ဘုရားသခင်နဲ့ဆိုင်တဲ့ အသိပညာ မရဖို့ တားဆီးနေတဲ့ အယူအဆတွေကို ဖြိုဖျက်ပါ

၁။ ဘိသိက်ခံ ခရစ်ယာန်တွေကို တမန်တော် ပေါလု ဘယ်လို သတိပေးသလဲ။

“ဒီလောကစနစ်ရဲ့ ပုံသွင်းမှုကို မခံပါနဲ့တော့” လို့ တမန်တော် ပေါလု သတိပေးတယ်။ (ရော. ၁၂:၂) ပထမရာစု ခရစ်ယာန်တွေကို ပေါလု ပြောနေတာ။ ဘုရားသခင်ဆီ ဆက်ကပ်အပ်နှံထားပြီး စွမ်းအားတော်နဲ့ ဘိသိက်ပေးခံရတဲ့ အမျိုးသား/သမီးတွေကို ပေါလု ဘာကြောင့် ပြင်းပြင်းထန်ထန် သတိပေးရတာလဲ။—ရော. ၁:၇။

၂-၃။ ယေဟောဝါဆီကနေ ကျွန်တော်တို့ ဝေးကွာသွားအောင် စာတန် ဘယ်လို ကြိုးစားနေသလဲ။ ကျွန်တော်တို့စိတ်ထဲ “အခိုင်အမာ အမြစ်စွဲနေတာတွေကို” ဘယ်လို နုတ်ပစ်နိုင်သလဲ။

^၂ ခရစ်ယာန်တချို့ဟာ စာတန့်လောကရဲ့ အကျိုးမရှိတဲ့ အယူအဆတွေ၊ အတွေးအခေါ်တွေရဲ့ လွှမ်းမိုးမှုခံနေရလို့ ပေါလု စိုးရိမ်နေတာ။ (ဧ. ၄:၁၇-၁၉) ဘယ်သူမဆို အဲဒီလို လွှမ်းမိုးမှု ခံရနိုင်တယ်။ ဒီလောကရဲ့ဘုရား စာတန်က ယေဟောဝါဆီကနေ ကျွန်တော်တို့ ဝေးကွာသွားအောင် နည်းအမျိုးမျိုး သုံးနေတယ်။ တစ်နည်းကတော့ ရည်မှန်းချက်ကြီးတဲ့၊ ထင်ပေါ်လိုတဲ့ဆန္ဒကို အမြတ်ထုတ်ခြင်း ဖြစ်တယ်။ သူ့လို တွေးခေါ်လာအောင် ကျွန်တော်တို့ရဲ့ နောက်ခံ၊ ယဉ်ကျေးမှု၊ ပညာရေးကိုတောင် သုံးနိုင်တယ်။

^၃ ကျွန်တော်တို့စိတ်ထဲ “အခိုင်အမာ အမြစ်စွဲနေတာတွေကို” နုတ်ပစ်ဖို့ ဖြစ်နိုင်မလား။ (၂ ကော. ၁၀:၄) “လူတွေရဲ့ မှားယွင်းတဲ့ အတွေးအခေါ်တွေ၊ ဘုရားသခင်နဲ့ဆိုင်တဲ့ အသိပညာ မရနိုင်ဖို့ သူတို့ကို တားဆီးနေတဲ့ ထောင်လွှားတဲ့ အယူအဆတွေကို ကျွန်တော်တို့ ဖြိုဖျက်နေတာ။ လူတွေရဲ့ အတွေးအခေါ်တိုင်းကို အနိုင်ယူပြီး ခရစ်တော်ကို နာခံလာအောင် လုပ်နေကြတာ” လို့ ပေါလု ပြောတယ်။ (၂ ကော. ၁၀:၅) မှန်ပါတယ်။ မှားယွင်းတဲ့ အတွေးအခေါ်တွေကို ယေဟောဝါရဲ့ အကူအညီနဲ့ ထိန်းချုပ်နိုင်ပါတယ်။ ဆေးဟာ အဆိပ်သင့်တာကို ပြေစေနိုင်သလို ကျမ်းစာဟာ စာတန့်လောကရဲ့ အဆိပ်သင့်မှုကို ပြေစေနိုင်ပါတယ်။

