ယေဟောဝါအား ဂုဏ်တင်ချီးမွမ်းရန် ပိုမိုပြုလုပ်နိုင်ဦးမည်လော

^၁ ယင်းက ကျွန်ုပ်တို့အားလုံး သုံးသပ်သင့်သည့် အရေးကြီးသောမေးခွန်းဖြစ်ပါသည်။ ကျွန်ုပ်တို့ သခင်ယေရှုခရစ်ကို သစ္စာတည်ကြည်စွာ အတုယူသူများအနေနှင့် နာမတော်ကို လူအများရှေ့ ကြေညာခြင်းအားဖြင့် ဘုရားသခင်ကို ယနေ့ ကျွန်ုပ်တို့ဂုဏ်တင်ချီးမွမ်းကြပါသည်။ ဘုရားသခင့်မျက်နှာသာတော်ကို ကျွန်ုပ်တို့ရလိုလျှင် ယင်းတာဝန်ကိုထမ်းဆောင်ရမည်။ (မာ၊ ၁၃:၁၀။ လု၊ ၄:၁၈။ တ၊ ၄:၂၀။ ဟေဗြဲ၊ ၁၃:၁၅) ယေဟောဝါ၏ စကြဝဠာသိုးခြံတော်အဝင် ဖြစ်နိုင်စရာအကြောင်းရှိသေးသည့် ပြန့်လွင့်နေသော အကြွင်းအကျန် “သိုးတော်” များထံ ဤသတင်းကောင်းကို သယ်ဆောင်ယူသွားပေးခြင်းသည် မဖော်မပြနိုင်လောက်သည့် အခွင့်အရေး​—မှန်သည်၊ ဂုဏ်ယူစရာ​—ပါတကား။​—ယော၊ ၁၀:၁၆။

^၂ ဓမ္မအမှုတွင် သင့်လုပ်ငန်းကို တိုးချဲ့ပေးခြင်းအားဖြင့် သင်နှင့် သင့်သားသမီးများသည် ယေဟောဝါကို ပိုမိုဂုဏ်တင်ချီးမွမ်းနိုင်မည်လော။ ကမ္ဘာချီ ရှေ့ဆောင်လုပ်ငန်းတွင် ပါဝင်နေသော သင့်ညီအစ်ကိုညီအစ်မများ၏ အရေအတွက်သည် တိုးများလာနေပါသည်။ ၁၉၉၂ ဧပြီလတွင် မြန်မာနိုင်ငံ၌ အထူး၊ မှန်မှန် သို့မဟုတ် အရန်ရှေ့ဆောင်လုပ်ငန်းတွင် အများဆုံးပါဝင်သူ ၃၄၀ ရှိခဲ့ပါသည်။ အသင်ကိုယ်တိုင် ရှေ့ဆောင်ခြင်းကို အလေးအနက်စဉ်းစားဖူးပါသလော။ အချိန်ပြည့်ဓမ္မအမှုကို လုပ်ငန်းသဘောရွေးချယ်ရန် သင့်သားသမီးများကို အားပေးပါသလော။

