စိတ်ဝင်စားသူများကို ရှာဖွေခြင်းငှာ ဘရိုရှာများကိုတင်ပြခြင်း

^၁ ဘရိုရှာများသည် တန်ခိုးပါသောလက်နက်များဖြစ်သည်။ ၃၂ မျက်နှာဖြင့်ပင် ဘရိုရှာတစ်စောင်သည် ကျမ်းစာမှသမ္မာတရားကို ခိုင်လုံစေနိုင်၍ ဘုရားသခင်ကိုသိသောပညာနှင့်ဆန့်ကျင်သည့် ဆွေးနွေးငြင်းခုံချက်များကို မှောက်လှန်ပစ်နိုင်ပါသည်။​—၂ ကော၊ ၁၀:၅။

^၂ ယေဟောဝါ၏သက်သေများ​—ကမ္ဘာတစ်ဝန်းတွင် စည်းစည်းလုံးလုံး ဘုရားသခင့်အလိုတော်ထမ်းရွက်ခြင်းဘရိုရှာကိုဖတ်ပြီးနောက် လူတစ်ဦး ဤသို့ရေးသားခဲ့သည်။ “ဒီလိုအဖွဲ့အစည်းမျိုးကို မမြင်ဖူးဘူး။ . . . ဘာသာရေးအရေခြုံမှု ဒီလောက်များတဲ့ခေတ်မှာ ဘုရားသခင့်အလိုတော်ကို တကယ်လေးစားသူတွေကိုတွေ့ရတာ အံ့သြချီးမွမ်းစရာပါ။” အာဖရိကမှ မှော်ဆရာတစ်ဦးသည် ကမ္ဘာသားဘဝ ထာဝရစံစားကြဘရိုရှာကို လေ့လာပါသည်။ ယင်းက သူ့အား မည်သို့အကျိုးသက်ရောက်မှုရှိခဲ့သနည်း။ မှော်အတတ်ပညာကို သူစွန့်လွှတ်ကာ မယားကြီးမှအပ အခြားမယားငယ်များကို ခွာလိုက်ပါသည်။ ထိုနောက် သူမကို တရားဝင်ထိမ်းမြားခဲ့သည်။

^၃ Should You Believe in the Trinity? ဘရိုရှာသည် သက်သေအထောက်အထား ပြည့်စုံ၊ ဆင်ခြင်တုံတရားနှင့်ညီပြီး သမ္မာတရားကို အလွန်ထိရောက်စွာတင်ပြသော လက်နက်ဖြစ်သည်။ ယင်းအကြောင်း အနောက် အင်ဒီးစ်နိုင်ငံ၊ ဂျမေကာမြို့၏ The Sunday Gleaner အတွက် ဘာသာရေးဆိုင်ရာ စာရေးဆရာက ဤသို့ဆိုသည်။ “ဤစာစောင်သည် သက်သေခံများ၏ ထူးကဲပိုင်နိုင်သောစာပေဖြစ်၍ ယခု မည်သည့်သုံးပါးတစ်ဆူဝါဒီ၊​—သို့မဟုတ် နှစ်ပါးတစ်ဆူဝါဒီမျှ မလွတ်နိုင်ရာ။ သုံးပါးပေါင်းတစ်ဆူအယူသည် သမ္မာကျမ်းစာမှ ဖြစ်ပေါ်လာသည်မဟုတ်ကြောင်း ဤစာအုပ်ငယ်သည် သမိုင်းဆိုင်ရာနှင့် ဘာသာရေးဆိုင်ရာစာပေများမှ ကောက်နှုတ်ချက်တစ်ခုပေါ်တစ်ခု ထပ်ဆင့်ထားပါသည်။ . . . ယေရှုသည် ဘုရားသခင်ပင်ဖြစ်ပါသည်ဟူသောအဆိုကို သက်သေခံများဆန့်ကျင်တင်ပြကြရာ ထိရောက်ပိုင်နိုင်သည့် အခြေအတင် တင်ပြချက်များကို သာမန်​—သို့မဟုတ် သာမန်ထက်သာသော​—အသင်းတော်သားများပင် ချေပနိုင်လိမ့်မည်မဟုတ်ဟု ဤဘာသာရေးဆိုင်ရာ စာရေးဆရာ ရှင်းပြပါသည်။”

