက နှစ်ခြင်းခံပေးရန်ကို ပေါလုဆိုလိုနေခြင်းလော။ အဆိုပါကျမ်းချက်များနှင့် တခြားဘာသာပြန်ကျမ်းတချို့က ထိုသို့ဆိုလိုပုံရမည်။ သို့သော် အဆိုပါကျမ်းနှစ်ကျမ်းစလုံးနှင့် ပေါလုအသုံးပြုရေးသားခဲ့သော မူရင်းဂရိကျမ်းကို သေချာစွာဆန်းစစ်ကြည့်လျှင် ထိုသို့မဆိုလိုကြောင်းပေါ်သည်။ ပေါလုဆိုလိုသည်မှာ ဝိညာဉ်တော်ဖွားခရစ်ယာန်များသည် ခရစ်တော်နည်းတူ သေသည်တိုင် သမာဓိစောင့်သိမည့် ဘဝလမ်းစဉ်တွင် နှစ်ခြင်း သို့မဟုတ် စုံးစုံးမြုပ်ခြင်းဖြစ်၏။ ထို့နောက် သူတို့သည် ကိုယ်တော့်နည်းတူ ဝိညာဉ်အသက်တာသို့ ရှင်ပြန်ထမြောက်လာကြလိမ့်မည်။

သမ္မာကျမ်းစာက ဤရှင်းပြချက်ကို ထောက်ခံအတည်ပြု၏။ ရောမမြို့သားများထံ ပေါလုပေးပို့သောစာတွင် ဤသို့ရေးသားခဲ့သည်– “ယေရှုခရစ်၌ [နှစ်ခြင်း]ကိုခံသောသူရှိသမျှတို့သည် [ကိုယ်တော်၏] အသေခံတော်မူခြင်း၌ [နှစ်ခြင်း]ကိုခံကြသည်ဟု သင်တို့မသိသလော။” (ရောမ ၆:၃) ဖိလိပ္ပိမြို့သားများထံ ပေါလုပေးပို့သောစာတွင် သူ့အကြောင်းကိုသူ ဤသို့ဆိုခဲ့သည်– “သေခြင်းမှထမြောက်သောအခွင့်ကို ငါရနိုင်ကောင်းလျှင် ကိုယ်တော်သည် အသေခံတော်မူသည်နည်းတူ၊ ငါသည်လည်း အသေခံ၍ . . . ဆင်းရဲခံတော်မူခြင်းကို ဆက်ဆံ၍ခံ” ရ၏။ (ဖိလိပ္ပိ ၃:၁၁) ခရစ်တော်၏ဝိညာဉ်တော်ဖွားနောက်လိုက်တစ်ဦး၏ အသက်တာသည် စမ်းသပ်မှုအောက်၌ သမာဓိစောင့်သိလျက်နေရ၏၊ နေ့စဉ် သေခြင်းနှင့်ရင်ဆိုင်လျက်နေရပြီး နောက်ဆုံးတွင် သမာဓိစောင့်သိစွာ သေဆုံး၍ ကောင်းကင်ထမြောက်ခြင်းရရှိသည်ဟု ပေါလုဖော်ပြခဲ့သည်။

မှတ်သားထိုက်သည်မှာ နှစ်ခြင်းခံထားသူများနှင့်ဆက်နွှယ်သော သေခြင်းကို တိုက်ရိုက်ဖော်ပြထားသည့် အဆိုပါကျမ်းများနှင့် တခြားကျမ်းများက သေလွန်သူများကိုမဟုတ်ဘဲ နှစ်ခြင်းခံပြီးသား အသက်ရှင်သူများကို ရည်ညွှန်းနေခြင်းဖြစ်သည်။ ပေါလုသည် ဝိညာဉ်တော်ဖွားခရစ်ယာန်ချင်းများအား ဤသို့ဆိုခဲ့သေးသည်– “[နှစ်ခြင်း]အားဖြင့် ထိုသခင်နှင့်အတူ သင်္ဂြိုဟ်ခြင်းကိုခံကြ၏။ ခရစ်တော်ကို သေခြင်းမှထမြောက်စေတော်မူသော ဘုရားသခင်၏ ပြုပြင်အားထုတ်တော်မူခြင်းကို ယုံကြည်သောအားဖြင့်၊ [နှစ်ခြင်း]ကိုခံ၍ ထိုသခင်နှင့်အတူ ထမြောက်ခြင်းသို့ ရောက်ကြ၏။”—ကောလောသဲ ၂:၁၂။

ကျမ်းစာပြန်ဆိုချက်အသီးသီးတွင် ၁ ကောရိန္သု ၁၅:၂၉ ပါ “ကိုယ်စား” သို့မဟုတ် “အတွက်” ဟုဘာသာပြန်ဆိုထားသော ဂရိဝိဘတ် (hy·perʹ၊ ဟိုင်ပါ) သည် “ရည်ရွယ်ချက်အတွက်” ဟုလည်း အဓိပ္ပာယ်ရနိုင်၏။ ထို့ကြောင့် သန့်ရှင်းသောကျမ်းစာစောင်များ၏ ကမ္ဘာသစ်ဘာသာပြန်ကျမ်းက တခြားကျမ်းချက်များနှင့်အညီ ဤအခန်းငယ်ကို မှန်ကန်စွာ ဤသို့ပြန်ဆို၏– “သေသူများဖြစ်ဖို့ရည်ရွယ်လျက် နှစ်ခြင်းခံခဲ့သူတို့သည် အဘယ်သို့ပြုမည်နည်း။ လူသေများအလျှင်းထမြောက်မည်မဟုတ်လျှင် သူတို့သည်လည်း ယင်းသို့ဖြစ်ရန် ရည်ရွယ်ချက်အတွက် အဘယ်ကြောင့် နှစ်ခြင်းခံကြသနည်း။”