^၃ ရှေ့ဆောင်လုပ်ငန်းအပေါ် သင့်စိတ်ထားကို သုံးသပ်ဆင်ခြင်ကြည့်ပါ။ ယင်းအကြောင်း ပြောဆိုတိုင်း သင့်အခြေအနေက ရှေ့ဆောင်ခြင်းငှာ အခွင့်မပြုပါဟူ၍ ချက်ချင်းဆုံးဖြတ်လိုက်ပါသလော။ ရှေ့ဆောင်ခြင်းသည် လူတိုင်းအတွက် မဖြစ်နိုင်သည်ကား မှန်ပေသည်။ ကျမ်းပေးတာဝန်များနှင့် အခြားကန့်သတ်ချက်များကြောင့် အချိန်ပြည့်အမှုမဆောင်နိုင်သူ များစွာရှိပါသည်။ (၁ တိ၊ ၅:၈) သို့သော် ယင်းကိစ္စကိုမကြာသေးမီက သင်ဆုတောင်းလျက်တွေးတောခဲ့ပြီလော။ မိသားစုမှ အနည်းဆုံးတစ်ယောက် ရှေ့ဆောင်ဖြစ်နိုင်မည့်အကြောင်းကို ဆွေးနွေးကြည့်ဖူးသလော။ ၁၉၈၂၊ နိုဝင်ဘာ ၁၅ ရက်ထုတ်ကင်းမျှော်စင်က ဤစဉ်းစားစရာအချက်ကို စာမျက်နှာ ၁၇ တွင်ဆိုထားပါသည်။ “ခရစ်ယာန်ဓမ္မအမှုဆောင်တိုင်းသည် မိမိ ရှေ့ဆောင်နိုင်မနိုင် သေချာစွာ ဆုတောင်းသုံးသပ်ရန် တကယ်လိုအပ်ပါသည်။ ဆယ့်ငါးနှစ် ရှေ့ဆောင်ခဲ့သော တောင်အာဖရိကလူမျိုး မောင်နှံစုံတစ်စုံက ‘ငါတို့ ဘာလို့ရှေ့ဆောင်နေကြတာလဲသိလား။ ရှေ့ဆောင်မလုပ်ဖို့ ယေဟောဝါရှေ့ မှာ ဘယ်လိုလုပ် ဆင်ခြေပေးနိုင်မလဲ’ ဟုပြောခဲ့သည်။ ရှေ့ဆောင်မဟုတ်သူများစွာတို့လည်း ဤခပ်ဆင်ဆင်မေးခွန်းကို ကိုယ့်ကိုယ်ကို မေးကြည့်နိုင်သည်။ ‘ရှေ့ဆောင်မလုပ်ရတဲ့အကြောင်း ယေဟောဝါရှေ့ မှာ ငါတကယ် ထုချေနိုင်မလား’ ဟူသောမေးခွန်းဖြစ်သည်။”

^၄ အခြားကင်းမျှော်စင်ဆောင်းပါးတစ်ခုက ယင်းအကြောင်းကို ဤသို့ပွင့်လင်းစွာဆိုသည်။ “ကျွန်ုပ်တို့တစ်ဦးစီသည် မိမိကိုယ်ကိုမိမိ ရိုးသားသင့်သည်။ ‘စိတ်ဝိညာဉ်ကား စေတနာရှိပေမယ့် ကိုယ်ကားအားနည်းတယ်’ ဟုသင်ဆိုတတ်သလော။ သို့သော် စိတ်ဝိညာဉ်သည် တကယ်ပင်စေတနာရှိပါသလော။ စိတ်ဝိညာဉ်သည် စေတနာမပါခြင်းကို ကိုယ်အားနည်းခြင်းဟူ၍ ဆင်ခြေပေးချက်အဖြစ် အသုံးပြုခြင်းကို ရှောင်ကြဉ်ကြစို့။”​—w78 8/15 p. 23.

^၅ သားသမီးများအား အောင်မြင်စေလိုသောမိဘများ– သုတ္တံ ၁၅:၂၀ ကဤသို့အာမခံသည်။ “ပညာရှိသောသားသည် အဘဝမ်းမြောက်ခြင်းအကြောင်းဖြစ်၏။” သားသမီးများသည် ယေဟောဝါထံ ဆက်ကပ်သည့် ဘဝပုံစံကိုလိုက်လျှောက်ကြလျှင် ဘုရားကြည်ညိုသောမိဘများ အလွန်ဝမ်းသာသည်အမှန်။ သို့ရာတွင် သင့်ကလေးများသည် ပညာရှိလမ်းစဉ်ကို အလိုအလျောက် ရွေးချယ်ကြလိမ့်မည်မဟုတ်ပါ။ ဤလောကသည် အလွန်ဆွဲဆောင်နိုင်သည်။ အသင်မိဘများ၊ သင့်ကလေးများ၏ တန်ဖိုးထားရာများသည် အများအားဖြင့် သင့်ပုံစံအတိုင်းသာ ဖြစ်တတ်သည်။ အချိန်ပြည့်လုပ်ငန်း၏အကျိုးကျေးဇူးများကို အပြုသဘောရှိရှိ အသင်အမြဲပြောဆိုနေမည်၊ အလုပ်ကြိုးစားသောရှေ့ဆောင်များနှင့် ပေါင်းသင်းဆက်ဆံရန် ကလေးငယ်များအား သင်တိုက်တွန်းပေးမည်၊ သင့်သားသမီးများရွေးချယ်ရန် ဂုဏ်အရှိဆုံးလုပ်ငန်းသည် အချိန်ပြည့်ဓမ္မအမှုဆောင်ရွက်ခြင်းဖြစ်သည်ဟု သင်တကယ်ယုံကြည်မည်ဆိုလျှင် ဤအပြုသဘောပါသောစိတ်ထားသည် သင့်ရင်သွေးများအပေါ် အကျိုးများစွာသက်ရောက်လိမ့်မည်အမှန်ပင်။ လူရှေ့ နာမည်ကောင်းရခြင်းထက် ယေဟောဝါရှေ့ နာမည်ကောင်းရခြင်း၏တန်ဖိုးကို လေးမြတ်တတ်ရန် ကူညီပေးပါ။

