ကင်းမျှော်စင် နှင့် နိုးလော့ကို ကောင်းစွာအသုံးပြုခြင်း

^၁ ကင်းမျှော်စင်နှင့်နိုးလော့တို့သည် ယနေ့လူတို့ဖတ်ရှုနိုင်သည့် စာပေများတွင် တန်ဖိုးအရှိဆုံး၊ အကျိုးအပေးဆုံးဖြစ်သည်။ အဘယ်ကြောင့်နည်း။ အကြောင်းမူကား၊ ယင်းတို့၌ပါသော ဝိညာဉ်ခွန်အားပေး သမ္မာတရားသည် လူတို့၏အသက်တာအပေါ် ထာဝရအကျိုးပြုနိုင်သောကြောင့်တည်း။ သို့ရာတွင် လူအများသည် မိမိတို့ ဝိညာဉ်ရေး၌ လိုလျက်နေကြောင်း အပြည့်အဝမသိရှိ၊ ယင်းကို မည်သို့ဖြေသိမ့်ရမည်ကိုလည်း မသိကြချေ။ သူတို့၏ဝိညာဏမျက်စိများကိုဖွင့်နိုင်ကြရန် ကူညီပေးခြင်းအားဖြင့် တမန်တော်ပေါလုကို အတုယူရန် အခွင့်အရေး ကျွန်ုပ်တို့၌ရှိပါသည်။​—မ၊ ၅:၃။ တ၊ ၂၆:၁၈။

^၂ အပြုသဘောရှိ၍ ကောင်းစွာပြင်ဆင်။ သမ္မာတရားကို လက်ခံကြမည့် သိုးကဲ့သို့သောသူများ သင့်ရပ်ကွက်တွင် ရှိပေမည်။ မဂ္ဂဇင်းများကိုဖတ်ရှုရန် အချို့သူတို့ကို သာမန်အားပေးမှုမျိုးလိုပေမည်။ ထိုကြောင့် ကင်းမျှော်စင်နှင့်နိုးလော့ကိုဝေငှသည့်အခါ အပြုသဘောပါပါ၊ နားဝင်အောင်ပြောပါ။ မဂ္ဂဇင်းများ အလွယ်တကူရှိစေကာ အခြားစာပေများကိုဝေငှသည့်တိုင် ယင်းတို့ကိုပါ ဝေငှရန် အခွင့်အရေးတိုင်းကို ရယူပါ။

^၃ မဂ္ဂဇင်းများဝေငှရာတွင် အဘယ်အရာက ပိုထိရောက်စေမည်နည်း။ အစအဦးအနေနှင့် ယင်းတို့ကို အမှန်တကယ် ကိုယ်တိုင်တန်ဖိုးထားရမည်။ ကိုယ်ဝေငှသောမဂ္ဂဇင်းများပါ ဆောင်းပါးတို့ကို ရင်းနှီးကျွမ်းကျင်ပြီးသားဖြစ်သင့်သည်။ သို့ဖြင့် ယင်းတို့ကိုဝေငှရာတွင် ပိုင်နိုင်စွာအားတက်သရော ထောက်ခံနိုင်မည်။ ယင်းတို့ကို သင်ဖတ်ရှုသည့်အခါ ဤအချက်ကိုစိတ်စွဲလမ်းပါ။ ဓမ္မအမှုတွင် ပေါ်လွင်စေလိုသောအချက်များကို ရွေးချယ်ရန် နိုးကြားနေပါ။ ကိုယ့်ကိုယ်ကိုမေးပါ။ ‘ဤအကြောင်းသည် အထူးသဖြင့်မည်သူသဘောကျမည်နည်း။ အိမ်ရှင်မ၊ လူငယ်၊ သို့မဟုတ် စီးပွားရေးသမားတစ်ဦး နှစ်သက်မည်လော။ ကျောင်းသား၊ အိမ်ထောင်သည်၊ ပတ်ဝန်းကျင်အတွက်စိုးရိမ်သူ စိတ်ဝင်စားမည်လော။ အမှန်ထိရောက်စေရန် ဤအခန့်သင့်ဆောင်းပါးများကို ကိုယ်တိုင်ဖတ်ပြီး၍ နှစ်သက်ခဲ့ခြင်းကြောင့် ထောက်ခံပေးနိုင်ခြင်းဖြစ်သင့်သည်။