“စိတ်သဘောကို ပြုပြင်ပြောင်းလဲကြပါ”

၄။ အမှန်တရားကို စလက်ခံချိန်မှာ ကျွန်တော်တို့ ဘာအပြောင်းအလဲတွေ လုပ်ခဲ့ကြသလဲ။

^၄ ကျမ်းစာ အမှန်တရားကို စလက်ခံပြီး ယေဟောဝါကို ဝတ်ပြုဖို့ ဆက်ကပ်အပ်နှံချိန်မှာ လုပ်ခဲ့တဲ့ အပြောင်းအလဲတွေကို စဉ်းစားကြည့်ပါ။ ကျွန်တော်တို့ အများစုက အကျင့်ဆိုးတချို့ကို စွန့်ခဲ့ကြတယ်။ (၁ ကော. ၆:၉-၁၁) အဲဒီလို အကျင့်ဆိုးတွေကို စွန့်နိုင်ဖို့ ယေဟောဝါ ကူညီပေးလို့ ကျေးဇူးတင်စရာပါပဲ။

၅။ ရောမ ၁၂:၂ မှာ ဘယ်အချက်နှစ်ချက်ကို လုပ်ဖို့ ပြောထားသလဲ။

^၅ အပြောင်းအလဲတွေ ထပ်လုပ်ဖို့ မလိုတော့ဘူးလို့ မယူဆသင့်ဘူး။ နှစ်ခြင်းမခံခင်က လုပ်ခဲ့တဲ့ ကြီးလေးတဲ့ အပြစ်တွေကို မလုပ်တော့ပေမဲ့ အကျင့်ဟောင်းတွေ ပြန်ကျင့်မိစေနိုင်တဲ့ အခြေအနေမှန်သမျှကို ရှောင်ဖို့ လိုတယ်။ ဘယ်လို ရှောင်နိုင်မလဲ။ “ဒီလောကစနစ်ရဲ့ ပုံသွင်းမှုကို မခံပါနဲ့တော့။ . . . ခင်ဗျားတို့ရဲ့ စိတ်သဘောကို ပြုပြင်ပြောင်းလဲကြပါ” လို့ ပေါလု ပြောတယ်။ (ရော. ၁၂:၂) ဒါကြောင့် အချက်နှစ်ချက်ကို လုပ်ဖို့ လိုတယ်။ ပထမ၊ ဒီလောကရဲ့ “ပုံသွင်းမှုကို မခံပါနဲ့တော့။” ဒုတိယ၊ စိတ်သဘောကို “ပြုပြင်ပြောင်းလဲ” ရမယ်။

၆။ မဿဲ ၁၂:၄၃-၄၅ မှာပါတဲ့ ယေရှုရဲ့ စကားတွေကနေ ဘာသင်ယူရသလဲ။

^၆ ပေါလု ပြောတဲ့ ပြုပြင်ပြောင်းလဲခြင်းမှာ ပုံပန်းသွင်ပြင် ပြောင်းလဲရုံထက်မက ပါဝင်တယ်။ ကျွန်တော်တို့ရဲ့ ဘဝကဏ္ဍအားလုံးနဲ့ သက်ဆိုင်တယ်။ (“ပြုပြင်ပြောင်းလဲတာလား၊ ပြောင်းလဲ ယောင်ဆောင်တာလား” လေးထောင့်ကွက်ကို ကြည့်ပါ။) ကျွန်တော်တို့ရဲ့ သဘောထား၊ ခံစားချက်၊ ဆန္ဒစတဲ့ စိတ်သဘောကို ပြုပြင်ပြောင်းလဲရမယ်။ ‘ခရစ်ယာန်ဖြစ်လာဖို့ ငါပြောင်းလဲတာ အပေါ်ယံလောက်ပဲလား။ စိတ်သဘောထားကိုပါ ပြောင်းလဲတာလား’ လို့ ကိုယ့်ကိုယ်ကိုယ် မေးပါ။ မဿဲ ၁၂:၄၃-၄၅ မှာ ယေရှုက ကျွန်တော်တို့ လုပ်ရမယ့်အရာကို ဖော်ပြတယ်။ (ဖတ်ပါ။) ယေရှုရဲ့စကားက– ‘မှားယွင်းတဲ့ အတွေးအခေါ်တွေကို ထုတ်ပစ်ရုံနဲ့ မပြီးဘူး။ ဘုရား နှစ်သက်တဲ့ အတွေးအခေါ်တွေကိုလည်း ဖြည့်ပေးရမယ်’ ဆိုတဲ့ အရေးကြီးတဲ့ အမှန်တရားကို ပေါ်လွင်စေတယ်။