^၆ လူငယ်များ၊ သင်တို့ရွေးချယ်စရာကို သုတ္တံ ၂၂:၁ ကပေါ်လွင်စေသည်။ “ကောင်းသောအသရေကို များစွာသောဥစ္စာထက် သာ၍ရွေးစရာကောင်း၏။ သူတစ်ပါးစုံမက်ခြင်းကျေးဇူးသည် ရွှေငွေထက် သာ၍ကောင်း၏။” သင့်အတွက်သင် အဘယ်နာမည်မျိုး ရရှိစေမည်နည်း။ အနစ်နာခံ ဘုရားအမှုတော်ထမ်းရွက်ခဲ့ခြင်းဖြင့် ကျမ်းစာတွင် နာမည်ထင်ရှားသော အမျိုးသားအမျိုးသမီးများကို သတိရပါ။ ချစ်စရာကောင်းသည့် ဆေးဆရာလုကာ၊ ဘုရားသခင်နှင့်အတူသွားလာခဲ့သော ဧနောက်တို့ပါဝင်သည်။ ရှမွေလသည် နုနယ်သောအရွယ်မှစ၍ ယေဟောဝါဗိမာန်တော်တွင် အမှုထမ်းခဲ့ခြင်းဖြင့် ရရှိနိုင်သမျှတွင် အကောင်းဆုံးပညာကို ရရှိခဲ့ပါသည်။ ဤသစ္စာရှိကျေးကျွန်များသည် သူတို့၏ရွေးချယ်မှုအပေါ် နောင်တရခဲ့လိမ့်မည်ဟု သင်ထင်ပါသလော။ အဘယ့်ကြောင့်ဝမ်းနည်းရမည်နည်း။ သူတို့အားလုံးသည် ပျော်ရွှင်ချမ်းမြေ့၊ ရည်ရွယ်ချက်ရှိ အားရစရာဘဝမျိုးရှိခဲ့ကြသည်။ ယေဟောဝါ၏မျက်နှာသာတော်ကိုလည်း သူတို့အမြဲတွေ့ရှိခဲ့ကြသည်တကား။​—ဆာ၊ ၁၁၀:၃။ ၁၄၈:၁၂၊ ၁၃။ သု၊ ၂၀:၂၉က။ ၁ တိ၊ ၄:၈ခ။

^၇ အောင်မြင်မှုရှိသောဘဝမျိုးကို သားသမီးများရကြလျှင် မိဘများ ဂုဏ်ယူတတ်ကြသည်။ “ယေဟောဝါပေးသော ဤအမွေဥစ္စာ” ကိုလေ့ကျင့်သွန်သင်၊ ပဲ့ပြင်ဆုံးမပေးခြင်းတွင် သူတို့အရင်းအနှီးမြှပ်နှံခဲ့ခြင်းမှ အထပ်ထပ်အကျိုးခံစားကြရ၏။ (ဆာ၊ ၁၂၇:၃) ယေဟောဝါအား အတတ်နိုင်ဆုံးနည်းဖြင့် ဂုဏ်တင်ချီးမွမ်းသောသား၊ သို့မဟုတ် သမီးတစ်ဦးရှိခြင်းထက်သာသော အခြားဂုဏ်ယူစရာမိဘများအတွက်မရှိပါ။ မျက်မှောက်ခေတ်တွင်ပင် လုကာ၊ ဧနောက်၊ ရှမွေလ၏ခြေရာကိုလိုက်နေသော လူငယ်များစွာရှိကြောင်း ဤစာကတင်ပြပါသည်။ “ကျွန်တော် ၁၆ နှစ်ရှိပြီ။ နှစ်ခြင်းယူပြီး ကိုးလကတည်းက . . . မှန်မှန်ရှေ့ဆောင်ခဲ့တယ်။ အဲ့ဒီကတဲက ယေဟောဝါရဲ့ကောင်းချီးများကို ခံစားနေရတယ်။ . . . ရှေ့ဆောင်ခြင်းက ကျောင်းမှာလည်း အကူအညီအများကြီးရတယ်။ အရင်ကဆိုရင် သက်သေခံတစ်ယောက်ဖြစ်လို့ အတန်းသားများက ကျွန်တော့်ကိုစကြတယ်။ အခုဆိုရင် ကိုယ်ပိုင်လေ့လာမှုများများလုပ်ရတော့ ‘ကျွန်တော်.ကိုကဲ့ရဲ့တဲ့သူကို ပြန်ဖြေဆို’ တတ်လာတယ်။”

