သတင်းကောင်း ဝေငှခြင်း—ကျမ်းစာသင်အံမှုများစရန် တစ်ဦးကိုတစ်ဦး ကူညီပေးခြင်းအားဖြင့်

^၁ ယေဟောဝါကို မြတ်နိုးသူတိုင်း မိမိတို့ဓမ္မအမှုတွင် အသီး သီးလိုကြသည်။ “တပည့်ဖြစ်စေလျက် . . . သင်တို့အား ငါပေးသမျှသော ပညတ်တော်တို့ကို စောင့်ရှောက်စေခြင်းငှာ ဆုံးမသြဝါဒပေး” ရန် ယေရှုကျွန်ုပ်တို့ကို တာဝန်ပေးထားပါသည်။ (မ၊ ၂၈:၁၉၊ ၂၀) ကျမ်းစာသင်အံမှု စလိုလျှင် ယေဟောဝါ၏လမ်းပြမှုကို ရှာယူကာ အသင်းတော်မှတစ်ဆင့် ရသော လက်တွေ့ကျအကူအညီနှင့် အကြံပြုချက်များကို ကျင့်သုံးပါ။​—မ၊ ၇:၇၊ ၈။

^၂ သင့်အုပ်စုတွင် ကျင်းပသော ကျမ်းစာသင်အံမှုလုပ်ငန်း၌ အသင်းတော်စာအုပ်ကြီးသင်တန်းမှူး အထူးစိတ်ဝင်စားပါသည်။ သူ့ထံချဉ်းကပ်ပြီး ကျမ်းစာသင်အံမှုရလိုကြောင်း တင်ပြပါ။ သင်နှင့်အတူ အတွေ့အကြုံများသော ကြေညာသူတစ်ဦးအား တွဲအမှုဆောင်ရန် စီစဉ်ပေးပေမည်။ ရည်ရွယ်ချက်ကား (၁) သင်အံမှုစပြီး တိုးတက်မှုရှိသော ကျမ်းစာသင်အံမှု ကျင်းပရန် ဖြစ်ပြီး (၂) နောင်လည်း အခြားသင်အံမှုများ စနိုင်ရန်ဖြစ်သည်။

ပုံသက်သေဖြင့် သင်ယူပါ

^၃ များသောအားဖြင့် ကျမ်းစာသင်အံမှုမရှိရခြင်းကား စာအုပ်ဝေငှထားသူထံ၊ သို့မဟုတ် စိတ်ဝင်စားသူထံ ချက်ချင်းပြန်မသွား၍ဖြစ်နိုင်သည်။ ထိုကြောင့် စောစောပြန်လည်ပတ်သွားရန် ကြိုးစားပါ။ သို့ပြုရန် မှတ်စုကောင်းကောင်း ယူထားရန် လိုအပ်ပေမည်။ သင့်အားကူညီပေးသော ကြေညာသူက မည်သို့ပြုရမည်ကို သင်ပြပေးပေမည်။ ကျမ်းစာသင်အံမှုစရန် ရည်ရွယ်ချက်နှင့် ဤပြန်လည်ပတ်မှုများကို သင်တို့နှစ်ဦး ပြုလုပ်သင့်သည်။ ပြန်လည်ပတ်သွားသည့်အခါ စိတ်ဝင်စားမှုကို မည်သို့ပြန်နှိုးဆွပေးနိုင်ပုံကို ကြိုတင်လေ့ကျင့်ထားလျှင် လုပ်တတ်ကိုင်တတ်ပေမည်။

^၄ ပြန်လည်ပတ်မှုတွင် ဦးဆောင်သည့်အခါ သင့်လုပ်ငန်းတော်အဖေါ် မည်သို့ပြုသည်ကို သတိပြုပါ။ အပြန်အလှန်စကားပြောနိုင်ရန် အိမ်ရှင်အားမည်သို့ပြောဆိုသည်ကို သတိပြုပါ။ သင်လည်း ထပ်တူပင် မည်သို့ပြုနိုင်ကြောင်း သုံးသပ်ပါ။ မေးခွန်းမေးခြင်းဖြင့် သို့မဟုတ် သင့်တော်သောကျမ်းချက်တစ်ခုကို မည်သို့သဘောထားကြောင်း ဖြေဆိုစေခြင်းဖြင့် အပြန်အလှန်စစကားပြောသလော။ ပြန်လည်ပတ်သွားပြီးနောက် သင်ကြားနာခဲ့ရာကို ပြန်သုံးသပ်ကြည့်ပါ။ ထိုနောက် အခြားပြန်လည်ပတ်မှုသို့သွားချိန်တွင် ထပ်တူပြုလုပ်ရန် စမ်းကြည့်ပါ။