“စိတ်သဘောကို အသစ်ဖြစ်အောင် အမြဲပြုပြင်”

၇။ စိတ်နှလုံးကို ဘယ်လို ပြောင်းလဲနိုင်မလဲ။

^၇ စိတ်သဘောကို ပြောင်းလဲဖို့ ဖြစ်နိုင်မလား။ “ခင်ဗျားတို့က စိတ်သဘောကို အသစ်ဖြစ်အောင် အမြဲပြုပြင်နေရမယ်။ စစ်မှန်တဲ့ ဖြောင့်မတ်ခြင်း၊ သစ္စာစောင့်သိခြင်းနဲ့အညီ အလိုတော်အတိုင်း ဘုရားသခင် ဖန်ဆင်းတဲ့ စရိုက်သစ်ကိုလည်း ဝတ်ဆင်ရမယ်” လို့ ကျမ်းစာ ပြောတယ်။ (ဧ. ၄:၂၃၊ ၂၄) ဒါကြောင့် စိတ်သဘောကို ပြောင်းလဲနိုင်ပါတယ်။ ဒါပေမဲ့ မလွယ်ဘူး။ မှားယွင်းတဲ့ ဆန္ဒတွေ၊ လုပ်ရပ်တွေကို ချိုးနှိမ်ရုံထက်မက လုပ်ဖို့ လိုတယ်။ “စိတ်သဘော” ကို ပြောင်းလဲရမယ်။ အဲဒီထဲမှာ လိုအင်ဆန္ဒ၊ သဘောထား၊ စိတ်ရင်းတွေ ပါဝင်တယ်။ အဲဒီလိုလုပ်ဖို့ အမြဲ ကြိုးစားနေရမယ်။

၈-၉။ အတွင်းစိတ်သဘော ပြောင်းလဲဖို့ လိုအပ်ကြောင်း ပေါ်လွင်စေတဲ့ ညီအစ်ကိုတစ်ယောက်ရဲ့ တွေ့ကြုံမှုကို ပြောပြပါ။

^၈ အကြမ်းဖက်တတ်တဲ့  နောက်ခံရှိတဲ့  ညီအစ်ကို တစ်ယောက်အကြောင်း စဉ်းစားကြည့်ပါ။ အရက်သောက်၊ ရန်ဖြစ်တာကို စွန့်ပြီး နှစ်ခြင်းခံဖို့ အရည်အချင်း ပြည့်မီလာတယ်။ ဒါဟာ သူနေထိုင်တဲ့ ရပ်ကွက်လေးမှာ သက်သေခံချက်ကောင်း ဖြစ်စေတယ်။ နှစ်ခြင်းခံပြီး မကြာခင် တစ်ညနေမှာ မမျှော်လင့်တဲ့ စမ်းသပ်မှုတစ်ခု ကြုံခဲ့ရတယ်။ အရက်သမားတစ်ယောက် အိမ်ရောက်လာပြီး ထိုးကြိတ်ဖို့ စိန်ခေါ်တယ်။ အစမှာတော့ ညီအစ်ကို စိတ်ထိန်းနိုင်တယ်။ ဒါပေမဲ့ ယေဟောဝါရဲ့ နာမည်ကို စော်ကားလာတဲ့အခါမှာတော့ ညီအစ်ကိုသစ်ခမျာ ဒေါသ မထိန်းနိုင်ဘဲ ထိုးကြိတ်ပစ်လိုက်တယ်။ ပြဿနာက ဘာလဲ။ ကျမ်းစာလေ့လာတဲ့အတွက် ကြမ်းတမ်းတဲ့ စရိုက်ကို ချိုးနှိမ်နိုင်ပေမဲ့ စိတ်သဘောကိုတော့ မပြောင်းလဲနိုင်သေးဘူး။