^၈ ဓမ္မအမှုတွင် လိုအပ်သောပညာနှင့် ပြည့်စုံနေခြင်း– ဤတွင် လောကပညာရပ်ကို ထည့်စဉ်းစားကြမည်။ ဤကိစ္စနှင့်ပတ်သက်လျှင် မျှတသောအမြင်ရှိရန် အထူးလိုအပ်ပါသည်။ ၁၉၉၂ နိုဝင်ဘာ ၁ ကင်းမျှော်စင် ၌ “ရည်ရွယ်ချက်တစ်ခုရှိသောပညာရေး” ဆောင်းပါးပါသည်။ “ဖူလုံသောပညာရေး” ဟူသည့်ခေါင်းစဉ်ငယ်အောက်တွင် ဤအချက်ကိုတင်ပြထားသည်။ “ခရစ်ယာန်များသည် အချိန်ပြည့်ရှေ့ဆောင်ဓမ္မအမှုဆောင်ပင်ဖြစ်ပါစေ မိမိကိုယ်ကို ထောက်ပံ့နိုင်သင့်သည်။ (၂ သက်သာလောနိတ် ၃:၁၀-၁၂) . . . ခရစ်ယာန်လူငယ်တစ်ဦးသည် ဤကျမ်းမူများကို အလေးထားနိုင်ရန်နှင့် ခရစ်ယာန်တာဝန်များကိုကျေပွန်နိုင်ရန် ပညာရေးမည်မျှလိုအပ်သနည်း။ . . . သတင်းကောင်း၏ ရှေ့ဆောင်ဓမ္မအမှုဆောင်လုပ်လိုသူတစ်ဦးအတွက် “ဖူလုံသော” [လုပ်ခ] ဟူသည် မည်သည့်အဓိပ္ပာယ်သက်ရောက်သနည်း။ ထိုသူသည် မိမိ၏ညီအစ်ကို သို့မဟုတ် မိသားစုအပေါ် “ကြီးမားသောဝန်ထုပ်ဝန်ပိုး” တင်ခြင်းကိုရှောင်နိုင်ရန် အချိန်ပိုင်းအလုပ်လိုအပ်သည်။​—၁ သက်သာလောနိတ် ၂:၉။”

^၉ အချိန်ပြည့်လုပ်ငန်း၌ပါဝင်နိုင်ရန် ရှေ့ဆောင်လိုသူက ထပ်ဆင့်ပညာရေးလိုသည်ဟု ယူမှတ်လျှင် ၁၉၉၂ နိုဝင်ဘာ ၁ ကင်းမျှော်စင်က ဤသို့အားပေးသည်။ “သက်သေခံလူငယ်တစ်ဦးသည် ခရစ်ယာန်လေ့လာမှုများပြုခြင်း၊ အစည်းအဝေးများတက်ခြင်း၊ ဟောပြောခြင်းများကို ဆက်လက်ပြုလုပ်ရင်းနှင့် ထပ်ဆင့်ပညာရေးကို အိမ်မှနေ၍ ရယူသင့်သည်။”