^၅ ကျမ်းစာသင်အံမှု စနိုင်ပြီဆိုလျှင် သင်တို့နှစ်ဦးစလုံး ပါဝင်နိုင်မည့်နည်းများကို ရှာကြံပါ။ အဓိကကျမ်းချက်များကို ဖတ်ပြီး အိမ်ရှင်နားလည်စေရန် ကူညီပေးနိုင်ပေမည်။ သင်အံမှုပြီး၍ အပြန်တွင် အကူအညီဖြစ်မည့် အကြံပေးချက်များကို သင်နှင့်တွဲဘက်သူထံမှ တောင်းဆိုပါ။ ဥပမာ၊ အရံမေးခွန်းများကို အဘယ်အချိန်တွင်မေးမြန်းမည်၊ နောက်သင်အံမှုအတွက် သင်သားစိတ်ပြင်းပြနေရန် မည်သို့ပြုနိုင်ကြောင်း၊ အဖွဲ့အစည်းသို့ စိတ်ဝင်စားမှုကို မည်သို့ညွှန်ပြနိုင်ကြောင်း မေးပါ။

ရပ်ကွက်အပြောင်းအလဲများ ရှိပါက

^၆ အသင်းတော်သစ်များ တည်ထောင်မည်၊ သို့မဟုတ် ရပ်ကွက်ပြုပြင်ချက်များရှိမည်ဆိုလျှင် သင်စထားခဲ့သော ကျမ်းစာသင်အံမှုကို အခြားကြေညာသူတစ်ဦးအား လွှဲပြောင်းပေးရန် လိုကောင်းလိုပေမည်။ သက်ဆိုင်ရာအသင်းတော်မှ အရည်အချင်းရှိ ကြေညာသူတစ်ဦးကို ထိုသင်အံမှုသို့ ခေါ်သွားနိုင်ပါသည်။ တစ်ပတ်နှစ်ပတ်ကြာသော် ထိုကြေညာသူအား သင်အံမှုကိုင်စေနိုင်သည်။ သင်အံမှုလွှဲပြောင်းပေးခြင်းသည် တပည့်ဖြစ်စေခြင်းလုပ်ငန်း၏ ကဏ္ဍတစ်ခုဖြစ်သည်ကို သိထားကါ သင်သားအတွက်အကောင်းဆုံးဖြစ်ရာကို ပြုလိုပေမည်။​—ဖိ၊ ၂:၄။

^၇ “လူမျိုးအပေါင်းတို့ကို ငါလှုပ်မည်” ဟူသော ကတိတော်ကို ယေဟောဝါအမှန်ပြည့်စုံစေ၍ အိမ်တော်ထဲတွင် နှစ်သက်ဖွယ်ရာများနှင့် ပြည့်စေနေတော်မူပြီ။ (ဟဂ္ဂဲ ၂:၇) အခြားသူများလည်း ယေဟောဝါကိုသိရှိ၍ ချစ်မြတ်နိုးလာရန် ကူညီပေးနိုင်ခွင့်ထူးကို ကျွန်ုပ်တို့ရရှိထားပြီတကား။ အသင်းတော်စာအုပ်ကြီးသင်တန်းအစီအစဉ်မှတစ်ဆင့် တစ်ဦးကိုတစ်ဦးကူညီခြင်းအားဖြင့် အိမ်တွင်းကျမ်းစာသင်အံမှု မှန်မှန်ပြုလုပ်ခွင့်ရှိသူ တိုးများလာစရာအကြောင်းရှိပေသည်။