^၄ ယင်းတို့ကို ကောင်းစွာအသုံးပြု။ အကျိုးထိရောက်စေရန် ဤဆွဲဆောင်မှုရှိ၍ ပိုင်နိုင်သောလက်နက်များကို ဖတ်မည့်သူတို့အား ဝေငှရမည်။ ခေါင်းစဉ်တစ်မျိုးစီနှင့်ဆိုင်သော ဘရိုရှာအမျိုးမျိုးရှိထားသည့်အတွက် ကျွန်ုပ်တို့တွေ့ဆုံသူအဖို့ အသင့်တော်ဆုံးဖြစ်မည်ဟုထင်သော ဘရိုရှာကို တင်ပြပါမည်။ ဘရိုရှာများပါအကြောင်းကို သိရှိထားရုံမက အမျိုးမျိုးရှိထားသဖြင့် လယ်ကွင်းလုပ်ငန်း၊ အိမ်တွင်း သို့မဟုတ် အခြားမည်သည့်နေရာ၌မဆို ယင်းတို့ကို ကောင်းစွာအသုံးပြုနိုင်ရန် လွယ်ကူပါလိမ့်မည်။

^၅ ဥပမာ၊ ခရစ်ယာန်ဘောင်၏ သုံးပါးတစ်ဆူအယူကြောင့် စိတ်ရှုပ်ထွေးနေသူ၊ သို့မဟုတ် ယေရှုသည် ဘုရားဖြစ်ပါသည်ဟု အထင်ရှိသူဆိုလျှင် မည်သည့်ဘရိုရှာကို သင်အသုံးပြုမည်နည်း။ မေတ္တာရှင်ဘုရားသခင်သည် ဤမျှများသောဆင်းရဲဒုက္ခကို အဘယ်ကြောင့်ခွင့်ပြုရသနည်းဟု မေးမြန်းသူအား မည်သည့်ဘရိုရှာသည် အသင့်တော်ဆုံးဖြစ်မည်နည်း။ လူတို့အားအကျိုးပြုမည့်အစိုးရ လိုအပ်ချက်နှင့်ပတ်သက်၍ စိုးရိမ်ကြောင်း တစ်ဦးတစ်ယောက်ပြောဆိုမည်ဆိုလျှင် သူ့အတွက် အသင့်တော်ဆုံးဘရိုရှာကား အဘယ်နည်း။

^၆ မည်သည့်ဘရိုရှာကိုအသုံးပြုရန် သိရှိထားသည့်အပြင် ယင်း၌ပါသောအကြောင်းများကို သိလိုစိတ်ရှိစေရန် ကြိုးစားပြောပြပါ။ အခြေအနေကခွင့်ပြုမည်ဆိုလျှင် ဖတ်ရှုလိုစိတ်ပေါ်လာစေရန် အချက်တစ်ချက်၊ သို့မဟုတ် ရုပ်ပုံတစ်ခုကို တင်ပြပါ။ သို့မဟုတ် သူနှင့်အပိုဒ်တစ်ပိုဒ်နှစ်ပိုဒ်ဖတ်နိုင်မည်။ ညွှန်းထားသည့်ကျမ်းချက်များကို ဖွင့်ဖတ်ပြီး အကြောင်းကို ဆွေးနွေးနှီးနှောနိုင်ပါသည်။ ဤနည်းဖြင့် အလွန်ကောင်းသောကျမ်းစာသင်အံမှုများကို စတင်ခဲ့ဖူးပြီ။

^၇ ကျွန်ုပ်တို့ဘရိုရှာများသည် ကျမ်းစာဆိုင်ရာအဖြေများကိုတင်ပြ၍ ကမ္ဘာပေါ် ပြုမူနေကြသည့် ရွံရှာဖွယ်ရာများအတွက်ကြောင့် ညည်းညူးနေသူများအား မျှော်လင့်ချက်ရှိစေပါသည်။ (ယေဇကျေလ ၉:၄ နှိုင်းယှဉ်။) သိုးကဲ့သို့သောသူများသည် ဤစာစောင်များပါ သတင်းတရားကို လက်ခံကြပါလိမ့်မည်။ စိတ်ဝင်စားသူများကို ရှာဖွေကြရာတွင် ကျွန်ုပ်တို့၏ဓမ္မအမှုကဏ္ဍအသီးသီးတွင် ဘရိုရှာများကို ကောင်းစွာအသုံးပြုခွင့်ကို ကျွန်ုပ်တို့ရရှိထားကြပြီ။