^၁၀ ရှေ့ဆောင်လုပ်ငန်းကို လုပ်ကိုင်လိုသော်လည်း ကူးသန်းရောင်းဝယ်ရေးပညာသင်ကျောင်းတက်ခဲ့ရသော အာဖရိကနိုင်ငံမှ ၂၂ နှစ်အရွယ်လူငယ်တစ်ဦး၏တွေ့ကြုံမှုရှိသည်။ သင်တန်းကျောင်းတက်နေစဉ် အရန်ရှေ့ဆောင်ဝင်လုပ်ပါသည်။ သက်တူရွယ်တူတို့က သူစာမေးပွဲအမှန်ကျမည်ဟု ကဲ့ရဲ့ကြသည်။ သူအမြဲအဖြေပေးသည်မှာ “ဘုရားသခင့်နိုင်ငံတော်နှင့် ဖြောင့်မတ်ခြင်းတရားကို ရှေ့ဦးစွာရှာလော့” ဖြစ်သည်။ ကိုယ့်ကိုယ်ကိုကြပ်မတ်ကာ နံနက်တိုင်း အိပ်ရာမှ စောစောထပြီး ကျောင်းစာကို နှစ်နာရီလေ့လာ၍ နေ့လယ်ကျောင်းဆင်းပြီးနောက် လယ်ကွင်းလုပ်ငန်းတွင် ပါဝင်ပါသည်။ အထူးပညာသင်စရိတ်ဆုပေးရန် အတော်ဆုံးကျောင်းသား သုံးဦးရွေးရန် အထူးစာမေးပွဲပြုလုပ်ရာတွင် ဤလူငယ်သည် တတိယထွက်ခဲ့သဖြင့် တစ်ကျောင်းလုံးက အံ့အားသင့်ခဲ့ပါသည်။ ဒုတိယလိုက်သောကျောင်းသားမှာ ကျွန်ုပ်တို့ရှေ့ဆောင်ညီအစ်ကိုနှင့် ကျောင်းတွင် ကျမ်းစာလေ့လာနေသူဖြစ်သည်။ ပထမဆုရသူသည်လည်း ဇွဲလုံ့လရှိသော အခြားသက်သေခံလူငယ်တစ်ဦးဖြစ်သည်။

^၁၁ အကြီးအကဲများလည်း တာဝန်ကျေပွန်– ရှေ့ဆောင်များ၏လုပ်ငန်းကို ဂုဏ်ယူသော အသင်းတော်အကြီးအကဲများသည် ဤဇွဲလုံ့လရှိ ဓမ္မအမှုဆောင်များကို အလွန်အားပေးတိုက်တွန်းသည်။ တိုးတက်ကြီးပွားသည့် အလုပ်ကြိုးစားသော ရှေ့ဆောင်များသည် မည်သည့်အသင်းတော်အတွက်မဆို ကောင်းချီးဖြစ်ကြောင်း သိကြသဖြင့် အကြီးအကဲများက ထိုသို့ပြုလိုကြပါသည်။ မှန်မှန်ရှေ့ဆောင်လုပ်ငန်းတွင် တစ်နှစ်နှစ်နှစ်ခန့်ပါဝင်ပြီးနောက် ဤသူများသည် ရှေ့ဆောင်လုပ်ငန်းသင်တန်းကျောင်းတွင် ထပ်ဆင့်လေ့ကျင့်မှုခံယူနိုင်ရန် အရည်အချင်းရှိလာကြပါသည်။ ရှေ့ဆောင်များ၏ထိရောက်မှုကို တိုးတက်လာစေရန် ဤသင်တန်းသည် အဖိုးဖြတ်မရနိုင်အောင် အကျိုးပြုခဲ့ပြီ။ ရှေ့ဆောင်များသည် လုပ်ငန်းတော်၏ရှေ့တန်း၌ ပါဝင်နေကြသော်လည်း သူတို့ကို မေတ္တာပါပါ အားပေးတိုက်တွန်းရန် လိုသည်။ ယင်းကို အကြီးအကဲများ နိုးကြားစွာပြုလုပ်သင့်ပါသည်။​—၁ ပေ၊ ၅:၁-၃။

^၁၂ ရှေ့ဆောင်ခြင်းလုပ်ငန်းကို အကြီးအကဲများ မည်သို့အရှိန်မြှင့်တင်ပေးနိုင်မည်နည်း။ ဦးစွာပြုလုပ်နိုင်သည်ကား ဤအခွင့်အရေးကို မည်သူတို့ လက်လှမ်းမီနိုင်သည်ကို မကြာခဏ အကဲခတ်ကြည့်ရန်ဖြစ်သည်။ မကြာခဏ အရန်ရှေ့ဆောင်လေ့ရှိသူများ၊ အငြိမ်းစားယူထားသူများ၊ အိမ်ရှင်မများ၊ ကျောင်းသားများပါအပါအဝင် ရှေ့ဆောင်နိုင်ဟန်ရှိသူများထံ အကြီးအကဲများချဉ်းကပ်နိုင်ပေမည်။ နာမည်စာရင်းမသွင်းမနေရဟု ခံစားစေမည်မဟုတ်သော်လည်း ရှေ့ဆောင်လိုသော်လည်း တွန့်ဆုတ်ခဲ့မည့်သူများအား လက်တွေ့ကျ အကြံဉာဏ်အနည်းငယ်ဖြင့် အားပေးလေသော် သူတို့ပါ ရှေ့ဆောင်နိုင်မည်ဟု သိလာစေပေမည်။