^၉ ဒါပေမဲ့ ဒီညီအစ်ကို အလျှော့မပေးဘူး။ (ပညာ. ၂၄:၁၆) အကြီးအကဲတွေရဲ့ အကူအညီကြောင့် တိုးတက်လာတယ်။ တဖြည်းဖြည်း အကြီးအကဲအဖြစ် အရည်အချင်း ပြည့်မီလာတယ်။ တစ်ညနေ၊ နိုင်ငံတော်ခန်းမ အပြင်ဘက်မှာ အရင်လို စိန်ခေါ်မှုမျိုး ကြုံရပြန်တယ်။ အရက်သမားတစ်ယောက်က တခြားအကြီးအကဲကို ထိုးကြိတ်ဖို့ လုပ်နေတယ်။ ညီအစ်ကို ဘယ်လို တုံ့ပြန်သလဲ။ အရက်သမားကို အေးအေးဆေးဆေး ဖျောင်းဖျပြီး အိမ်ပြန်ပို့ပေးလိုက်တယ်။ ဘာကြောင့် ဒီလို တုံ့ပြန်နိုင်တာလဲ။ ညီအစ်ကိုဟာ စိတ်သဘောကို ပြုပြင်ပြောင်းလဲနိုင်ခဲ့လို့ပဲ။ ညီအစ်ကိုရဲ့ အတွင်းစိတ်သဘော ပြောင်းသွားပြီး သင့်သင့်မြတ်မြတ် နေတတ်သူ၊ နှိမ့်ချသူ ဖြစ်လာလို့ပဲ။ ဒါဟာ ယေဟောဝါကို ချီးမွမ်းမှု ဖြစ်စေတယ်။

၁၀။ အတွင်းစိတ်သဘောကို ပြောင်းလဲဖို့ ဘာလုပ်ရမလဲ။

^၁၀ အဲဒီလို အပြောင်းအလဲတွေက ညတွင်းချင်း၊ အလိုလို ဖြစ်လာတာ မဟုတ်ဘူး။ နှစ်များစွာ “အစွမ်းကုန် ကြိုးစားအားထုတ်” ဖို့ လိုအပ်နိုင်တယ်။ (၂ ပေ. ၁:၅) အမှန်တရားမှာ နှစ်ပေါင်းများစွာ ရှိနေရုံနဲ့ ပြောင်းလဲမှာ မဟုတ်ဘူး။ အတွင်းစိတ်သဘောကို ပြောင်းလဲဖို့ အစွမ်းကုန် ကြိုးစားရမယ်။ ပြောင်းလဲဖို့ ကူညီပေးနိုင်တဲ့ အချက်တချို့ကို ဆွေးနွေးကြည့်ကြစို့။

စိတ်သဘောကို ပြုပြင်ပြောင်းလဲနိုင်ပုံ

၁၁။ ဆုတောင်းခြင်းက ကျွန်တော်တို့ရဲ့ အတွင်းစိတ်သဘော ပြောင်းလဲဖို့ ဘယ်လို ကူညီပေးသလဲ။