^၄ ယခင်စာစောင်များကို ကောင်းစွာအသုံးပြု။ ကင်းမျှော်စင်နှင့်နိုးလော့တို့၏ရက်စွဲသည့် တစ်လနှစ်လနောက်ကျသည့်တိုင် တန်ဖိုးမလျော့သွားပါ။ ယင်းတို့တွင်ပါသောအကြောင်းများသည် အချိန်ကုန်လွန်သွားသည့်အတွက် အရေးမကြီးတော့သည်မဟုတ်ပါ။ ယခင်စာစောင်များ၏အခြေအနေ ကောင်းနေပါက ဝေငှရန် မတွန့်ဆုတ်သင့်ပါ။ ယခင်မဂ္ဂဇင်းများကိုစုပုံစေ၍ လုံးဝမသုံးဘဲထားခြင်းက ဤအဖိုးတန်လက်နက်များကို တန်ဖိုးမထားကြောင်း တင်ပြပါသည်။ နိုးကြားနေရန်အာနိသင်ရှိပြီး ဝိညာဏခံတွင်းတွေ့စေနိုင်သည့် သမ္မာတရားများ မဂ္ဂဇင်းတိုင်းတွင်ပါသည်။ ထိုကြောင့် ယခင်မဂ္ဂဇင်းများကိုဘေးဖယ်၍ မေ့လျော့ထားမည့်အစား စိတ်ဝင်စားသူတို့၏လက်ထဲအရောက် ဝေငှပေးခြင်းငှာ အထူးကြိုးစားခြင်းသည် ပို၍ကောင်းမည်မဟုတ်လော။

^၅ အစကနဦးတွင် ဝိညာဉ်ရေးစိတ်ထားမရှိသူတို့အား ဝိညာဉ်ရေးတွင် လိုလျက်နေကြောင်း သိလာစေရန် နိုးလော့မဂ္ဂဇင်းကူညီပေးခဲ့သူ များစွာရှိပါသည်။ ကင်းမျှော်စင်သည် ယေဟောဝါလူမျိုးအား ဝိညာဏအစာကျွေးမွေးရေးအစီအစဉ်တွင် အဓိကလက်နက်ဖြစ်ပါသည်။ ဤမဂ္ဂဇင်းများသည် တစ်ခုကိုတစ်ခုသင့်တော်စွာ အကူအညီပေး၍ သတင်းကောင်းဟောပြောပြီးစီးစေခြင်းငှာ အရေးကြီးကဏ္ဍတွင် ပါဝင်ပါသည်။

^၆ မဂ္ဂဇင်းများဝေငှရာတွင် အခွင့်အရေးတိုင်းကိုယူကြစဉ် သိုးကဲ့သို့သောသူများ၏ ဝိညာဉ်ရေးဘက် လိုအပ်ရာများကို ထိရောက်စွာဖြည့်စွက်ပေးနိုင်မည်ဟု စိတ်ချနိုင်ကြပါသည်။ အပြုသဘောအမြဲရှိပြီး ကောင်းစွာပြင်ဆင်လျက် ဓမ္မအမှုတွင် မှန်မှန်ပါဝင်လိုကြပါသည်။ သတင်းကောင်းကြေညာသူများအနေနှင့် ကင်းမျှော်စင်နှင့်နိုးလော့မဂ္ဂဇင်းများကို ကောင်းစွာ မှန်မှန်အသုံးပြုကြမည်။