^၁၃ လျှောက်လွှာတင်လိုသူများအား တိုက်တွန်းပေးရာတွင် မှန်မှန်ရှေ့ဆောင်အဖြစ် နာမည်စာရင်းပေးခြင်းငှာ လပေါင်းများစွာ အရန်ရှေ့ဆောင်ဖြစ်နေစရာမလိုကြောင်း အကြီးအကဲများသိထားနိုင်ပါသည်။ (km 8⁄86 insert par 24–26) သို့သော် လျှောက်လွှာတင်သူသည် လိုအပ်နာရီကို ဖြည့်စွက်နိုင်မနိုင်သည်ကို အကြီးအကဲသည် အသေအချာချင့်ချိန်သိရှိနိုင်ပေမည်။

^၁၄ လျှောက်လွှာကို အသင်းတော်လုပ်ငန်းတော်ကော်မတီ ပြန်သုံးသပ်ပြီး၍ မေးခွန်းအားလုံးကို ဖြေမဖြေ အတွင်းရေးမှူး အပြည့်အစုံစစ်ဆေးပြီးနောက် အသင်းမထံ ချက်ချင်းပို့ပေးသင့်ပါသည်။

^၁၅ ရှေ့ဆောင်များကြုံတွေ့နေရသည့် မည်သည့်ပြဿနာကိုမဆို အတွင်းရေးမှူးသည် အကြီးအကဲများအား တင်ပြနေသင့်သည်။ အထူးသဖြင့် ရှေ့ဆောင်များများရှိသည့် အသင်းတော်များ ယင်းကိုဂရုစိုက်သင့်သည်။ အသင်းတော်စစ်ချက်မှတ်တမ်း (အက်စ်-၁၀) တွင်တောင်းဆိုထားသည့်အတိုင်း လုပ်ငန်းတော်နှစ်အကုန်တွင် ရှေ့ဆောင်များ၏လုပ်ငန်းကို ပြန်လည်သုံးသပ်သည့်အပြင် အတွင်းရေးမှူးသည် မတ်လအစောပိုင်းတွင် လုပ်ငန်းတော်ကြီးကြပ်မှူးနှင့်စည်းဝေးထိုင်ကာ အဘယ်သူများသည် နာရီမပြည့်မီ၍ အကူအညီပေးရန်လိုအပ်နေသည်ကို ဆွေးနွေးတိုင်ပင်သင့်ပါသည်။ (၁၉၉၃ ဖေဖော်ဝါရီ ကျွန်ုပ်တို့၏နိုင်ငံတော်ဓမ္မအမှု၊ ကြေညာချက်များကိုရှု။) မဆိုင်းမတွအကူအညီပေးခံရလျှင် ယင်းရှေ့ဆောင်သည် လုပ်ငန်းတော်နှစ်ကို အောင်မြင်စွာပြီးဆုံးနိုင်စရာအကြောင်းရှိသည်။

^၁၆ ရှေ့ဆောင်အသစ်များစွာသည် အသက်ငယ်ရွယ်ကြပြီး သမ္မာတရားတွင် လူသစ်များသာဖြစ်ကြပါသည်။ သူတို့စိတ်စေတနာသည် ကျွန်ုပ်တို့အား ရွှင်လန်းစေသည်ကားအမှန်။ သို့သော် ဤလူသစ်များသည် တစ်အိမ်မှတစ်အိမ်လုပ်ငန်း၊ ထိရောက်စွာ ပြန်လည်ပတ်မှုများပြုလုပ်ခြင်း၊ ကျမ်းစာသင်အံမှုများ၌ သွန်သင်ပေးတတ်ခြင်းကိစ္စတွင် ကျွမ်းကျင်လာနိုင်ကြရန် လေ့ကျင့်မှုလိုအပ်နေကြသေးသည်။ ဤလေ့ကျင့်မှုကို မရရှိကြလျှင် တစ်နှစ်နှစ်နှစ်အကြာတွင် လူသစ်သည် ဓမ္မအမှုဆောင်ခြင်း၌ တိုးတက်မှုမခံစားရသဖြင့် စိတ်ဓာတ်ကျဆင်းလာပြီး ရှေ့ဆောင်လုပ်ငန်းကို ရပ်စဲလိုက်ပေမည်။ အကဲခတ်လျင်သောအကြီးအကဲများသည် အသေးအမွှားပြဿနာများ၊ သို့မဟုတ် လုပ်ငန်းဆောင်ရွက်ခြင်းတွင် လျော့ပေါ့သွားခြင်းကို သိရှိနိုင်လိမ့်မည်။ ချက်ချင်းဂရုစိုက်ပြီး ရှေ့ဆောင်အား သူ၏အခက်အခဲကိုကျော်လွှားရန် ကူညီပေးလိုက်မည်ဆိုလျှင် တိုးတက်မှုရှိရှိ လုပ်ငန်းတော်ကို နှစ်ချီပြီးဆောင်ရွက်သွားလိုပေမည်။