^၁၁ ဆုတောင်းခြင်းဟာ အရေးကြီးတဲ့ ပထမအချက် ဖြစ်တယ်။ “အို ဘုရားသခင်၊ ကျွန်တော့်ရင်ထဲမှာ စင်ကြယ်တဲ့ စိတ်နှလုံးကို ဖန်ဆင်းပေးပါ။ မယိမ်းယိုင်တတ်တဲ့ စိတ်သဘောအသစ်ကို ထည့်သွင်းပေးပါ” လို့ ဆာလံဆရာလို ဆုတောင်းရမယ်။ (ဆာ. ၅၁:၁၀) စိတ်သဘောကို ပြုပြင်ပြောင်းလဲဖို့ လိုအပ်ကြောင်း အသိအမှတ်ပြုပြီး ယေဟောဝါဆီ အကူအညီ တောင်းရမယ်။ ယေဟောဝါ ကူညီပေးမယ်လို့ ဘာကြောင့် ယုံကြည်စိတ်ချနိုင်သလဲ။ ယေဇကျေလခေတ်က ခေါင်းမာတဲ့ အစ္စရေးတွေနဲ့ပတ်သက်ပြီး ယေဟောဝါ ဒီလို ကတိပေးတယ်– “သူတို့ကို စည်းလုံးညီညွတ်စေမယ်။ သူတို့အထဲမှာ စိတ်သဘောသစ်ကို သွင်းပေးမယ်။ . . . အသွေးအသားနှလုံး [ဘုရားသခင့် လမ်းညွှန်ချက်ကို လက်ခံလွယ်တဲ့ နှလုံးသား] ပေးမယ်။” (ယေဇ. ၁၁:၁၉၊ အောက်ခြေမှတ်ချက်) အစ္စရေးတွေ စိတ်သဘောထား ပြောင်းလဲနိုင်ဖို့ ယေဟောဝါ လိုလိုလားလား ကူညီပေးခဲ့သလို ကျွန်တော်တို့ကိုလည်း ကူညီပေးမှာဖြစ်တယ်။

၁၂-၁၃။ (က) ဆာလံ ၁၁၉:၅၉ အရ ဘာတွေကို တွေးတောဆင်ခြင်ရမလဲ။ (ခ) ကိုယ့်ကိုယ်ကိုယ် ဘယ်မေးခွန်းတွေ မေးသင့်သလဲ။

^၁၂ တွေးတောဆင်ခြင်ခြင်းက အရေးပါတဲ့ ဒုတိယအချက် ဖြစ်တယ်။ နေ့တိုင်း ကျမ်းစာဖတ်တဲ့အခါ ဘယ်အတွေးအခေါ်နဲ့ ခံစားချက်တွေကို ပြောင်းလဲဖို့ လိုနေသလဲဆိုတာ အချိန်ယူ တွေးတောပါ။ (ဆာလံ ၁၁၉:၅၉ ကိုဖတ်ပါ။ ဟီ. ၄:၁၂။ ယာ. ၁:၂၅) ကိုယ့်မှာ လောကဆန်တဲ့ အတွေးအခေါ်၊ ခံစားချက်တွေ ရှိနေသလားဆိုတာ သိအောင် စစ်ဆေးရမယ်။ အားနည်းချက်တွေကို ရိုးသားစွာ ဝန်ခံပြီး ကြိုးစားတိုက်လှန်ရမယ်။

^၁၃ ဥပမာ၊ ကိုယ့်ကိုယ်ကိုယ် ဒီလိုမေးပါ– ‘ငါ့ဆီမှာ မနာလိုတတ်တဲ့စိတ် ရှိနေသလား။’ (၁ ပေ. ၂:၁) ‘ငါ့ရဲ့ နောက်ခံ၊ ပညာရေး၊ ငွေကြေး အခြေအနေကြောင့် မာနတက်နေသလား။’ (ပညာ. ၁၆:၅) ‘ကိုယ့်မှာရှိတာတွေ မရှိတဲ့သူကို အထင်သေးသလား။ ကိုယ်နဲ့ လူမျိုး မတူသူတွေကို အထင်သေးသလား။’ (ယာ. ၂:၂-၄) ‘စာတန့်လောကရဲ့ ကမ်းလှမ်းမှုတွေကို သဘောကျနေသလား။’ (၁ ယော. ၂:၁၅-၁၇) ‘အကျင့်ပျက်၊ အကြမ်းဖက် ဖျော်ဖြေမှုတွေကို ငါ နှစ်သက်နေသလား။’ (ဆာ. ၉၇:၁၀။ ၁၀၁:၃။ အာ. ၅:၁၅) အဲဒီမေးခွန်းတွေရဲ့ အဖြေက တိုးတက်ဖို့ လိုနေတဲ့ အပိုင်းကို သိစေနိုင်တယ်။ ‘အခိုင်အမာ အမြစ်စွဲနေတဲ့’ အတွေးအခေါ်တွေကို အနိုင်ယူခြင်းအားဖြင့် ကောင်းကင်ဖခင်ကို ပျော်ရွှင်စေနိုင်တယ်။—ဆာ. ၁၉:၁၄။

၁၄။ အပေါင်းအသင်းကောင်းတွေ  ရွေးချယ်ဖို့  ဘာကြောင့်  အရေးကြီးသလဲ။

^၁၄ အပေါင်းအသင်းကောင်းတွေကို ရွေးချယ်ပေါင်းတာက အရေးပါတဲ့ တတိယအချက် ဖြစ်တယ်။ အပေါင်းအသင်းတွေဟာ ကျွန်တော်တို့အပေါ် အတော် ဩဇာညောင်းနိုင်တယ်။ (ပညာ. ၁၃:၂၀) အလုပ်မှာ၊ ကျောင်းမှာ ကျွန်တော်တို့ ထိတွေ့ဆက်ဆံနေရသူတွေက ဘုရားနှစ်သက်တဲ့ အတွေးအခေါ် ရှိဖို့ အားပေးသူတွေ မဟုတ်ကြဘူး။ ဒါပေမဲ့ ခရစ်ယာန် အစည်းအဝေးတွေမှာ အပေါင်းအသင်းကောင်းတွေ ရနိုင်ပါတယ်။ အဲဒီမှာ “မေတ္တာစိတ်ရှိစေဖို့၊ အကျင့်ကောင်းတွေ ကျင့်စေဖို့” လှုံ့ဆော်ခံရတယ်။—ဟီ. ၁၀:၂၄၊ ၂၅။

“ယုံကြည်တဲ့စိတ်နဲ့ အခိုင်အမာ ရပ်တည်ကြပါ”

၁၅-၁၆။ ကျွန်တော်တို့ရဲ့ အတွေးအခေါ် ပြောင်းလဲဖို့ စာတန် ဘယ်လို ကြိုးစားနေသလဲ။

^၁၅ ကျွန်တော်တို့ရဲ့ အတွေးအခေါ်ကို ပြောင်းလဲအောင် လုပ်ဖို့ စာတန် စိတ်ပိုင်းဖြတ်ထားတယ်။ ကျွန်တော်တို့ရဲ့ စိတ်ထဲက ကျမ်းစာ အမှန်တရားကို ဖျက်ဆီးဖို့ နည်းမျိုးစုံ သုံးနေတယ်။

^၁၆ ဧဒင်ဥယျာဉ်မှာ ဧဝကို မေးခဲ့တဲ့ “ဘုရားသခင် တကယ်ပဲ ပြောသလား” ဆိုတဲ့ မေးခွန်းမျိုးကိုပဲ စာတန် ဆက်သုံးနေတယ်။ (က. ၃:၁) စာတန် ထိန်းချုပ်ထားတဲ့ လောကမှာ သံသယဝင်စေတဲ့ ဒီလို မေးခွန်းတွေ ကြားရလေ့ရှိတယ်– ‘လိင်တူလက်ထပ်တာကို ဘုရားသခင် တကယ်ပဲ မနှစ်သက်တာလား။ ခရစ္စမတ်ပွဲ၊ မွေးနေ့ပွဲ ကျင်းပတာကို ဘုရားသခင် တကယ်ပဲ မကြိုက်တာလား။ သွေးမသွင်းဖို့ ဘုရားသခင် တကယ်ပဲ တောင်းဆိုသလား။ နှင်ထုတ်ခံရတဲ့ ဆွေမျိုး၊ မိတ်ဆွေတွေနဲ့ မပေါင်းဖို့ မေတ္တာရှင် ဘုရားသခင် တကယ်ပဲ တောင်းဆိုသလား။’