^၁၇ ရပ်ဝေးရေပြင်များတွင် သင်ငါးမျှားနိုင်မည်လော– ယေရှု၏တပည့်တော်အချို့သည် တံငါသည်များဖြစ်ကြပါသည်။ တစ်ခါတစ်ရံ သူတို့တစ်ညဉ့်လုံးငါးဖမ်းခဲ့ကြသော်လည်း တစ်ကောင်မျှဖမ်းမရကြပါ။ (ယော၊ ၂၁:၃) နှစ်ချီ၍ ‘လူကိုမျှား’ ခဲ့ရာ မိမိတို့အသင်းတော် “ရေ” တွင် “ငါး” အနည်းငယ်သာ ကျန်ကြွင်းတော့သည်ဟု ရှေ့ဆောင်အချို့ ယူမှတ်ပေမည်။ (မ၊ ၄:၁၉) သို့သော် အခြားနိုင်ငံများတွင်ကြေညာသူများနှင့် ရှေ့ဆောင်များသည် ကျမ်းစာသင်အံမှုများစွာကျင်းပနေကြကြောင်း သတင်းရရှိသည့်အခါ ဝမ်းသာအားရကြသည်မဟုတ်လော။ ဤနိုင်ငံများရှိ ရှေ့ဆောင်များနှင့် သာသနာပြုများ၏ ရွှင်လန်းမှုသည် အလွန်ထင်ရှားပါသည်။ (က၉၂ ၉/၁ စ၊ ၂၀ အပိုဒ် ၁၅) ယင်းကြောင့် ဝီရိယရှိသောရှေ့ဆောင်အချို့သည် အကူအညီပိုလိုအပ်နေသည့်နိုင်ငံတစ်နိုင်ငံသို့ ရွှေ့ပြောင်းနေထိုင်နိုင်သည့် အခြေအနေတွင်ရှိမည်ဆိုလျှင် ယင်းသို့မပြုမီ သူတို့၏ဌာနခွဲနှင့် ဤကိစ္စကိုဆွေးနွေးတိုင်ပင်သင့်သည်။

^၁၈ အစအဦးတွင် ရှေ့ဆောင်သင့်သည်ဟူ၍ စိတ်ဆုံးဖြတ်ပြီး အချို့ရှေ့ဆောင်ခဲ့ကြသော်လည်း ယင်းကို အောင်မြင်စွာ ပြုလုပ်နိုင်မနိုင် ဇဝေဇဝါဖြစ်ခဲ့ကြပေမည်။ စိတ်ထဲတွင် စနိုးစနောက်ဖြစ်ပြီး ခြွင်းချက်များထားကာ လျှောက်လွှာတင်ခဲ့ကြပေမည်။ စစဦးဆုံးတွင် လယ်ကွင်း၌ အကျိုးခံစားမှု အနည်းငယ်သာရရှိခဲ့ပေမည်။ သို့သော် အချိန်တန်လေသော် ပိုကျွမ်းကျင်လာရာ သူတို့၏လုပ်ငန်းကို ယေဟောဝါကောင်းချီးပေးနေကြောင်း ထင်ရှားလာပေမည်။ ထိုအခါ ပျော်ရွှင်မှုသာမက ကိုယ့်ကိုယ်ကို ယုံကြည်စိတ်ချမှုလည်း တိုးပွားလာမည်။ အချို့သူများအတွက်ဆိုလျှင် ရှေ့ဆောင်ခြင်းသည် ဗေသလတွင်အမှုဆောင်ခြင်း၊ ဂိလဒ်၌ လေ့ကျင့်မှုခံယူပြီး သာသနာပြုလုပ်ငန်း၌ပါဝင်ခြင်း၊ ဓမ္မအမှုထမ်းဆိုင်ရာ လေ့ကျင့်မှုသင်တန်းကျောင်းနှင့် နယ်လှည့်လုပ်ငန်းသို့ တက်လှမ်းရာ ဖြစ်ခဲ့ပေပြီ။