၁၇။ ယုံကြည်ချက်ကို သံသယဝင်စေတဲ့ မေးခွန်းတွေ အမေးခံရတဲ့အခါ ဘာလုပ်သင့်သလဲ။ ဘာရလဒ် ရမယ်လို့ ကောလောသဲ ၂:၆၊ ၇ မှာ ပြောသလဲ။

^၁၇ ကိုယ့်ယုံကြည်ချက်တွေကို စိတ်ချဖို့ လိုတယ်။ အရေးကြီးတဲ့ မေးခွန်းတွေကို အဖြေမရှာရင် သံသယဝင်လာနိုင်တယ်။ သံသယတွေဟာ အတွေးအခေါ်နဲ့ ယုံကြည်ခြင်းကို တဖြည်းဖြည်း ပျက်စီးစေနိုင်တယ်။ ဒါဆို ဘာလုပ်ဖို့ လိုသလဲ။ “ဘုရားသခင်ရဲ့ ကောင်းမြတ်တဲ့၊ လက်ခံဖွယ်ဖြစ်တဲ့၊ ပြီးပြည့်စုံလင်တဲ့ အလိုတော်ကို” ကောင်းကောင်းသိနိုင်ဖို့ စိတ်သဘောကို ပြုပြင်ပြောင်းလဲပါလို့ ကျမ်းစာ ပြောတယ်။ (ရော. ၁၂:၂) ပုံမှန် လေ့လာမှုလုပ်မှ ကျမ်းစာအမှန်တရားကို ကောင်းကောင်း သိနိုင်မယ်။ ယေဟောဝါရဲ့ စံနှုန်းတွေ မှန်ကန်ကြောင်း အပြည့်အဝ စိတ်ချနိုင်မယ်။ ဒါဆိုရင် နက်နက်ရှိုင်းရှိုင်း အမြစ်စွဲနေတဲ့ သစ်ပင်လို “ယုံကြည်တဲ့စိတ်နဲ့ အခိုင်အမာ ရပ်တည်” နိုင်ပါလိမ့်မယ်။—ကောလောသဲ ၂:၆၊ ၇ ကိုဖတ်ပါ။

၁၈။ စာတန့်လောကရဲ့ အဆိပ် မသင့်အောင် ဘာက ကူညီပေးမလဲ။

^၁၈ ယုံကြည်ခြင်း ခိုင်မာအောင် သင့်ကိုယ်စား ဘယ်သူမှ လုပ်ပေးလို့ မရဘူး။ ဒါကြောင့် စိတ်သဘောကို အသစ်ဖြစ်အောင် ကိုယ်တိုင် ပြုပြင်ပြောင်းလဲနေရမယ်။ မပြတ် ဆုတောင်းရမယ်။ ယေဟောဝါရဲ့ စွမ်းအားတော် အကူအညီကို တောင်းခံရမယ်။ နက်နက်နဲနဲ တွေးတောဆင်ခြင်ရမယ်။ သင့်ရဲ့ အတွေးအခေါ်နဲ့ စိတ်ရင်းကို ဆန်းစစ်နေရမယ်။ အတွေးအခေါ် ပြောင်းနိုင်အောင် ကူညီပေးမယ့် အပေါင်းအသင်းကောင်းတွေကို ရွေးချယ် ပေါင်းသင်းရမယ်။ ဒီနည်းအားဖြင့် စာတန့်လောကရဲ့ အဆိပ် မသင့်အောင် ကာကွယ်နိုင်မယ်။ ‘လူတွေရဲ့ မှားယွင်းတဲ့ အတွေးအခေါ်တွေ၊ ဘုရားသခင်နဲ့ဆိုင်တဲ့ အသိပညာ မရနိုင်ဖို့ တားဆီးနေတဲ့ ထောင်လွှားတဲ့ အယူအဆတွေကို’ အောင်မြင်စွာ ဖြိုဖျက်နိုင်ပါလိမ့်မယ်။—၂ ကော. ၁၀:၅။