^၁၉ တိုင်းတစ်ပါးသို့ သင်ပြောင်းရွှေ့နေထိုင်ရန်၊ ဂိလဒ်၌လေ့ကျင့်မှုယူရန် သင်အခွင့်အရေးမရနိုင်သော်လည်း မိမိနိုင်ငံတွင်ပင် လက်ရှိရပ်ကွက်၌ တိုးတက်မှုအထူးမတွေ့ မြင်လျှင် အခြားရေပြင်တွင် တံငါလုပ်ငန်းပြုလုပ်ခွင့်ရှိပါသေးသည်။ ဤသို့ရွှေ့ပြောင်းနေရန် သင့်ဘဝပုံစံကို ပြုပြင်ပြောင်းလဲစရာ လိုကောင်းလိုမည်ဖြစ်သော်လည်း ဝိညာဏအကျိုးကျေးဇူးများစွာ ခံစားရပါလိမ့်မည်။​—မ၊ ၆:၁၉-၂၁။

^၂၀ သို့မဟုတ် သင့်အခြေအနေများက ခွင့်ပြုမည်ဆိုလျှင် သင့်တိုက်နယ်တွင်းရှိ အနီးအနားအသင်းတော်၌ ကူညီပေးနိုင်ပေမည်။ သို့ ပြုနိုင်ပါက ရှေ့ဆောင်အကူအညီလိုသည့် တိုက်နယ်အတွင်းရှိအသင်းတော်များကို တိုက်နယ်ကြီးကြပ်မှူးက ပြောပြလိုပါလိမ့်မည်။

^၂၁ တစ်ချို့သောရှေ့ဆောင်များနှင့်ကြေညာသူများသည် အိမ်၌ရှိစဉ်သူတို့၏ဒေသ၌ လိုအပ်ရာများကိုဆောင်ရွက်နိုင်ခဲ့ကြပြီ။ သူတို့အခြားဘာသာစကားတတ်ပေမည်။ သင်၏ရပ်ကွက်တွင်အခြားဘာသာအခြားပြောသောလူအုပ်စုကို သင်တွေ့သလော။ ဘာသာစကားတတ်သူများသည် နိုင်ငံတော်သတင်းကို လူအသီးသီးတို့အား ဟောပြောရာတွင် များစွာအကူအညီဖြစ်သည်။ ယင်းသည် စိန်ခေါ်ချက်တစ်ရပ်ဖြစ်သော်လည်း အလွန်အကျိုးပြုပေသည်။​—၁ တိ၊ ၂:၄။ တိ၊ ၂:၁၁။

^၂၂ ယေဟောဝါကို ဂုဏ်တင်ချီးမွမ်းရန် သင်အတတ်နိုင်ဆုံးကြိုးစားနေမည်ဆိုလျှင် ယခုသင်ရရှိထားသော လုပ်ငန်းတော်အခွင့်အရေးများ၌ ဝမ်းမြောက်ပါ။ ပိုမိုတတ်နိုင်မည်ဟုထင်မှတ်ပါက ယေဟောဝါအား ဆုတောင်းပါ။ သင့်အခြေအနေများက အဘယ်အပြောင်းအလဲများကိုခွင့်ပြုမည့်အကြောင်း အသေအချာစဉ်းစားစိစစ်ပါ။ ရှေ့ဆောင်စိတ်ဓာတ်ရှိအကြီးအကဲ၊ သို့မဟုတ် တိုက်နယ်ကြီးကြပ်မှူးနှင့် သင့်အကြံအစည်များကို ဆွေးနွေးကြည့်ပါ။ ဆုတောင်းပြီး၍ ဆုံးဖြတ်ချက်ချပြီးလျှင် ယေဟောဝါကို ဂုဏ်တင်သူများအား ကိုယ်တော်ချီးမြှောက်မည်ဟူသော ကတိတော်ကို စိတ်ချယုံကြည်စွာဖြင့် ဆုံးဖြတ်သည့်အတိုင်း ချက်ချင်းပြုလုပ်ပါ။​—ဟေဗြဲ၊ ၁၃:၅၊ ၆။ ၁ ရာ၊ ၂:၃၀။